ود رعوف

08:24 PM Dec, 29 2015

سودانيز اون لاين
Salah Zubeir-UAE
مكتبتى
رابط مختصر

ود رعوف خالنا لزم , زول حاد الطبع و المزاج و اللسان , عندو شوره مع عمه ود أبو عبيل (جدنا). من شرق النيل خالنا قطع البحر لجدنا الساكن غرب النيل.
جدنا ود أبوعبيل زول هادى وبالو طويل و متزوج إتنين و المره التانيه دي مرة أخوه المتوفى لزوم تربية عيال أخوه. ود رعوف وصل مع المغيرب.
طبيعة القريه في الوكت داك مافي حيشان , الديوان معكوس مع غرفة الحريم. فوق عنقريبين مخرته قدام الديوان صنقرو اللتنين بعد ما صلو العشاء
و جابولم الفطير الحار العايسهو حبوبتنا بت الدود مع لبن البقر المحلوب بعد المغرب. طبعن أولاد أمدرمان أكان شافو الجماعه ديل أثناء تناولهم الأكله دي
و الأصوات الصادره منهم اللتنين كان طوالى ألفولم سلم موسيقى جديد. بعد حمد الله وشكره على النعمه الجماعه بقو ناس نوم. مافى شويتين إلا يسمعولك
أصوات ناس راكبلهم حمير وقفو قريب منهم. ود رعوف صنقر و ود أبوعبيل وقف على حيلو مرحب بالجماعه.
ود أبوعبيل:- ا ناس مرحب إتفضلو على البيت.
الخزين (كبير الجماعه):- مشكور ياشيخ عل نحن جايين من بعيد و ديرين توصفلنا بيت ود العقيد.
ود أبوعبيل:- ود العقيد مكانو قريب بهناك للشدره الكبيره ديك لكن إنتو أنزلو إتعشو بعدين أمشو.
الخزين:- مشكور ياشيخنا لكن نحن مستعجلين شويه.
ود أبوعبيل:- ا ناس عليكم الله و عليكم الرسول تنزلو تتعشو.
ود جادين (الرجل القوى في الجماعه):- يازول علي الطلاق ما بننزل نحن مستعجلين و معاكم سلامه.
الجماعه إتحركو لبيت ود العقيد و ود أبوعبيل رجع لعنقريبو لقالك ود رعوف يربط فى عمتو,
ود أبو عبيل:- ود اخوى بتربط فى عمتك ماشي وين.
ود رعوف:- يا زول إت مالك تخسم فى الرجال زى الحريم عليكم الله و عليكم الرسول ما تحلف باطلاق والا خايف حريمك الشينات الجوا ديل يفوتنك , على الطلاق ما أبيت عندك إنشاله أنوم فى قيفت البحر,