تلت التلاته كم

12:41 PM Dec, 27 2015

سودانيز اون لاين
Salah Zubeir-UAE
مكتبتى
رابط مختصر

جاغوم و الجاهوري ناس ميطي ساكت , ما فاقد تربوى لكن فاقدين كل حاجة , لا خلوَة لا مدرسة لا زول يقوليهم دا أعوج والا دا عديل , من عمر سته سنه دقشو الدنيا دى كايسين الرزق.
تشتغل "كرى" فى الديمبويا (حله من نجوع نهر النيل) يعنى من دغشا" بدرى إت مسخر تشتغل كل حاجه:- حلاب لبن , حشاش قش , قراع مويه , سارح مع السعيه ,,, وأجرتك ياها بطنك و كسوتك كل عيد.
جماعتنا ديل زهجو من الواحد شغال "كرى" عمرو كلو و قررو يجَنَدو فى الديش. تم تجنيدهم فى القيادة الشمالية شندى وقضوا ثلاثة شهور مستجدين وتم تخرجهم عساكر وتم إلحاقهم بحامية نجالا فى الغرب.

قائد حامية نجالا العميد الزين ود فحل وبلكمين الحامية المساعد (الصول) الكلس ود المدير الإثنين من نواحى الديمبويا. بعد التعرف عليهم بواسطة ود المدير
تم إلحاق جماعتنا ديل بمنزل القائد للقيام بمهام منزليه مختلفه كنوع من الرعايه كونهم من الديمبويا. شهرين تلاته الجماعه طاب ليهم المقام وفى لحظة تجلى بعد ما صلو عشاهم وإتعشو و راقدين فى عناقريبم قعدو يفكرو فى مستقبلهم :-
جاقوم:- إت اجاهورى ما نقابل جنا فحل دا يرقينا.
الجاهورى:- يرقينا يعنى شنو؟
جاقوم:- ياخى يدونا شريط شريط نبقى وكيل عريف.
الجاهورى:- والشريط دا بزيد الماهيه؟
جاقوم:- أى بلحيل.
الجاهورى:- خلاس باكر من بدرى نتلح جنا المدير يدخلنا على القايد.
جاقوم:- خلاس أرقد عافيه.

باكر بعد طابور الصباح وقفو إنتباه قدام ود المدير وقالو ليهو دايرين نقابل القايد عشان يرقينا
. ود المدير قال ليهم مقابلت القايد بعد الساعه عشره. يا زول بعد عشره يقوم ود المدير يدور
ليك الجماعه بالطريقه العسكريه لغاية ما يوقفهم قدام مكتب القايد.ود المدير:- سعادتك العساكر
ديل طلبوا مقابلت القايد.
ود فحل (القايد):- مرحب جنيات الديمبويا أها شن دايرين؟
جاقوم:- و الله ا سعاتك دايرين نترقى و تدينا كل واحد شريط.
ود فحل مبتسما" و مندهشا":- أفو تستاهلو لكن بدور أسألكم سعال و بديكم يوم كامل عشان تردو.
جاقوم:- حاضر سعاتك
ود فحل:- داير أعرف منكم تلت التلاته كم؟ أمشو وتعالو بكره بالجواب الصاح.
ود المدير إنصراف.ود المدير:- عساكر خلف دور , معتد" مرش. مشو برا و عمليهم إنصراف.
الشى الواضح إنو الإتنين ما عارفين الإجابه شنو بدليل إنو ما إتكلمو مع بعض إلا بعد صلاة العصر,
الجاهورى:- جاقوم إت ود فحل دا جاب السعال دا من وين؟
جاقوم:- يا سيدى الحسن أها إت أكان ماك عارف الجواب الدباره كيف.
الجاهورى:- إت عارف الجواب نلقاهو عند ود خالك الخير ود كنفو قالو فاتحلو دكان فى سوق نجالا.
جاقوم:- خلاس نصلى المغرب فى السوق ونمشى نقابل ود كنفو.
بعد المسالمه و المطايبه ودكنفو جر الكراسى و طلب الشاى و المويه.
جاقوم:- يا زول نحن شغالين فى بيت القايد و نحن بنرجع سريع بس دايرين منك تورينا تلت التلاته كم؟
ود كنفو:- ا ناس الحكايه شنو إتو نحن لحم و دم لازم تزورو البيت وتسلمو على العيال , عل تلت التلاته ما واحد بس.
يا زول الجماعه ودعو ود كنفو وفى الطريق لبيت القايد بدو ينضمو.
الجاهورى:- إت ا جاقوم تلت التلاته واحد بس؟
جاقوم:- ا زول ود كنفو دا نجيض فى الحساب
الجاهورى:- نان واحد دا ماشويه على العميد ود فحل.
جاقوم:- من ناحيت شويه والله شويه.
الجاهورى:- ا زول باكر يحلها الحلال.
ود المدير دور الجماعه لغاية ما وقفهم قدام مكتب القايد.
ودفحل:- جاقوم تلت التلاته كم؟
جاقوم:- سعادتك تلت التلاته إتنين
ودفحل:- الجاهورى تلت التلاته كم؟
الجاهورى:- سعادتك تلت التلاته اتنين ونص.
ودفحل:- ود المدير دور العسكر ديل و دخلن السجن كل واحد سبعه يوم.

دى حكايه سمعتها بى هناك وو حبيت أنقلها هنا لطرافتها , ما في واحد يجى يقول لى النص دا و الأدوات دى , أنا لا أديب لا بحب الأدب. تضحكو بس.

واللة فيها عبرة لكن اظن بدل ودكنفو مفروض الكلام حق القايد في الاسطر الاخيرة ..

يا صلاح عندنا جداً لينا إسمو ( ود كرا )الله يرحمه
دا كان عندو ولد شاطرين نااار بث وبجي الأول والتاني
كان بجلدو ويقول له الله يخربك يا الباطل الناس
تجيب اربعين وخمسين انت تجيب واحد واتنين
(خاصية الوجه الضاحك متعطله عندي)
:
:
:
:
:
:
:
:
مع التحيات لله الزاكيات