مسادير يا أهل المسادير 4.................................

صفقن فَرَدَتِنْ دارت الرقيص جنحاتا
وزه وبت جزر خشب القلوب نحاتا
شدر العقول مهما كبر حتاتا
يات من قال كبيرسايقنو ماش التاتا



منصور

سمحات فى المساير ماها جِنْ بى تِفّه
وعسلاً للكلام بتعصرو من الشِفْْه
الزوله المكبرته فيها كيف نتدفّى
من برد البرارى اللا كِمِلْ لا خفّ

منصور

Quote: صفقن فَرَدَتِنْ دارت الرقيص جنحاتا وزه وبت جزر خشب القلوب نحاتا شدر العقول مهما كبر حتاتا يات من قال كبيرسايقنو ماش التاتا

مفدوع القوام الشتت لحاظنا وجاطا
بي ديسو المجدع ال فتّر المشاطا
شبّك قلوبنا ولي عروقن شدّ رباطا
لخبط فهمنا ولي ارواحنا زاد إحباطا

إسماعيل حميم


مرفق:
سلام منصور أخوي
أتشرف بأن تكون عودتي بعد عجاف السنين في هذه الدار

تقديري

رضوان بستحق منك جميل النمّا
تبان للمقصره ساخى دايما تمّا
جبار للكسور جمع القرايب لمْا
وزى خالو الحسن بى أولاد سكينه إهتما

منصور
23 mins · Like

الزول إن وقع من فوق مصيرو الواطه
ومافيش زول بسندو ولا بتفكو حواطه
القرمت دابا قامت وديسها فوقو بتاطا
هبرت كل شراكنا ومنهن نطاطا


شكرا وألف سلام يا حميم
منصور

يا سلام يا المفتاح

والله المسادير متعة .. لكن يا أخوى أشرح لينا المعانى ..

أعمل خط تحت المقطع .. وجيب لينا المفردات

-----------------------------
مثلاً:
الديسا:
القرمت:
هبرت:

بريمة

الديس الفاحم المتعثكل كجريد النخل فوق سبيطها من المشرق

والقرمت هى العبور أو العناق التى لم تعد تتغذى بالرضاعه وكذا البكره ويقال لها بنت لبون أى لم تفطم بعد.

وهبر الشرك أى أن الشراك لا تصيدها ولا تأتى لمكانها

ويقول الشاعر

مى حاجاجه مى لاجاجه
فوق شرك التهم هباره مى ولاجه
فرع الخيدران أم طلعةً وجاجه
دى أم بيتاً خريف للجاره والمحتاجه
شن برضيها غير ألبل جدية الباجه
ما برضيها غير ألبل جدية الباجه

والمعنى واضح يا بريمه وعظيم الإمتنان والشكر لك والسلام


منصور

أخوي منصور

قبل عام من اليوم كان يكتب أستاذنا القدال " مرباع اليوم " في صفحة (الفيس بوك)
و كنت أرد عليه "مجتهداً" في صفحة (الوآتساب) الخاصة.
وأورده هنا لإثارة قريحتكم حتى يدفق الحرف ندى ..
ليُطرب أزهارنا صباحاً . .. . فهل لها بالرقص على انغامه . ؟

نفير القدال .. .. مرباع اليوم

المغسه الجزيرة وزراعا وعمالا
فارده جناحها للريد الطويل فتاله
وين طيب هواها وخدرتا الكتاله
اضحت منهبات للعالم الرمتاله
-----
الجزيرة اهلها جنياتا شيوخها والترباله
بي كترت الفساد والهملا صبحو كساله
قبل في الحصاد تلقى الجموع منهاله
واليوم شبابا في الخليج والفيزا عماله

إسماعيل حميم


.

نحل الجوافه الفوقا طارن ودنن
ونقرن للرحيق زى الشتامه وغنن
من عجب الكريم عسلن أصيل ومغنن
وزى لبن النعاج فوق شاى خليط ومقنن




منصور

مى المطفوقه لافحه التوب وزواعه
ومى الشهفانه لحم العضمه مزاعه
فيها جنس جمال يا يحى فزاعه
وجديه وبت جدي لى روحنا نزاعه


أبشر يا يحى أنا أخو الجزولى ودالحسن


منصور

ميلاد النجوم ليك فى الكتف تترصّعْ
وشايلاك النجايب فى الدروب تتمصّعْ
زايداك فى الرتب حاقاها ما بتصنّع
وحقك يوت علينا اللى فرحنا بتصنع

منصور

طايرات في العساين والزراري وركن
تحت الشمله بى بوخ العطور أتمكن
لون التبري يا منصور جسيمه مركن
قدر ما قت اتوب تلقاني فيها مجكن

الباشمهندس عبدالله الأسد

أنا آخ من هبيلة الشاف وكِتْ تتمكّن
ومن الفوقا قعدن ولى ورقهِنْ شكّن
زى بهم الأرايل لى أزاى بِتَكّن
وعارفات ورقى قافل غفلنى ودَكّنْ


منصور

فوق نيران غرام هابلاها يوت بِتوّطّا
وماسك دربو جاك ما زاغ خِطاهو ونَطّا
فوقهن تب قَدلْ ما خاف خِتاهنْ فَطّا
و قبلان بالحريق فرحان بدورا الورطّه


منصور

البلد القدل فوقو الصبر والبو
وما نبحن كلابو ولا سمعنا قالن هو
مليان بالحروب مدفع كتالك دو
وفاير بالمناحات والسكاليب رو



منصور

سمحه الفى البنات زى المهر نتاله
سمحه الجيدها نابت كان مشت تلاله
سمحه الفى الورود الصيد تقيف ترتاله
سمحه الفى الحشا واقداها نار ملاله

منصور

سمحات كلكن كدب البقول هن لالا
وسمحات يا العيون متل الكلاش كتالا
ملكات الطباع مافيش بشر بعلالا
يا ترب الغزال من الضباع فلالا


منصور

لتيبات النقد القندلن يادوبهن
حارسن العفاف سابل عليهن توبهن
جافاني الغميد عيني دموعهن فوقهن
ميت من بعادهن ومن جمالهن وزوقهن

يحى الطيب محمد الإمام

لتيبات النقد الداب فريكهن حَمَسْ
بكريهن بدور قرياف عليهن خَمَسْ
مترار خلقهن فات الحرير في الملمس
ديل يا يحى سوّنْ فينا شغل المس

منصور

الظابط المهندم والدبابير فوقو
وجمبو دباس سلم شافوهو غنو وقوقو
دوّره وقفتو ووجه جحيم بازوقو
وين البحملن جبخانو واللا يدوقو

منصور

عينو متل صقر المحاصات نشّنْ
وشاف الغير صغار متل السواسيو دشّن
جياب السليب اللى القبايل فشّنْ
ودمع الحُرْقه فوق خد أم ضفاير قشّنْ
منصور

المنصور التحايا والأشواق لك ولصحبك الكرام
كلام رائع يعيدنا أيام أن كانت القرية قرية قبل أن يدخلها النور والموتور والفأر الإلكتروني والمعروف في بلادنا بالركشه. يتنافس المتنافسون في قرانا على أنواع الموبايلات وأنشغلوا ببرامج التواصل الإجتماعي وزحفت مباني الأسمنت المسلح بكل ما أزجته الحضارة من مضار للبيئة ولم تترك للقطية والقطيع والدانقة والحور والحوش شبرا في أرض تحسب أنها تطوي من أطرافها يوماً بعد يوم فلم يعد هناك شجر عشر ولا سيال ولا طنضدب ولا حراز أجدبت الأرض أو جرفت بفعل فاعل وحتى العشرق الزجل والمعروف في أمصارنا بالسنمكه لم يعدل له وجود.
إستبدلنا أم رقيقة بالفول وموية الفول والكسرة والقراصة بالرغيف وحتى العراقي والسروال الفي الرمال يلحس تنازل مكرها لسراويل الجينز من نوع low west فأصبح جل شباب القرية داقي سيستم.
آسف لهذه المقدمة الطويلة لكنه الدوبيت من يعيدني دائماً إلى حيث البطان والعرضه والدلوكه والعتمور والسيكن الفي الضراع والعكاز الأعمى وأطرش والسدرة الظليلة والجروف والحسان وهن يردن الماء من البير والحفير. عجبتني هذه الأبيات من الدوبيت وهي من مضارب البادية ولا أعلم قائلها:
جديتاً سارحه فى زوقها وجمالهـا فريده
كل ما مرّ طيفها أفكارى تبقى شريده
ليش جافيانى ؟ وأصلى الحكمه مانى طريده
وده السبب المخلى كبدتى راقده هريده

العزيز المله عمر أعدت إلى الذاكره طبيعة حياة المجتمع الذى تمت فيه
التنشئه عندما كانت الكبور كإرمه ذات العماد وكانت تضج بالأنعام البريه
فالزباد كما الَنمِر تحت العلق المتعثكل فوق الطندب وللورل مُقراَ فى ساس
الزريبه والبو يعوى فى الدهسير والأرنب والفرة تقفز من تحت أرجل
الدابه حتى يكاد القلب أن يقفذ من صدر راكبها أما عن الصبر فحدث
ولا حرج والقمرى والدباس والبلوم وأم دلدلو والقرض يثقل غصون السنط
فتتدلى روبة حول الساق والبرم تحمرّ به الأرض وكذا الخريم والنبق يخرج
الناس من السنه والحمبك كريزا يتلون أحمراَ فاقعاً وأصفراَ ومائلاً للبنفسجيه
لا بل يتلون بأكثر من لونين والقطا يرد غِبّاً فى المشارع والباجبار والوز
والنعيج وأبو مركوب جميعها فى حضرة من يهوى والجروف صخابةٌ
بالبطيخ والشمام والتبش وتحت العدسى البنضوره العسليه والبلى والكركدى
يدّن نحله فى التقانت والقنجر يكاد قصبه يقع من ما يحمل والكبكبيق فى سهله
بزهره الأصفر اليانع وعلى الحاحيات صغارٌ يجدعون الطير بمجداعات برمها
الآباء بمهاره والدعول يرتفع خواره فى الزرائب والضان
والغنم ضاقت ذرعاً بضرعها حتى ترضع صغارها ومن ثم يتم حليبها
ليتراوح الناس للفرقان ويجتمعون لشاى المغرب باللبن الصافى والكفتيره
كلما صُب منها إمتلأت كتلك العنزه التى بارك ضرعها سيد الخلق
وأشبعت أهل بيتها ومن معه وفى الطلاقات تنطلق أسارير الناس
ويبنون السيجه ولطاب والضاله وصفرجت تلك الألعاب الشيقه
تحت الكشاشات وفى الرواكيب حيث الأزيار المكواريه والدجاج
يكاكى ويلهث تحت التيبار والعصيدة تستوى فى الطاجن وتسنسن
والحاضر يتناول ما شاء منها بلبن أو ملاح لبن أو بورق أو بالبنضوره
ويا حلاتها بالبنضوره والبيوت خُف وكشاشه وقطيه وراكوبه بها المشلعيب
واللدايات والطاجن والتيبار أو مربعه وقطيع وهولاء أهل الفنجره والطاقه
شباكها عودين بالخلاف تسد بقطعه قديمةٍ فى الشتاء وكانت للحياة معنى
وللحياء وجوداً وللصدق حضوراَ وللمحبة سوقاً عامراَ وكانت الحميمية فى
سقف فوق كل السقوف فيا عزيزنا عمر يا حليل زمان.

لك الشكر والسلام

منصور

أوعاك من ظُلم بِحرِق عقيدتك ودِينكْ
وفى الحال بتعبك يوم القيامه بدينك
اللقا والفقر ماهن صنايع إيدنك
وما تغفل تطيش أحسن تفتح عينك

منصور

الليله العيون السوده والجمال حاويها
زعجت قلبي شغلت فكري عينيا المنام مابيها
الخلاني مالومك ياروحي المعلقه بيها
حتي الفقراء شوف عيني في الصوره ماسكين فيها

وقت الفقره قامو الليل دا بالإخلاص
البلاء والمحل حتماَ بفوتو خلاص
كلام المله دايما للأمر لخاص
وقلّب للكلام لكنو داس إخلاص

منصور

أبوك صِنْديدْ رَفيق أَنْدَادُو يـَومْ الدَيَّه
ونارِكْ دِيمَه في قلوب المُحِبين حيَّه
الخلاني دون النــاسْ مَنَامي شويَّه
يا الـقـدَّاله فيكي مـَحَكَّمَـه القـادريَّه