وظائف برمجة شاغرة فى أمريكا .. Job Opportunities with Renowed IT Company

00:38 AM Dec, 23 2015 سودانيز اون لاين
بريمة محمد-الولايات المتحدة، ولاية فرجينيا
مكتبتى
رابط مختصرالأخوة السودانيين والقراء الكرام .. شركتنا التى أخدم بها كسبت عطاء ومحتاجين ل 15 مبرمج بصورة عاجلة ..

الوظائف كلها فى منطقة العاصمة واشنطن دي سي .. Washington DC

هنا أيميل مدير الشركة .. رجاءً ذكر أسمي له: Bir Adam

Mr. Venkatesh Jangalapali
venkatesh @ iconsoft.us

مع تمنياتى لكم بالتوفيق ..

بريمة

سلام بريمة

بيكون أفضل لو ختيت ليهم ال
Job requirements so they can tailor their resumes accordingly

و بالتوفيق للمتقدمين مقدماً.

تحياتي...

أسم الشركة Iconsoft US

وكل الوظائف تعاقدات حكومية ..

لو أي إنسان لديه إستفسار .. رجاءً لا تتردد فى السؤال ..

بريمة

شكراً فردوس،

Quote: سلام بريمة بيكون أفضل لو ختيت ليهم ال Job requirements so they can tailor their resumes accordingly و بالتوفيق للمتقدمين مقدماً. تحياتي...

طلبت المواصفات الوظيفية Requirements .. ومتى ما يصلنى أي شيئ سوف أرفقه هنا ..


بريمة

ما قصرتا يا بريمة،
الواحد وين ووين لما يلقى ليهو سوداني بيحاول يساعد أولاد بلدو بصدق

لأنها وظائف حكومية، هل مطلوب سيكوريتى كليرانس؟

بعدين الإيميل protected موقع بكرى لا يظهره.. خليه مشتت زى دا

abcd @ xyz .com

الواحد يعتبر نفسه موظف معاكم واللا مع الحكومة؟

بعدين نوع البرامج مهم عشان نعرف نقدم ام لا

Java Android SQLite VB

خبرتى ما تمرق من الأربعة الفوق ديل. كو

الباشمهندس أبو الريش
سلامات ..

الوظائف كلها بلغة Java ... وال Database هى Oracle .. وأشياء أخري ..

أيميل مدير الشركة venkatesh @ iconsoft.us

وهنا الأيميل بتاعى أنا ..
bir.adam @ hotmail .com

أنت وأنا شغالين فى الشركة المعنية والشركة شغالة للحكومة .. ومسمانا الوظيفي لدي الحكومة Consultants or contractors

مثلاً شخصي، المسمي الوظيفي الذي أحمله لدي الحكومة Principal Software Consultant
والمسمي الوظيفي لدي الشركة Senior Software Engineer

بخصوص العطل الحكومية الرسمية السنوية .. كلها مدفوعة من قبل الشركة التى نخدم بها .. بخصوص التأمين أيضاً مدفوع من قبل الشركة التى نخدم فيها بنسبة 80% .. مثلاً يوم 24 ديسمبر القادم، الرئيس أوباما أعطي الموظفين نصف يوم إجازة .. أنا ح أمشي أشتغل 4 ساعات فقط وبجئ البيت وأجرنا مدفوع 8 ساعات .. الغرض من أن الحكومة تعمل Delegation للشغل بهذه الطريقة هي رفع المنافسة بين الشركات .. أضف أن الحكومة لا ترغب أن تتورط فى فوائد ما بعد الخدمة .. فوائدنا تأتى من السوشال سيكورتى وليس معاش من الحكومة بصورة مباشرة.

بخصوص .. السكيورتى كليرنس .. محتاجين حاجة أسمها Public Trust .. ودا معناها بيعملوا ليك Background check لمدة 7 سنوات .. وما مهم تكون كل السنوات في أمريكا ممكن تكون أنت شغال فى الخليج لكن المهم أنهم يتأكدوا من أمكنة تواجدك .. الوظايف ال 15 كلها واقعة فى وزارة التربية الفدرالية .. وهى برمجيات تخص توزيع ومراقبة ومتابعة المصادر المالية الحكومية إلي الطلاب فى الجامعات والمعاهد العليا .. وهى وظائف ممتازة .. تشتغل 8 ساعات فقط .. وتقفل كمبيوترك وتمش البيت .. وتجئ حسب ما يوافقك طريقتك 6 صباحاً أو 7 .. أو 8 أو 9 أو 10 صباحاً .. المهم الروتين بتاعك يكون معروف.

بريمة

شكرا يا باشمهندس، وشغل الكنتراكتور اشتغلته قبل كدا مع IBM من 1998 حتى 1999 في مركزهم في ويست بالم بيتش، فلوريدا.
شركة التوظيف في اورلاندو عيننونى بـ 35 دولار في الساعـة، لكن باعونى لأى بى أم ب 60 دولار في الساعة، والشيك الاسبوعى كان
يجينى من شركة التوظيف وليس من اى بى ام.. ساعات الشغل مرنة بصورة عجيبة.. تجى في أي وقت، بس تشخت الكرت بتاعك وتخش
حتى لو مافى زول في المبنى وعداد الساعات يشتغل.
ناس اى بى ام كرهونا التكنولوجيا زاتا.. تشخت الكرت في المكتب في فلوريدا، والباب يفتحوه ناس السيكيوريتى في أتلانتا، جورجيا.. وزملائى
في التيم QA واحد في النمسا والتانى في استراليا.. مطور البرامج يرفع ال build بتاعو لسيرفر في تكساس وانا انزله من هناك عشان اشتغل عليه
وأنا والمطور الكيوبكل بتاعنا جمب بعض، وننزل للكافتيريا للغدا مع بعض، يعنى كان ممكن يدينى الفايل بفوق البارتشن.

الباشمهندس أبو الريش
يا أخى أنت زول واصل ..

هناك وظائف أكثر دخلاً لكن المعاينات فيها صعبة .. ومدة أنتظارها أطول ..
ومحتاجين فيها الأنسان يكون ملم إلمام دقيق بالأتى:
EJB
JSP
JMS
D3.js

بالأضافة إلي Struts2 أو Spring framework ..

الحاجات دي لو عندك .. أرسل لي الرزمي بتاعتك فى أسرع وقت وأنا بجيب ليك الخبر الأسبوع الجاي إن شاء الله.

بالله يا أبو الريش أي سودانى فى أمريكا يأنس فى نفسه الكفاءة أدفروه خليوه يقدم، نساعدوا بعضنا. أنا والله لا عندي فيها قرش لا تعريفه .. لكن عايز أي سودانى يلقي وظيفه مريحة.

بخصوص الأجور تتفاوت .. حسب الخبرة .. لكن من ناحية الحكومة تدفع للشركة قروش خيالية قصاد كل مبرمج .. ما تبيعوا أنفسكم لهم رخيصين .. أمسك أعلي ما يمكنك .. وأعمل بحث عن خبرتك ومقابلها فى واشنطن .. الواحد يجئ عارف هو عايز كم، لكن ما تخرج نفسك من المنافسة .. لو جيتونا ساكت نحن بنقيمكم بإدني حد .. وتأخذ الشركة فيكم أعلي شيئ من الحكومة. لو الواحد فيكم قيم نفسه عالي شديد بنهمل الرزمي بتاعته .. المسألة محتاجة قعدة وبحث ..

بعدين ما تتوصوا علي اللبس Professional Dress .. و ال Posture بتاعت إنسان واثق من نفسه ..

المسألة تحتاج لوجاهات فى البداية .. مرة سودانى جاء معاينة بقميص كاروهات وبنطلون جينز وشبط (صندل) طردوه من الباب (قالوا شخص مستهتر). لكن بعد ما يتم التوظيف .. بعد داك الزي كاشوال.

بريمة

.



الوظائف دي للسودانيين الأمريكان والمقيمين فيها؟ ولا مفتوحة لكل السودانيين؟


.

الأخ سيف اليزل،
سلامات ..

كل سودانى يحمل أورقات ثبوتية أمريكية .. إذن عمل .. + قرين كارد أو جواز أو حتى TPS .. سواء مقيم فى أمريكا أو خارجها ..


بريمة

شكرا يا بريمة ومع الأسف ليست لى مهارات في الأدوات التي ذكرتها.. ورغم ذلك اسأل عن البروجكت هو شنو؟

المسمى الوظيفى بتاعى في اى بى ام كان QA Engineer والمشروع شرحوه لى قبل المعاينة وكنت ضمن فريق IBM ViaVoice SDK
لتطوير مكتبات للمطورين.. DLLs, AciveX ...etc منها تطوير ال dictation engine و TTS ActiveX control الخ

معرفة المشروع تساعد على مقارنة المهارات المطلوبة بما املك~.

الباشمهندس أبو الريش
أنا ما عارف مواصفات ال 15 وظيفة حتى هذه اللحظة .. لكنى أعرف إنها 15 وظيفة فاتحة هذه اللحظة لم يتم تعيين أحد فيها حتى هذه اللحظة ..

رسل الرزمي بتاعت .. وأي بروجك جديد يشمل ح يشمل كل التخصصات .. من الأدارة، QA و SE، Testing و DBA و Testing

رسل سيرتك الذاتية .. وربنا يهون ..

بخصوص التخصصات التالية:

EJB: Java Enterprise Bean v3.2 or up
JSP: Java Server Pages
JMS: Java Messaging
Java Servlets
D3.js: JavaScript Data Visualization

بالأضافة إلي Struts2 أو Spring framework .

الوظائف دي مستمرة فى هذا المجال .. وكل هذه البرمجيات متوفرة فى النت ..
هنا وصلة ممتازة لل Beginners
Turtorialspoint .com

الواحد لازم يقعد لها تحت .. حتى يستطيع أن يمرقها.

بريمة

سلام بريمه



معاك في VA ومحتاج لي تلفونك وتكون مشكور وايملي في الخاص




Mohamed Osman

الأخ محمد،
سلامات ..

Quote: معاك في VA ومحتاج لي تلفونك وتكون مشكور وايملي في الخاص

وصلت تب .. راجع الأيميل بتاعك .. ضروري.


بريمة