صاحبنا منصور المفتاح، نعلّك طيّب . الله يكضب الشيّنة يا صاحب ...

02:38 AM Dec, 19 2015

سودانيز اون لاين
معاوية المدير-بكندا محافظة البرتا
مكتبتى
رابط مختصر

الأخ الحبيب منصور المفتاح .
سلآمات يا زول .

إفتقدناك كثيراً يوم الأحد الماضي في حلقة تلآوة القرآن بالنادي السوداني، عاينت لكبايتك المانعة ؤُ قلت،
هلآ، هلآ الليلة الكباية دي مريوقة بالحيل للشاي اللخدر . إفتقدناك بيننا لكن صوتك كان حضور في مسامعنا
وانت تتلو آيات الذكر الحكيم، إفتقدنا دعائك بعد الختمة والذي ينزل السكينة علي نفوسنا، إفتقدناك بيننا ونحن
نتسامر بعد إنتهاء الحلقة لكن ضحكتك المألوفة كانت تطوف حوالينا وونستك الجميلة تدغدغ مسامعنا .
قلت بيني ؤُ بين نفسي، اخوي المنصور دا ما بيغيبو من حلقة التلآوة إلا الشديد القوي، الزول دا إن شاء
الله يبقى لِبابة ؟ . رفعت التلفون وإتصلت عليك لاكنك ما رديت . قلت، منصور دا بيكون مشغول، لكن
هسّع بيتصل راجع . فضلت منتظر ردك لكنك ما إتصلت !. عاودت الإتصال عدة مرات وكان صوتك يجيني
عبر جهاز التسجيل، لكنك عارفني ما بحب اترك رسالة، لكن وكت المسألة كِترت تركتلك رسالة وبعدها
حتي صوت جهاز التسجيل إختفى !؟.
عادةً يا منصور الصباح قبل امشي الشغل بتصفّح سودانيزاون لآين علي السريع، اليوم الصباح لفت نظري
بوست اخونا المسلمي عن الأخت تراجي إنها وصلت الخرتوم، فتحت البوست والحقيقة لفت نظري وآحد
يشبهك شبه شديد جداً، قلت، سبحان الله الزول دا يشبه منصور المفتاح، بعد دآك ما اشتغلت بالموضوع
ؤُ مرقت مشيت الشغل . بالليل نزل جليّد يا منصور وانا مارق لقيت الشوارع زي الزفت والوآطة باردة.
بختك مرقت منها . المهم يا زول كان يوم قاسي جداً، وانا راجع علي البيت الشوارع كانت زحمة لا يعلمها
إلا الله نسبةً للظلط المغطى بالجليد، اها وانا زآحف مع الزاحفين تلفوني ضرب، رفعت السماعة ردّ علي
وآحد من اصحابنا، قال لي، صُح منصور المفتاح مشى السودان مع تراجي، ؤُ تراجي دي مِنو ؟. طوالي
طق إتذكرت الصورة الشفتها الصباح !، قلت، سبحان الله ! الله يكضب الشيّنة .
دا كلآم يا منصور، يا اخي حتّ مع السلآمة ما تقولآ لينا ؟. طيّب يا اخي كان علي الأقل تكلمنا عشان
نسويلك حفلة وداع في النادي، وحات الله كان غنيتلك غُنا يعجبك جد، رغم إنو الجماعة ما معترفين
بإمكانياتي الفنيّة، لكن صدقني في وداعك كنت حا أبدع . بعدينك ياخ كان تقول عوّك عشان نجي نوديك
المطار .
علي العموم يا زول حصل خير، بس انا كنت بدور اشيّلك جواب لعموم اللهل، كنت بدور اشيّلك جواب
لأصحاب حميّد، لشفع القطر الحيارى البِفنو الشايلآ إيدُن ؤُ يجرو كابسين القُطارا . كنت بدور اوصيك
تسلم لي علي الأُمهات والأباء الفقدو فلزات اكبادهم في ذلك اليوم المشئوم برصاص الغدر والخيانة .
علي العموم حصل خير . الناس قالو، المنصور دا بيبقى بايتلو فوق راي . قتلهم اخونا عبد القادر محمد
سعيد قاعد يقول، رايك اكان ما عيشك بيرضيك، دحين يا المنصور اخوي رايك هو محور كلآمنا
ومحل نقدنا لآمن تقولو لينا، وتبقى عشرة السنين علي حالها لن ولم تشيبها شائبة .
فاتت علينا اكتر من عشرين سنة في الغربة يا منصور اخوي، ؤُ حتي العِمير ما فضل فيهو شيتاً كتير
لكن اتاريهو ود ابنادم دا عايش علي شفاء حفرة، نسعل الله السلآمة .
عارف، مشيت بحلقت عويناتي ؤُ فنقلتهن في الصورة ؤُ قلت، الزول دا تب ما المنصور صاحبي،
هههههههههههه، عارف يا منصور بِقت علي حكاية الضبعة يقطعو فيها ؤُ تقول، إن شاء الله حِلِم .

يا زول ارقد عافية ؤُ سلّم علي صاحبك محمد المكي زول الغابة والصحراء .

اخوك معاوية المدير
كالقري 18 ديسمبر 15 ...

<

يا مُدير، يا أخي، الكتابة دي جميلة جدا

مكتوبك وصل وما به علم ويحفظ للتعليق والافاده

ود المدير كن بخير يا صديق

تراجي دي ذاتها دايرين نوصيها علي حبة دكوة و حبيبات اللات شمار يا مدير

ياود المدير سلام ياليتنا كلنا نكتب ماكتبته من جميل القول وتوجيه اللوم بأدب واحترام
يحفظ الود والمكانة التي تجمعك مع اخي وصديقي المفتاح ، كتبت وطوعت القلم ان
يكتب الجميل ومن رأي هنا ماكتبته انت في هذا البوست يستحق ان يطلق عليه
اجمل بوست. في 2015 ويستحق اجمل الألقاب دمت بخير وصحة جيدة وعافية

👍👍👍👍👍👍👍👍👍

يا ود المدير سلامات ياخ
ود المفتاح جيته للحوار ليست غريبة لمن يقرأ له, فلم يلعنهم يوما او يصفهم بالقتلة و الفاسدين و يرفق صور من يحاورهم اليوم كما فعل قريمان لغاية اول امس القريبة دي :)

Quote: إفتقدناك كثيراً يوم الأحد الماضي في حلقة تلآوة القرآن بالنادي السوداني، عاينت لكبايتك المانعة ؤُ قلت، هلآ، هلآ الليلة الكباية دي مريوقة بالحيل للشاي اللخدر . إفتقدناك بيننا لكن صوتك كان حضور في مسامعنا وانت تتلو آيات الذكر الحكيم، إفتقدنا دعائك بعد الختمة والذي ينزل السكينة علي نفوسنا، إفتقدناك بيننا ونحن نتسامر بعد إنتهاء الحلقة لكن ضحكتك المألوفة كانت تطوف حوالينا وونستك الجميلة تدغدغ مسامعنا .

معاوية المدير.

قلت لي الكوز ده كان بيتلو معاكم القرأن ويشرب الشاي والقهوة معاكم ! أها فيها لقيمات ولا شاي وقهوة ساكت؟

هذا هي أخلاق وأساليب الكيزان الخادعة، أنهم دائما يخدعون الناس بمثل هذه الأساليب.

الترابي عندما تم أعتقاله في كوبر في خدعةيمشي لكوبر والبشير للقصر، كان الترابي يتجسس على القيادات السياسية في المعتقل.
وفي أول يوم له في المعتقل تقدم الترابي لأمامة الصلاة، ولكن الحاج نقد الله الزول العاقل والبعرف الكيزان تماما ، قال الترابي ما ح يصلي بينا أبدا.

أها أنتو يا معاوية المدير بقت عليكم قصة سجناء كوبر الذي حاول الترابي خداعهم، بس أنت مشت فيكم قصة التلاوة دي .

تعيشوا وتاكلوا غيرها، ده طبعا ثمن التعايش الأجتماعي مع الأخوان المسلمين في الخارج يا مهاجرين ويا لاجئين!

وأنا هنا أتسأل !!

إذا أنتو أصلا ما عندكم مشكلة أن تتعايشوا مع الكيزان والعنصريين من أمثال منصور مفتاح، سبب هجرتكم من السودان أصلا شنوا ؟؟

اذا هو كوز يا دينق و اسي جا للحوار بتاع الكيزان يبقى وين الخدعه هنا؟
شوفوا لينا موضوع قريمان :)

والله العظيم اول ما قرأت مداخلة دينق كنت عايز اسأل نفس السؤال؟؟؟ بالله يا دينق أفتنيا في سؤال محمد البشري

غايتو غلبني كلو كلو

دينق عينك في شنو كده وتشرب في الشاي

وقالو من الزعل اتشهدت هؤلاء المغرضين

تحياتي وسلامات عزيزنا ود المدير

إن صحت الرواية بأن الصديق العزيز منصور المفتاح قد ذهب للخرطوم مشاركاً في الحوار ضمن وفد الأخت تراجي مصطفى
فذاك يعني عندي أن الأخت تراجي سوف تقول كلاماً موزوناً
فمنصور الذي أعرفه من كتاباته رجل جاد وصادق وأمين مع نفسه
سواء إتفقنا أم إختلفنا مع توجهاته فله رؤى متماسكة

Quote: فمنصور الذي أعرفه من كتاباته رجل جاد وصادق وأمين مع نفسه سواء إتفقنا أم إختلفنا مع توجهاته فله رؤى متماسكة

يا لك من منافق !

Quote: يا مُدير، يا أخي، الكتابة دي جميلة جدا

كتّر خيرك يا مستنير،
وهذا يعني ان واقعنا جميل ...

Quote: مكتوبك وصل وما به علم ويحفظ للتعليق والافاده ود المدير كن بخير يا صديق

قريبتي إخلاص،
نعلّك طيبة ؟.

حباب رايك السديد ...

Quote: تراجي دي ذاتها دايرين نوصيها علي حبة دكوة و حبيبات اللات شمار يا مدير

ؤُ تكشح فوقو نبقات من نبق سدراتنا
في بدل التسالي
وكان بالقِل شخاليب دوم
ؤُ هِني والله ني ؤُ مسيخ ؤُ غالي ...

Quote: ياود المدير سلام ياليتنا كلنا نكتب ماكتبته من جميل القول وتوجيه اللوم بأدب واحترام يحفظ الود والمكانة التي تجمعك مع اخي وصديقي المفتاح ، كتبت وطوعت القلم ان يكتب الجميل ومن رأي هنا ماكتبته انت في هذا البوست يستحق ان يطلق عليه اجمل بوست. في 2015 ويستحق اجمل الألقاب دمت بخير وصحة جيدة وعافية

الله يعافيك أخي محمد المسلمي .
ما بيني والمنصور عُشرة سنين مأصلة العُرى وهذا ما دفعني لأكتب له، والملآمة
بيني وبينه نوع من المودة والمحبة .
اشكرك علي الإطراء يا صديق ...

Quote: يا ود المدير سلامات ياخ ود المفتاح جيته للحوار ليست غريبة لمن يقرأ له, فلم يلعنهم يوما او يصفهم بالقتلة و الفاسدين و يرفق صور من يحاورهم اليوم كما فعل قريمان لغاية اول امس القريبة دي :)

سلآمات يا صديق .

قِريمان بيكون قرمان، حسب ظني الذي بعضه إثم ...

Quote: معاوية المدير. قلت لي الكوز ده كان بيتلو معاكم القرأن ويشرب الشاي والقهوة معاكم ! أها فيها لقيمات ولا شاي وقهوة ساكت؟ هذا هي أخلاق وأساليب الكيزان الخادعة، أنهم دائما يخدعون الناس بمثل هذه الأساليب. الترابي عندما تم أعتقاله في كوبر في خدعةيمشي لكوبر والبشير للقصر، كان الترابي يتجسس على القيادات السياسية في المعتقل. وفي أول يوم له في المعتقل تقدم الترابي لأمامة الصلاة، ولكن الحاج نقد الله الزول العاقل والبعرف الكيزان تماما ، قال الترابي ما ح يصلي بينا أبدا. أها أنتو يا معاوية المدير بقت عليكم قصة سجناء كوبر الذي حاول الترابي خداعهم، بس أنت مشت فيكم قصة التلاوة دي . تعيشوا وتاكلوا غيرها، ده طبعا ثمن التعايش الأجتماعي مع الأخوان المسلمين في الخارج يا مهاجرين ويا لاجئين! وأنا هنا أتسأل !! إذا أنتو أصلا ما عندكم مشكلة أن تتعايشوا مع الكيزان والعنصريين من أمثال منصور مفتاح، سبب هجرتكم من السودان أصلا شنوا ؟؟

سلآمات يا دينق .
في لقيمات ؤُ كمان عشا مرات تصدق .
يا سيدي كيزان ميّن واخوان مسلمين ميّن العايزني الغي عُشرة سنين، ومعرفة إمتدت لأكثر من عشرين سنة
واصدقا منّك بمداخلة وآحدة ؟. دا رايك في منصور اما معرفتي به لا تجعلني القي بال لرايك حتي لو كنت
متأكد منه اكثر من وجودك .
غايتو انا مرقت من السودان إتفسّح ...

Quote: تحياتي وسلامات عزيزنا ود المدير إن صحت الرواية بأن الصديق العزيز منصور المفتاح قد ذهب للخرطوم مشاركاً في الحوار ضمن وفد الأخت تراجي مصطفى فذاك يعني عندي أن الأخت تراجي سوف تقول كلاماً موزوناً فمنصور الذي أعرفه من كتاباته رجل جاد وصادق وأمين مع نفسه سواء إتفقنا أم إختلفنا مع توجهاته فله رؤى متماسكة

الأخ الحبيب عاطف،
سلآمات .
أأمّن علي رايك في منصور الذي استشفيته من كتاباته من منطلق صحبتي للأخ منصور علي مدى
اكثر من عشرين عام، ولا أعلم إن كان ضمن وفد تراجي ام لا ...

Quote: عُشرة سنين، ومعرفة إمتدت لأكثر من عشرين سنة

وبعد ده كلوا غشاكم وسافر السودان ضمن وفد تراجي!

هو أخلاق الكيزان دي كيف ؟

خليهو يجيب ليك كم ملوة من البيسكيت

ســـجمـــنا!!// إسحاق أحمد فضل الله..................ســـجمـــنا!!// إسحاق أحمد فضل الله..................

الكوز منصور مفتاح يمجد ويمدح في الكوز القمئ اسحق فضل الله.

Quote: يا لك من منافق !

؟؟؟؟؟؟؟؟؟؟؟؟؟؟؟؟؟؟؟؟؟؟؟؟


كل هذه السنين وأنت في أمريكا
وكل هذه السنين وأنت في موقع سودانيزأونلاين

ولم تتعلم حتى الآن أو تستوعب أن يكون للناس قراءات غير ما ترى ؟؟
ولم تتعلم أن تختلف ( باحترام ) مع الآخر ؟؟
وهل تعتقد أن الشتيمة سوف تجعل حجتك أقوى ؟؟

والأهم
هل تعتقد أن رد الشتيمة بأقذع منها أمر صعب ؟؟

إرعوى يا أمانى الطويل// هاشم الإمام محيي الدين.............. إرعوى يا أمانى الطويل// هاشم الإمام محيي الدين..............

الكوز منصور مفتاح نقلا مقال للكوز هاشم الإمام، ومدافعا فيه على البشير.

اللليله الفيسبوك //إسحاق أحمد فضل الله.........اللليله الفيسبوك //إسحاق أحمد فضل الله.........

الكوز منصور مفتاح محتفلا ببوستات أسحق فضل الله.

دخل القش وما قال كش// عبدالمحمود نورالدائم الكرنكى........دخل القش وما قال كش// عبدالمحمود نورالدائم الكرنكى........

كيف ينقل الكوز منصور مفتاح مقالات الكيزان!

ذلك طبعا خلاف الكتابات العنصرية التي كتبها الكوز منصور مفتاح في هذا المنبر.

Quote: والأهم هل تعتقد أن رد الشتيمة بأقذع منها أمر صعب ؟؟

حقك علينا أخي عاطف .
يا دينق ياخي الحكاية ؤُ ما فيها اراء مختلفة في زميل منبر
مبنية علي اُسُس مختلفة، انا ما شايف فيها ما يدعو للشتم
خلينا نختلف مع حفظ الوُد ...

كتب محمد النور كبر في بوست مجاور:

Quote: الشيوعي البيكتب خلال بيت الأشباح دينق اخوان ، وناكرين انو شيوعيين ، مش ياهم انتو الكنتو بتزرزروا كمال فرانكلي لمن جاب خيط انو الحزب الشيوعي السوداني قبض عشرة الف دولار من حيكومة الجنوب ، فخانكم التعبير ومشيتوا تعيطوا في فرانكلي؟..و انتو لمن عاملين فيها حرفوا وبتمثلوا وعاملين فيها ممثلين ، ليه بتخرجوا عن النص وبتفضحوا روحكم؟..ولا عاجباكم تريقة مرتضى عبد الجليل بتاعة ( مات كبر)؟.. مش مهم.. المهم ، تراجي ركت في مطار الخرتوم ، وربيبكم ياسر عرمان عمل مفاوضات في غرف مغلقة مع وفد الحيكومة وخرج قال الرووب..! اها مالكم ما قلتو: الأخت تراجي..عندها افق تحل مشاكل السودان؟..نفسي اعرف ليهو بتضايروا من تراجي قدر ده؟..قابضة عليكم شنو بالضبط؟..ياخي الخوف ده مرات محرج خلاص..!! ونحن سنظل على عهدنا ، ح نوصل الشعب السوداني لمرحلة يقتنع فيها تماما انو ليس محتاج لحاجة اسمها الحزب الشيوعي السوداني..! فشنو.. It is over and the game has passed you long time ago من حق وليد الشفت يشمت في دينق ، والنطيحة والموقوذة وما اكل السبع من الشيوعيين الوهم الذين يتخبأون خلف الأقنعة..!!! ومن حقه ان يشمت في الناس الكانت بتخلق ليها اصنام وتعبدها ، ويا وليد..المعارضة الحايمة في الخلاء دي ما عندها التكتح..نص دراويش سلاح حايمين في الخلا..والنص القاعد في امريكا واوربا .. الشيوعيين مسيطرين عليهو بوضع اليد على طريقة (البصيرة ام حمد)..ناس قاعدة في الصقيعة ما عندها التكتح..!! يا بيت الأشباح دينق اخوان: الحزب الشيوعي دارو في الخرتوم اتنين ، ومنصور المفتاح لا يملك دار في الخرتوم اتنين..!!.. ما ياهو داك معاوية المدير فاتح مناحة بيبكي وبيتذكر منصور المفتاح ، الإفتقدوهو في التلاوة ، وكبايتو بتاعة الشاي الأخضر المنتظرة..مالكم ما قدرتو قلتو بغم؟..يعني دايرين تأكدوا عنصريتكم علينا؟..ولا معاوية المدير جلدكم وما بتجروا فيهو الشوك؟..ولا خايفين معاوية المدير يرجعكم لعلبكم زي نضمي عادل امين ؟.. قلتها من قبل لخالد كودي ، واقولها ليكم تاني.. انا بعرف محل وين ممكن اعضي..وانتو الح تخسروا..!! كونوا شجعانا وتعالوا بالباب العديل..!! ولن نترك حزبكم الهالك..لأنو ما عندو سالفة في مستقبل امسودان..!! ابلعوا ساكت يا خلق هوي ، اتضايروا..انزوا في الظل..!!! كبر

يا معاوية المدير.

زولكم بتاع كندا ده شوفو له حل معاكم.

Quote: يا بيت الأشباح دينق اخوان: الحزب الشيوعي دارو في الخرتوم اتنين ، ومنصور المفتاح لا يملك دار في الخرتوم اتنين..!!.. ما ياهو داك معاوية المدير فاتح مناحة بيبكي وبيتذكر منصور المفتاح ، الإفتقدوهو في التلاوة ، وكبايتو بتاعة الشاي الأخضر المنتظرة..مالكم ما قدرتو قلتو بغم؟..يعني دايرين تأكدوا عنصريتكم علينا؟..ولا معاوية المدير جلدكم وما بتجروا فيهو الشوك؟..ولا خايفين معاوية المدير يرجعكم لعلبكم زي نضمي عادل امين ؟..

معاوية المدير.

أنت شيوعي ولا شنوا؟؟

هههههههه

قول مواطنكم في البلدين ده أنا كتب في البوست ده قبل ما أكتب في البوست التاني، يمكن يقتنع بي كلامك أنت

ههههههههههههههههه

يا سلام يا اولاد عطبرة..
كل يوم تورونا الجديد..وكل يوم تثبتوا لينا انكم ذوق واخلاق ..
وشوفو روعة اللوم وادب الحوار الجميل الانيق من ود عطبرة
ود المدير..
بسمات

سلامات يا معاوية المدير
والله ليكم وحشة انت ومنصور والنصري ومحمد الإمام وخالد المهدي وو ... وكل العقد الفريد بمدينة كالجري
احتفظ لكم جميعا بكل المودة والتقدير بغض النظر عن مواقفكم السياسية اتفقت أو اختلفت معها لأنني متأكد من شيء واحد وهو محبتكم
لبلدكم واهلكم .
ربما لا أتفق مع من ذهب إلى الحوار لأنني مازلت مقتنع بأن الحوار الناجح لابد وا تتوفر فيه الحريات العامة وهو امتحان ظلت الانقاذ تخفق فيه باستمرار منذ انقلاباها على السلطة الشرعية في البلاد
لكني مقتنع تماما بأن من ذهبوا إلى الحوار قد فعلوا ذلك من منطلق الحرص على تحقيق السلام ووقف الحروب
وهذا لعمري من حقوق المواطنة وواجباتها في نفس الوقت
هناك من يعرف الحق بالرجال ولست منهم وهم ليسوا مني
ولو كان في قيادة الحوار الصادق والخطيب لباركوه وأن ذهبت تراجي وغيرها تعاملوا مع الأمر في منتهى الشك والتخوين والبارانويا السياسية

Quote: ؟؟؟؟؟؟؟؟؟؟؟؟؟؟؟؟؟؟؟؟؟؟؟؟ كل هذه السنين وأنت في أمريكا وكل هذه السنين وأنت في موقع سودانيزأونلاين ولم تتعلم حتى الآن أو تستوعب أن يكون للناس قراءات غير ما ترى ؟؟ ولم تتعلم أن تختلف ( باحترام ) مع الآخر ؟؟ وهل تعتقد أن الشتيمة سوف تجعل حجتك أقوى ؟؟ والأهم هل تعتقد أن رد الشتيمة بأقذع منها أمر صعب ؟؟

الاخ عاطف

يا لك من محترم

تحياتي وسلامات عزيزنا سيف

Quote: الاخ عاطف يا لك من محترم

وأنت الأكثر إحتراماً

لك الشكر الأجزل

منعول أبوك يا زمن!!

الدهنسة والتعرصة بقت أحترام!

معاوية انت وقباني وكبر ولا كشكشروا ليكم ساي بعزومة مراكبية

الأخبار الواردة من الخرطوم تقول أن الإنتهازي المتملق منصور مفتاح شوهد وهو يحمل حقيبة رئيسة الوفد.

يتخيل لى ود المدير موعود بى مدير مكتب ود المفتاح
وسمعتا تحت تحت كدى محمد النور مدير مكتب تراجى
اخونا قبانى قالو مدير التلفزيون و كده
و لو ده حصل, الله يكون فى عون نشرة الاخبار
و يا ريت الواحد لو كان مشى كندا .. كان هسى وعدوهو بى حاجة
الا بس الله فى .. و اكيد السيد الاستاذ معاوية ماب ينسانى
____
عزيزنا عاطف
كويس انك ما جاريت خبير الافك و النفاق بالمنبر
..... و هو امر من حسن الخلق لو يعلم الذين يسيئون ......
عشان سيدنا بكرى ما يطبّل البوست ده
و البوست ده انا مغرود فيهو شديد
مسك فى رقبة المنصور و كبر
و عمل نايم من تراجى
شفتا الفهم الاعور ده كيف
عينو فى الفيل يطعن فى ضلّو
ذكّرنى النكتة القديمة ديك
صاحبك ال طلب فول و اكل كبدة الزول القاعد جنبو
_____
اصيل يا ود المدير و انت تفصل بين معزّتك لشخص ما و احترامك لى خياراتو
_____
سؤال د البشرى ده حنلقى ليهو اجابة متين

والله ما ضيع السودان الا المجاملة الرخيصة
شخص يعيش مع الناس 20 عاما ويرحل مثل البوم بالليل ولا يخبر احدا تقول لي عتاب وجميل قول
وغيرها من المدح
هذه صفه الخيانة ولا ياتي من شخص صادق محب لاخوته
كمان قلت انه يتلي ايات الرحمن ,,,, بالله

شكرا أخ المديـــر

قبل تسجيل أية حالة من حالات الدهشـة (وحق الدهشة دائماً محفوظ) هناك أمور من المسلمات لا يختلف عليها اثنان

حكومة الاخوان المسلمين في السودان من هذه الأمور .. كل الذين لا يلعنونها ... هـم بكل تأكيـد , معهـا .... سواء كانوا يعلنون ذلك أم لا يعلنونـه

والذين لا يعلنونه أخطر ...

أحمد الشايقي

سلام يامعاويه الشعب بيتفرج وينكت اخر سخريته قال مسطول
قال لى زوجته انا عاوز اختبر ولدى دا
قالت كيف قال ليهانجيب مصحف والف جنية وقزازة ويسكى
نختهم فى الغرفة
وندخل ولدك اذا شرب الويسكى حيطلع سكرجى
واذا اخد الالف حيكون حرامى
واذا اخذ المصحف وطلع حيكون مولانا وامام جامع
المهم دخلوا الولدالولد اول حاجه طبق الالف فى جيبو
وضرب الويسكى
وشال المصحف طلع
المسطول بقى يبكى ويصرخ
مرتوا قالتو سجمى بتبكى مالك
قال ليه دا الكنت خايف منو
وماعملتو حسابو
مرتو سجمى كيف
قال ليه ولدك طلع مؤتمر وطنى

Quote: قبل تسجيل أية حالة من حالات الدهشـة (وحق الدهشة دائماً محفوظ) هناك أمور من المسلمات لا يختلف عليها اثنان حكومة الاخوان المسلمين في السودان من هذه الأمور .. كل الذين لا يلعنونها ... هـم بكل تأكيـد , معهـا .... سواء كانوا يعلنون ذلك أم لا يعلنونـه والذين لا يعلنونه أخطر ... أحمد الشايقي

الكلام دا ما بشبهك يا مولانا .......

Quote: خليهو يجيب ليك كم ملوة من البيسكيت

عبد العزيز يا اللِيّلنا،
يا زول الجماعة ديل ممكن نطلب منهم ايّ حاجة يجيبوها لينا إلآ حاجة تتكوضم .
يا اخي قاليك في القاعة الفطور دا كان ما كابستو إيآكَ البايت القوى، يا راجل
ميزانية العضّة عضوها زماااااان، تقول لي بيسكت !، علي اليمين دا في
السيالة ما يلقاهو، نشاااااف شديد غايتو الله يهوّن ...

Quote: معاوية المدير. أنت شيوعي ولا شنوا؟؟ هههههههه قول مواطنكم في البلدين ده أنا كتب في البوست ده قبل ما أكتب في البوست التاني، يمكن يقتنع بي كلامك أنت ههههههههههههههههه

هههههههههههههه،
غايتو جِنِس مِحن !.
يا دينق يا اخي القاسم المشترك مصلحة الوطن ؤُ كُلو زول بينظر ليها من زآوية
مختلفة عن الآخر تبقى وجهات النظر دي مكان الإهتمام . يعني الناس حا يستفيدوا
شنو لو عرفو انا شيوعي واللآ مؤتمر وطني واللآ حتي وآحد من الشياطين الطلطاشر
البيرضعو من باسويرد وآحد ؟!؟!...

Quote: منعول أبوك يا زمن!! الدهنسة والتعرصة بقت أحترام!

أصبحنا وأصبح الملك لله الواحد القهار

Quote: يا سلام يا اولاد عطبرة.. كل يوم تورونا الجديد..وكل يوم تثبتوا لينا انكم ذوق واخلاق .. وشوفو روعة اللوم وادب الحوار الجميل الانيق من ود عطبرة ود المدير.. بسمات

بسمات يا بنتنا ؤُ بت حلتنا،
ادبتنا عطبرة وأحسنت تأديبنا، وامسكي عندك
طلعت الطيّب دا من اولآد عطبرة برضو ...

نهديك الغنية دي عسى ولعل
اتا راجل طيبوب ياودالمدير

Quote: سلامات يا معاوية المدير والله ليكم وحشة انت ومنصور والنصري ومحمد الإمام وخالد المهدي وو ... وكل العقد الفريد بمدينة كالجري احتفظ لكم جميعا بكل المودة والتقدير بغض النظر عن مواقفكم السياسية اتفقت أو اختلفت معها لأنني متأكد من شيء واحد وهو محبتكم لبلدكم واهلكم . ربما لا أتفق مع من ذهب إلى الحوار لأنني مازلت مقتنع بأن الحوار الناجح لابد وا تتوفر فيه الحريات العامة وهو امتحان ظلت الانقاذ تخفق فيه باستمرار منذ انقلاباها على السلطة الشرعية في البلاد لكني مقتنع تماما بأن من ذهبوا إلى الحوار قد فعلوا ذلك من منطلق الحرص على تحقيق السلام ووقف الحروب وهذا لعمري من حقوق المواطنة وواجباتها في نفس الوقت هناك من يعرف الحق بالرجال ولست منهم وهم ليسوا مني ولو كان في قيادة الحوار الصادق والخطيب لباركوه وأن ذهبت تراجي وغيرها تعاملوا مع الأمر في منتهى الشك والتخوين والبارانويا السياسية

سلآمات يا طلعت،
ؤُ خليني اقولك مشتاقين في اللوّل، وتقبل سلآم الجميع .
ألف شكر لثقتك فينا، ؤُ يا ريت ترجع لينا .
إتفق معك في عدم إتفاقك مع من ذهبوا للحوار وأحترم خياراتهم، وأقول، إن كانت الإنقاذ واقع مفروض
علي الناس فالشيطان واقع ايضا، فهل هذا يعني ان نتحاور مع الشيطان ؟. ابداً لا أتفق مع من ذهب
للحوار .
حتي الذين ذهبوا للحوار إنتقدوا بعضهم وأحجموا عن البعض !...

سلامات يا صديقي و لا تبتئس
منصور المفتاح و كل المهرولين لموائد الحوار ليسوا سواء
فبعضهم سئم النضال و صار يبحث عن الحل عند من يخلقون لنا كل يوم مشكلة.
و بعضهم دخل المعارضة من باب المصلحة و وجد الآن أن الريح و الغنائم عند الحكومة فهرول ناحيتها.
و هنالك آخرون طيبون أهل جودية يعتقدون أن الحكومة قد تفهم لغة الأخلاق و التعامل السوداني.
من ضمن الحكم - الجواهر التي قرأتها في كتابات أديبنا الرائع شاهين.
حكمة تقول أن هنالك من باع و هو شباب و هنالك من باع بعد الستين.
لكن لا فرق فكله بيع.
لذلك لا تبتئس يا صديقي ففجر شمس الحرية أوشك على البزوغ.
و رحم الله أمل دنقل و رحم الله زماناً ترنمنا فيه بلا تصالح و كلمات اسبارتكوس الأخيرة.
و كن أبداً بخير
تحياتي لك و لمنصور و لكل ضيوف البوست الكرام.

Quote: واللآ حتي وآحد من الشياطين الطلطاشر البيرضعو من باسويرد وآحد ؟!؟!...

ول ابا معاوية المدير..حبابك يا صديقي

بالله الشغلانة لحقت طلطاشر..!


المهم..

التحية لصديقنا منصور المفتاح ..

لكنك كتابتك سمحة با صديقي ، مارقة من مطامير بعيدة خلاص..

ويظل منصور اخ وصديق حتى لو شرطت الشياطين الطلاطاشر هدومها ولا كسرت رويساتها فوق الحيط..

كبر

Quote: معاوية انت وقباني وكبر ولا كشكشروا ليكم ساي بعزومة مراكبية

منتصر..حبابك يا صديقي

وين يا عم..!
كبر مشى امسودان وقام قسم الموبايلات للأحباب..

وجا راجع ايدينو فاضية..!

اها الجماعة قالوا ، عذرهم ، (لم نعرف له تلفون ثابت)..!

يعني لو كان التلفون اتلقى ، كان ح يكون (وفد كبر)..!!

هل تصدق يا منتصر كبر ما عندو موبايل..والله صحي..!

ياخي عمك مسكين لمن بغادي ذاتو..!


كبر

مكتب بيت الأشباح دينق اخوان:

Quote: نعول أبوك يا زمن!! الدهنسة والتعرصة بقت أحترام!

شنو يا شباب انتو زعلتو ولا شنو؟..

اعتذروا عن هذه اللغة غير اللائقة..!

قليلا من الإتساق لا يضر..

كبر

كتب ول ابا جلالدونا:

Quote: وسمعتا تحت تحت كدى محمد النور مدير مكتب تراجى

بركة شيخي ابضراط اللي الغول طراد..تسمع البعاتي واقف حارسك في كورنر..!!

يفتح الله يا ول ابا..استاذنا ود المكي قال (رئيس وزراء)..فشنو قوموا شوفوا واجبكم الثوري واسقطوا النظام ، عشان نلحق نبقى (رئيس وزراء)..!

Quote: مسك فى رقبة المنصور و كبر و عمل نايم من تراجى

وين يا عمك..ما سمعت التصريح بتاع بيت الأشباح انو كان مخطط لزيارة الخرتوم في شهري واحد (يعني في زمن الحوار الوطني)..!

انتا قايل ابوروضة براهو معصور؟..ياخي العالم دي كلها ضابنها كربون اسكت ساكت خليهو..!

المهم يا حبيب..ليه بيت الأشباح ، صدفة ساكت..كان متواجد في اثيوبيا ايام المفاوضات بين الحيكومة وقطيع الشمال؟..

متذكر محمد سعيد الصحاف أخر وزير اعلام في دولة صدام حسين؟..

وتيب..!

كبر

اللمين البشاري،
شكراً يا فردة ...

Quote: حافظ الإمام محي الدين · Calgary, Alberta أخونا ود المدير الجنا ده مزعلاه التلاوه أكثر من كباية الشاي، غايتو قنطرت نفسك لكوزنه مرتقبه مع أول إختلاف ليك معاه، ف شِد حيلك يا إبن عمي. غايتو دينق ينطبق عليه المثل ( غلبته مرته عاوز يأدب حماته)، هسي إنت خليت تراجي ومسكت في منصور وودالمدير وحتى عاطف ...................دينق أُخخخخخخ تراجي جاتك.

حافظ ود الإمام،
حبابك ألف .
يا اخوي تراجي تضرّع سااااكت في الخرطوم حاسرة الرأس، أهلنا قالوا، البلد
المافيها التمساح يقدل فيها الورر . بعد تراجي دي طلعوها كوزة يا اخوي الكوزنة
حبابا، تراجي طلعت نجييييضة ؤُ بتعرف دروب المطارات وانا مغرود لي في
عُمرة، ثم إنو يا اخي ناس دينق ديل الدايرين يشوفوهو بيشوفوهو والدايرين
يدمسوهو بيدمسوهو، المسألة بالنسبة ليهم منو المدّ رويسو بالطاقة كان عدو
بيصقعوك شاكوش كان ماك عدو الشاكوش قاعد في محلو ...

Quote: معاوية انت وقباني وكبر ولا كشكشروا ليكم ساي بعزومة مراكبية

صاحبي معاوية ... و الله منصور ما ليهو حق ابداً ...

Quote: معاوية انت وقباني وكبر ولا كشكشروا ليكم ساي بعزومة مراكبية

و الغريبة انا اقرب زول ليها جغرافياً من هاشم نوريت ... و بدلي كلها مكوية ...

كدي لما ترجع نشوفها فطتنا ليه ... هههه

ياخي و الله تراجي زوله عادية تماماً ... ابسط من تعقيدات من يسمعها ...

Quote: اخونا قبانى قالو مدير التلفزيون و كده و لو ده حصل, الله يكون فى عون نشرة الاخبار و يا ريت الواحد لو كان مشى كندا .. كان هسى وعدوهو بى حاجة الا بس الله فى .. و اكيد السيد الاستاذ معاوية ماب ينسانى

يا جلّي ...

معاوية و كبر مشو السودان من هنا اكتر من مرة كفاهم المكاتب دي ...

اها اخوك الما شاف البلد من فبراير 1989

و الما ظلته سما السودان تحت حكم الكيزان ده ...

وزارة ما تديهو ؟

انشاء الله وزير بتاع لعب على قولة سيرسير ايرو ( مش هو القال طلعت فريد وزير بتاع لعب ؟ ولا منو القالها )

Quote: حافظ الإمام محي الدين · كالغاري أخونا عاطف عمر كلمة منافق دي لازم تقرأها مقرونه بمطايبتك لي في بوستات سابقه، دحين عمك ده زي الجمل ما بنسى ومصاقر المنبر24/7 ، أكل العيش حار، فمعليش أمسحها لي في وشي وأتمنى إنك ماترد عليه رغم إني متأكد عندك مليون رد

لا عاش من يرد لك ( أمر ) حافظ يا حبيبنا
تسلم
ويسلم وجهك الجميل

Quote: لا عاش من يرد لك ( أمر ) حافظ يا حبيبنا تسلم ويسلم وجهك الجميل

شكراً يا صديقي ...

فلا شيء يهم ... سوى الكلمة الطيبة ...

المنصور ما زولآ هين
الاغنية مهدأ لكما يا من جملتم ايامنا

Quote: معاوية انت وقباني وكبر ولا كشكشروا ليكم ساي بعزومة مراكبية

هو نحن ادونا فرقة نعرف يا منتصر ؟،
عليك امان الله كان عرفنا كنا كنكشنا فيهم جنس كنكشة زي كنكشة
الجماعة في الكراسي يا قول تراجي ...

Quote: منعول أبوك يا زمن!! الدهنسة والتعرصة بقت أحترام!

مرمى الله ما بترفع....
ود المدير و اولاد البلد فى البوست....تحياتى واحترامى

Quote: و يا ريت الواحد لو كان مشى كندا .. كان هسى وعدوهو بى حاجة الا بس الله فى .. و اكيد السيد الاستاذ معاوية ماب ينسانى

انساك كيف يا فردة ؟.
حتي لو ناظر محطة بنعلقك فيها ما تخاف ...

Quote: والله ما ضيع السودان الا المجاملة الرخيصة شخص يعيش مع الناس 20 عاما ويرحل مثل البوم بالليل ولا يخبر احدا تقول لي عتاب وجميل قول وغيرها من المدح هذه صفه الخيانة ولا ياتي من شخص صادق محب لاخوته كمان قلت انه يتلي ايات الرحمن ,,,, بالله

سلآمات أخي إدريس .

ياخي مافي مجاملة لا رخيصة ولا حتي غالية، وانا كان جاملت منصور شِن فايدة
خوتي ليهو ؟، انا أعاتب منصور والذي بيني وبينه لا يحتمل المجاملة .
اما القرآن فالبر والفاجر يتلوه ...

Quote: شكرا أخ المديـــر قبل تسجيل أية حالة من حالات الدهشـة (وحق الدهشة دائماً محفوظ) هناك أمور من المسلمات لا يختلف عليها اثنان حكومة الاخوان المسلمين في السودان من هذه الأمور .. كل الذين لا يلعنونها ... هـم بكل تأكيـد , معهـا .... سواء كانوا يعلنون ذلك أم لا يعلنونـه والذين لا يعلنونه أخطر ... أحمد الشايقي

سلآمات أخي احمد .

بعض الأحداث تصرعنا بالدهشة رغم إيماننا التام بانّ القلوب
بين اصبعي الرحمن يقلبها حيث شاء ...

Quote: سلام يامعاويه الشعب بيتفرج وينكت اخر سخريته قال مسطول قال لى زوجته انا عاوز اختبر ولدى دا قالت كيف قال ليهانجيب مصحف والف جنية وقزازة ويسكى نختهم فى الغرفة وندخل ولدك اذا شرب الويسكى حيطلع سكرجى واذا اخد الالف حيكون حرامى واذا اخذ المصحف وطلع حيكون مولانا وامام جامع المهم دخلوا الولدالولد اول حاجه طبق الالف فى جيبو وضرب الويسكى وشال المصحف طلع المسطول بقى يبكى ويصرخ مرتوا قالتو سجمى بتبكى مالك قال ليه دا الكنت خايف منو وماعملتو حسابو مرتو سجمى كيف قال ليه ولدك طلع مؤتمر وطنى

ههههههههههههههه،
يا عمر شر البليّة ما يضحك،
لكن صدقني لو علم هذا المسطول نقاء وصفاء إبنه مقارنةً بأهل المؤتمر الوطني
كما يزعمون تسميته لشعر بأنه اسعد الناس علي وجه الأرض .

Quote: نهديك الغنية دي عسى ولعل اتا راجل طيبوب ياودالمدير

الأخ الحبيب حامد بدري،

مشكور علي الإهداء وأتوقع الإجابة،
ان تكون ماني عارف ...