الخشونة ،،،

09:17 AM Nov, 29 2015

سودانيز اون لاين
بلال زكريا- السعوديه
مكتبتى
رابط مختصر

في كرة القدم ، كرت أحمر، وطرد،، الغريبة إنّو الخشونة تأتي من الدفاع دائماً ،
وتقل من الوسط أو الهجوم، لكن (الفاضل دريسة) رَجُل الثواني كان يهُاجم ويُسجل ويُخاشن ، ولم يُطرد بأحمر ،،

خشونة الركب، الاِحلال بـ( مفصل صناعي) جراحة(٣) ساعات و(١٣) جلسة علاج طبيعي، و(٣٠) يوماً راحة، ويعود كما كان وأحسن،،،،

الخشونة في التعبير عن الاِمتاع ،،،نوعٌ من العاطفة المستثيرة لكوامن الغضب ، الممزوجة بسحر الطرب ،،
هذا ما يجعل مولانا العاشق( خضر بشير) يخرج من الزمن،، ليطلع فوق الشجرة،!!
عندما يصّل لمقطع ( لكن تأكد ليك ربّ يأخد حقوقك وينصفك) من رائعة( خدعوك وجرحوا سمعتك) لحسين محمد حسن ،

وللطربِ أسبابٌ ودوافع ، الذين يطربون لخيالٍ سًحريٍ في معانٍ عميقة كقولِ (حسان) في سيد البشر صلوات ربي وسلامي عليه ونحن في أيام مولده ،المُباركة ،
عفّت ذاتُ الاصابع فالجواء ،، إِلَي عزراء منزلها خلاء،
ديارٌ من بني الحسحاس قفرٌ
تعفيها الروامسُ والسماءُ،،

يقول الاستاذ( أيوب عابدون)
إن ( أبنعوف) كان عندما يسمع المقطع المذكور من إنشاد( قنديل) حوار ومريد ( الشيخ قريب الله) كانت، تعتريه حالةٌ من الخشونة الزائدة، فيطيح علي الأَرْضِ ، ويُقطّع ( كرّاب) العنقريب حتي أخر فتلة من حبلٍ اخضرٍ ،
مما دعي والدته أن تختلي بالشيخ ( قريب الله) طالبةً إما أن يُصرف قنديل من الاِنشاد، أو أن يؤمن لها الشيخ بعد كل ( ليلية) عنقريب جديد ،،،

لقد تداخلت أمس الاول مع صاحب بوست (أسوأ أغنية) الأستاذ / محمد المرتضى حامد بشئٍ من(الخشونة) لطربٍ أصابني وحرك ما كان ساكناً،، وأعتقد أنها خشونة لا تحتاج (تغيير ركبة) ولا طلوع في الشجرة ولا حبل أو (كرّاب) أو عنقريب،
كما لا أظن أنها تستدعي (كرت أحمر،).
التحية للاستاذ محمد المُرتضي للاِبداع المستمر،

بلال..
أنا من قبييييل شايف البوست دا وقلت لو تداخلت ببوظو ليك
كان كدي انت ما عندك فكره عن الخشونه..
إخشوشنوا فإن المداخلات لاتدوم _ بكري عمل خاصية المسح..
إنت ماك مواكب؟

ولقد أغلق في وقته لوصول الفكرة ،، والاعتقاد الجازم بانتفاء سببها .

Quote: ولقد أغلق في وقته لوصول الفكرة ،، والاعتقاد الجازم بانتفاء سببها .

لا لا ، الفكره واصله لكن الخشونه القاصدا انت ما الخشونه البيعرفوها العامه، انت قاصد
الخشونة الخاصه..
زي الخشونه التي تعني يا بلال، حكيت عنها في حالة (م.خ) التي لاتشبه سوى الخشونة التي دعت خدر بشير
أن يرتقي الشجرة.. خايف لو أعدت سردها تاني زول يقرا لي بوست مافي لكن والله إلا أقولا للمره التازعه
لأنها في ذات السياق.
م.ع ،عليه الرحمة، وهو صديق لصيق بعبدالعزيز داؤود يلازمه في كل جلسات الطرب، قيل أنه ما أن يستبد
به الطرب ويبلغ مداه طوالي يقوم يشرِّط جلابيتو سيما في أغنية مساء الخير وتحديدا عند(بحنانك أنا
مستجير)، أها قالوا في إحدى القعدات واحد طلب من عبدالعزيز يغني مساء الخير وكان م.ع
حاضرا ، أبوداؤود قال ليهو والله أنا ما عندي مانع لكن قُبَّال ما نغنيها أخونا م.ع دا شوفوا ليهو عراقي قديم..
في خشونه يا اخوانا أكتر من كده؟

أبهّج الله أيامك ،،
في زواج، ( مبارك عكّور )بي قلعة ود أُورو،، وكان تجمعاً مُزداناً لاهلنا جموعية الفتيحاب،، وكرري ،،أهل ( بت المك ) ،،،لما خلف الله حمد،،
صدح :/
يتّنهد الدّماع رَهَد ،،،،
تترمي فُوق مَهَد النَهّد
قولي لِي ألكان ْ بَعَد،،
نَفَر الحبيب عَنّي،، اِبتَعّد،،
قام ( مكوة) وتحت ضغط الآيفوريا العالي ، وأن ( تخاشن) ،،مُتأبطاً ( الجَمر المولع) بكلتا كفيه،،
،وجري علي،، منصة خلف الله ،، ولولا لطف رَبُّك ،،ثم ( البَاقِر) وعنفوانه،، لحدث ما لاتُحمّد عُقباه،، ،الرحمة لموتانا