euphoria

01:39 PM Nov, 23 2015

سودانيز اون لاين
بلال زكريا- السعوديه
مكتبتى
رابط مختصر

ياخي الأمريكان ديل كلو شيء يعملوه يجودوا، ما عدا( الكورة ) و(السياسة ) ، بالله أسي البيعمل فيهو أوباما وسكرتير خارجيته - كيري، ده تسمي شنو ؟؟؟

،، غايتو - ما علينا،،
ياخي ديل عندهم عطر كده إسمو،( ايفوريا) ،حاجة تمخول، ، بالذات - النسائي ، رهيب خالص ، يدخل في أغشية مخك بلا إستئذان ،،، ، الواحد يجي يتلصص في البيت ، عشان يستنشق هذا العبير السحري وأحيانا بحنك الجماعة ،أدوهو. بخة وكدة،،

وعلي طول ، تعيش حالة من الايفوريا، وتتخيل نفسك لابس عراقي وطالع في لوري (ود اب حريزات) بي وره وهدومك ملاننننننة حيمور ، وبتنزل الطوب جنب بيت ( مني الخير ) في ( بري أبو حشيش ) ،،
هذه ( الايفوريا) آسرة للانوف وساحرة للقلوب ، ،،

(دومنيك لوبين) و( كارلوس بيتم) هما من أجريا الأبحاث والتطوير، وضبط الجودة ، ولمدة خمس سنوات عجاف، لغاية ما سلموها صاحبها(كالفين كلاين) وهاك ياسوق وتوزيع،،،

معلوم أن لكل مصنع عطور جهاز خبراء ،، في (الشم) وكدة !! لضبط الجودة، لازم تكون عندهم أنف حساسة، وشمامة، عشان تميز وتقرر لخط الانتاج بالبدء في التصنيع ،،

ويقولون أن الايفوريا عبارة عن خلاصة ازهار اللوتس والاوركيد ،مخلوطة مع خلاصة العنبر والمسك الأبيض ،،ومنقوعة في خلاصة ماء أشجار المهوقني،
يعني بالله حاجات زي دي تقوم توديك لوري (ود أب حريزات) ،، و( بري أبو حشيش ) ولا تمشي الكونكورد سكوير/ رويال باريس،، لاحتساء فنجان من اللاتيه ميكاتو !! ،،،
إنه سحر ، (الانتماء) ،،،،،،،،
يغمرك بنار اصطلائه، أينما كنت،، ووقتما شئت ،،،،،

شفتو بالله الشغلانة دي مريحة كيف ؟ بس تشم العطر، وتقول موافق او لا ،يقومواينزلوا
، ماهيتك في البنك ،،وتقبض !!لا ادري لماذا نطلق علي صرف الماهية( القبض) !!
الواحد يقوم من الصباح ،،يمشي لي أمه يقول ليها عاوز قروش درس العصر،،، تقول ليك،، أصبر لأمن ابوك ( يقبض) الماهية ،،
بالله تقول الماهية دي حرامي !!

في كل مهنة تجد الزواقة ،
يعني مثلا المطاعم المشهورة ،،،،،،صاحبة( الفرنشايز ) لا يمكن ان تعتمد وجبة جديدة،، الا بعد اختبارها من (الزواقة) ،،وهم الذين يوافقون علي ضبط الجودة،، وبالتالي اعتماد ألمنتج النهائي ، وعرضه علي العملاء،،

مرة في السبعينات مشينا زيارة لمصنع بيرة النيل الأزرق بالخرطوم بحري ، الشهير ب( أبو جمل ) ،،والشراب اسكوب، ،،وتم تعريفنا علي جميع خطوات الانتاج،، حتي مرحلة التعبئة النهائية،،، والشحن للمستودع والبارات ،
،،وبعد ان انتهينا، وجلسنا في مكتب المدير، عمر حسن ( اعتقد كان وقتها سكرتير نادي الهلال ) ، وهو ليس سعادة اللواء عِمر علي حسن ( جنابو ) عضو المنبر ،،
قال لينا/المدير ،،توجد مرحلة هامة من التصنيع،، هي التّذوق وضبط الجودة،، وهي تتم ( مانيول) ،،،
وإذا به يستدعي شخصا ضخما،، عريض المنكبين ،،طووول في عرررض،، وهو باين عليهو من ناس ( بحري) ،،اسمه فارس ،،وقال لينا مدير المصنع ،،هذه ادارة ضبط الجودة ( اي فارس) ،،،،،،(ابو الزفت ) ادارة بي حالها،، !!!وقام فارس شرح لينا وظيفته وقال / قبل التعبئة النهائية لازم يتذوق ( كوز) من حوض العبوات،، وهو البيدي ( الاوكي) بالاستمرار،، او التوقف !! وقال المدير إن هذه الادارة أي ( فارس) ،تتقاضي اكبر راتب في المصنع .

يعني (ود أب حريزات )حايم النهار كلو،، من الكمائن،، لي بري أبوحشيش،،، ينزل في الطوب لغاية المغرب ،،واللوري يقيف ويديهو ( مانفيلا) ،،ومرات دفرة ، وفي النهاية عمك ( محمد توم ) يعصر ليهو شوية قريشات،
لا تثمن ولا تغني من جوع !! في حين (فارس) بتاع الجودة ده ،،بس قاعد يشرب في البيرة الساقطة ويدوهوا بلاوووي ،،

هذه المهن ولا بلاش ،، مِن الذي يشم الريحة ،،الي الذي يضوق الاكل،، الي الذي يحتسي البيرة ،،
وكلو الا( الايفوريا) والله عطر خرافي ،، مرات برضو لما الواحد يستنشقها من الصباح كدة بكون متقريف للاكل،، وبالذات اللقيمات ،،البتسويهن ( حاجة حرم) خالة أخونا صلاح بتي /ود درو / القلعة،، وتتخيل انك وترتشف كأساً من شاي لبن مقنن،، تحت العمود الجنب بيت ( توفيق صالح جِبْرِيل ) وكأنك تسمع نادي يقول (دهليز توفيق عاد الأنس يبهجه ونضرت جانبه هذا الطرب) .
إنه زمن ، الاِيفوريا وحسب (Dubai Duty Shop) الـ 50 ملم = 90 دولار
و الـ 100 ملم = 140 دولار .
و ، ابوووو الايفوريا زاتوووو،،

بلال سلام...ورينا دربو يا حبيب.........الطيب سمح

أهلييين اسماعيل / باريس جاليري - Dubai Duty Shop

اخي بلال ..

لك التحية ..

Quote: بالله أسي البيعمل فيهو أوباما وسكرتير خارجيته - كيري، ده تسمي شنو ؟؟؟

نسميهو حقارة الرجال في الرجال ! والبلدان في البلدان !


ولك الشكر .

Quote: نسميهو حقارة الرجال في الرجال ! والبلدان في البلدان !

تحياتي الأخت منى ، لو أن السيدة (ميشيل) تفننت ووضعت 100 ملم من الإيفوريا في دولابو لتغير المزاج وعدل من مواقفه

وكما تقول أحلام مستنغانمي : (ليس للنسيان عطر،، العطر لايمكن أن يكون إلا عطر الذكريات)
هذه ليست دعاية ولكن من أراد الذكريات عليه بـ (إيفوريا) النساء.

يقول د. (عثمان الحاج) كبير استشاريي الامراض النفسية والعصبية : أن دراساتٍ وأبحاثٍ محققة ،، أكدت أن للرائحة ،، تأثير مباشر على المزاج ، سلباً أو إيجاباً .
وبالذات - العطور ، والتي قد يكون لها في الغالب ارتباط شرطي بالسلوك أو - بالممارسة - أو بالحدث

مثلاً مجمل العطور التي يتم تركيبها لدواعي العُرس السوداني ( الدِنقر / دق الريحة) - لها إيحاءات مرتبطة شرطياً بالجنس والإثارة .
وكذلك العطور المستخدمة في تركيب مستلزمات (الحنوط ) لتجهيز الميت غالباً ما يكون لها انعكاس شرطي مباشر في تعديل المزاج والإصابة بحالة من الخشية والجزع والخوف ،،
ويكون كل ذلك ضمن بيئةالانسان التي ترسخت فيها هذه الممارسات والمفاهيم .

سلامات بلال

واحدة من الحاجات الجاذبة في السلعة الأسم!

عليك الله شوف إسم إيفوريا ده إسم مريح كيف !!

تسمع الأسم بس تنتشي فما بالك تشم العطر!

center]والله صدقت ياعثمان ,, يكمُن ’’ الَاندهاش فى الاسم الذى يستفزك لكى تُجرب ,, [/