الدهب

01:19 PM Nov, 19 2015

سودانيز اون لاين
بلال زكريا- السعوديه
مكتبتى
رابط مختصر

السلام يا روح البدن ... ياغصين الندى يا لدن .
الأخوة والأخوات أعضاء المنبر يطيب لي وانا بينكم أن أقدم محاولتي الأولى بينكم
عسى أن تجد قبولاً ومشاركة

الأيام دي في تقليعة جديدة كده،
تسأل من اي زول يقولوا ليك( مشي الدهب).
زمان اهلنا كان الدهب بيلبسوه، الان الذهب بقي يمشوا ليهو !!
طبعاً هو بيستحق! تمشي / تجري / تهرول، او تطير كلو مقبول المهم ( الدهب ) ،

تعاقدت اثناء إجازتي الفاتت مع فني لعمل ديكورات جبس ، واشاد بيهو العديد من الأصدقاء والمعارف، وانو هو فنان/ مبتكر / امين، وسريع ، واتفقنا علي الأسعار شاملة كل شيئ بما فيهو تكلفة المواد، علي ان ينهي العمل خلال (٣٠) يوماً من إستلام الدفعة المقدمة ،،

احد المعارف قال لي/ ياخي انتو المغتربين ديل جيعانين خلاص !! ،
دفعة مقدمة بتاعة فنيلتك !! ،، ياخي ادفع للراجل كامل المبلغ ،
وبدل ما يخلص ليك الشغل في (٣٠) يوم ،.
ينهي ليك الموضوع في أسبوع / أسبوعين ،، وَيَا دار ما دخلك شر ،،

المهم / عمك (قبض) كامل المبلغ ، وقال حايبدأ الشغل يوم الأحد ،
وكان ذلك يوم الخميس، وسافرت أنا يوم السبت،
وشطارة مني ( كدة) يعني الود مفتح، شلت رقم تلفونو،،، اها/
وصيت الحارس بأنو المعلم عبد الله بتاع الجبس، حا يجي يوم الأحد بدري شوية ،
وقلت ليهو لازم تكون موجود ، عشان تفتح ليهو وكمان تراقبو ، مع إنّو هم قالوا امين وكدة ،

مشيت وانشغلت في العمل الذي لا ينتهي ،
وفجأة اتذكرت عبد الله والجبس، يعني بعد(١٠) ايام كده ،
قمت ضربت واحد تلفون لي (ِعِِبد) اها ردت علي واحدة قالت لي
(ان المشترك الذي تحاول الاتصال به الان لا يجيب فضلاً اترك رسالة بالضغط علي رقم (١) ،،
ولقد وصلت للبريد الصوتي لشركة زين عالم جميل

وبعدين اكثر من خرطومية اتصال ونفس الحكاية ،،
يلا أمكن عندو مشكلة في التلفون ، قمت ضربت للحارس ، لكن قال لي، عبد الله منو ؟ قلت ليهو،
بتاع الجبس، جبس منو ؟ حولا !! شرحت ليهو الموضوع ،، ايووووه اتذكر،
وقال لي ،والله الزول ده من سافرت ما ورآنا وشوو،،
أهه قمت ضربت لي صاحبي القال لي ادفع كلو المبلغ ،،يا مغترب با جيعان ،
وشرحت ليهو الموضوع ، وتاني قال لي ، اصلو أنا زي جوع المغتربين ده ما لاقاني ،
دحين ياخي اديني فرصة واضرب لي بعد ساعة، تمام ،
ضربت تاني يوم ،،ما بعد ساعة زي ما قال، عشان ما يقول لي جيعان ،، !
المهم صاحبي ومن صوتو حسيت كده في شي ما عادي،
قام قال لي/ أنا مشيت بيت عبد الله واهلو قالوا( مشي الدهب) ،،

اها أنا ما فهمته حكاية الدهب دي !
قام هو شرح لي الموضوع وقال لي/
تتذكر ياخي زمان في المدرسة الأولية دروسنا التاريخ ،
وقالوا إنّو محمد علي باشا قام بغزوة السودان عشان ( الرجال والدهب).
وانو الدهب في جبال(بني شنقول)،
وانو محمد علي باشا وجد الرجال، لكنه لم يجد الدهب في (جبال بني شنقول )،
ورجع عائداًالي مصر المؤمنة، ،

اها اسي ناس(عبدالله) اخوي ليقوا الدهب في (بني شنقول)،ومشو ليهو!!!!!
قمت أنا وبكل عفوية قلت لي صاحبي ، طيب و(الجبس) ،
قام رده علي وبانفعال ياخي أقول ليك(دهب) تقول لي(جبس)،
ياخي انت مغترب جيعان كده لييييه،
وقفل التلفون،، قمت ضربت ليهو ردت علي واحدة
وقالت لي( ان المشترك الذي ،،،،،،،، ،،،، زين عالم جميل)

اها ياجماعة ممكن تساعدوني
عبد الله مشي ( بني شنقول ) ،
عشان يستثمر لي قروشي حقت ( الجبس) في ( الدهب) ويرجع القروش مع العائد علي الاستثمار، !؟!؟
ولا يكون عبد الله وصاحبي اتفقوا إنّو بلا جبس بلا جوع مغتربين وقاموا اشتروا لي شهادات
(شهامة) وبي اسمي كمان !،!
ام ياجماعة ممكن يكون في حاجة تانية أنا ما عارفها( زين عالم جميل ) ،،،
والله لا وراكم مكروه في ( جبسكم )،،،

سلامات أخ بلال ..
أولاً مرحباً بك في المنبر .. وقصتك واحدة من حكايات عدم الضمير الذي اجتاح البلد ..

ولكين إنت غايتو روحك رياضية جداً ..

الله يعوضك في قروشك .. ومادام يوم القيامة في، عوجة مافي وحقك ما بيروح ..

الأخ بلال..
وعليكم السلام ورحمة الله وبركاته (زما ما قال الأخ منير).
إنت جديد في المنبر لكن لا اعتقد أن ما يجري في السودان جديد عليك إلا إذا كان طوللللللت من البلد.
و ياهو نحن "الجيعانين" ديل بنساهر لغاية هسه الساعة الثانية صباحاً نكابس في الرزق. وإنت الحمد لله راح منك حق الجبس بس.
في ناس اشتروا ليهم أراضي وبنوا ليهم بيوت وشطبوها كمان وفي النهاية طلعت "فشنق... أو فشنك".... لا أرض ولا بيت ولا جبس، لا رجعت هي ولا رجع الحمار.
وأنا من الناس البمشي السودان كل سنة للتواصل مع أقرب الأقربين ومشاركتهم الأفراح والأتراح وعشان الأولاد ما يشعروا بأنهم غرباء في بلدهم ... وكدة.
كل سنة في حاجات جديدة:
مصطلحات جديدة ومسميات جديدة (الخرشة... جاري الشحن ... الخ)
أسماء مليارديرات جُدد وكمان صغار في أعمارهم.
نسوان كتار سابقات مركبات الطوسان.
الأدوية في الصيدليات مختلفة الأسعار.
مقابلة الطبيب في شارع الدكاترة بمبلغ 200 ألف جنيه (جنيح ينطح جنيح).
الثقة في الأسرار موجودة والرحمة متوفرة. لكن الثقة في المعاملات النقدية انعدمت (أو تكاد تكون انعدمت).
كثرة البنات الشابات الشحاذات خاصة بعد المغرب في الشواع الرئيسية وبالقرب من المستشفيات وحججهن مقنعة.
وهناك الكثير والكثير بس الله يجب العافية.

عارف يا بلال في الزمن دا، وحسب مراقبتى، أي زول يدخل واسطة بين نفرين يكون متامر مع الزول اليقبض القروش.. فأقبل الإمتحان وتانى الزول البقول ليك جوعان قول ليه وكمان داير أموت من الجوع.
أو كمان ابقالو رباطابى وقولو وهو كان شبعان شغال جبص مالو؟

.