يحي قباني ، فيس تو فيس: عن غنية ، ونفس الغنية..!

08:00 AM Nov, 19 2015

سودانيز اون لاين
Kabar-كـــندا
مكتبتى
رابط مختصر

كدت ان اقول ، حتى انت يا بروتس ، بمناسبة (السواها فيكم مافي زول عملها)..أو نحو ذلك..ولكن..!

هي ، هنا ، خواطر عن الثقافة/الإنسان/التاريخ..والحاجات الحنينة القاعدين نعدي فيها ونحن ماشين في درب المماحكات/المناكفات/ والسياسة الطين يااااااااااااااااخ..!

ثم..

شهادتي ، كان ترتيبهن كالآتي ، بنات ابا البلابل، وبعد اذنك اثتب ليك الترتيب..الكان بيغننا بيهو ايام كعة هاشم العطا ..اوعك تقول لي هاشم ده منو..!!!



هادية كانت طرف ، ونومهم قرف ياعمك..!!


وبعد داك الرصة اتخلبتت..ثم كانت بمظهرها الحالي ، اللي صار رسمي من غير مشورة الجماهير ، وهم نحن ياعمك..!

نقول شنو يا حبيب ، غايتو نحن مع النبي الكريم ، القال نحن خير امة اخرجت للناس..فدشن قدسية الوسطية ، ونحن مع نبينا ، قبلنا بالوسطية ، فتكسرنا محبة سااكت في الوسطاني..الديب سنتر فروج على قول على الحسن مالك..!!

قبل ايام اتكسرنا في مغنية جميلة من بحر ابيض اسمها سمية الجوخ ، وعينك ما تشوف الإ النور..المطاوعية سوها قلة ادب بالباب الواحد ..وانتا يا صاحب ما قصرتا جبت ليك ترلة فيها جرادل عيفونة..!!..غايتو..!

داير اقول شنو؟..

البلابل..الرصة الأخيرة..نحن معاها ، ونحن مع الوسط..!

وبرضك سلام للأجنحة (امال وحياة)، ومن غير ترتيب (عتمان والعاقب: متذكر يا يحي لمن كان العاقب بيغني: يا بلدينا..!!)

المهم..

كبر

ودي الغنية..

طبعا كان ممكن اختار (البنريدو تايه) ، لكن اكتشفت مافي زول غناها في التمانينات..!

اخترت نور بيتنا ، والتحية للبلابل ، مع محبة خاصة للوسط (الديب سنتر فروج ، على قول على الحسن مالك ، والإ ح اقوم اجيب ليكم طه حمدتو (ده الزول الكتب الوسيم القلبي رادو)..!!)..

تحياتي ، ومحبتي استاذتنا الجميلة هادية ( ويا علي عبد الوهاب عليك الله قول لي العبارة دي باللغة النوبية عشان اقولها لأستاذنا هادية)..!!

الغنية: نور بيتنا..البلابل






كبر

نفس الغنية..




استاذنا الجيلاني الواثق *،
تقول عنه الأساطير الكثير المثير..
في حواره ، مع مجلة الإذاعة و التلفزيون والمسرح (لأ ادري سنة كم بالضبط) قام اتحزلق عليهو الصحفي وقال ليهو: شرحبيل احمد ملك الجاز في امسودان..فرد الجيلاني متهكما وقال: انا ملك ملوك الجاز في امسودان..!!
وتقول الأسطورة ، انو الجيلاني نزل كمرشح في دايرة جغرافية (عن الحزب الإتحادي الديموقراطي) ايام الديموقراطية التالتة (1986) وكان خصمو هو استاذنا محمد ابراهيم نقد.. فقام نقد قال للجيلاني: يا ود هوي انتا قايلها لعب.؟؟..شيل عودك واشيل عودي وارحكاكا الميدان نغني ( واشار نقد ، نحو ميدان الحارة الفيها الدايرة الجغرافية تلك..!!)

وبرغم الأساطير عنه ، يظل جيلاني الواثق ، هو ذاك الصوت الحالم المتفرد..وتعجبني فيه حينما يردد اغاني وليم اندريا (زول بتاع جاز اتكتل وهم في صهرجة امسودان ، وحينما سألنا عن الحصل شنو في 1976، كل الخلوق عملوا نايمين)..!!
الجيلاني ، صاحب ، ديل عيونك ولا واحة ، وسمرة يا سمرا..!!

ساحاول ان احضره في تقاطع اخر ، مع فنان الفنانين ، العظيم صديق احمد ، لكن الأصل بصوت صديق اختفي ، وقام صديق اتغاتت وجاب شغل تاني..!!

ونشوفكم في غنية ، ونفس الغنية..!!

كبر
ــــــــــــــــــــــ

*جيلاني ، وليم ، وغيرهم..كانوا بيغنوا بفرقة جاز مافيها كمنجات ، وكانوا بيشتغلوا فيما يسمى بالــ
Night Club
وهو نفس الشغل الكان بيشتغلوهو ناس فرقة القلب النابض في شاليهات علي ضفاف النيل الأزرق (جنب منتزه المقرن العائلي)..طبعا يا يحي انتو ما حضرتوا الشغل ده..!

الغنية..


في ربيع الحب ،الكلمات الشاعر العظيم ادريس جماع ، الغناء الفنان العظيم سيد خليفة..

في اخر مئيتن وخمسين سنة ، بما يشمل السنة الحالية ، اجمل بيت شعر كتب باللغة العربية هو مجزوء من قصيدة للشاعر ادريس جماع..!!

ادريس قضى اخر ايامه ، نزيلا بمصحة للأمراض العقلية..!!!

اما سيد خليفة ،

هو من نفس القرية ، ان لم تخني الذاكرة ،التي انجبت شاعر السودان الفذ ، دكتور محمد الواثق ، صاحب (امدرمان تحتضر) ، وهو عندي اجمل من كتب الشعر باللغة العربية في عصرنا..!
ثم من نفس القرية ثنائي الدبيبة..!! (هل نذكر لهم عمل ؟؟؟)..

كبر

نفس الغنية..



استاذنا ابراهيم خوجلي ،
وهو رجل ليهو اسهامات لن تخطئها الإ اذن بها صمم..!
ابراهيم يسخر ، بانو ناس معهد شنو كده رسبوهو..لأنو ساقط في مادة الصوت..!!
ابراهيم خوجلي من توتي الجمال ، وهي القرية التي منها العملاق العاقب محمد حسن..ونفسها هي القرية التي وقف على اعتابها شاعرنا الجميل امحمد ود الرضي فاخذ يجوعر: من الأسكلا وحلا,,حبيبي اللي للبلد ولى..!!
ثم وقف واحد تاني من عيال البندر اسمو ابراهيم ادريس.. فقام غنا وقال (انا في شخصك ، بحترم اشخاص..ياااااااااااااااخ..!!)

وكاد ان يضيف (من اوصاف عديدة ، بصوت شهرياز ، لكن ربك ستر..!!)

هل سمعت يا يحي ، ابراهيم خوجلي بيغني اغاني العاقب؟...

كبر

ثم كان الماجيك..!!..السحر الذي لا يقاوم..
تحية لأهلي ، صديقاتي واصدقائي في مدينة الدلنج ، تلك التي اسبارها قصائد لاتنتهي..!
سبب هذا الخيط هو الغنية..

والغنية اسمها (في عز الليل)..






شاعرها التجاني حاج موسى ، وانضرب واتفلق ذات يوم ما في بريطانيا ، من قبل ناس فاكرة انها بتكاتل نظام الجبهة الإسلامية..!!
غض النظر عن الحصل ، يظل التجاني شاعر جميل واغنى تجربتنا الوجدانية من (ريحة البن في قلاية ..!)..
الغنية ، طبعا من الحان واداء الأستاذ الكبير عبد الكريم الكابلي...
واخترت الفيرشن دخ مخصوص ، لأنو بيظهر فيهو صديقنا واستاذنا الكمجنست يوسف القديل..!
الغنية لمن سمعناها في منتصف التمانينات من القرن المنصرم كانت بصوت العملاق النور الجيلاني..ولكن .!
قاموا اصحابنا وصاحباتنا من ناس حزب البعث العربي الإشتراكي بالدلنج ، قالوا لينا: الغنية دي اصلا حقت الكابلي..!
ثم بعد داك ظهر استاذنا الكمنجست التجاني الصادق ، وهو افضل من يغني بصوت الكابلي ، وغنى لينا الغنية ، ثم بعد داك مشى التحق بفرقة الكابلي (كعازف كمان)..التجاني..شقيقو الأصغر واسمو صابر الصادق ، واحد من اجمل الأصوات التي تؤدي اغاني عثمان حسين..!!
عمنا الصادق (والد التجاني وصابر) برضك كان فنان ايام شبابو ، فالثنائي المعروف (ميرغني المأمون واحمد حسن جمعة) اصلا كان ثلاثي..والثالث هو عمنا الصادق..!!
الحي الذي يسكنه عمنا الصادق ، حي قعر الحجر في الدلنج ، هو الحي الذي ولدت فيه فنانة سودانية عظيمة اسمها ام بلينا السنوسي..!!
نفس الحي ، يسكنه الآن ، استاذنا ، الفنان التشكيلي عبد الرحمن حامد جمعة (بليا)..!!
ونفس الحي ، على اطرافه ، قبر الفكي علي الميراوي..!!
وكلهم ، في لحظات صفاءهم يترنمون (في عز الليل..!!!!)

هههههههههههههه..!!

نسيت..من ناس الدلنج: الكمنجست محمد عبد الله (محمدية) ، التجاني الصادق ، يوسف عبد الجبار ، يوسف القديل..ومن الهوائيات..بابكر ابراهيم ، عازف الساكسفون الشهير (الزول بتاع صولات حنان بلوبلو في التمانينات) ، ثم عازف الساكسفون ياسر ابراهيم ابكر (شقيق بابكر) ، ثم اسراء ابراهيم ابكر (اسراء بابكر ، اي والله..!!)..التلاتة ديل ابوهم ، عمنا ابراهيم ابكر ، وكان صول واستاذ الموسيقى بمعهد التربية الدلنج (درس يوسف القديل لبعض الوكت)..ومن الطرائف اذكر جاءنا وفد في بصات انيقة من الخرطوم ، والوفد كان قصدو يوثق لمارش سوداني نادر ، وناس سلاح المزيكا قالوا للوفد: الزول الوحيد الحافظ المارش ده وومكن يكتبو ليكم في نوتة هو ابراهيم ابكر..!!


كبر


كبر

ونفس الغنية..

الليجند النور الجيلاني ، وهو الفيرشن الذي شب عليه وجداننا ، انفعلنا ، وتفاعلنا معه..وهو عندي اجمل وابدع تقليد لغنية سودانية ، لأن النور فيه تفوق على نفسه وابدع شكل جديد..
لا نستطيع أن نقول مختلف و مغاير ، ولكن فيه ظلال الفيرشن الأصلي ، يحوم ، يختفي ويظهر..وده السحر..!
طبعا ، النور ، حتى في تقليد اعمال خالو (العظيم خدر بشير..!!) برضك بتحس بالتمييز فيهو..!
لكن اهم حاجة عند النور ، اضافة لإبداعه المتنوع والمتجدد ، هو مظهره وقدرته الفائقة على التواصل مع جمهوره..
وكما قالت بنياتي عنو"
This dude is so talent!!
he know how to connect with his audience







التحية لكابلي ، النور ، التجاني حاج موسى ، التجاني الصادق ، يوسف القديل...واهل الدلنج..!
نشوفكم في غنية ونفس الغنية...!

كبر

Quote: هي ، هنا ، خواطر عن الثقافة/الإنسان/التاريخ..والحاجات الحنينة القاعدين نعدي فيها ونحن ماشين في درب المماحكات/المناكفات/ والسياسة الطين يااااااااااااااااخ..!

سلام يغشاك يا صديقي ...

وين السياسة دي عليك الله ؟ ده ممكن تقول عليهو ( عك ) سياسي ...

انا شخصيا يا كبر عاهدت نفسي اليوم الاتكرم علي فوقه اخونا بكري بباسويرد ...و ما زلت حافظاً للعهد ان لا اتحدث عن السياسة في هذا الزمن ذو الملامح المعكرة ...

لو على الكم بوست الفتحتهم اليومين ديل و اتكلمت فيهم عن مصر و السودان ... فدي ما سياسة ..

ممكن تقول عليها دراسات ( إنسانية ) و علم نفس لمحاولة فهم الشخصية السودانية الجديدة ...
_____________________________________________________________
ما علينا ...

نجي لكلامك السمح و حاجاتك السمحة ...

Quote: وبعد داك الرصة اتخلبتت..ثم كانت بمظهرها الحالي ، اللي صار رسمي من غير مشورة الجماهير ، وهم نحن ياعمك..!

في معاكسة مع احد أبناء الموسيقار العجيب بشير عباس هنا في كندا ...

سأل احد أصدقاء الأستاذ بشير عباس في اول زيارة لبشير للسودان بعد غيبة هنا ...

سال ابنه الصغير ( يا ولد ابوك خبره شنو ؟ )

قال ليهو والله يا عمو حفلات و استقبالات كبيرة ... و امس عملوا ليهو حفلة بي ندى القلعة !!

فرد الصديق سائلاً ... عليك الله ندى القلعة دي ( جابوها بي كم ؟ )

قال ليهو يا عمو جات غنت مجانا طبعا ... لانو ابوي فنان كبير زي ما عارف ...

فرد الصاحب ( معاكسا ) انت ياولد ما تكون قايل ابوك ده رياض السنباطي ...

مش ياها لون المنقة دي ... جيب لي غتا الحلة داك هسي بعمل واحده زيها ...

الشاهد يا كبر ... انو بشير عباس اخرج صنيعاً من بين يديه اسمه البلابل ...

لم يفلح غيره فيه حتى تاريخه ...

اما عن ( الرصة ) ... فبدأت فسيولوجياً لطول قامة حياة و منطقية وجودها في الوسط ...

ولكن ( لطول قامة صوت هادية ) الما بتصاقع استوجب ( البالانس ) ان تتوسطهم هادية و الا الغنا يبقى ( مونو ) او زي البتسمعه بي سماعة واحده... :)
__________________________________________________________________________________________________
الغنية و نفس الغنية ...

ساعود يا حبيب ان شاء الكريم بدرر يستحقها بوستك هذا ...

نرفع البوست لمزيد من القراءة وإماطة الأذى
وفي ذلك حسنة

الصديق الجميل استاذي هاشم صديق دائما في نقاشنا يذكر ان الأغنية عبارة عن ( مثلث )

الشاعر - الملحن و المغني ...

واحد من المثلثات ... يحتاج حساب مثلثات لفك طلاسم جماله ...

ليه حساب مثلثات ؟

اول شيء حميدة أبو عشر !!!

الزول البسيط داك ... الزول الحرفي القائم على السليقة ...

الزول الكتب كلام عجيب لما قال:

نسيت الماضي يا ليلي وماضي الحب والطهر
ليالي نقضى الليل بحلو النجوى والشعر
ليالي حبنا الاولي
نسيتِ الليل اذ كنا نفدي النفس بالنفس

و الاعجب كمان قال :
غضبك جميل زي بسمتك !!!

و الله الذي لا اله الا هو ... لو ما كانت ريدة صافية صفاء الماء على البلور ...

ما قارن الغضب بالبسمة !!!

اها ضلع المثلث الأول ده قام جا و كتب كلام وقال :
محبوبي لاقاني .. و بي بسمة حياني ...

الضلع التاني كمان اعجب ؟ ... لأنه براهو عمل حاجة اسمها ( ما شقيتك ) كتبها زول عجيب تاني اسمه خدر حسن سعد...

و قابل فيها كلام المصطفى زملوني و دثروني .. اغنية تدخل توش جوة القلب ... و تقعد في الراس تزننننن ... و تزوزي بيك ...

قوم يا حسن سليمان الهاوي و ( فردة أبو علي ) و الكان بلبد معاهو يسمعوا الخليل في ديوان عبد القادر سليمان ( شقيق الهاوي الأكبر )

قوم يا الهاوي خت لحن عجيب ... و خلي صاحبك حسن محمد عطية الريح الضلع التالت للمثلث الناري ده يغني الكلام العجيب ...






و حمد الريح قام دندن بيها في جلسة ...




و عربون محبة لي كبر وود الزبير ...

ما شقيتك بصوت سيدها ...

ول ابا معاوية..حبابك يا صديقي

كتر خيرك على رفع البوست..

لكن (اماطة الأذى) دي قاسية ، مع ناس عمك كبر الجايين بحكاية (مع سبق الإصرار والترصد)..!!

شرحوا..اخير بدل الإماطة ، تعال اترصد معانا ساكت يا صديقي..!!

كتر خيرك يا معاوية..طبعا كبير المستنيرين بيكون قاعد يشف ساكت ، مرة يلقط ، ومرات كتيرة يجليها..!

كبر

ول ابا يحي..حبابك يا صديقي..

زمان ابكر ادم كان قاعد يتونس معاي ، والزول ده عندو سخرية بيعرفها براهو..اها جات السيرة في شغل ابونا ابوعشر بتاع (روضتي الغناء)..وابكر رجع خلف في الكرسي ، وقال لي..عارف يا كبر ، مرة مواطن واحد (من امسودان طبعا) كان زعلان ومستغرب من كلام ابو عشر لمن قال (وكسرت ابريقي والدنا)..اها المواطن اياه ، سأل ابكر ادم مستغربا وقال ليهو كيف يعني يكسر ابريق والدنا (الوالد الواحد ده يا يحي..والله صحي..!)..!!

غايتو ،من ديك ، ونحن في اصقاع البراري والجليد والبرد..بر اي قلت لنفسي: ابو عشر ده فايت الناس بسنوات ضوئية..!!

هل ملاحظ يا يحي ، في الفيرشن بتاع (محبوبي لاقاني/بالعود) أنو حصلت حاجة نادرة شديد..وهي انو المعلم حسن عطية ، طيب الله ثراه ، قام غني بصورة فيها مخارج الحروف واضحة للغاية ، وهي طريقة خلاف لطبيعة المعلم حسن ..!
والأسطورة بتقول: قام واحد عمل لقاء مع المعلم حسن عطية ، وقال ليهو:ليه انتا بتقوم تدغمس الحروف والكلمات في غناك؟..

فقام المعلم حسن قال ليهو: اغنيها ليكم بحروف واضحة عشان باكر القاها حايمة في الإندايات (واشار نحو ناس: نزلت دموع عيني ، بتاعة طال هجرك يا بنية..ناهيك عن : انتي كلك زينة وحايمة كالوزينة ، يحفظك مولاي..!!!)..تسطيح شديد بالجماهير ..مش؟..

وهنا نفس الغنية..
كبر

هنا نفس الغنية..
محبوبي لاقاني..



غايتو سيد خليفة ، عليه السلام ، ما بيقلد زول بأخوي واخوك..!!

كبر

كتر خيرك يا يحي على الهدية ، فسليمان الهاوي من النوادر العجيبة يا صديقي..

وهنا نفس الغنية ..

ما شقيتك..



ويقال ،

الفيرشن بتاع مصطفى ، جاب ابيات غير ظاهرة في الفيرشن الرسمي المنشور في اذاعة (هنا امدرمان) ، والله اعلم..!

وبرضك ، ستظل هناك..الغنية..
ونفس الغنية..

تحياتي..

كبر