و الله العملها فيكم بالغ !

Post: #1
Title: و الله العملها فيكم بالغ !
Author: يحي قباني
Date: 11-02-2015, 03:05 PM
Parent: #0

02:05 PM Nov, 02 2015
سودانيز اون لاين
يحي قباني-فى الدنيا العجيبة
مكتبتى فى سودانيزاونلاين

طبعاً مع الاعتذار للناس الحلوة ...
___________________________
زمااااان ...

واحد سكران سكرة يني ... واقف داير توصيله اوتوستوب ... طبعا كمل قروشه كلها في الشربه ...

مادي اصبعه و يترتح ... زول اشتغل بيهو مافي ...

لغاية ما جات عربية البلدية ... ملانه جرادل وقفت ليهو ... وهو مع السكره ما شايف ...

ركب و قعد وسط الجرادل و قايلهم ناس ...

اها السكه كلها الجرادل تنخج ... و الريحة كتلتوا ...

بس وصل محل بيتهم و نزل ... رجع لي ورا و رفع يدوا الشمال و قال ليهم :

على أي حال شكراً ... لكن العملها فيكم بالغ !!!
_________________________________________________
انتو اليومين دي الحاصل شنو ؟

Post: #2
Title: Re: و الله العملها فيكم بالغ !
Author: صلاح عباس فقير
Date: 11-02-2015, 03:24 PM
Parent: #1

لا يا قباني ما في داعي للاعتذار!

عجبني ليهو!
هههه

وتحياتي!

Post: #3
Title: Re: و الله العملها فيكم بالغ !
Author: يحي قباني
Date: 11-02-2015, 05:48 PM
Parent: #2

يافقيري

ياخي و الله حاجة صعبه

مافي حاجة غير دوشمان و منو البتلفظ اكتر

Post: #4
Title: Re: و الله العملها فيكم بالغ !
Author: علي عبدالوهاب عثمان
Date: 11-02-2015, 05:59 PM
Parent: #3

حبيبنا يحيى .. تحياتي ..
أي بوست ليك .. بجيك جاري عشان دائماً ما تذكرنا الزمن الجميل أيام الشباب ..
المرة دي بس يكفيني توقيع عزالدين كاركتير ( رحمه الله ) ..
ما عارف إنت كيف تختار أدوات البوستاتك ..
زي بوست ( تعلق قلبي ..) ذكرتنا ايام إذاعة البي بي سي ..

تحياتي لك .. وسمعت أمس دكتور يشرح قناة أم بي ئي .. إستحضار أيام الشباب .. فيه علاج ..

مودتي .. أنس الباقين وخليك في طريقك الرائع ..

تحياتي ..

Post: #9
Title: Re: و الله العملها فيكم بالغ !
Author: يحي قباني
Date: 11-02-2015, 11:48 PM
Parent: #4

استاذي العزيز جداً علي عبد الوهاب ...

شاكر فضلك يا اخي على الاطراء الغير مستحق و الله ...

اختيار البوستات ( قبيل حاولت ارد من التلفون و الاوتو سبيلنج كتبها ( بروستات ) ... ربك ستر ما كملت ...

اختيار البوستات مجرد جو عام بعيد ذكريات جميله و تاريخ مليان احداث ...

فلو كان حال المنبر جميل مرقت بوستاتنا ...

يعني تلقى ود الزبير جاك باشراقات ... ود ابسن جاك بذكريات و د المدير و ناس عبيد وود المرتضى و العجايز الباقين ( في منهم اتنين هنا )

طوالي ( تنداح ) ... " رغم اني ما عارف اندياح دي تصريفها شنو لي حسي " ...

يعني لو كان مكتبك بطل على حديقة مليانة ازاهر و ورود ... قطع شك ما حيمرق منك الا كل ماهو جميل ...

اما لو فاتح على احد ( المقالب ) ... فتجيب من وين ؟

Post: #5
Title: Re: و الله العملها فيكم بالغ !
Author: الطيب عباس
Date: 11-02-2015, 06:16 PM
Parent: #1

Quote: على أي حال شكراً ... لكن العملها فيكم بالغ !!!

هههههههههههههههههههههههههه هههههههههههه
تحياتي قباني .. ياخ دي البوستات تجي تقولي ود المسلمي يسل روحنا بي بت ماتت ÷ههههههههههههههههههههه

Post: #6
Title: Re: و الله العملها فيكم بالغ !
Author: محمد أبوالعزائم أبوالريش
Date: 11-02-2015, 07:02 PM
Parent: #5

Quote: واحد سكران سكرة يني

الأولاد السغار الزينا عايزين شرح يا عمو

Post: #7
Title: Re: و الله العملها فيكم بالغ !
Author: عاطف عمر
Date: 11-02-2015, 07:09 PM
Parent: #6

Quote:
واحد سكران سكرة يني

الأولاد السغار الزينا عايزين شرح يا عمو

هههههههههههههههههههههههههههههههههههههه

تلقاك يا الممسوخ كنت من ( ندامى ) يني دا

_______________________

يا أبو الريش قدر ما حاولت أمشي من تعليقك دا ما قدرت
فاااااااااااااا دحين فوت ( الشوتة الضفارية دي )

Post: #11
Title: Re: و الله العملها فيكم بالغ !
Author: يحي قباني
Date: 11-02-2015, 11:56 PM
Parent: #6

Quote: الأولاد السغار الزينا عايزين شرح يا عمو

سمِــــــــــــحْ ....

Post: #10
Title: Re: و الله العملها فيكم بالغ !
Author: يحي قباني
Date: 11-02-2015, 11:54 PM
Parent: #5

الطيب عباس يا أمير ...

قالوا لزول اكتب قصة عن الانسان ..

قال الانسان خُلقَ فعاش َ فماتْ ...

سل الروح و التطويل ما ليهو حق فيهو المسلمي ...

و كتابته زاتها قاده ههههه ...

داير يعمل اثارة ... زي البكتب في قصة في فلوسكاب و يفط سطرين عشان يكتر الورق .... :)

Post: #8
Title: Re: و الله العملها فيكم بالغ !
Author: عاطف عمر
Date: 11-02-2015, 08:09 PM
Parent: #1

Quote: رجع لي ورا و رفع يدوا الشمال و قال ليهم :

يا قبة الوصف دا إتقطعت فيهو
رجعة وراء ورفعة اليد الشمال وكمان لو معاها ( كريعة ) تكون ياها زاااااااااااتا

Post: #12
Title: Re: و الله العملها فيكم بالغ !
Author: azhary taha
Date: 11-03-2015, 00:26 AM
Parent: #8

ناس الزمن الجميل ازيكم ..........واحد من ذاك الزمن

Post: #13
Title: Re: و الله العملها فيكم بالغ !
Author: معاوية المدير
Date: 11-03-2015, 04:00 AM

Quote:
اما لو فاتح على احد ( المقالب ) ... فتجيب من وين ؟

ههههههههههههههههههه،

جيب من جوّة يا فردة،
شغلك نضيف .
بعض البوستات تدخلك ليها الزنقة، تلقى نفسك دخلت بشمالك
ؤُ قلت اللهُمّ إني اعوذ بك من الخبث والخبائث بعد تقطع الجُمار
بالراااااحة تمرق بيمينك ؤُ تقول، غفرانك ...

Post: #16
Title: Re: و الله العملها فيكم بالغ !
Author: محمد أبوالعزائم أبوالريش
Date: 11-03-2015, 05:45 AM
Parent: #13

Quote: تلقاك يا الممسوخ كنت من ( ندامى ) يني دا

يا نديمي دعك من عثرات قولي
واترع الكأس وناجي الكون مثلي
لا تظنني أبيد العمر لهواً
إذ أنا جسمٌ به البركان يغلي
سوف يأتي باسم الثغر
يلوّحُ بالأماني
ضي عينيه بريقٌ وغموضٌ ومعاني

Post: #18
Title: Re: و الله العملها فيكم بالغ !
Author: يحي قباني
Date: 11-03-2015, 06:01 AM
Parent: #16

Quote: يا نديمي دعك من عثرات قولي
واترع الكأس وناجي الكون مثلي
لا تظنني أبيد العمر لهواً
إذ أنا جسمٌ به البركان يغلي
سوف يأتي باسم الثغر
يلوّحُ بالأماني
ضي عينيه بريقٌ وغموضٌ ومعاني

في داعي حسي للكلام ده .؟

كنت ماشي انوم ...ياخي ... حرام عليك ...

Post: #17
Title: Re: و الله العملها فيكم بالغ !
Author: يحي قباني
Date: 11-03-2015, 05:55 AM
Parent: #13

Quote: بعض البوستات تدخلك ليها الزنقة، تلقى نفسك دخلت بشمالك
ؤُ قلت اللهُمّ إني اعوذ بك من الخبث والخبائث بعد تقطع الجُمار
بالراااااحة تمرق بيمينك ؤُ تقول، غفرانك ...

و الله يا مدير حاجة صعيبة ...

المشكلة تمرق بشمالك ... و تقول امشي ارتاح لي في بوست كده يعيد لي التوازن ...

دايماً بمش لي بوستات ود المشرف عشان ما انسى الكلام و آخُد لي انجمامه ...

الا اليومين ديل من يوم ما عاطف عمر قال ليهو ما بعرف شنو ...

بالله العربي حقه بقي من العهد القديم و لي ورا ...

كلمة تفهم عشره ما تفهم ...

كنا معاهوا لغاية جبرائيل ماركيز و الكوليرا ... لكنه غرّق لينا في نيتشه و كانت و ارسطوطل ... بقيت الا تقراهوا من الشمال لليمين حتين يتسق ...

Post: #15
Title: Re: و الله العملها فيكم بالغ !
Author: يحي قباني
Date: 11-03-2015, 05:43 AM

Quote: ناس الزمن الجميل ازيكم ..........واحد من ذاك الزمن

عشت معانا الزمن داك يابو الزهور معناتها وجع القلب محمدك ...

السودان قبال ما القيامة تقوم فوقه ...

Post: #14
Title: Re: و الله العملها فيكم بالغ !
Author: يحي قباني
Date: 11-03-2015, 05:40 AM
Parent: #8

Quote: يا قبة الوصف دا إتقطعت فيهو
رجعة وراء ورفعة اليد الشمال وكمان لو معاها ( كريعة ) تكون ياها زاااااااااااتا

شقينا المقابر يا عمو كم مره كده ...

( كريعة ) دي الا يكون شارب بيرة كتيره او مريسه وممكن بغو ...

لكن سكرة زولي دي كانت عرقي عيش اظنها ...

Post: #19
Title: Re: و الله العملها فيكم بالغ !
Author: يحي قباني
Date: 11-03-2015, 06:23 AM
Parent: #14

بعدين قصة كل شوية واحد ماشي ينوم قبال ما يكمل قصته دي شنو ؟

تاااااني واحد قال الساعة ( الثانية عشر ) ليلاً ...

طيب بديت تكتب اتناشر الا خمسه ليه و انت عارف انو الساعة 12 بتجي بعد شوية ...

خايف ( بنات ) أفكارك يطيرن ؟

لأ ... كمان قصة كل تلاتة سطور في رد دي مدرسة تانية ...

قدر ما حاولت اتعلمها .... برضو اررررر اكُب العندي في رد واحد و اقعد اتلفت ...

صحي التقل صنعه ....

Post: #20
Title: Re: و الله العملها فيكم بالغ !
Author: علي عبدالوهاب عثمان
Date: 11-03-2015, 06:53 AM
Parent: #19

Quote: السودان قبال ما القيامة تقوم فوقه ...

يا سلام الراتب 38 جنيه .. مدرس في أقصى الشمال ..
ميز المدرسين والهجيج والخروف والعتوت والأكل .. فقط 7 جنيهات
باقي الماهية الواحد ما كان عارف ماذا يفعل به .
والد الله يرحمه راح الحج بـ 250 جنيه فقط ..
نزور العاصمة في الاجازات السنوية 60 جنيه سياحة في شارع الجمهورية لمدة شهر
وكمان ما تنسى كان يرافقنا دليل سياحي من إخواننا المقيمين في العاصمة برضه مصاريفه علينا

ليت الشباب يعود يوماً ..

Post: #21
Title: Re: و الله العملها فيكم بالغ !
Author: يحي قباني
Date: 11-03-2015, 04:23 PM
Parent: #20

Quote: يا سلام الراتب 38 جنيه .. مدرس في أقصى الشمال ..
ميز المدرسين والهجيج والخروف والعتوت والأكل .. فقط 7 جنيهات
باقي الماهية الواحد ما كان عارف ماذا يفعل به .
والد الله يرحمه راح الحج بـ 250 جنيه فقط ..
نزور العاصمة في الاجازات السنوية 60 جنيه سياحة في شارع الجمهورية لمدة شهر
وكمان ما تنسى كان يرافقنا دليل سياحي من إخواننا المقيمين في العاصمة برضه مصاريفه علينا

ليت الشباب يعود يوماً ..

ليت السودان يعود يوماً لأخبره بما فعل البشيرُ

كان الخروج من السودان للعمل قبل عهد النميري يشوبه بعض العيب ...

لو كان راتبك يكفي لفتح بيت اسره ... و يمكنك ان تعيش عيشة كريمة ...

اما عهد النميري عهد الفقر و الذي اعقبته فترة ديموقراطية هزيلة اضاعها الصادق المهدي كلاماً و ثرثرة ...

ثم أتت ( الإنقاذ ) ... و انقذونا من كل ما هو كريم و عفيف ... و تشردنا في كل بلاد العالم ...

كنت في السبعينات لو رأيت سوداني في أي دوله تأخذه بالأحضان لأنه حدث فريد ...

اما الآن ...

Post: #22
Title: Re: و الله العملها فيكم بالغ !
Author: نصار
Date: 11-03-2015, 04:46 PM
Parent: #21

يا دكتور دي ما مجرد نكتة
حصلت حقيقي في مدني من استاذ علم في المدينة
و من اكبر اسر مدني
مافي داعي لذكر الاسماء و رحم الله الاستاذ الجليل

Post: #25
Title: Re: و الله العملها فيكم بالغ !
Author: يحي قباني
Date: 11-03-2015, 06:23 PM
Parent: #22

Quote: يا دكتور دي ما مجرد نكتة
حصلت حقيقي في مدني من استاذ علم في المدينة
و من اكبر اسر مدني
مافي داعي لذكر الاسماء و رحم الله الاستاذ الجليل

تعرف يا نصار انا قربت اطلع دكتور ...

و كمان ازيدك من الشعر بيت ...

كنت بمشي مع اصحابي الدكاترة ازورهم في نبطشياتهم في الخرطوم ...

كتير من المرضي يقولوا ليهم ممكن الدكتور داك هو اليكشف علينا ... و المقصود انا ...

الشاسيه شاسيه دكاتره شكلوا يا نصار لكن مشينا معمار نعمل شنو ؟
____________________________________________________________________
اما حقيقة القصة ... فانا دايما على قناعة انو كل قصصنا عندها اصل و لازم تكون حصلت هنا او هناك ...

و اهو انت جبت لينا المعلومة ...

Post: #23
Title: Re: و الله العملها فيكم بالغ !
Author: محمد أحمد الريح
Date: 11-03-2015, 04:49 PM
Parent: #21

شغلك نضيف وخلّيك مع الفن وسيبك من السياسةالتى تـصيب بالقرف

Post: #24
Title: Re: و الله العملها فيكم بالغ !
Author: معاوية الزبير
Date: 11-03-2015, 05:10 PM
Parent: #23

غيبة اليومين الفاتو ديل يا قباني افتكرتك حردان مع الحردانين
لو طولت الغيبة شوية كنت ح أفتح بوست بأسمائكم
أقول ليكم دا حال المنبر عندو دميرة بتقوم عليهو لكنه لا يلبث أن يصفو
وقد كفتني عودتك ومداخلات من بعض من حسبتهم حردانين مشقة التبرير والتفسير
عادي ياخ

Post: #26
Title: Re: و الله العملها فيكم بالغ !
Author: يحي قباني
Date: 11-04-2015, 00:10 AM
Parent: #23

Quote: شغلك نضيف وخلّيك مع الفن وسيبك من السياسةالتى تـصيب بالقرف

سعادتك ...

الفن هو الباقي لينا ... سياسة يشتغلوها مع منو على قولة د. الواثق كمير ...

Post: #27
Title: Re: و الله العملها فيكم بالغ !
Author: يحي قباني
Date: 11-04-2015, 01:19 AM
Parent: #26

Quote: غيبة اليومين الفاتو ديل يا قباني افتكرتك حردان مع الحردانين
لو طولت الغيبة شوية كنت ح أفتح بوست بأسمائكم
أقول ليكم دا حال المنبر عندو دميرة بتقوم عليهو لكنه لا يلبث أن يصفو
وقد كفتني عودتك ومداخلات من بعض من حسبتهم حردانين مشقة التبرير والتفسير
عادي ياخ

ود الزبير يا حبيب ...

الغيبات كانت شوية شغله بس ...

لكن ما يمنع انو الوضع هنا بصراحة ريحتو عيش ناشف ...