رمضان الفات في المعمورة لاقوني موقفين عربيتهم وناداني رجل خمسيني كده : يا ولدي يا ولدي لو سمحت دقيقة بالله الزول أكبر مني مشيت عليهو لغاية جيتو جنب عربيتو حكى لي أنو جايي من مدينة كذا وأمو اتعالجت وقطع قروش ومحتاج بس قروش بنزين توصلوا وأول ما يوصل حا يحول لي القروش رصيد ووراني الأسرة فعلاً معاهو إمرأة كبيرة وأخرى ماسكة طفل واقفين خارج السيارة وقال لي تلفوني حصلت فيهو مشكلة لو ما كده كان اتصل بي قريبو دكتور في مستشفى الخرطوم لكن ما حافظ رقمو وقصة طويلة كده ، ونفس الحنك العنصري البغيض : كلنا أولاد عرب والله لمن قال الكلمة دي كرهتو من قلبي بس قلت عشان خاطر أمو و زوجتو وطفلو الصغير بعد أديتو القروش قال لي رقم تلفونك عشان احول ليك فيهو الرصيد لمن أوصل قلت ليهو يا حاج اتوكل على الله انا ما عايز منك حاجة وربنا يوصلكم بالسلامة ركبوا عربيتهم وفاتو .. الحقيقة قلبي أكلني من أسلوب كلامو لأنو أسلوب (شحاد محترف) لكن عينك بتكذب قلبك .. ما ممكن زول شحاد يكون سايق عربية زي دي! الله المستعان ..
Post: #4 Title: Re: ناس الخرطوم يرجى الحذر من عصابات تقود سيا� Author: صلاح عباس فقير Date: 10-30-2015, 02:40 PM Parent: #3
حيا الله باشمهندس محمد، والله نفس الظاهرة دي أنا لاحظتها في المملكة، وبالتحديد في رمضان، وخاصة في الطريق بين مكة والمدينة، عصابة في سيارة ومعهم امرأة، ولاحظت طبعاً أنهم بقصدوا السودانيين خاصة! فأنا أنبه الإخوة السودانيين في مواسم الحج والعمرة!
هسع انا ما فهمت منو العاوز يغش التاني.. هل السايق العربية ولا الزول الواقف بالشباك وموقف عربيته قدام العربية الأولى.. والحاجة التانية يعني شنو يحول ليه القروش رصيد في التلفون يعني حيستفيد شنو من الرصيد . حيتكلم بيهو مع أصحابه والقروش تروح مكالمات ولا شنو!!! وشكرا على التنبيه.. ودمت بالف خير وصحة وعافية
Post: #6 Title: Re: ناس الخرطوم يرجى الحذر من عصابات تقود سيا� Author: أحمد محمد عمر Date: 10-30-2015, 03:05 PM Parent: #5
الرصيد هو وسيلة التحويل البنكي في السودان يا بسمات شكلك طولتي من البلد بتمشي بيها لي اقرب بياع رصيد بشتري منك الرصيد كلو بي خصم 10%
موضوع الشحدة بقى احترافية وكتيرين الزي ديل ومالين الاسواق قبل كدة لاقتني واحدة وأدتني كمية من الأوراق الطبية قالت عاوزة تعمل صورة مقطعية لي ابوها طوالي شلت الورق كلو وقلت ليها خلاص انتظريني أوقف امجاد نمشي نسوق ابوك المستشفى بعمل ليه الصورة وارجعكم البيت ولو عندو علاجات بشتريها قالت لي ابوي ما برضى زول يساعدنا انت اديني القروش وانا بعملها قلت ليها ولما تشيلي ليه قروش وانتي ما شغالة ما حيعرف إنه في زول ساعدك ؟!! من الآخر كدة قرش في يدك ما بديك .. لو ابوك فعلاً عيان نمشي نعالجه غير كدة مافي قالت لي خلاص شكراً ليك ما دايرة حاجة
.
Post: #7 Title: Re: ناس الخرطوم يرجى الحذر من عصابات تقود سيا� Author: محمد البشرى الخضر Date: 10-30-2015, 03:34 PM
سلام محمد عبدالله للأسف المحتالين ديل بقتلوا المروءة في الناس . لكن تعرف ظاهرة الاحتيال بالأسرة دي ما قاصرة على السودان لاقتني في الإمارات أكتر من مرة, شحط باكستاني طويل عريض معاه مرته لاقاني في العين حكى قصة قريبة انو عمه اتوفى في المستشفى وهو من الشارقة وعايز يعمل افجراءات دفع العنده كله واسي عايز بس حق البنزين بعد شهور لاقاني في كافتريا على طريق الدبي العين خليتو بعد حكى قصتو كلها المرة دي قال عمه راقد في المستشفى ماشي يشوفه قلت ليه انت ياخي قلت عمك دا مات ولاقتيني قبل كدا وبتاع الراجل اتخلع لكن بسرعة ولا اتلفت قال لي دا عمي التاني :)
Post: #8 Title: Re: ناس الخرطوم يرجى الحذر من عصابات تقود سيا� Author: Mohd Ibrahim Date: 10-31-2015, 02:00 PM Parent: #7
Quote: هسع انا ما فهمت منو العاوز يغش التاني.. هل السايق العربية ولا الزول الواقف بالشباك وموقف عربيته قدام العربية الأولى..
فعلا انا ماعارف منو المستنكح ..عليك اللة كمل القصة للاخر ..لانو الزول في الشباك دا مقنع جدا وكلامو واضح وانا كنت ح اديهو اي حاجة في جيبي ...اذا طلع مستنكح فدا ممثل بارع ضل طريقة ..
