ما خاب ظني فيكي

11:29 AM Oct, 03 2015
سودانيز اون لاين
د.محمد حسن-
مكتبتى فى سودانيزاونلاين



ادمنت فيك رنة الحرف
البياخد من محاسنك
أحلى ريق
وجريت عليك عز المطر
والبرق كان واقد بريق
بيناتنا كان
سكة حديد
وقطار من الأشواق بينهب
في الطريق
وكتبت ليك
المفردة الشالت ملامح دمي
من عرق الوريد
فيها التسابيح الهيام
فيها الملامح الالفة
والجوف الحريق
وهمستي لي
خليك علي القيف الأمان
ما تمشي للهدام هناك
النيل عميق
ضحكت في سري
وحكيت
ناجيت فوادي الما بنوم
الزولة ما عرفت حقيقة
اني في عمق المحاسن
كنت قد
أضحيت غريق
بيناتنا موعد
جوة في عمق التواصل
عن زهو الحروف جوة في بطن الكتب
وعن
تاريخ انطمس مرمي
في قارغة طريق
ونحن في عز الشجى
بيناتنا التهب الحنين
كان همسك المليان ومترع
بالحنين
خليك قريب
خليك حبيب
خليك لي اجمل صديق
ومشينا كان
جوانا احساس الامل
نفرح مع القمري الرجع
نغشى البيوت
في كل شوارع دي المدينة
نملاها بالاحساس سكينة
نغرس ملامح الفال على
كل ابوبا حزينة
عانت الزمن الضنك
كاويها ضيق
انا وانت والنيل الزمن
نتراشق الكلمات جدل
موسوم غزل
نتبادل الحساس خجل
انا يا صبية
زولا عشق درب المتاهات في عيونك
كلما ارجع الاقي
صباح بطل
تاني اتوكل وانم
مسداري والشوق الدفيق
ونظل نطلسم في الاجابة
والسوال قادوس بلف
والساقية تنهل
من معين بعض الحقيقة
حالة استنباط
او حالة استبطان
او حالة استرجاع
مشاعر زول رفيق
خلينا في النيل والنخيل
والدنيا ما بين العصير
ومغيب شمس
نتلاقى جمب القيف
ونشرب مرة من كاسك سلاف
نسكر نعب من الطرب
والاغنيات بيناتنا عن عزة خليل
وكلام جميل
ويغمرنا شلال الضيا
من القمر نصحى ونفيق
والموجة لما تغازل الضفة
وتهمس ليها بي
سر الجمال الفي عيونك
يمرق من القيف الشهيق
والدهشة تدخل بين مسامات
الزمن
جواي اتوحد زمانك والمكان
عشتك حلم
عشتك تفاصيل اغتراب
حين رجع جواي احساس الوجع
وعز يا غالية اقتراب
شفتك تصاوير
في عيون الصحو في وضح النهار
لمن نضح وجدي الجهار
جواي تكبر ،
كلما ومضت عيونك،
ايقونة الصبر الرقيق
ظلت تجابه
طيلة العقدين مخاوف
وانكاسارات من زمن
عسكر صفيق
باقي الكلام بيناتنا
اتوزع هناك
بين كهوف الليل
والفجر اندياح
يا زول صباح
انا اصطفيتك
و نبضي بين ايديك امانة
خليك امين
جوايا ليك
وحياة عيونك يا جميل
احساس عميق
وبس

وكتبت ليك
المفردة الشالت ملامح دمي
من عرق الوريد
فيها التسابيح الهيام
فيها الملامح الالفة
والجوف الحريق

***

هذه الجزئية منحوتة من أعمق أغوار الحِس و مغروفة بحبال الوريد ومثبتة بأركان الفؤاد

أبو التومات سلام

=

شكراً لك د. محمد حسن وأنت تُهدي المنبر حروفكم وبروقكم في هذا الزمن (الموحش المكهرب بالحريق) ، (الزمن الضنك) ، (زمن عسكر صفيق) كما وصفتموه..
و(زمن الشقا) (زمن الأسى) (زمن العذاب) (زمن العزوف والاغتراب)
كما وُصف من قِبل زميلكما الشاعر المبدع (صلاح حاج سعيد) في قصيدته (قمر الزمان):

وكتبت ليك لا بيني بينك ريدة لا قصة غرام
إخترت ليك أجمل حروف وأصدق فواصل نادرة في لغة الكلام
لا قصدي ألهو معاك بي كلمات غُنى
لا حروفي ليك مرجيحة من شعر الغمام
وكتبت ليك والله يا قمر الزمان
شان جيتي بي زمن المحنَّة
وشفت في عينيك حس أهلي القُدام
وكتبت ليك وأنا جاي من زمن الشقا
مرسوم على وش الثواني مظللا
تتمدد الساعات سنين
تتفتح الأحزان غريبة ومذهلة
واشتاق افتش نسمة في الزمن العذاب
وايامي من كُتر الأسى
وكُـتر العزوف والاغتراب
صارت حروف مترهلة
كلمات أسيفه ومهملة
وكتبت ليك .. ووقفت ليك لامن لقيتك جاية في قلب الطريق
ولمحت فيك راحة المشاوير البعيدة
ولفحة النسمة الحنينة الجاية من جوف المضيق
حسيت عجايب الدنيا إتلمت
بِقت جاياني من عصراً سحيق
عينيك حِس أطفال بنادو القمرة للغايب يعود
وجبينك الضواي حجا الحَبُوبة في الزمن السعيد
يا قمرة أقلبي السنسنة الحمرة شوفي ابوي ليه ما جا
وانا في قساوه الزمن الموحش المكهرب بالحريق
أنا حيلتي ايه قول لي يا قمر الزمان
غير أتكي واحلم معاك واحضن أماسي الصحو والأمل البريق
قولي لي يا قمر الزمان أنا حيلتي أيه قولي لي يا قمر الزمان

الشكر لك د. محمد حسن
والتحية لك وللأخ الأستاذ أبوجهينة
ولكل المبدعين.
...
..
.

ابو جهينة
صديقي الاديب
قراءتك تاخذ ابعاد
وانتظرها بشغف حيث ترشدني الى موضع قدمي
لك احترامي وكثير تقديري ناهيك عن مودتي التي تعلم