اغاثة الملهوف والفزع الفزع دة براهو يقوم مقاما انسانيا راقيا و كباس في الضلام وقتين يموتو ويضيقو الناس جبار الكسور عجزت الانقاذ رغم سوءها من انتزاع قيم طمرتها الحاجة والظلم
شعرت بالفخر دون تعجب او اندهاش والحديث عن مواقف السودانيين ابان كارثة الحج . المواقف الفردية والجماعية . من دون كل الحجيج افراغ كل الخيم عدا واحدة وضعوا فيها متعلقاتهم . وتركوا بقية الخيم لانقاذ الجرحي .. وتحركوا بشكل فردي في المساهمة في انقاذ الجرحي .. تحرك فردي بدأ كأنه قرار جماعي وكانت القصص التي يعدها الاخرون بطولة ويعدونها واجب
Post: #7 Title: Re: كارثة الحج واصالة السودانيين Author: معتصم سليمان Date: 09-30-2015, 06:26 AM Parent: #1
تحية طيبة لك أخي عبدالحفيظ كل عام انت والمعاك بخير
انت عارف أمس مشيت الدكان القريب مننا أجيب أغراض لوليداتي وكانت الساعة 11 و45 مساء ..الدكان قطعت شارع من البيت وأنا راجع إستوقفني رجل سعودي في بداية العقد الخامس تقريباً ...قال لي معليش يا أخي أنا عرفتك من الجلابية أنك سوداني ممكن تديني من وقتك شوية بس ..أصلي اليوم أنا نذرت أني بعد صلاة المغرب وحتى الساعة 12 ليلا أي سوداني ألاقيهو اتكلم معاهو وأعيد عليهو واسألو من أحوالو وأهلو ولو محتاج أي مساعدة كانت بمقدوري أقدمها ليهو .... قلت ليهو أها والمناسبة شنو في النذر ده ؟؟؟
قال لي هو الدور العملتوهو في الحج العام ده دور سهل ؟؟ منو من الشعوب التانية الفكر بس مجرد فكرة بل أنو معظمهم فكر في عكس ماقمتم به انتو ...يا أخي يحق ليكم تفتخروا ..السودانيين وأخلاقهم المشهود ليهم بيها .. اترجمت واقع قدام العيون والرجال بتبان في المواقف الصعبة ...يا أخي الكريم انتو حديث كل بيت في الرياض وفي كل مدن المملكة بل وعبر العالم مع ميزة الوسائط الاجتماعية دي ...
ده كان خلاصة كلام الراجل ...الذي إستمر زهاء ال35 دقيقة ثم ودعني ودعواته تلاحقني حتى بعد أن تحركت سيارته ...طبعا قبل مايتحرك أصر على أن يعرف أنو ممكن يساعدني في شنو ؟؟ قلت ليهو تشكر مافي أي حاجة والله ...والامور كلها تمام ومستقرة هههههه ضحك الراجل قال لي للأسف ما إتوفرت فرصة أساعد فيها أي واحد مع أني قابلت أكثر من 12 شخص إيفاءأ للنذر ده ...كل القابلتهم أمورهم تمام أنا قلت ليهو ساعدني طيب بالدعوات بس
أردد معك أخي عبدالحفيظ الحمدلله مازلنا بخير
Post: #8 Title: Re: كارثة الحج واصالة السودانيين Author: عفاف أبو حريرة Date: 09-30-2015, 06:36 AM Parent: #7
والله يا معتصم لامن شعرة جلدي كلبت واصبت بالقشعريرة والفخر للذين يسخرون من قصيدة اسماعيل حسن .. وقصيدة سيداحمد الحردلو ديل انحنا .. بدون لغة منمقة او محسنات بديعية .. نسير في الارض هونا ونسوي الواجب الواجب الذي لا يراه الاخرون
Post: #10 Title: Re: كارثة الحج واصالة السودانيين Author: احمد الشيخ Date: 09-30-2015, 06:48 AM Parent: #9
ديل اهلي مهما جار عليهم الزمان يبقى المعدن الأصيل أصيلا يبقى علينا المحافظة على هذا التراث بتربية أبنائنا عليه تسليما للأمانة
اتنبري ساي يا خية .. ياهو الشكر الفيكم تعرفي يا عفاف تبين المواقف في لحظات الضيق .. ويظهر المعدن الاصيل للقيم الراسخة اكيد الناس دي فكرت تفكير واحد .. ولا اصلا مافكرت زاتو . تحركت بدافعها الداخلي نحو الواجب الضو مابقوللو سو
العزيز معتصم عطفا غلى روايتك و ال 12 من قبلك يكفى اهلى و رغم الضيق و الحاجة الحمد لله مستورة عبد الحفيض كل سنة و انتا طيب و ضيوفك الكرام و كل اهلى اهل الكل
شيخ العرب ود أب سن سلام وكل عام وأنت بألف خير الفينا مشهوده وعارفانه المكارم نحنا بنقوده
هذا الشعرالجميل والكلمات الصادقة المعبرة لم تكن من فراغ، والأيام في كل مناسبة ، تثبت وتترجم لنا هذه المعاني الجميلة والصفات النبيلة التي يتفرد بها السودانيون واقعا معاشا. أحكي هذه القصة يا شيخ العرب: مره خالي الفاضل ود فضل الله كان زاير ليهو مريض في مستشفى واد ومدني. وهو مار في العنبر ، فإذا بجمهرة من الناس حول سرير مريض شاب حاول أهله إقناعه بأخذ حقنة شرجية قررها الطبيب لكنه رفض رفضا باتا وأصر على عدم أخذها حتى لو يموت. فلما علم خالي الفاضل بالأمر طوالي قام بخلع جلبابه وعراقيه وشرع في حل تكة سرواله وقال للشاب: يا ولدي الحقنة شن فيها ماها علاج وحرّم كان آخدها قبالك، فلما رأى الشاب جديتة إقتنع بأخذ الحقنة التي كانت سببا في معافاته وشفائه.
Post: #15 Title: Re: كارثة الحج واصالة السودانيين Author: على احمد النعيم Date: 09-30-2015, 11:59 AM Parent: #1
الغالى ود اب سن كل عام وانت والاسرة الكريمة بألف خير
ذكرتنى كلمة المروة فقد سمعت ان احد الناس قد غرق فى نهر النيل وبدأ يصيح با ابو مروة يا ابو مرووووة فجاء احد المزارعين وكان لا يجيد العوم فرمى بنفسه فى النهر ليلحق بالرجل الغريق الذى كاد ان يموت وتشابكوا الاثنين ليموتوا معا فرآهم من هو بالقرب منهم ونزل الى النهر وانقذهم الى بر الامان وهم فى الرمق الاخير. المهم بعد صحصحوا شويه قام الغريق قال للزول الحاول ينقذوا اول (آزول انت طالما ما بتعرف العوم الجابك لى شنو؟؟) فرد الرجل بكل اريحية (ياخ انت كنت بتقول يا ابو مروة ماقلت يا البتعرف العوم)
صدقت اخى ما زلنا بخير واسأل الله عز وجل ان يديم ويحفظ فينا هذه الشيم المارقة من الليد
تحياتي جلال والله يا صاحب لولا خوف ان اكون ملولا لحكيت لكم يوميا قصة من واقع الحال غضة طرية .. من اناس عاديين .. في سلوك غير عادي ولا يأبهون له ولا يظنون انهم يحسنون صنعا
حباب اسحق كيفك يا صاحب وممكن ياخدها كان ..فعلا السواهو خالك دة بشبهنا .. المرؤة والشهامة والكرم داير رواشة .. وتصرف آلي مدفوع بمنظومة القيم الراسخة داخلنا .. خالك ماخش في نقاش بل اتصرف بشكل تلقائي والولد كان ممكن يطلع خايب وخالك ياخد الحقنة مافكر فيها كدة ابدا ديل نحن . الناس الساي .. الذين يصنعون التاريخ عمنا المروح عبدالرحمن محمد خالد اب دقن . من اب جلفة نص الليل سمع دق في الباب . مرق وشايل عكازو . لقا مرة جارو مالك الراجل طردني ساقها قدامو . وبالعكاز دفر الباب واحدث ضجة راجلها جا مارق .. ولامن شاف عمنا قال ليهو المرة دي طردتها وما بتنفع معاي قبل يتم كلامو ..اداهو عكازين في صفيحاتو واداهو الواطة يا رجل يا خايب يا باطل . تمشي وين نص الليل . تمشي تتصعلك..علي بالطلاق طول ما انا ساكن جمبك اسمع صوتك بالليل الا عكازي دة ياباك .. دفر باب الاوضة ومرق سد الباب سمعت بالقصة وسألتو قال لي من يوم داك لي الليلة ما اختلفو
Post: #20 Title: Re: كارثة الحج واصالة السودانيين Author: عفاف أبو حريرة Date: 10-01-2015, 05:19 AM Parent: #19
Quote: ديل نحن . الناس الساي .. الذين يصنعون التاريخ
بتشدني كتابتك بعيد ياخ انت بتقول كلام كلام الدنيا كله ما بديه حقه في الوصف الله يطول عمرك
حباب علي النعيم وعيدك سعيد والبسمع فيهم يا ابومروة بي فرارو ينط من جوة ويبادر ليك من غير تأخير كما قال صلاح احمد ابراهيم ابومروة دي فيها طاقة وضع سحرية . تسمعها تبقا لابتشوف لابتسمع وقلبك يضرب وجسمك يرجف والبقول ابومروة بكون ممكون مكنة جد ومتضايق ثقافة ابومروة و الله كريم مفتاح شخصية السوداني .. الشخصية التي لم تلوثها الانقاذ .. لم تأكل مال السحت ولا باعت الاغاثة وشوف من لطف الله .. الاكل الجماعي في صحن واحد ينقل الامراض وشراب السبيل .. لكن اهلنا في سبيل الجماعة الله حامبهم .. ومغطي عليهم وعندهم قناعة موية السبيل لا تمرض و الموت وسط الجماعة عرس
الدولة السودانية برموزها الحاليه لا تمثل قيم السودان ال بمثلونا ال بلفو ساعة الضيق في الشرق والغرب والوسط والشمال البرامكة وناس علي دينار وتاج الدين وشيوخنا وشراتي وعمد المسخ الممثل في حكومة السجم ال بتقلع من الناس دي ما تبعنا نبرا منها وادا طرفنا منها
التعديل لاضافة الاتي ال بمثلونا الناس الغبش الداقشين وما داقسين
Post: #26 Title: Re: كارثة الحج واصالة السودانيين Author: عمر دهب Date: 10-02-2015, 07:48 AM Parent: #25
الاخ ابوسن عمل انسانى مبهج وماغريب علينا اذا قارنا انسانيه اهنا الغبش ببرود شعوب حولنا لعل تلك التربيه كانت نتاج السلوك الصوفى والادارات الاهليه والبساطه التى لايدهشها الغنى ولا يقلقها الفقر ورغم السنوات العجاف التى مرت بنا سنظل دائما نرى صورا مشرقة .
Post: #27 Title: Re: كارثة الحج واصالة السودانيين Author: عمر دهب Date: 10-02-2015, 07:48 AM Parent: #25
الاخ ابوسن عمل انسانى مبهج وماغريب علينا اذا قارنا انسانيه اهنا الغبش ببرود شعوب حولنا لعل تلك التربيه كانت نتاج السلوك الصوفى والادارات الاهليه والبساطه التى لايدهشها الغنى ولا يقلقها الفقر ورغم السنوات العجاف التى مرت بنا سنظل دائما نرى صورا مشرقة .
فعلا عمر دهب رغم المسغبة والعوز وضيق ذات اليد ظل الانسان السوداني المغروس عميقا في رحم الارض صامدا صامدا وانسانيا دون هتافية سياسية جوفاء او ديماجوجية دينية مضللة فقط هو سوداني