Post: #1
Title: يا الله يامنان .. معقولة العنصرية بقت حتى في الإحسان ؟؟؟!!!
Author: عمر عبد الكريم علي
Date: 09-27-2015, 10:06 AM
09:06 AM Sep, 27 2015
سودانيز اون لاين
عمر عبد الكريم علي-أمدرمان - بيت المال
مكتبتى فى سودانيزاونلاين
كان يامكان في حديث الزمان
إنسان غلبان وتعبان وقهران من بلاد السودان
إسمو عبدالرحمن
يتكون غذاؤه من FAF ، فول عدس فول ، وبعد كل وجبة بحبس بي شاي بالهبهان
ضغيف جدا ومن لحم الدنيا كملان
مابضوق اللحمة إلا في عيد الخرفان
وجا عيد الأضحى الكلو بركة وإيمان
وفيو لمة الجيران والأهل والحبان
صلى العيد وطايب الناس وفطر هو وشفعو في بيت حاج عثمان
ضربو اللحمة تمااااام لمن اتملو .. واتدشى عبدالرحمن وقال الحمد ليك ياربي انا شبعان
ومن دربو مشى للمنظمة الخيرية الماسكينها الكيزان
متعود كل سنة يأخد منهم كيس لحمه ملان
لقاهم ضابحين خرفان وتيران
ومعبيين اللحم في اكياس كيمان كيمان
والناس تكابس وعامله زحمه وهيلمان
سألهم : في شنو ياناس وليه الهيجان ؟؟!!!
قالولو السنه دي قالو اللحم بوزعو لي ناس سوريا واليمن ومافي حاجه للمواطن الغلبان
قاللهم هو الأكل كان ماكفى ناس البيت كيفن يدوهو للجيران ؟!
دافر وكابس لامن وصل قدام ولقالو راجل مليان وتريان
قرب منو وقالو يا أخينا الحكاية شنو الناس دي زعلانه وحاسه بالخذلان
قاللو ياخوي معقوله اديك انت الجربان !!
وأخلي نسوان سوريا الحير جمالهم العرب وأهل إيران
ديل من حور الجنان
شوف شفعك وسخانين كيف وشينين وريحتهم أعفن من ريحة الفيران
وديك شفعهم يضوو زي اللولي والمرجان
قاللي : مامشكله أقسموها بيناتنا ماكلنا أولاد آدم ومن جنس الإنسان
لزاو بعصايتو وقال : غور بلاش فلسفه .. كلامك كتير زي ابو الزنان
دنقس زولنا واستغفر وقال : يا الله يامنان
معقولة العنصرية بقت حتى في الإحسان؟؟!!
|
Post: #2
Title: Re: يا الله يامنان .. معقولة العنصرية بقت حتى ف
Author: Munir
Date: 09-27-2015, 10:20 AM
Parent: #1
أخخخخخخ .. فقعت مرارتنا ..
كل سنة وإنت طيب يا عمر ..
|
Post: #3
Title: Re: يا الله يامنان .. معقولة العنصرية بقت حتى ف
Author: بدرالدين بابكر مصطفى
Date: 09-27-2015, 10:25 AM
Parent: #2
قبل سنوات قليلة كانوا يوزعون لحوم الأضاحي ويجيبوها لينا في السودان
السوريين واليمنيين ما قالوا حاجة
مافي زول بينكر إنو ظروفهم أسوأ من ظروفنا
ولا علاقة للموضوع ببناتهم الجميلات
أي حاجة لازم تشوفوا فيها عنصرية
وبعدين منو في السودان الما قادر ياكل لحمة في عيد الضحية
لو ما قدرت تضبح جيرانك بيأكلوك لحمة
|
Post: #5
Title: Re: يا الله يامنان .. معقولة العنصرية بقت حتى ف
Author: عمر عبد الكريم علي
Date: 09-27-2015, 10:43 AM
Parent: #3
تحياتي أخ بدر الدين
ماتعاين في المجتمعات المحيطه بيك
أمشي الضهاري وطرف المديان والفرقان والبوادي
وأغشى معاك مناطق الحروب والنزاعات
شوف الناس دي عايشه على الكفاف كيف
وأنا ما بتكلم هنا عن ناس فقراء
أنا بتكلم عن ناس ماعندهم أيييي حاجه في الدنيا دي
|
Post: #4
Title: Re: يا الله يامنان .. معقولة العنصرية بقت حتى ف
Author: عمر عبد الكريم علي
Date: 09-27-2015, 10:38 AM
Parent: #2
إنه البوبار يامنان
|
Post: #6
Title: Re: يا الله يامنان .. معقولة العنصرية بقت حتى ف
Author: بدرالدين بابكر مصطفى
Date: 09-27-2015, 11:48 AM
Parent: #4
Quote: ماتعاين في المجتمعات المحيطه بيك
أمشي الضهاري وطرف المديان والفرقان والبوادي |
نعم أنا من هناك
|
|