إنتهى المولد.. إنفض السامر .. المسافة إلى لوممباتشي

08:27 AM Sep, 27 2015
سودانيز اون لاين
طلحة عبدالله-
مكتبتى فى سودانيزاونلاين



انتهى المولد أو كاد بالنسبة للمريخ .. إنها مسألة وقت وفركة كعب المسافة
إلى لوممباتشي ..
ولن يكون الهلال بأفضل حالا ..
أعتقد أنه من الأوفق للجميع الإكتفاء باحتفالية الوصول للمريع
الذهبي واعتباره إنجازا لا بأس به على أمل أن يكون الواقع أفضل
في المرة المقبلة ..
لا تحلموا بعالم سعيد .. أو على كيفكم العايز يحلم يحلم زي ما عايز
فاني محتفظ بعواطفي لما تستحقه .. بس بعدين ما تجوا تقولوا ما قلتا ليكم .

ههههههههههههههه
حاسي بيكم يا الكارهين بوستاتي ...
لكن صدقوني أنا عايز مصلحتكم ..
مصلحتكم تكمن في الاعتراف بالواقع المتردي فيما يتعلق
بالكورة السودانية ..
العواطف التى يدلقها مشجعو المدرجات في الجرايد الرياضية
ضارة بالصحة .. الجرايد الرياضية أفيون الجماهير .. تسري
في النخاع باللذة والمتعة لكن سرعان ما يذهب مفعولها لتبقي
آثارها المدمرة .. لا فكاك من هذا الادمان القاتل إلا بحقن
شريان العواطف التالفة بمصل الحقيقة المغيبة وعقار الواقع
الماثل .. إنها مؤلمة لكنها شافية حتما .

سلام طلحة

كلام عقل

معااااااك والله يا طلحة

وقاعد استغرب بالجد فى بعض البوستات وعند مطالعة اخبار الصحف (مرات مرات بالغلط)

الناس دى فى حتة والواقع حتة تانية خالص

تلقي مانشيت فى صحيفة قبل المباراة

صواريخ بكري المدينة تهدد مش عارف مين

سته اهداف بالترمين الختامى تقلق مضاجع مش عارف مين

ولا تشوف واحد فى منتدى كاتب ليك الهلال اسد افريقيا ومرعبها

والمصيبة بكونو مصدقين الكلام دا

تعرف يا طلحة قبل فترة قريت حاجة جاتني رايحة كدة فى الفيس

واحد كاتب الهلال مرعب افريقيا وكلام الجرايد الكتير دا

دخل عليهو مصري قال ليه بامارة ايه يعنى مرعب افريقيا

بامرة كم بطولة يعني خدها

والله لا عرفت اضحك ولا عرفت ابكى

ياخ جمهورنا مع اعتذاري بقي زي القطع يسوقو ناس الصدى وحبيب البلد

أخ / طلحة عبد الله .... كل عام وأنت بخير..

أنت إنسان واقعي ...

والمشكلة الكثيرين عايشين في أحلام الوهم...

Quote: حاسي بيكم يا الكارهين بوستاتي ...

و ما أكثرهم .....
قبل ما أقول ليك قوم لف...
الكورة السودانية عودتنا أنو كل يوم هي في شأن .... ما مضمونة و ليس لها حال ثابت عشان تحكم عليها
ف شنو إتوقع أي شي في أي وقت بي أي طريقة .......
عموماُ إنت زول غير جدير بي أي حاجة عشان كدا حقو تقوم تلف .....

انا معاك وما معاك

تحياتي يوسف الطيب وكل عام وأنتم بخير

هاشم عبدالله العيد مبارك عليك .. الجماعة ديل أدمنوا الوهم ..
والمصيبة الأكبر أنهم ما عايزين زول يصحيهم .. الله يعينم .

كل عام وأنتم بخير أخي أحمدونا وشكرا ع المرور ي حبيب

يا أبوحسين بطل الملاوة البتعمل فيها دي .. متين عودتك الكورة السودانية
انها كل يوم في شأن ؟؟ اسي عليك دينك من 1989 الاتغير شنو في حال
الكورة السودانية .. ياها كل سنة مشاركة خارجية وبالونة أحلام وتمنيات
كبيرة وفي النهاية فرقعة .. ياتو شأن تاني غير الشأن الواحد القدامك
دا ؟ قال كل يوم هي في شأن قال .. معقولة ياخي تقعدوا تكذبوا على
نفسكم كدا عيني عينك .

يا محمد بحر أحسن ليك تكون معاي ومعاي .. لو عايز تكسب .

طلحه كل سنه وانت طيب
حالتك دي اسمها عند الرياضيين والسياسيين
Low Expectations
عشان لو الفوز حصل تبقى الفرحة اكبر
ولو حصل الما دايرنو داك ما يجيك ضغط وسكري لا قدر الله
بالمناسبه طولت ماشهدت كوره لفريق سوداني
لكن شفتها امبارح وشفقت علي المريخ في الشوط الثاني الا بعد
هدف بكري المدينه الذي اعتقد جازما انه هدف عالمي فعلا
-------------
الليله بشوف الهلال كمان ان شاء الله

يا فنان كل سنة وانتا طيب وجميع من يليك
صدقني المسألة ما مجرد توقعات من أجل التوقعات
دي إستنتاجات قوية بناء على الواقع ومعطياته ..
ما رأيك في زول يتوقع فوز السودان بكأس العالم المقبل ؟

Quote: اخوان ضفر وعلي جعفر لها باذن الله

ههههههههههه نحلم بهذا .. هي الأحلام دي بى قروش ؟

الأخ طلحة .. فى هذا السودان المشاتر فى كل شئ خليك متفاءل .. الفرق السودانية كما هي رمة وما منها فايدة لا تنسي ظروف الآخرين
يعني ..نستفيد من مصائب الآخرين مؤقتا .. البطوله الأفريقية رقم 2 هذه السنة فيها اورلاندرو والنجم الساحلي وارطبونات اولاد بمبا الأتنين اهلي / زمالك
ولو كانت الأمور طبيعية لكانت هي البطولة رقم واحد ..لكن الله قادر ويفعل ما يريد ... ما يدريك لعل الله اطلع على على خيبات السودانيين الطويله و المتواصله وقرر
أن يهديهم بعض السعادة المؤقتة ...انظر الى الجزء الممتليء ..الوصول الى المربع الأفريقي العظيم بعدد 2 فريق سوداني انجاز ضخم وله ما بعده ..
اتمني الخروج بشرف فقط ..اما اذا ما وصلنا النهائي الأتنين ولا واحد فعلينا ان نهلل ونكبر وننسي المشائمين الكثيرين من أمثالك .......



على جنب كدا... اذا ما وصل الهلال والمريخ الى النهائي فأن دولة الكيزان ضمنت (سنة على الأقل)

Quote: اما اذا ما وصلنا النهائي الأتنين ولا واحد فعلينا ان نهلل ونكبر وننسي المشائمين الكثيرين من أمثالك

لكم ذلك يا أخونا عبد الحميد ولو عايزين تنسوا
من إسي أنسوا لشنو تنتظروا لغاية ما تتأهلوا الاتنين للنهائي ..
فوق قلتا العايز يحلم يحلم والعايز يتفاءل يتفاءل دي حريتو ووفق
قناعاتو .. كما هي حريتي في التشاؤم ووفق قناعاتي ..
قناعاتي انو بعد 27 سنة منذ كأس مانديلا 1989 أيقنت انو
التفاؤل والإستبشار في ظل هذا الواقع المزري ضرب من ضروب
الوهم الضار بالصحة .
كل سنة وانتا طيب آزول .

شيخ طلحة
سلام
كل سنة وانت طيب

لم ينتهي بعد

انتهي الشوط الاول ( بتفوق المريخ ) رغم النتيجة الصعبة

و تبقي الشوط الثاني .

انها كرة قدم
تعطي لمن يعطيها داخل المستطيل
واذا اعطوها لاعبي المريخ في مباراة الرد أكيد ستعطيهم ...
كلنا تفاؤل
و في الانتظار

مودتي

ــــــــ

بالتوفيق للزعيم

صدق ابو حسين, انت راحد غير جدير بس :)
+
قم فلف لك لفة

Quote: انت راحد غير جدير بس

صدقني أنا راحد جدير جدارة متأصلة كمان ..
ما عليك من القبور .


يا الشيخ طارق حرسي .. نحن منتظرين .. يا رب ما يكون مثل كل سنة ..
طبعا نفس الكلام دا قاعدين نعيدو كل مشاركة .. اتا متمسك وأنا متمسك .

القبور = الجراد الواحد دا .. عشان بس ما في زول
يقول ما فاهم

الفكره يا طلحة أخوي ...نحنا حاليا على الأقل ما نعاين لى تاريخنا الخائب الطويل جدا فى كرة القدم..لكن نعاين بعين التفاءل للفرصة النادرة جدا جدا الأدانا ليها الله (سبحانه وتعالي)..
أنا معاك كورتنا ما بتأكل عيش .. وممكن واحد من الجماعة ديل(هلال /مريخ) لو خبطة من خبطات القدر أخد الكاس ممكن جدا السنة الجاية يطلع من دور ال 32 عادي جدا..
فلذلك خليك مع الزمن او كما قال رمضان زايد ..

منطق برضو يا عبد الحميد لكن دا لا يلغي أبدا
انو الشغلانية بايظة .. حتي الحظ متعلق بخيوط الأسباب
لا يمكن أن تفوز بسيارة في مسابقة سحب وانت لم تدافر وتعافر
أو على الأقل تتكبد مشاق المشي لشراء التذكرة الخاصة بالسحب
دا ..
النجاح ليهو أسباب والحظ ليهو أسباب أيضا .. اللهم إلا اذا كان
الكأس دا بلقوهو واقع في الواطة زيو وزي ابقرشين الزمان داك.

طلحة المتشائم

سجل عندك واحد من الكارهين تنظيرات

Quote: انتهى المولد أو كاد بالنسبة للمريخ .. إنها مسألة وقت وفركة كعب المسافة إلى لوممباتشي .. ولن يكون الهلال بأفضل حالا ..

الهلال ممكن لكن المريخ لديه أمل وبدر كمان
يا طلحة مازيمبي السنة الفاتت اتغلب من وفاق سطيف 2-1 وطلعوا فرحانين
وفي مباراة الرد فاز مازيمبي 3-2 وطار

فما تسبق الحوادث ياخ!

هو الهليل اتعادل معاهم هناك :)
وبعدين ما عايز الففك كتير شايف الجماعة ما قصروا معاك ()

تحياتي

تحياتي يا البشاري
ربنا يقلل من المتفائلين أمثالك .. خخخخخخ
أنا متعود على جنس ملاواتكم دي كل سنة.. ما في جديد ..
وكل سنة قاعد أسبق الحوادث وأجىء الأول .. برضو ما في جديد ..
أها المرة أتمني أجىء الطيش ويكون في جديد .. بس ما أظن ..
الشغلانية ما غلاط وكوار ساي يا أخوي الزين .
..............
لو ما جيت هنا ذات مرة كتبت انو المريخ أو الهلال واحد
ح يشيل فيهم بطولة ما تتعبوا مشاعركم بالأحلام الوردية .. خخخخخخخخخخخ

خسوف كلي للهلال أو كما قال جيمي .. يا دي الكسوف .
أعتقد انو كدا الهلالاب العاقلين تيقنوا ..
نبقي فقط على الهلالاب الزي أخونا البشاري الفوق دا ؟

طلحة انا مش قلته الهلال ممكن؟

أيوة قلتا
لكن شايفك متفائل بالمريخ وبتغالط زي ما كانوا
الهلالاب متفائلين قبل كورة الليلة دي ..
أها وقع ليك واللا لسة متمسك ؟

Quote: أها وقع ليك واللا لسة متمسك ؟

طبعا متمسك ياخ!
الهلال متعود ههههههههههههههههه
ونحن لسه مستجدين صغااار يا قولات الهلالاب :)

خلال استمسك قوي .. على كيفك .. خخخخخ

Quote: خلال استمسك قوي .. على كيفك .. خخخخخ

كلم الزول الجبنك يضرب لهناي داكـ ويتفقد احواله هههههههههه

قال ليك .. ضرب ليهو قال ميروود .. حمي وصداع نصفي
بلع ( حبتين ) بندول ونام ..
أي والله ناااااااااام .

حبيبنا طلحة كنت بتمنى اكون معاك في كلامك دا بس للاسف ماقادر
و بعون الله النهائي المريخ و اتحاد العاصمة و الكلام دا انا قلتو قبل
دوري الثمانية .

يا نابري كل سنة وانت طيب والعاقبة زي ما عايز ياخ ..
أنا كمان متأسف إنك ما معاي في رأيي دا .. من منطلق
قراءة لمعطيات معلومة، وخبرة لا أدعي أنها طويلة لكن يعول
عليها أقول ليك من الصعب جدا وصول المريخ للنهائي حتي
لو كان فائز تلاتة صفر في الخرطوم ..
الموية تكضب الغطاس يا حبيب .

طبعا ابوالطلوح ...معذور
شبع احباطات ونفسيات وضربات موجعة تجعل المتبسم للحياة يعاني من
الكرمشة بين العينين وانسداد الشريان الاورطى للفرح والرجاء
ودا نتاج تلاقح الهزائم وانهيار جسر البطوﻻت وخبرة السنين
طلحة ياخي كل سنة وانت طيب ...وانحن في المريخ نهدي ليك مقطع من اغنية
افرد جبينك لي خليهو ...ينفررررررررا

شكرا يا أحمد ياسين وكل سنة وانتا طيب شديد ياخ
تقريبا شخصت الحالة لكن البقهرني أكتر ما إستمرار
الإنهيارات والإحباطات بقدر ما هو إستمرار أسبابها
الواضحة والملعومة لأصغر مشجع كورة في أبعد بقعة
بنواحي الوطن .. كنت وما زلت أنتظر اليوم الذي يتمرد
فيه الجميع على الواقع المزري ليشعل شرارة الثورة
على الفوضي الجاثمة على صدر الكورة السودانية بفعل
أرباب المصالح وكهنة الإرتزاق والمنتفعين بلا أدني فائدة
بالمقابل .
يا ريتني أقدر أفرد العبوس المرسوم على الوجيه الحزين
يا حبوب .