مليون مسلم ممنوعون من ذبح الأضحية في بلجيكا

08:17 AM Sep, 26 2015
سودانيز اون لاين
ahmedona-أرض الله الواسعه
مكتبتى فى سودانيزاونلاين





أيمن حسن- سبق: يعيش نحو مليون مسلم في بلجيكا مأزقاً خطيراً؛ حيث تمّ منعهم من ذبح الأضاحي، بحجة تعارضه مع أدبيات الرفق بالحيوان، رغم أن الأضحية طقس ديني تكفله المواثيق الدولية وحرية إقامة الشعائر لأبناء الديانات المختلفة.

وحسب صحيفة "الأهرام" المصرية، اليوم الأحد، فقد رفضت الحكومة الحالية بمملكة بلجيكا جميع الالتماسات والتوضيحات المقدمة من ممثلي الجالية بشأن السماح بذبح أضحية عيد الأضحى، وأصرّت أن يكون الذبح بعد تخدير الحيوان أو صعقه بالكهرباء وإلا سيعد ذبح الأضحية جريمة يعاقب عليها القانون وبشكل مشدّد!

الأحزاب المتطرفة
قالت الصحيفة: إن هذه المشكلة لم تعرفها الجالية المسلمة في بلجيكا إلا قبل نحو أربع سنوات ومع بدايات صعود أحزاب اليمين ذات النزعة القومية المتطرفة التي تتخذ مواقف معادية من المهاجرين والأجانب، ووصل الأمر إلى ذروته بنجاحها في الانتخابات البرلمانية الأخيرة وتشكيلها ائتلافاً حاكماً.

جلسة البرلمان
بدأت المشكلة في إقليم فلاندر، حين أصرّت لجنة الرفق بالحيوان في برلمان الإقليم، على عقد جلسة استماعٍ لوزير الرفق بالحيوان بشأن ذبح الحيوانات من عنقها، وهي لا تزال مستيقظة، الأمر الذي تعده جمعيات حقوق الحيوان "وحشية لا مبرر لها".

وانتقد عددٌ من النشطاء السياسيين البلجيك المهتمين بقضايا التعايش السلمي بين الأديان المختلفة، قرار الحكومة الفدرالية الذي جاء مؤيداً لقرار الحكومة المحلية بإقليم فلاندر.

انتقادات بلجيكية
نقلت "الأهرام" عن السياسي البلجيكي أوليفر لمنت، قوله: إنه ليس من حق هذه السلطات التي وصفها بـ "الفاشية" منع أقلية دينية من ممارسة طقوسها الخاصّة، بينما عبّرت كرستين داننبرج؛ عن خيبة أملها بسبب عدم مراعاة الخصوصية الثقافية للشعوب الأخرى "على نحو يجعلنا نعطي المتطرفين في العالم الإسلامي المبرر لكي يزيدوا من مشاعر الكراهية تجاه أوروبا".

مساعي المسلمين
نقلت "الأهرام" عن مصدر بالهيئة التنفيذية لمسلمي بلجيكا - الجهة المعترف بها رسمياً لدى الحكومة لتمثيل المسلمين بالبلاد - أن الهيئة لم تقف مكتوفة الأيدي وتواصلت مع المجلس العلمي البلجيكي لتوضيح أن الشريعة الإسلامية ترفض الذبح بعد التخدير، وأن ذبح الأضحية له ضوابط شرعية محدّدة وكيف أنه ثبت علمياً أن الذبح بهذه الطريقة الأقل إيلاماً.

اخي الفاضل .. احمدونا ..

السلام عليكم ... وكل عام وانتم بخير ..


مكرر !!!




****************
فظيع جهل ما يجري
وافظع منه أن تدري !

كل عام وأنت بخير..

Quote: مكرر !!!

التكرار للعبرة ...

Quote: التكرار للعبرة ...

العبرة لمنو ؟

Quote: مليون مسلم ممنوعون من ذبح الأضحية في بلجيكا

كلام فارغ واكاذيب لا معني لها خلاف الغش وتثبيت عقلية التظلم غير المستند علي حقائق
فاذا تتضرر المسلمون لماذا لا يقاضون الجهات التي تظلموا منها؟
هل يا تري اذا خير ملايين المسلمين القادمين من سوريا وافغانستان وغيرها بين بلجيكا التي يفترض انها
تمنع الاضحية والعالم الاسلامي لمن يقع اختيارهم؟
المسلمون حسموا خياراتهم وفضلوا العيش تحت النظم العلمانية الكافرة.
الضحية غير واجبة واذا لم تسمح بها قوانيين البلد المضيف فلن يدخل مسلم النار بسبب ذلك.
دعونا من الجهالات والترويج لها بمسميات غبية تهدف في النهاية توطين الافكار الاغترابية للمسلمين من
بقية العالم.

والحال هكذا..
ندعوهم لترك ديار الكفر التي تمنع الذبح..
ومرحب بيهم في السودان..
ﻻ شئ يجبركم على الاقامة
في بلد يمنعكم الذبح.

الاخ احمدونا ... كل عام وانتم بخير ...

Quote: الضحية غير واجبة واذا لم تسمح بها قوانيين البلد المضيف فلن يدخل مسلم النار بسبب ذلك.

(1) اؤمن على كلام الاخ GAAFER ALI ...

(2) الاخ منير عبد الرحيم فتح بوست اتناول فيه نفس الموضوع قبل 3 أسابيع تقريبا ودا الرابط حقه :

http://www.sudaneseonline.com/cgi-bin/sdb/2bb.cgi؟seq=msgandboard=480andmsg=1440847692andfunc=flatview

ـــــــــــــــــــــــــ

(3) ملاحظة أخيرة ...
اعتقد أنه عنوانك فيه خطأ والصحيح هو (مليون مسلم "ممنوعين" من ذبح الأضحية في بلجيكا) ...

لو قعدوا في العراق وسوريا؛
كان ضحت بهم داعش...
وامثلتها من قوى التطرف....

سلام يا احمدنا و عيد سعيد،
في ٣٥ مليون مسلم فى السودان ما قادرين يمارسون حقوقهم السياسية فى اختيار من يحكمهم او في الكيفية التى تنفق بها اموالهم و الطريقة التى تدار بها دولتهم على العموم. فى ملايين فى دارفور و جبال النوبة و النيل الازرق يعيشون فى الخوف و الفزع جراء جرائم الحكومة. و انت مشغول بحق مسلمي بلجيكا فى زبح الحيوانات. ياخي اخوانك المسملين يذبحون الي جوارك و انت شغال بالفارغة!

Quote: لو قعدوا في العراق وسوريا؛ كان ضحت بهم داعش... وامثلتها من قوى التطرف.... الثورة مستمرة و سننتصر

ديل مواطنين أولاد بلد ما لاقين حقوقهم في بلدم ...

قالوا علمانية ....

ومكنة المساواة ...

عنهم ما ضبحوا يا احمدونا يا اخوي..
مئات الملايين في دول العالم الثالث تتاجر فيهم حكوماتهم و مترفيهم و يمنعوهم من اكل اللحمة طول العام
حتى تصيبهم امراض سؤ التغذية و ينشأ عيالهم هزيلين يعانون نقص النمو و تهلكهم الامراض ..
ركز لينا في ديل بالله و كل عام و انتم بخير.

Quote: مئات الملايين في دول العالم الثالث تتاجر فيهم حكوماتهم و مترفيهم و يمنعوهم من اكل اللحمة

المحروسة مثلاً ....

يا دكتور / سيف --- هدفنا تسليط الضوء على الدول التي تدعي التحضر .... وهناك من يهلل لها .

قالوا علمانية...

Quote: الضحية غير واجبة واذا لم تسمح بها قوانيين البلد المضيف فلن يدخل مسلم النار بسبب ذلك.

أخ / جعفر ....

العلمانية تدعي حرية الإعتقاد والتعبد...

وها هي مبادئ العلمانية تسقط في أحد معقلها ...

والمسلمين في بجيكا جزء كبير من هم من أولاد البلد --- ويعانوا من التميز في دولة تدعي الديمقراطية والعلمانية...

Quote: (2) الاخ منير عبد الرحيم فتح بوست اتناول فيه نفس الموضوع قبل 3 أسابيع تقريبا ودا الرابط حقه : http://www.sudaneseonline.com/cgi-bin/sdb/2bb.cgi؟seq=msgandboard=480andmsg=1440847692andfunc=flatview

أخ / قسم الفضيل ... كل عام وأنت بخير...

البورد دا تنزل فيه عدد من البوستات لنفس الموضوع ومتزامنة ...

كل يتناوله من زاويته ...

إبن عباس كان يذبح طول السنـة ما عدا يوم العيـدـ حتى لا يقال انها واجبـة.. والان أصبحت واجب إجاماعى وليس دينى..

وأقترح على المسلمين البلجيكيين أن (يساهموا مع المانيا شوية) في إستضافة اللاجئين المسلمين.. أدوها يدكم شوية ياخوانا..

منطقكم غريب يا أبوبكر صالح وسيف النصر مع أحمدونا؟!
الراجل داير يناقش الحتة دي، تقولوا ليهو بعد تتحل مشكلة الديمقراطية والجوع في السودان؟
علي كدا ما نلقاكم في بوست بتاع غناء أو كورة لحدي ما مشكلة دارفور تتحل!!

Quote: منطقكم غريب يا أبوبكر صالح وسيف النصر مع أحمدونا؟! الراجل داير يناقش الحتة دي، تقولوا ليهو بعد تتحل مشكلة الديمقراطية والجوع في السودان؟ علي كدا ما نلقاكم في بوست بتاع غناء أو كورة لحدي ما مشكلة دارفور تتحل!!

يامستنير هوي ..
إتـــا مش شلت كورتكـ ومشيت ..
وقلت تاني ما داير معانا ..
الجابكـ راجع شنو ..

ــــــــــــــــــــــــــــــــــــــ

يأخ أنت تعطي لهذا المكان رونقه ..
وعندكـ اضافات لاتخلو من استناره ..
فخليكـ قاعد يأخ وبطل حمبكة ..
والله الحبة دي مابتجيك ..
خلي قال خايف على طقوقو ..

كل سنة وانت طيب يأخ ..

كلما أشيل كورتي وأمشي، بكري يقع فيني تحنيس ويزيد الشيك وانا طفس!

غايتو من ناحيتي يا ابوبكر كورة ما بتلقاني، و غنى يمكن مرة مرة بس ناس بلجيكا ديل ما متعاطف معاهم
خالص خالص. شنو يعني تتجدع السنة كلها و تجي يوم العيد تتبكى و تقول منعوني من الضبح!
الكلام ده ذكرني واحد من المحكومين في امريكا في قضية تفجير مركز التجارة العالمي الكان فيها عمر عبد الرحمن
ديك كان بشتكي في لقاء صحفي انهم ممنوعين من الرياضة في السجن في نفس ايام بيوت الاشباح و الناس
البتفقد حياتها و نظرها و صحتها في سجون الدولة الرسالية في الخرطوم.
بعدين حرية ممارسة الشعائر دي مطلوقة كدي ساااكت..تعدد الزوجات مثلا مش مباح في الدين؟
يسمحوا بيهو برضو؟
حاجة ضد الصحة العامة او بتتعارض مع قواعد انتاج الطعام في البلد ممكن جدا تتمنع و مفروض هم كمواطنين
يحترموا المسألة دي او كمان عليهم بالمحاكم حتى يثبتوا رأيهم اذا كان مختلف عن رأي الحكومة.

يا مسلمى اوروبا، ما دام المانيا الكافرة دى قامت بواجبكم نيابة عنكم ساعدوها بتمن الأضاحى .. وتذكروا الاية :
لن ينال الله لحومها ولا دماؤها ولكن يناله التقوى منكم.. ومن التقوى خوف الله في التفريط في واجبكم في إغاثة الملهوف حين عندكم المال لشراء الخروف الذى ليس واجباً ولا فرضا، حين البرد بدأ يقتل اخوانكم.
النفاق والرياء والدجل سيبك منهم..... حياء مافى وأنتم ترون اخوانكم واخواتكم في صفوف يطعمهم الخواجات.. موش يمنعوا الذبح، والله لو أدوا اى مسلم عايز يشترى خروف كف في وشـه ما قصروا.

Quote: العلمانية تدعي حرية الإعتقاد والتعبد...

حبيبنا أحمدونا
أعيش فى أميركا ودستورها العلمانى معروف لديكم لكننى كمسلم ضمن ملايين المسلمين الأمريكان
لا تعيش إدعاءاً ولكننا نعيش واقع حرية الإعتقاد والتعبد لله الكبير المتعال تحت حماية الدوله والقانون
ونحن فى هذه الإيام السعيده نعيش وأسرنا وأطفالنا بهجة العيد الكبير إليك البرهان لما يتمتع به المسلمون
من الحريه فى الإعتقاد وممارسة شعائرهم الدينيه فى أميركا :-

يا عبد الله ما تقوم نفسك ساكت.. الصورة الفوق هي في الحديقة بين الكنجرس والبيت الأبيض في العاصمة واشنطون.. وقبة الكونجرس واضحة في خلفية الصورة.

اقول ليك حاجة.. شفت المسجد الإنطلقت منه جماعات تفجيرات مبنى التجارة العالمى.. التفجير الأول في 1993 موش بتاع الطيارات.. هذا المسجد فيه الان مدرسـة لتعليم العربية والقران تدعمها الحكومة الأمريكية ب 20 الف دولار..
شفت كيف.. وأزيدك من الشعر بيت.. القائمين على المسجد يتصارعون ويتقاتلون في هذا المبلغ.. والله شوف عين، يوم جمعـة الإمام سلم، وقبل نحن ننتهى من التسليم تخاطفوا الميكرفون كل واحد يشتم التانى ويتهمه بالخيانة والسرقـة.

التحيه لك أخى العزيز أبوالريش
وكل عام وأنت بخير وأشكر لك تعقيبك على مداخلتى .
أود أن أعلق على بعض نقاط ما ذكرت

Quote: يا عبد الله ما تقوم نفسك ساكت.. الصورة الفوق هي في الحديقة بين الكنجرس والبيت الأبيض في العاصمة واشنطون.. وقبة الكونجرس واضحة في خلفية الصورة.

أشكرك كذلك أخى أبو الريش بمشاركتك لى قومة النفس بتأكيد أن المسلمين فى أمريكا يمكنهم أن يصلوا
صلاة العيد فى الفسحات العامه الرحبه أمام البيت الأبيض أو أمام قبة الكونقرس وبحريه تامه .
سبق للمسلمين فى واشنطن أن صلوا صلاة العيد أمام البيت الأبيض وأمام الكونقرس وفى الإستاد الرياضى
وسط واشنطن .

Quote: هذا المسجد فيه الان مدرسـة لتعليم العربية والقران تدعمها الحكومة الأمريكية ب 20 الف دولار..

خير وبركه
ودعم للمساجد والأئمه . هذا الدعم ليس قاصراً على ذلك المسجد فى نيويورك بل على كل المساجد فى أميركا
قكل مسجد يجد الدعم والحمايه من الحكومه المركزيه ( الفيدرال ) والولايه والمحافظه .

Quote: شفت المسجد الإنطلقت منه جماعات تفجيرات مبنى التجارة العالمى..

الأخ أبو الريش
غالبية القياده السياسيه الأمريكيه يتفهمون أن لكل قاعدة شواذ وعلينا كمسلمين فى أميركا أن نعمل بكل
الوسائل هل مسح تلك الصوره القاتمه والتى يعمل على بثها الإرهابيون .

Quote: القائمين على المسجد يتصارعون ويتقاتلون في هذا المبلغ.. والله شوف عين، يوم جمعـة الإمام سلم، وقبل نحن ننتهى من التسليم تخاطفوا الميكرفون كل واحد يشتم التانى ويتهمه بالخيانة والسرقـة.

الصراعات الداخليه بين المسلمين والتنافس فيما بينهم فى أميركا لا يؤثر إطلاقاً على مبدأ
حرية الإعتقاد وحرية ممارسة الشعائر الدينيه والتعبد , وهذا ما أعنيه .
أكرر تحياتى لصاحب البوست الحبيب أحمدونا .

Quote: علي كدا ما نلقاكم في بوست بتاع غناء أو كورة لحدي ما مشكلة دارفور تتحل!!

هههه يا أبوبكر .. ختيت ليهم العقدة في المنشار ..

-- إن صح التعبير - -

شكرا يا عبد الله بالتكرم على الرد المفصل.. والقصـد مما قلته كان دحض الافتراءات ان المسلمين ممنوعين من أداء شعائرهم في أوروبا.. والضحية ليست شعيرة من شعائر الإسلام.
نعم كل المساجد تتلقى الإعانات وكثير منها تبنى مخصوص لجنى الإعانات مثل بعض الكنائس.. بس لو الزول اتحير يؤجر ليه حتة و يخت هلال في السقف، ثم تجيب شوية من اصحابك وتسجلهم
وشوف الدولارات ما تديك الدرب.. وإنت ك (شيخ) يا ساتر.. لك الحق ان تستقدم إمام من مصر ويدوه القرين كارد في المطار. وبعد شوية يجيب اسرته كلها وأولاده يتعلموا مجاناً.. كميات الإحتيال
الحاصلة في المساجد لا تصدق إلا لو شفتها بنفسك.
العام الماضى فقط كان هؤلاء اللاجؤون السوريون معززين ومكرمين في منازلهم في وطنهم، وأطفالهم يلعبون بملابسهم الجديدة.. فجأة هذا العيد هم في خيام ويمشون عشرات الأميال سيرا على الأقدام..
تنقذهم الدول الأوربية التي فتحت لهم صدرها كما فتحته لمسلمى بلجيكا.. وتتفاوض دولهم لتقاسـم تكلفة إسكان وإعاشـة هؤلاء المسلمين، ومسلمو بلجيكا يحتجون بعدم السماح لهم بذبح الأضاحى.. فتأمل.
لو الخروف 100 دولار، وهم مليون، فهذه 100 مليون دولار.. لو تبرعوا بنصفها وقسموها بين المانيا والنمسا والمجر لكان لهم أجر عند الله.. ولعكسوا لأنفسهم وللعالم روح الوحدة الوجدانية والإنسانية
بين الأمة الإسلامية.

أبدا يا عبد الله عبد الله، لا تعيشون حرية الاعتقاد بشكلها الكامل
وزي ما قال سيف النصر لا تستطيعون بالزواج من اكتر من واحدة
فما هو ردك؟

. خلااس طوالي الملكيين أكتر من الملك وصلوا ..!!

قلتوا علمانية خلاص خلوا المسلمين يمارسوا علمانيتكم ..
ويا أبو ريش شنو شابكنا ألمانيا وما ألمانيا .. إنت ما تساهم .. مالك محنن؟ أم تكون ساهمت من ورانا ؟؟
خلاس لقيت فرصة تبشير بالجمهورية؟ حقو الواحد هسه ينادي ليك حاتم يضحي بيك ويسلخك في البوست ده ..

بس تصحيح بسيط للقراء عشان نكون منصفين .. بلجيكا حددت مذابح معيَّنة للذبح الحلال ولكنها ليست كافية للأعداد الكبيرة للمسلمين - هذا يعتبر تعسف غير مبرر- طالما أصلاً هم سمحوا بذبح الحيوان بدون تدويخ، يبقي ما كان في داعي للتعسف وكانوا يخلوا الأمر زي السنين الفاتت - حيث كانت هناك مذابح مؤقتة في كل المدن -
ومن ناحية أخري برضو المسلمين فوضويين بصورة منفرة ..
والشئ التاني.. أوروبا دي خلاس إنتهت .. من ناحية قروش فمعظم الناس قروشها علي قدر معايشها أو أقل .. باقي ليهم النظام، والفوضويين حينتهوا منه باللف والدوران بتاعهم ..

قبل كم سنة صديق جزائري قال لي في مزرعة ممكن نمشي نشتري خروف ونضحي هناك .. قلت كويس أهو الواحد يمشي يضحي في الريف والهواء الطلق .. فقمت مشيت معاهو فوجدت المكان عبارة عن حظيرة أحد الخواجات عبارة عن جملون مغاق مليان جداد وخرفان وبقر وخنازير وو كل أنواع الحيوانات .. ولقيت كمية من المغاربة كل واحد ماسك خروفه وينتهز فرصة حتي فاضية في هذا الجملون المزدحم - في مساحة مترين x مترين - ويمشي يضبح ويسلخ وو .. والدنيا مضلمة إلاّ من لمبة واحدة ووو بهدلة شديدة وجوطة وو .. أنا تفاجأت من هذه القذارة والفوضي والدسوسية الحاصلة - حيث ممنوع تضبح برّة ..
حليل ضحية السودان - تنظف الشارع قدام البيت وتضبح برواقة وهدوء لامن الخروف زاتو يتكيف ..

المهم، تاني قلت التوبة لي حبوبة ..

قال الهواء الطلق قال ..

التعديل عشان نسيت أكتب حليل ضحية السودان زاتو :)..

التحية للجمييييييييع ,,

وكل عام وانتم بالف خير ,, وكل عام دولنا الاسلامية سليمة ومعافية ,

النجيضة انه احمدونا دا رجل طيب مشكلتو الوحيدة العلمانية والديمقراطية والحرية!
ما عشان بعرفها من بعيد عشان ما عايشها لو عايش فيها كان بكون رايو آخر عشان كدا
نخلق ليهو العذر . لكن كمان ما حانتعامل معاهو بالمثل البقول ( الداير تكملو هملو ) لازم
نجيهو ونشاركو افراحو في الاسلام واطراحو في العلمانية .. اها ان شاء الله عاديني العيب ؟

وكل عام والعالم الاسلامي سليم ومعافي .

Quote: ويا أبو ريش شنو شابكنا ألمانيا وما ألمانيا .. إنت ما تساهم .. مالك محنن؟ أم تكون ساهمت من ورانا ؟؟

منير..
المحنن هو البيتكلم باللغـة دى.. بعدين انا محنن واللا ما محنن ما حتعرفها أونلاين أبداً.. وأنا لا اعرف الشكل فى الإنترنت لأن هذه صفـة المحننين.

أنا ما تحدثت عن أشخاص، خصوصا عنك انت.. فلماذا تشخصن النقاش.. وما أدراك انى ساهمت أم لا؟ تعرف من وين؟ شوف زى ما قلت ليك انا لا اشاكل
في الانترنت، لكن لو اصريت على name calling وشخصنة النقاش فهذا امر اخر.

غلبك الرد على كل الكلام الذى ذكرته أنا عن المسلمين في أوروبا.. الذين يعيشون عالة على الغرب الكافر ويتنكرون لأخوانهم.. لو مسلمين جد كان استضافوا إخوانهم في بيوتهـم، موش يخلوا الخواجات يأكلوهم
وهم يحتجوا انهم لم يسمح لهم بالذبح.. وغالبا ثمن الخروف يكونوا وفروه من إعانات بلجيكا دى زاتها. هنا في أمريكا يتشاكلوا في إعانات الدولة للمدرسة الإسلامية والمسجد.. ولما تجى خطبة الجمعة يقولوا اللهم
أهلك الكفار..
المسلمون صاروا مسخاً في الغرب..

يا أبوالريش .. تعرف أن كلمة محنن عبارة رمزية عامة، كناية عن سلبية المرء مع دعوته الآخرين للعمل وليست نبذ أو شتيمة ..
وعلي العموم أشعر أني ما كان يجب أستعديك ، ولذلك أعتذر لك ، وكل سنة وإنت طيب ..

لا عليك يا منير، وانت فعلا كالكلب في الحفاظ على الود.

Quote: حاجة ضد الصحة العامة او بتتعارض مع قواعد انتاج الطعام في البلد ممكن جدا تتمنع و مفروض هم كمواطنين يحترموا المسألة دي ا

يا دكتور / سيف -- المواطنين البلجيكيين طول عمرم يمارسوا معتقدهم الديني في الأضحية ---

الجديد شنو --- هل هذه أصبحت الأضحية الصحة العامة ....

وهل أكل الخنزير صحي ؟؟؟؟

ومالكم تمكرون أيها العلمانيين ...

ماقلتو حرية --- ومساواة --- عدالة ...

ماقلتو علمانيين...

Quote: ما دام المانيا الكافرة دى قامت بواجبكم نيابة عنكم ساعدوها بتمن الأضاحى ..

أخ / ابو الريش -- كل عام وأنت بخير....

سوق العمل الألماني محتاج الى عمالة رخيصة ....

ووجدت ضالتها في اللاجئين السوريين....



مع خوفهم من معتقدهم كمسلمين....

Quote: النجيضة دا رجل طيب مشكلتو الوحيدة العلمانية والديمقراطية والحرية!

بت نفيسه ... كل عام وأنت بخير..

العلمانية أُس مشاكل في كل البلاد الأسلامية ....

وهي زي لحم الرأس كل بلد تطبقه بطريقتها ....

Quote: لا عليك يا منير، وانت فعلا كالكلب في الحفاظ على الود.

شكراً .. مقبولة منك ..

Quote: علي كدا ما نلقاكم في بوست بتاع غناء أو كورة لحدي ما مشكلة دارفور تتحل!!

نميري قالو ليه لابد من قليل من الديمقراطية قال ليهم ديمقراطية شنو اذا الديمقراطية بتتجسد في الشافع ابشلاليف ده ( طبعا هسي كبر ولا زالت البراطم كما هي ) المهم أول العلمانية ولا الضبح غايتو الدنيا دي بقت ممحوقة خلاص القشرانية دي كانت كبيرة خلاص هسي اتسهتت بقت ضبح وعرس أربعة

Quote: أبوبكر عباس أبدا يا عبد الله عبد الله، لا تعيشون حرية الاعتقاد بشكلها الكامل وزي ما قال سيف النصر لا تستطيعون بالزواج من اكتر من واحدة فما هو ردك؟

التحيه لك الأخ , أبوبكر عباس وعيد مبارك .
ماهو حكم مشروعية الزواج بأكثر من واحده ؟
وهل الزواج فى حد ذاته أوعدمه له تأثير فى حرية الإعتقاد وممارسة شعائر الدين والعباده ؟
يا حبيب أميركا بلد المهاجرين من كل الأعراق والديانات لذلك وحتى يعيش الكل فى سلام وتوادد
وترابط وضع جورج واشنطن بمعاونة جون آدمز وتوماس جيفرسون قبل أكثر من 300 عام دستور
وقوانين المواطنه الأمريكيه بغض النظر عن الدين أو العنصر مما أدى إلى جعل أميركا اليوم الدوله الأولى
فى العالم من الناحيه الصناعيه والقوه الإقتصاديه والعلميه والعسكريه .
لذلك خلت أميركا من أى صراعات دينيه أو مذهبيه ومن يمارس أى تمييز دينى أو عنصرى تطاله يد القانون والعداله.
الدستور ألأمريكى فى بعض بنوده منح الولايات الحق فى أن تتخذ ما يلائمها من قرار إن شاءت . وكمثل تعدد الزوجات .
وتعدد الزوجات لا يُعتبر مخالفه قانونيه فى ولاية يوتا .

Quote: المهم أول العلمانية ولا الضبح غايتو الدنيا دي بقت ممحوقة خلاص القشرانية دي كانت كبيرة خلاص هسي اتسهتت بقت ضبح وعرس أربعة

أخ/ منتصر --- كل عام وأنت بخير ...

القشرانية تتمثل في سقوط أبسط مبادئ العلمانية القادين بيهم أضانا --

حرية الإعتقاد --- وممارسة المعتقد بحرية ...

سقوط أبسط المبادئ في دولة متقدمة وعريقة في ممارسة العلمانية..

قالوا عدالة --- ( لا) مساواة -- حرية ..

كتب أستاذ/ عبد الله عبد الله.....

Quote: ماهو حكم مشروعية الزواج بأكثر من واحده ؟

Quote: قوله تعالى: {فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة} (النساء:3)..

الأصل الإباحة --- للمسلمين -- والقوانين العلمانية في كثير من البلاد العلمانية تمنع ذلك...
ويسمح النظام العلماني بالخليلات
وشغل الكيري

و الله جماعة منطق عجيب. المسلمين يقتلوا فى دافور القريبة دي. دارفور الاقرب من بلجيا، قتلوا قتل غرائب الابل و الشوراد و احرقت قراهم و شردوا فى معسكرات اللجوء فى الدول المجاورة. يوم ما قريت لاحمدنا دا بوست يهاجم فيه قتل المسلمين فى دارفور و تشريدهم و حرق قراهم. مع العلم انو الضحايا فى دارفور هم أحسن أهل السودان اٍسلاماً و اٍلتزاما بالدين، احرقت قرائهم و نهبت اراضيهم بواسطة الجنويد بعضهم لا يعرف الله زاتو.

لماذا يتجاهل ناس أحمدونا الجرائم التى تقوم بها جماعة الاسلام السياسي تجاه المسلمين ثم يرفعوا عقيرتهم على توافه الامور؟ لو في ناس بتنتبه كان عرفوا ان دا المنطق البتشتغل بيهو جماعات الاسلام السياسي. الهرج و الهياج و الغوغائية، فى حين هم انفسهم يرتكبوا اظرط الجرائم فى حق المسلمين. ما شفت قبل أيام ناس الحركة الاسلامية طلعوا بكل قوة عين فى مظاهرات فى الخرطوم تدين الانقلاب العسكري فى مصر؟ شئ أقرب للجنون. أتحاد الطلاب السودانيين بتاع الكيزان كل مرة يطلع مظاهرة فى الخرطوم ضد قتل الفلسطيين، فى حين اتحاد الطلاب جزء من دولة تقتل مواطنييها. بل اعضاء الاتحاد زاتهم يشاركون قتل و تعذيب الطلاب المسلمين فى الجامعات السودانية. كيف لانسان عاقل ان يتأتي بمثل هذه الافعال المتناقضة؟ لكن الكيزان لا يجري على ما يجري على بقية البشر.

ياخي المسلمين فى نعمة كبيرة فى بلجيا و غيرها من الدول. نعمة ما قاعدين يلقوها فى بلاد المسلمين زاتها. معظم الدول الاوربية تعطي المسلمين جنسية و كامل حقوق المواطنة فى فترة تتراوح بين ٤ الى ٨ سنوات. فى السويد يحصلوا السوريين على الاقامة الدائمة فور دخولهم البلاد و يحصلوا معها على السكن و الاعاشة و المواصلات و كورسات تعليم اللغة مجانا. و يحصلوا على الجنسية بعد اربعة سنوات. جنسية تخول لهم المشاركة فى الانتخابات بالتصويت و الترشح. دا مولد عديل، فى السعودية لا يدخل المسلم لها الا عن طريق كفيل!

بالمناسبة المسيحيين السودانيين ممنوعين من بناء الكنائس. فى قانون من زمن عبود يمنع بناء كنائس جديدة. اي منع عديل لبناء دور العبادة. و اسالواهم عن المعاناة التى يعرضون لها فى هذا الصدد. اجراءات تصديق بصيانة ساكت فى مجابدة لسنوات. اي عشان يصينوا كنيسة لابد لهم من اٍستخراج تصاديق و تساريح لا حصر لها.

ما يقوم به أحمدونا ياهو بيزنس الاتجار بالدين الذى تمارسه الحركة الاسلامية الستينات. و للاسف كل مرة بمر على الناس. تجارة و سمسرة بالدين و هم مستعيدين للفتك بام أهل المسلمين زاتهم. نحن هسة فى شهر سبتمر و الناس لو متذكرين ماذا حدث للشباب السودانيين عندما خرجوا فى وجه الاسلاميين فى سبتمبر 2013> They don't give a damn about Muslimeen

Quote: للمسلمين -- والقوانين العلمانية في كثير من البلاد العلمانية تمنع ذلك... ويسمح النظام العلماني بالخليلات وشغل الكيري

يا أحمدونا الكلام برضو نوع من الجهل ساكت. اولا مافي حاجة واااحدة كده اسماها العلمانية. العلمانية فى فرنسا تختلف من نظيرتها فى بريطانيا و تختلف من العلمانية فى امريكيا ... الخ. العلمانية باختصار هى مجهود الناس فى تدبير شؤونهم بالطريقة المثلي. و هى مثلي لانها عرضة للمراجعة و التقويم و النقد و التطوير و الاستجابة لمتغيرات العصر و متغيرات الحياة و تطور التجربة البشرية و تطور العلوم كمان. عشان كده هى مختلفة من الدين الثابت. عشان كده ترك الدين للتدبير الشخصي.

الدول العلمانية لا تمنع تعدد الزوجات، as such> ممكن تزوج اربعة نسوان. اذا اردت الزواج بمعناه الديني. يعني تمشي الجامع و تعقد و تشهر ... الخ. مافي زول بيسالك. المشكلة فى بعض الدول انو فى السجل الرسمي ما بتسجل ليك اكثر من زوجة واحدة. فى السويد مثلا بتسجل ليك الزوجات التانية كصديقات او حاجة من النوع دا. لكن دي ما بتاثر على حقوق اخري الاطفال بيحصلوا على كامل حقوقهم و كل شئ تمام التمام. لكن المواضيع دي زاتها ممكن تكون عرضة للنقاش و تتطوير و تتغير اذا ما ظهرت فى المجتمع حوجة جديدة. دي ميزة العلمانية، انو تجربة الحكم و اٍدارة الدولة مفتوحة دائمة للمراجعة و التطوير و للاستجابة لحوجات المجتمع.

Quote: نوع من الجهل ساكت. اولا مافي حاجة واااحدة كده اسماها العلمانية. العلمانية فى فرنسا تختلف من نظيرتها فى بريطانيا و تختلف من العلمانية فى امريكيا ... الخ.

أخ / أبوبكر صالح --- تحياتي..

سبحان الله من يستنكر لحم الرأس بتاع العلمانية ...

يعتبر نوع من الجهل....

كل ينجر على هواه....

وهواه هو الرابط بين العلمانيات المختلفة....

Quote: فى السويد يحصلوا السوريين على الاقامة الدائمة فور دخولهم البلاد و يحصلوا معها على السكن و الاعاشة و المواصلات و كورسات تعليم اللغة مجانا.

ليس لسواد عيونهم --
عدد السكان يتناقص في الدول الأوربية ...
ولحاجة سوق العمل ...
يعني مجبورين على ذلك..

Quote: و يحصلوا على الجنسية بعد اربعة سنوات. جنسية تخول لهم المشاركة فى الانتخابات بالتصويت و الترشح.

ولكن لا يستطعيون أن يكونوا رئيس وزراء أو رئيس دولة ...
لأنهم مسلمين ... وهي نصوص ضمنية في القانون

Quote: ليس لسواد عيونهم -- عدد السكان يتناقص في الدول الأوربية ... ولحاجة سوق العمل ... يعني مجبورين على ذلك..

لو كانت دي المشكلة كان ممكن الدول الاوربية يكون عندها حلول اسهل كتير. مثلا فتح باب اللوتري او الهجرة المشروطة مثل كندا. هجرة Selective. كان ممكن يحصلوا على خيرة العقول و الايدي العاملة من كل بلاد العالم. بل و يختاروا من شعوب سهلة الاندماج غير متعسّمة مثل المسلمين بدل فتح الباب للمسملين و يتحملوا خطر انو ممكن واحد يطلع داعشي و يتفجر فى الناس فى وسط البلد. قبل سنوات فى عراقي حاول يعمل ليهو حركة تفجير فى وسط استوكهولم، الحمد لله لم تنجح و لم تقتل أحد غيره. جاء السويد طفل مع أهل الهاربين من جحيم العراق فى بواكير التسعينات و استمتع بكل الخدمات المجانية المقدمة للاطفال من الرياض الحديثة، للعلاج المجاني و التعليم المجاني و الرحلات و البرامج الرياضية فى الاخر عمل ليهو قنبلة عشان يقتل السويديين!

بالمناسبة انا قابلت بجليكا قبل شوية. قلت ليها دي شنو العملية البايخة العمليتها دي، كيف تمنعي المسلمين من ذبح الاضاحي بالطريقة البدائية ديك. ضحكت كده و قالت لي انت من وين؟ قلت ليها انا من السودان! قالت ياخي كدي امشي شوف المسلمين القاعدين يذبحوهم فى دارفور ديل. مسلميني ديل اخر روقة و راحة بال لمن بتدلعوا كمان

أبوبكر صالح ...
خليك من المزايدة بالحرب في دارفور وغيرها ....
الدول العلمانية الكبرى هي من تقود الحروب في البلاد الإسلامية
سوريا -- العراق -- ليبيا ....
المهم سقوط قناع العلمانية وضح النهار بشعاراتها الفضفاضه في المساواة ....

الحبيب أحمدونا
لنجعل تركيزنا فى الإجابه على تساؤل الأخ أبوبكر عباس

Quote: أبوبكر عباس أبدا يا عبد الله عبد الله، لا تعيشون حرية الاعتقاد بشكلها الكامل وزي ما قال سيف النصر لا تستطيعون بالزواج من اكتر من واحدة فما هو ردك؟

أتيت أنت بجزء من الآبه رقم 3 من سورة النساء

Quote: قوله تعالى: {فانكحوا ما طاب لكم من النساء مثنى وثلاث ورباع فإن خفتم ألا تعدلوا فواحدة}

بينما الآيه تتحدث عن محاذير عن تعدد الزوجات
كانت بداية الآيه
( وإن خِفتم ألا تقسطوا فى اليتامى
فانكحوا ما طاب لكم من النساء مثنى وثلاث ورباع
فإن خِفتم ألا تعدلوا فواحده
أو ما ملكت أيمانكم
ذلك أدنى ألا تعولوا )

Quote: الأصل الإباحة --- للمسلمين -- والقوانين العلمانية في كثير من البلاد العلمانية تمنع ذلك... ويسمح النظام العلماني بالخليلات وشغل الكيري

إباحة الشئ تعنى أنه ليس فرضاً وعدم القيام به لا يعتبر معصيةً و لا يؤثم تاركه .
المهم الحبيب أحمدونا
نحن المسلمين فى أميركا أكدنا لكم بالبرهان أننا نمارس شعائرنا الدينيه والحمد لله بكل حريه
فى المساجد وحتى فى الميادين العامه أمام البيت الأبيض وأمام قبة الكونقرس
وبالمناسبه فى أعلى مبنى الكونقرس قبه كبيره يمكن مشاهدتها من بعد عشرات الأميال .

Quote: أبوبكر صالح ... خليك من المزايدة بالحرب في دارفور وغيرها ....

يا أبو حميد انت ما خجلان تزايد بتوافه الامور و تجقلب لمن نذكرك بجرائم الاسلام السياسي فى حق المسملين انفسهم؟ الالاف من المسلمين المساكين ذبحوا على يد جماعة الاسلام السياسي فى السودان، بل أفضل التزاما بالدين هم من ذبحوا و شردوا و اٍحرقت قراهم. أحرقت القري و سفكت دماء المسلمين ملشيات حليفة لجماعات الاسلام السياسي مكونة من جنجويد لا يعرفوا الله ولا يعرفوا الدين زاتو.

غايتو المسملين أحسن ليهم يتحركوا و ينتزعوا دينهم من فك تجار الاسلام السياسي ديل. هسة زي الحادثة بتاعت بلجيكا دي خير مثال. قالوا داير تدابير تقليل الالم الحيون اثناء الذبح. نقول ليهم خير و بركة، نحن زاتنا دينا يدعونا للرفق بالحيوان. خلاص نعمل لجنة مشتركة تبحث افضل الحلول فى هذا الاطار. اذا كان الحل الامثل هو تخدير موضع الذبح مع مراعاة صحة الذبح و صحة اللحم كلام تمام. اذا كان الخيار الامثل هو صعقة كهرباء تخدر الحيوان و تقليل آلام الذبح، برضو خير بركة. دي الكلام المعقول المسلمين مامورين بالرفق بالحيوان أكثر من غيرهم!

Quote: الدول العلمانية الكبرى هي من تقود الحروب في البلاد الإسلامية

يا ربي قطر و السعودية و الامارات بقوا دول علمانية كبرى و للا شنو؟

الحبيب احمدونا عيدك مبارك و تحياتي لك و لزوارك الكرام

عارف يا احمدونا في مقولة بتقول "اطمإنوا فإن العرب لا يقرأون .....و إذا قرأوا لا يفهمون......و إذا فهموا لا يطبقون!!!! تنسب هذه المقولة لهنري كيسنجر و عندما سألت عنها عمنا قوقل قال لي لا لا دا ما هنري دا رئيس وزراء اسرائيل موشى دايان عندما علم بتسرب معلومات عسكرية حساسة تخص الدول العربية, و لامه الناس، فقال لهم اطمإنوا فإن العرب لا تقراء

هسي يا احمدونا اخونا منير فتح بوست في ذات الخصوص و اخونا قسم الفضيل ما قصر و بذل جهد جهيد نكتوا ليك من سابع أرض و عتلوا تنكش تنكش تنكش جا كبا ليك هنا في عبك

زي ما قال موشي دايان تعب اخونا قسم الفضيل و الله طلع خسارة فيك
لا قريت البوست
ولو قريتوا ما فهمتو
ولو فهمتو ما اختشيت و جيت اعتذرت عن بوستك دا

بي بساطة لانو اخونا منير العايش في بلجيكا دي زاتا كتب قبل 25 يوم يعني قبل العيد بي فترة الاتي

Quote: أبوبكر .. والله أحيِّ إجتهادك .. لو تلاحظ أن ردهم عليك يؤكد إحترامهم للأديان وشعائرها .. لكين ياخوي أنا أساساً جبت الخبر لأنه غطي الأخبار هنا وأدي لرد فعل من المساجد بمقاطعة الأضحية هذا العام - يعني الناس دي ما جاطت من فراغ .. وأكون صريح أنا ما قاعد أتابع الأخبار باللغة البلجيكية إنما من عرب بلجيكا ديل المتابعين كل التفاصيل .. وأبشرك إنه أنا يوم الإثنين الفات ده مشيت لجزارة مغاربة وسألته حصل شنو في الموضوع، فقال لي أن البلدية تراجعت عن قرارها - أول حاجة قلت يمكن الجزار ده ما ناقش - لكين البارح كان هناك خبر رئيسي في القناة البلجيكية عن هذا التراجع ..

ياحمدونا انت و برضو للاسف الشديد و الشديد جدا اخونا العزيز منير بتعتمدوا في الاخبار علي المصدر التاني يعني معلومات سكند هاند و ليس من مصدرها الاساسي
انت يا احمدونا علي حسب علمي انك ما عشت في الغرب و ربما تفضل ان تتلقي الاخبار عن الغرب باللغة العربية و ليس الانجليزية او اي لغة اوروبية اخري لسبب او لاخر و بي صراحة معظم ما تنقلة انت و كذلك الاخ الحبيب عماد موسي - والله مشتاق ليهو شديد واتمني ان يكون بخير و له التحية اينما كان- اقول تجيبو اخبار عن الغرب مترجمة من الانجليزية مثلا، امشي افتشها بي لغتها الاصلية، القي الكلام فيهو اختلاف كبير

الغرض مرض يا احمدونا و للاسف انت دايما تنقل كتابات الناس العندها غرض زي ايمن حسن دا بتاع صحيفة سبق الالكترونية كاتب المقال الانت فتحت بيهو البوست دا من هنا http://sabq.org/w4Hgdehttp://sabq.org/w4Hgde
كتب المقال بهذا العنوان المثير لمشاعر المسلمين "مليون مسلم ممنوعون من ذبح الأضحية في بلجيكا" قبل ٤ ايام من عيد الاضحي مع العلم ان هذا الامر قد حسم في بداية شهر 9 علي حسب كلام اخونا منير
بلاضافة للغرض - ما عايز اقول فاسق بحكم النباء الكاذب، فربما هو جاهل- يبدو ان ايمن حسن دا من انصاف المتعلمين، حتي ما قادر يضبط عنوانو لغويا - مع انو دي مهنتو- فكتب "ممنوعون" فرفع المفعول بهم بدلا من نصبهم
وهذه كما قال اخونا شاموق - اشتاق الي كتاباته هو الاخر و احييه اينما كان- قال هذه علتنا تولي امرنا و امر ديننا أجهلنا
يا احمدونا الله يرضي عليك و عشان مما تتخما ساكت و كلام موشى ديان دا ما ينطبق فيك أول حاجة افهم دينك صاح "و تبين الاخبار" فعسي ان تكون من فاسق، و بعد ما تفهم دينك صاح، طبقو صاح و تعال هنا ما عايزين منك اعتذار و لا حاجة، لكن من الرجولة انك تقول و الله يا جماعة الكلام النقلتو دا اتضح انو ما صاح، الا اذا عندك راي انو اخونا منير دا كذاب و عندها لكل حادث حديث

ارقد عافية و كل عام و انت و اهل بيتك بخير

المقال من هنا sabq.org /w4Hgde

ياجماعة الزول الاسمو احمدونا دا واضح انو عقلو ما كويس
فياريت تخلوهو يبرطع براهو
انا غايتو وصلتا للنتيجة دي بعد كم موضوع و مداخلة مع الزول دا

هسي الناس في دول الخليج بأمر البلدية ممنوع يضبحو في البيت
يعني برضو ممنوع تضبح براحتك ذي ما بحصل في السودان
و الناس رغم المعاناة والزحمة بتاعة المسالخ يوم العيد ما قالو شئ

Quote: ياجماعة الزول الاسمو --- دا واضح انو عقلو ما كويس فياريت تخلوهو يبرطع براهو

كل عام وأنت بخير يا خضر ...
نحن لا نبرطع ....

نسرد حقائق ...

لتبصير الميغبين...

Quote: "اطمإنوا فإن العرب لا يقرأون .....و إذا قرأوا لا يفهمون......و إذا فهموا لا يطبقون!!!!

Quote: زي ما قال موشي دايان تعب اخونا قسم الفضيل و الله طلع خسارة فيك لا قريت البوست ولو قريتوا ما فهمتو ولو فهمتو ما اختشيت و جيت اعتذرت عن بوستك دا

كل عام وأنت بخير يا جامع ...

أختشي لشنو ... كان مشيت لبوست دكتور منير النقلوا الأخ / قسم الفضيل مشكور لدي فيه مداخله --

والتكرار للفائدة إعتذر لشنو ...

ولو طبق معايرك --- كل الناس الفاتحين بوستات عن مباراة الهلال أمس مفروض يعتذروا لأن الموضوع واحد والبوستات متعددة ومتزامنة ....

غايتو يا العلمانيين خلو نظرية عنزة ولو طارة...

Quote: والتكرار للفائدة إعتذر لشنو ...

يا احمدونا بالجد كدا عليك الله الخلقك دا انت قريت مداخلتي دي كلها من بدايتها لي نهايتها؟

Quote: فكتب "ممنوعون" فرفع المفعول بهم بدلا من نصبهم

معليش ، بس قلت أعلق علي دي حار حار .. ..
بمناسبة المسلمون ممنوعون : رغم طول المدة لكين برضو متذكرين شوية قواعد ونحو .. المسلمون - أو بليون مسلم - ممنوعون .. كده صاح .. لأنو المسلمون مبتدأ وممنوعون خبر علي ما أعتقد، والرفع بالواو .. وأظن يكون هناك فطاحلة عربي ممكن يفتوا في الموضوع .. أنا ما شاطر سوي أني عربي ساي جبتها علي السليقة ليس إلاّ - خلي العربوفوباويين يجو يغالطوني - :)..

ويا صاحبي ناصر جامع .. عاين فوق أنا برضو علقت في هذا البوست - شوف تعليقي - قلت إنو البلجيك تنازلوا عن قصة تدويخ الحيوان ولكن جعلوا الذبح في مسالخ محدودة العدد مقارنة بأعداد المسلمين .. يعني ما ممكن مثلاً تسافر ١٠٠ كيلو عشان تمشي تضبح وتكون المدة المتاحة ليك تساوي جذر خمسة من الثانية !! .. وقلت ده تعسف غير مبرر - لأنه الإعتراض الأساسي هو تدويخ الحيوان، فلو سمحت بعدم التدويخ - وهي القضية المبدئية - تاني التضييق لزومو شنو؟؟ !!..
هسه معظم المسلمين ما ضحوا السنة دي ..

Quote: معليش ، بس قلت أعلق علي دي حار حار .. .. بمناسبة المسلمون ممنوعون : رغم طول المدة لكين برضو متذكرين شوية قواعد ونحو .. المسلمون - أو بليون مسلم - ممنوعون .. كده صاح .. لأنو المسلمون مبتدأ وممنوعون خبر علي ما أعتقد، والرفع بالواو .. وأظن يكون هناك فطاحلة عربي ممكن يفتوا في الموضوع .. أنا ما شاطر سوي أني عربي ساي جبتها علي السليقة ليس إلاّ - خلي العربوفوباويين يجو يغالطوني - :)..

ههههههه يا حبيب انا زيك واحد اكتر من عشرين سنه في بلاد الفرنجة لكن ممنوعين زي الماء الزلال في اللسان
للعلم انا بتاع هندسة و علاقتي بالعربية اسوأ من علاقة الضره بالضرة

عشرين سنة؟ حولااا ..
ليه؟ إنت أصلو مولود قبل الميلاد واللا شنو؟؟
طيب فضل فيك شنو ؟؟
إنت إنتهيت رسمي .. هههه ..

Quote: ههههههه يا حبيب انا زيك واحد اكتر من عشرين سنه في بلاد الفرنجة لكن ممنوعين

ربنا يفك كربتكم يا ناصر ...

بعدين ما في إنسان يرفض النظام ... من أجل النظام --- ولكننا نشير للتضيق الذي يتنافى مع مبادئ العلمانية الراحت شمار في مرقه ..

قالوا مساواة ....

Quote: يا احمدونا بالجد كدا عليك الله الخلقك دا انت قريت مداخلتي دي كلها من بدايتها لي نهايتها؟

ما جاوبت علي سؤالي يا احمدونا

ما جاوبت علي سؤالي يا احمدونا

Quote: يا احمدونا بالجد كدا عليك الله الخلقك دا انت قريت مداخلتي دي كلها من بدايتها لي نهايتها؟

أخ/ نار جامع --- تحياتي.

العالم أصبح قرية يا حبيب ....

العلمانية التي تحكم بها الدولة الغربية يجب أن لا تتدخل على الإطلاق في مسائل المعتقدات والممارسات الدينية ...

إن كانوا يدعوا حقاً أنهم علمانية كما يسموا أنفسهم ....

السلطات هناك أصدرت القرار ... وعندما شعرت بردة الفعل تراجعت وحددت مسالخ محددة كما وضح الأخ / منير ولكن لا تكفي ...
علماً بأن المسالخ المؤقته معمول بها حتى في الدول العربية ( السعودية مثلاً )
راجع مداخلته ..

Quote: بس تصحيح بسيط للقراء عشان نكون منصفين .. بلجيكا حددت مذابح معيَّنة للذبح الحلال ولكنها ليست كافية للأعداد الكبيرة للمسلمين - هذا يعتبر تعسف غير مبرر- طالما أصلاً هم سمحوا بذبح الحيوان بدون تدويخ، يبقي ما كان في داعي للتعسف وكانوا يخلوا الأمر زي السنين الفاتت - حيث كانت هناك مذابح مؤقتة في كل المدن