Post: #1
Title: ميدالية أولمبيّة
Author: أبوبكر عباس
Date: 09-22-2015, 08:43 AM
Parent: #0
08:43 AM Sep, 22 2015
سودانيز اون لاين
أبوبكر عباس-الإمارات
مكتبتى فى سودانيزاونلاين
منذ قدومه للخرطوم من لندن عام ٦٥ رئيسا لمكتب الخطوط الجوية البريطانية بالخرطوم، تعوّد نور الدين صلاح أن يخرج من بيته الكائن بشارع القصر للزيارات والفسح بعد صلاة العشا؛ تجنبا لتقاطعات احراجات الصلاة مع علاقاته الاجتماعية.
في يوم الاربعاء الشتوي داك من عام سبعين، كان ناوي يزور بعض أقاربه الحلبة من اولاد كرمة النزل العزابة الساكنين جنوب كلزيوم، لكنه غيّر رأيه وفضّل عليهم التمشي على الكورنيش.
|
Post: #2
Title: Re: ميدالية أولمبيّة
Author: أبوبكر عباس
Date: 09-22-2015, 10:21 AM
Parent: #1
أثناء جلوسو في الكورنيش عبرت في خاطرو فكرة الدور الذي يطمح به في المجتمع، وامنيتو بان يعمل حاجة خلال حياتو تكون في ذاكرة الاجيال.
عاين كدا، لقى أكبر انجاز ممكن يحققو انو يحجز لزوجات الوزراء مقاعد سفر في الاجازات!
سرح واذكر انو آخر إنجاز حققوهو أهلو قبل الهروب من حريق قلعة محمد علي هو الحريق نقسو!
وقف على حيلو وقرر طرد الوساويس دي بالذهاب لبار الخواجة الجنب صينية سان جيمس،
دخل يدو في جيبو عشان يتصل بالقبطية السكرتيرة، يقول ليها بكرة بتاخر من المكتب، لكنو تذكر انو الموبايلات لسع ما كانت في!
أول ما دخل البار اتصل بصباح في المسالمة من تلفون البار وقال ليها؛ عليك جيسس يا صباح بكرة قولي لود عمك المعفن داك خليهو يوقع الاوراق؛ عشان أنا بتأخر شوية.
قالت ليهو: خير إن شاء جيسس يا أستاذ؟
- لا لا خير، عندي إجتماع بخصوص مشروع مكتب مدني وقفل السماعة وقال في سرو: مدني شنو كمان ووسخ شنو!
والله، عرب الجزيرة ديل لو انكسرو في لندن دي إلا يلحقوها أمات طه!
|
Post: #3
Title: Re: ميدالية أولمبيّة
Author: بله محمد الفاضل
Date: 09-22-2015, 10:25 AM
Parent: #2
| Quote: دخل يدو في جيبو عشان يتصل بالقبطية السكرتيرة، يقول ليها بكرة بتاخر من المكتب، لكنو تذكر انو الموبايلات لسع ما كانت في! |
|
Post: #4
Title: Re: ميدالية أولمبيّة
Author: أبوبكر عباس
Date: 09-22-2015, 01:07 PM
Parent: #3
بعد الكاس الرابعة إنتبه لسهرة في التلفزيون مع رئيس اللجنة الأولمبية السودانية، السهرة كان تتخلها لقطات عن المسابقات السابقة، ضيف السهرة قال: السودان يستعد بكثافة لاولمبياد برلين ٧٢، والسيد الرئيس القائد حارسنا وفارسنا وجه وزير الرياضة للاهتمام بالالعاب القوى، وضرورة حصد الميداليات من معاقل الامبريالية في برلين، في اللحظة دي كانت هناك لقطة لبطل العالم في العدو السريع.
علق نور الدين على سرعة العداء بصوت خافت: بالله شوف العب دا سريع كيف!!
النادل سمع التعليق دا وقال: وحات الله وسيدي أبقدم، يا سعادتك، عندنا في أم قوزين حرامي اسرع مية مرة من الأمريكي دا.
نور الدين قال ليهو: أبقدم دا منو؟
|
Post: #5
Title: Re: ميدالية أولمبيّة
Author: الصادق عبدالله الحسن
Date: 09-22-2015, 01:40 PM
Parent: #4
=
سبقـني الشاعر (بله الفاضل) والشعراء دائماً يلقطونها طائرة ، ويخطفونها "والعـة"
إلى التعليق على اللقطة العبقرية الخاصة بالموبايل..
ولولا أنني عرفت بعد أن قرأت، أنك أحد أحفاد الشيخ (مدني السُني) أو حفيد لشيخ آخر ربما من أولئك الشيوخ الذين يمشون فوق سطح الماء ويروبونه بالطبع.
لدعوت الله أن يحمي و يُسلِّم تلك الأنامل المبدعة التي لفــَّت لك سيجارتك.
فأستغفر الله وأعود للقطة الموبايل مرة أخرى، ولزاوية فاتت ،لحسن الحظ، على شاعرنا المرهف بله،
وأذكرك يا يا أبا بكر بأن المذيعين السجمانين الذين يستضيفون في سهراتهم ضيوفاً سجمانين و يسمحوا لهم بأن يقولوا:
| Quote: : السودان يستعد بكثافة لاولمبياد برلين ٧٢ |
ذاتهم (لسع ما كانوا في).
تحياتي لكما
...
..
.
|
Post: #6
Title: Re: ميدالية أولمبيّة
Author: معاوية الزبير
Date: 09-22-2015, 02:08 PM
Parent: #5
| Quote: وضرورة حصد الميداليات من معاقل الامبريالية في برلين، |
ميونيخ يا مستنير يا بتاع الخلاوي.
|
Post: #7
Title: Re: ميدالية أولمبيّة
Author: أبوبكر عباس
Date: 09-22-2015, 04:37 PM
Parent: #6
عليك الله يا بله والصادق كلمو معاوية دا، وقولوا ليهو معلومة زي معلومة ميونخ ما ممكن تفوت على كاتب بكثافة أبوبكر عباس!
يا معاوية، يا مثقف، السوفيت هم من أصروا على عدم اقامة الاولمبياد في برلين، والامبريالية رضخت ليهم وحولتها لميونخ.
ثم ثانيا الكلام على لسان الرئيس القائد وكتر خيرو كونو يكون عارف اسم برلين في الزمن داك!
|
Post: #8
Title: Re: ميدالية أولمبيّة
Author: يحي قباني
Date: 09-22-2015, 04:40 PM
Parent: #6
Quote:
: وضرورة حصد الميداليات من معاقل الامبريالية في برلين،
|
| Quote: ميونيخ يا مستنير يا بتاع الخلاوي. |
انت كمان ما تدقق يا حبيب ... الراجل صاحبك ...
صاحبنا ود النعيمة يا معاوية ... ( الغريبة من أولاد مدني برضه )
قال زمان كان مؤجر بيت في العمارات في شارع 44
فوتناها ليهو لأنه صاحبنا ... رغم انه العمارات ارقام شوارعها فردية ...
____________________________________________
و صاحبنا ود الحضري ( الغريبة قرا في الهوارة مدني )
كتب موضوع انشا في الوسطى قال كان ماشي فوق ( كوبري الحرية ) ...
و سمع صوت استغاثة ... و تاوق من فوق الكوبري شاف زول داير ( يغرق ) ...
فقفز و صارع الأمواج لغاية ما انقذه ...
الغريبة يا معاوية ... الحتة ديك بالذات كانت عبارة عن قراشات لي صعاليق المحطة ...
* الناس الما حضروا الزمن داك ممكن يسألوا صعلوق المحطة يعني شنو )
____________________________________________________
|
Post: #9
Title: Re: ميدالية أولمبيّة
Author: أبوبكر عباس
Date: 09-22-2015, 04:45 PM
Parent: #8
ثم ثالثا، زي ما قال ليك قبّة ما تدقق
دا أدب يتشابه مع الواقع بالصدفة
|
Post: #10
Title: Re: ميدالية أولمبيّة
Author: أبوبكر عباس
Date: 09-22-2015, 05:05 PM
Parent: #9
لمان الساعة اتنين جات وناس البار بدو يرفعوا في الكراسي فوق الترابيز، كورك للجريون بتاع أم قوزين سألو: اسمك منو؟
- مختار
- ممكن يا مختار تجيب لي تاكسي وتمشي معاي بيتي ولو داير تنوم ما مشكل، والصباح تشيل الفيها النصيب؟
علي الفور مختار وافق، وقال ليهو أصلنا عزابة مقطوعين من شجرة وساكنين اللاماب.
تاني يوم نص النهار صحى لقى مختار مرتب البيت وعامل الشاي والقهوة وطابخ ليهو حلة جداد كاربة
ابتسم وقال لمختار كدي تم لي قصة حرامي أم قوزين وذكرني بأبقدم دا منو؟
|
Post: #11
Title: Re: ميدالية أولمبيّة
Author: الصادق عبدالله الحسن
Date: 09-22-2015, 05:40 PM
Parent: #10
=
أتعهد أنا وأخوي الشفيف (بله الفاضل) ومعنا (نورالدين صلاح، ومختار زاتو) ونزولاً عند طلب الكاتب الكثيف، أن نلتزم ونحن في كامل قوانا العقلية، بإقناع الأخ غير الكثيف (معاوية الزبير) بأن معلومة (زي معلومة ميونخ ما ممكن تفوت على كاتب بكثافة أبوبكر عباس).
ونحن من جهتنا نطلب من الكاتب الكثيف الذي قال نصاً: | Quote: السوفيت هم من أصروا على عدم اقامة الاولمبياد في برلين |
ونستحلفه بالله وبسيده أبقدم، وحتى نمضي معه في بقية حداثياته، أن يشرح لنا مبررات إصرار السوفيت على عدم إقامة الأولمبياد في برلين، علماً بأن برلين في العام 1972 لم تكن إمبريالية ولا يحزنون كما يزعم الكاتب الأشد كثافة في تاريخ الأدب الحداثي.
بل كانت عاصمة لألمانيا الشيوعية التابعة للاتحاد السيك ــوفيتي معلَّق فيك.
...
..
.
|
Post: #12
Title: Re: ميدالية أولمبيّة
Author: أبوبكر عباس
Date: 09-22-2015, 05:53 PM
Parent: #11
دي الفكرة يا كيشة، برلين يا كيشة، كانت برلينين؛ واحدة امبريالية والتانية كانت تدعي على لسان الشرق أنها عاصمة العالم الحر الجديد
|
Post: #13
Title: Re: ميدالية أولمبيّة
Author: أبوبكر عباس
Date: 09-22-2015, 06:07 PM
Parent: #12
أبقدم هو ناظر عموم الهواوير.
الحرامي اسمو صجّة، مرّة قبل العصر دخل ليهو فريق عرب لفح ليهو كم حاجة وجرى، صبيان الفريق ركبوا جمالم وقصوا اترو، تاني يوم الضحى وصلوا ليهم فريق عرب تانين وسألوهم عنو؟
قالوا ليهم: بلحيل جانا أمس العشا وكان عندنا حفلة عرض فوقها للصباح، وبعد شرب الشاي وفطر، ختر مصبّح وكمان حفيان!!
- لو مشينا ليهو في أم قوزين بلاندروفري البرّة دا بجي معانا؟
- ما لو ما بجي الكلب؟ عندو شنو؟ إلا نان بعدمكم الإبرة
- تقدر توصلنا؟
- ود عمي حسن قمريّة بالسجانة، خبير في الدروب وهامل ما عندو شغلة بمشي معانا
|
Post: #14
Title: Re: ميدالية أولمبيّة
Author: أبوبكر عباس
Date: 09-22-2015, 06:21 PM
Parent: #13
أوكي يا مختار، قوم أرفع براميل الجاز وخلينا نمشي نجيب سيد قمريّة ونشاري حاجاتنا وبكرة فجر نسافر.
اتصل بنائبو في المكتب يوسف جرجس وقال ليهو مسافر مدني لمعاينة المكتب وبرجع بعد العيد.
غشى بنك الخرطوم وسحب ليهو رزمة قروش، طلع منها مية جنية مداها لمختار وقال ليهو خمسين ليك وخمسين لقمرىّة والباقي بعد نجيب صجّة.
مختار قربت تجيهو سكتة قلبية من كُبر المبلغ!!
في الطريق للسجانة مختار قال للنور: عليك الله، يا أستاذ تعفي لي؟
- أعفي ليك شنو؟ سرقت حاجة من البيت؟
- لا، معاذ الله، لكن أمس في البار لمان قلت لي تنوم معاي، كنت قايلك من الجماعة وكايس ال...
|
Post: #15
Title: Re: ميدالية أولمبيّة
Author: محمد على طه الملك
Date: 09-22-2015, 06:45 PM
Parent: #14
لعلي على ضوء انتباهة الزملاء الكيشة ..
وقبل وصول من علموهم السحر ناس منتصر وجلالدونا ..
أرفع كرتا أصفر يمنع دغمسة لغتنا العامية الشعبية وتحريفها على يد المستنيرين الجدد ..
إتا متأكد مختار قال ليهو كده بالحرف؟
|
Post: #16
Title: Re: ميدالية أولمبيّة
Author: أبوبكر عباس
Date: 09-22-2015, 06:53 PM
سبب هلاككم
غلاطكم لأنبياءكم
|
Post: #17
Title: Re: ميدالية أولمبيّة
Author: أبوبكر عباس
Date: 09-22-2015, 07:03 PM
Parent: #16
نور الدين طلّع العربية من الشارع ووقفها وقال لمختار:
يعني أمس لو احتكيت بيك أو خليتك نمت معاي في اللوضة كنت انتهيت مني؟
- لا لا
- لا لا شنو؟ دا ياهو كلامك!
- ابدا ما كنت بعمل القصة دي معاك بدون ما استلم الفكّة قبل الشغل
نزل من العربية وقعد في الواطة منفقع من الضحك لحدي ما اتعشرق وطرش الجداد المخلوط بالنبيذ
وردد صحي كلام الخواجات: "إيّاك والغريب" تلاتة مرات
رجع العربية قال لمختار: إتّا من وين يا ولد؟
- أم قوزين
أم قوزين
أم قوزين
|
Post: #18
Title: Re: ميدالية أولمبيّة
Author: Faisal Saad
Date: 09-22-2015, 07:24 PM
Parent: #17
الأجواء في اسبورو الخضراء شكلها منعشة و همبريبها طاقش.. كل عام و انتم بخير،، و انا هنا مرابطون في درب الأنبياء برلين ولا ميونخ شرقية ولا غربية معاذ الله ولا لا حول ولا قوة كلوا ما فارق كتير فى سبيل الوصول لفك طلاسم أم قوزين و أب قدم.. غايتوا في البرتا كندا في اتنين هايوي مشهوران دير فوت و بلاك فوت احتمال يكون عندهم علاقة بروايتك و كدا..
|
Post: #19
Title: Re: ميدالية أولمبيّة
Author: muntasir
Date: 09-22-2015, 08:27 PM
Parent: #18
دي شنو القصة الكلها أسامي دي فعلا المغمور مغمور لو ركبوا في شماغو بابور
|
Post: #20
Title: Re: ميدالية أولمبيّة
Author: محمد المرتضى حامد
Date: 09-23-2015, 09:04 AM
Parent: #19
Quote: Quote:
لعلي على ضوء انتباهة الزملاء الكيشة ..
وقبل وصول من علموهم السحر ناس منتصر وجلالدونا ..
أرفع كرتا أصفر يمنع دغمسة لغتنا العامية الشعبية وتحريفها على يد المستنيرين الجدد ..
إتا متأكد مختار قال ليهو كده بالحرف؟ |
كتبا ناقصه (لا) أخرى بعدها فاصلة يا مولانا ..
ولعلك لحظت أنه رمى برلين كدا ساااي ما عارف إنو صاحبو معاويه هو اللي سقف استاد ميونيخ،
هسه أي مداخله يكتبا يردد وراها ( وجعلنا من بين أيديهم ..)
الله يجازي أيلول الأسود..
-
من أجمل البوستات ، يستحق مسمى أبوبكر عباس وشركاؤه (تضامنية) ..
|
Post: #21
Title: Re: ميدالية أولمبيّة
Author: أبوبكر عباس
Date: 09-23-2015, 09:06 AM
Parent: #19
كلامك صاح يا منتصر، بختصر ليك الموضوع ونهيههو في المداخلة الجاية وبودي ليك الحرامي صجّة مباشرة لميونخ ٧٢
|
Post: #22
Title: Re: ميدالية أولمبيّة
Author: أبوبكر عباس
Date: 09-23-2015, 09:24 AM
Parent: #21
في بوستات "الشراكة" يا محمد المرتضى، الشركاء ديل، بعد يصلحوك، ترجع تصلح مداخلتك ولا تشير للتعديل وتخلي الشريك حايم ساكت!
أرحب ترحيب كبير بانضمام الشفيف المرتضى لرابطة محبي الأديب الكبير أبوبكر عباس
|
Post: #23
Title: Re: ميدالية أولمبيّة
Author: أبوبكر عباس
Date: 09-23-2015, 09:43 AM
Parent: #22
منتصر وغلاطكم ضيعن عليكم تفاصيل حميمة فيها على سبيل المثال لا الحصر:
جيبة صجّة من سجن بارا، والعلاقة الجنسية بين مختار ومامور السجن، واعجاب الرئيس القائد بسرعة صجّة، وتعيين نور الدين رئيسا لبعثة السودان لاولمبياد برلين المعدلة،
وح أعرش ليكم القصة دي في تلاتة سطور جايات، ولمدة اسبوع ما ح ابركم بعمل أدبي جديد
وتحياتي لفيصل سعد
|
Post: #24
Title: Re: ميدالية أولمبيّة
Author: محمد على طه الملك
Date: 09-23-2015, 12:29 PM
Parent: #23
كضااااب ما بتقدر ..
لكين عشان انضمام مولانا ود المرضى لفريق الكيشة في اولمبياد وين ما عارف ..
بديك تلاته يوم فقط ..
:
واحد قبضو يدير مصنع مشروبات في الكمينة ..
القاضي قال ليهو حكمت المحكمة عليك بشهرين سجن ..
قال لي : وييي جهّر واحد بس ..
استغرب القاضي وسألو ليه شهر واحد ..
قال لي نمشي الزراعة ..
قديمة مش ؟
المهم عايز اقول شنو؟
أيوه – كل سنة وانتو طيبين .
|
Post: #25
Title: Re: ميدالية أولمبيّة
Author: محمد المرتضى حامد
Date: 09-23-2015, 12:43 PM
Parent: #24
| Quote: أرحب ترحيب كبير بانضمام الشفيف المرتضى لرابطة |
هيا اااا دا!!
أنا براااي معجب الكاتب الكبير تقوم تسويني رابطه؟
الشي عجاجه!!
-
عيدكم مبارك ونسأله أن يعيده على السودان والأهل جوه وبره بالخير واليمن والبركات..
|
Post: #26
Title: Re: ميدالية أولمبيّة
Author: جلالدونا
Date: 09-23-2015, 04:29 PM
Parent: #25
ابداع يا بكور
اى محاولة لتقليل كثافة الاديب بكور هى محاولة مأجورة و مدانة
اللام دى يا بكور تجر ليك صجّة بتاعك ده فى علبة صلصة
و ان كان فكوها فى الخلا تجر ليك جبل
خليك من ده
ان درعوها فى رقبة جمل برضو بتجرو
زى حرف الفى ده
لآنبيائكم
|
Post: #27
Title: Re: ميدالية أولمبيّة
Author: أبوبكر عباس
Date: 09-24-2015, 12:41 PM
Parent: #26
الأستاد الأولمبي بميونخ مليان على بكرة أبيه، وتخيلوا معاي الشقراوات الآريات بلبس الصيف، وصورة صجّة تتوسط التي (T) شيرتات وتتوسط حاجات تانية، والشعر الذهبي تداعبه نسايم سبتمبر اللطيفة، كلهن جن لدعم صجّة في مواجهة العداء الأمريكي الأسود لمسافة اربعمية متر! الظاهر الألمان ما نسووا هزيمتم في فرنسا ومشروع مارشال ما طمر فوقم!!
كل صحف العالم تحدثت عن قاطرة الصحراء التي قهرت الجميع في التصفيات الأولية، ما زال صجّة يدخل السباقات بدون حذاء وتي شيرت أصفر.
|
Post: #28
Title: Re: ميدالية أولمبيّة
Author: muntasir
Date: 09-24-2015, 12:56 PM
Parent: #27
سبتمبر ده صيف في حلالكم ما في ميونخ
|
Post: #29
Title: Re: ميدالية أولمبيّة
Author: معاوية الزبير
Date: 09-24-2015, 01:31 PM
Parent: #28
| Quote: منتصر وغلاطكم ضيعن عليكم تفاصيل حميمة |
|
Post: #30
Title: Re: ميدالية أولمبيّة
Author: محمد البشرى الخضر
Date: 09-24-2015, 05:15 PM
Parent: #29
Quote: | Quote: : منتصر وغلاطكم ضيعن عليكم تفاصيل حميمة |
|
كل سنة وانتم بخير
|
Post: #31
Title: Re: ميدالية أولمبيّة
Author: معاوية الزبير
Date: 09-24-2015, 05:36 PM
Parent: #30
وأنتم بخير
مع الاعتذار للعرجي بن أبي عبد شمس
أأنتم ممن ضيّع المستنيرَ؟.. ويْحَكم أي مستنيرٍ أضَعتم !
ألا تخشوْن يوم كريهةٍ .. وثغرٍ راقدٍ في السهلَةِ
|
Post: #32
Title: Re: ميدالية أولمبيّة
Author: قسم الفضيل مضوي محمد
Date: 09-24-2015, 06:40 PM
Parent: #31
Quote: صاحبنا ود النعيمة يا معاوية ... ( الغريبة من أولاد مدني برضه )
قال زمان كان مؤجر بيت في العمارات في شارع 44
فوتناها ليهو لأنه صاحبنا ... رغم انه العمارات ارقام شوارعها فردية ... |
يا قباني دي شكلها دقت معاك في العارضة ...
وكلام ود مدني صحيح واحتمال يكون كان ساكن في شارع 44 ...
العمارات الشوارع العرضية بتاعتها بالارقام الفردية فعلا ...
ولكن الشوارع الطولية بالأرقام الزوجية ...
بتلقى شارع 15 بالعرض وبعده شارع 17 بالعرض برضو ولكن بيربط بينم شارع 16 بالطول ...
التوقيع / واحد أغبش قرأ في السجانة وكان بشاقق بشوارع العمارات
كل عام وانتم بخير ...
|
Post: #33
Title: Re: ميدالية أولمبيّة
Author: يحي قباني
Date: 09-24-2015, 07:28 PM
Parent: #32
| Quote: بتلقى شارع 15 بالعرض وبعده شارع 17 بالعرض برضو ولكن بيربط بينم شارع 16 بالطول |
44 شنو و 16 شنو ... يا قسم يا خوي
و الله الا كان سموهم بعدما مرقنا ...
|
Post: #34
Title: Re: ميدالية أولمبيّة
Author: muntasir
Date: 09-24-2015, 10:07 PM
Parent: #33
قبة انت مرقت من زمن تتي ولا بعدو
|
Post: #35
Title: Re: ميدالية أولمبيّة
Author: يحي قباني
Date: 09-24-2015, 10:33 PM
Parent: #34
| Quote: قبة انت مرقت من زمن تتي ولا بعدو |
يا راجل ...
|
Post: #36
Title: Re: ميدالية أولمبيّة
Author: Faisal Saad
Date: 09-25-2015, 07:53 PM
Parent: #35
ابقدم ليه رافع..
|
Post: #37
Title: Re: ميدالية أولمبيّة
Author: Faisal Saad
Date: 09-25-2015, 07:53 PM
Parent: #35
عذرا للتكرار..
|
Post: #38
Title: Re: ميدالية أولمبيّة
Author: Faisal Saad
Date: 09-25-2015, 07:56 PM
Parent: #35
|
Post: #39
Title: Re: ميدالية أولمبيّة
Author: Faisal Saad
Date: 09-25-2015, 08:01 PM
Parent: #35
السلام و التحايا للجميع و كل عام و انتم بخير،، غايتوا يا أخوانا زي ما قال ليكم أبكر قبيل مغالطة الأنبياء و أرقام الشوارع ضيعت علينا سرد تفاصيل حميمة و كدا في هذا البوست البديع، علاوة على خروج الحبيب يحي في زمن تتي و لا بعيونك تقول لي تعال و تعال، و طبعا الكاتب الحردان أشار بأنه توقف عن الكتابة مؤقتا لأسباب لوجستية حفاظا على سلامة حياته من تهديدات إهدار دمه بواسطة بعض المتشددين الدواعش، عليه واحد فيكم يتبرع يكمل الرواية و يظبط ليها خاتمة جهبوزة ريثما تصفو السماء و نتبين الخيط الأبيض و الخيط الأسود و فجر المشارق و انا ارشح الأخ معاوية الزبير ليقوم بهذه المهمة باحتمال انه سمع القصة شفاهة من خشم سيدها..
و كونوا بالف خير..
|
Post: #40
Title: Re: ميدالية أولمبيّة
Author: معاوية الزبير
Date: 09-25-2015, 10:19 PM
Parent: #39
فيصل يا حريف عايز تبقى فيني حكاية الصحابي القال ليهم، هذه هي الفاتحة فأين عمر.
قوول عارف القصة أقصها كيف؟
فميزة هذا الرجل الساحر ليست في عضم قصصو (أصلا كلها فشفاش) إنما في حكيهو
هسي لولا الحكي، شنو يعني لوري قطع في السكة وختوا الصاجات
وكان معاهن قمر قامت نطت وكلوشها شبك في التندة إلى ما لا نهاية إلى ما لا نهاية إلاه إلاه إلاه
|
Post: #41
Title: Re: ميدالية أولمبيّة
Author: أبوبكر عباس
Date: 09-26-2015, 03:08 AM
Parent: #40
اتنين كانوا بتعشوا صير في الموردة وجنبهم رادي بنقل في الأولمبياد، واحد قال للتاني: صجّة أمل الأمة.
|
Post: #42
Title: Re: ميدالية أولمبيّة
Author: معاوية الزبير
Date: 09-26-2015, 06:26 AM
Parent: #41
انا آسف يا بكور على ردي أعلاه، الحقيقة افتكرتك ما ح ترجع تاني بعد التحذير المبطن من أخونا منير، قلت أدلي برأيي الحقيقي.
بوردابية صاحبتي تركت المنبر من سنين طويلة، مرة سألتها عن سر صمودها على قرارها بترك المنبر نهائيا
رغم بعض البوستات المغرية سواء من ناحية المتعة أو الآكشن (الحق محفوظ لود البشرى) فضلا عن المناشدات المتكررة لها بالعودة
فأجابتني: أنا والله هجرت ليك المنبر دا هجران الحبيبة المغدورة، لا بشوف مغريات لا منغصات لا مناشدات.. محطة وعديناها.
أها أفضل طريقة لمقاومة مغريات الكتابة في المنبر ألا تلتفت إليه نهائيا بعد تركه
شكلو قلبك رهيف وماااا بقدر على الهجران في عز الصيف. ننتظر ونشوفك كيف في الشتا
|
Post: #43
Title: Re: ميدالية أولمبيّة
Author: أبوبكر عباس
Date: 09-26-2015, 08:58 AM
Parent: #42
يا معاوية، يا أخي، تحذير شنو ومبطن شنو؟
يا أخي صورة موت الحجاج محزنة ومحبطة لدرجة تخلي بطنك طامة لمدة سنة لقدام
شنو يا أخي، البخلي طفلة تقوم من النوم يقول ليها أبوك مات في تدافع لرجم الشيطان؟!
يا أخوانا عليكم ( شنو ذاتو ما عارف لي حاجة تاني أحلف بيها)، شيطان شنو؟ البرجمو فوقو بالحجارة؟
لي خمسين سنة في الحياة دي، لا شفت شيطان ولا شفت لي حاجة لا يستطيع عقلي عدم تفسيرها!!
المتاهة دي ح تستمر لمتين؟
منظر الموت الفات دا يخلي الزول يستسلم وينزوي من هذا المجتمع، ويقنع من مجرد عشم للتغيير
حقو الواحد يسب ليكم كلكم
شيطان!!
دا عمود خرطانة عملتو شركة أمريكية
قروشو كان ممكن تقيم تنمية في اليمن منذ عشرات السنين
|
Post: #44
Title: Re: ميدالية أولمبيّة
Author: muntasir
Date: 09-26-2015, 09:16 AM
Parent: #43
شيخي المستنير بعجبني فيك اخلاصك لصحبانك مع اني اشك انك انتيم وبي اف اف لابوالاباليس اكتر من معاوية ما هاين عليك إرجموا يا معاوية ما تخاف ابوبكر ده عندو رسالة استنارة بكب فيها ما بنسحب حتى ينير عقول اقوام من يسار ويمين
|
Post: #45
Title: Re: ميدالية أولمبيّة
Author: طلحة عبدالله
Date: 09-26-2015, 09:30 AM
Parent: #43
فعلا
لاحظت أنو أبوبكر أعلن فرارو من المنبر بعد تنوير
دكتور منير لكنه نكث الوعد وعاد زي الما حصل حاجة ..
كما لاحظت أيضا في هذا البوست ثمة مشكلة (ربما)
في عبارة (يستعد بكثافة) حسب ما ردده بعض السابلة
المشكلة شنو الله أعلم .
كل عام وانتم بخير .
|
Post: #46
Title: Re: ميدالية أولمبيّة
Author: أبوبكر عباس
Date: 09-26-2015, 09:46 PM
Parent: #45
إنطلق سباق ال٤٠٠ متر وسط تصفيق شديد، وصجّة يتقدم العداء الامريكي فينس ماثيو بعشرين متر في ال٢٠٠ متر الأولى، لكن فجأة صجّة يخرج من الملعب، الجمهور للحظة افتكرو داير يقلد العداء الصومالي الانجليزي بطل العالم للسباقات الطويلة ٢٠١٥ ، الطلع من الميدان أثناء السباق شرب موية وجاء فاز بالسباق،
لكن صجّة قعد علي ركبو ويدينو في الارض زي الوضع المنو و السجود في الصلاة، وبدأ يستفرغ سائل أصفر سميك بكميات كبيرة زي صفيحتين....
تاني يوم الصحف الالمانية اهتمت بفقدان كرتونتين موز من مطبخ الفندق النازل فيهو الوفد السوداني، أكتر من فوز ماثيو!!
نور الدين ودع الوفد في المطار وهو بصافح في صجّة قال ليهو: طفس
ورجع لندن
|
Post: #47
Title: Re: ميدالية أولمبيّة
Author: محمد على طه الملك
Date: 09-27-2015, 00:12 AM
Parent: #46
سنما أونطا ادونا قروشنا ..
:
ويحكم براكم يا معاوية الزبير..
الأديب لن يتخلى عن أولمبياده ( بالله الدال دي لما تصلوها أكسروها فوق رويسو الغليد دا ) ..
صحيح تخلى عن برلين بعد سقوطها بيد البلاشفة ..
وربما تخلى قريبا عن ميونخ في أقرب زنقة مالية ..
إن تأخرت شيكات الامبريالية الامريكية قيد أنملة حسب فتيا حلاق الجامعة ..
غير أنه لم ولن يتخلى عن أولمبياده حتى لو أقامو في جبرونا..
جرو انتو ذيما عايزين فهو ليس له وقت للجرجرة ..
دعوه يفتل حبال أفكاره على نار هادئة ..
أيوه النيران لا تحرق الأنبياء ..
افرنقعوا - دي كلمة عربية ولّ أنا غلطان؟
|
|