أبو آمنه حامد ... قال أنا هدندوي راعي غنم ... اغتصبت العاصمة موهبتي و امكاناتي ...
ذلك الرجل كتب في زمن كان الخروج للعمل خارج السودان من المُعيبات ...
كتب أبو آمنه قائلاً :
بنحب من بلدنا ، ما بره البلد
سودانية تهوى عاشق ود بلد
و لحنها و غناها محمد وردي ... في ابداع لا يضاهى ...
و ظلت الأغنية عنوان لكل شاب ( في السودان ) مقبل على الزواج في ذلك الزمن الجميل ..
و استمرت ...حتى بعد ان بدأ موسم الهجرة و الارتحال ...
نسمعها ... و نأتي الى موضوع البوست ... .
Post: #2 Title: Re: بنحب من بلدنا ما بره البلد .. هل يمكن تطبيق� Author: يحي قباني Date: 09-21-2015, 03:31 AM Parent: #1
موضوع البوست او سؤالي :
اولادنا ... الذين أتينا بهم سواء الى بلاد الخليج و ما حولها ... او الى بلاد المهجر البعيدة ...
حيث تزايدت اعداد السودانيين هاربين من الظلم و ضيق العيش في البلد
تراكمت علينا السنين و نشأ ابناءنا و بناتنا في هذه البلاد سؤالي : هل نتوقع ان يرتبط ابناءنا و بناتنا في مرحلة الزواج بأبناء و بنات السودان؟ و هل ابناءنا و بناتنا انفسهم ينطبق عليهم ما قاله ابو آمنة حامد بنحب من بلدنا ، ما بره البلد سودانية تهوى عاشق ود بلد
و هل طول الزمن اثر علينا و اصبحنا ( برة البلد ) تقريرياً و روحياً ...
بل السؤال الأكثر مرارة من السؤال الأول: هل السودانيين ( المهاجرين ) و المتواجدين في (الغربة ) ... ما زال بدواخلهم الاحساس بهذه الأبيات ؟ مين في الدنيا دية أجمل من بناتنا الليهن قلوبنا والفيهن صفاتنا الكامنات في روحنا والعايشات في ذاتنا..
ام اختلط حابلنا بنابلنا ... ؟
Post: #3 Title: Re: بنحب من بلدنا ما بره البلد .. هل يمكن تطبيق� Author: يحي قباني Date: 09-21-2015, 04:06 AM Parent: #2
قال لي احدهم و هو حزين جداً ...
تصور بتّي دايرة تتزوج واحد امريكي ابيض ؟
و أضاف:
انا و أمها دايرين نموت ...!!!
فسألته:
و من وين الشاب ده ؟
قال لي كان زميلها في كلية الهندسة ...
اها:
و هم اتخرجوا سوا و شغالين في نفس الشركة ...
و بعدين:
قال لي بعدين شنو ياخ ... بقول ليك امريكي و ابيض كمان ؟
قلت ليهو طيب لي هسي ما قلت لي غير امريكي و غير انه ابيض ... و مهندس زميلها صاح ؟
طيب هل الولد أسلم ؟ و هل البنية فاهمة الكلام ده ؟
قال لي هو جانا مسلم جاهز ليهو سنتين ... بعد ما هم قرروا الارتباط ... فهمته انو لو هو ما مسلم ما حيتزوجوا ...
طيب؟
الولد اسلم ... و امه و ابوهو مقتنعين باختياره ... و جونا زيارة يطلبوا ايد البت ...
لكن ياخي حكاية انها ما تتزوج سوداني دي مصيبة ؟
قلت ليهو طيب انت ليك الان 23 سنة هنا ...
و الشابة دي زاتها جبتها عرها سنتين تلاته صاح ؟
و نشأت عارفه دينها و عارفه القيم و الاخلاق ...
اها القلب ده كيف داير انت بي قدرة قادر داير توجهه اتجاه واحد و تزوجها سوداني ؟
و هل انت بتعتقد انو الشاب السوداني ده لو موجود و فيهو كل مقومات النجاح
هل بتضمن انه لازم قلبه يميل لي واحده سودانية .؟ ماهو جاء في نفس الظروف ... _______________________________________________________ ما زال الحوار مستمراً ...
Post: #4 Title: Re: بنحب من بلدنا ما بره البلد .. هل يمكن تطبيق� Author: يحي قباني Date: 09-21-2015, 04:33 AM Parent: #3
تمت بعض الزيجات السودانية - سودانية ... بين شباب و شابات ولدوا او نشأوا هنا منذ طفولتهم ...
لم يمضي وقت طويل حتى نحكم على نجاها ... و لكن الشكل العام يوحي بأنها ( لو تمت باختيار العروسين ) ستكون ناجحة ...
تتم افراحهم مخلوطة بمسحة كندية حسب هوى العروسين ... و تنتهي بطقوس سودانية جميلة ... حسب اهواء كبار الأسرة ...
لا اعتقد ان الجيل الثالث من السودانيين سيكون في افراحهم أي اثر اعراس سودانية ... ___________________________________________________________ كانت الاعراس و الاتراح في السودان القديم تكمل 40 يوماً بالتمام و الكمال ...
و تناقصت الأيام و مظاهر الافراح و الاتراح لظروف عديدة ...
حتى اصبح دفن الميت هو نهاية ( الفُراش ) ... ___________________________________________________________ هل نحزن على الماضي ...
أم نرضى بواقعنا الجديد ...!!!
Post: #5 Title: Re: بنحب من بلدنا ما بره البلد .. هل يمكن تطبيق� Author: معاوية الزبير Date: 09-21-2015, 05:24 AM Parent: #4
"ود بلد بتاع قميصك" الشرِط دا هي البت دي عارفا ود بلد يعني شنو بالسوداني* طالما هي نشأت في الغرب عليها اختيار ود البلد بتاع الغرب بعدين نحن تراثنا دا نصو أوهام وإلا لما حاق بنا ما حاق
* بعدين التانية: ود بلد دي بتجيب ليك هوا
Post: #6 Title: Re: بنحب من بلدنا ما بره البلد .. هل يمكن تطبيق� Author: يحي قباني Date: 09-21-2015, 05:32 AM Parent: #5
Quote: "ود بلد بتاع قميصك" الشرِط دا هي البت دي عارفا ود بلد يعني شنو بالسوداني* طالما هي نشأت في الغرب عليها اختيار ود البلد بتاع الغرب بعدين نحن تراثنا دا نصو أوهام وإلا لما حاق بنا ما حاق
* بعدين التانية: ود بلد دي بتجيب ليك هوا
قال ليك امريكاني ود بلد ...
ياخي أبو آمنة حامد حام السودان كله في الاغنية ...
تقول لي بتجيب ليك الهوا ... ؟
انا أتوقع تجيب لي الهوى و الله ...
Post: #7 Title: Re: بنحب من بلدنا ما بره البلد .. هل يمكن تطبيق� Author: محمد البشرى الخضر Date: 09-21-2015, 07:19 AM Parent: #6
سلامات يا هندسة في الإمارات هنا بعرف اسرة سودانية مقيمة من سنين طويلة وابنائها اتولدوا واتربوا هنا بنتهم الأولى تزوجت عماني القيامة قامت عند معارفهم واقربائهم, بعد شوية البنت الثانية تزوجت فلسطيني اردني وايضا قامت القيامة مرة ثانية لكن في النهاية هدأت الأحوال والناس مضطرة تتعامل عامل عادي هي خيارات الأبناء النشأوا في الغربة ولا تعني لهم العادات والاعراف السودانية الكثير وبعد شوية الأجيال الجديدة هي سيدة قراراتها, انتهى زمن يا ولد و يا بت اسمع / ي الكلام
Post: #8 Title: Re: بنحب من بلدنا ما بره البلد .. هل يمكن تطبيق� Author: معاوية المدير Date: 09-21-2015, 08:09 AM Parent: #7
Quote: طالما هي نشأت في الغرب عليها اختيار ود البلد بتاع الغرب
كايبوي يعني ؟.
تصدق نحن الشعب الوحيد البيلِت ؤُ يعجن في الحِتة دي باقي الشعوب بيشوتو طوالي ؤُ ضفاري كمان .
عندنا وآحد هنا متزوج سورية، كل يوم أحد في حلقة التلآوة انا بقولو، أها الليلة البيت السوري عاملنا شنو ؟. بيجيب حاجات خترة، تصدق ...
Post: #9 Title: Re: بنحب من بلدنا ما بره البلد .. هل يمكن تطبيق� Author: يحي قباني Date: 09-21-2015, 10:15 PM Parent: #7
Quote: هي خيارات الأبناء النشأوا في الغربة ولا تعني لهم العادات والاعراف السودانية الكثير وبعد شوية الأجيال الجديدة هي سيدة قراراتها, انتهى زمن يا ولد و يا بت اسمع / ي الكلام
هو كذلك يا صديقي ...
تعرف يا ود البُشرى قصة انو الشباب هو سيد قراره ...
زمان كنت راكب الأندرقراوند في لندن ...
قاعد قدامي ولد عامل شعره لي فوق كده و مصمغه و ملونه بنفسجي و اصفر ...
فسألته قلت ليهو ليه عامل شعرك كده ...
رد علي بكلمتين بس و قال لي :
؟ why not
اها من وقتها عرفت انو الأجيال الجديدة هي سيدة قراراتها, انتهى زمن يا ولد و يا بت اسمع / ي الكلام