أوعك يا أحمد تسمع كلام البشير قاتل الاطفال

12:11 PM Sep, 19 2015
سودانيز اون لاين
معاوية عبيد الصائم-ارض الله الواسعة
مكتبتى فى سودانيزاونلاين



شريفة شرف الدين

Quote: أولا أهنيك على نبوغك و عبقريتك و ثانيا أقول ليك إنت مش رفعت راس أبوك و أمك بس إنت رفعت راس السودان كله و أحمد الله إنو الحكاية بتاعة البوليس الأمريكي دي حصلت ليك .. و بسببها إنت بقيت شخصية عالمية و أجمل شيئ إنك 14 سنة فقط و سوداني و زد على ذلك مخترع .. إنت بعملك ده مسحت صور كتيرة مشوهة عننا و بدل إنت تجري وراء أوباما بقى هو اللي يقدم ليك الدعوة و معاهم ناس الفيس بوك. إنت مننا و فينا يا ولد و أخبارك دخلت كل بيت سوداني و صورتك في كل وسائل الإعلام .. الكلابيش اللي في إيدك زادتنا شرف و أدتك بطولة و أكيد حنتابع أخبارك و تبقى لينا مخترع كبير تشيل همنا اللي وقعنا فيه. بس أوعك تكون سمعت حكاية الرئيس السوداني البشير القدم ليك دعوة إنك تجي السودان عشان يرعاك .. كان سمعت كلامو (واطاتك أصبحت) قول لأبوك يترجم ليك البين القوسين. يا أحمد في شباب في عمرك و أقل من عمرك و أكبر في السودان ماتوا برصاص البشير .. و زيهم اتشردوا في المعسكرات بسبب البشير .. و القاعدين جوة السودان حالتهم تحنن .. تلقى المشرد .. تلقى البقطع سبعة و تمانية كيلو على رجيلاتو عشان يمشي المدرسة .. تلقى الفارش الأرض عشان يقرا .. تجي السودان ما تلقى الكهربا التخليك تخترع ما تلقى الموية التخليك تروى

أهم شيئ إذا إنت جيت السودان و البشير رعاك ده براهو دليل إنو اختراعاتك فيها عوجة ليه؟ لأنو البشير مجرم و مطلوب من المحكمة الدولية و بعدين أبوك عارف كلو شي طالما هو اترشح ضد البشير .. ما عايزين نوجع راسك بكلام كتير لكن البشير زور و غش في الانتخابات.

كان تاني عملو معاك مقابلة إعلامية و سألوك رأيك في دعوة البشير ليك شنو .. ما دايرنك تستعجل و ترد بسرعة .. عايزنك تديهو رد قوي عشان العالم كله يعرف إنو الرئيس البقتل الأطفال يستحيل يرعاهم و يرعى اختراعاتهم.