السوداني المصاب في حادثة الحرم يرفض مبلغ نصف مليون ريال ( صورة ) ..

01:37 PM Sep, 16 2015
سودانيز اون لاين
awad okasha-
مكتبتى فى سودانيزاونلاين



رفض حتى تقييد اسمه في كشف المصابيين .. موضحا ان هجرته كانت لله والرسول ..

أصدر خادم الحرمين الشريفين الملك سلمان بن عبدالعزيز آل سعود ـ حفظه الله ـ أمره الكريم بصرف مساعدة لذوي المتوفين والمصابين في حادث سقوط إحدى الرافعات يوم 27 / 11 / 1436 هـ في المسجد الحرام الذين تم حصرهم من قبل الجهات المعنية ، وذلك على النحو التالي : (1) صرف مبلغ مليون ريال لذوي كل شهيد توفاه ـ الله سبحانه وتعالى ـ في هذه الحادثة . (2) صرف مبلغ مليون ريال لكل مصاب بإصابة بالغة نتج عنها إعاقة دائمة . ( 3) صرف مبلغ ( خمسمائة ألف ريال ) لكل واحد من المصابين الآخرين .وكان ضمن المصابين الحاج السوداني من قطاع الخرطوم / النابغة الجيلي ابشر ، وهو مصاب في راسه ، وعندما علم بقرار الملك سلمان بتعويض المتوفيين و المصابين والتعويض كان عباره عن مبلغ 500,000 الف ريال سعودي .. لكنه رفض ان يقبل التعويض !! وقال : ان هذا شرف كبير له ان اصيب في داخل الحرم .

الاخ عوض ..
كان يستلم المبلغ ويتبرع بها لمدرسة او مسجد او للمحتاجين في قريته ..
سوف تكون صدقة جارية له ..
دي حكاية غريبة ..
عشرات الخانات مفتوحة للصرف في البلد .. ماذا يستفيد من رفض المبلغ
في إنتظار أحد الاخوة الذي لديهم علم بالموضوع ؟
ليس لنا ذلك العمق في العلوم الدينية لنتحدث عن هذا .. ولكن بالعقل كده أنا لا إتفق معه ..
500 الف ريال .. يحل مشاكل ناس كثيرين في قرانا النائية ..

مال حلال وتعويض ..

تحياتي عوض ومودتي ..

وانا بتفق مع علي عبد الوهاب بان هذا الحاج كان مفروض يستلم مبلغ التعويض ويتبرع به الى الفقراء واالمساكين
في السودان وما اكثرهم .. او كان يبني مدرسة .. واذا هو كان شاف الفيديو النزله هشام هباني عن اطفال المدارس المالاقين
حق الفطور ما كان رفض مبلغ التعويض وكان على الاقل حيتبرع لهؤلاء الاطفال الذين يعانون كل يوم..
والله يديكم الصحة والعافية

Quote: ماذا يستفيد من رفض المبلغ

اذا صح الخبر المتداول عن رفض المبلغ
يعتبر دقسة العمر ...
وذي ماذكر الاخ علي عبد الوهاب
اتصدق بيها للفقراء والمساكين من اهلك وجيرانك ومعارفك
في السودان اذا ما محتاج ليها
تعويض جاك حلال بلال وترفض ... قال نابغة قال !!!

السلام عليكم،

وحمداً لله تعالى، على سلامة هذا الأخ " الحاج" السـوداني " النابغة " ونجاته حتى يزيد صالحاته في الحياة الدنيا، فهو " نابغة" كما اسمه، صحيح.

رحم الله تعالى، من مضوا إلى رحابه وفي رحابه الطاهرة، والأمنيات بشفاء المُصابين.

والله يا أخي عوض،

لو صحّ الخبر، فهذا نُبْلٌ و وَرعٌ ضليع.

الذي قام به هذا الأخ الحاج النابغة السـوداني..


.......
أستغربُ أن كل المُتداخلين، يُغلّطون هذا "الحاج" في ما لَهُ من خيارات !

فهوَ لم يَستحلّها ( وأعني ال خُمسمائة ألف ريال)، فكيف يتصدّق بها ...؟

وله، بالطبع، أسبابه؛ والتي بالأكيد، منها حرصه على خلوص نيّته لإقامة مِشعَرٍ من مشاعر الدِّين.

...
أعتقد، أن صنيع هذا الأخ الحاج "النابغة" ســ يُعلِّي من " مقام " آل السودان، باعتباره مُتخلِّق بالروح السـوداني النبيل.

وَ

كفى..




.............
مع التحايا للجميع

Quote: الاخ عوض .. كان يستلم المبلغ ويتبرع بها لمدرسة او مسجد او للمحتاجين في قريته .. سوف تكون صدقة جارية له .. دي حكاية غريبة .. عشرات الخانات مفتوحة للصرف في البلد .. ماذا يستفيد من رفض المبلغ في إنتظار أحد الاخوة الذي لديهم علم بالموضوع ؟ ليس لنا ذلك العمق في العلوم الدينية لنتحدث عن هذا .. ولكن بالعقل كده أنا لا إتفق معه .. 500 الف ريال .. يحل مشاكل ناس كثيرين في قرانا النائية .. مال حلال وتعويض .. ..

كتر خيرك اخ علي
عبرت عني تماما ان صحت الرواية

تحياتي اخ عِوَض وضيوفك الاكارم

مرات كدا بجيني احساس
انو نحن شعب عارض
وفقر

ليت ولاة الأمر، ولا أمر لهم، بقامة أمثال (النابغة) ونبله...

Quote: دي حكاية غريبة .. عشرات الخانات مفتوحة للصرف في البلد .. ماذا يستفيد من رفض المبلغ +++ لو صحّ الخبر، فهذا نُبْلٌ و وَرعٌ ضليع. +++ أعتقد، أن صنيع هذا الأخ الحاج "النابغة" ســ يُعلِّي من " مقام " آل السودان، باعتباره مُتخلِّق بالروح السـوداني النبيل.

وتسأل!

هي ذات الأسباب التي أوجدت ثنائية (الصمغ العربي) مقابل (فستق العبيد) فياله من "مقام" "نبيل" و "ضليع"

سلام للجميع,

وحمدلله على سلامتك اخي الحاج ذو النفس الكبيرة , أبو الشهامة!
والله التحية ليك والتحية للولدتك والناس الربوك ,
وسيي فوقك والله رفعت راسنا في الزمن الأغبر دا.
والمال يروح وسيدو يروح وتبقى القيم واليقين والقنوط والتوكل على رب العالمين ,
واتمنى ان يتقبل الله حجتك وان يخلص لك اخلاص نيتك السليمة هذه.
وربنا يزيدك من نعمه ويكثر من امثالك .

ست البنات.

عندكم ليه تلفون يا شباب

نحاول نقنعو باستلام المبلغ

وشكرا

ودالباوقة داير تطلع حقك امشي خلي بربار يديك روسية وسجل في الكشف

تلك خياراته وهو حر فيها
وكل ينظر من زاوية نظر مغايرة


لو علم كم من النبل وكم من الحسنات ستجلبه له هذه ال500 الف لطالب بها!!
في السودان ده 500 جنيه ممكن تدخلك الجنة خليها 500 الف ريال!!

لو رماها في دار اطفال المايقوما ساااى كان كفلت كم وكم يتيم وقال (ص)
أنا وكافل اليتيم كهاتين في الجنة.
غايتو فرصة وضيعتها لي دنيتك ولي آخرتك.

الامر به كثير من علامات الاستغراب

اذا افترضنا جدلا ان له ان يرفض مبلغ الـ 500 الف ريال لاسباب هو يراها ...
السؤال .....؟
لما يرفض ان يكون اسمه في قائمة المصابين ؟ هل هنالك موانع شرعية لذلك ايضا ..؟

انا لا اعتقد في صحة الخبر المنقول ..
ربما يكون الحاج المصاب قد غادر المكان قبل حصر المصابين ... او هنالك اسباب اخرى غير معروفة او معلنة ..
فالرواية لا تتفق مع العقل والمنطق ...
وايضا كان في استطاعة ناقل الخبر الذي اراد ان يدعم الخبر باضافة صورة الحاج بتلك الضمادة على جبينه كان له ان يدعم ويعزز مقولة (كان هجرته لله ورسوله) باضافة وثائق ثبوتية للحاج توضح ان قدومه كان للحج.

كأني مرة قريت إن في صحفي كان مرافق رجل أعمال سعودي أو خليجي ما متأكد ، وكأن الصحفي سأل رجل الأعمال عن كيف اصبح مليونير وصاحب اموال.
فسكت رجل الاعمال وأخرج دفتر شيكات وكتب شيك بـمبلغ مليون ريال، ومده للصحفي.
فما كان من الصحفي إلا أن رفض الشيك. (برضو لأسباب تخصه) ههها.....

المهم كان رد رجل الاعمال للصحفي، إنه استغل فرصة سنحت له في الحياة، وها هو قد رفض أول فرصة سنحت له.

وأهلنا بقولو شنو ... (مرمي الله ما بترفع).

لو صدقت الرواية !!
اقل ما يمكن ان يقال على هذا الشاب انه داعشي الفكر

تحية طيبة


هذا الرجل من الصالحين باذن الله

رغم ان المبلغ يساهم في حلحلة مشاكل ناس كتيرة
ولكن اعجبني رده

واراه نظر من منظور ما عند الله خير وابقى

وربنا سيجزيه كل خير اكيد

هذا الرجل من الومضات القليلة التي تضيئ من وقت لأخر في ظلام حب الدنيا الذى ملآ الافاق..

للذين يتحدثون عن التبرع، فإنه تبرع بأكبر مما تعتقدون للسودانيين وغيرهم.. تبرع بالقيم والنبل التي السودانيون أحوج اليها من المدارس والمشافى.. وما أضاع السودان سوى المتعلمين الفاسدين عابدى الدولار.

Quote: السوداني المصاب في حادثة الحرم يرفض مبلغ نصف مليون ريال

اقل ما يمكن ان يقال عن هذا الحاج انه رجل : زاهد وعفيف وورع وقنوع
ونحسب انه راى المسألة من منظار خلوص الحج لله سبحانه وتعالى ..
الرسول صلى الله عليه وسلم قال : فتنة امتى فى المال .. وتحسب ان هذا الحاج ليس منهم ,,
قال تعالى ( ولا تعجبك اموالهم واولادهم ) 85 التوبة

هى قناعة الكثيرين من ابناء وطنى ودرس بليغ لحكام البلاد لاخذ الدروس والعبر فى القناعة والعفاف .
اعتقد حازما ان كان الخبر صحيحا ان الله سبحانه وتعالى سيعوضه اضعاف اضعاف ماتركه لوجهه الكريم

اسأل الله العظيم ان يتقبل منه حجه وان يخلفه خيرا فى المال الذى رفضه طمعا فى رضوانه وخلوص حجه لوجهه الكريم

قل ما يمكن ان يقال على هذا الشاب انه داعشي الفكر

>>>>>>>>>>><<<<<<<<<<<<<<<<<

عزيزي ولياب

بل بالعكس يا ولياب لأن ناس داعش يحبون المال حبا جما وهم ينهبون الآثار التي لا تقدر بثمن ويبيعوها
للأوروبيين وفي نفس الوقت يخدعوا العالم المسلم بانهم يكسروا التماثيل لانه شرك بالله .. وهم طبعا بيكسروا
ربع ما نهبوه ويبيعوا الباقي .. وينهبوا ابار البترول وينهبوا السكان المدنيين تحت تهديد السلاح والعنف والتهديد
بالحرق حيا,,,,
وانا بقول هذا الكلام مع انني لا اتفق مع هذا الحاج في رفضه للتعويض الذي كان من الممكن ان يتبرع به لفقراء
السودان او يبني به مدرسة ..ولكن على حال رفع راس السودانيين امام المسؤولين السعوديين عشان السعوديين
يعرفوا قيمة الشخص السوداني وما يتسم به من امانة ونزاهة وصدق وايمان ..

والله يديك الصحة والعافية

.


وصلنى على الواتساب " على ذمة الراوى"

( بالنسبة لموضوع الحاج الذي قيل انه رفض العلاج وتعويض الملك هذه اشاعه
ياشباب الحاج دا معانا في نفس القطاع ويقيم في نفس الفندق الذي نقيم به بدانه الاصيل (أ) برج ب
وقد تم رصده منذ اليوم الاول ووقفت كل البعثه علي الاطمئنان علي صحته يتبع للامير بشير فضل
اصيب اصابه طفيفه ووقت الحادث كان داخل صحن الطواف وادرج اسمه ضمن كشوفات المصابين
من الفئه ب الاصابات الطفيفه التي تعوض 500000ريال قابلته امس بعد قرار الملك القاضي بتعويض الاصابات
وافادني بانه تم الاتصال عليه من وزاره الحج السعوديه للحضور لرئاسه الحرم المكي لاستلام التعويض مساء اليوم
وسيذهب فعلا لاستلام المبلغ مساء اليوم ..... ومن الطرائف احد الحجاج الظريفين ساله امامي بعباره
(واها بعد استلام المبلغ دا بتكمل حجك ولا بترجع؟)

منقول عن رئيس قطاع الخرطوم ا






.

Quote: وافادني بانه تم الاتصال عليه من وزاره الحج السعوديه للحضور لرئاسه الحرم المكي لاستلام التعويض مساء اليوم وسيذهب فعلا لاستلام المبلغ مساء اليوم ..... ومن الطرائف احد الحجاج الظريفين ساله امامي بعباره (واها بعد استلام المبلغ دا بتكمل حجك ولا بترجع؟)

شكراً كثير حبيبنا عبدالحفيظ ..
لقد أتيت بالقول الفصل ..
(واها بعد استلام المبلغ دا بتكمل حجك ولا بترجع؟) يا أخي الجملة دي خلتنا غرقانين في الضحك
صدقني الحاج القال كلام ده جميل .. زي ده في الحج أحسن مرافق ..

مع التحية ..

يقولون أن السخي هو الذي يعطي ولا يأخذ، وأن الكريم هو الذي يعطي ويأخذ ، وأن البخيل هو الذي يأخذ ولا يعطي، وأن اللئيم هو الذي لا يأخذ ولا يعطي

ما دفعه الملك سلمان - حفظه الله - ما كان تعويضا بل ذكر بكل وضوح أنه لن يؤثر في حقوق الافراد الشخصية.

استغرب لمن هللوا وجعلوها نوعا من الكرامة لرفضه المبلغ - ان كان اصلا رفضه - ولم يفكروا أن هذا لؤما أن يمنحك شخصٌ شيئا وترفضه، والرسول صلى الله عليه وسلم يقول "لو دعيت الى ذراع أو كراع لقبلت ولو أهدي الي ذراع أو كراع لقبلته"

Quote: شكراً كثير حبيبنا عبدالحفيظ .. لقد أتيت بالقول الفصل .. (واها بعد استلام المبلغ دا بتكمل حجك ولا بترجع؟) يا أخي الجملة دي خلتنا غرقانين في الضحك صدقني الحاج القال كلام ده جميل .. زي ده في الحج أحسن مرافق .. مع التحية

ياخ قروشو الحج بيها دي قروش حلال
عاين ليها جابت كم

Quote: استغرب لمن هللوا وجعلوها نوعا من الكرامة لرفضه المبلغ - ان كان اصلا رفضه - ولم يفكروا أن هذا لؤما أن يمنحك شخصٌ شيئا وترفضه، والرسول صلى الله عليه وسلم يقول "لو دعيت الى ذراع أو كراع لقبلت ولو أهدي الي ذراع أو كراع لقبلته"

التحية أخي حسن فؤاد ..
في بوست سابق .. كتب أحد الاخوة موضوع في غابة الروعة عن ( السلوك التعويضي ) لأننا أحياناً نبالغ في بعض الممارسات المشابهة
بحثت عن هذا الموضوع في الارشيف ولكنني لم أستطيع الحصول عليه .. ليت هذا الاخ يعيد إلينا تلك المقالة .. رغم أنني لم أتوافق معه
في رأيه .. ( نسيت إسمه .. زهايمر بعيد عنك )
تحياتي ومودتي ..

Quote: Quote: استغرب لمن هللوا وجعلوها نوعا من الكرامة لرفضه المبلغ - ان كان اصلا رفضه - ولم يفكروا أن هذا لؤما أن يمنحك شخصٌ شيئا وترفضه، والرسول صلى الله عليه وسلم يقول "لو دعيت الى ذراع أو كراع لقبلت ولو أهدي الي ذراع أو كراع لقبلته" التحية أخي حسن فؤاد .. في بوست سابق .. كتب أحد الاخوة موضوع في غابة الروعة عن ( السلوك التعويضي ) لأننا أحياناً نبالغ في بعض الممارسات المشابهة بحثت عن هذا الموضوع في الارشيف ولكنني لم أستطيع الحصول عليه .. ليت هذا الاخ يعيد إلينا تلك المقالة .. رغم أنني لم أتوافق معه في رأيه .. ( نسيت إسمه .. زهايمر بعيد عنك ) تحياتي ومودتي ..

أشكرك أخي علي على مداخلتك، تعرف أنا كتبت الكلام دة لأني (كاتلاني المغسة) من الثقافة السودانية لأني حصل مني تصرف مشابه سنة 1985 ووقتها كنت فقيرا وزيادة على ذلك ابن سبيل وكان الموقف برضوا في مكة جينا عمرة مع اتحاد الطلبة ولما وصلنا أعطوا كل واحد تمانين ريال وتذكرة العودة بالباخرة ، المهم قعدت حوالي عشرين يوم في مكة ومع أخ نسيت اسمه، المهم في الاسبوع الثالث كنا نتشارك ربع كبسة كوجبة وحيدة طول اليوم، وفي يوم كنا قاعدين برة الحرم، ما كان في زحمة زي السنسن الاخيرة، يا زول جاء واحد سعودي وفي يده خمشة ريالات ودولارات ومن دون الناس جانا نحن أعطانا فرفضنا أن نأخذ منه، ولما شافوه الناس إتلموا فيه ووقفوا صف كل واحد ياخد نصيبو ونحن قاعدين نعاين، مع إننا فقراء وابناء سبيل لكنها الثقافة الزفتة وعدم الواقعية التي حرمتنا من أن نأخذ حقا شرعيا

هذا الخبر متداول عىل نطاق كبير في مواقع التواصل الاجتماعي لكن اعتقد غير صحيح حتى رفض تدوين اسمه
ضمن المصابين، بخصوص هذا الحادثة تداول الناس النكات ايضا،

قالوا واحدة سمعت قرار الملك سلمان تعويض 500 الف ريال للجرحى.
اتصلت على راجلها الموجود مع بعثة الحج ...قالت
ليهو هسي قلت ولا حجر ساكت ما وقع في راس الكبير دا...
قال ليها الناس العوضوهم قالوا بعد الحج برجعوا يعرسو بالتعويض
قالت ليهو البركة الماجاتك حاجة تبرا يا ود امي من الحجار والسيخ

الخلاصة يعني إسمو نزل في الكشف وحايستلمها
مبروكة عليه

عنداللفة بس :
----------
حكاية حايكمل حجتو ولا يرجع دي عالمية لكن

غايتو زي ما قال ود الشيخ دي قروش حلال ربحت دنيويا ونسال الله له القبول اخرويا

الله يستر عليهو من ناس المطيع والبطيع المطيع

رحم الله شهداء الحادثة وشفى المصابين

ما اظن الكلام ده صاح
وسيقوم المصاب باستلام المبلغ كااااملاً..

الزول ده يرفض المبلغ ده ..

الا الحكومة ترسل ليه مبعوث خاص من الخارجية

ياخ الدولة كلها من الرئيس لللللللللللللللللللللليييييي ناس ود الباوقة يلقطو فيها بالريال والدولار ..

يجي السنيح ده يرفض 500 الف ريال ..

سلام للكل

Quote: وصلنى على الواتساب " على ذمة الراوى" ( بالنسبة لموضوع الحاج الذي قيل انه رفض العلاج وتعويض الملك هذه اشاعه ياشباب الحاج دا معانا في نفس القطاع ويقيم في نفس الفندق الذي نقيم به بدانه الاصيل (أ) برج ب وقد تم رصده منذ اليوم الاول ووقفت كل البعثه علي الاطمئنان علي صحته يتبع للامير بشير فضل اصيب اصابه طفيفه ووقت الحادث كان داخل صحن الطواف وادرج اسمه ضمن كشوفات المصابين من الفئه ب الاصابات الطفيفه التي تعوض 500000ريال قابلته امس بعد قرار الملك القاضي بتعويض الاصابات وافادني بانه تم الاتصال عليه من وزاره الحج السعوديه للحضور لرئاسه الحرم المكي لاستلام التعويض مساء اليوم وسيذهب فعلا لاستلام المبلغ مساء اليوم ..... ومن الطرائف احد الحجاج الظريفين ساله امامي بعباره (واها بعد استلام المبلغ دا بتكمل حجك ولا بترجع؟) منقول عن رئيس قطاع الخرطوم ا

طيب نودي وشنا وين من الشاعر السعودي اللي مدح الزول دا :) !!!!

Quote: طيب نودي وشنا وين من الشاعر السعودي اللي مدح الزول دا :) !!!!

ههههههههه دا نفس الجا في بالي يا يوسف
هو الشعر زاتو مستعجل كدا مالو؟ ما يصبر كان يتأكد من الموضوع :)

يا خي حمدا لله على سلامته أولاً ....
يا أخي المال الذي لا تريده يوجد ملايين في السودان يحتاجونه !!!
كرامة شخصية !!!!!!!!!!!!!!!!!!!!!!!!!!!!!!!!!!
حاجة غريبة

( يا خي قوم حج وتعال : مرمي الله ما بترفع )
*

Quote: ههههههههه دا نفس الجا في بالي يا يوسف هو الشعر زاتو مستعجل كدا مالو؟ ما يصبر كان يتأكد من الموضوع :)

والله يا ود البشرى مرات (السوادنة) ديل يدخلوك في بكان ضيق بلحليل
السوق حار يا عمك .. الشاعر بدور يلحق السوق في حرارتو :(

.


وهاكم ما جاء عن موضوع الشعر الذى قيل فى الحاج المذكور
كما جاء فى شبكة السودان الإخبارية .... هناك فيديو ... لكن ما
عرفت انزلو كيف :

Quote: شبكة السودان الاخبارية ✳ توضيح هاااام... بالفيديو شبكه السودان الإخبارية تكشف حقيقه الشعر الصوتي للشاعر السعودي سليمان بن عبدالعزيز والذى قيل إنه للحاج السوداني الذي رفض هبة خادم الحرمين الشريفين في الواقع هذا الشعر مكتوب في أحد شباب السودان يعمل في أحد المطاعم حين سالوه كيف حالك ورد قائلا (في زحام من النعم الحمد لله ) نعم هم أهل السودان حامدين الله وشاكرين له في كل الأحوال

.




.

اسي في ذمة ودالبشرى دي فلقة نص مليون ريال الحمدلله ودالباوقة ما كان معتمر كان كتلنا بالمغسة

Quote: في الواقع هذا الشعر مكتوب في أحد شباب السودان يعمل في أحد المطاعم حين سالوه كيف حالك ورد قائلا (في زحام من النعم الحمد لله )

إن صح الكلام دا معناها نحنا بلغنا حد بعيد في حب التلفيق و التسابق على - صنع - الأخبار و نشرها
الحمار القطع من راسو قصة انو الزول دا رفض التعويض و االحمار المكادي التاني النشر قصيدة السعودي على انها قيلت فيه ضروا الزول دا ضر شديد
اسّي حلّته كلّها تكون سبّوا ليه في قصة الرفض و اسّي بعد اتضّح انو ما رفض باقي السودان كلّو بكون سبّ ليه

Quote: بدر العتيبي - سبق - الرياض: نفى المنسق المقيم لبعثة الحج السودانية عصام خلف الله أن يكون الحاج المصاب في حادثة سقوط الرافعة بالحرم، النابغة الجيلي، قد رفض المبلغ المقدم من مقام خادم الحرمين الشريفين ضمن الأوامر الملكية التي صدرت أول أمس بعد تناقل معلومات مفادها أنه رفضها برغبة شخصية منه، يبتغي وجه الله. وقال عصام في اتصال لـ "سبق": "الحاج المصاب لم يُسجل أساساً في قائمة المصابين، كذلك إصابته خفيفة تم علاجها بالموقع". وكانت دولة السودان قد سجلت مصاباً واحداً فقط ضمن ضحايا حادثة الحرم، بينما تنوعت الجنسيات الأخرى من عدة دول وأصيب النابغة وهو من الخرطوم بشظية.

تحياتي؛؛؛

العهدة على الراوى ,,
واحد راح الحج السنة دى ,, ضرب يطمئن مرتو
قال ليها الحمد لله انا سليم ما اصبت فى الحادث ده
المرة سامعة بحكاية التعويضات دى قالت ليهو :
إنت ياراجل متأكد ولا سيخة ساكت خبتتك فوق رويسك ده؟

يا جناعة الخير هسع نحن نصدق منو ..هل نصدق المنسق المقيم لبعثة الحج
والبيقول ان الحاج ده ضربته خفيفة وعالجوهو في نفس اللحظة وما بيدخل
ضمن الفئات التي تمنح لهم التعويض(يعني ما عنده تعويض)ولا نصدق الحاج
الثاني المقيم معاهو في نفس الفندق والبيقول انه ماشي للقصر الملكي عشان
يستلم مبلغ التعويض..!!!
غايتو اذا كان الحاج ده هو النشر الاشاعات دي براهو تبقى مصيبة...
يعني نحن بقينا نلوم فيه بدون سبب...