06:38 AM Sep, 16 2015 سودانيز اون لاين طلحة عبدالله- مكتبتى فى سودانيزاونلاين
عطبرة التاريخ .. تاريخ الحركات النضالية ضد المستعمر، ومهد أول حركة نقابية بوطني العزيز عطبرة (ناسا طيبين وأهلا حنان ) يستحقون أن تنسب لهم كلمات شاعر البساطة والأناقة أبوقطاطي الذي قال: نحن أسياد شهامة والكرم جنده .. عطبرة التلاقح الثقافي والتلاقي الأثني .. خليوة،الحصايا، القلعة، أبوطليح، مدني الفكي، حي العرب الموردة، حي السوق، السيالة، أمبكول، المربعات ...... عطبرة حسن خليفة العطبراوي، مكي سيد أحمد، عوض الله دبورة، عبد القيوم حسن طه، الرشيد مهدي، الشفيع أحمد الشيخ، صلاح حاج سعيد، علي باخريبة، و.......... كمال حامد .... يتبع ........
نعم كمال حامد سليل القامات العطبراوية، المنحدر من صلب مدينة الحديد والنار وليس في الأمر عجب.. الإعلامي النابه الذي وهب شبابه وعصارة حهده وفكره للعمل الإعلامي بإنتاج غزير (كما وكيفا) بمادته الصحافية الدسمة الرصينة وإطلالته التلفزيونية الوقورة على المستويين المحلي والخارجي حتى أصبح تميمة فخر وإعزاز على جبين الإعلام السوداني في كل مكان .. شكرا لعطبرة التي أنجبت هذه القامة، وشكرا لرابطة المريخ بأبوظبي ( أول رابطة نادي سوداني في دول المهجر) التي التقطت القفاز وانفردت بأول تكريم لمن يستحق التكريم، وما ذلك بجديد فالمريخ جبل على الأسبقية والتفرد وأدمن الأفضلية.. التحية لرئيس الرابطة الخلوق الولوف الباشمهندس السر حمد وللرجل المهذب حسن منقوري وسكرتير الرابطة الهميم الأخ علي سيد وكل أعضاء الرابطة الميامين الذين شرفوا المريخ بمبادراتهم الرائعة وأفكارهم المتفردة التي تشبه هذا الكيان العظيم .. وشكرا لزهرات المريخ أخوات سيدة فرح اللائي كن حضورا متأنقا ازدان به المكان وتجمل . وشكرا للأخوة في رابطة الهلال ممثلة في رئيسها دكتور عثمان العوض ونائبه دكتور أحمد عباس و الذين شاركوا أخوانهم في الرابطة الشقيقة الاحتفاء بالإعلامي البارز مجسدين بصدق معاني الوفاء والأخوة بعيدا عن الانتماءات الضيقة التي صنعتها صحافة المدرجات، وشكرا لكل الحضور من الإعلاميين ومعجبي الأستاذ كمال حامد الذين زينوا قاعة التكريم بحضور أنيق وتلاقي حميم .. هولاء كرماء وكمال حامد يستاهل .
يا حيدورف والله جاءني احساس شبعان جدا انو ود المدير عايز يتأكد ان كنت من الدار واللا لا .. الداخلة زي ما انتا عارف وأنا عارف كان اسم عطيرة في سالف العصر والأوان .. لم تسقط سهوا لكن ذكرت الجزء وأردت الكل كما فقهاء البلاغة العرب .
لكن النقطة الاستفاهمية هي ربطك للمريـخ بعطبرة في مجال تكريم وتعظيــم ولا مكان كعطبرة كُسرت فيه هيبة المريــخ ومُرقت انفه بالتراب كما فعل العطبراب لله درّهم ..
يا حيدوف العزيز ؟ ما عهدناها ولا حريناها فيك.. عطبرة مسقط رأس كمال حامد وهو أحد الأحباء الذين أنجبتهم تلك الديار البهية كما أنجبت العطبراوي.. وللعبد لله هناك ذكريات مفعمة بود لا ينسي بعيدا عن الدافوري بتاع الأمل عطبرة القاعد يعملوا للمريخ العظيم دا . أتبرا العتيقة العتيدة تستحق الذكر الوسيم بدون شك .. حتي بدون أية مناسبة .. أرجو أن أكون قد أفحمتك ومليتك سكن ذاتو .. عشان سؤالك التعسفي جدا دا .
يا جماعة طالما انكم متوعدني بأبي جهينة .. فلابد من المذاكرة والتحضير وينوبكم ثواب لو في امكانية بخرة واللا أية حاجة كدا أقم بها حجتي المنتظرة .. ولو كمان واحد فيكم وقع على غلطة مطبعية في الفذلكة الفوق دا يخت لي أصبعو عليها .. وكتر خير سيد الحوش الذي أوجد خاصية اللتق والرتق..
يا ود المدير معليش ياخ شغلني حيدروف بتساؤلاتو الخبيثة دي شكرا للإرفاق الدسم .. انتو يا خوانا ما في ناس من عطبرة في البورد دا غير حيدر الزين ومعاوية المدير وأبو جهينة المنتظر .. ؟ أية حاجة كدا تمشوا بيها أموركم يا بلد السكة حديد .
عارف قليبك رهيف وما بقدر على الهبباي .. يا الأهيف .
Post: #22 Title: Re: عطبرة حضارة ورابطة المريخ بأبوظبي جدارة Author: Ahmed Elsadig Date: 09-16-2015, 10:33 AM Parent: #21
الاخ طلحة وضيوفه تحية عطبراوية
Quote: بعديــن يآخ تذكر السيييلة وخليوة وتنسي كنور.. لا وحتى الداخلة ما تجيبلها خبر أفوووو
يا حيدر الزين خليوه والسياله احياء عطبرة الشمالية وكنور بربر الجنوبية خليوه والسيالة وكنور أهل وحالتهم واحدة بس ناس كنور مرات بداغلو علينا وما بيرضو يشيولو ناس خليوة في بكاسيهم وبالذات لو التحرير كان راشي الفلاح هههههههه
Post: #24 Title: Re: عطبرة حضارة ورابطة المريخ بأبوظبي جدارة Author: محمد أحمد الريح Date: 09-16-2015, 01:39 PM Parent: #22
سلام يا أخ طلحة وضيوفه من أبناء عطبرة الميامين
عطبرة عشقنا الذى لا يدانيه عشق فهى مرتع صبانا فيها ترعرعنا ودرسنا وعملنا وفيها قبور آبائنا وأمهاتنا وأهلنا وأصدقائنا عليهم من الله الرحمة والرضوان. عطبرة وما جاورها من المدن والقرى هى أرض الحب والتكافل والحياة الإجتماعية المميزة ولن نستطيع أن نوفيها حقها مهما قلنا. التحية والتقدير لعطبرة المدينة الفاضلة ولأهلها الكرام النبلاء ولأبنائها الذين يسدون عين الشمس اينما حلّوا والتحية لرفاق الصبا والدراسة. نسأل الله أن يهيئ لعطبرة من يعيد لها مجدها وعظمتها وما ذلك على الله ببعيد....
تنظير الليلة بسحروك بوست مافيه تنظير و كمان مرة صورة تنزل ليك في البورد القاديه بالتنظير ليك سنين, فرصة خلّي الناس يشوفوك :) الأسطبة - بالسين يا ود المدير - هي قطعة القماش التي يستخدمها الصنايعي في مسح الزيوت و بقايا الشحم وبرادة الحديد من الماكينة او الآلة التي يعمل عليها وتستخدم كغطاء لخزان البنزين لما يكون الغطاء الأصلي رايح, باختصار هي : دلقان :)
عطبرة التلاقح الثقافي والتلاقي الأثني .. خليوة،الحصايا، القلعة، أبوطليح، مدني الفكي، حي العرب الموردة، حي السوق، السيالة، أمبكول، المربعات ...... عطبرة حسن خليفة العطبراوي، مكي سيد أحمد، عوض الله دبورة، عبد القيوم حسن طه، الرشيد مهدي، الشفيع أحمد الشيخ، صلاح حاج سعيد، علي باخريبة، و.......... كمال حامد ....
>>>>> >>>>>>>
عزيزي الفاضل طلحة عبد الله
والله انا يا طلحة العطبراوي مشغولة شغل شديد .الايام دي . ولقيت لي بريك( فسحة) 10 دقائق من المحاضرات ودخلت المنبر العام اقرأ بوست ود الفاضلاب ود حلتنا. اعرف الاخبار الجديدة والحكاوي البتخلينا نستحمل غربة البلد دي . لكن لمن لقيت عنوان بوست ومكتوب فيه اسم عطبرة ما قدرت اتمالك نفسي وقلت اقرا شئ عن عطبرة تفتح نفسي للقراية الورمت رجلينا من قعاد الكرسي .. واذا مشيت لبوست ود الفاضلاب وشربت فنجان قهوة حتلقاني وصفت صعوبة القراية في البلدي من وحي ابيات شعر قالها الشاعر ود بادي والقال مصائب الجامعة اكبر من جميع الشفتو ولا سمعتو في ايامي الخوالي..
وكمان عاوزة اقول ليك زي ما قال ليك محمد احمد الريح ان عطبرة عشقنا الذي لا يدانيه اي عشق فهي مرتع الصبا وفيها ترعرنا وفيها درسنا وفيها ذكريات طفولتنا... والله يديك الصحة والعافية
السلام والاحترام يا سعادتو محمد أحمد الريح معاك أقول التحية والتقدير لعطيرة المقرن ودي ما عارف الناس ما قاعدين يذكروها لشنو مع انو دا معلم بارز عندما يلتقي نهر عطيرة بنهر النيل ليكملا معا رحلتهما الأبدية إلى البحر المتوسط .. المصريين شاربين موية أنهار في السودان أكتر من السودانيين أنفسهم . اللهم أعد لعطبرة مجدها وألقها .
عزيزتي الأفضل ابتسام ليك التحية والأمنيات العراض بالتوفيق والصعود إلى هامة المجد .. ولعطبرتكم الحبوبة التقدم والإزدهار .. شكرا للمداخلة المتألقة .. أنا ما عطبراوي لكن لي الشرف طبعا .
خليوة،الحصايا، القلعة، أبوطليح، مدني الفكي، حي العرب الموردة، حي السوق، السيالة، أمبكول، المربعات ...... عطبرة حسن خليفة العطبراوي، مكي سيد أحمد، عوض الله دبورة، عبد القيوم حسن طه، الرشيد مهدي، الشفيع أحمد الشيخ، صلاح حاج سعيد، علي باخريبة، و.......... كمال حامد ....
>>>>>>>>>>>> >>>>>>>>>>>
عزيزي الفاضل طلحة
يعني اذا انت ما عطبرواي العرفك بحي السوق وامبكول والمربعات وعوض الله دبورة شنو؟؟ المهم اذا انت ما عطبراوي وبتعرف المعلومات كلها عن عطبرة بنكلم ليك معاوية ود المدير يسجلك في رابطة الععطبراويين زمرحب بيك ودمت بالف خير وصحة وعافية بسمات الشيخ عبد الرحيم
عطبرة دي عندي وأعتقد معظم السودانيين مثل أم درمان والخرطوم وبحري دي يا بسمات مدينة سودانية بارزة في الأطلس والتاريخ والجغرافيا وشىء طبيعي الناس تعرفا .. إلا من أبي كما قال الشاعر .. لو ما طلع منها غير العطبراوي وصلاح حاج سعيد وكمال حامد لكفاها أتشرف أكون في لمة ناس عطيرة
غايتو ياود المدير الناس البكونو مهبوشين زىيك كدى الواحد بقولوا ليه إنت راميك جمل ,, لكن انت التقول رامياك دحشة فارده جناها وإنت راكب فوق لويَّة لوبا ,, جاى من الجروف . لكن يامعاوية طلحة ده ظنيتو غَوَّاسة العرفو بالبكانات دى كلها شنو؟ ياخ ده مرة فى مداخلة ذكر وطن ام الطيور هاك يا طلحة قطار الشوق بصوت صاحبها الاصلى (بابكر الحسين رابح ــــ الزَّكار) وبرضو بالمناسبة من ام الطيور
Quote: يا حيدر الزين خليوه والسياله احياء عطبرة الشمالية وكنور بربر الجنوبية خليوه والسيالة وكنور أهل وحالتهم واحدة
سلآمات يا ناس خليوة . ومن الجهة الجنوبية الشرقية الطِليح يا أحمد، دي أحياء عطبرة قبل ان يتم إختيارها مركز لسكك حديد السودان وبعد إختيارها عاصمة لسكك حديد السودان في عام 1906 بدأت تتوافد نحوها الوفود من جميع مُدُن وأقاليم السودان، والشئ الجميل منذ ذلك العهد وحتي الآن لم يبدي لهم السكان الأصليين اي نوع من الضجر ولم يحسسوهم إنهم غرباء من الوهلة الأولى، ؤُ حتي حكاية السكان الأصليين دي ما هي إلا شئ موجود في التاريخ فقط حيث لا وجود له في نفوس السكان . عطبرة هي المدينة الوحيدة التي لا تشعر فيها بالغربة حتي لو زرتها ليوم وآحد، وناس عطبرة يحبوها لدرجة لا توصف، وعندما يأتي ذكرها في ايّ محفل تجد أهلها يديمون الحديث عنها حتي تقول، ليتهم سكتوا، حتي قال الجابري عليه رحمة الله مقولته المشهورة، بلآ عطبرة بلآ مسخرة ...
Quote: الأسطبة - بالسين يا ود المدير - هي قطعة القماش التي يستخدمها الصنايعي في مسح الزيوت و بقايا الشحم وبرادة الحديد من الماكينة او الآلة التي يعمل عليها وتستخدم كغطاء لخزان البنزين لما يكون الغطاء الأصلي رايح, باختصار هي : دلقان
يا حيضر تعال شوف ود البشرى قال شنو، غايتو جِنِس مِحن !.
كدي في اللوّل النسمكر كلآمو دا . يا ود البشرى إجتهادك دا إن شاء الله ربنا يجعلو ليك في ميزان حسناتك، عِلآ عاين لي جاي اللقولك، اللُصطُبّة دي بالصا المفخمة لآمن تملا الخشُم ؤُ مرآت معاها غُنّة كمان . كلآمك صحيح نوعاً ما من الناحية الشكلية، لكن اللُصطُبّة عندنا في عطبرة عبارة عن خيوط تمتص الزيوت كانت تُجلب مخصوص لورش السكة حديد، والأهالي يستعملوها مع السعف لنسج الهبابات التي تساعد في تلطيف الجو، أما في الوِرش فهي كما ذكرت تستعمل لمسح الزيوت من فوق المكن وإزالة برادة الحديد في المخرطة . دا كلو في إطار الظاهر، أما في إطار الباطن يا طلحة وأنت تسأل من معنى اللُصطُبّة، فكما لآحظت انا ذكرت رائحتها ؤُ دا بيت القصيد زاتو فرائحة الزيوت العابقة في اللُصطُبّة عابقة في اركان المدينة الأربعة وعابقة في كل بيوت المدينة وفي كل الأفرولآت والعجلآت، ونحن ناس عطبرة نحبها جداً ونستنشِقها فتنعشنا حد الثمالة . هذه الرائحة هي رائحة الكفاح والنضال، رائحة التلآحُم والترابُط، رائحة المودة والإلفة، رائحة الشموخ والكبرياء والتحدي، رائحة البساطة الأنيقة، رائحة العِز، رائحة معشوقتنا وحبيبتنا عطبرة، هذه الرائحة بالنسبة لنا أجمل وأفخم من أفخر العطور الباريسية نستنشقها إلفة ومودة ونزفرها ترابُط وإخاء ومحبة . نحبها جداً ونستمتع بها خاصةً عندما تأتي ممزوجة برائحة الفلنكة مع رزاز مطر خفيف والدنيا صباح وأسرآب الضحايا الكادحون يقودون عجلآتهم نحو الوِرش، نحبها جداً عندما تأتي ممزوجة برائحة الجرايد والمجلآت والجميع يطالع فيها ألأخبار في مكتبة دبورة أو حنتبلي . يا طلحة هذه الرائحة نجدها عالقة في كل ناس عطبرة وفي كل من يحب عطبرة، فما خاب ظني يا صديقي . لك التحيا ولود البشرى ممزوجة برائحة اللُصطُبّة ...
Quote: المهم اذا انت ما عطبراوي وبتعرف المعلومات كلها عن عطبرة بنكلم ليك معاوية ود المدير يسجلك في رابطة الععطبراويين
ههههههههههههههههههه،
يا بسمات إنت لِسّع ماسكة في كلآم قريبي محمد همزة الحسين ؟، أقولِك حاجة بالمناسبة دا حُلم أصبح بالنسبة لي الخِل الوفي وإن شاء الله سأسعى من اجله حتي يتحقق إن شاء الله . بعد تنتهي من اللمتحانات ذكريني عشان أوقعلك الكلآم واشرحلك الحلم . هسّع أبقى عشرة في قرايتك كان باريتي حيضر الزين ؤُ طلحة تنظير وحات الخوّة تسقطي زي الطايرة الماليزية ...
Post: #36 Title: Re: عطبرة حضارة ورابطة المريخ بأبوظبي جدارة Author: اباذر عبد العال Date: 09-17-2015, 06:43 AM Parent: #34
يا وصيف طلعت من معجبي عطبره كلام جميل وانت اجمل عبيك انك مريخابي
Post: #38 Title: Re: عطبرة حضارة ورابطة المريخ بأبوظبي جدارة Author: عبد العزيز محمد عمر Date: 09-17-2015, 07:36 AM Parent: #36
دا بوست معتق ...
كمال حامد يستاهل كل خير والله .... قدم الكثير .. والمؤسف أنه قال أنه سيعتزل بعد ريودي جانيرو 2016 بعد أن يكون قد أكمل خمسين عاما في بلاط صاحبة الجلالة
.
Post: #39 Title: Re: عطبرة حضارة ورابطة المريخ بأبوظبي جدارة Author: جمال المنصوري Date: 09-17-2015, 07:56 AM Parent: #38
Quote: انتو يا خوانا ما في ناس من عطبرة في البورد دا غير حيدر الزين ومعاوية المدير وأبو جهينة المنتظر .. ؟
بالحيل يا طلحة كلنا من عطبرة.. ونحي معاك كمال حامد، وكمال طه، وكمال همزة كمان... ونحي معاك كمان ود الريح ( ود حاج الريح السنهوري، الله يرحمه) صاحب اشهر طاحونة، وصاحب اول موقف يسمي باسمه وهو حي.. يا طلحة (قبل ما يجي ابو جهينة النديك (هنت @) اللسطبة (كنا قال: ود المدير) والاسطبة كما تنطق في ورشة المرمه، هي (بزديق) بتاع ناس القطارات.. مع وافر تحياتي
Post: #40 Title: Re: عطبرة حضارة ورابطة المريخ بأبوظبي جدارة Author: حيدر حسن ميرغني Date: 09-17-2015, 09:20 AM Parent: #39
Quote: فرائحة الزيوت العابقة في اللُصطُبّة عابقة في اركان المدينة الأربعة وعابقة في كل بيوت المدينة وفي كل الأفرولآت والعجلآت
فهمت طال عمرك .. أنا اتعلمت سواقة العجلات في عطبرة .. مع كل التقدير للأخ العزيز حسن عبد السلام أمين خزينة نادي المريخ الأسبق عطبرة ما ساهلة والله يا ود المدير
هلا يا عبد العزيز وفعلا كمال حامد سيعتزل كما قال لكن المسألة ح تكون ليهو صعبة جدا .. زي طلوع السمكة من الموية .
تحياتي جمال المنصوري مع وافر المحبة والتقدير .. ما قصرت
سلامات يا حيدر حسن وين الغيبة يا زول جميل ؟ محبة عطبرة في الحنايا والله .
Post: #45 Title: Re: عطبرة حضارة ورابطة المريخ بأبوظبي جدارة Author: Ahmed Elsadig Date: 09-17-2015, 10:43 AM Parent: #44
Quote: سلآمات يا ناس خليوة . ومن الجهة الجنوبية الشرقية الطِليح يا أحمد، دي أحياء عطبرة قبل ان يتم إختيارها مركز لسكك حديد السودان وبعد إختيارها عاصمة لسكك حديد السودان في عام 1906 بدأت تتوافد نحوها الوفود من جميع مُدُن وأقاليم السودان، والشئ الجميل منذ ذلك العهد وحتي الآن لم يبدي لهم السكان الأصليين اي نوع من الضجر ولم يحسسوهم إنهم غرباء من الوهلة الأولى، ؤُ حتي حكاية السكان الأصليين دي ما هي إلا شئ موجود في التاريخ فقط حيث لا وجود له في نفوس السكان . عطبرة هي المدينة الوحيدة التي لا تشعر فيها بالغربة حتي لو زرتها ليوم وآحد، وناس عطبرة يحبوها لدرجة لا توصف، وعندما يأتي ذكرها في ايّ محفل تجد أهلها يديمون الحديث عنها حتي تقول، ليتهم سكتوا، حتي قال الجابري عليه رحمة الله مقولته المشهورة، بلآ عطبرة بلآ مسخرة ..
حببك الف يا ود المدير وكلامك سمح بالحيل والتحية لاهلنا في الطليح
Post: #46 Title: Re: عطبرة حضارة ورابطة المريخ بأبوظبي جدارة Author: Ahmed Elsadig Date: 09-17-2015, 10:51 AM Parent: #45
Quote: هاك يا طلحة قطار الشوق بصوت صاحبها الاصلى (بابكر الحسين رابح ــــ الزَّكار) وبرضو بالمناسبة من ام الطيور
صاح يالفاضلابي الفنان بابكر الزكار من ام الطيور وساكن خليوه وعنده محطة مواصلات باسمه التحية له ولرفيقة دربة الاستاذه حورية
Post: #47 Title: Re: عطبرة حضارة ورابطة المريخ بأبوظبي جدارة Author: اباذر عبد العال Date: 09-17-2015, 11:46 AM Parent: #41
Quote:
قبل كل شىء .. يا جماعة كلام أبا ذر دا صاح واللا ما صاح ؟
هههههههههههه
والله الا تبقي قاصد موقعة ابي طليح
الفكي مدني...يااااااااااخ اموت انا في محطة عباس .. بجوار نادي السلام ومدرسة العمال هههههههههههه
ادفن في الطليح في فريق السناسناب ههههههه
Post: #48 Title: Re: عطبرة حضارة ورابطة المريخ بأبوظبي جدارة Author: عبد العزيز محمد عمر Date: 09-17-2015, 12:50 PM Parent: #47
شايف البوست اتملا بناس ( الضواحي والحلال ) شيء كنور .. وشيء خليوة .. وشيء الطليح ... وشيء السيالة ... بسمات دي ما عارفنها من وين ... لكن شكلها كدا من جماعة الدهب ...
انا غايتو من الامتداد الشرقي مربع ٢ وقبلها سكنا الحصايا .. ود المدير كنت بقابلو في صف السينما (الجمهورية) ومن سنة ٩٠ رحلنا الحلفاية حقت ابصلعة صاحب البورد
Post: #50 Title: Re: عطبرة حضارة ورابطة المريخ بأبوظبي جدارة Author: جمال المنصوري Date: 09-19-2015, 05:59 AM Parent: #49
انا غياتو من المربعات سابقا(شارع السلك) جوار ناس احمد عبدالله ابو الروس وبينا وناس (جبرالله) شارع، وناس الرشيد مهدي، وابو خليل كانوا ورانا.. حلة العموم برضو سابقا... حاليا (حي المطار..
Quote: شايف البوست اتملا بناس ( الضواحي والحلال ) شيء كنور .. وشيء خليوة .. وشيء الطليح ... وشيء السيالة ... بسمات دي ما عارفنها من وين ... لكن شكلها كدا من جماعة الدهب ...
لكن إنت كنت قاعد تكون واقف في صف السينما واللآ في الصف الجنبها ؟
دي غايتو لما تقرنا ب ( قول الصاح ) توحي بحاجات تانية حامياني .. يا جماعة ممنوع التلغز في الحاجات دي .. قولوها عديل .. لأنو عندنا ناس هنا بفهموا غلط .
Post: #60 Title: Re: عطبرة حضارة ورابطة المريخ بأبوظبي جدارة Author: حسين عمر الفكي Date: 09-19-2015, 09:18 AM Parent: #59
يا سلام على هذا البوست الجميل .
مدينة عطبرة من المدن العريقة حقيقة ..لا تشبه باقي المدن.
والدتي اطال الله عمرها من عطبره حي المربعات.... محطة حليمة ماضي...ومنزل جدي محي الدين محمد عبدالرحمن موجود حتى الان
فاتح على المقابر...جنب المسجد ..وكان جارنا رجل فاضل اسمه (درويش) ..وكنا نلعب في فسحة امام نادي النسر ...ومن شلتنا عدنان محمد عثمان عدنان وصابر حسن عرور ومدثر كنور ونزار ..وكنت خميس وجمعة.. اذهب الى خالي في (السودنة) وخالتي في حي العموم وكان جارهم عبدالقيوم حسن طه ..وخالي الباقر محي الدين كان استاذ في احد مدارسها وابناء خالتي العميد عادل حسن حميدة كان احد لعيبة فريق نادي الامل ..واخيه هشام حارس مرمى
Quote: وابناء خالتي العميد عادل حسن حميدة كان احد لعيبة فريق نادي الامل
ياسلآلآلآلآلآلآلآلآم يا حسين عمر يا اخ . بالله الزول دا وين ؟، عادل حسن حميدة قرينا القومية مع بعض وكان صديق عزيز، والله ايام . بالله سلم لي عليهو شديد يا اخ ...
Post: #62 Title: Re: عطبرة حضارة ورابطة المريخ بأبوظبي جدارة Author: حسين عمر الفكي Date: 09-19-2015, 09:45 AM Parent: #61
أخي معاوية
عادل حسن حميدة موجود حتى الان في مدينة عطبرة ...وقائد ثاني سلاح المدفعية.
Post: #64 Title: Re: عطبرة حضارة ورابطة المريخ بأبوظبي جدارة Author: جمال المنصوري Date: 09-19-2015, 10:21 AM Parent: #63
Quote: وصابر حسن عرور ومدثر كنور ونزار
اخونا / حسين عمر الفكي تحية طيبة.. غايتو الاسامي دي حقت ولاد في حلتنا: - نزار حسن عرور (ود ع... عرور) مدثر كنور، اظنك قاصد ود (ز... كنور) افتكر هسع شغال في شرطة الحركة.. التالت ده انا شاكي انو يكون (نزار محمد بدري) مع اطيب التحايا
Post: #66 Title: Re: عطبرة حضارة ورابطة المريخ بأبوظبي جدارة Author: حسين عمر الفكي Date: 09-19-2015, 10:43 AM Parent: #65
أخي جمال المنصوري
فعلا كنت اقصد نزار محمد بدر ..رجل مهذب وخلوق ...ومدثر كنور الرجل الكارثة ههههه...وعندك ناصر ابو شوك
تعرج كدا شويه تمشي ناس سيد احمد جمال واخته المربية الفاضلة سهام ...اما ناس عرور ..صابر حسن عرور ...سامي .....محي الدين.
وفي نفس (حي العموم )عندك ناس الجعلي ...وامراة فاضلة اسمها امنة العربية ...ناس بادنين (من شرق السودان) كان يعمل في الدريسة ..يا سلام على عطبرة واهل عطبرة
لك تحياتي
Post: #67 Title: Re: عطبرة حضارة ورابطة المريخ بأبوظبي جدارة Author: اباذر عبد العال Date: 09-19-2015, 11:06 AM Parent: #66
Quote: شايف البوست اتملا بناس ( الضواحي والحلال ) شيء كنور .. وشيء خليوة .. وشيء الطليح ... وشيء السيالة ... بسمات دي ما عارفنها من وين ... لكن شكلها كدا من جماعة الدهب ...
ده شنو يا الشغيل هههههههههههههه
كنور اداريا تابعه لي بربر وجغرافيا قريبه من عطبره وقديمه وعريقة بعراقة حي الداخله الذي لم يتم تذكره هنا خليوه احدى روافد ومكونات عطبره الطليح داخل عطبره من قلب الحدث كيف تكون ضواحي... من بيتكم ههههه تشوف حلة الحلب وشكلة الحلب زااتو ههههه والطليح مرتبطه بالمورده- والمحطات ( الطليح -تكساس- المجله -بت الجيلي- السوق ..نقاش..-حليمه ماضي. والسياله ايضا حي من احياء عطبره العريقه واهلها عمد واسياد بلد كيف تكون ضواحي.... انت كدا حا تتطلع ناس (عباس الكير) بره الحساب ههههههههههه ...
طلحة عادة ألينا ذكريات وايام جميلة في وطني الصغير عطبره اعظم المدن السودانيه ..
يا أباذر كيفن من جبنا سيرة الداخلة وهي أساس عطيرة .. جبناها حرم .. الحاجة المهمة المهملة هنا هي ( المقرن ) أنا شايف المقرن مفروض يكون أهم معالم أتبرا .. لكن ما عارف رأي العطبراوية شنو .
يا ود المدير حبابكم عشرة بلا كشرة .. أنا طلحة عبدالله طه أتشرف والله وأفتخر بعطبرة وناسا .
... ... ... .. .. ..هلا بعطبره ....و ناسا ..هلا بالناسا و ناسا... .. ..صوره من كتاب (عطبره) ..للعامل ...المرحوم الحاج عبد الرحمن ... ... ...يا طلحه ...عطبره دي ....عمالا بيكتبو و يصدروا ...كتب كمان ..و من سنة 1966 ... ....تقول لي طلحه تنظير ....ياود البشري ؟؟؟؟؟ ؟؟؟ ؟؟؟ هسه طلحه ده اخر مره اصدر كتاب بتين يا ود البشري؟؟؟؟ .. ..ال ايه ....ال تنظير ال..
.. ..فصل في مدرسة بنات الانجيليه ...1965 .... .. ..كاميرا عمنا المرحوم الرشيد مهدي .. ..هي عطبره ...هي المزج و التمازج الاثني و التصالح الروحي الانساني النبيل ... .. ..ومن اجل بلد احتوي بين دفتيه هذا التنوع في حنو و رحمه .. .. ..لله درك ي بلد ....و لله درك ي عطبره ... ..
Quote: يا ود المدير حبابكم عشرة بلا كشرة .. أنا طلحة عبدالله طه أتشرف والله وأفتخر بعطبرة وناسا .
يا طلحة مشكور علي الترحاب، وانا علي اليمين بعتبرك إنت يا طلحة بترحب بينا نحن في عطبرة، فعطبرة موطنك وموطن كل السودانيين، ورغم ان البوست يكاد يكون خرج من محوره لكن ليس لدي ادنى شك المُحتفى به زاتو يكون طربان لهذه الجلسة العطبراوية، له منا عاطر التحايا، وبالمناسبة طرفكم من عطبرة من يستحق الإحتفاء ايضاً سعادة اللواء عمر علي حسن ...
Post: #73 Title: Re: عطبرة حضارة ورابطة المريخ بأبوظبي جدارة Author: جمال المنصوري Date: 09-20-2015, 05:48 AM Parent: #72
Quote: أخي جمال المنصوري فعلا كنت اقصد نزار محمد بدر ..رجل مهذب وخلوق ...ومدثر كنور الرجل الكارثة ههههه...وعندك ناصر ابو شوك تعرج كدا شويه تمشي ناس سيد احمد جمال واخته المربية الفاضلة سهام ...اما ناس عرور ..صابر حسن عرور ...سامي .....محي الدين. وفي نفس (حي العموم )عندك ناس الجعلي ...وامراة فاضلة اسمها امنة العربية ...ناس بادنين (من شرق السودان) كان يعمل في الدريسة ..يا سلام على عطبرة واهل عطبرة لك تحياتي
حسين كيف حالك واحوالك.. امنه العربية زوجة علي العربي، ابو ناس يوسف وعمر، وهلم جرا..امرأة حسانية ارجل من الرجال كرم وشهامة وصبر وكدح،،، ناس بادنين (عديل سليمان الرضي) ديل البيت البفتح عليهم من الشمال كان بيت ناس (عبد العزيز البطل) ابو ناس مصطفي البطل، وبيت ناس (سيد احمد جمال الدين) كان سابقا بيت ناس الامين محمد صالح قريش... غايتو يا حسين رجعتنا لي ذكريات جميلة.. ان شاء الله نتابع معاك.. مع خالص الود والتقدير...
اهداء ...للمحتفِي ....و المحتَفي بهم ... .. ..الشبيبه و الامل او الامراء...علي ما اعتقد و حسب المصدر الذي استقيت منه المعلومه ..باستاد عطبره ...في بدابة الخمسينات ... ..و التصوير بكاميرا عمنا المرحوم الرشيد مهدي ....(استديو الرشيد) ... .
Post: #76 Title: Re: عطبرة حضارة ورابطة المريخ بأبوظبي جدارة Author: حسين عمر الفكي Date: 09-20-2015, 04:03 PM Parent: #75
ياسلام يا جمال المنصوري على عطبرة واهلنا في عطبرة.
قضيت اجمل ايام عمري في مدينة عطبرة ..ناسا حنان ..البيوت مفتوحة للكل ..تفطر في بيتك ...الغداء مع امنة العربية ...العشاء مع ناس بادنين
الباسطة في العمارة ...السنماء الوطنية وتجي راجع البيت مهدد وتعبان ...ايام وسنين في الخاطر ستظل للابد في دواخلنا عن الحبيبة عطبرة
عزيزي العطبراوي عبد العزيز محمد عمر قريب جدا بوريك بيتنا في قلب عطبرة عن طريق Earth google وكمان بصورة تكعيبية مكبرة ...واكيد انت حتكون مريت بالشارع ده مرات كتيرة.....بس خليني افضى ليكم واجيب ليكم روائع عطبرة والاتبراوي.. وشكرا ليك الحبيب Hololy للصور الرائعة
اي والله يا ود المديــر .. زمن .. كان للمحطة هيبة وكانت لوحة وطن بحالو
هاك الصورة التانيـة دي بكاميرا العبد لله .. زمن الكاميرا أم 36 لقطة وتودي الفيلم يتحمض باستوديو الرشيد مهدي او مضوي يرسلوهو الخرطوم ومواعيدك تكون بعد شهر .. دا لو ماكان قريبك مغترب ورسلتوا انت وولاد الحلة معاهو خمسمية فيلم ترجع مع اول زول " معرفة " نازل اجازة..
الصورة عند ود المدير تحت :)
لحظة وداع ذات بعد عيد اضحى لا يخلو من الشربوت من اعياد التمانينات ...
Post: #84 Title: Re: عطبرة حضارة ورابطة المريخ بأبوظبي جدارة Author: جمال المنصوري Date: 09-21-2015, 08:46 AM Parent: #82
سلامات يا حيدر ويا معاوية يا ود الزين .. ما تاكل الناس حنك ساي، الصورة الجايبة من منبر مجاور دي ما ماصورة الأسطبة (الاصطبة) - صاحبة الاسم ده منديل كانو بيصرفوه لي ناس الدريسة، الاسطبة الجد، كانت لفة من الكتان، لا لامة قطن لا لامة قماش، لونها وهي جديدة عندو لمعة، وطبعا بعد الاستعمال لونها بكون زي القطن الكانت ماسكة فوقو نار وطفوها بي موية... مع قناطير من المودة
يا حيدروف الحاجات دي كانوا بصنعوها في عطبرة واللا وارد برة وكلها خاصة بالقطارات والسكة حديد واللا برضو العربات والعجلات وهسع المعهد دا شغال واللا بقي أطلال ؟؟
Post: #88 Title: Re: عطبرة حضارة ورابطة المريخ بأبوظبي جدارة Author: حيدر حسن ميرغني Date: 09-21-2015, 10:36 AM Parent: #87
يامعاوية تتذكر حادث قطر كريمة بتاع العرس دااك دفنا موتاهم في مقابر عطبرة ... كان يوم حزين ياخ الاسطبة دي ذكرتني الحادث .. كيف ماعارف
Quote: يامعاوية تتذكر حادث قطر كريمة بتاع العرس دااك دفنا موتاهم في مقابر عطبرة ... كان يوم حزين ياخ الاسطبة دي ذكرتني الحادث .. كيف ماعارف - عارفك هسع تجي تقول لي كنت في اولى ابتدائي
لا والله يا حيدر، كنت في الأهلية المصرية . كانت مأساة هزّت المدينة كولها، الناس كانوا نايمين والبابور جاء دافر فوقُن، أيام كانت حزينة . يا حيدر طبعاً المقابر جنب المدرسة، بمجرّد ما النعوش وصلت طلعنا من الحصص علي المقابر، نسأل الله ان يرحمهم ويرحم جميع موتى المسلمين ...
Post: #90 Title: Re: عطبرة حضارة ورابطة المريخ بأبوظبي جدارة Author: حيدر حسن ميرغني Date: 09-22-2015, 10:22 AM Parent: #89
طلعت اكبر مني بخريف نعم كانت حادثة بشعة جدا .. حدثت في الساعات الاولى من صباح ذلك اليوم المشؤوم عامل مستجد دور الديزل بسرعة فائقة وقتل النايمين تحت عربة القطر وحتى من كان بداخلها كان العزاء في مسجد الختمية .. تحدث رجل وقور فقد ابنه وزوجته في الحادثة ، نيابة عن اهل الضحايا كنا ندفن اكثر من جثة في مقبرة واحدة .. البعض منها صعب التعرف عليها من شدة تشوهها يرحمهم الله ويحسن اليهم - نحن برضو طلعونا من المدرسة عشان نساعد في الحفر
اثناء بحثي عن مواضيع عطبرة في المنبر العام استفزاني عنوان غريب وكاتبه هشام المجمر .. والعنوان بيقول:: بلا عطبرة .. بلا مسخرة.. في الحقيقة في البداية زعلت زعل شديد وكنت ناوية ارد على هشام المجمر عشان اوريه عطبرة دي شنو.. ولكن بعد ما قريت الموضوع .. عرفت ان هشام المجمر عنده معزة خاصة لعطبرة مع انه ما سكن فيها غير سنة ونص... واقرأوا معي موضوعه اذا ما قريتوهو قبل كده... ( وسمعت انه اليوم وقعت جريمة بشعة في عطبرة.. عن امرأة ذبحت طفلها وعمره 3 سنوات انتقاما من زوجها الذي طلقها ويبدو ان المجتمع المسالم في عطبرة بدأ يتغير من ازمات الحياة التي تطحن الناس .. وارجو ان لا يكون كذلك ... فعطبرة ناسها حنان وما شبه الجرائم دي.. وعطبرة تبرا من الجرائم.. ودمتم بالف خير وعافية
( موضوع هشام المجمر)..بعنوان" بلا عطبرة.. بلا مسخرة.. يقال أن الفنان الجميل الجابرى كان يعشق الجلسات الرائقة و التى ليس بها صخب او كلام كتير حيث يتحدث الجالسون حديثا قليلا ممتعا و يبهجهم هو ببعض من أغنياته لذلك كانت له شلة محددة من الناس لا يغيرهم أبدا.
فى مرة من المرات جلب احد اصدقائه قريبا له لل( القعدة) و توجس الجابرى من ذلك وكان معه الحق. الشاب كان من عطبرة وكان من النوع كثير الكلام ما ان يفتح شخصا موضوعا او يتحدث عن شئ حتة ( ينط) له الشاب فى حلقه و يقول له نحن فى عطبرة نصنع كذا وكذا أو يحكى عن موقف مشابه حدث له فى عطبرة.
تملل الجابرى كثيرا ولكنه صمت احتراما للصديق ولكن بعد ان طفح به الكيل و الشاب يقاطع احد الجالسين قائلا : فى عطبرة... إذا بالجابرى يقول له يا أخى بلا عطبرة بلا مسخرة خلى الناس تسكر سكرها.
هذه الطرفة عن الجابرى سمعتها قبل حلولى بمدينةعطبرة بمدة من الزمن و بالتاكيد الفنان المبدع الجابرى لا يقصد مدينة عطبرة ولكنه قصد هذا الشاب الذى عكر عليه مزاج الجلسه. وقد تكون الحكوة كلها مؤلفة من احد المتهكمين من العاصميين طويلى اللسان والذين بالقطع لا يعرفوا مدينة عطبرة و لا اهلها المتفردين و لترويج الحكاية نسبوها للجابرى. وربما يكون الشاب قد تحمس لمدينة تستحق الحماسة و الا سهاب فى الحديث عنها.
عطبرة تلك المدينة الماجدة والتى اختارت لها موقعا عند ملتقى النهر الصغير الذى سميت باسمه والنيل الكبير الذى ياتيها فيضحك عندهاا قبل ان يتثنى فوقها بمسافة ليست بالبعيدة فالمدن تختار مواقعها لوحدها و توحى لبنى البشر بذلك.
فى عطبرة عرفت بشرا مختلفا فيها استمعت و استمتعت فيها باطرف و اشطر عملية تسول فى حياتى. ففى ذلك الوقت من الثمانينات اشتدت وطأة الحياة على المدينة بفعل فاعل وصار عمالها الذين يشكلون غالب سكانها يفطرون على الفول السودانى وكباية شاى لمن استطاع اليها سبيلا. حثت الحادثة وبعد وصولى لعطبرة بشهور عندما كنت استقبل احد المهندسين فى محطة السكة الحديد. بينما انا فى انتظار القطار إذا بشخص يمد الى ورقة . تسلمتها منه بسرعة وانا اتشوق لأقرأ ما بها فقد كان ذلك الوقت معبأ برياح التغيير. عندما فتحت الورقة قرأت فيها و بخط واضح وكبير سطرين فقط:
موضوع الساعة...... مساعدات مالـــــية
ضحكت حتى استلقيت و أدخلت يدى فى جيبى واعطيت منحة مالية مقدرة لهذا الشحاذ المثقف والذى دخل لموضوعه مباشرة دون لف او دوران.
لا اريد ان اتحدث عن تاريخ عطبرة ومن يسكنها فمن القبائل ذلك حديث آخر كما اننى لست مؤهلا له ولكننى اريد ان اتحدث عن المدينة التى عشت بها قرابة العام ونصف فى منتصف الثمانينات من القرن الماضى.
هشام المجمر
Re: بلا عطبرة .....بلا مسخرة.....
عند حلولى بمدينة عطبرة كان برفقتى صديقى و رفيق دربى جمال بروتين المحامى فأمه المرحومة الحاجة فهيمة كانت من مواليد وسكان عطبرة قبل ان يرتبط بها ابوه و يحضرها للخرطوم.
جمال كان يقضى بعض اجازاته المدرسية بعطبرة و كان عندما يأتى بعد انتهاء الاجازة يأتى و تحت ابطه كيس من الحكايات المشوقة. هكذا عرفت عطبرة من حكاياته عنها عن ناسها نسائها فتياتها ومغنييها فتواتها وصعاليقها. كانت حكاياته عن ابى جنزير و مغامراته تلهب خيالى وحديثه عن فتيات عطبرة الفاتنات يشحذ مخيلتى.
بتلك الذكريات وصلنا مدينة عطبرة ونزلنا بمنزل خاله عبد المنعم بالامتداد الشرقى. اهل هذه البيت اعرفهم عن بعد وهناك من لا أعرفه فقد كان بعضهم يزور الخر(.........)م فى مناسبات متقطعة. نزلنا بهذا المنزل و رحب بنا ترحيبا شديدا وسكان البيت على رقة حالهم لم يدخروا جهدا فى اكرامى بالطاعم من الطعام ولا بالوثير من المرقد. هكذا عرفنى أهل عطبرة بانفسهم ممثلين فى اسرة عمنا عبد المنعم رحمة الله تغشاه وزوجته الفاضلة الحاجة اعتماد اطال الله عمرها و بناته وابنائه. هؤلاء الناس شالونى على كفوف الراحة لمدة ثلاثة ايام دافئة قضيتها بينهم وكانى ولدت بذلك المنزل ثلاثة ايام هنية مازالت عالقة بذاكرتى حتى الآن.
هكذا دلفت لعطبرة بنعومة ودفء شديدين رغم اننى كنت اتهيب جدا تجربتى الاولى خارج الخرطوم موظفا بالهيئة القومية للكهرباء قسم المشروعات منقولا لعطبرة للاشراف على الاعمال المدنية لمحطة كهرباء عطبرة الجديدة.
وصلنا عطبرة يوم خميس فى اواخر العام 1984 م ويوم السبت ظهرت بمكاتب الهيئة القومية للكهرباء الواقعة عن الطريق المؤدى لمدينة بربر مرورا بآخر نقطة فى شمال عطبرة وهى قرية خليوة. و لخليوة هذه موقع خاص فى نفسى فقد كان احد السباب من متدربى الهيئة وقتها من تلك المدينة وكان دمث الاخلاق حلو المعشر و كنت دائما ما اكاويه قائلا له بالله فى حد يسكن حتة اسمها خليوة يعنى انتو خلوة ما تاميين وكان يضحك كثيرا و يقول طبعا نحن ما بنقدر عليكم يا اولاد الخرطوم وكانت تلك المداعبات البريئة تنتهى بعزومات فى الخليوة هذه التى احببتها و الشاهد اننى بعد مشاهدة كرم اهلها و نباهة شبابها فاننى تركت حتى هذه المداعبات.
فى مكاتب الهيئة تم استقبالى بود و قرر المدير المالى فى ذلك الوقت عبدالله والذى كان يسكن الامتداد الشمالى و يلد بناتا فقط كما علمت لاحقا وقد اكلت سماية بنته الرابعة فيما بعد وكنت دائما من اشد مناصريه فيما كان مصدر مكاواة دائمة له والتى كان يقابلها بكثير من الضحكات قرر عبد الله هذا ان انزل فى احدث فندق بعطبرة واسمه فندق النيل لصاحبه المرحم لطيف.
كان الفندق جديدا لدرجة اننى كنت اول نزيل به و قد امضيت به قرابة الشهر تحولت فيها بقدرة قادر من نزيل الى موظف و احيانا الى صفرجى يخدم ضمن اسرة لطيف وذلك عندما حلت بعثة فريق المريخ بعطبرة ونزلت فى الفندق وكان عدد العاملين فى الفندق محدود بالعم لطيف و ابنه الشاب ارنست و زوجته فانضم لهم لا شعوريا نزيلهم المهندس هشام المجمر.
كيف تحولت العلاقة من علاقة نزيل واصحاب فندق لتلك العلاقة الحميمة والقريبة سؤال لا استطيع الاجابة عليه ولكنى وجدت نفسى منذ اليوم الاول جالسا فى حديقة الفندق الصغيرة والتى توجد امامه مع العم لطيف و وزوجته و ابنه ارنست.
جاءوا مساءا و احضروا معهم الشاى و القهوة وجلسوا معى يؤانسون وحدتى. كان العم لطيف وقتها ما يزال موظفا كبيرا بسكك حديد السودان وله بيت حكومى كالجنة يطل مباشرة على سليل الفراديس. حدثنى العم لطيف كثيرا عن السكة حديد ما كانت عليه و ما آلت له وكنت شديد الاهتمام بحديثه إذ لأول مرة اسمع حديث من شخص عليم ببواطن الأمور. قال العم لطيف انه من المؤسف ان ترى أن السياسة تسببت فى القضاء على شريان الحياة فى السودان وعلى القضاء على المدينة التى كان من المفترض ان تكون قمة فى الازدهار فى ذلك الوقت مع تطور السكة الحديد لو سار الامر حسب الخطط التى وضعتها ادارات مختلفة ولكن تم تجاهلها تماما لاسباب سياسية.
شربنا الشاى والقهوة وشاركتنا حرم السيد لطيف بالحديث وكانت جلسة عائلية دافئة ازعم انها كسرت كل الحواجز مرة واحدة حتى انه فى آخر الجلسة طلب منى العم لطيف معالجة بعض المشاكل الهندسية بالفندق و قد فعلت.
غادرتنى الاسرة ولم ارى العم لطيف بعدها الا لماما ولكن ابنه ارنست لم يفارقنى ابدا الى ان انتهيت من مؤموريتى ورجعت للخرطوم وفى قلبى مدينة كاملة.
اعتدنا انا وارنست على الجلوس يوميا فى حديقة الفندق الذى يقع فى مكان متوسط من امتداد الدرجة الاولى ويفتح على ميدان فسيح وكان القليل من البيوت وقتها مبنيا مما اتاح لنا خصوصية جميلة ازدانت ببعض اصدقاء ارنست واصدقائى فيما بعد ملازم شرطة عيس وعبد الحفيظ الكارثة مسئول شركة اسماك حلفا. عيسى كان يسكن فى حى الداخلة الجميل ولكنه يسجل الحضور اليومى كذلك كان عبد الحفيظ يسكن الحصايا وياتى بعربته البيجو 404 البيك اب ( الكانون)الزرقاء كقلم الكوبيا ولكنها خدمت مشاويرنا خدمة تشكر عليها. ننزل بها الموردة لاحضار العشاء من العم خضر هكذا كان اسمه وكان موظفا فى السكة حديد ولكنه ومع ضيق العيش اضطر لعمل قدرة فول مع مستلزماتها و كان يجلس بها ليلا خارج المنزل ما ان نصله و نوقف العربة الكوبيا حتى يبادره حفيظ قائلا 4 فول مصلح البصل برة وكتر الجرجير ومع انى لا احب الجرجير فى الفول الا انى اعتدت عليه مع تلك الشلة المرحة.
فى مقبل الايام انتقلت للسكن فى منزل اجرته لى الهيئة القومية للكهرباء فى امتداد الدرجة الاولى ولا يبعد كثيرا عن الفندق. صارت جلساتنا المسائية متبادلة بين منزلى الجديد الكبير و بين الفندق.
بمرور الايام تعودت جدا على المدينة واحببتها وصرت لا ارجع للخرطوم فى الفارغة و المقدودة كما كنت افعل فلى بداية ايامى وبعد ان خصصت لى سيارة صرت اتجول باستمتاع بين احياء المدينة المختلفة.
حى الداخلة كا ن يشدنى بحميميته فعندما اذهب لمنزل صديقى الملازم عيسى اشعر كاننى وسط اهلى بمدينة بحرى فيض غريب من الحنان يغمرك وانت تدخل هذا الحى الجميل.
كنت احب جدا حى السودنة بمنازله الحكومية الكبيرة و حدائقه الغناء ولكن عندما امر امام قيادة ما سمى بالكتيبة الاستراتيجية للقوات المسلحة اشعر بنفس ما يشعر به اهل المدينة تجاهها فقد أنشأها التعيس جعفر محمد نميرى للقضاء على قوة نقابة عمال السكة حديد خاصة بعد اضرابهم الشهير فى بداية الثمانينات من القرن الماضى
الكتية الاستراتيجية كانت تمثل شوكة فى خاصرة المدينة الجميلة و تظهر الوجه الآخر لها وجه السلطة البغيض السلطة التى لم تتدخل لانقاذ العمال من الفقر المدقع الذى هوى له معظمهم ولم تتدخل لإنقاذ السكة حديد أهم و أرخص وسيلة مواصلات بالسودان وإنما تتدخل لقمع العمال وإنشاء وحدة عسكرية لتشغيل المرفق مظهريا فى حالة اضرابهم. فى ذلك الوقت كانت مظاهر الفقر و الفاقة تغطى سماء المدينة كما تغطيها رياح الخماسين. لكن الناس كانوا صابرين ومجالدين. عندما كنا نتاول طعام الفول يوميا بإحدى المطاعم فى السوق كنت أرى بعض العمال ياتون ويجلسون طيلة ساعة الافطار دون ان تلامس شفاههم اى طعام او شراب يجلسون يتجاذبون اطراف الحديث ويضحكون و كأن الجوع لا يعصرهم حتى تدوى الصفارة الثانية موعد الرجوع للعمل فيركبون عجلاتهم بسرعة عائدين للورش الكبيرة التى تبتلعهم فى صمت لان دولاب العمل نفسه كان شبه متوقفا فى تلك الفترة من الثمانينات.
قال لى احد ابناء عطبرة ان اغلب العمال يذهب للبيت ساعة الفطور فى العادة ولكنهم الآن لا يذهبوا حتى لا يشاركوا أهل البيت فى الطعام القليل لذلك ياتون للمقاهى لتمضية الوقت وربما حصل احدهم بطريقة ما على كوب شاى يسند به معدته الخاوية.
هؤلاء الناس ربوا اجيال بمجاهداتهم وتضحياتهم الكبيرة. رغم الجوع و الفقر علموا ابنائهم و خرجوهم للمجتمع مهنيين فى كافة المهن دون دعم من الحكومة بل بالعكس كانت الحكومة تحاربهم فى رزقهم فتوقف من توقف فتفصل من تفصل. هذه طينة من البشر جبلت على الصمت والتحمل لأقصى درجاته جبلت على العطاء كلما اتذكرهم احنى رأسى لهم محييا من مايزال منهم على قيد الحياة و مترحما على من فارقوها بعد حياة عامرة بحب الغير والتضحية لأجلهم.
فى وسط هذا الجو كنا نعمل بجد لانجاز محطة كهرباء عطبرة الجديدة الممولة بالكامل من برنامج العون الدنماركى " دانيدا"
المحطة القديمة كانت وضع لا تحسد عليه و بالكاد كنت تحس بوجود الكهرباء فى مدينة عطبرة. فى ذلك الوقت صارت الثلاجات دواليب لحفظ اشياء اخرى ومن كان له بعض المال اشترى تلاجة جاز و حتى هذه عانت من شح الجاز فلحقت بزميلتها ثلاجة الكهرباء.
سلآمات يا بسمات، العيد يتبارك عليك ؤُ علي مدينتنا القاطرة وعلي أهل البوست سواء مشاركين بالكتابة أو القرأة .
بمناسبة إني عطبراوي مرّت بي مواقف غريبة ؤُ طريفة عن الحبيبة عطبرة . مرّة في طريقي للسودان غشيت واحد صاحبي في دبي، أها يوم قال لي، أصحابي الليلة قالوا نجي نتعشى معاهم . مواعيد العشا مشينا علي الجماعة، اوآت ما دخلنا وأنا بسلّم علي الجماعة في وآحد لآمن سلّمت عليهو صاحبي طوالي قالو، معاوية دا من عطبرة أمسكو عليك . أها، بعد قعدنا الزول طوالي جا قعد جنبي، الجماعة طوالي قالوا، لي يا اخي الزول دا ذبحنا ذبح بعطبرة . الراجل ما اشتغل بهم الشغلة، ؤُ قبل يسألني من وين في عطبرة فضل يتحدث عن عطبرة حديث زول خبير بالمدينة . حدثني عن احياء عطبرة وعن السوق والسينمات والورش والعمال، الراجل ما ترك شئ، ؤُ ما اداني فرصة عشان اشاركو الحديث. أها، لقيت لي فُرصة قاطعتو وسألتو السؤال الكنت اتوقع يبدأ بيهو النضمي معاي، سألتو، إنت من وين في عطبرة ؟، وكانت المفاجأة التي شلتني شلل، عندما اجابني، والله الحقيقة انا ما من عطبرة، لكن قعدت فيها سنتين . غالبت وكابدت الدموع كي لا تنفلت من عيني، وشعرت بإنتمائي لمدينة تستحق منا كل الحب الذي تضج به نفوسنا نحوها .
مرّة جونا إتنين شباب في مدينة إدمنتون غرب كندا وكنت وقتها اسكن هناك، إتنين شباب سودانيين بتاعين رسم تشكيلي جو من كينيا لأقامة معرض في جامعة البرتا. بحكم إني في المدينة كنت بالنسبة لهم كالدليل، طوالي بكون معاهم . أها، مرّة مشيت لهم في البيت عشان اخُدهم للمعرض، دقيت جرس الباب ؤُ فضلت منتظر برّه، وآحد منهم جا دعاني ادخل، قتلو مافي طريقة انا برجاكم في العربية اطلعوا سريع . في اثناء ما انا قاعد، مرق خوآجة ابيض من البيت، ؤُ طوالي جا فتح باب العربية ؤُ قعد في المقعد القدآم، وبادرني بالسلآم، إزيّك يا زول !. الدهشة عقدت لساني ؤُ فضلت مبحلق فيهو، كايبوي عدييييل ؤُ بيتكلم سوداني !؟. قبل افتح خشمي قال لي بنضمنا السوداني الوآحد دا، الجماعة قالوا لي إنت من عطبرة، عشان كدا جيتك. إنت من وين في عطبرة ؟. وانا في دهشتي جاوبتو دون ما اشعر، من السيالة . الزول دا ما خلآني أخدت نفسي ؤُ راح يحدثني عن السيالة ؤُ عطبرة، والحصايا ؤُ ناس الحصايا، ؤُ حدثني عن الطليح ؤُ نهر عطبرة، والدافوري . قتلو، يا زول كدي اقيف، إنت شنو !؟. قال لي، إستغربت، مُش ؟. قتلو، كدي اللغة دي خلها، إنت العرفك بعطبرة شنو ؟. قال لي، أنا من تكساس، وزوجتي كندية إشتغلنا في معهد الأفاق الأوسع في عطبرة لمدة سنتين، ما اظن في حياتي تاني تمر علي سنين جميلة زي السنتين العشتهم في عطبرة، تصدق انا لآمن إتعودت علي شراب العرقي . الزول دا انا شطب راسي عدييييل كدا ...
مرّة شداني لقاء في الراديو مع شاب أُنتُخِب (ماير) في مدينة من مدن اونتاريو، اللفت إنتباهي للقاء سمعتو جاب سيرة السودان، قلت اشوف الزول دا علآقتو شنو بالسودان . من الحوار بينو والمذيع إتضح لي إنو زول شاب . أها، في اثناء الحوار المذيع سألو عن الفترة القضاها في السودان، وفي ايّ مدينة ؟. الزول دا قال كان منتدب في مأمورية ؤُ قعدت في مدينة عطبرة لمدة اربع سنين بعد طلب تمديد فترتو من سنتين لأربعة، ؤُ راح يكلم المذيع عن عطبرة حتي خلت المذيع حايقولوا، بلآ عطبرة بلآ مسخرة . اليوم دآك قميصي كلو إتملأ دموع .
ود المدير كل سنة وانت طيب انت يا ود المدير عطبراوي صحي صحي ...وانا المفتكراك عطبراوي قشرة... وعندي بت خالتي ساكنة هسع في الداخلة ودائما بتتكلم معاي بالتلفون وتقول لي هي اصلا ما كانت بتحب عطبرة وتحب الخرطوم وبهرجتها لكنها مما بدات تقرا مواضيع عطبرة في المنبر العام بقت تحب عطبرة وتقول لي نحن ما كنا عارفين عطبرة بالسماحة دي كلها ..وبقت تغني لي لعطبرة وتقول زي كانها عايشة في اجمل مدينة في العالم..وكمان بتقول لمن تقرا مواضيعكم دي عن عطبرة عيونها بتتملي بالدموع زي حالتك دي.. وهسع بقت عطبراوية صحي صحي... ودمت بالف خير
وكل سنة وانت طيب يا طلحة الما عطبرواي وعطبراوي يعني عطبراوي بالتجنس وما بالميلاد لانك بتعرف عن عطبرة احسن من العطبراويين نفسهم زي بنت خالتي ابتهال الما بتعرف ان عطبرة كانت عاصمة السكك الحديدية في افريقيا ودمت بخير
الأستاذ كمال حامد إعلامي معروف على الصعيدين الداخلي والعربي فقد قضى سحابة عمره وزهرة شبابه في العمل الإعلامي حتى تبوأ أرفع المناصب متنقلاً من نجاح إلى آخر ليصبح مفخرة للسودان
بدأ الأستاذ كمال حامد مسيرته الإعلامية مراسلاً للصحف السودانية من مدينة الحديد والنار عطبرة في شمالي السودان منذ العام 1966م وكان كذلك عقب تخرجه في معهد التربية بخت الرضا بمدينة الدويم
في العام 1969م عمل محرراً بقسم الأخبار بتلفزيون السودان إضافةً لعمله كمعلم بمدارس المرحلة الثانوية العامة
في العام 1975م انتقل للمملكة العربية السعودية للعمل في صحيفة عكاظ لينتقل لصحيفة الشرق الأوسط ومشرفاً رياضياً على مطبوعات الشركة السعودية للأبحاث والتسويق ,ثم مديراً لتحرير صحيفة الرياضية السعودية ومديراً لمكتب الخرطوم لمطبوعات الشركة السعودية للأبحاث والتسويق ,وأميناً عاماً لنقابة الصحفيين السودانيين ,ومديرا لمكتب الحياة اللندنية بالخرطوم ,ثم مراسلاً لهيئة الإذاعة البريطانية من الخرطوم
عضو الاتحاد العربي لكرة القدم
عضو مجلس إدارة التلفزيون السوداني
مستشار البرامج الرياضية بالتلفزيون السوداني
مدير إدارة البرامج الرياضية بالتلفزيون السوداني
مؤسس ومدير لقناة النيلين الرياضية
رئيس اللجنة الدائمة للرياضيين باتحاد الإذاعات العربية
رئيس الفريق العربي الموحد لتغطية دورات الألعاب الأولمبية أثينا 2004م,سيدني 2000م,بكين 2008م ولندن 2012م
منقول
Post: #99 Title: Re: عطبرة حضارة ورابطة المريخ بأبوظبي جدارة Author: اباذر عبد العال Date: 10-06-2015, 07:10 AM Parent: #98