كيف مع الموت عزام عبد العاطي

11:06 AM Sep, 12 2015
سودانيز اون لاين
لطفى العمده- ksa
مكتبتى فى سودانيزاونلاين



Azzam Abd Alati
كيف مع الموت ؟؟
.
.
نحن طيبييييييين
يانا زااااتنا
لسه مغشوشين
ترانا نقوم من النوم
راسنا دايش
نجري في كسب المعايش
وكل من تلقاو تسالمو
تدور تطايبو
تشوف خبيرا
يبقي جايبو
يطش يقول لك
غايتو عايش
انت كيفنك مع الموت ؟؟
حظك ارتح ..
لا مدافرة في الركوب للثورة بالنص لا كرور ..
لا دخول مستشفي بالدور
لا وقوف قدام مكاتب خمسة ساعات الفطور
بطل تقيف في صف رغيف
يازول ها كيف ؟؟
راقد تمام ؟؟
شان ود لحددك شايفو ضييق
ما اظن اضيق من اخلاق الكماسرة الساعة اربعة في تقاطع بانت اصلو
ولا هو اضيق من فصل سنة تلاتة مدرسة ابن عوف الفتح واحد ..
شفت فصلو ؟
ولا هو اضيق من ضمير مسؤول مصايب الناس مع شاي الصباح في النشرة يسمعا حتي تصلو ..
انت كيفنك مع الموت ؟؟
جاك نكير ؟؟
أها قتلو شنو ؟؟
وين صلاتك ؟؟
وين زكاتك ؟؟
نحن غايتو نكيرنا فاتك
قبل يسأل ببدا لببيع
وللا شلليت
وللا كببيع
وللا طلع معروضاتك
ياجنا ...
اسكت
سكت حسك مواطن تيييت
اقيف
اقعد
اقيف
أها وانت كيف
اسع مع الموت ؟؟
شفت ليك صيف ؟؟
الله يسألك اسي مما مت لاقنك سخانتين ؟؟
نحن برة وجوة حرين ..
والغريبة بنهوي حتة زحمة الناس والكواريك والتلووث ..
شفت في موتك تلووث ؟؟
عان بياض كفنك دا ما عنوان نضافة ؟؟
يللا قوم عاين هنا الزيف والسخافة
والكضب بالدين وتمجيد الخرافة
انت قايلا خايفة الله ؟؟
نحن ديل ال عد نخافا
وانت مييييت .. شييييك .. قياااافة
ياااا لطافاتك وانت ميت
أها
الجديد
طبعا ولا شي
تعال اقوليك وانت ماشي
- وانت ماشي دي ساي دي ماليك
انت ميت وانا بحجيك -
وانت ماشي
بتلقي ست شاي جمبها بتاع الاقاشي
عقلك الباطن بقول ليك
يللا ياخ هي قليلا رايح
- كبي جبنة بدون دوا
وسكر خفيف كباية نص بس
فجأة ..
تلقي الكرسي طاير في الهوا
- في مظاهرات ؟؟؟
- ياشيخنا قوم
الكشة جات
وكتيرا رايح في الجبايات ..
الاتاوات ..
والرسوم ..
من الله كتلك
دفععك زول حق هدوم ؟؟
زي مدرسة ؟؟
وكراس وعلبة هندسة ؟؟
حق مسطرة ؟؟
وقلمين رصاص ؟؟
وكتاب علوم ؟؟
ما كتاب علوم
انسان وكون
وفي مادة غايتو مع الموسيقي ولا بتباصر
فيها نحن وحاجة ... عاصر
خلي دا ..
مما اتلحست عييت حصل ؟؟
مالك سكتت ؟؟
عيييييييت حصصصصل ؟؟
خشيت حوادث بحري والخرطوم
وسط ؟؟
حصل اشتريت دوا مانفع شان اصلا التشخيص غلط ؟
بطل عبط
موت لي معاك
ما عااااادي سوداني انجلط
موت لينا كلنا ..
كيف
....... كدا
............. الموت
..................ما ظبط ؟؟

موت لي معاك ... زي ماقال معاويه شهيتنا الموت

كتابة جميلة يا لطفي وبأدوات بسيطة
شكرا ليك و للشاب عزام

شكرا معاويه
عاجباني البساطه
والوصف الحي