الفنان شول منوت الذي ابكاه الانفصال (تبا للذين فصلوا الجنوب)

11:26 AM Sep, 11 2015
سودانيز اون لاين
عبدالعظيم عثمان-
مكتبتى فى سودانيزاونلاين



تبا لكل الانفصالين الذي دفعوا الجنوب للانفصال
تبا لكل الذين زرعوا الكراهية ومارسوا العنصرية
كانت هنالك عدة خيارات لعلاج الأزمة الوطنية ، فاختار الساسة أسوأ الخيارات وانشطر السودان ولكن لم تنشطر مشاعر أبنائه
هاهم أبناء السودان يتفاعلون مع خبر مرض الفنان (شول منوت)..
أشار الكاتب السوداني الأستاذ : عبدالعزيز بركة ساكن. إلى خبر معاناة الفنان (شول منوت) ....

في العام 2011 نشرت صحيفة الخرطوم تصريحات منسوبة للفنان شول منوت : كان يتحدث وهو يبكي عن الانفصال ، وذكر بأنه يحس بحالة من التوهان ويتذكر أصدقائه واحبابه الذين يحسن بأنهم من رحم واحدة) .. هذا التصريح نشرته صحيفة الخرطوم في 15 يناير 2011 ..

الأخ الحبيب والعظيم عبد العظيم عثمان ..
حقيقة تألمت كثيراً عند سمعى بحالة الفنان الشاب شول منوت
الذى أبكاه الإنفصال ..
..
حقيقة أخى .. أنا نفسى انتابنى نفس هذا الشعور ..
ولهذا قمت بكتابة هذه الكلمات .. والتى أهديها لكم
و للإبن الحبيب شول منوت ..
مع خالص حبى وامتنانى ..



حرام عليكم .. ليه شرطتو الخرطة .. !!
ارنست ارجانوس جبران
حرام عليكم .. ليه شرطتو الخرطة ..!!
مش كفاية شرطتو عينا .. جبتو لينا جلطة ..
بالمناسبة .. جيتكم دى للحكم .. كانت أكبر غلطة ..
مش أول ما جيتو .. كتلتو مجدى محجوب .. وجرجس الطيار .. وبعَدُم .. برضو سال الدم أنهار ..
ومنهم و قبّال 8 سنوات بالضبط .. كانوا شهدا كجبار .. الشباب الطيبين فى منطقة النوبة فى الشمال ...
قايلنها شطارة ..
قايلنها شطارة ..
قايلنها لعب كورة شراب فى الحارة ..
حارة .. ومحارة .. وسيجارة .. إياك اعنى واسمعى يا جارة ..
فاكرين لما تزيدوا فى الضغط .. وتتمادوا فى الغلط .. الشعب حيسكت ولا حيرقد لط ..
فى الحقيقة .. انتو قاعدين وما عارفين حاجة .. لو مافى سلام .. حيكون جوع و قحط ..
ما انتو قلبكم جافى .. قاعدين فوق الكراسى .. ما جايبين خبار العريان الماشى حافى ...
ولى حسه دى .. نازلين رش .. فى البشر .. بالطيارات فى دارفور ... فى كردفان ..
وفى كل مكان .. لا بهمكم .. وطن .. ولا إنسان ..
يا حليل وطنا حق زمان ..
يا حليل خرطتنا حقت زمان ..
يا حليل سودانا حق زمان ..
سودانا .. اللى كان .. أيام كان ياما كان .. اللى كان بيحكى بيهو فلان و فلتكان ..
سودانا .. اللى كانت خرطتو .. تملا العين والكيان ..
حسدونا الناس عشان الخرطة السمحة ..
حسدونا الناس .. عشان اللمة السمحة ..
من قمنا .. تبينا ربينا على شكل خرطتنا السمحة ..
كل يوم فى حصة الجغرافيا .. ياها الخرطة .. حفظناها حفظ ..
بقت محفورة فى الوجدان .. وما ممكن تمّحِى .. ولا تتنسى .. حتى ولو عجزنا .. وأصابنا مرض النسيان..
ياها خرطتنا .. محفوظة فى الوجدان .. .
والتاريخ يحكى .. وجدودنا يحكوا .. وحبوباتنا يحكن ..
كيف كان سودانا .. سودانا حق زمان ...
لاكين .. جو ناس الحاسد الذى حسد ..
جابو مقص كبير .. قصو بيهو الخرطة .
حسة .. بقى شكلها .. كيف كده .. حرام عليكم ..
حرام عليكم .. شرطتو الخرطة .
حرام عليكم .. بوظتو الخلطة .
حرام عليكم .. جبتو لينا جلطة ..
بقيتو .. بقيتو فى الحلقوم ظلطة .
مرة تانية .. جَيّتكم دى كانت أكبر غلطة ...
قعادكم بقى حراق ..حراق بالحيل ..بس شطة
والقليب الصغيرون ..
.. القليب الصغيرون حزنان .. ممكون .. ..
صحى .. هو قليباً .. صغيرون ..
لاكنو .. لاكنو وحاتكم .. هو كبير بالحيل .. شايل فيهو سودانا بخرطتو القديمة
قبال ما يقصوها .. قبال .. سودانا .. قبال ما يصغروهو .. قبال ما يشرطو خرطتو السمحة ..
قبال ما يبوظو سمعتو .. قبال ما يشوهو شكلو ..
الله يسامح اللى كان السبب ..
بصراحة .. ما بقدر أنوم .. لما أتخيل ..
نص السودان اللى تحت .. مافيش ..
ما قادر اتصور خرطتو المقطوعة ..
شكلها بقى شين بالحيل .. يعنى دينق وينو .. ووين ملوال ..
وصديقنا منقو زمبيرى .. الدرسونا ليهو.. ياهو.. صديقنا حق زمان .. راح وين ..
يعنى حسى دى أهل منقو زمبيرى .. ما ممكن يتلاقو مع أهل صديق .. صديق صديقنا اللى كان فى القولد ..
يعنى حسه .. خلو ناس الجنوب .. ما يتلاقو مع ناس النوبة اللى فوق ..
عليكم الله .. عليكم الله .. بدل ما يخلو ناس الجنوب يعرفو حضارة الشمال .. وين حضارة النوبة .. وين اهرامات النوبة ..
يا حليلك يا حبوبة .. لو كنتِ عايشة .. ما كان برضيك .. حالنا المايل دا ..
لاكين نقول شنو .. أيوه .. لازم نقيف و نتكلم ونقول .. ونسألُم ؟؟؟ ..
يا اخوانا .. ليه .. ليه .. شرطتو الخرطة .. ؟؟.
يا اخوانا .. ليه فصلتو الجنوب عن الشمال ..؟.
ليه .. شينتو داك .. الجمال ؟؟..
لما أعاين فى الخرطة حقت حسه .. أشعر بشعور .. غريب ..
أشعر .. أنا غريب .. آى .. أنا خجلان .. شاعر كده .. أنا بقيت عريان ...
بجد ..أنا شاعر .. انو .. أنا .. ما لابس سروال ..
آى .. أنا شاعر .. بقيت عريان .. بدون سروال .. وكمان سودانا ..
بقى عريان وبدون سروال .. يغطى نصو التحتانى ..
يا ناس فضحتونا .. خليتو الناس تقول كانى ومانى ..
يعنى شوية .. شوية .. يجيو مقصهم الكبير داك .. ويقصو حته تانى ..
الله يسامح اللى كان الجانى ...
آى .. يمكن الليلة دى يقصوا دارفور .. وبكره دى يقصوا كردفان ..
يعنى فى النهاية .. يكونوا قاعدين مبسوطين .. فى الخرطوم .. مبسوطين نايمين نوم ..
.وما عارفين .. قُعادم دا بقى .. شوكة فى الحلقوم ..
يا حليل سودانا حق زمان .. أيام ما كنا صغار وكنا نكُدَ الدوم ..
.. آه .. آه .. من وين ديل جونا .. قطعوا علينا قعدتنا .. شربتنا لجبنتنا .. حتى ما خلونا نخلص فناجينا ..
وجينا جايين .. عشان تفرقتهم فى الدين .. قطعوا علينا أحلامنا .. وطموحاتنا .. جينا لبلاد الحرية .. وياها الجية ..آه .. آه ..
ما علينا .. نرجع لموضوعنا ...
يعنى نسأل و نقول تانى .. وين باقى الخرطة .. وين بحر الجبل .. وين نمولى .. وين جنقلى ومشروع جنقلى ..
فى حاجة ناقصة .. فى حاجة نافصة .. وين المويه .. اللى جاية ..
من بحيرة فكتوريا .. خلاص انقطعت .. لا مويه .. لا سمك ..
.. لا سمّاك .. عملتوها .. وبقيتو تتاوقو من الشباك ..
آى .. لا موية .. ولا سمك .. خرطتكم بتقول كده ...
خرطة شنو .. الخرطة .. بقت كده صلعة ....
يا جماعة .. الواحد يعمل شنو .. نقول شنو ..
يعنى الواحد يكورك .. ولا يجيب ليهو كوريك .
يخمخم جواهو .. القليب المكتول كمد ..
القليب المصرور جواهو سودانا .. حق زمان ... ..
آآى ..سودان حق زمان .. لساتو .. مصرور جوه القليب ..
أآى أقول كمان .. بحبو .. بحبو .. وبحب ناسو حقين زمان ..
لكنو لساتو صابر .. وممكون .. ومكتول كمد .. ..قليباً .. محروق
ناس كتار ما بصدقو .. بيقولوا .. دا مجنون .. يا ناس وينُم ناس حَمد ..
ما قلتليكم .. القليب مكتول كمد .. ياهو .. أنا الزل زاتو اللى كان ساكن فى بحرى حلة حمد
لما اتذكر وأحكى .. وأحكى ليهم سودانا حق زمان .. كان كيفنو نقول شنو بس ....
وكيف كانت القعدات .. كيف كانت الشيات .. والمنقد والكانون ..
وكيف كان الفانوس .. وقراية الفانوس ..
والعلم اللى كان فى الدقنوس .. !! .. وكتاب المطالعة والمحفوظات ...
مع غنمى ترعى .. وسط المرعى ..
ونحن إذا جاء المطر ..
نجرى ونلعب بالزهر .. ..
وكريت مالا .. أبت الرجوع للبيت ..
وبيت الجاك .. وما أدراك .. بالبيت الذى بناهو الجاك ..
يانا نحنا ناس البروش .. القرينا فوق البروش .. واتعلمنا .. وكتبنا الحروف فوق الأرض ..
وفى حصة الأعمال .. كنا نعمل بالطين .. ونلعب بالطين .. ولمن نرجع البيت .. نرش الحوش ..
وتتلم أجمل لمة .. لمة ضيوف الحوش المرشوش ..
وبيغادى .. ناس المزارع .. البسموها البلاد .. وناس هناك .. قاعدين يحاحو فى الطير ..
وناس الحفير .. مع الحمير .. لساتم بيقولو فى الدوباى .. حق زمان .. ..
آآى ..أنا لما أتذكر .. كيف كنت أقعد أتحكر .. فوق البمبر ..
حارس الشاى .. لمان يغلى فوق كانون الجمر .. أنفخ فيهو .. ولا أجيب ليهو هبابة .. أخلي ليك الجمر يبقى لونو أحمر .. واللبن المقنن .. يا ولد خلى بالك من اللبن .. أوع يفور .. يدفق .. عارف لو دفق .. بجى اقطع راسك .. بالمناسبة أقطع راسك دى من عندى أنا .. لأنو أبوى الله يرحمو ما كان يطلع ليهو كلمة بطالة .. بس لما نغلط .. كان يقولى .. يا غبى .. سمح يا ابوى .. آى الشاى باللبن المقنن .. نشربو .. ونقعد تفنن ..
تكتب ليك قصيدة عن بت سمحة قاعدة تتحنن .. تتجهز لعرس بكره .. والفنانين .. والدلوكة والرقيص .. رقصة الحمامة .. أبشر يا عريس .. والزغاريد .. وقطع الرحط .. والشباب اللى بِعرض .. والجرتق .. والدلكة .. والخُمْرَة .. وحفرة الدخان .. والحِنة .. والعروس المُكبرته .. ونحنا يانا نحنا .. نحنا فى وادى وناس البندر فى وادى آخر .. ..
وناس البندر قالوا عايشين فى المدينة .. عندهم كهربه .. لاكين .. ديمة قاطعة ..
عليكم الله شيلو كهربتكم دى .. ما دايرنا . .
وجيبوا لينا رتاينا .. وفوانيسنا .. وكوانينا ..
دايرين ناسنا حقين زمان .. بطيبتم .. وبونساتم .. يا حليلم ..
يا اخوانا ..
دايرين ناسنا حقين زمان ..
دايرين سودانا حق زمان ..
وكمان .. رجعوا لينا خرطتنا حقت زمان ..
وناسنا حقين زمان ..
مره تانية .. ومرة تالتة .. يا حليل سودانا .. بلاد النوبة .. وحضارة النوبة .. و دارفور .. و يا حليل كردفان و جبال النوبة .. لاكين انتو يا ناس الحكومة أرجوكم .. أرجوكم ما تشرطوا الخرطة تانى .. ياريتكم تلصقوها .. عليكم الله رجعوها لينا تانى ..آ آى رجعوا لينا خرطتنا القديمة .. يعنى جيبوا لينا الجنوب .. ويبقى الشمال مع الجنوب حته واحدة .. وبطلوا الحرب فى الغرب .. مع ناس دارفور وكردفان .. والجبال .. والسودان يرجع زى ما كان زمان .. دايرين سلام .. ووئآم .. نوقف بيهو نزيف الدم .. وخلونا نتلم .. مرة تانية .. من فضلك يا حكومة .. من فضلك يا حكومة .. دايرين سلام .. يعم السودان كله .. وبطلوا تقطيع وشِرّيط فى الخرطة .. قربتو تجيبوا لينا جلطة .. أنا خلاص بقيت بالحيل مرضان ...
خلاص .. انتهى البيان .. الإمضاء .. العجوز الكحيان .. الهايم بحُب السودان .. ارنست ارجانوس جبران
التاريخ 13 يونيو سنة 2015
+++

Quote: الأخ الحبيب والعظيم عبد العظيم عثمان .. حقيقة تألمت كثيراً عند سمعى بحالة الفنان الشاب شول منوت الذى أبكاه الإنفصال .. .. حقيقة أخى .. أنا نفسى انتابنى نفس هذا الشعور .. ولهذا قمت بكتابة هذه الكلمات .. والتى أهديها لكم و للإبن الحبيب شول منوت .. مع خالص حبى وامتنانى ..

سلامات الأستاذ / أرنست
شكرا لكتابتك الصادقه التي تخرج من القلب وتلامس الوجدان
هؤلاء قوم لا يعلمون شيئا عن الوجدان السوداني الموحد الذي دفع الجميــع
للتعاطف العفوي مع الفنان شول منوت الذي اسأل الله له الشفاء العاجل

عاجل الشفاء للفنان " شول منوت"

في العام 2009 طالب الزميل الجميل جمال السنوسي بالتصويت لهذا الفتي الأبنوسي
في برنامج نجوم الغد .....
http://sudaneseonline.com/msg/board/240/msg/1248383979/rn/1.html

كتب الزميل علي دفع الله في بوست الدكتورة وضاحه عن الحالة الصحية للفنان شول منوت :

Quote: الاخت الكريمة الدكتورة وضاحة الاخوة الزملاء الكرام ذهبت الى الى الاخ شول في المستشفى ووجدت وضعه الصحي تعبان شديد ومحتاج الى دعمكم ووقفتكم عاااجلا. الاخ شول يعاني من عدة امراض وعلى حسب كلامو معاي هو في تحسن واستجابة للعلاج وذكر لي انو مرتاح في المستشفى فقط يحتاج الى الدعم واتحدث انو وجد التعاون من المستشفى والاطباء والممرضين والعاملين. وطرحت عليه امكانية نقله الى الخرطوم او مدني ايضا رفض وسالتو ان اتصل عليه اي شخص من قناة النيل الازرق او برنامج نجوم الغد ذكر شول انه لم يتصل به اي شخص من القناة او البرنامج. وجدت معه بعض الاخوة العازفين و مطربة محلية من سنار في زيارته ايضا ذكر لي ان معتمد سنار اتصل عليه ووزير الصحة بولاية سنار -------. وعدته ان له اخوة من داخل وخارج السودان يريدوا ان يمد له يد العون وافق وشكر الخطوة . حاولت ان احري معاه حوار مصور ويكون في شكل مناشدة ورسالة تطمين لكل من سال عنه لكنه رفض واحترمت رغبته. بديت انا ومجموعة وحا اتواصل مع شارع الحوادث سنار لكي نوفر له التزاماته ونهيء له جو الرعاية . اتمنى السلامة للاخ شول مودتي واحترامي

الفنان الشفيف شول منوت يتغني برائعة التيجاني حاج موسي
أمي الله يسلمك

عاجل الشفاء للفنان شول منوت

سلامات جميعآ ...

* بالنسبه لشول منوت شفاه الله وعافاه ... وحسب متابعتي لاحد المذيعين أن مجموعة شارع الحوادث اتصلت بشول منوت بمستشفى سنار - الذي يرقد فيه - ونسقت علي ان يتم ترحيله للخرطوم لتلقي العلاج ... واحدي الناشطات نشرت رقم هاتفه المباشر .
كل الخير للجميع ،،، * وشفى الله شول منوت .
http://www.gulfup.com/؟dfbv2o

---------------
الإنسانيه لا تتجزأ .

Quote: سلامات جميعآ ... * بالنسبه لشول منوت شفاه الله وعافاه ... وحسب متابعتي لاحد المذيعين أن مجموعة شارع الحوادث اتصلت بشول منوت بمستشفى سنار - الذي يرقد فيه - ونسقت علي ان يتم ترحيله للخرطوم لتلقي العلاج ... واحدي الناشطات نشرت رقم هاتفه المباشر . كل الخير للجميع ،،، * وشفى الله شول منوت .

سلامات أيمن الصادق
عاجل الشفاء للفنان شول منوت

والتحية لمجموعة شارع الحوادث

نسأل المولى أن يشفيه الشفاء التام

شكرا لكل من تناول هذا الموضوع

الحيوى والهام لعلاج هذا المبدع

Quote: نسأل المولى أن يشفيه الشفاء التام شكرا لكل من تناول هذا الموضوع الحيوى والهام لعلاج هذا المبدع

سلامات جمال خضر
عاجل الشفاء للمبدع شول منوت

Quote: Alfatih Mosa · كردفان شول منوت رمز لوحدة السودان التي ضاعت بافعال البعض الذين مزقوا الوطن ..... يجب دعم شول والوقوف الى جانبه في محنة المرض والله يشفيه

شكرا الفاتح موسي

نعم هو كذلك هو رمزا للسودان الموحد
شول منوت هو رمز وشموخ هذا الوطن الذي قسمه الساسه
شول في وطنه وبين أهله

عاجل الشفاء

نتمنى للعزيز شول منوت شفاءً عاجلاً


وكلنا معك يا شول


تقوم بالسلامة انشاء الله


لا شمال بلا جنوب ،،، ولا جنوب بلا شمال


تحياتي

دعونا ندعو الى الله عز وجل دعواتٍ ... وإن شاء الرب سيستجيب ..

يا إلهنا الصالح .. نطلب منك أن تمد يد الشفاء الى إبننا الحبيب
شول منوت .. والذى هو طريح الفراش .. يا ربنا يسوع المسيح
وأنت الذى كنت تسير وسط الجموع تصنع خيراً .. تشفى المرضى
وتشفى منكسرى القلوب .. فاهو أبنك شول منوت .. فهو مريض ومنكسر القلب
أيضاً .. يحتاج الى لمسة شفاء ..
فأنت يارب .. أنت الذى أقمت لعازر من الموت .. والمفلوج الذى كان طريح الفراش
لمدة 38 سنة .. أقمته .. وقلت له احمل سريرك وامش .. وأرملة نايين والذى كان
لها ابن وحيد محمول على النعش .. كانت تبكى .. فتحننت عليها .. ولمست النعش ..
حيث قلت :" أيها الشاب لك أقول قم " .. وجلس الميت وابتدأ يتكلم .. فدفعته الى أمه .. وأنت
الذى فتحت عينى المولود أعمى ....
وكم .. وكم كنت تصنع المعجزات .. فنحن بنو البشر لا نستحق حبك العظيم هذا .. لأننا ممتلؤن خطايا و نجاسة ..
هذه النجاسة التى تحجب وجهك عنا .. ولكن يارب وعلى الرغم من كل هذا .. أنت إله رحوم وعطوف ..
و نحن نؤمن تماماً .. أنت لا تعاملنا بالمثل .. ونحن نعلم أيضاً .. أنت يارب لا يستعصى عليك أمر ..
فأنت الذى تقول كن فيكون ..

فها أنت يارب .. الذى كنت تجول تصنع خيراً .. نصلى اليك يارب .. هذا هو ابنك شول منوت ..
" لكن قل كلمة فقط فيبرأ غلامى " .. كما قالها قائد المئة .. نعم يارب ..
قل كلمة يارب ليشفى هذا الغلام .. ويترك فراشه ويمضى الى أهله وذويه واصدقائه ..

يارب .. يارب .. ارحمنى أنا الخاطئ .. ارحم ضعفاتى ..
ولتكن ارادتك يارب ..
عبدك الخاطىء الذى لا يستحق بنوتك .. وكما قالها العشار .. قارعاً على صدره ..
" اللهم ارحمنى أنا الخاطئ " .. نعم يا أبى السمائى .. أنا لست مستحقاً أن أدعى لك ابناً "
ولكن على الرغم من كل هذا .. أنا الآن أقف أمامك اصلى إليك يارب أن تشفى ابنك
شول منوت .. يارب .. يارب .. يارب ..
عبدك الخاطئ ..
ارنست ارجانوس جبران
+++

Quote: نتمنى للعزيز شول منوت شفاءً عاجلاً وكلنا معك يا شول تقوم بالسلامة انشاء الله لا شمال بلا جنوب ،،، ولا جنوب بلا شمال تحياتي

نتمنى الشفاء للفنان شول