حسب تعريف شهاب كرار لليبرالي أخدت الدرجة الكاملة

04:27 PM Sep, 04 2015
سودانيز اون لاين
أبوبكر عباس-الإمارات
مكتبتى فى سودانيزاونلاين



حسب تعريف شهاب كرار لليبرالي أخدت الدرجة الكاملة
تسعة من تسعة
تشغلني هذه الأيام سيرة شهاب وأثناء المقوقلة وجدت هذا لعادل عبد العاطي يناقش فيه كتابات لشهاب عن الليبرالية:

"كيف يمكن ان نعتبر الانسان ليبرالي؟

نقول ان الانسان ليبرالي اذا انطبقت عليه الشروط التالية:-
1. يحترم خيارات الاخرين ولا يتعصب لموقفه الفكري.
2. لا يقول إن من ليس معنا هو ضدنا، بل يعتقد ان وجود الاخر المختلف عنك هو ضروري لوجودك ونموك واستمرارك انت نفسك.
3. الليبرالي ليس عنصريا، ولا يفرق بين الناس بسبب اللون او الجنس او العقيدة او الاصل الاثني او الاصل الجغرافي او الثروة الشخصية او الوضع الاجتماعي.
4. ينادي بمبدأ سيادة القانون وفصل السلطات.
5. ينادي بإحلال الدولة المدنية مكان الدولة الثيوقراطية او الاوتقراطية ويرتضي الديموقراطية كخيار وحيد للحكم.
6. ينادي بحرية الفكر وحرية الصحافة وحرية البحث العلمي.
7. يقول ان الافراد مسؤولون عن تصرفاتهم فرادى، لذا ينمي حس المسؤولية الفردية لديه ولدى المجتمع.
8. يقول ان الاعلان العالمي لحقوق الانسان و غيرها من المواثيق الدولية الخاصة بحقوق الانسان والمرأة والطفل والبيئة هي خلاصة ما وصل إليه الفكر البشري بعد الاف السنين من الحروب والمذابح والصراعات والاضطهاد الديني والعرقي والمذهبي، لذا ينادي بالحفاظ عليها وإحترامها افرادا ودول والعمل علي تطويرها من اجل إكتساب المزيد من الحقوق.
9. لا يستخدم العنف في نشر افكاره مهما كان السبب، ويدعو الي السلم في كل الاوقات"

تمانية من تسعة يا بكّور أو تمانية ونص على أحسن الفروض
نمرة واحد يستحيل تجيب فيها النمرة الكاملة وانت جنّك تشكّك في معتقدات الآخرين. وكمان بتهدّد بيها :)

Quote: 1. يحترم خيارات الاخرين ولا يتعصب لموقفه الفكري.

صاح
وبعد الإحترام نحاول نبين ليهم ضلال فكرهم بالسخرية المرحة والدليل حب الوهابيين لي وعلى رأسهم عماد حسين

عشان كدا أديتك النص
خلاص تمانية ونص

Quote: تمانية من تسعة يا بكّور أو تمانية ونص على أحسن الفروض نمرة واحد يستحيل تجيب فيها النمرة الكاملة وانت جنّك تشكّك في معتقدات الآخرين. وكمان بتهدّد بيها :)

أبدا يا بشرى،
لا أرضى بغير النمرة الكاملة
التشكيك من حبي ليهم ودايرم يضوقوا حلاوة الحقيقة وإطلاق الحرية للعقل.
بهدد بيها دي ما عارفها كانت وين، كدي جيب لي مثال يمكن نلقى ليهو مخارجا

Quote: 2. لا يقول إن من ليس معنا هو ضدنا، بل يعتقد ان وجود الاخر المختلف عنك هو ضروري لوجودك ونموك واستمرارك انت نفسك.

دي طبعا برضو تنطبق علي وحتى الجزء الأحمر أراهو فيهو حب نفس وأفضل تغييره إلى:
وهو حق له ختى لو كان يؤثر سلبا على استمراريتك

وبكدا باخد فيها واحد ونص

Quote: 3. الليبرالي ليس عنصريا، ولا يفرق بين الناس بسبب اللون او الجنس او العقيدة او الاصل الاثني او الاصل الجغرافي او الثروة الشخصية او الوضع الاجتماعي.

برضو النمرة الكاملة
مشيت مع أمي عرس زميلة لي في رفاعة والعريس زغاوي، ونحن في البنطون أمي قالت لي: ما لو العريس التقول فيهو عرق؟
كنت في اللحظة داير أمدي ليها ببسي، رجعت يدي لورا وقلت ليها: هسع يا حاجة، الفيهو عرق العريس دا ولّ إتّي وقعدت أوصف ليها في ملامحها الافريقية التي أورثتني ليها من سواد قاتم وأنف أفطس وشفاه غليظة، فرمالتها الوحيدة للخروج من الأفرقة هي شعرها الناعم وجدها أبو أمها الكان عمدة قرى غرب شندي الحسن ضبعة
قالت لي: كدي جيب الببسي دا، وبعد شفطتت بقة تنرفزت قائلة، يا ريتنا البوم داك بدل نوديك المدرسة كان نخليك مع أبوك تعبي البصل، كريه ونريه.

فيكم زول قاعد يوري أهلو حقائقم؟
النمرة الكاملة يا بكور

ياخي في واحد من بوستاتك البتحجّينا فيها قلت كان ما جيت لقيت عشرة مداخلات ح تقوم تشكّكنا في الدين او حاجة قريبة من كدا :)

بالنسبة لسؤال فيكم زول بوري اهله حقيقته, مرة في اجتمع عندنا كمية من اقرباءنا مقيمين في دول مختلفة ما بين الخليج و امريكا واستراليا جو يسلموا على ابوي اها ناس امدرمان بقى لمّا يتلموا و السيرة جات حاولت اعمل فيها لبرالي عينك ما تشوف الا النور :)

بس ينقصك الانتظام في مصفوفة أحد الاحزاب اللبرالية .. و عندك
خيارات كثيرة و متعددة الايام دي.. فشنو ؟ الحق السوق ..

و عفيناك من الامبلمنيشن علي ارض الواقع و كدا و ذلك لاعترافك
بانك برجوازي صغير.. و دي محمدة عالية النبرة على ما اعتقد رغم
انه معاوية الزبير ما بمشيها ليك بالساهل..

ارقدوا عافية..

من خلال معرفتي بيك فانا اتهمك بانك بتميز بين الناس على اساس الجنس!

حيث انك بتعامل البنات بلطف اكتر من الاولاد

لو نكرت بديك امثلة :)

Quote: بس ينقصك الانتظام في مصفوفة أحد الاحزاب اللبرالية .. و عندك خيارات كثيرة و متعددة الايام دي.. فشنو ؟ الحق السوق .

من أكتر من سنة مقدم طلب للإنضمام لحزب الخضر السوداني، وما جاني رد حتى الآن!
ممكن يكونوا مزحومين وكدا، بننتظر
سنة ما كتيرة

دا يا خالد اسمو التمييز الايجابي، وبيمارس مع المجموعات الواقعة تحت تمييز حالي أو خرجت منه حديثا

كلو ليبرال بي حلاتا ما عرفنا السمحة ياتا الحمدلله سحبتا البيبسي بس من الحجة مرة شفت فلم هندي ليبرالي حصل نفس الموقف جدع أمو من البنطون ونطا وراها انقذها

إعمالاً للمبادئ الليبرالية الواردة في النقاط ( 1) و ( 2 ) و ( 3) من كتاقوري الحركة الليبرالية اعلاه التي نجحت بها يا بكور بالنمرة الكاملة.. ننشر لك التساؤل او المناشدة التي بالاسفل :/

Quote: Atif Omer Mohamed Ali تناولت تعقيبي عليك بالسخرية واوردت عبارة لا تليق بالرجرجة والدهماء ناهيك عن (رجل)* يدعي الليبرالية!!! * عبارة الردحي (كاتيقورياً) تضعك في مصاف اعداء النساء ...لانك وصفت بها رجلاً اردت معايرته بصفة انثوية!! فديل نقطتين بي (حجر) واحد يخصموا من رصيدك (الصفري) ..وتطلع بي قد القفة!! ما جاوبتا لينا السؤال يا (ولدنا)...بتعرف سوق الآخرة!! أعجبني · رد · 5 سبتمبر، 2015 11:45 صباحاً

وجزاني الله خيراً ،،،

سلام لحيدر الزين المجزي عند الله خير،
ومن بعد للفيسبوكي عاطف عمر
أما بعد،،
وصلنا إحتجاجكم عن تشبيهنا لكم بالرداحة وهي صفة أنت لصقتها بالاخوات شقايق الرجال وأردت أن تدخلنا في خانة أعداء المرأة والمقللين من شأنها وبالتالي إخراجنا من واحة الليبرالية التي نتشدق بها؟؟
للإجابة عن هذا المطب خلوني أول شيء أشوف الليترشال ريفيو بتاع الردحي والرادحات حسب موسوعة بكري أبوبكر التي لم تترك شاردة أو واردة من الأدب الشعبي وإلا دونته.
شوفو معاي العلامة سيف اليزل برعي قال شنو يوم واحد سبعة ألفين وتسعة:

"الردحى لمن لا يعرفونه هو طريقه من الطرق الكثيره التى تستخدمها النسوان فى حروبهن ونزاعاتهن
وهى طريقه تعتمد اساسا على استخدام فنون اللغه من سجع وطباق ومقابله لاعطاء الكلمات معنى اكثر قوه .......
وهذه الكلمات بدورها منتقاة بعناية من قبل الرداحه لتؤكد علو مكانتها
أو لتحط من قدر اخرى وهو ما يجعله ضربا من ضروب
الفنون تشتهر به الرداحات ويتميزن به عن باقى النسوان ( البجم) اللاتى لا يستطعن الدفاع عن انفسهن .
وللحقيقة وخلال تجوالى فى العديد من البلدان عربها وعجمها
لم اجد شعبا له هذه الممارسه او ال (flow ) او حتى مثلها من
حيث ال (free style ) ماعدا فى مصر فهى موجوده ولكن ليست بنفس الجوده.
وأذكر فيما أذكر قديما انه كانت تسكن فى حى قريب
من حينا (رداحه) من فطاحل الرداحات وفوق
كونها كذلك فقد كانت ضخمة الجثه سميكة الجلد
وافرة اللحم والشحم كبيرة العظم واسعة الحلقوم
كبيره البلعوم لها جنازير صوتيه بدلا عن الحبال الصوتيه. كانت هذه المرأه (فتوة) النساء
فى ذلك الحى لذا فكثيرا ما كانت النسوه يلجأن اليها لتأخذ بثأرهن بيد انها كثيرا
ما كانت تنفجر اذا شاغلتها احداهن بكبر حجمها ف(تغز) احدى يديها فى وسطها
والاخرى ملوحه بالمفراكه فتردح مفتخره :
· ماتقيفى فى الزلط وتتكلمى غلط
· الكهرباء فى السلوك والطماطم فى السوق ........... ما بنرفع الحاجب
وبنقوم بالواجب
· نحن نحمد الله الغدء ضأن والتحلية برتكان ....
العشاء حمام والتحلية شمام ....
مليانييييييييييييييييين يا انتى لا كوع يقد الوساده ولا ساق
يضبح الجداده .... نحن تربية بيت وفرش موكيت
· هيييييييييييييييييييييها اسمعينى انتى يا التبش البقى يمش يا ابره مصديه تحت الحيطه مرميه
· حليلكم انتو يا ناس الاشلاق يا الماسمعتو بالسيريلاك نبببببببببببببببره ونستبره وما نسكن جبره
· بشششششششتنه والناس ممتحنه ...."

Quote: للإجابة عن هذا المطب خلوني أول شيء أشوف الليترشال ريفيو بتاع الردحي والرادحات حسب موسوعة بكري أبوبكر التي لم تترك شاردة أو واردة من الأدب الشعبي وإلا دونته.

اها ... شفنا وقرينا..
ولقينا التعريــف ياهو زاتو التعريف

اي اضافة والا تسقّف على كلام عاطف عمر :)

بالله صاحبي بكور المسغف دا قاع يقرا
كلآم الرداحات ! عجبي ...