Post: #1
Title: سلامتك يا حاتم عبدالمنعم
Author: abdalla elshaikh
Date: 09-03-2015, 00:51 AM
00:51 AM Sep, 03 2015
سودانيز اون لاين
abdalla elshaikh-MEMPHISE-TN-USA
مكتبتى فى سودانيزاونلاين
سلامتك يا حاتم عبدالمنعم
صديقنا حاتم عبدالمنعم لزم سرير الجراحة بقاهرة المعز .. فسلامتك يا حاتم ياصديق
|
Post: #2
Title: Re: سلامتك يا حاتم عبدالمنعم
Author: abdalla elshaikh
Date: 09-03-2015, 01:14 AM
Parent: #1
قوم يا حاتم يا خي نغشي زهرة البستان ومِنّها نمشي لحلوان لزوم نأكل أصابع دجاج بالشطه علي طريقة ياسر بسطاوي وضحكات ابوقصيصه ونطرب مع عباس حمزه وهو يغني في عزّ الليل وننكأ جراح تعذيب بيوت الأشباح مع ناس ياسر حامد وعلي العوض و زين الطيب عثمان و عبدالرحمن الزين والجرف الصبور احمد راشد !!! فيا حليلكم دوام بطراكم وبطري مسعود وعبدالمنعم سيداحمد والرفيق محمد سعيد
نواصل!!!!!!!!!!!!
|
Post: #3
Title: Re: سلامتك يا حاتم عبدالمنعم
Author: abdalla elshaikh
Date: 09-03-2015, 01:36 AM
Parent: #2
كل هؤلاء الشباب وقتها نثرتهم مروي بذور إغتراب في بداية التسعين بعضهم يداوي جراح التعذيب والعسف النفسي وبعضهم يقصع جرّة الحرمان من العيش الكريم داخل الوطن فآوتهم شقة بائسة بحلوان أشبه بالزنزانه ولكنهم جملوها بالضحك والماء الزلال فكان يغنيهم مزمل زكي عيسي أغنية واقف براك والهم عصف ويحكي لهم سامي سالم حكاوي الشيخ إسماعيل صاحب الربابه ويغشاهم طارق كرف بالسائل المزيل للكآبه شريطة أن نلتزم بدفع التكلفه والتي غالباً لانلتزم بها فينوء كاهل طارق كرف بالديون
فيا حليلكم دوام بطراكم وبطري بتول كندري و سكينه كمبال وسلمي الشيخ سلامه والاسباط
|
Post: #4
Title: Re: سلامتك يا حاتم عبدالمنعم
Author: abdalla elshaikh
Date: 09-10-2015, 11:15 PM
Parent: #3
تذّكر يا حاتم لامن الواحد يكسر رُكبه في حلوان ؟ يا النبي نوح!! طبعاً يا جماعه حلوان بتبعد عن وسط القاهرة لمسافة ٤٥ كيلو متر فيعني لو ما عندك عشره صاغ حقت الباص والجماعه فاتوك فخيارك الوحيد كسر الركبه وإجترار الصبر لأنو الشقه لا فيها تلاجه ولا يحزنون إذ عليك بماء الماسوره والجوع الكافر إلي أن يبعث الحظ إليك واحد من نص البلد عند منتصف الليل!!! وبعد مرّات لامن يكون حظك سيئ ستكسر ركبه لمدة يومين فيسأل عنك حسن بندي ناس قهوة زهرة البستان فيتذكرون إنّك كاسر ركبه في حلوان فيرسلوا من يجيب الخبر!!!
|
Post: #5
Title: Re: سلامتك يا حاتم عبدالمنعم
Author: abdalla elshaikh
Date: 09-25-2015, 06:31 PM
Parent: #4
و حسن بندي دا يا جماعه زولًا إسمو تاني و رسمو تاني زول بيحلم بتحقيق دوله إشتراكيه في بلد سمّاهو حمّيد [نادوس يا وطن الغلابه] فحسن بندي كان يرابط بمقهي زهرة البستان من أجل أن يفك أسرنا من قيمة الشاي الذي نشربه!!!! فنم قرير العين صديقنا حسن بندي في سريرك الأبدي و لا تحزن فالعازة أنجبت طفل قاسي العيون
|
Post: #6
Title: Re: سلامتك يا حاتم عبدالمنعم
Author: عبد المنعم سيد احمد
Date: 09-25-2015, 07:52 PM
Parent: #5
دعواتنا الصادقة للاخ العزيز
حاتم عبد المنعم
شدة وتزول يازول يارائع
وكل سنة وانتم بخير وعافية
واعيادكم سعيدة
ياناس حلوان الزمان
هوى سلام
|
Post: #7
Title: Re: سلامتك يا حاتم عبدالمنعم
Author: abdalla elshaikh
Date: 09-30-2015, 11:56 PM
Parent: #6
منعم يارايع فينك إنت وفين صديقنا مسعود وشقة عم أحمد وقفشات بكري !! طبعاً حلوان دي ذاكرة منفي لن تُنسي
|
Post: #8
Title: Re: سلامتك يا حاتم عبدالمنعم
Author: abdalla elshaikh
Date: 10-01-2015, 01:06 AM
Parent: #7
تذّكر يا حاتم كوارع ياسر بسطاوي القاطعها من راسو بسبب فقرنا المادي ويا له من فقر إذ باعد بيننا وبين أصحاب النادي السياسي فكٌنا أصحاب قرارنا السياسي!! فكوارع ياسر بسطاوي يا جماعه هي عباره عن دسته من أصابع كرعين الدجاج وثمنها أثنا عشر بريزه
|
Post: #9
Title: Re: سلامتك يا حاتم عبدالمنعم
Author: Osman Musa
Date: 10-01-2015, 02:06 AM
Parent: #8
صديقنا العزيز أستاذ عبدالله
سلامات .. وينك ياخ .. وكيف عامل مع الدنيا ؟
لا تخاف يا أخ عبدالله علي عزيزنا حاتم .. حاتم زول الشدايد المرق من تحت ضل سيف الشبح .
أكيد حيقوم و حيتلب من ده السرير الأبيض . لكم جميعا التحايا
|
Post: #10
Title: Re: سلامتك يا حاتم عبدالمنعم
Author: عبد المنعم سيد احمد
Date: 10-01-2015, 03:37 AM
Parent: #9
ياهلا بيك كارلوس
عساك طيب
حلوان هذه..تحتاج لمجلد
لتحكى حكاويها..وجمال ناسها
عندما غادر حاتم عبد المنعم..القاهرة.
من غير رجعة..بعد ان عزم امره
ههههههه
قالت ام صلاح
ان حاتم قد ولى الادبار
وهى لاتدرى المعنى
فقط لانها..تسمع عمنا احمد
يحكى بلغة عربية..
احيانها يترك اللهجة المصرة
ليحكى بلهجة سودانية
او عربية فصحى
ام صلاح
كانت تعنى..ان حاتما قد سافر
من غير رجعة
شدة وتزول يازول جميل.
|
|