هل صحيح ان العلاج خارج السودان بقى ذي ( فطور العريس ) وفقا لوصف احد الاطباء على قناة امدرمان .. ؟؟

10:21 AM Aug, 29 2015
سودانيز اون لاين
عمار بابكر-
مكتبتى فى سودانيزاونلاين



طبيب مستضاف على قناة امدرمان وصف ظاهره السفر للعلاج خارج السودان بانها (( بقت ذي فطور العريس )) ..
فهل صحيح هي ظاهره معني بها المظهر الاجتماعي اكثر من كونها لطلب العلاج ؟
هل بالفعل يحتاج المجتمع لتبصيره باي مرحله يتطلب وقتها السفر طلبا للعلاج خارج السودان وما هي الجهه المناط بها ذلك داخل السودان ؟
وفقا للطبيب المستضاف في قناة امدرمان ان كثير من العمليات والتي ينظر اليها اولياء امور المرضى بانها عمليات معقده هي في واقع الامر عمليات بسيطه وغير مكلفه - وتبعا لذلك الفهم يسافر المرضى ويصرفون المبالغ الطائله على عمليات من الممكن اجراءها بمبالغ زهيده في السودان - هل المجتمع في حاجه الى جهه بحيث تكون مرجعيه لتبصير المرضى وذويهم بما يحتاجونه وهو موجود في السودان وما لا يحتاجونه ويتطلب السفر خارج السودان ؟
هب ان المريض وذويه قد سافروا طلبا للعلاج فهل هنالك كيان في سفارات السودان بالخارج لتبصير المرضى وذويههم وتوجيههم التوجيه الصحيح - اي المستشفيات يقصدون - وما تستدعيه حاله المريض من فحوصات وعمليات وعلاجات وفقا لميزانيه المرضى والتي هي في الغالب استقطاعا من مدخراتهم المعيشيه ؟

في كل بلدان العالم هنالك العدد الذي لا يحصى من الاطباء السودانيين (( المتميزين )) والمشهود لهم بالكفاءه - فاذا ابعدنا السياسه (( قاتلها الله )) فهل من المكن خلق كيانات في كل دوله من اولئك الاطباء ليشكلون مجموعات طوعيه فقط لتبصير الوافدين من المرضى طلبا للعلاج بما يحتاجونه فعليا وما لايحتاجونه من فحوصات وعمليات وعلاجات ؟ ام ان السياسه ستطل بعنقها في كل كيان و ( تفرتقه ) !

تحياتي عمار
كلامو ما صاح ولا يوازيه
واتحدث عن العلاج بالخرطوم وليس الاقاليم
في الخرطوم تكون ضحية في ايادي تجارة الطب .. قبل ما تفتح خشمك بتكون صرفت 3 مليون تحاليل وصور وفحوصات .. وبعد دة كلو ممكن يعودك الصور بحجة انها ما واضحة .
بالمناسبة الناس ما بتسافر برة الا بعد تجربة الداخل
وبالمناسبة العلاج برة ارخص من هنا
وهنا تعني الخرطوم
الاخلاق الطبية في الخرطوم الا من رحم ربي

مشكور اخي عبد الحفيظ ابو سن على المرور والمداخله /

هو كلام الدكتور المستضاف على قناة امدرمان وليس كلامي

اما كلامي هنا كواحد من المغتربين واعرف مدى (( تجاريه )) المستشفيات الخاصه في بلاد المهجر - اما ما يحدث في السودان في المستشفيات فيمكن الاخذ بافادتك والزملاء في المنبر لتسليط الضوء على المشكله في داخل السودان وخارجه وابعادها ..
دمت بعافيه

الأخ عمار بابكر
تحية طيبة
هناك مشكلة علاج وبالذات مشكلة تشخيص في السودان ومشكلة كبيرة جداً وواقع لا مفر منه ، يعني يكون عندك عين سمكة في رجلك عادي يقولو ليك سرطان في المخ - أعاذنا الله وإياك - .
أما بالنسبة لكلام الطبيب في نسبة وبسيطة وهي ناس شوفوني ومش في العلاج وبس في أي شيء بقو شوفوني وهم في الغالب أثرياء الغفلة وآخر الزمان ومستجدي النعمة وشفت ناس بتونسو
بحكاية أنو كنت بره وبتعالج وفي أشياء بسيطة وهنا ممكن تتعالج والمسألة بقت شو اكتر من انها علاج يعني الواحد يستلم المجلس بحكاوي السفر والعلاج ... الخ
ودي النوعية البتحب البوبار والفشخرة حتى في الموت ، وعليه نقدر نقول كلامه صحيح بس بنسبة بسيطة مع عدم النفي مشكلة التشخيص في السودان
حكى لي واحد قال عندهم جارتهم كانت عيانة مشت لمستشفى مشهور أها شخصو ليها انها عندها كانسر من سمعت الكلام انطوت وضعفت وبقت ما بتاكل واتفقو هي وزوجها ما يكلمو اولادهم عشان ما يتأثرو
المهم بطول الزمن الأولاد لاحظو تغير أمهم وضغطو عليها وكلمتهم بالحاصل ، أصرو الا تسافر مصر ولو باقي ليها ثواني وتموت وفعلاً سفروها مصر وبدو العلاج من جديد ، تعرف قاليك الدكتور المصري
شاف الفحوصات والعلاجات وشاف فحوصاته قعد يبكي قاليهم حرام عليكم ياخ وقاليهم في جرعة كيمياوي لو اخدتها كان ماتت ، اتضح انها ما عندها أي سرطان ولا شيء ، ما اتذكر المرض شنو لكن المرة لليلة عايشة
وفي أمان الله واهلها جرو واشتكو ومافي فايدة .

تسلم اخي يوسف الطيب على المرور الكريم والمداخله .

وفقا لقراءاتك لاصل المشكله فان دوافع السفر للعلاج خارج السودان ليست في مجملها ( شوفانيه ) أو ( كظاهره فطور العريس وفقا لوصف الطبيب ) وقد تكون الشوفانيه نسبيه , ونسبه اخرى مقدره لنتائج تجارب حقيقيه في اروقة المستشفيات ,

تسلم على المداخله الثره ..