اليومين ديل مكرهننا فى الواتس والفيس بموضوعين فقط ﻻ ثالث لهما

07:13 PM Aug, 26 2015
سودانيز اون لاين
محمد النيل-
مكتبتى فى سودانيزاونلاين



اليومين ديل فى كل مواقع التواصل الإجتماعي مافى غير موضوعين بس.
كرهونا فيهم: موضوع سودانى فى مطار ابو ظبى، وموضوع النميرى مع الحلفاوى الجاء متأخر عن وظيفته فى احدى الوزارت النميرى الكان عامل عليها كشة.
خلاس يا جماعة الموضوعين ديل غطوا الواتس والفيس
من نفس الاشخاص ونفس الاعضاء هنا وهناك لدرجة اختلاط المهام فصار الامر واتسبوك و فيسآب.
النميرى اللى هسة بنصفقوا ليهو دا الله يرحمو، مالكم طيب مارقين عليه ومنتفضين عليهو فى ابريل؟
خلاااس نسيتو البقرة الضاحكة والفلاشا؟ ولن يحكمنا طيش حنتوب؟
ول ضاقت وبقينا نحلم بالذى مضى من ضيقا اقل؟
شر البلية لم يعد ما يضحك، بل شر البلية صار ما يبحث عن اقله بلاء.
وقصة مطار ابو ظبى العاجباكم دى، طيب مارقين ليه من السودان اصلا؟ ذاتو ما دام الموضوع بقى فيه أم ولدتنى وزوجة اخترتها، وجرسة فايتة الحد، يعنى لو داير تدبل الزوجات تغترب فى الامارات وقطر يعنى؟ ول السحلية عدت من على رأبتك؟؟ ما تاكلش بيض وﻻ سمك! انا اصلا كنت بعرف حد مغترب فى قطر والإمارات فى نفس الوقت، واعتبرهما زوجات ﻻنهن باختياره، فصارت قطر والامارات ضرات، وعشان كدا بنلقاهن مختلفات لحدى الليلة فى كل شيىء، فى علاقتن مع مصر وقناة الجزيرة. ويتشاكلن فى الريموت دى مصرة تفتح الجزيرة ودى ابوظبى مسلسلات، واحدة مثقفة والتالتة مستفة. وحدة مع مرسى والتانية مصرة تصنقر فى الكرسى.
كفاية بالله خلاس سمعنا ياخ النميرى قال للحلفاوى الله ﻻ يكسبك، وبتاع مطار ابو ظبى نففففسو يعرس وحدة تانية لكن يشمها قدحة.
كرهتونا

سلام حمد النيل
خلاس ياخ ولاتزعِّل نفسك نغير ليك شوية وبرضها من الواتساب

شحَّاد ,, واحد كان كل يوم يمر عليه ويبره بـ عشرة جنيهات
وفى يوم اداهو سبعة جنيه ,,, بعد كم يوم اداهو خمسة.
الشحاد قال ليهو إن شاء الله خير مالك نقَّصت القروش؟
قال ليهو ياخ انا دخَّلت بنتى مدرسة خاصة ,, وعندى ولد برضو دخلتو مدرسة خاصة ,, والمصاريف كتيرة.
الشحاد قال ليهو عندك ولاد غيرهم؟
قال ليهو ايوه عندى اربعة.
الشحاد قال ليهو :
اها وديل عاوز تَقَرِّيهن على حسابى؟
اها ياحمد النيل ان شاء الله نكون عدلنا ليك المزاج؟