ورنيـــــك 15 وخروف الدامر- صورة

10:50 AM Aug, 18 2015
سودانيز اون لاين
Adam Youssif-Jeddah, Saudi Arabia
مكتبتى فى سودانيزاونلاين






فــي الدامــر (دامر المجذوب) بولاية نهر النيل ..لو مشيت سوق المواشي وعايز تشتري ليك (خروف) لازم تدفع لود ضحوية 5 جنيه كاش .. ليييه ؟ رسوم دخول السوق وكدا ! طيب ود ضحوية دا بأي صفة يشيل منك 5 جنيه ؟ بصفتو متعهد تحصيل ..رسى عليه العطاء لتحصيل رسوم السوق من اي واحد يخش السوق ويشتري خروف او غنماية او تيس أو حتى ديك أعور ! أو دجاجة متفلهمة ! أو سخلة حوصاء ! او حمار مرات مرات بيشتغل مطرب جماهيري ! او حصان نزل معاش وخلى عربة الكارو لشبل جديد ! المهم تدفع !
لكن أهم حاجة لازم تقول لــ(ود ضحوية ) إسم قبيلتك شنو واسم شيخ الحلة والعمدة او الناظر والحلة الانت ساكن فيها عشان يطلع ليك (أيصال استلام) ..بالمناسبة الايصال المالي ما اورنيك (15) ولا 14 ولا 13 ولا 11 ولا عندو أي رقم ذاتو ..! وأهم حاجة لازم يكتبو في الايصال المالي دا أوصاف الخروف..آآآي مش في الجواز مكتوب أوصاف حامل الجواز ؟ اها هنا لازم الخروف يكون وصفو مكتوب: ابيض الجلد عيونه عسلية كبيرة وعندو قرنين واحد فيهم مكسور وحالتو الصحية (تحير) .. ذيله سمين وعندو (تمبلة) وبيقول باااااااااااااااااع ! وانت اشتريت !
منقــــــــــــــــووووول

المتعهدون فئة موجودة في العمل التجاري منذ أمد بعيد ... وفي جميع دول العالم تقريبا
هذا الشخص يقوم بتنظيم الجهة الموكلة له مثل سوق الماشية أو أماكن النقل العام... وما شابه ذلك
يدخل التجار في مزايدة حول المبلغ الذي سيدفعونه للدولة خلال العقد .... ويتم كتابة الأسعار المتفق
عليها في العقد ( الأسعار للجمهور والمستفيدين )....
لذا فإن الإيصالات المتعلقة بالتحصيل لا تخص الدولة .. وهو يطبعها بطريقته

في هذه الحالة ليس هنالك ما يعيب.. يبدو أن ود ضحوية فاز بالعقد ..


لكن الشيء غير المفهوم إيراد القبيلة في إيصال مثل هذا ...

المعنين بالأمر عليهم تلافي هذا الشيء لعدم أهميته ومخالفته حتى لأنظمة السوق العادية


تحياتي




الشغيل

السلام عليكم ورحمة الله

هذا الاجراء قديم قدم سوق الدامر وود ضحوية من رسى عليه العطاء وبموجبه يدفع كامل قيمة العطاء للمحلية ودا أكيد بأورنيك 15 وبعد ذلك يقوم بتحصيل

رسوم دخول السوق. ذكر معلومات المشتري والبائع في الايصال ضرورية وذلك لتجنب بيع الابهايم المسروقة وكان البيع لا يتم إلا بمعرف ولكن قبيلة ضامن في السوق يقوم

بمضان أفراد قبيلته أو من يعرفهم وذلك لكثرة مرتادي السوق من القبائل المختلفة ، فإن أردت أن ترى التنوع القبلي في المنطقة تعال سوق البهائم يوم السبت.

تخريمة : زمان سنة 1985 بعت لي سخلة في سوق الدامر
ومررت بنفس الاجراء

حبيبنا حسين ديقول
لك التحية
اوفيت وما قصرت في الشرح مشكوووووووووور على التوضيح

Quote: تخريمة : زمان سنة 1985 بعت لي سخلة في سوق الدامر ومررت بنفس الاجراء

كتبت في وصف السخلة شنو؟؟

المتعهد ده مستهبل قبيلة شنو الكاتبها في ايصال بيع خروف


نعلو ده السوق الجديد الجاي يفتحو عمر البشير

الأخ الحبيب عبدالعزيز محمد عمر
لك التحية

Quote: في هذه الحالة ليس هنالك ما يعيب.. يبدو أن ود ضحوية فاز بالعقد ..

ود ضحوية فاز بالعقد ..لكن الله يستر عليهو من ناس الجبايات ما يختوه في راسهم ياخ ديل ناس الدرداقات ما خلوهم

Quote: كتبت في وصف السخلة شنو؟؟

أنا بائع وليس مشتري ، أتذكر السخلة سوداء اضنينها بيض ، هههههه

بعدتها بخمسين جنيه وزودت عليهن عشرين جنيه بقت سبعين اشتريت بيها عجلة رالي من دلالة عطبرة ، هههههه

دخل واحد من عروبنا صيدلية في سوق تمبول وطلع ورقة من جيبو واداها للصيدلي
الصيدلي قاليهو دا ما ورشتة جيب الورشتة ؟
قاليهو اتا يا جنا اظنك ما بتعرف جيب الورقة جاي
الصيدلي زعل وقاليهو انا ما بعرف ؟ اها النقراها ليك
تيس بعامي ضنبو مقطوع
تسود ختوتو طلحة ولدي ساق التيس بورقة الدواء واداني ورقة التيس
اها اللعالج امو ببعر التيس البعامي دا المسنوح هههههههههههه
تحياتي لراعي البوست وضيوفه
انه بوست خفيف ولذيذ

Quote: المتعهد ده مستهبل قبيلة شنو الكاتبها في ايصال بيع خروف

لا ما مستهبل ولا حاجة ، ما أي أحد يبيبع بهية في السوق تكون حقتو ، يمكن لافحها من محل ،

سوق الدامر كان يرتاده اللصوص والهمبانة ومن أشهر الهباتة الطيب ود ضحوية ( قريب المتعهد دا ) أكيد معظمكم سمع بيه

وأيضاً هناك أشخاص من مناطق وقبائل معينة مشهورين بسرقة البهائم لذا لزم وجود المعرِف والضامن.

Quote: أنا بائع وليس مشتري ، أتذكر السخلة سوداء اضنينها بيض ، هههههه

دي كديسة يا ديقول ... دافننو سوا

Quote: لا ما مستهبل ولا حاجة ، ما أي أحد يبيبع بهية في السوق تكون حقتو ، يمكن لافحها من محل ، سوق الدامر كان يرتاده اللصوص والهمبانة ومن أشهر الهباتة الطيب ود ضحوية ( قريب المتعهد دا ) أكيد معظمكم سمع بيه وأيضاً هناك أشخاص من مناطق وقبائل معينة مشهورين بسرقة البهائم لذا لزم وجود المعرِف والضامن.

مستهبل شديد كمان ...
.اعرف كل المعلومات الذكرتها من همباته وحراميه وغيرها ولصوص الغنم والابل وانا قريب من هناك شديد



ودخلت السوق ده نفسو اكتر من مراات وبعت فيهو ...قبيلة شنو اي واحد جاي يشتري خروف بلقط ليك اى قبيلة من اي حته ويبقي مارق
دي ونسه ساي منهم ...

Quote: تيس بعامي ضنبو مقطوع تسود ختوتو طلحة ولدي ساق التيس بورقة الدواء واداني ورقة التيس اها اللعالج امو ببعر التيس البعامي دا المسنوح

هههههههههههههههههههههههههه
الرائع حيبنا عبدالله ود البوش
لك التحية والتقدير