|
Re: متى سيدخل الســـودان عهــد الفضـاء؟ (Re: Abureesh)
|
سلامات أبو الريش
أتمنى أن يدخل السودان أولا" عهد الانسانية قبل عهد الفضاء عهد التعليم لكل فرد عهد الصحة لكل فرد عهد الخدمات المتوفرة من كهرباء وماء وتصريف صحي عهد الجامعات المؤهلة ومراكز البحوث عهد القضاء الخدمة المدنية الجيدة عهد الطرق الجيدة حتى ولو في المدن الكبيرة فقط عهد الاستفادة من أبنائه في المهاجر وووووووو الخ الخ
السودان يعيش حاليا" في فترة ممكن تقارنها بالقرن الثامن عشر في بعض الدول نحتاج على الاقل قرنين لنصل لمصاف الدول الطبيعية ثم قرن آخر لندخل عهد الفضاء مع إنو تلاتة قرون لدخولنا عهد الفضاء تعتبر فترة قصيرة جدا" لن يحلم بها أشد المتفائلون!
أطرد الأحلام يا جميل وأصحى :)
| |
|
|
|
|
|
|
Re: متى سيدخل الســـودان عهــد الفضـاء؟ (Re: muntasir)
|
الأقمار الصناعية فى حد ذاتها ما مشكلة، زى ما تشترى عربية تشترى قمر صناعى وتفكه بواسطة صاروخ أوروبى أو هندى برسوم معينة ويختوه فى المدار الانت عايزو.. لكن الكلم هنا عن الصاروخ اليفك القمر الصناعى دا زاتو.. وللأخوة البقولوا عن الأولويات نحن ما قاعدين نقول نفك صاروخ عشان يحيب لينا تراب القمر.. عندنا تراب كفاية فى السودان، لكن لنفس الأسباب التى ذكرتوها وأنا زاتى ذكرتها.. التعليم الصحـة... الخ.. فلابد ان يكون لنا وجود فى الفضاء.
| |
|
|
|
|
|
|
Re: متى سيدخل الســـودان عهــد الفضـاء؟ (Re: Abureesh)
|
Quote: إستشعار عن بعد (مجاناً)، إتصالات... |
مررت على إحدى القنوات إياها عصر اليوم وعرفت أن هناك معهدا ل (الفراسه) وكان أحد منسوبيه يحاضر قوة نظاميه في هذا المجال.. نحن تفوقنا على البنتاغون بالدفاع بالنظر والقياس بالإحساس..
مساك خير أخي أبوريش أنت وضيوفك وأهمس في أذنك أننا في الواقع نحتاج الخروج من الفضاء..
| |
|
|
|
|
|
|
Re: متى سيدخل الســـودان عهــد الفضـاء؟ (Re: Abureesh)
|
Quote: فى القرن الواحد وعشرين السؤال مفروض يكون بالعكس.. مع بلايين دولارات البترول دقسـوا، وهسى يحنسوا شركات روسيا عشان تعاين ليهم من فوووووق فى ذهب واللا ما فى. عهد الفضاء يعنى الكثير.. صحة، تعليم، أعلام مستقل، دفاع (بالنظر من فوق)، طقس، بيئة، تأجير قنوات بدل إستئجارها، مراقبة لصيقة من على البعد لحماية الحدود، إستشعار عن بعد (مجاناً)، إتصالات... +++ الأقمار الصناعية فى حد ذاتها ما مشكلة، زى ما تشترى عربية تشترى قمر صناعى وتفكه بواسطة صاروخ أوروبى أو هندى برسوم معينة ويختوه فى المدار الانت عايزو.. |
أهاااا، تطبيقات تقليدية يعني، technician mentality! | مانكون اتاخرنا عليك: شغلتنا أموالنا وأهلونا.
والله أنا ما عارف "محترم" دي قاصد بيها شنو، لكن للضمان "محترم انت".
شوف، الموضوع مش بس تشتري قمر وتأجر صاروخ يجدعوا ليك في مدار من اختيارك المسائل دي سياسية بالدرجة الأولى رغم ظاهرها التقني إذا كنت تقصد أقمار الاتصالات المستخدمة للإعلام تحديداً فالحد المسموح به لتجنب التداخل هو 180 قمر أعلى خط الاستواء على ارتفاع 35،800 كيلومتر حتى تظهر ثابتة نسبياً بالنسبة للكرة الأرضية.
في الوقت الكانت الدول بتتصارع عشان تحجز كميتها من الكعكة (180 قمر فقط) أي حجز موقع ضمن المدار الثابت كانت الدول المتخلفة (ومنها السودان) في وادي تاني، والموضوع مش بس سياسي، جغرافي أيضاً، معظم "الحتات" الكويسة حجزوها زماااان. أها، باقي الترددات، ودي معركة عليك تخوضها مع فطاحلة المنظمة الدولية للاتصالات (ITU) وبرضك حتلقى الترددات "السمحة" كلها حجزوها، بالضبط زي أسماء النطاقات بتاعة الانترنت. عشان أوضح ليك، باقي انت بتاخد المواضيع بتفاءل كبير، مش مرات لما تحرك مؤشر الراديو (الموجة) بتلقى حتات فاضية خلا وفجأة تلقا ليك زي عشرة محطات متكابسات يورجغن في محل واحد؟ أها دا لأنو التردد دا بالذات (حلو) ليهم من ناحية التجهيزات الأرضية ونقاء الإشارة، الموضوع اقتصادي هنا بالدرجة الأولى، يلا يا أبوريش الأقمار الصناعية دي نفس الشيء، الناس القاموا بدري حجزوا الترددات السمحة كلها وخلوا لينا الترددات العايزة تجهيزات أرضية مكلفة، كان دايرنها شيلوها كان ما ديرنها خلوها، هم عارفين إنها بتداخل مع الإشارات الكونية، كل الحتلقاهو شوية نشيش، زي صوت اللحمة البحمروها في الصاج، if you wish.
وأها النقول ليك، انحنا ذاتنا ما عندنا محتوى قدر دا، قول لي كيف، ياهو تلفزيوننا دا الشهر كلو ما تصفي منو يوم واحد برامج مفيدة، كلو غنا ومدايح والباقي برامج حوارية ومسلسلات، هو في الحقيقة مجرد إذاعة صوتية تحاول أن تظهر، عياناً.
لكن أطمئنك، دلوقتي الحل الوحيد هو توسيع عرض النطاق والانتقال للبث الرقمي، وبرضك كلو محجوز، لكن المنافسة بين أصحاب الأقمار خلت إيجار القنوات أرخص من إيجار بعض المنازل في المناطق البسموها "راقية" في الخرطوم، فالأيسر هو إيجار قنوات، نحنا يا أخوي إدارة قمر صناعي شعراً ما عندنا ليهو لا رقبة لا اضنين.
سياسياً دي النشرحا ليك: أمسك عندك آخر قمر يتبع لدولة في الشرق الأوسط، الإمارات، اسمه "ياه سات" دا يا سيدي صدقوا ليهم بيهو بعد تحالفات دولية وخراج روح، الحكاية ما قروش وهندي زي ما انت متوقع.
بالنسبة للقائمة بتاعة التطبيفات بتاعتك which seems open ended, amazingly.
واحد: - الصحة والتعليم ما ليهم علاقة كبيرة بالفضاء، جايز عندك أفكار جديدة في هذا المنعرج، فيا ريت تدينا نماذج. - التعدين ربما، لكن النتائج الممكن الحصول عليها بواسطة بعثة جيولوجية تعادل عمل أسابيع في تحليل الصور التوبوغرافية، عادة الصور الجوية تكون تأكيد لمجرد شواهد لتكوينات صخرية يحتمل أن تحتوي المعدن المطلوب بكميات تجارية - إذا كنت بتشير للذهب فهو بالفعل موجود بكميات ربما تصلح للتعدين التجاري هنا أو هناك ودا بيتم بعد المسوحات والاختبارات على الأرض مش من فوق، الدهب الموجود دا ما يتم التعامل معاه زي البترول، لا يا أبوريش، الدهب الفي دا موجود بالتوزيع الحالي ونسب تركيزه من يوم ما الأرض بردت وبقت تدور بينا، البلد دا.
اتنين: - دفاع وطقس وبيئة ياخوي مالك علينا! هو الموضوع صور جوية وخلاص؟ زي الكأنك بتقترح نأخد صور و"نعاين" ليها، لا يا أخوي شايف صور غوغول إيرث المجانية دي، كمية المعالجة وقوة الكمبيوترات المخصصة لتنقيتها وتنظيمها أكبر من ميزانية سودانك دا شايف نشرة الطقس البيعرضوها عليكم في أمريكا كل نص ساعة دي؟ أظنك عارف كويس إنها بتحتاج لسيوبر كمبيوتر، تستأذن أمريكا عشان تشتري واحد بقروشك، لأنو متعدد الأغراض ياكل يمين وشمال، زي مصانع تخصيب اليورانيوم، فيها تطلع ليك وقود وفيها تطلع ليك قنابل. أها نجي للدفاع، داير تدافع عن شنو بشنو؟ عشان بس نفرز الاختساسات.
تلاتة: دا منو القال ليك إنو الاستشعار عن بعد مجاناً، دائما مقترحاتك متأثرة بعقلية التيكنيشن الما بشوف إلا الجهاز يا شغال يا ما شغال انت يا أبوريش لما تغيب ما قاعد تذاكر البيحصل شنو في الكرة الأرضية دي؟ ياخي لو عايز تراقب حركة المرور ساكت دي دايرة ليها مراكز معالجة أغلى من دخل الوزارات الخدمية هنا مجتمعة. هي قول عايز تراقب المحاصيل الزراعية، وينا زراعتك البشعروا بيها من فوق دي، نحنا التحت جنبها ما شعرنا بيها يا أخوي ما أرخص ليك تشتري صور جااااهزة من ناس غوغول ديل؟
بعدين يا أبوريش يا خوي انتوا قاعدين في أمريكا لشنو إذا بتجونا "تقترحوا" علينا شيء نحنا شايفنو وعارفنو، أمشوا شاركو بصوتكم في المؤتمرات واللقاءات، إن شاء الله قنبوا في الكنبة الوراء مستمعين ساكت عشان يقولوا السودان حاضر، وتسووا لينا حركة كدا إن شاء الله نحنحة في المكرفون عشان يقولوا شاركتو باسمنا، اتلحلحوا ياخي، بدل ما تقضيها لينا أبواب سيارات إلكترونية وقهوة بالانترنت.
هنالك في الفضاء اليوم أكثر من 4،000 (نعم ألف) قمر صناعي بعضها (أكثر من النصف) خارج الخدمة منذ عقود لكنه يظل هناك لحجز المدار تقريباً امتلاك قمر صناعي في الوقت الراهن يعادل إيجار خدمات قمر موجود بالفعل، معادلة شكلها مغري مش؟ لكن هل باستطاعتك إدارته؟ فما الداعي لامتلاك واحد إذا كنت في النهاية ستعهد بكل خدماته لجهات أخرى خارج القطر وهذا سيكلفك أضعاف مبلغ الشراء ولفترة قصيرة نسبياً تعادل 10 سنوات عليك رد التكلفة خلالها وتحقيق أرباح منظورة بتأجير القنوات (إذا استطعت المنافسة)، أو غير منظورة.
|
| |
|
|
|
|
|
|
Re: متى سيدخل الســـودان عهــد الفضـاء؟ (Re: Abureesh)
|
Quote: حين ذكرت الصحة والتعليم كنت اقصد تطبيقات الإتصالات +++ ثم ان الدول تطلق أقمارها يوما بعد يوم.. وقطر الان بصدد إطلاق قمر للتحرر من عربسات أو أى كان اسمه، بعد تشويش المصريين على قناة الجزيرة.. شفت الامن القومى والدفاع الذى أتحدث عنه؟ ومعه الإستقلال الوطنى. الذبذبات فى سوق الله أكبر وفى أى وقت تستطيع تشترى أجمل ذبذبة +++ وقبل زمن طويل إنتهت كل اسماء النطاقات TLDs التى تحتوى على ثلاثة حروف فقط، والان عادت من جديد بعض الفرص وقد تجد اسم من ثلاثة حروف.. فى ناس تفلس فى ناس تموت، وفى ناس يخلوا الشغلانية بس كدا .. وهذه هى سنـة الحياة. وهذا من معانى الجهاد ماض الى يوم القيامة. الصراع على إمتلاك سلاح نووى الان إنتقل الى الصراع على إمتلاك قطعة ارض فى الفضاء لأن الحرب القادمة هى حرب معلومات وليست حرب طيارات وقنابل. +++ ما أن تؤجر قمرا فهذا يشبه تأجير الطائرات بل شرائها.. والشركات المصنعة اليوم تستطيع التحكم من بعد فى الطائرة التى اشتريتها منهم بحر مالك وينزلوها فى المطار الذي يريدون.. إن لم تتمكن من إمتلاك ناصيـة التقنية فمحكوم عليك بالذيليـة.
|
انتظر ردك على التشفير وعلى ذاكرة العنقريب! | انت ذكرت الاتصالات في أول مرة وكانت كافية أما محتوى الإشارة سوى كان تعليمي أو ترفيهي فهو مجرد تصنيف فئوي، فلا يوصف قمر صناعي يوصف بأنه للصحة والتعليم، كلمة اتصالات كافية. - معلومة أن الدول تطلق أقمارها يوم بعد يوم غير دقيقة. - فكرتك مغلوطة عن تقنيات التشويس يا أبوريش، التشويش يمكن أن يتم حتى لو لم يكن بثك من نفس القمر (onboard) بل ربما لا يتم استهداف القمر بالمرة، بل يتم استهداف تجهيزاتك الأرضية وللإشارة الصاعدة (uplink) خاصة إذا كانت رقمية. فقمر "قطر" لن ينجو من التشويش لو أرادت أية جهة ذلك، ما يحظر ذلك هو القانون الدولي فقط ومخافة الدولة صاحبة القمر، يمكن أن تشوش على القمر من جهاز لابتوب يا أبوريش. الإشارة الراجعة إلى الأرض بعد إطلاقها من القمر صعب التشويش عليها يا باشمهندس، اللهم إلا إذا قمت بالبث في نفس ترددها ولنفس البقعة المستهدفة (footprint) من مصدر إشارة ثاني ليس بالضرورة أن يكون قمر صناعي (طائرة مثلاُ أو بالون) ودا محظور قانوناً وبيعرض الفاعل لكمية من المشاكل لأنه من السهل التعرف عليه، ما لم تكن هنالك حرب معلنة بين الشائش والمشوَش. - كلامي عن اقتراحك لامتلاك "قمر صناعي" يا أبوريش، أنا ذكرت أسماء النطاقات بس كمثال مشابه وليس موضوعاً أساسياً. - بخصوص الإيجار، رأيي في محله، دائماً تفكيرك في الأمور الفنية بمعزل عن الصورة الكبيرة، المهندس يا أبوريش مطلوب منه التفكير في أمور أخرى مثل (الجدوى الفنية، الجدوى الاقتصادية، تعدد الاستخدام، الاستمرارية)، لكنك بتفكر بطريقة التيكنيشن، أنا سردت عليك الجانب المخفي من عملية امتلاك قمر، دلوقتي انت فقط أكدت ذلك، شوف التشويش على الجزيرة كان سنة كم وللآن القمر القطري مجرد مداولات، قطر ليست دولة فقيرة ومليانة هنود، تفتكر ما السبب في تأخر امتلاكهم لقمر خاص؟ - مثال للتفكير العقلاني: لولا الرؤى الواسعة للمهندس (المدني) في تقليص كلفة البناء واستخدام مواد مجربة لأمكن للمعماري أن يشيد قصراً بعشرة أضعاف التكلفة لمجرد المنظر - حديثك عن امتلاك ناصية التقنية برضو تنقصه الدقة في وصف الأسلوب الصحيح لذلك، فانت تحدثت عن امتلاك، فإذا كنت تقصد نقل الملكية بالشراء فأن لا تزال تحت رحمة الجهة صاحبة التقنيات التي صنعت القمر، فلا رحت ولا جئت يا عمرو، نفس مثال الطيارة الفوق بتاعك دا ينطبق على قمرك الاشتريته. وإذا كنت تقصد البدء في تصنيع قمر محلياً، فياها ذاتها عقلية التيكنيشن التي تحاول إعادة اختراع العجلة وتخطي الأولويات. _________
ياريت تفتح البوست عن اللغة العربية انت، أنا بدخل المنبر ساعة أو اتنين بس في الأسبوع، فربما يتداخل معاك آخرون تحاول أن تتناقش معهم حتى أحضر، من أجل الفائدة العامة فقط. وإلى لقاء آخر
|
| |
|
|
|
|
|
|
Re: متى سيدخل الســـودان عهــد الفضـاء؟ (Re: حاتم إبراهيم)
|
Quote: انت ذكرت الاتصالات في أول مرة وكانت كافية أما محتوى الإشارة سوى كان تعليمي أو ترفيهي فهو مجرد تصنيف فئوي، فلا يوصف قمر صناعي يوصف بأنه للصحة والتعليم، كلمة اتصالات كافية. |
هذا غير صحيح، والأقمار الصناعية تستعمل الإتصالات كوسيلة لنقل المعلومات فقط، ولكنها متخصصـة فى وظائفها.. فهناك أقمار للبث التلفزيونى والإذاعى (مع وظائف اخرى مشابهة) وهناك أقمار للأغراض العسكرية وأخرى لمراقبة الطقس وأقمار قوقل للخرائط... الخ.
شكرا للرابط وكع ذلك أقول انه مضى عليه وقت طويل واقترح عليك فتح بوست جديد.. أنا لم افتح ذلك البوست ولا املكه وكنت متداخلا فقط.. ولو فتح بوست جديد يمكن المواصلة فيه.
| |
|
|
|
|
|
|
Re: متى سيدخل الســـودان عهــد الفضـاء؟ (Re: Abureesh)
|
الأخ أبو الريش,
قيل بأن واحد مصري سأل سوداني قال ليهو: مساحة السودان كم متر مكعب؟ السوداني: المساحة بالمتر المربع مش المكعب. المصري: بعد إنفصال الجنوب السودان دخل في الهاوية عشان كده مساحته بقت بالمكعب.
أنحن مالنا ومال الفضاء؟!!! أنحن شغالين تحت, هسي شغالين تنقيب بترول ودهب لمن نخلص منهم نشوف فوق في شنو.
| |
|
|
|
|
|
|
Re: متى سيدخل الســـودان عهــد الفضـاء؟ (Re: Abureesh)
|
Quote: هذا غير صحيح، والأقمار الصناعية تستعمل الإتصالات كوسيلة لنقل المعلومات فقط، ولكنها متخصصـة فى وظائفها.. فهناك أقمار للبث التلفزيونى والإذاعى (مع وظائف اخرى مشابهة) وهناك أقمار للأغراض العسكرية ++++ شكرا للرابط وكع ذلك أقول انه مضى عليه وقت طويل واقترح عليك فتح بوست جديد.. أنا لم افتح ذلك البوست ولا املكه وكنت متداخلا فقط.. ولو فتح بوست جديد يمكن المواصلة فيه. |
| |
|
|
|
|
|
|
|