كُليقة قَصَب وخروف وبعشوم انه حال بعض المغتربين والمهاجرين

09:04 AM Aug, 13 2015
سودانيز اون لاين
عبدالله ود البوش-محل تمسا ترسا
مكتبتى فى سودانيزاونلاين



الغلوتية دي متوارثة اب عن جد منذ زمن سحيق من زمن اجدادنا القدماء
كل اب انبطح في عنقريبو بعد العشاء وصنقع للسماء اعاين كان للقمرة ول للنجم
وبنظرة للسماء وفي الهواء الطلق تتسرب كل شحناته النفسية السالبة ارضا باللاسلكي الارضي النيوترال
روق وابتسم يضاحك ملائكة السماء وهبش راس ولدو الراقد جنبو وقاليهو
كان عندك بعشوم وخروف وكلوقة قصب داير تقطعهم البحر بالمركب بتعمل شنو ؟
شرطا الخروف والقصب ما يكونوا مع بعض عشان الخروف ما ياكل القصب
والبعشوم والخروف ما يكونوا مع بعض عشان البعشوم ما ياكل الخروف
وتقطعهم واحد واحد بدون ما واحد فيهم ياكل التاني اها بتقطعهم كيف يا شاطر ؟
والحكاية امكن اكون الشافع دا سمعها مرارا وتكرارا وحلاها مرارا وتكرارا
ولكنه الانس الجميل المتكرر مافي غيرو لا تلفزيون ولا واتساب ولا سجم رماد
اياهو كدي بس
حكيت الغلوتية لمن يجهلها لو لم يسمع بها من الشباب والشابات
الغلوتية دي بتشبه حال المغتربين الان مع اسرهم عندما يكبر العيال ويدخلو الجامعات
يا حاجة لازم تمشي السودان مع البت للجامعة
بري يا حاج البنات كلهن في الداخليات شن بجيها زيها وزي البنات
لا لا الزمن بقى كعب امشي مع بتك
وتنظر اليه شذرا جوة عيونو علها تكتشف فايروس خبيث
الولد مشى اقرأ في الفلبين ... يا حجة ماش الفلبين امشهد الولد دا
ونفس النظرة شذرا
وهكذا دواليك الخ .. الخ ....
طيارة قايمة وطيارة نازلة والتذاكر نار في الاجازات
وشملة كنيزر تلاتية وقدها رابعة تدور السنة كلها
مرة كلوقة قصب ومرة خروف ومرة نعجة ومرة البعشوم الذي علمهم العيتنوبة
تعديل اخطاء

ود البوش حبابك

الله ما براك شيء بعشوم وشيء خروف وشيء كليقة قصب

السادة المغتربون بقى أي مثل سالب بينطبق عليهم طوالي

تذكرة لولد ماشي وتذكرة لبت جاية والعمر ماشي

ربنا يبارك في الأيام والرزق ويصلح حال البلد

ود البوش

مثل صادف أهله المغتربين.

وأسمح لي بأن أضيف لك بأن المركب عندها روّاسي ( صاحب المركب وقبطانها ) ، يمسك بعتلة سنينة ويهدد بإغراقها إذا لم يتم حلحلة معضلة التعدية في وقت وجيز .

طبعا الروّاسي دة يعادل ميزانية زولنا المشلهت بين الكفيل وملاليم الراتب.

كان الله في العون

كلام عروب صح

Quote: كلام عروب صح

بس دا الـ الله قدرك عليهو
تتكلوا فوق الشِعَب لي قولة فلان كعب
لكن تاني بعد كدا البتكل فوق شِعَبي ام كويعات بس فوق صنقورو هههههههههه
وبرضو مشتاقين يا ابو سنينة لكن خلي الخفة دي

الملهاة في جوف المأســاة

Quote: وتنظر اليه شذرا جوة عيونو علها تكتشف فايروس خبيث

مبدع يا ود البوش

ودالبوش المسخوت وضبوفو سلام
شايفك بقيت تبحت الجحار ... بتقرص يوم
ها نفس مركبكم دي نحن عندنا .. علا مركبنا واسعة شوية ..
تلم فيك ام العيال ونقة في راسك .. وتحكي ليك من القصص مثني وثلاث ورباع ..عن وعن .. ان كان بقا راسك خفيف ياكا الورطت واتلككت في الطين .. تقوم تأجر بيتك وتمشي تأجر ليك بيتا ولا عليك بيهو في صقط لقط .. وتتبشتن والحياة تغلبك
ولا ان تبقا زول جابر وتقيف في الحدود وتحرن .. علا بجازوك ! كل شهر شهرين ام العيال ماشة تزور بتها الفي الجامعة وتشوفها ساكنة كيف ..وتخم ماتخم ..
شفنا بيوت فكت جبارتا واتبشنت مع دخول العيال للجامعات
القصص مريعة فعلا والحكاوي كتيرة
لكن بفتكر الاسر الكبيرة اتفرتقت .. ما بتعدم ليك اخو ولا اخت اكان انت ولا ام عيالك من اخو ساكن الخرطوم .. لكنك لم تبذل مجهودا في تواصله ومعرفتك عيالك له

الهجره او الاغتراب ..... قصة واخره لسعه .... رغم الكان والحيكون .... للاسف

ســـترت الحال بتجبر علي المحال
الله يطوول عمرك يا أمي صفية
البنات باقي ليهن سنة
وأنا ما لقيت لي نجما في سما احسبه
شن الدبارة .. وكيف البصارة
هنا الأية اتعكســت معاي
بناتي اتنين لا وراي ولا قدامي
يحرم علي القعاد هنا وامش ارميهن في ( دخولية )
مالي ومال الهم البمص الدم وياكل العضم
غربة وتبقى معاها لهلها
شي تلفونات من تشرق لامن تمسي
وشي ختفة كراع
تمانية سنين بنات حفرة
قعدتها في خرتوم الســجم
(وخلعت ثوب أنثى كان يدثرني )
المهمة بتتطلب اقوم بالدورين دور المرا ودور الراجل
في مدينة بحرها لا ينجو منه أمهر السباحين
وطرحت من عمري 8 سنين عشان بناتي
وما ندمانة عليهن .. لأني عديتها عد .. زي ست الفول والتسالي 1+1 =2
والبحر كبير .. والمركب ما بتشيل مع البعشوم وقصب السكر .. بنية صغيرة
ختيت في المركب شوالات هم وخيتها بي خيت دبارة
وخليتها في نص البحر
ورجيت الموج العاتي سنة ورا سنة لامن قدّ الشوال وشالت الموية الهم .
دي تجربتي ومدافرتي التمانية سنين وجيت طابه بناتي في صفحتي .
ولا الخروف أكل الكليقة . ولا البعشوم أكل الخروف .

Quote: ولا الخروف أكل الكليقة . ولا البعشوم أكل الخروف

يا سلام
يا سلام
هذا هو المطلوب التوفيق بين كل المهمات الصعبة والنتيجة طبيبة تدواي امراضنا ومهندسة تعمر ديارنا
ربنا يحفظهما ويوفقهما اكثر ومن نجاح لنجاح وتشوفيهن في بيوتن سعيدات ومبسوطات
انت ام مثالية يا رشا وربنا وفقك وتحققت كل امنياتك بفضل الله ثم جهودك وشفتي بناتك اكلمن تعلمين ونالن اعلى الشهادات المطلوبة طب وهندسة
والله يا رشا وما طالباني حليفة دائما بضرب بيك المثل المشرف في تربية بناتك وتعليمن
ربنا احفظكم واغتي عليكم
هذا مع التحية والسلام والاحترام مرفق طيه

الناس دي الجابرها تقعد في الاغتراب بعد الاولاد ما وصلو الجامعة شنو ؟؟

و البت ذنبها شنو يسكنوها داخلية ؟


غايتو اغتراب بعد الاولاد بقو قدر ده مشكلة كبيرة و اهمال للابناء في وقت هم فيه اكثر حوجة لتواجد الاسرة
و الامثلة على ذلك كثيرة
كل واحد يقول ليك انا عندي ثقة في اولادي و بناتي و هم اتربو تربية سليمة و ما عارف شنو و و و و
بعد سنة و لا سنتين يجي يلقى الولد ليس هو الولد و لا البنت هي البنت
مسلسل متكرر و لكن الناس لا يتعظون
في تقديري ان ترك الابناء بمفردهم او الى الاقرباء الغير حريصين جريمة ترتكب في حقهم

Quote: الناس دي الجابرها تقعد في الاغتراب بعد الاولاد ما وصلو الجامعة شنو ؟؟ و البت ذنبها شنو يسكنوها داخلية ؟

ما كل الناس يا خالد عشان كدا انا ركزت على كلمة ( بعض ) ....
الوضع الطبيعي الناس تمشي ولكنه بجبرك على المر الامر
وفي بعض الناس لو ما استمر في الاغتراب ما اقدر اعلم اولادو بالدولار
.
.
تحياتي خالد المبارك

Quote: الهجره او الاغتراب ..... قصة واخره لسعه .... رغم الكان والحيكون .... للاسف

حظيرة مقفولة من بخارجها يريد الدخول فيها ومن بداخلها يريد الخروج منها
شكرا الحبيب وليام اندريه مع التحية

Quote: ودالبوش المسخوت

ههههههههههه مسخوت انا ول مسخوت ات البتك دايرة موز تديها حلاوة لبان
عشان تسكتا وتلعبوا العيتنوبة ههههههههههه مبالغات

Quote: ها نفس مركبكم دي نحن عندنا .. علا مركبنا واسعة شوية ..

بس الميزة في الوساع دا يعني الخيارات متعددة
والله اهون على الجميع
ياخي مشتاقين جدا جدا

مولانا أحمد الشايقي
الله اجبر بخاطرك ياخي
دائما مرورك كالنسمة
شكرا جزيلا ياخ

Quote: الملهاة في جوف المأســاة

كمشكاة فيها مصباح والمصباح عند النجار والنجار عايز عروس مغتربة

Quote: طبعا الروّاسي دة يعادل ميزانية زولنا المشلهت بين الكفيل وملاليم الراتب

حال المغترب حاليا فعلا اصبح مشلهت بعدما كان مريح وممشي الحال
الان الرواتب متدينة والاسعار في دول المهجر والاغتراب ارتفعت وحال البلد زادت الطين بله
الله اهون يا ابو جهينة
مع الشكر والتحية يا ريس

Quote: ربنا يبارك في الأيام والرزق ويصلح حال البلد

ربنا استجيب دعوتك دي يا جعفر
غير كدا اياها شملة كنيزة التلاتية وقدها رباعي
شكرا يا حبيب

سلام ياكلس
ياخ انت زمنك ده كله ترقع جَنب الـقَدْ يادوووبك عِترتَ فوقو
دحين ياخوى خلينى اللمشى اجيب الخيَّاتة دوبن ما إنت تجيب الخيت
وكلم ود ابسن الـ يجيب اللمبة ام عِوينَة وكان عندهن رتينة يكون احسن
وبيكون عندو الرتينة باقى شايفو اليومين ديل مهضرب بحكاية الكهرباء القاطعة دى ,,,
وماتنسى تكلم ودالمنسى الـ يجى يجارِد معانا ,, باقى الفتق الـ فتحتو ده واسع بدور ناس كتار يشوفو ليهو حل.
غايتو الموضوع ده زى حسبة برمة تنحل حكاية البعشوم والكليقة وده ماينحل ,,

يا سلاااام يا سلام

Quote: ولا الخروف أكل الكليقة . ولا البعشوم أكل الخروف

و مركبك للقيف التانى تعدّى
تشيل و تودّى
ويا بلد السلامة سلام
____
دايما بنعتمد الحلول الفردية
لو مرة واحدة انجزنا حل جماعى
ما كان بقينا فى جنس الشهلتة دى
سلام يا بوش و للموجوعين معاك
______
خطأ املائى

Quote: والله يا رشا وما طالباني حليفة دائما بضرب بيك المثل المشرف في تربية بناتك وتعليمن ربنا احفظكم واغتي عليكم هذا مع التحية والسلام والاحترام مرفق طيه

يديك العافية محل ما تقبل يا ود البوش.
فعلا مداخلة رشا دي معلقة تتعلق فوق أي حاجة، لها الاحترام والتقدير.

ويا خالد المبارك

Quote: الناس دي الجابرها تقعد في الاغتراب بعد الاولاد ما وصلو الجامعة شنو ؟؟ و البت ذنبها شنو يسكنوها داخلية ؟

الما عارف يقول بعشوم
بعد ما الولاد يدخلوا الجامعات يا دوووب الاغتراب استعدل.
لو كان الزمن غير الزمن دا، كانوا قروا وأكلوا بي قروش الحكومة اللي هي من إنتاج الشعب،
أو كان الأهل علموهم وحفظوهم أمانة، إلا الزمن ما ياهو
ثم تانيا انت قاليك المغترب دا باقي داب اولادو بس ؟
هو نان المثل فوق كم؟
قالوا ليك قصب وخروف وبعشوم
والبحر دميره والبر زاتو دميره
استغفر الله بس يا زول وما تقول حاجة
وخليك في سفارة لندن دي

الفاضلابي انا قاعد لكن عاين للمسنوح يبحت كيف
هسة العيتنوبة دي مش دايرة يشرح .. وانا بحكي اقول ان شاء الله مافي واحد يربط دي بي ديك

ود اب سن يا صديقي الجميل
يا زول سو ساهي الافندية ديل ما جايبين خبر
اتحدى أي واحد اعرف العيتنوبة غير ناس صقيعة سلامة
ما تتحسس ألفخ ساهي ههههههههههه
قال حلاوة جكسا قال
اها قالت دايرة موز ههههههههههه مبالغات
البت دي ح تكون طبيبة بتعرف قيمة الفواكه تقوم تديها حلاوة لبان ؟

معاوية الزبير يا حبيب
اشكرك جدا لمداخلتك القيمة

Quote: الما عارف يقول بعشوم بعد ما الولاد يدخلوا الجامعات يا دوووب الاغتراب استعدل. لو كان الزمن غير الزمن دا، كانوا قروا وأكلوا بي قروش الحكومة اللي هي من إنتاج الشعب، أو كان الأهل علموهم وحفظوهم أمانة، إلا الزمن ما ياهو ثم تانيا انت قاليك المغترب دا باقي داب اولادو بس ؟ هو نان المثل فوق كم؟ قالوا ليك قصب وخروف وبعشوم والبحر دميره والبر زاتو دميره استغفر الله بس يا زول وما تقول حاجة وخليك في سفارة لندن دي

جزيل الشكر والتقدير مع التحية والاحترام

عزيزي ود البوش
كعادتكم دائما بتجونا بالشئ المفيد والمليان وحكاوي تشد النفس
وفعلا مشكلة التربية في دةل المهجر ودول الاغتراب اصبحت مشكلة
عويصة وخاصة للمهاجرين في دول اوروبا وامريكا لان التربية في
الدول العربية. نسبيا. اسهل لان العادات والثقافات هناك ما فيها خطورة
وي دول اوروبا
وانت فعلا جبت المثل التمام لوصف حالة الاباء والامهات نه اولادهم وبناتهم
هل الاب يرسل الام والبنت للسودان ويقعد مع الولد في بلد الغربة ولا يرسل الولد
والام للسودان ويقعد مع البنت على اساس ان تربية الولد هو الاصعب في الغربة
ام يرسلهم كلهم للسودان ويقعد براهو ويمشي يزورهم في الاجازات وتكون مهمته
توفير المال فقط دون الاشراف على تربيتهم بنفسه
..المهم يا ود البوش انا عندي الحل للمشكلة دي وبجيك
صادة مرة تانية بالحل الامثل..
لكن وجدت صعوبة شديدة في حل مشكلة كليقة القصب والبعشوم والخروف
وكيف نعديهم بالشاطئ التاني دون ان ياكل الخروف القصب ودون ان ياكل البعشوم
الخروف..وقعدنا نحن 4 زميلات بالورقة والقلم ..وواحدة بتقترح تشيل البعشوم والقش
بالاول وتخلي الخروف ..ولمن تصل بهناك ترجع بالقش وتخلي البعشوم وتجي راجعة وتشيل
الخروف وتخلي القش ....وفي الحالة دي ساعتين ما لقينا حل ...وهسع نطلب المساعدة
كيفن الحل؟؟عشان حل الاولاد والبنات حل ساهل وهين
والله يديك الصحة والعافية

الشهم .... ود البوش
البعشوم والخروف والقصب والبحر والمركب كلها دلالات رمزية معبرة عن معاناة المغترب و"الخازووق... إن صح التعبير" الذي هو فيه.
يعني غربتنا بقت زي بيض أم كتيتي (نحن نسميها "أم برّشتي" في جنوب كردفان). إذا أخذت بيض أم كتيتي أبوك بموت وإذا تركته أمك تموت والعكس صحيح. ونحنا لقينا بيض أم كتيتي. والله في أمرنا محنّا.
ود البوش والإخوة المتداخلين...
أصحاب الهمة والمسئولية هم الذين يشعرون بالمعاناة وبالصعوبة في موازنة الدخل والمنصرف قبل اللجوء إلى الأصول (إن وجدت-ودا شغلك ياخوي).
إنما البويجعني وبفقع مرّارتي ويؤرق عيوني ويسبب لي الوسواس القهري وسوء الهضم الفكري هم أولئك المغتربون "القاعدون" تُج. قاااااااااااعدييين.
مضت عشر وعشرين سنة وأكثر وهو قاااااااعد. الشقة أو الغرفة فيها مكيف وبياكل ويشرب وعندو عربية ... ويمكن قاعد في جمعية كمان... واحتمال سهر كوشتينة وضمنة وهلم جرا. هذه غاية الطموح.
المرا المسكينة قاعدة هناك تربي في العيال والبنات ... وبقوا كبار والبنات خطبوهن والأولاد صايعين.... وهو قاااااعد هِنا.
وياها نفس المرا المسكينة "القصب" تشاشي جاي وجاي من الخرفان..... أو هي "الخروف" تشاشي جاي وجاي من البعاشيم في زمن كثر فيه الخرفان والبعاشيم وأبناء آوى.
صاحبنا يجيهو الخبر أنو أهلو هجرو الحلة أو نزحوا أو مات منهم فلان عمه أو فلانة خالته وهو ......
يجيهو الخبر إنو أبوه مات .... أو أمو ماتت (لا حول ولا قوة إلا بالله) وهو قااااعد.
في خاتمة المطاف هو ذاتو مات (يرحمه الله) في غربتو
ندعو الله أن يهدي الجميع ويكتّر لينا القصب والخرفان والبعاشيم كمان
.

سلام يا بوش،
ليس القش؛ والخروف والبعشوم وبس، ولكن دائما هنالك محك رابع...
ومشكلة مركب المغترب؛ انها لاتحمل احدا ولا تحتمل، وان قدها خماسي؛
وسلم التوابع خليط بين البريك دانسنق والسباعي؛ وداعش؛
وولع لي النحرقو؛
........................
ليس من مفر غير ان تصفو سماء الخرطوم حبيبتا،
تلك الملبدة بالفساد والظلم والقهر...
وان يتحقق شعار
حرية سلام وعدالة،
والثورة خيار الشعب...
تلك المستمرة؛
والتي حتما ستنتصر؛
وعندها يكون مخرج 10 السيال...
او كما قال محمد خير...

Quote: زي بيض أم كتيتي (نحن نسميها "أم برّشتي" في جنوب كردفان). إذا أخذت بيض أم كتيتي أبوك بموت وإذا تركته أمك تموت والعكس صحيح

دي يا اسماعيل ببو يا جميل ذكرتني حكاية الافندي لاول مرة امشي جنوب كردفان وما بعرف عاداتهم وتقاليدهم كويس
في اثناء السفر صعوطو كمل شاف ليهو راعي بقر ( بقاري ) مشى عليهو قاليهو عندك صعوط ؟
البقاري طلع الحقة اداها ليهو
فتح الحقة وقاليهو فيها سفة واحدة اسفها ؟
البقاري قال ليهو كان سفيتا اني بنطعنك وكان ما سفتيها بطعنك
يا ساتر
احتار الافندي وشاف واحد هناك ناداهو قاليهو تعال حلني من الشبكة دي
وحكى ليهو الورطة
قام قال لصاحب الحقة لو طعنتو انا بنطعنك ولو ما طعنتو انا بنطعنك
تعرف يا ببو انا حللت الحكاية دي بشنو ؟
ناس كردفان ناس مبادي واصول ممكن اموتو من اجلها
الزول الاولاني بتاع مزاج من مباديهو السفة الاخيرة ما بتنسف عرف متفق عليهو وكدا واي زول ما بحترم العرف دا يستاهل الموت في كل الاحوال
عشان كدا كاتلو كاتلو
والثاني زول كرم ومن مباديهو اكرام الضيف ومن يحترم الضيف يستاهل الموت في كل الاحوال عشان كدا كاتل الاولاني كاتلو
ولحبك الحكاية خلينا نقول أي واحد من بيئة مختلفة
.
.
صديقي يا ببو شكرا جزيلا ياخ مداخلتك كانت ثرة وممتعة وشاملة ووضحت الحاصل بالزبط
تحياتي وتقديري وودي الذي تعلم

الشهم .... ود البوش
البعشوم والخروف والقصب والبحر والمركب كلها دلالات رمزية معبرة عن معاناة المغترب و"الخازووق... إن صح التعبير" الذي هو فيه.
يعني غربتنا بقت زي بيض أم كتيتي (نحن نسميها "أم برّشتي" في جنوب كردفان). إذا أخذت بيض أم كتيتي أبوك بموت وإذا تركته أمك تموت والعكس صحيح. ونحنا لقينا بيض أم كتيتي. والله في أمرنا محنّا.
ود البوش والإخوة المتداخلين...
أصحاب الهمة والمسئولية هم الذين يشعرون بالمعاناة وبالصعوبة في موازنة الدخل والمنصرف قبل اللجوء إلى الأصول (إن وجدت-ودا شغلك ياخوي).
إنما البويجعني وبفقع مرّارتي ويؤرق عيوني ويسبب لي الوسواس القهري وسوء الهضم الفكري هم أولئك المغتربون "القاعدون" تُج. قاااااااااااعدييين.
مضت عشر وعشرين سنة وأكثر وهو قاااااااعد. الشقة أو الغرفة فيها مكيف وبياكل ويشرب وعندو عربية ... ويمكن قاعد في جمعية كمان... واحتمال سهر كوشتينة وضمنة وهلم جرا. هذه غاية الطموح.
المرا المسكينة قاعدة هناك تربي في العيال والبنات ... وبقوا كبار والبنات خطبوهن والأولاد صايعين.... وهو قاااااعد هِنا.
وياها نفس المرا المسكينة "القصب" تشاشي جاي وجاي من الخرفان..... أو هي "الخروف" تشاشي جاي وجاي من البعاشيم في زمن كثر فيه الخرفان والبعاشيم وأبناء آوى.
صاحبنا يجيهو الخبر أنو أهلو هجرو الحلة أو نزحوا أو مات منهم فلان عمه أو فلانة خالته وهو ......
يجيهو الخبر إنو أبوه مات .... أو أمو ماتت (لا حول ولا قوة إلا بالله) وهو قااااعد.
في خاتمة المطاف هو ذاتو مات (يرحمه الله) في غربتو
ندعو الله أن يهدي الجميع ويكتّر لينا القصب والخرفان والبعاشيم كمان
.

Quote: لكن وجدت صعوبة شديدة في حل مشكلة كليقة القصب والبعشوم والخروف وكيف نعديهم بالشاطئ التاني دون ان ياكل الخروف القصب ودون ان ياكل البعشوم الخروف..وقعدنا نحن 4 زميلات بالورقة والقلم ..وواحدة بتقترح تشيل البعشوم والقش بالاول وتخلي الخروف ..ولمن تصل بهناك ترجع بالقش وتخلي البعشوم وتجي راجعة وتشيل الخروف وتخلي القش ....وفي الحالة دي ساعتين ما لقينا حل ...وهسع نطلب المساعدة كيفن الحل؟؟

اتفضلي يا اميرة اتدربي هنا ...

games.waraqat.net/277

طريقة اللعبة بعد ما تضغطي على on تقومي تضغطي بالماوس على الحاجة الدايرة تنقليها بالمركب ...
مثلا تضغطي على الخروف بيقوم ينط في المركب ثم تضغطي على go بتتحرك المركب للضفة التانية تقومي تضغطي على الخروف مرة تانية بينط من المركب وتجي راجعة تاني وتضغطي على الحاجة التانية وهكذا لغاية ما تظبط معاك اللعبة ...

ــــــــــــــــــ

تحياتي لصاحب البوست وضيوفه ...

اميرتنا السمحة اميرة السيد
كل الود والاحترام والاشواق

Quote: وانت فعلا جبت المثل التمام لوصف حالة الاباء والامهات نه اولادهم وبناتهم هل الاب يرسل الام والبنت للسودان ويقعد مع الولد في بلد الغربة ولا يرسل الولد والام للسودان ويقعد مع البنت على اساس ان تربية الولد هو الاصعب في الغربة ام يرسلهم كلهم للسودان ويقعد براهو ويمشي يزورهم في الاجازات وتكون مهمته توفير المال فقط دون الاشراف على تربيتهم بنفسه ..المهم يا ود البوش انا عندي الحل للمشكلة دي وبجيك صادة مرة تانية بالحل الامثل..

دا الكلام النجيض
وكلنا في انتظارك للمساهمة في حل هذه المعضلة التي تؤرق مضاجع كل مغترب ومهاجر
مع تحياتي لزميلاتك وبناتنا السمحات الراقيات بسمات وامتثال

حباك جلالدونا
ويبدو انك ما زلت في الشاطئ وضاربك الهواء البارد
لكن اعمل حسابك من بدري ما تبقى عليك حكاية بخيت العجب امو
تحياتي

الفاضلابي يا جميل
ياخي مشتاقين
حبابكم جت عليكم يا السمحين
ود اب سن
ود المنسي
وبقية الزينين والزينات جت عليهم
وجيبو المسلة وخيت الدُبارة وخيتو شملة كنيزة دي التلاتية وقدها رباعي هههههههه
ياخي اتا لسع بدري عليك من المعمعة دي ولكن الذكي من يتعظ بغيره والغبي الزي كدا يتعظ بنفسه

السلام عليكم ورحمة الله
المقال التالى فيه تشريح ووصف دقيق لحال الكليقة والخروف والبعشوم
................
التعديل لتنسيق المداخلة

هجرة الجواميس
د.ابراهيم القرشي عثمان

شاهدت فى بعض افلام الحياة البرية تحركات قطعان الجاموس البرى فى هجرتها السنوية تخوض الاوحال
وتقتحم الادغال متدافعة فتندق اعناق بعضها ويموت بعضها فى الزحام فاذا نجت من ذلك كانت السباع
والضوارى فى انتظارها.وهى بذلك فى صراع ابدى يكون البقاء فيه للاقوى او للمحظوظ فى نهاية المطاف.
فمر بخاطرى اثناء ذلك مصطلح (الطيور المهاجرة) الذى يطلق على المغتربين فقلت والله ان هذا المنظر
المذكور انسب لحالهم وان مصطلح (الجواميس المهاجرة) اقرب لمآلهم لفرط ما يناطحون من اجل البقاء.
وقديما كنت آسى واحزن واستاء لمنظر المهاجرين الكبار (الشياب) وبمرور الزمن ادركت ان اكثرهم
مثلى هاجروا شبابا ثم طال عليهم الامد.وكنت فى اول عهد الاغتراب كتبت ابياتا لزميل عزيز بالسودان قلت فيها :
وقضيت خامسة السنين وما اشتريت (أُليف) طوب
فرد على جافا ساخرا قائلا (وقاعد تسوى شنو؟) ووكيلك الله لحق بى بعد ذلك باعوام ولايزال يصارع
والله اعلم كم ألف طوب اشترى؟ اما ابيات الشعر فما رأيت مؤهلا فى الغربة يعمل مضطرا فى غير
حقل تاهيله الا تذكرت قول ابن مفرغ:
وما كنت حجاما ولكني أحلني. بمنزلة الحجام بعدى عن الأهل
فالغربة ذل وكربة.وما جلب الهم والغم لآكثر المغتربين الا مهنة (الراعي) التى جعلت اكثر حامليها
زورا يعملون حجامين وان لم يكونوا حجامين بين اهليهم. وليس لآحد منهم حجة الا (ايه رماك على
المر قال الامر منه) ومع ان فى تراثنا قناعة وتنفيرا من الغربة حتى فضلوا الموت عليها سجل لمشاهدة
الصورمن النجعة وسكنة الغربة--افضل لى دفنة التربة). ولكن لعل بعض الذين ركبو موجة الهجرة
كانوا مدفوعين بجانب من التراث يدعو الى الاغتراب ايضا ابتداءا بابيات الامام الشافعى المشهورة
(سافر تجد عوضا عمن تفارقه) وقول الاخر (سافر ففى الاسفار خمس فوائد),و(اذا نبا بك منزل فتحول),
و(خير البلادما حملك), بل بعضها يحارب حب الوطن علنا ويدعو للهجرة :
حبك الاوطان عجز ظاهر فاغترب تلقى عن الاهل بدل
وبعضها يدعو الى الاستكانة والخضوع:
اذا نلت فى ارض معاشا وثروة فلا تكثرن منها النزاع الى الوطن
فما هى الا بلدة مثل بلدة وخيرهما ما كان عونا على الزمن
نعم ربما صادف بعض النس نجاحا فى غربته وهم قليل ولكن دارت الدائرة على كثيرين
ممن لم يكونو محتاجين للهجرة اصلا ولكن جرفهم التيار والمظاهر الخادعة فلا طالو بلح الشام
ولا عنب اليمن بل تردوا بعد العز برداء المهانة.فكم من مهاجر فى هذا الزمان كان ملء السمع
والبصر فى وطنه فان لقيته فى المهجر استغربت كيف هاجر هذا وامثاله خصوصا الجيل الحديث
من ابناء المشايخ والاعيان والاثرياء (ابناء العز) .فمعظمهم كان فى بلده تبرا فاصبح ترابا وكان
عودا عطرا فعاد اشبه بدخان الطندب ولئن كان المتنبى قال : (وكل مكان ينبت العز طيب) فإنا نقول :
العز مطلوب وملتمس واعزه ما كان فى الوطن
ووالله ما قرأت ابيا الشاعر القديم الا تخيلت انه ما قالها الا فى السودانيين الذين اصبحوا من بين
شعوب الدنيا هم خلفاء الخضر عليه السلام فى تدويخ البلاد , اسمع قوله:
بكل بلاد بل بكل مظنة اخو امل منا يحاول مطمعا
كأنا خلقنا للنوى وكأنما حرام على الايام ان نتجمعا
أليس هذا هو حالنا ؟
والمصيبة ان وصف مرارات الغربة لايقنع ولايسر الذين لم يجربوا الاغتراب ولا يصغى اليه الراغبون
فيه,فلا يرون قائل مثل هذا الكلام الا حاسدا او حاقدا او عديم مروءة لا يريد المساعدة حتى تحملهم الامواج
الى اللجة وهناك يستبين النصح ويبدا صراع النجاة حيث لاينفع الندم,ويدخلون فى المسلسلات التى لاتنتهى
كمسلسلات امريكا الجنوبية المدبلجة.والناس لا يرحمون المغترب ولا يعذرونه وهو عندهم كما يقول البحارة
(مجبور الريس يجيب الريح من (قرونه) . اصيب احدهم بارتفاع ضغط الدم فاستغربت لانه لايحمل مؤهلات
هذا المرض , فقال ان السبب (زعلة) . فقد اجتمع فى اول اجازته مع خاصته من اخوانه واقاربه واخبرهم انه
مفلس وانما جاء به السواق واستدان تكاليف السفر ليزور هم ويبر والديه ولايملك شيئا يساعد به احدا ابدا.
قال فتفرقوا ثم صار كل واحد منهم يختلس غفلة الاخرين ويدخل عليه قائلا : ( القمرية ما بتعذر التقا ) .
انا اوضاعى كذا وكذا واريد المساعدة . فيقول يعنى انتو ما مصدقين كلامى,فيقولون : نحن مصدقين لكن
( حجر الضبعة ما بخلا من العضم ) قال والله كدت (اطرشق ) ومنذ تلك الاجازة صنفت فى المصابين
بمرض العظماء. ولا يخلو الامر احيانا من طولة لسان احيانا فقد ذكر بعضهم انه ارسل مبلغا لقريبه فطالت
مدة وصوله وكرر السؤال عنه فلما ( زهج ) المرسل اليه قال له بكل ( مساخه ) : ( والله قروشك دى لو كنت
ارسلتها على ظهر نملة لكانت وصلت ) . وقد يتعرض بعضهم للاستنزاف فقد ذكروا ان مغتربا كافح واشترى
قطعة ارض ثم اوكل من يتولى بناءها من اهله واصبح يحول ( التحويل فى ضنب التحويل ) حتى كل ومل
فقال للوكيل : ياخى باختصار البنيان وصل وين ؟ فقال يعنى ارتفع من الاساسات قدر متر . فرد عليه بحزم شديد
: خلاص اعرشوه ( اسقفوه ) .
ولا يسلم المساكين من الابتزاز خصوصا ابتزاز بنى جلدتهم , فكل من يقدم خدمة او سلعة اذا عرف ان الزبون
مغترب فانه سينبذ كل موروث الاصالة والذمة والورع فى سبيل الفوز بكمشة من مال هذا المسكين كأنه
( ما ضاربو حجر دغش ) فى هذا المال . اوقف احدهم سيارة الافراج المؤقت بعيدا ولكن البايع رآه ( كحلو )
, ثم وقف ينتظر حتى بايع الزبون الموجود سأله عن سعر الطماطم فأعطاه السعر مضاعفا فاحتج المسكين
يا اخى انت هسع بعت للزول القدامى ده بى ربع القيمة , فرد عليه ببرود : والافراج داك ما ليهو قيمة ؟.
ومن اوهام الناس عندنا انهم يظنون ان كل مغترب غنيا وكل راكب سيارة انما جلبها معه ترفا وهم
لا يعلمون ان من ياتى بالسيارة لا يملك سيارة فى السودان , وان هذه السيارة ستعينه على تحركات
اسرته ومواصلة ارحامه وترفع عنه ابتزاز سيارات الاجرة وتوفر له وقت الاجازة القصير. وانه لما
( ضرب بتشديد الراء) قيمة التذاكر لاسرته المباركة وتكاليف الرحلة وجد ان السفر بالبر اوفر له
والا فما ضرورة ركوب البحر لساعات قد تقارب العشرين احيانا فى عارات ( بواخر ) عديمة الاهلية
( حدفه ) عليها تشجيع الناقل الوطني ( الخطوط البحرية السودانية ) وقد جربتها وارجو الا اجربها ثانية
رغم ما يشاع من تحسن اضاعها. ثم اذا خرج من البحر وقع فى طريق لا يخلو من خطورة ووعورة ,
ثم يقع المسكين فى سلسلة الرسوم والجبايات المتتابعة. وبعضها همبته صريحة فقد استوقفنا احد العساكر
فى منطقة مقطوعة فاشفقنا عليه فاقتطعنا له شيئا من ( زوادتنا ) فرفض واعترض طريقنا مطالبا
بملابس واشياء اخرى
ويمتد مسلسل الابتزاز حتى لمن يشاركونهم الغربة فانك ما تدخل على صاحب متجر لسلعة سودانية الا
وجدت جشعا وطمعا بغيضا حتى ان السلعة احيانا لتباع باضعاف ثمنها وما ذلك الا تعويضا لعقدة الوهم
القائل بان المغترب يدفع ولا يهتم. او رغبة فى الثراء السريع الذى بدل ( اخلاقيات ) السودانيين فاصبحت
فئات كثيرة منهم تعج بها سجون الخليج خاصة بسبب التزوير والاخلاس والمسكرات وبيع الشرف
وغير ذلك مما لم يكن للسودانيين به سابق عهد. لآن الذين اغتربوا فى بادىء الامر كانوا مؤهلين ثم جاءت
افواج اخرى فى الوقت الضايع ابتدأ معها الخلل من داخل السودان حيث افلتوا بالرشوة والتزوير والغفلة من
اوضاع لا تسمح لهم بمغادرة السودان ثم كان ما كان.
ومصيبة المغترب الكبرى ان دائرة همومه تبدأ فى الاتساع كلما تقدم الزمن وكلما طال امد اغترابه فتشمل
الابناء والزوجة اذا كانوا مقيمين معه, الابناء تلقى بهم رياح التعليم فى اغتراب اخر دخل الوطن بعيدا
عن الوالدين . والسعيد من كان قريبا من بقية اسرته من جدود وحبوبات ونحوهم. اما البقية فتتناهبها ا
لداخليات والمطارات جيئة وذهابا. فيطير من عقل الاب ما لا يرجع اليه ابدا من هموم الغربتين المضاف
اليها ضغوط العمل وهواجس ( التفنيش ) وشبح رسوم التعليم الخاص الذى يكتوى به اكثر المغتربين تحقيقا
لرغبات الابناء ونزولا قسريا للوائح التعليم والقبول الجائرة. علاوة على الجبايات من زكاة لا تجب على
اكثرهم وضرائب ورسوم وغيرها ثم هموم بقية الاسرتين فى الداخل والخارج. ولا تخلو الزوجة بالتاكيد
من الهموم نفسها فان بقيت مع الزوج تقطعت كبدها على المغتربين فى الوطن ومن ابنائها . وان حزمت
امتعتها وقررت العودة الى الوطن بقى قلبها مع الزوج ان كان وحده او كانت معه بقية من فلذات كبدها
اضافة الى ما ينتظرها هناك من ( البهدلة ) ووظيفة الامومة والابوة فى وقت واحد اى معادلة معقدة هذه؟!
هذا اذا لم يطارد المرأة شبح اخر اصبح عظيم الخطر فان المرأة كلما تقدمت بها السن ازدادت وتيرة الغيرة
عندها والرجل تزداد عنده وتيرة الحنين الى الشباب. وربما اصابته الوحشة فيطمح فيمن يبدد تلك الوحشة
فان فكر فى الزواج وليس مستبعدا فتلك الطامة الكبرى.
تعطلت سيارة احدهم مرة فتبرع بعض زملائه فى العمل بإيصاله الى منزله وفى الطريق عرف منه ان اسرته
كلها فى السودان بحجة تعليم العيال. فقال له : اذن هذه فرصة ما دمت عازبا تناول معى الغداء . فقال له :
لا ياخى انا بعد الاولاد الكبار سافروا سويت لى واحدة تانى ( تزوج ) . وهذا تطبيق للمثل القائل ( كان غلبك سدها وسع قدها ).

نسيت اهم حاجة يا سجم سعة المركب
الهو الراتب


سنبرية ياكل عيش بالدس

____
سعة المركب بتشيل حاجة وحدة في الرحلة الواحدة