جمال الوالي يشتري طيارة خاصه.

09:42 PM Jul, 20 2015
سودانيز اون لاين
محمد قسم الله محمد-
مكتبتى فى سودانيزاونلاين



حملت الأنباء أن جمال الوالي يفاوض الخطوط الأميرية القطرية لشراء طائرة خاصة لنادي المريخ لنقل الفريق في رحلاته وتعمل كذلك كاستثمار لدعم النادي..
وكان جمال الوالي إشترى لنفسه طائرة خاصة من ذات الجهة .

أها وكان قاموا طاروا الدلاقين ديل .. يا محمد قسم ..
ما حيشددونا الطيارة دي ..
نكمل بيها مشوار الكاس الافريقية ..
وأهو كلو قروش البلد ..
والجيب واحد ..
فلا داعي للحسادة ..
من هسه ناس الهلال يجهزوا حالهم للطيارة الخاصة ..
لكن بس كمان ماتكون طيارة ماسورة ..
لازم يجيبوا طيارة معتبرة ماتكون خردة أو مستهلكة ..

شحات وعايز فطيره ......

ود القوز..
ما هو عمك الوالي قال ليك في الخبر الطياره حتشتغل تاكسي ..
مطار هيثرو .. وبالعدم الخرطوم جده الخرطوم.

Quote: ود القوز.. ما هو عمك الوالي قال ليك في الخبر الطياره حتشتغل تاكسي .. مطار هيثرو .. وبالعدم الخرطوم جده الخرطوم.

يعني نظام فكـ ولزق وكده ........
حفظ الله عمنا جمال الوالي في حله وترحاله ..
ده الكلام والله ...
ولا نامت أعين الجبناء والحاسدين والمارقين والمتربصين ..
ومن في قلوبهم مرض ..
ده كلو شغل ترقيد للوالي عشان ناس الهلال ..
يخلوهم يسافروا بالطيارة الجديدة دي بلاااش ..
بعدين طمنتنا يأخ ..
طيارة بتصل لندن دي أكيد طيارة قلبها حار ..
مازي المابقدرن يصلن دنقلا ديل ..
ويقعدن يكركبن ويكوركن ويفطفطن في جو ..
لامن تجيك رجفيبة وتتشهد وتكتب وصيتكـ ..
عاش جمال الوالي ..
رئيس ناديي القمة ( الهلال ــ المريخ ) هي أقصد ( المريخ ــ الهلال ) ..
الترتيب عشان الطيارة حقتهم ...
أها وكمان يمين تحمونا نركب الطيارة ..
نشجع ليكم الفرق الجزائرية في قلب الخرطوم ..
عشان يحكوكم ناس اب ساطور ديل .....
وتمرقوا كيت ..
كيتن عليكم وعلى فسالتكم ..

كردنه وين؟؟

Quote: كردنه وين؟؟

والله صحي ..
إنت باقي ليك يا محمد قسم هسه ..
أشرف الكاردينال ده وصلوا خبر الطيارة دي .. ! ..
وماسوى أي شيء !! .. ياعيب الشوم ..
مفروض الكاردينال ده يتلحلح وينفض كيسو ..
ويشتري للهلال طيارة برضو ..
بدل مرمطتنا وشحدنا لي طيارات ..
اللي يسوي واللي مايسواش ..
حليل صلاح ادريس هسه كان جاب طيارتو ..
مع أبو ( العُدل ) وجابوهن سوا الحجل بالرجل ..
بدل شماتة الدلاقين فينا ...

Quote: الخطوط الأميرية القطرية

يمكن من الخطوط الجوية القطرية ......

Quote: يمكن من الخطوط الجوية القطرية ......

غايتو يا محمد الحسن لقيناها في المصدر مكتوبة كده ومن صحفيين محترفين.
ولكن فلتكن أميرية أو جوية فهي في نهاية الأمر قطرية.

Quote: أها وكان قاموا طاروا الدلاقين ديل .. يا محمد قسم .. ما حيشددونا الطيارة دي .. نكمل بيها مشوار الكاس الافريقية .. وأهو كلو قروش البلد ..

ود القوز ـ سلام ياصاحب
لو ما الكتابة الـ بُولْد دى كنت قلت فى زول بستخدم حسابك
فيا رجل ياطيب الكلام الزى ده انا شخصيا مابرضاهو ليك
لإنك فعلاً زول سمح ,,, تعرف فى واحد من الاعضاء بكتب
دلاقين دى فقاطعت مداخلاته وبوستاته ولكن لا استطيع ذلك معك
لأنك من زمرة السمحين وانا احببتك بالجد,, رغم انك من بنى زرقان.

Quote: ود القوز ـ سلام ياصاحب لو ما الكتابة الـ بُولْد دى كنت قلت فى زول بستخدم حسابك فيا رجل ياطيب الكلام الزى ده انا شخصيا مابرضاهو ليك لإنك فعلاً زول سمح ,,, تعرف فى واحد من الاعضاء بكتب دلاقين دى فقاطعت مداخلاته وبوستاته ولكن لا استطيع ذلك معك لأنك من زمرة السمحين وانا احببتك بالجد,,

أخي الفاضلابي..
كنتُ أود الإشارة لمن يشترون الطائرات في زمن يعجز فيه البعض عن شراء رغيفة في هذا السودان العجيب المُريب.
ولكن العزيز ود القوز أخذه عنوة واقتداراً لمناكفة المريخاب.
مع تحياتي لك ولو القوز ولجميع المتداخلين.

Quote: أخي الفاضلابي.. كنتُ أود الإشارة لمن يشترون الطائرات في زمن يعجز فيه البعض عن شراء رغيفة في هذا السودان العجيب المُريب.

وعليكم السلام اخى قسم السيد

دعنا نتفق اولا ان الغنى والفقر بيد الله سبحانه وتعالى
وكما ليس الفقر بعيب كذلك الغنى,, الا ان الغنِىّ الكريم
احب إلى الله سبحانه وتعالى من الغنى البخيل ,, ولا تثريب
على جمال الوالى أن اغناه الوهاب ,,, كما لاتثريب عليه
أن يشترى طائرة ,, فهو يُذَم إن بَخِل واستغنى ,, ومنع زكاة
هذا المال ,, ولما كنا لانعلم مالا يبديه من الصدقات والبِر نحسن به الظن عملا بالأصل .
واستصحاباً لقول الحق تبارك وتعالى:(إِن تُبْدُوا الصَّدَقَاتِ فَنِعِمَّا هِيَ ۖ وَإِن تُخْفُوهَا وَتُؤْتُوهَا الْفُقَرَاءَ فَهُوَ خَيْرٌ لَّكُمْ ۚ وَيُكَفِّرُ عَنكُم مِّن سَيِّئَاتِكُمْ ۗ وَاللَّهُ بِمَا تَعْمَلُونَ خَبِيرٌ)
ولانقول انه بشراء طائرة لنادٍ رياضى قد تجاوز ولم يرقب فى فقير الَّاَ ولا ذِمة ,, لأن الرياضة اصبحت عملاً ومهنة ويُرزق بسببها خلق كثير لانحصرهم فى اللاعبين فقط ,,
فإذا هو حاول تنظيم النادى الذى ينتمى اليه وجعله اكثر ربحية فهذا من باب الاصلاح المحمود ,, وكما قلنا يخدم قطاعاً عريضا من الناس ويوفر لهم مصدر رزق.
ونتمنى كما قال صديقى اللدود (فى الكورة) ودالقوز أن يحذو الكاردينال حذوه حتى يفيد قطاعاً عريضاَ من اعضاء مؤسسة نادى الهلال العريق.
قوموا الى مازيمبيكم وركزوا على تطوانيكم ,, عسى ان تأتون بكاس افريقى يسر كاردينالكم.

Quote: ود القوز ـ سلام ياصاحب لو ما الكتابة الـ بُولْد دى كنت قلت فى زول بستخدم حسابك فيا رجل ياطيب الكلام الزى ده انا شخصيا مابرضاهو ليك لإنك فعلاً زول سمح ,,, تعرف فى واحد من الاعضاء بكتب دلاقين دى فقاطعت مداخلاته وبوستاته ولكن لا استطيع ذلك معك لأنك من زمرة السمحين وانا احببتك بالجد,, رغم انك من بنى زرقان.

فاضلابي يا حبيبنا ..
أولاً ....
احبك الله الذي أحببتني فيه ..
يارجل حنانيكـ ..
والله ماقصدت الا المزاح مع حبايبنا المريخاب ..
بعدين ماقاعدين يقولوا لينا الصفيراب والطيشاب ..
ماقاعدين نزعل إن هي إلا مناكفات الكورة ليس إلا ..
ويشهد الله أتمنى للمريخاب كما الهلال أن يشيلوا الكاس الافريقي هذا العام ..
بل أتمنى ان يكون النهائي في الخرطوم بين الفريقين ..
ليس لي على جمال الوالي أي مأخذ شخصي ..
بالعكس أحب الرجل لأياديه وفضله على الكثير من قطاعات البلد ..
وحتى لو كانت قروش البلد أو قروشه ..
الرجل ساهم في دفع عجلة التقدم الرياضي ..
في البلد وفي غيرها من قطاعات ..
بل دعمه للمبدعين لاتخطئة عين متابع ومنصف ..
وغيره لايدفع ولايسهم ومعهم من الاموال الكثير ..
لا قصد لي إلا المزاح ..
فلا تبتئس يا صاحب ولاتزعل ..
حقاً نهوى هذا الوطن كما أنفسنا وأهلينا وزيادة ..
ونهوى الهلال والمريخ حينما يلعبوا باسم الوطن ..
ونتمنى لهم وللبلد الخير العميم ..
دمت يارجل ..
وشاكر لكـ حسن ظنك بي ..
ومتابعتك لي وما أكتب ..
بل وحتى طريقتي في الكتابة ..
حقاً أثمّن لكـ ذلكـ ..
تقديري ومحبتي لك ولمحمد قسم السيد ..

وفعلا على الكاردينال أن يشتري لنادي الهلال طيارة برضو ..
على الاقل يرتاحوا اللاعبين ..
من مسالة الخطوط والترانزيت والكونيكشن بيت الدول ..
والسفر الذي يرهقهم ويضيع لياقتهم قبل المباريات ..

Quote: ولكن العزيز ود القوز أخذه الأمر عنوة واقتداراً لمناكفة المريخاب. مع تحياتي لك ولو القوز ولجميع المتداخلين.

حبيبنا يا محمد قسم ..
شاكر لشخصكم قبول مداخلاتي وكلامي ..
صحيح أنا أخذت ايرادكـ للخبر من ناحية واحدة ..
وتركت بقية مناحي ومرامي الخبر الأخرى ..
ليس لي مقصد يشين أو ذا مآرب أخر ..
بل هو طبعي في مناكفة حبايبنا ناس المريخ ..
لكن ساعة الجد تجدنا ويجدنا الفاضلابي عند الموعد ..
تشجيعاً للمريخ فهو يمثل بلدنا الذي نحبه ..
ولافرق عندي بين الفريقين حينما يمثلان الوطن ..
ونتمنى لهما وللبلد الخير العميم ..
وان يحسنا رفع علم السودان خارجياً ..
وفي شتى المحافل ..

شاكر لكم أنتم ولحبيبنا الفاضلابي ..
ودامت المحبة بيننا ..

لا ابداً حبيبنا ودالقوز ـ مافى زعل ولا حاجة
انا زعلان ليك مش زعلان منك ,, بعدين
ياخ دلاقين وصفيراب ,, شِن جاب لِجاب
الصفيراب دى ليها علاقة فقط بالمحصلة الرياضية
ودى الزول لو عاد السنة الجاية يمكن يجب نِمَر اعلى
لكن دلاقين دى ليها علاقة بالاشخاص والزول الدلقون ده
معناتو زول وسخان لان الدلقون ده هو الخرقة البالية وتستخدم فى مسح الحذاء ومكنة اللورى وبوابير الجاز وحاجات تانية ,,
وانا متأكد انك ماانتبهت او إنصرف ذهنك للمعنى ده لإنك اخذتها فى إطار المناكفة
فما كان منى هو تذكرة لاخ احبه لان المؤمن مرآة اخيه ,, وما تعقيبك على مداخلتى ومداخلة محمد الا دليل على حسن ظنى فيك.

إختلاف الرأي لا يُفسد للود قضية..
ويا عزيزي فاضلابي لم أستنكر وليس من حقي الأرزاق التي يسوقها رب العباد للعباد..
وال(individual diffrences) دي قانون سماوي قبل أن يكون قانون وضعي..
لكن الزاوية التي أنظر منها هي الإختلالات الهيكلية في الاقتصاد السوداني الذي تبدو فيه هذه الفروقات الفردية على درجة من عدم التناسب بحيث تحصل فئة على أعلى مطلوبات الرفاه بينما فئة أخري وفي ذات المحيط تعجز عن تحصيل أساسيات الحياة.

Quote: لكن دلاقين دى ليها علاقة بالاشخاص والزول الدلقون ده معناتو زول وسخان لان الدلقون ده هو الخرقة البالية وتستخدم فى مسح الحذاء ومكنة اللورى وبوابير الجاز وحاجات تانية ,, وانا متأكد انك ماانتبهت او إنصرف ذهنك للمعنى ده لإنك اخذتها فى إطار المناكفة

وعلى الاطلاق ..
لم أقصد هذه المعاني البعيدة ..
أو الانصراف للاسقاط الشخصي على اللاعبين أو الادارة ..
وزعلك على شخصي مقبول يافاضلابي ..
فعلاً لابد من عكسنا لأخطاء بعضنا ..
والانسان مابسلم من الخطا ..
أو حتى سوء الفهم ..
واختلاف التفسير ..

الود محفوظ يأخ .. وليس ردي بكثير عليكم ..
فكلنا أحبه وأخوان .. والعشم بيننا كبير ..
تقديري لك ...

Quote: وعلى الاطلاق

ياود القوز على الاطلاق دى قرييييبة من علىَّ الطلاق
زى البطاقة الصفراء بعدها بتجى الحمراء هسع مرتك تقرأ البوست ده
ماتشوف الف لام الف دى تقوم تنقرن فيك زى ما انا انقرنت فيك فى دلاقين دى.
دحين ياخوى الباب الـ البيجيب الريح اقفله بى كُسَّار طوب ,,,

محمد قسم ,,, سلام تانى
ياخ لو نظام الزكاة عليهو ادارة مؤهلة كان زال استغرابك
لو الضرائب بتمشى محلها الصحيح كان الفجوة ضاقت
الحلول الفردية لن تجدى ,,

Quote: ياخ لو نظام الزكاة عليهو ادارة مؤهلة كان زال استغرابك

ولكن هل الزكاة هي الآلية الوحيدة لصياغة إقتصاد متوازن؟؟!!
عدالة توزيع الدخل.. التنمية المتوازنة.. الإنتاج.. المنافسة.. تدوير رؤوس الأموال.. الاحتكار.. رقابة الدولة.. السياسات المالية والنقدية.. الخ
أين بقية ميكانيزمات الاقتصاد؟؟

Quote: عدالة توزيع الدخل.. التنمية المتوازنة.. الإنتاج.. المنافسة.. تدوير رؤوس الأموال.. الاحتكار.. رقابة الدولة.. السياسات المالية والنقدية.. الخ أين بقية ميكانيزمات الاقتصاد؟؟

يامحمد ياخ انت كمان ماتعصر عليهم شديد كدى
ياخ كلامك صاح لكن وين الادارة اللى بتسوى الكلام ده؟
ده نظام حِبال بدون بَقَرْ

Quote: يامحمد ياخ انت كمان ماتعصر عليهم شديد كدى

وهو كذلك.

الشاهد أنّ الإختلالات الإجتماعية التي يشهدها مجتمعنا ما هي إلا نتيجة مباشرة للإختلالات الإقتصادية.
وتلك ثالثة الأُثافي.

Wael Haydar · الخرطوم رغم مريخيتى .. اذا صح الخبر وكانت الطائرة لنادى المريخ .. فهذا من باب الاسراف المزموم .. وكرة القدم ليست حرفة ولاينبغى لها ان تكون كذلك .. لان المال مال الله والعبد مستخلف فيه .. وفى بلد مثلنا هناك ابواب اخرى اوجب للانفاق واجدى وانفع واقرب الى الله من كرة القدم التى اصبحت تجارة شديدة البذخ .. مما يدل على جهل ممارسى تجارتها وعدم تقديرهم للمال واوجه انفاقه الصحيحة ..... ودونكم شباب الجمعيات الطوعية ومايبذلونه من جهد ومدى حاجتهم للمال ليسدوا بها الثغور المتسعة يوما بعد يوم .. مالكم كيف تحكمون ؟ !!
شكراً يا وائل..

Quote: Wael Haydar · الخرطوم رغم مريخيتى .. اذا صح الخبر وكانت الطائرة لنادى المريخ .. فهذا من باب الاسراف المزموم .. وكرة القدم ليست حرفة ولاينبغى لها ان تكون كذلك .. لان المال مال الله والعبد مستخلف فيه .. وفى بلد مثلنا هناك ابواب اخرى اوجب للانفاق واجدى وانفع واقرب الى الله من كرة القدم التى اصبحت تجارة شديدة البذخ .. مما يدل على جهل ممارسى تجارتها وعدم تقديرهم للمال واوجه انفاقه الصحيحة ..... ودونكم شباب الجمعيات الطوعية ومايبذلونه من جهد ومدى حاجتهم للمال ليسدوا بها الثغور المتسعة يوما بعد يوم .. مالكم كيف تحكمون ؟ !! شكراً يا وائل..

كلام معقول ومنطقى
ينسب الى الامام الشافعى رحمه الله انه قال:
ماناظرت أحداً قط واحببت ان اكون على صواب

Quote: ينسب الى الامام الشافعى رحمه الله انه قال: ماناظرت أحداً قط واحببت ان اكون على صواب

أنا على ذات النسق معك..
شكرا يا فاضلابي على إثرائك النقاش..
أرجو أن أكتفي بهذا القدر فواقع الحال يُغني عن المقال..
ولكن...
يبقى في النفس شئٌ من حتى.