زيارتي لمِستر جوّن ديّفز في نيويورك عام 3099، ووصيّة عوض ابراهيم عوض ...

10:54 PM Jul, 20 2015
سودانيز اون لاين
معاوية المدير-بكندا محافظة البرتا
مكتبتى فى سودانيزاونلاين



الكلآم دا قبل سنة 4000 تعمل كِلِك بشويييية بس ...

وصلت يُونين إستيشن منتصف النهار وأجرّت لي بتاع كارو من الـ42،
ؤُ قبل يتحرّك سعلتو، يا زول بتعرف بيت ناس مِستر جون ديفز اللكان
سنيتور في الكونجرس ؟.
قال لي، بالحيّل، الزول دا ساكن في منهاتِن، ؤُ جاراً لي ناس دِينزِل وآشنطون
الحيطة بالحيّطة .
قتلو، اكان كدي إتوكّل تب .
ياآآآآآآآ الله حتي اتخارجنا من الـ42 لأنو الجماعة إتحاوطونا من كل الجهات،
الدآير يبيعلنا إسكِراتش، والدآير يبيعلنا مساويك، والدآير يبيعلنا جُكاكة شربات،
والدآير يبيعلنا تِشوّز، والدآير يبيعلنا لآلوّب، وهكذا .
بجاي بجاي الراجل وصلني البيت، واديتو الفي النصيب . قال لي يا ابن العم
زِيّس إز نوط إنيف، ؤُ علي بالطلآق ما بتخارج معاي .
قُتلو، أها كِدا كيف ؟.
قال لي، قوّض بِلِس يوو، ما قصرّت تب .
دقيت الباب، ردّ علي مِستر ديفز بصوت جهوري، مرحب حبابك، ادخل
دوور إز اوّبن .
بعد شويّة فتح الباب . تأملت في الرجل فوجدته فارع الطول كث الأشناب
أصلع مع شعر طويل بجنبات الراس، سفتو دُقار لوري، كافي العراقي بين
ضراعو ؤُ سكين الضراع، لآحظت حِجبات في ضراعو اليمين .
، إتفضّل، إتفضّل، نو دآوُت إتز لآيك يوّر هاوُس .
تنقلت ببصري في الحوش، علي يميني مزيرة فيها زيرين تِحِتِن جدآدة رآكضة،
ؤُ مُصلآية معلقة في الحيّطة، ؤُ بِرِش مشرور فوقو عيش متلمين فوقو كميّة من
ناس ود ابرك ؤُ عشوش أقلق مِستر ديفز نقدهن للعيش بدرآبة خلتِن إتشتتن جزء
فوق راس البيت ؤُ جزء فوق حبل الغسيل، حبل الغسيل فوقو تيبآن ؤُ سراويّل
ؤُ عراريق ؤُ ترينق سُوّت، البيت اوضتين خلف خلآف . مِستر ديفز صفّق
إيدينو وانا دخلت ورآهو .
، حبابك إتفضّل، إتفضّل، يا باربرا، افقعيلك جنا جدادآت للضيف دا، ؤُ سويّلك
موية ليمون .
، اوكِي هنِي، من مآي آييز .
أهلاً حبابك، إتفضّل اشرب الشربات . ما عرفتك انا .
قتلو، انا جاي من طرف بروف عوض ابراهيم عوض .
يا سلآلآلآلآلآم، جاي من طرف العوض !. ؤُ قام تاني سلّم علي بلأحضان .
العوض اماني ماهو راجلاً عديّل، إللي عندو شوية طنقعة، ما خلآها ؟.
قُتلو، ما خلآها .
قال لي، ايّ، القِرد العوّد ما بتعلّم الرقيص، عِلآ العوض دا فضلو علينا كبير بالحيل،
كان ما هو ما كُنا نحن هسّع في الحالة دي . واشار بيده لرجل قد تجاوز التسعين من
عمره، مِتربّع في قلب العنقريب ؤُ يهِش في الضُبان من حوله بضنب توّر، ؤُ يبزّغ
والجداد يشيّل ؤُ ينقّد في البُزآغ، إتذكرت الجنا جدآت الدايرين يفقعوهن لي . هسّع
ابوي دا كان ما العوض كان يكون في الفوكس هوم، هو وابوهو الفي بطن اللوضة
ديّك .
بعد شوية سمعت ليك صوت من بطن اللوضة، شط اوول ويندوز آي دو نوط نِيّد
زِسيّس هبوب تُو كم إن، آند بُوت زآ دونكيس اون زآ تيبُل .
مِستر ديفز قال لي، اها هسّع دا لآمِن خرّف قاعد معنا، تقولِي شِنو ؟.
لآحظت مِستر ديفز عندو بعض لكنة شايقية، وتتخلل كلآمه بعض الكلمات الإنجليزية
عكس الجيل الجديد الذي يتحدث عاميتنا بطلآقة، أما العجايز اللِتنين فزي عاجز
الدناقلة والمحس عندنا يرطنو إنقليزي ساااااكت، يا الله تفرز لك منهم كلمتين .
مِستر ديفز قال لي، عارف، العوض دا انا زمااااان اديتو سِر، قُتلو اللوتري دا
نحن سويناهو مخسوس عشانكم نعمننا بندور نتعلم منكم خسايلكم ؤُ عاداتكم، قال لِي
انا بمشي احدث أهلي . قُتلو عآد اكان حدستهم انا بنكرك حطب، المطموص مشى
حدسُن عِلِي حديسو نفعنا بالحيل . العوض راجلاً مُو هيّن .
بعد شوية اسمعلك باربرا شابة فوق الحيطة ؤُ تكورك، سِتي نوّر، سِتي نوّر .
يا باربرا تبربِري في تُرعة ابو العاص، بتكوركِيلِي نُصّت نهار دايرِي شِنو ؟.
الرسول فوقك بدورلِي طايوقِي جانا ضيف من السفر .
مِستر ديفز قال لي، جارتنا دي من القرير، أمانة ماها مرةً عديلة، وكِت تنزل
البلد تجيبلنا معاها البركاوي والنبق، والحرجل، ؤُ لي عِن قراصة التمر دي
تجي شايلآها . العوض دا إن شاء الله يتبارك، كان ماهو هسّع كان كوووولنا
حصلنا تقريط شديد في الميّن بِريّن ؤُ بقينا أجسام البغال وأحلآم العصافير .
قُتلو يا مِستر ديفز انا بعد دا ادوني خاتركم، وراي مشاوير كتيرة .
يا زول حرّم تتغدا معانا، كلآمك دا ما بيبقى .
قُتلو كتّر خيّرك، انا معاي وصايا اللت ناس ؤُ ماشي كليفورنيا ؤُ سياتل، بجيكم
مرّة تانية .
سمح سلّم علي الوِليدآت، يا باربرا شلسي مشت ويّن ؟
مشت ناس كلينتون عندهم عليّم عروس، ساندرا بنتهُن داروها ؤُ عرسا الشهر الجاي.
سمِح الجنوّن مشو وين ؟.
مشو مديسون إسكوير، في مبارأة اللت سكج مكج .
معليش يا مِستر ديفز اسمح لي امشي، بجي اسلّم عليهُن مرّة تانية .
يا بربرا تعالي سلمي علي الضيف دا جاي من العوض .
باربرا جات مِتبلِمة بالتوب، ؤُ قالت كدي رمت التوب فوق إيدا مدتا لي بالسلآم
ؤُ هي مدنقرة سألتي، العوض ؤُ وِليداتو نعلهم طيبين ؟.
قتلها بخيّر ؤُ يسلمو عليكم كتيّر ؤُ منتظرين زيارتكم . أها، يا جماعة انا اللمشي .
باربرا قالت لي، يا دا ما تقعد تتغدا معانا .
قتلها كتّر خيركم مرّة تانية .
باربرا، عليك الله سلّم علي العوض ؤُ وليداتو كتيّر، الوِليدات اكان في كانو في كانو
بيوصلوك المحطة .
كتّر خيّرك يا حاجة .
مِستر ديفز طلع مقدمني للباب .
مِستر ديفز، اكان بضرب لي جون كلينتون يجي يوصلك برقشتو لكن زي الساعة دي
بيكون ماخد قيلولة في الهآي بآرك .
كتّر خيرك يا حاج، أها ودعتك الله .
قِبلنا وِداعت الله، لا تنسى تسلم علي العوض ؤُ وِليداتو، ؤُ قولو مِستر ديفز راجيك .
إن شاء الله . أها، مع السلآمة .
الله يسلمك يا ولدي، إن شاء الله ربنا يغتي عليك ...

سلام ود المدير
لكن انت ما خطر عديل ، لكن نسيت (قلب الهوبه).
تعرف سوى ليك فيديو مع الترجمة على الشريط .لهذا الزيارة.
ما تلوم الزول إنتا ما سمعت إنّو أصل موسيقى الرأب سودانى ؟؟؟؟؟

ههههههه حلوة و الله يا ود المدير
لكن كمان العوض ما ظنيتو كان قاصد ناس الضهاري لمن قال الامريكان كان دايرين يتعلموا عادات السودانيين
الزول باقي لي كان قاصد ناس البنادر آزول.. تقوم ات تجي تمرقها ليهو في ابكريميت يا قول حبوبتي مدينة بت زروق.

يا لخيالك الفنان يا المدير
ما أحلاها عيدية
يقطّعك كان ما اديتها لي تروس

Quote: سلام ود المدير لكن انت ما خطر عديل ، لكن نسيت (قلب الهوبه). تعرف سوى ليك فيديو مع الترجمة على الشريط .لهذا الزيارة. ما تلوم الزول إنتا ما سمعت إنّو أصل موسيقى الرأب سودانى ؟؟؟؟؟

سلآمات يا هاشم .

يا اخي اصل موسيقى الرآب سوداني دي اوّل مرّة أسمع بيها،
بس خليها في سِرّك لا يسمع بها العوض .

الفيديو علي اخونا تِروس حسب إقتراح ود الزبير ...

طيب كان بلد عمك جون ديفيز دي سقطنا حجرا ولحقناها أمات طه في ٣٠٩٩، بلد أهل العوض زااتا يكون حالها كيف للوقت داك...؟؟

كل سنة و انت و الأسرة طيبين يا معاوية ربنا يحقق أمانيكم و الله يجازي محنك.

Quote: ههههههه حلوة و الله يا ود المدير لكن كمان العوض ما ظنيتو كان قاصد ناس الضهاري لمن قال الامريكان كان دايرين يتعلموا عادات السودانيين الزول باقي لي كان قاصد ناس البنادر آزول.. تقوم ات تجي تمرقها ليهو في ابكريميت يا قول حبوبتي مدينة بت زروق.

غايتو يا دكتور الجماعة ديل انا وكِت وصلتهم لقيتم من الدِفيتة و ابكريمت وإنت
ماشي، الظاهر الزول الوصل قبلي وصّل كلآم الدكتور بالغلط . غايتو انا لقيتم
إتبوجنو بالحيل ؤُ نقلت الحالة البقت عليهم ...

سلام

عشان ما تقول كلامى بتاع ( دجال )
. اداناة نص الخبر محتفظ بة
لليوم الأسود عشان ارفع قضية
تعويض ههههههه.


أسلوب الراب موجود في المديح والدوبيت ويرتبط بالنفير والفزع - صحيفة الراكوبة

http://www.alrakoba.net/news-action-show-id-163106.htmhttp://www.alrakoba.net/news-action-show-id-163106.htm
09-10-2014 11:23 PMبواسطة SMC الخرطوم أخضعت تجربة موسيقى الراب في الغناء السوداني إلى التحليل والنقد من قبل باحثين ونقاد، وذلك بهدف الوقوف على التجربة ومضامينها بعد انتشار هذا النمط وسط شريحة الشباب، ففيما أكد بعضهم أن الطريقة التي يؤدى بها الراب موجودة في الموروثات السودانية، حذر من المساس بالعادات والتقاليد السودانية في التجربة داعين لتحصين المجتمع من الاستيلاب الثقافي. وقال د. صلاح فرج الله الناقد الفني في منتدى (smc) اليوم ان التجديد في الفن هو تطور طبيعي مأخوذ من الحياة وتطورها، مؤكداً ان الفن ينبع أصلاً من الطبيعة وحراك المجتمع وتطوره. مضيفاً ان هناك تجارب كثيرة في الغناء والموسيقى وجدت نقداً لاذعاً لكنها أثبتت وجودها من خلال المواكبة واتباع الأساليب التي تتماشى مع أذواق المجتمع. من جانبه قال الأستاذ طارق شريف الصحفي والناقد الفني ان الراب هو نوع من الموسيقى والغناء ظهر في الولايات المتحدة الأمريكية، مضيفاً أنه أصبح طابعاً لأنواع مختلفة من الغناء والموسيقى. موضحاً ان الربيع العربي أسهم بشكل واضح في انتشار أغنية الراب في كثير من البلدان العربية، مشيراً إلى ان الراب يمكن ان يكون مدخل للاستيلاب الثقافي. وأبان ان ما يميز الراب عن غيره من الغناء أنه عفوي وارتجالي ويعمل على استقطاب شرائح المجتمع باعتباره يناقش قضاياهم بطريقة عفوية قائلاً إن لغة الراب هي لغة الحياة اليومية. وشدّد شريف على أهمية ان تخضع التجربة إلى المزيد من النقد حتى لا نجنح إلى الاستيلاب الثقافي من الغرب، وأنه لابد من تقديم راب سوداني خالص من الشوائب الغربية ، داعياً للاهتمام بالثقافة من قبل الدولة باعتبارها أساس لبناء الأمم. وفي السياق أوضح الباحث عبد الرحمن مساعد الكتيابي ان الراب السوداني قديم قدم الزمان مشيراً إلى أنه ظهر قديماً في المديح والدوبيت وأذكار الصوفية، مقدماً نماذجاً لذلك. وقال إن إيقاعات الراب لها ارتباط بالعادات والتقاليد خاصة في الفزع والنفير وغيره من الحراك الاجتماعي للمجتمع. وقدمت فرقة (05 بروديشن) نماذج من أغنية وموسيقى الراب تركزت في مجملها حول قضايا اجتماعية تهم المجتمع السوداني خاصة في (دعوة الشباب للزواج والأم وقاضايا الشباب والواقع الحالي). 0 | 0 | 76سلوب الراب موجود في المديح والدوبيت ويرتبط بالنفير والفزع - صحيفة الراكوبة

http://www.alrakoba.net/news-action-show-id-163106.htmhttp://www.alrakoba.net/news-action-show-id-163106.htm
09-10-2014 11:23 PMبواسطة SMC الخرطوم أخضعت تجربة موسيقى الراب في الغناء السوداني إلى التحليل والنقد من قبل باحثين ونقاد، وذلك بهدف الوقوف على التجربة ومضامينها بعد انتشار هذا النمط وسط شريحة الشباب، ففيما أكد بعضهم أن الطريقة التي يؤدى بها الراب موجودة في الموروثات السودانية، حذر من المساس بالعادات والتقاليد السودانية في التجربة داعين لتحصين المجتمع من الاستيلاب الثقافي. وقال د. صلاح فرج الله الناقد الفني في منتدى (smc) اليوم ان التجديد في الفن هو تطور طبيعي مأخوذ من الحياة وتطورها، مؤكداً ان الفن ينبع أصلاً من الطبيعة وحراك المجتمع وتطوره. مضيفاً ان هناك تجارب كثيرة في الغناء والموسيقى وجدت نقداً لاذعاً لكنها أثبتت وجودها من خلال المواكبة واتباع الأساليب التي تتماشى مع أذواق المجتمع. من جانبه قال الأستاذ طارق شريف الصحفي والناقد الفني ان الراب هو نوع من الموسيقى والغناء ظهر في الولايات المتحدة الأمريكية، مضيفاً أنه أصبح طابعاً لأنواع مختلفة من الغناء والموسيقى. موضحاً ان الربيع العربي أسهم بشكل واضح في انتشار أغنية الراب في كثير من البلدان العربية، مشيراً إلى ان الراب يمكن ان يكون مدخل للاستيلاب الثقافي. وأبان ان ما يميز الراب عن غيره من الغناء أنه عفوي وارتجالي ويعمل على استقطاب شرائح المجتمع باعتباره يناقش قضاياهم بطريقة عفوية قائلاً إن لغة الراب هي لغة الحياة اليومية. وشدّد شريف على أهمية ان تخضع التجربة إلى المزيد من النقد حتى لا نجنح إلى الاستيلاب الثقافي من الغرب، وأنه لابد من تقديم راب سوداني خالص من الشوائب الغربية ، داعياً للاهتمام بالثقافة من قبل الدولة باعتبارها أساس لبناء الأمم. وفي السياق أوضح الباحث عبد الرحمن مساعد الكتيابي ان الراب السوداني قديم قدم الزمان مشيراً إلى أنه ظهر قديماً في المديح والدوبيت وأذكار الصوفية، مقدماً نماذجاً لذلك. وقال إن إيقاعات الراب لها ارتباط بالعادات والتقاليد خاصة في الفزع والنفير وغيره من الحراك الاجتماعي للمجتمع. وقدمت فرقة (05 بروديشن) نماذج من أغنية وموسيقى الراب تركزت في مجملها حول قضايا اجتماعية تهم المجتمع السوداني خاصة في (دعوة الشباب للزواج والأم وقاضايا الشباب والواقع الحالي). 0 | 0 | 76

Quote: يا لخيالك الفنان يا المدير ما أحلاها عيدية يقطّعك كان ما اديتها لي تروس

تروس إحتمال يزورنا في اليومين الجايات ديل، لو لفقت
معاهو ياخدا في بطن إيدو إن شاء الله ...

Quote: طيب كان بلد عمك جون ديفيز دي سقطنا حجرا ولحقناها أمات طه في ٣٠٩٩، بلد أهل العوض زااتا يكون حالها كيف للوقت داك...؟؟

أمانة بآلك ما طويل يا السيف أخوي، دحين باقيلك بلد أهل العوض
للوكت دآك دايرة تبقى قاعدة فوق ضهر البسيطة ؟!...

سلام يا معاوية ود المدير
وكل سنة طيبين طيبين

رهيبة وعقبال نشوفها من تروس.

ياسر

Quote: كل سنة و انت و الأسرة طيبين يا معاوية ربنا يحقق أمانيكم و الله يجازي محنك.

وإنت طيّب يا الوليد،
يا اخي والله النِيّة معقودة عِلآ المنادي ما نادا ...

هههههه
غايتو وقعتو سودة
نجضتو نجاض
يعني الناس تقول ابونا ادم وعنترة سودانيين وتمسكو الزول دة في كضبة صغيرة قدر دة
تشكر
وعيد سعيد عليك انت و ضيوفك

سلآمات يا عبد المنعم .

سعلت مستر ديفز من دينزل واشنطن، قال لي كان عندك وكِت بوديك
ليهو في ملجة الخدار عندو دردآقة، ؤُ حريف جداً في الزوغان من ناس
الضرايب ...

Quote: سلام يا معاوية ود المدير وكل سنة طيبين طيبين رهيبة وعقبال نشوفها من تروس. ياسر

سلآمات يا ياسر، وانتو طيبين .

تُشكر، وما زلنا في إنتظار تروس ...

Quote: Adil Hussein · SKMJ Higher Secondary School مبالغة ...

مشكور يا عادل علي المرور والتعليق ...

ود المدير
تحية عذبة رقيقة

خلينا الخواجه والعوض بقينا في صور تانيه صدقي لا توجد الا في امثال خيالكم الخصيب
تلك ايام وصور تبقي منها التداعيات واجترار الزكريات اتساقا مع العولمة

Quote: تنقلت ببصري في الحوش، علي يميني مزيرة فيها زيرين تِحِتِن جدآدة رآكضة، ؤُ مُصلآية معلقة في الحيّطة، ؤُ بِرِش مشرور فوقو عيش متلمين فوقو كميّة من ناس ود ابرك ؤُ عشوش أقلق مِستر ديفز نقدهن للعيش بدرآبة خلتِن إتشتتن جزء فوق راس البيت ؤُ جزء فوق حبل الغسيل، حبل الغسيل فوقو تيبآن ؤُ سراويّل ؤُ عراريق ؤُ ترينق سُوّت، البيت اوضتين خلف خلآف . مِستر ديفز صفّق إيدينو وانا دخلت ورآهو .

Quote: العلي علي ود المدير يا اخ بقيت زي عمتي نفيسة مافي مرة تبوبر جنبها إلا تديها في راسا ,, يا اخي في نواحيكم دي في ناس كتار بوبارين عليك بيهم بدون اي رحمة .

ههههههههههههههههه،

يا العلي ذكرتني حبوبتاً لينا في وآحدة عندها ولداً ليها ضابط صحة ؤُ في ايّ لمّة نسوان
قاعدة تتبوبر، ولدي الضابط فعل ؤُ ولدي الضابط ترك . وكِت كترّت الحكاية يوم في لمّة
نسوان، المرا طوالي قالت ولدي الضابط، بس حبوبتنا دي قاطعتا ليك، عآن ها الولدي
الضابط، ولدي الضابط، ولدك ضابط نيشان واللآ ضابط ميدان ؟، مُو ضابط ضُبان .

قانصين يا العلي، وتشكر علي المرور ...

Quote: ود المدير تحية عذبة رقيقة خلينا الخواجه والعوض بقينا في صور تانيه صدقي لا توجد الا في امثال خيالكم الخصيب تلك ايام وصور تبقي منها التداعيات واجترار الزكريات اتساقا مع العولمة

حيّاك الغمام يا قريبي .

الأيام دُول، ورغم انّ الذآكرة شاخت إلا انّ الأشياء
الجميلة تظل عالقة بها .

مودتي...

ياخ أنت زول مسخوت و الله ...

.
.
.
ود المدير سلام

قمة الروعه والابداع

والله قريت البوست ده اكتر من عشرين مره
وفي كل مره بكتشف صوره جديده ما بين
سطورك الفائقة الابداع والتصوير الراقي
في وصف بعض الاشياء التي لا يعرفها
الكثيرون منا
.
.
.
.
.
.

هههههه دي حالتا حتيته من الرباطاب !
العجوز القاعد بى غادي داك ..
كان ما خايف الكضب ياها صورة الزول الخاتنو لينا في كتاب تاريخ عصر التنوير الانترنتي..
اسمو ود المدير قالو زماااان كان بكتب كلاما حلو في موقع كان اسمو سودانيز ايام الناس بتكاتبو بالنت .
اسّق ديفز.

Quote: ياخ أنت زول مسخوت و الله ...

ههههههههههه،

سلآمات يا خالد .

تصدق العوض ليوم الليلة دي متقطع للناس لحم في
قُفة إنو كلآمو صُح، عجب والله !...

Quote: ود المدير سلام قمة الروعه والابداع والله قريت البوست ده اكتر من عشرين مره وفي كل مره بكتشف صوره جديده ما بين سطورك الفائقة الابداع والتصوير الراقي في وصف بعض الاشياء التي لا يعرفها الكثيرون منا

كتّر خيّرك كتير يا بشير علي المتابعة، وأتمنى ان تجد
بين سطوري ما هو مفيد ويستحق المتابعة ...

حبيبنا ود المدير
الشوق كميات ياخي وكل سنة وانت طيب ياخي
طلب بسيط جداً ياخي
اخونا محمد عبد الماجد الصائم كره اللوتري والامريكان عيشتهم وكرهنا نحن كمان
شوف اخونا الكونجرسمان مستر ديفيز دا يشوف ليهو حل للزول دا كان ربنا يفرجها على خلقو، باقي الزول دا مكججها على لوتراب البورد كلهم
اما بالنسبة لشخصي الكريم احلف وانت صادق وقول لمستر ديفيز
على الطلاق ودا الفكي دا من اهل العوض ذاتهم

Quote: هههههه غايتو وقعتو سودة نجضتو نجاض يعني الناس تقول ابونا ادم وعنترة سودانيين وتمسكو الزول دة في كضبة صغيرة قدر دة تشكر

عبد الحفيض،
سلآم .

يا اخوي العوض قنطر نفسو . والله صحي .
قالوا لي يوم الليلة يردح ؤُ مُصر علي شخصية مستر ديفز
بتاع الكونقرس . تصدق !...

نسي البر-off- ان يقول--- رايت في ما يري النائم-- ويحلف بالحي الدائم-

Quote: هههههه دي حالتا حتيته من الرباطاب ! العجوز القاعد بى غادي داك .. كان ما خايف الكضب ياها صورة الزول الخاتنو لينا في كتاب تاريخ عصر التنوير الانترنتي.. اسمو ود المدير قالو زماااان كان بكتب كلاما حلو في موقع كان اسمو سودانيز ايام الناس بتكاتبو بالنت . اسّق ديفز.

يا ملك،
هي اصلآ لحمة من تآلآ ابوي الله يرحمو .
عارف، عندنا صاحباً لينا في مناسبة بيغسّل لي احمد عمر الرباطابي في إيدنو، واحمد
عمر بيخابر فيهو . قام صاحبنا إتماسخ علي احمد عمر، اها، احمد عمر قالو، يا جنا
إنت رباطابي ؟. صاحبنا قالو، فيّ لحمة رباطاب . احمد عمر قالو، والله يا جنا اصِلا
زي نقطة الجاز في الموية، قدُر ما تبقى سغيّرة تظهر .

شُفتا زمنا سمح كيف ؟!، مافي حاجة اسما سنير هوم،
كتّر خيّرو العوض ...

Quote: حبيبنا ود المدير الشوق كميات ياخي وكل سنة وانت طيب ياخي طلب بسيط جداً ياخي اخونا محمد عبد الماجد الصائم كره اللوتري والامريكان عيشتهم وكرهنا نحن كمان شوف اخونا الكونجرسمان مستر ديفيز دا يشوف ليهو حل للزول دا كان ربنا يفرجها على خلقو، باقي الزول دا مكججها على لوتراب البورد كلهم اما بالنسبة لشخصي الكريم احلف وانت صادق وقول لمستر ديفيز على الطلاق ودا الفكي دا من اهل العوض ذاتهم

يا ود الفكي يا اخي إنت وين ؟،
حليل ايامنا قدُر ما سونقنا جبادتنا ما جابت لها شي .

بالله ود الصايم دا ردح جِنِس ردحي !، لآمن خلآ حوش بكري ما عِرِف شي،
العوض جاتو مقنطرة شِدّة مُو مالي إيدو المباصا دي رفض يباصيها، لكن قول لود الصايم
ابشر الفرج قرّب . اما بخسوسك انا ما نسيتك مستر ديفز مسكتو من إيدو ؤُ قتلو اخونا
ود الفكي دا مغرود بالحيل، ؤُ هو زاتو كان جبتوهو حا تلقو مفعولو اسرع من الكافينول في
ترويضكم وترويض اجيالكم القادمة . قال لي، نحن ما بنابا زول يجي من طرفك، لكن
لآزم التزكية تجينا من العوض . قُتلو كان كدي هيّنة العوض بنصلو . دحين إنت اصبر ...