فاتحة بابكر ود أبكوع

10:38 AM Jul, 19 2015
سودانيز اون لاين
أبوبكر عباس-الإمارات
مكتبتى فى سودانيزاونلاين



بابكر ود أبكوع مزارع من نواحي أبو حمد، السنة الفتاتت جاب ليهو عشرة شوالات فول مصري ودساهن في المخزن. شهر واحد السنة دي شالن وداهن الخرطوم وجابن ليهو قروش كتيرة خلاص، شال قروشو ومرّ على قريبا ليهو استلم منو الشنطة والريالات والبطانية التركية المرسلن ليهو أخوهو عمر من السعودية. بعد وصل عطبرة أجّر ليهو بوكس واتصل بآسيا مرتو وكلمها بخريف أبو السعن الما خمج.
آسيا رتّبت كامل التراتيب بالرغم من انو اليوم كان أربعا!

Quote: آسيا رتّبت كامل التراتيب بالرغم من انو اليوم كان أربعا!

تاااااني !
ياخي الحتة دي إتا عالجتها بعقلة وسلوك الافندية ..
أهو أنا قت ليك قبال يصحى ود المدير ( الأصلي) .

السبب يا ملك، انو حياة بابكر دخلتها شوية مدنيّة دون بقية أهله، لأنو آسيا مرتو أمها حلبية من نواحي حفير مشّو، وبيتو الوحيد الفيهو غرفة نوم بها سرير واحد، ولا يكثر من صلاة الجامع، ولو لا رشوته لناس الجامع بمطايب خبايز الحلبية كل فترة، شلة الجامع كانت كفرتو!
قبل يدخلوا أبوحمد بشويّة، بتاع البوكس وقف في قهوة للصلاة، بابكر استغل الموقف وجمع معاهو العشا لشيء في نفسه.
وصل البيت مع صلاة العشا، وعزم السواق للعشا عيزومة مراكبية ليس لبخل فيه ولكن انحيازا للريحة التي ميزها وهو بنزل في البطانية.
لحسن الحظ لقى الشفع الاتنين نائمين، وآسيا يا ها آسيا كما تخيلها بالتلفون، وفي الطبلية دمعة جداد وقراصة تمر بالسمنة.
فتح الشنطة وأدى آسيا توبنها ولبسات العيال ولقى عمر حاشر ليهو ريحتين من عبد الصمد القرشي وأخوانه، بسرو دعا لخادم الحرمين بطولة العمر.