+++ حرام عليكم .. ليه شرطتو الخرطة .. !! +++

08:41 PM Jul, 15 2015
سودانيز اون لاين
Sudany Agouz-
مكتبتى فى سودانيزاونلاين



حرام عليكم .. ليه شرطتو الخرطة .. !!
ارنست ارجانوس جبران
حرام عليكم .. ليه شرطتو الخرطة ..!!
مش كفاية شرطتو عينا .. جبتو لينا جلطة ..
بالمناسبة .. جيتكم دى للحكم .. كانت أكبر غلطة ..
مش أول ما جيتو .. كتلتو مجدى محجوب .. وجرجس الطيار .. وبعَدُم .. برضو سال الدم أنهار ..
ومنهم و قبّال 8 سنوات بالضبط .. كانوا شهدا كجبار .. الشباب الطيبين فى منطقة النوبة فى الشمال ...
قايلنها شطارة ..
قايلنها شطارة ..
قايلنها لعب كورة شراب فى الحارة ..
حارة .. ومحارة .. وسيجارة .. إياك اعنى واسمعى يا جارة ..
فاكرين لما تزيدوا فى الضغط .. وتتمادوا فى الغلط .. الشعب حيسكت ولا حيرقد لط ..
فى الحقيقة .. انتو قاعدين وما عارفين حاجة .. لو مافى سلام .. حيكون جوع و قحط ..
ما انتو قلبكم جافى .. قاعدين فوق الكراسى .. ما جايبين خبار العريان الماشى حافى ...
ولى حسه دى .. نازلين رش .. فى البشر .. بالطيارات فى دارفور ... فى كردفان ..
وفى كل مكان .. لا بهمكم .. وطن .. ولا إنسان ..
يا حليل وطنا حق زمان ..
يا حليل خرطتنا حقت زمان ..
يا حليل سودانا حق زمان ..
سودانا .. اللى كان .. أيام كان ياما كان .. اللى كان بيحكى بيهو فلان و فلتكان ..
سودانا .. اللى كانت خرطتو .. تملا العين والكيان ..
حسدونا الناس عشان الخرطة السمحة ..
حسدونا الناس .. عشان اللمة السمحة ..
من قمنا .. تبينا ربينا على شكل خرطتنا السمحة ..
كل يوم فى حصة الجغرافيا .. ياها الخرطة .. حفظناها حفظ ..
بقت محفورة فى الوجدان .. وما ممكن تمّحِى .. ولا تتنسى .. حتى ولو عجزنا .. وأصابنا مرض النسيان..
ياها خرطتنا .. محفوظة فى الوجدان .. .
والتاريخ يحكى .. وجدودنا يحكوا .. وحبوباتنا يحكن ..
كيف كان سودانا .. سودانا حق زمان ...
لاكين .. جو ناس الحاسد الذى حسد ..
جابو مقص كبير .. قصو بيهو الخرطة .
حسة .. بقى شكلها .. كيف كده .. حرام عليكم ..
حرام عليكم .. شرطتو الخرطة .
حرام عليكم .. بوظتو الخلطة .
حرام عليكم .. جبتو لينا جلطة ..
بقيتو .. بقيتو فى الحلقوم ظلطة .
مرة تانية .. جَيّتكم دى كانت أكبر غلطة ...
قعادكم بقى حراق ..حراق بالحيل ..بس شطة
والقليب الصغيرون ..
.. القليب الصغيرون حزنان .. ممكون .. ..
صحى .. هو قليباً .. صغيرون ..
لاكنو .. لاكنو وحاتكم .. هو كبير بالحيل .. شايل فيهو سودانا بخرطتو القديمة
قبال ما يقصوها .. قبال .. سودانا .. قبال ما يصغروهو .. قبال ما يشرطو خرطتو السمحة ..
قبال ما يبوظو سمعتو .. قبال ما يشوهو شكلو ..
الله يسامح اللى كان السبب ..
بصراحة .. ما بقدر أنوم .. لما أتخيل ..
نص السودان اللى تحت .. مافيش ..
ما قادر اتصور خرطتو المقطوعة ..
شكلها بقى شين بالحيل .. يعنى دينق وينو .. ووين ملوال ..
وصديقنا منقو زمبيرى .. الدرسونا ليهو.. ياهو.. صديقنا حق زمان .. راح وين ..
يعنى حسى دى أهل منقو زمبيرى .. ما ممكن يتلاقو مع أهل صديق .. صديق صديقنا اللى كان فى القولد ..
يعنى حسه .. خلو ناس الجنوب .. ما يتلاقو مع ناس النوبة اللى فوق ..
عليكم الله .. عليكم الله .. بدل ما يخلو ناس الجنوب يعرفو حضارة الشمال .. وين حضارة النوبة .. وين اهرامات النوبة ..
يا حليلك يا حبوبة .. لو كنتِ عايشة .. ما كان برضيك .. حالنا المايل دا ..
لاكين نقول شنو .. أيوه .. لازم نقيف و نتكلم ونقول .. ونسألُم ؟؟؟ ..
يا اخوانا .. ليه .. ليه .. شرطتو الخرطة .. ؟؟.
يا اخوانا .. ليه فصلتو الجنوب عن الشمال ..؟.
ليه .. شينتو داك .. الجمال ؟؟..
لما أعاين فى الخرطة حقت حسه .. أشعر بشعور .. غريب ..
أشعر .. أنا غريب .. آى .. أنا خجلان .. شاعر كده .. أنا بقيت عريان ...
بجد ..أنا شاعر .. انو .. أنا .. ما لابس سروال ..
آى .. أنا شاعر .. بقيت عريان .. بدون سروال .. وكمان سودانا ..
بقى عريان وبدون سروال .. يغطى نصو التحتانى ..
يا ناس فضحتونا .. خليتو الناس تقول كانى ومانى ..
يعنى شوية .. شوية .. يجيو مقصهم الكبير داك .. ويقصو حته تانى ..
الله يسامح اللى كان الجانى ...
آى .. يمكن الليلة دى يقصوا دارفور .. وبكره دى يقصوا كردفان ..
يعنى فى النهاية .. يكونوا قاعدين مبسوطين .. فى الخرطوم .. مبسوطين نايمين نوم ..
.وما عارفين .. قُعادم دا بقى .. شوكة فى الحلقوم ..
يا حليل سودانا حق زمان .. أيام ما كنا صغار وكنا نكُدَ الدوم ..
.. آه .. آه .. من وين ديل جونا .. قطعوا علينا قعدتنا .. شربتنا لجبنتنا .. حتى ما خلونا نخلص فناجينا ..
وجينا جايين .. عشان تفرقتهم فى الدين .. قطعوا علينا أحلامنا .. وطموحاتنا .. جينا لبلاد الحرية .. وياها الجية ..آه .. آه ..
ما علينا .. نرجع لموضوعنا ...
يعنى نسأل و نقول تانى .. وين باقى الخرطة .. وين بحر الجبل .. وين نمولى .. وين جنقلى ومشروع جنقلى ..
فى حاجة ناقصة .. فى حاجة نافصة .. وين المويه .. اللى جاية ..
من بحيرة فكتوريا .. خلاص انقطعت .. لا مويه .. لا سمك ..
.. لا سمّاك .. عملتوها .. وبقيتو تتاوقو من الشباك ..
آى .. لا موية .. ولا سمك .. خرطتكم بتقول كده ...
خرطة شنو .. الخرطة .. بقت كده صلعة ....
يا جماعة .. الواحد يعمل شنو .. نقول شنو ..
يعنى الواحد يكورك .. ولا يجيب ليهو كوريك .
يخمخم جواهو .. القليب المكتول كمد ..
القليب المصرور جواهو سودانا .. حق زمان ... ..
آآى ..سودان حق زمان .. لساتو .. مصرور جوه القليب ..
أآى أقول كمان .. بحبو .. بحبو .. وبحب ناسو حقين زمان ..
لكنو لساتو صابر .. وممكون .. ومكتول كمد .. ..قليباً .. محروق
ناس كتار ما بصدقو .. بيقولوا .. دا مجنون .. يا ناس وينُم ناس حَمد ..
ما قلتليكم .. القليب مكتول كمد .. ياهو .. أنا الزل زاتو اللى كان ساكن فى بحرى حلة حمد
لما اتذكر وأحكى .. وأحكى ليهم سودانا حق زمان .. كان كيفنو نقول شنو بس ....
وكيف كانت القعدات .. كيف كانت الشيات .. والمنقد والكانون ..
وكيف كان الفانوس .. وقراية الفانوس ..
والعلم اللى كان فى الدقنوس .. !! .. وكتاب المطالعة والمحفوظات ...
مع غنمى ترعى .. وسط المرعى ..
ونحن إذا جاء المطر ..
نجرى ونلعب بالزهر .. ..
وكريت مالا .. أبت الرجوع للبيت ..
وبيت الجاك .. وما أدراك .. بالبيت الذى بناهو الجاك ..
يانا نحنا ناس البروش .. القرينا فوق البروش .. واتعلمنا .. وكتبنا الحروف فوق الأرض ..
وفى حصة الأعمال .. كنا نعمل بالطين .. ونلعب بالطين .. ولمن نرجع البيت .. نرش الحوش ..
وتتلم أجمل لمة .. لمة ضيوف الحوش المرشوش ..
وبيغادى .. ناس المزارع .. البسموها البلاد .. وناس هناك .. قاعدين يحاحو فى الطير ..
وناس الحفير .. مع الحمير .. لساتم بيقولو فى الدوباى .. حق زمان .. ..
آآى ..أنا لما أتذكر .. كيف كنت أقعد أتحكر .. فوق البمبر ..
حارس الشاى .. لمان يغلى فوق كانون الجمر .. أنفخ فيهو .. ولا أجيب ليهو هبابة .. أخلي ليك الجمر يبقى لونو أحمر .. واللبن المقنن .. يا ولد خلى بالك من اللبن .. أوع يفور .. يدفق .. عارف لو دفق .. بجى اقطع راسك .. بالمناسبة أقطع راسك دى من عندى أنا .. لأنو أبوى الله يرحمو ما كان يطلع ليهو كلمة بطالة .. بس لما نغلط .. كان يقولى .. يا غبى .. سمح يا ابوى .. آى الشاى باللبن المقنن .. نشربو .. ونقعد تفنن ..
تكتب ليك قصيدة عن بت سمحة قاعدة تتحنن .. تتجهز لعرس بكره .. والفنانين .. والدلوكة والرقيص .. رقصة الحمامة .. أبشر يا عريس .. والزغاريد .. وقطع الرحط .. والشباب اللى بِعرض .. والجرتق .. والدلكة .. والخُمْرَة .. وحفرة الدخان .. والحِنة .. والعروس المُكبرته .. ونحنا يانا نحنا .. نحنا فى وادى وناس البندر فى وادى آخر .. ..
وناس البندر قالوا عايشين فى المدينة .. عندهم كهربه .. لاكين .. ديمة قاطعة ..
عليكم الله شيلو كهربتكم دى .. ما دايرنا . .
وجيبوا لينا رتاينا .. وفوانيسنا .. وكوانينا ..
دايرين ناسنا حقين زمان .. بطيبتم .. وبونساتم .. يا حليلم ..
يا اخوانا ..
دايرين ناسنا حقين زمان ..
دايرين سودانا حق زمان ..
وكمان .. رجعوا لينا خرطتنا حقت زمان ..
وناسنا حقين زمان ..
مره تانية .. ومرة تالتة .. يا حليل سودانا .. بلاد النوبة .. وحضارة النوبة .. و دارفور .. و يا حليل كردفان و جبال النوبة .. لاكين انتو يا ناس الحكومة أرجوكم .. أرجوكم ما تشرطوا الخرطة تانى .. ياريتكم تلصقوها .. عليكم الله رجعوها لينا تانى ..آ آى رجعوا لينا خرطتنا القديمة .. يعنى جيبوا لينا الجنوب .. ويبقى الشمال مع الجنوب حته واحدة .. وبطلوا الحرب فى الغرب .. مع ناس دارفور وكردفان .. والجبال .. والسودان يرجع زى ما كان زمان .. دايرين سلام .. ووئآم .. نوقف بيهو نزيف الدم .. وخلونا نتلم .. مرة تانية .. من فضلك يا حكومة .. من فضلك يا حكومة .. دايرين سلام .. يعم السودان كله .. وبطلوا تقطيع وشِرّيط فى الخرطة .. قربتو تجيبوا لينا جلطة .. أنا خلاص بقيت بالحيل مرضان ...
خلاص .. انتهى البيان .. الإمضاء .. العجوز الكحيان .. الهايم بحُب السودان .. ارنست ارجانوس جبران
التاريخ 13 يونيو سنة 2015
+++

مرحبا بالحبيب الهميم ارنست

وايام مباركه وكل عام و انت بخير.

يا ارنست بلادنا طولت ليست بخير

ولكن لن نكتفي بالدعاوات فقط

وطالما الحرب لم تكن خيارنا

فاليكن السلام خيارنا.


والسلام يمكن ان نشارك بصنعنه لانه من حقنا

لا نستجدي فيه احد

لا حكومة ولا معارضه السلام من حق الغبش فعليهم ان يتحدوا لينتزعوا السلام.


نساء الجنوب حدث ان اضربنا عن الحقوق الزوجيه من اجل السلام.

الان بفتكر نساء الشمال عليهن دورة اعظم لانه الجرب فتكت بالشعبين في الخريطه المشروطه كما سميتها.




كن بخير وعام جديد سعيد باذن الله بحياة شعبنا الذي انهكته الحروب.

الأخت الحبيبة تراجى ..

كم .. كم أنا سعيد يا تراجى بطلتك البهية بعد طول الغياب ..
وكم أنا سعيد بكلماتك البناءة ..

Quote: مرحبا بالحبيب الهميم ارنست وايام مباركه وكل عام و انت بخير. يا ارنست بلادنا طولت ليست بخير ولكن لن نكتفي بالدعاوات فقط وطالما الحرب لم تكن خيارنا فاليكن السلام خيارنا. والسلام يمكن ان نشارك بصنعنه لانه من حقنا لا نستجدي فيه احد لا حكومة ولا معارضه السلام من حق الغبش فعليهم ان يتحدوا لينتزعوا السلام. نساء الجنوب حدث ان اضربنا عن الحقوق الزوجيه من اجل السلام. الان بفتكر نساء الشمال عليهن دورة اعظم لانه الجرب فتكت بالشعبين في الخريطه المشروطه كما سميتها. كن بخير وعام جديد سعيد باذن الله بحياة شعبنا الذي انهكته الحروب.

نعم .. لابد وأن نعمل سوياً .. كل واحد يعمل فى مجالة لدحر الظلم .. ولتعريف الظالم
إن الله .. لن بنسى المظلومين .. والويل وكل الويل للظالم ..
وإن غداً لناظره قريب ..
الرب يبارك حياتك يا تراجى .. ويكلل مجهوداتك بالبركات ..
بس لى رجاء أخير .. عليك الله يا تراجى .. ما تحرمينا من طلاتك الجميلة دى ..
ونحب نشوفك دايماً ..
أخوك وعمك العجوز ..
ارنست
+++

العزيز عاطف
كل سنة و انتا طيب
كان عندى مداخلة عن القرور و السورو
تحكى عن وطن جمبل عامر بالامن و السلام
بس يا اخوى .. الله فى..

الأخ الحبيب جلال ..

شكراً لمداخلتكم الكريمة ..

Quote: العزيز عاطف كل سنة و انتا طيب كان عندى مداخلة عن القرور و السورو تحكى عن وطن جمبل عامر بالامن و السلام بس يا اخوى .. الله فى..

أقول ليك شنو يا جلجل ..
يا حليل أيام القرقور .. أيام ما كنا بنلعبو سورو ..
ولاسيما .. قرقور الصاج .. المصنوع بواسطة الحدادين ..
لو استطاعت أصابعنا أن تحكى الجلدات اللى أخدتا .. لحكت
أصعب الجلدات .. اللى كان صوتا يقول كع .. كع .. وكثيراً
ما كان الدم يطير .. والذى يثبت مدى الألم .. ولكن كان
كلو يهون .. من أجل اللعب ..
يا حليل الزمن الروح ..

وشكراً مرة أخرى يا أخى الحبيب والجليل جلال ..
أخوكم وعمكم العجوز ..
ارنست (عاطف)
+++

+++

بناء على طلب بعض الأحباء ..
نديلو رفعه ..

مع الشكر الجزيل ..
أخوكم وعمكم العجوز ..
ارنست
+++

الأخ الحبيب مزمل ميرغنى - الفيس بوك
شكراً أخى لتعليقكم الكريم

Quote: يجب فعل شئ.... عدم وجود البديل هو اساس المشكلة. لو وجد لالتف حولهو الغبش..

حقيقة .. المشكلة فى التعدد الكثير لأحزاب المعارضة ..
وهذا يؤدى الى كثرة الإنقسامات ..
ولكن نطلب من الله الإرشاد .. لجلب هذا البديل ..
ولكن بشرط أن يكون هذا البديل وطنياً صالحاً لقيادة البلاد ..
الرب يبارك حياتكم ..
أخوكم وعمكم العجوز ..
ارنست
+++