Post: #1 Title: من معاوية الصائم:عوض إبراهيم عوض يقول أمريكا فكرت اللوتري من أجل السودانيين (فيديو) Author: النذير حجازي Date: 07-15-2015, 01:46 PM
12:46 PM Jul, 15 2015 سودانيز اون لاين النذير حجازي-بلاد الله الواسعة دي، كل شهر في بلد مكتبتى فى سودانيزاونلاين
Post: #2 Title: Re: من معاوية الصائم:عوض إبراهيم عوض يقول أمر� Author: النذير حجازي Date: 07-15-2015, 01:50 PM Parent: #1
يلا يا شباب نسيبكم مع الفيديو وأنا مسافر ميريلاند وما ح يكون عندي نت لمدة يومين، أرقدوا عافية
Post: #3 Title: Re: من معاوية الصائم:عوض إبراهيم عوض يقول أمر� Author: فردوس جامع Date: 07-15-2015, 02:50 PM Parent: #2
سلام النذير البروف ده حيرني حيرة ... هل من المعقول بروف و إعلامي يتونس من غير "طاقيته" العلمية و من دون تمحيص لي ونسات مع أمريكان؟ ونستُه مغلوطة أهداف برنامج اللوتري و أسبابُهُ تربية السينقل بيرنتس ضمور الدماغ- الجهاز العصبي السودانين عشان الحبوبات و البيت المليان ناس, بيربو الأطفال أحسن و عاوزين يصلحوا بيهم الجين بُوول gene pool المُصيبة إنه جادي أو هكذا يبدو!!!
Post: #4 Title: Re: من معاوية الصائم:عوض إبراهيم عوض يقول أمر� Author: Deng Date: 07-15-2015, 03:21 PM Parent: #3
النذير سلامات.
عوض إبراهيم عوض ده حكايتوا حكاية، تفتح أي فضائية سودانية تلقى فيها عوض إبراهيم عوض بيحجي في الناس.
والغريبة في مقدمي البرامج التفزيونية الذين يطبلون لهذا الدجال !
Post: #5 Title: Re: من معاوية الصائم:عوض إبراهيم عوض يقول أمر� Author: محمد البشرى الخضر Date: 07-15-2015, 03:29 PM Parent: #3
ههههههههههههههههه مبالغة يا نذير لكن ياها كدا الونسة السودانية دائما, جخ ومبالغات بل وكذب راسه عديل ماشي بعيد ليه, افتح الواتساب ولا الفيس ولا حتى البورد دا زاتو اقل من عشرة في المية من المكتوب صدق و الباقي كذب
Post: #6 Title: Re: من معاوية الصائم:عوض إبراهيم عوض يقول أمر� Author: Deng Date: 07-15-2015, 03:42 PM Parent: #5
مشيت فتشت في قوقل عن السيناتور السابق جون دافيذ ده، لقيت سيناتور سابق في القرن الثامن عشر بهذا الأسم. وفي واحد تاني عضو كونجرس ولائي.
كده لو في زول خبير في القوقل يمشي يفتش، يمكن يلقى لينا السناتور السابق ده.
Post: #7 Title: Re: من معاوية الصائم:عوض إبراهيم عوض يقول أمر� Author: الصادق اسماعيل Date: 07-15-2015, 04:06 PM Parent: #6
يهزوا ويرزوا دي قالها ليهو كيف بالانجليزي؟
هسع في ذمتك يا دكتور ببالغ جون ديفيس ولّا بتتبالغ إنت دا؟
Post: #8 Title: Re: من معاوية الصائم:عوض إبراهيم عوض يقول أمر� Author: الطيب رحمه قريمان Date: 07-15-2015, 04:18 PM Parent: #7
اخوى النذير ما صحيت لى هسه ...
عوض ده حلى ليه الكلام ... !!
هههههههههه مبالغة ..
فى الحقيقة .. ده ما كلام زول عاقل و متعلم و يحمل درجات علمية
Post: #9 Title: Re: من معاوية الصائم:عوض إبراهيم عوض يقول أمر� Author: أيمن نواى على Date: 07-15-2015, 06:37 PM Parent: #8
سلام يا النزير شكرا ليك يا النزير...عرفنا سبب تخلف البلاد...دولة المشروع الحضارى...الذى اباح كل حرام وحرم كل حلال..الاشراك بالله ...مدعى الغيب...بلة الغائب له مكانة....الكذب من الكبير الى الصغير...الاختلاس والفساد المحمى بالقانون....قتل النفس التى حرم الله فى كل مكان...الزناء دار المايقوما....اغتصاب الاطفال...انتشار المخدرات حاويات بورسودان بحماية جهات عليا....تصديق القمح الفاسد الموت البطي للشعب بالسرطانات...عدم توفير الدواء واغلاق المتشفيات....وتهجير الاطباء.
Post: #10 Title: Re: من معاوية الصائم:عوض إبراهيم عوض يقول أمر� Author: muntasir Date: 07-15-2015, 06:54 PM Parent: #9
يا الصادق ما تخلي عندك ضمور في المين برين الترجمة شايكن اند بايكن كدي انت ترجم لي يرزو دي بالعربي ثانك يو مدام مستر سبيكر
Post: #12 Title: Re: من معاوية الصائم:عوض إبراهيم عوض يقول أمر� Author: أبوبكر عباس Date: 07-15-2015, 07:08 PM Parent: #10
غايتو لو السودانيين كانوا بحللوا الخمرة، وبحبوا الرقيص المختلط ومتساهلين شوية في قصة الحب كنت صدقت كلام البروف عن الأمريكان في موضوع العلاقات الأُسرية دا، وقلت بكون الأمريكان دايرين بديل إجتماعي عن نموذج المكسيكان الممتاز، لأنو المكسيكان ولادين شديد، وبي كدا بيكونوا ضربوا عصفورين بعوض!
Post: #11 Title: Re: من معاوية الصائم:عوض إبراهيم عوض يقول أمر� Author: Deng Date: 07-15-2015, 07:05 PM Parent: #9
Post: #13 Title: Re: من معاوية الصائم:عوض إبراهيم عوض يقول أمر� Author: Omer Abdalla Omer Date: 07-15-2015, 07:25 PM Parent: #11
و من الراكوبة سلام يا عوض
Quote: شان نطعم الشعب الأمريكي 07-15-2015 02:44 PM قال البروفيسور عوض ابراهيم عوض أنه تعرف على مستر جون ديفز السيناتور الامريكي الذي عمل مجمع تدريس لغات في عدة مناطق في العالم ووافقت أن أعمل معه في معهده بكوالالمبور رغم قلة المقابل المادي لان العمل مع سيناتور أمريكي له قيمته ولما تعمقت صداقتنا يوم قال لي " يا عوض انا داير اديك سر وانا الكلام ده بقولو احقاقا للحق - فيوم من الايام قال لي يا عوض نحن اللوتري ده والله عملنا عشان السودانيين دليرين نجيب سودانيين لقيم كتيرة عندكم -قلت ليهو يا جون انت بتبالغ قال لي نو نو - أنا بحكي ليك وانا سيناتور في الكونغرس الاميركي - على مدى السنوات في اشكاليات حصلت بان الامريكان خايفين من حكاية الاسرة ذات العائل الواحد بدون خال ولاعم ولاحبوبة دي بتعمل مع مرور الزمن ضمور في الجزيئه بتاعت الذكاء في مخ الانسان وخايفين تجي مرحله يكونوا كل الناس اغبياء لانه السلوك الزي ده ضد فطرة الانسان. وقال لي طبعا الدستور مابساعدنا عشان نفرض على الناس انو يقعدوا في البيوت , الاسر الابناء والعمات والخالات, فلجأنا الى حكاية اللوتري, مابنقدر نشحد السودان نقول ليهو ادينا ناس يصلحوا الامريكان أبدا, فعملنا اللوتري مفتوح للعالم كلوا لكن همنا نجيب سودانيين لسبب واحد انو اللجان العملنها تدرس المجتمعات الفي الدنيا عشان نجيب شعوب عندها المستوى بتاع التعامل مع الاسر وكدة وعشان تطعم الشعب الامريكي قال لي لقيناها في السودان لوحدو , باقي الدول الدول حكاية دي ماموجودة فيها فالسودان قال لي ضالتنا في التربيه الدايرنها تلقى الحبوبه قاعدة لامن تموت يدفنوها من البيت والجد قاعد وجد الجد ممكن يكون قاعد في البيت وياكلوا كلهم في صينيه واحدة , وفي رمضان يمرقوا صوانيهم وينادوا الغاشي والماشي والجعان والعطشان ويمدوا الاكل قال لي بي فوق الحيطة. ده كلوا هو عارفو فقال لي قلنا السلوك ده بخلينا نجيب سودانيين عشان يبقوا امريكان وفتحنا اللوتري حتى قام قال لي ياعوض هسه كان قدمته حناخدك قلت لي ياجون انا ماشي اكلم اهلي انو يا اهل السودان لازم تفرحوا, انتو شعب فيكم ميزة دايره امريكا تصلح بيها ناسها, فقال لي ياعوض انا حأنكر اني كلمتك دي الحقيقه وقال لي نحن ماممكن نرضى نقول دايرين ناس يجو يصلحونا لكن دي الحقيقه اللي حقو انك تعرفها, على كل قمت انا سألت السؤال ده للمتحدث في الكونغرس الامريكي قلت ليهو مستر جون ديفز قال لي الكلام ده وانا اثلج صدري وانا رجل اعلام قبلما اكون استاذ جامعي فبالتالي ماصحة الكلام ده؟ قال لي صاح نحن نقدر جدا الشعب السوداني وبالتالي معانا سودانيين يهزوا ويرزوا وجزء كبير من القيم الامريكيه دي شايلنها على اكتافهم سودانيين, طيب يا أخي ماتودوا ناسنا ديل وتجوا السودان وتصلحوا علاقاتكم معانا وكدة فقام قال لي عبارة قال لي يا اخي انتو مابتدونا تأشيرة عشان نجيكم في السودان.
تابع الحديث في الفيديو -
وتعليقاً على ذلك قال أحد الأكاديميين السودانيين والذي يعمل بإحدى الجامعات الأمريكية : كما توقعت فقصة الأخ عوض إبراهيم عوض مفبركة. لا يوجد أي عضو في الكونغرس الأمريكي باسم جون ديفز John Davis في هذا العصر. هناك عضوان حملا هذا الاسم أحدهما كان في القرن التاسع عشر و الآخر في القرن الثامن عشر. لا أظن أن عوضا كان معاصرا لهما! و يوجد شخصان أيضًا بهذا الاسم أحدهما يعيش في ولاية تكساس كان نائبا في مجلس الولاية التشريعي (و ليس الكونغرس) و لم "يطلق السياسة" إلا في يناير من هذا العام و مهنته مقاولات البناء و ليس له أي علاقة بتعليم اللغات أو بماليزيا. أما الثاني فهو محام في ولاية أوريغون صغير السن و يعمل حاليا نائبا في مجلس الولاية و ليست له علاقة بالكونغرس أو باللغات أو بماليزيا. و بالتالي قصة السناتور الأمريكي كان بيزورني في البيت و قال لي يا عوض، و أنا قلت ليه يا جون بتبالغ... إلخ، دي قصة مفبركة و احتقار لعقول الناس. و بعدين أمريكا عاوزه تستورد سودانيين عشان خايفين إنو العقل الأمريكي يحصل فيه ضمور في مركز الذكاء؟؟!! إذا كان ده مستوى أحد حملة الدكتوراه في وطننا العزيز كان الله في عون الطلاب. لذلك لست أستغرب الآن دعوته لأساتذة جامعته بمنح الرئيس البشير درجة الدكتوراه على رسالة الماجستير. و لله في خلقه شؤون.
Post: #14 Title: Re: من معاوية الصائم:عوض إبراهيم عوض يقول أمر� Author: Deng Date: 07-16-2015, 08:36 AM Parent: #13
تحياتي للطربيد معاوية عبيد.
كل سنة وأنت والأسرة بألف خير يا مواطن.
عيدك سعيد.
Post: #15 Title: Re: من معاوية الصائم:عوض إبراهيم عوض يقول أمر� Author: حيدر حسن ميرغني Date: 07-16-2015, 08:48 AM Parent: #14
عوض زول نرجسي جدا .. بس كضاب دي جديدة عليه اختشي ياعوض
Post: #16 Title: Re: من معاوية الصائم:عوض إبراهيم عوض يقول أمر� Author: Deng Date: 07-19-2015, 08:09 AM Parent: #15
.
Post: #17 Title: Re: من معاوية الصائم:عوض إبراهيم عوض يقول أمر� Author: حاتم إبراهيم Date: 07-19-2015, 09:22 AM Parent: #1
الفيزا هينة على المستوى الشخصي
المهم عمل لينا شنو في الدرن؟
غايتو السوداني لمن يولعوا ليهو كشافات الاستوديو في وشو بيبدع إبداع عجيب *************************** لا للاستيكة. ضع العنصرية في مكانها المناسب.