كدي نديها صنة .. ونروق اعصابنا شوية

06:53 AM May, 05 2015
سودانيز اون لاين
د.محمد حسن-
مكتبتى فى سودانيزاونلاين



كيف اببتديك
والقول موجوج في اضطراب
ما بين حضورك
والتساؤل عن بدايات الجواب
في الانتظار
ما بين تفاصيل القلق
تنبت براعم فيها اشيا من رجاء
رغم التعاتيم الرؤى
والحال ضباب
صابرين على مر السفر
ادمنا لون حادق السهر
صابرين جمال الاحتمال
رهق السنين
ارق الحنين
طالت سنين الاغتراب
جيتك موشح انفعال
راجيك زي قيفا فقد طعم الدميرة
لما في جوف المحل
اتلاشى مرجو السحاب
ادمنت طعم الارصفة
ملح المواني
اتنفس اليود بين مسامات الهوا
وبين خلاياها الرمال
كلما اقيف في ساحل العودة الرهاب
املي الجميل
اقراا القصيدة العودة
قدام مقلتيك
انا وانت والنيل والسمر
والقمرة تزدان بي جمالك
والضفاف مسرح طرب
والصوت حنين من جوف رباب
يلاكي نمرق
زي طيور الرجعة لي الشرع الكبير
حلتنا والناس الظراف
نكتب تفاصيل الفرح جوات كتاب
نطلي الحيط
بي ضحكة صافية
بعد سنين قاست عذاب
حلتنا يا روعة غناي
جواها احساس ناس عزاز
لونهم طمي النيل الخصيب
حلتنا ما بتعرف حسد
مزهوة بي اجمل شباب
صوتك
سجيع القمري
في وقت الاصيل
يطرب نخيل
عينيك فنارات المواني الغارقة
في عتم البحار
تبقالي في عز الوجع اجمل دليل
عينيك
رجا الناس المسافرين
بيها بحلف
كلما اشتد الغياب
ولما ارجع
وابدا اسجع
واحكي ليك عن ليل طويل
وعن وحيح
وامال بتزحف لي زحيح
واحلام تعربد في الظنون
مليانة بي كل اليقين
انك حقيقة
دونما اي ارتياب
وبس

*