الصورة دي عاملة ضجة كبيرة على مواقع التواصل .. ( انظر الصورة ) ..!!

11:04 AM May, 03 2015
سودانيز اون لاين
awad okasha-
مكتبتى فى سودانيزاونلاين



عندي بوست قديم عن الصور الاثارت جدل بين رواد مواقع التواصل الاجتماعي ..
لكن الصورة تحتاج بوست خاص لانها سودانية وفعلا مختلفة وعاملة ضجة كبيرة ..
ولسة الحكاية مدورة ما بين مؤيد ومعارض وناقد ومساند ..

... ...

أثارت صورة لرجل سوداني يقوم بعملية ” عواسة الكسرة ” الكثير من الجدل في مواقع التواصل الاجتماعي أمس ، هذا وقد تباينت الآراء وتنوعت ما بين مؤيد للصورة وما بين رافض لها ، بينما شهدت التعليقات في العديد من الصفحات الأسفيرية نقاشات ساخنة جداً تدور حول وضعية الرجل السوداني وحول تقبل الناس له بتلك الصورة التي وصفها البعض بأنها ” فضيحة “، بينما يرى آخرون أن الصورة عادية جداً ولا تستحق كل ذلك الغضب والاختلاف .

أرى إن الصورة عادية جدا
يمكن زوجته ضارباها ملاريا ولا تاييفوئيد...

الصورة عادية جداً
هل هو تبخيس العمل في هذا المجال
أم أصبحت المهن هي موضع سخرية

لو كانت صورة طباخ او شيف كما يسمى ..كان في زول بقول فيها حاجة؟؟

أصلاً الزول ده لا بعوس ولا حاجة أخد الصورة من باب الفكاهة

الصورة يجب ان تكون عادية

انا يا جماعة جربت العواسة ووريق الخدرة

مافوكا حاجة

نحنا عشنا داخليات وفى الغربة عشنا جمعيات بنشد حلتنا وبنقلع قراريصنا عادى

Quote: لو كانت صورة طباخ او شيف كما يسمى ..كان في زول بقول فيها حاجة؟؟

اتمني الاجابة .

والتحية للجميع ..

Quote: لو كانت صورة طباخ او شيف كما يسمى ..كان في زول بقول فيها حاجة؟؟

ايه العيب فيها ممكن توضح ؟

الراجل يا عالم ممكن يكون ببيع الكسرة

و ممكن يكون فى بيت عزابة فى اى مكان فى الدنيا و عاوزين ياكلو كسرة ( المانع شنو)

الذين يعيشون داخل السودان يرونها ( عيب) و الذين يعيشون فى امريكا يرونها ( عادية)
خلونا نكون واقعيين شوية
ليه الصورة دى الناس اعتبرتها شاذة و الراجل دا خايب ؟؟؟؟؟؟؟؟

لماذا نعتبر اعداد الاكل فى بيت العزابة اذا كنا عايشين فيهو عادى و لما نراه فى الصورة يكون عيب ؟؟؟؟؟

الطوابة و الطيانة و عمال الزراعة و عمال الفحم ( رجال و فايتين الرجالة بى غادى) الواحد فيهم يكون لامى حلة البنى كربو ( العصيدة) بين رجليه و يسوط فيها و عرقو يتصبب و بجواره حلة الملاح
ودى عادية فلماذا لا نعتبر هؤلاء من الخيابة .

و الله ان لم نغير مثل هذه النظرات و الافكار فلن يتغير حالنا ابدا

يعني لو جبنا صورة حرمة شغالة في فرن تبقى فضيحة برضو؟؟

نظرة قديمة ..
وتنميط بتاع زمان ..
والدي لا يدخل المطبخ إطلاقاً ولو لاحضار غرض يريده ..
فيرسل من يحضره له ..
فمابالك والطبيخ وعواسة الكسرة ..
دي حتكون طامة كبرى ..

عني ..
أعوس الكسرة ..
من زمن كنت بقعد جنب أمي ..
راجي الطرقه تمرق حااارة من الصاج ..
وصحن الملاح جنبي ..
قبل ما التانية تجي أكون قضيت على الأولى ..
لامن أشبع واتخراج من جنب الصاج ..
ولمن ناس البيت يكونوا قعدوا للغداء ..
أنا بكون في الشارع ..
شبعاااان وزنقلتي ملانة ........

من يومها وأنا بعرف أعوس ..
إحتراماً للصاج ..

تزوجت ..
وجدت المدام مابتعرف تعوس ..
يشهد الله علمتها كيف تعوس ..
ووريتها تمسكـ القرقريبة كيف ..
وكيف تحركها في الصاج .. بعد تكب العجين ..
بسوي العصيده مع إنها ما أكلتنا ..
معلم كبير في رمي القراريص اربعة بوصة ...
وبعرف بطبخ نص نص ..

تمرض المدام أو تسافر لي أي سبب كان ..
بمسك الشفع ..
وأسوي شغل البيت كله ..
من زمن شافع .. مرسال أبرد البطن .. ونجيض ..
بعرف أعزل البامية ...
طبيخ ولاّ فركـ .. وبعرف أعزل خدار المحشي ..
وأجيب أيتها خدار زي الورد ..


أها نقصان الرجولة في كده شنو ؟؟!! ..

..

في تصوري الخاص أن الصورة ليس فيها ما يدعو للضجة ولا لهذا الإنتشار الواسع للصورة
لكن أعتقد أن الإهتمام بها جاء من باب أن (عواسة) الكسرة مهمة تقوم بها النساء ولذلك خاطبت الصورة
في البعض هذا الجانب في الناظرين ..
لكن الصورة عادية في بلاد المهجر إذ أن الكثيرين يقومون بذلك وتعتبر صورة مثالية عندهم في النخوة
وإعانة الضيوف وحسن الكرم .. لذلك فإن مجرد إخراج الصورة من إطارها يعرضها لهذا التناول المفضي
الى هذا الجدل الواسع ..
مع شكري لك أخي الكريم



.

اخي الكريم عوض
من لم يسافر في ربوع السودان يجد ان هذه الصورة غريبة
وقد يسر لي ربي ان اسافر بالقطار شمالا وجنوبا وشرقا
وقد رايت في كثير من المحطات عند الصباح الباكر عمال الدريسة يقومة بتجهيز وجباتهم من كسرة وعصيدة
وده شي عادي

العيب الوحيد فى الصوره دى
إنو غطى وشو ...!!!

خجلان ليها شنو؟؟مادمت واثق من رجولتك ....!!!
...

تحليه معاها تحيه ...
أكيد ده الزول بهظر ياعوض ياخ ...

Quote: العيب الوحيد فى الصوره دى إنو غطى وشو ...!!!

أتصور أن الإستخباء سببه هو ذات السبب الذي يجعل من اللقطة قرينة بالعمل النسوي
خاصة حينما نجردها من ظروفها التي أخذت فيها ..
,اتصور أن من أخذ اللقطة قصد أن يشهر بالرجل لذلك تم إخفاء وجهه .

المهم أن هناك صورا كثيرة حينما نجردها يكون لها بعد أخر مختلف


..

Quote: أتصور أن الإستخباء سببه هو ذات السبب الذي يجعل من اللقطة قرينة بالعمل النسوي خاصة حينما نجردها من ظروفها التي أخذت فيها .. ,اتصور أن من أخذ اللقطة قصد أن يشهر بالرجل لذلك تم إخفاء وجهه . المهم أن هناك صورا كثيرة حينما نجردها يكون لها بعد أخر مختلف

مرحب صلاح شكوكو
...
هو عارف انو بيتصور وهو بيعوس كسره ....ورضى بالتصوير وغطى وشو ...
لو كان ماراضى وشخصيتو قويه كان زجر الصورو واخد منو الموبايل مثلاً ومسح اى صورة بتتعلق بيهو
...
يبقى التحليل المنطقى انو هو راضى يتصور وهو بيعوس كسره بس من غير مازول يشوف وشو
وكمان رضى انها تتوزع بدليل انو ماقام مسحها من الموبايل او الكاميرا
ولو شافها بعد مانزلت فى الميديا وهو راضى أكيد فى ناس من الحله حيعروفوا ده منو
من خلال التفاصيل الموجوده فى خلفية الصوره ....!!!
..
اما البعد الإنسانى
فأنا لا أرى عيباً من ان يمارس الإنسان تفاصيل الحياة كلها مادامت لاتنتقص انتقاص فعلى من كينونته

احترامى

تكمن أهمية الصورة في أنها هدمت آخر القلاع التي جعلت المرأة السودانية تدّعي أنها سيدة المطبخ! فمثلما تفوقت العضلات الذكورية في كَتل العصيدة... ها هي أنامل صاحب الصورة تبرع في رسم أقواس الكسرة القزحية! وعقبال عواسة الآبري.

العيب في القعدة النصها ما في و تغطية الوش
طيب لو حاسي انها عادية مغطي وشيو لشنو
القعدة قعدة كديانة
لكن يعوس ما يعوس دي ما مشكلة

اعتقد لا غبار عليها انا سافرت باللوراى كثيرا وكنت بمر بمحطات السكك الحديد وشاهدت كثير من عمال الدريسه يعوسون الكسرة ويسوطون العصيده ويعملوا الملاح علي ابدع ما يكون الواحد يكون اهله في شندى ومو شغال محولجي في في السكه حديد في خط بورتسودان لا غبار عليها الصورة يا جماعة المسألة ما متعلقة بانو هو المراة حاكماهو او هو نسواني بالرغم من انو الصورة في بيت مؤسس وبيت امراة لكن من حيث المبدا بتاع العواسة بتاعة الكسرة للظروف الطارئة اعتقد انو ما من عمل الرجال ولكن اذا انكسر بيك لورى وطالت قطعتك وجاك راجل شايل صحن كسرة برشوشه بتعرف قيمته تماما واذا عرفت انو هو من قام بعواسة الكسرة يكبر في نظرك

Quote: تحليه معاها تحيه ... أكيد ده الزول بهظر ياعوض ياخ ...

يكون قال للمصور .. صوِّر خلينا نجوط مواهيم الواتس ديل شوية ..

عادي جدا ولا أرى عيبا أن يعوس الرجل الكسرة
عني ، ولأنني أحب الكسرة جدا فقد طلبت من زوجتي أن تعلمني العواسة
وكانت لما تمشي إجازة للسودان أظبط ملاح تقلية واعوس كسرة رهيفة لذيذة جدا واستمتع بأكلها
تحياتي لصاحب البوست وضيوفه

الغلط في الوضعية الغلط والقعدة وتنية الرقبة بلا خجلة والمضاراة بطرف العراقي ( كان الطرحة أحلى )
واضح من كان يعوس كان يجلس بالجانب الآخر

يا جماعه الراجل عاس كتير و بقش فى وشه من العرق

ليه انتو مشيتو بعيد كده .. والله لو عرف الكلام دا كلو يندم على عواستو دى .

Quote: العيب الوحيد فى الصوره دى إنو غطى وشو ...!!!

ما فيها عيب، العيب انو الزول يتفنقل و ينتظر الاكل يجيهو جاهز كل يوم. شارك اخي المواطن فى الاعمال المنزلية، ياخي دي اشغال شاقة عديل و تركها للنساء وحدهن ظلم كبير.

صورة عادية .. بس البمبر صغير.

للناس البقولو عادي طبعا اكيد ماعادي

وعيب كمان

يعني لو بتقش الحوش و بتغسل الصحانه لي مرتك مافي داعي جيرانك يعرفو

بتعتبر مساعده ومن غير امه لا اله الا ا لله تشيل حالك

وحبكت يعني ناكل كسره لاي ظرف حصل للوليه؟؟

بكره جيبو لينا راجل ملصق في ضهر مرتو بمشط ويكوفت فيها وقولو عادي



وللعلم: اكثر من اربعه مصانع كسره في ولاية الخرطوم

تحياتي يا عكاشة
انا شخصياً لما كنت طالب لحدي تانية جامعة
كنت بشتغل في مطعم بلدي يفتح على استاد
الخرطوم و كانت شغلتي في المطعم ارمي قُراصة
يمين فنان فيها فنن يحير ابداها ليكة من اتنين
بوصة لحدي تمنيه بوصه لووووووووول

فوق لمزيد من الاراء ..

غايتوا الزمن دا الرجال ديل بقوا يحيرو وما مضمونين
لازم فحوصات طبيبة سريرية ومعملية قبل اى خطوة زواج
كاااااااااااك