الرخمة قالت، أنا اخيّر من زول ! ...

07:46 PM Apr, 25 2015
سودانيز اون لاين
معاوية المدير-بكندا محافظة البرتا
مكتبتى فى سودانيزاونلاين

Quote: الأنوق على فعول : الرخمة ، وقيل : ذكر الرخم . ابن الأعرابي : أنوق الرجل إذا اصطاد الأنوق ، وهي الرخمة . وفي المثل : أعز من بيض الأنوق لأنها تحرزه فلا يكاد يظفر به لأن أوكارها في رءوس الجبال والأماكن الصعبة البعيدة ، وهي تحمق مع ذلك . وفي حديث علي - رحمة الله عليه - : ترقيت إلى مرقاة يقصر دونها الأنوق ; هي الرخمة لأنها تبيض في رءوس الجبال والأماكن الصعبة ; وفي المثل : طلب الأبلق العقوق فلما لم يجده أراد بيض الأنوق قال ابن سيده : يجوز أن يعنى به الرخمة الأنثى وأن يعنى به الذكر لأن بيض الذكر معدوم ، وقد يجوز أن يضاف البيض إليه لأنه كثيرا ما يحضنها ، وإن كان ذكرا ، كما يحضن الظليم بيضه ، كما قال امرؤ القيس أو أبو حية النميري : فما بيضة بات الظليم يحفها لدى جؤجؤ عبل بميثاء حوملا وفي حديث معاوية قال له رجل : افرض لي ، قال نعم ، قال ولولدي ، قال لا ، قال ولعشيرتي قال لا ، ثم تمثل : طلب الأبلق العقوق فلما لم يجده أراد بيض الأنوق العقوق : الحامل من النوق ، والأبلق : من صفات الذكور ، والذكر لا يحمل فكأنه قال طلب الذكر الحامل . وبيض الأنوق مثل للذي يطلب المحال الممتنع ، ومنه المثل : أعز من بيض الأنوق والأبلق العقوق ، وفي المثل السائر في الرجل يسأل ما لا يكون وما لا يقدر عليه : كلفتني الأبلق العقوق ; ومثله : كلفتني بيض الأنوق . وفي التهذيب : قال معاوية لرجل أراده على حاجة لا يسأل مثلها وهو يفتل له في الذروة والغارب : أنا أجل من الحرش ثم الخديعة ، ثم سأله أخرى أصعب منها فأنشد البيت المثل . قال أبو العباس : وبيض الأنوق عزيز لا يوجد ، وهذا مثل يضرب للرجل يسأل الهين فلا يعطى ، فيسأل ما هو أعز منه . وقال عمارة : الأنوق عندي العقاب ، والناس يقولون الرخمة ، والرخمة توجد في الخرابات وفي السهل . وقال أبو عمرو : الأنوق طائر أسود له كالعرف يبعد لبيضه . ويقال : فلان فيه موق الأنوق لأنها تحمق ; وقد ذكرها الكميت فقال : وذات اسمين والألوان شتى تحمق وهي كيسة الحويل يعني الرخمة . وإنما قيل لها ذات اسمين لأنها تسمى الرخمة والأنوق ، وإنما كيس حويلها لأنها أول الطير قطاعا ، وإنما تبيض حيث لا يلحق شيء بيضها ، وقيل : الأنوق طائر يشبه الرخمة في القد والصلع وصفرة المنقار ، ويخالفها أنها سوداء طويلة المنقار ; قال العديل بن الفرخ : بيض الأنوق كسرهن ومن يرد بيض الأنوق فإنه بمعاقل

اوووووه حبيبنا ود المدير
عساك طيب ياخ
هسخ الواحد يقول ليك يا رخمة تزعل
يقول ليك صوتك رخيم تضحك من الاضان لى الاضان

غايتو الرخم دا تآلآ السافل ما عندنا ولا الرهو، وربما تكون بعض
الطيور التي نراها عابرة اجواءنا .

ود ابرك شوف عيني مع الأسكيمو حايم ...

هذا البوست يا جلالنا إطلآلة علي نافذة من نوافذ تراثنا العميق
العريق الجميل،
ؤُ خليك قريب ...

سوف نتعرض في هذا البوست للتشبيه المباشر، يعني تشبيه عديييييل كدا .
تشبيه بدوان اداة تشبيه، وهو ما يسمونه في اللغة العربية بالتشبيه البليغ،
ومثال له، الرجل اسد . إذا اردنا ان نضيف اداءة للمثال نقول، الرجل
كالأسد، فأداة التشبية هنا (الكاف) ودا يكون تشبيه مُجمل . علي كُلٍ في
البوست دا يهمنا التشبيه من غير ادوات، اي البليغ وفي البوست سميناهو،
التشبيه العديييييل كدا ...

تنبيه تاني،
حا نركز علي التشبيه المُستمد من البيئة، يعني كالتشبيه بالحيوانات
والأشجار والتُربة والحشرات، والطيور، فإلي اضابير البوست .


تكون كلمة اضابير دي عجبتكم، مُش ؟ ...

بالنسبة للعنوان،
الرخمة قالت انا اخيّر من زول .
قالولآ، مِنو ؟ .
قالت، الراجل البيسكن مع نسابتو .

في التشبيه يقولوا، الزول دا رخمة، والتشبيه قد يأتي بصيغة السؤال،
يا جنا إنت رخمة ؟، أو التعجب، عليكم الله شوفوا الجنا الرخمة دا !.

بالنسبة للناس البيعرفو الرخمة هل هناك علآقة بين الشتارة في التصرُف
والرخمة ؟، واللآ الرخمة دي ظالمنها ساكت ؟.

غايتو الطيرة ظالمنها، الطيرة جميلة ؤُ ظريفة ؤُ صوتها جميل
ؤُ ظريف، لكن بالرغم من كدا الزول لآمن تصدر مِنّو تصرفات
عويرة يقولوا، فلآن طيرة . غايتو دا ظلم الحسن ؤُ حسين فالطيرة
تحتاج لمحامي كاااارب عشان تقاضي ود اب نادم .

قلنا قبل كدا في شأن الطيرة، البنات الوآحدة تقولها يا طيرة تزعل،
تقولها يا عصفورة تتبسم وتتلظلظ، ويحمرّ خدها خجلا . غايتو
يا النسوان، عندكن المِحن . والله صحي ...

الاتبراوي السمح معاوية
سلام يغشاك وين ما كنت

قيل ان الشيخ العبيد ود بدر شتمه احد الجهلاء امام حيرانه فقال له ياالعبيد ودبدر انت كل ب فقال له الشيخ انا كل ب ... فقال السفيه ايوة انت كل ب وستين كل ب ...
فرد عليه الشيخ العبيد ودبدر قائلا ((نان يابا انا الكل ب بحصل مقامو ؟انت وضعتني في مقام انا مابحصلوا واريتني احصلوا الكل ب صاحي وسيدو نايم ..وانا نايم وسيدي صاحي ..) .

اهو دا تراثنا وتشبيهاتو البليغة وحكمة اهلنا الطيبين

التشبيه قد يصير لقب ويلتصق بالشخص حتي يخفي إسمه، ومثال لذلك،
الدحيش
الثعلب، وعلي ذلك قِس ...

المرا تلقاها مغيوظة من وآحدة .
اها، اوآت يجيبولآ سيرتا تعضي شلوفتا ؤُ تقول،
احيييييييا منها العقرب .


قال ليهو، يا جنا اوّل أُمّك المِتل العقرب دي انا حبيتا ؟...

Quote: التشبيه قد يصير لقب ويلتصق بالشخص حتي يخفي إسمه

صاحبنا عثمان العيص، سنانو عجيبة مرة، ذات حريق كارب في النادي،
قام عثمان العيص، زَهَّح خالنا مُحُمَّد، فالتفت اليه، قابلتو سنان عثمان وش،
زجره قائلا: اسكت يا ولد عامل سنونك الزي الترتوس ديل،
سمبناهو مباشر عثمان ترتوس،
لاحقا اصبح اسمه ترتوس بس!

معاوية المدير تحياتنا يا امير،
ساكون قريبا من هذا هذا البوست، فاضاءة الثراث السوداني امر جلل...

أشجار الدليب تآلآ السافل ما عندنا، عشان كدا في
المثل تآلآ السافل بنقول، ضُل الدوم البيرمي بعيد بأعتبار ان
الدوم اطول الأشجار التي تنمو عندنا في الشمال .
الناس الثقافتهم مرتبطة بالدليب بيقولوا، ضل الدليب البيرمي
بعيد، وهذا ابلغ فالدليب اطول من الدوم . التشبيه في المثل
فيهو بلآغة ؤُ حصافة .

رحم الله اُمي، كانت تقول لي، يا جنا شُوّف ضُل اشاتي ختَّ .
بنقول، الضُل ختَّ، والضُل رمى .


ود بادي قال،
حامد عوج الطُنضُب .
الطُنضُب نوع من الأشجار الخلوية عيدانه صلبة عندما تنشف،
وثمره الحُنبُق كنا ناكلو وكِت كنا سغار .
شبّه حامد في صلآبته بعوّد الطُنضُب ...

Quote: رد عليه الشيخ العبيد ودبدر قائلا ((نان يابا انا الكل ب بحصل مقامو ؟ انت وضعتني في مقام انا مابحصلوا واريتني احصلوا الكل ب صاحي وسيدو نايم ..وانا نايم وسيدي صاحي ..) .

سلآمات يا علي .

دي والله حكمة المفروض تُكتب علي استار الكعبة
بماء الذهب . الكلآم دا فيهو بلآغة ؤُ سرعة بديهة ما معقولة ...

الزول دا تمّ تشبيهه بالخروف وصار التشبيه لقب، ثمّ تطور حتي طغى
علي إسم الزول، أو صار مُلتصق بالإسم، صلاح الخروف .
غايتو في ظُلم شديد جداً وقع علي الخروف، فالخروف حيوان وديع
ؤُ مُسالم لدرجة تشبيه الزول المُسالم بالحمل الوديع . الزول دا كان
المفروض يسموهو وحيد القرن، فهو في رعونته بالضبط زي الكركدن .
وحيد القرن يكون بيرعى في امان الله، ناموسة سغيرة تعضيهو يقوم
يهيج ؤُ يكسّر كل شئ، ؤُ فجأة يقيف ؤُ يقعُد ياكل كأنو ما حصل شئ .

Quote: مرة، ذات حريق كارب في النادي،

عبد المنعم يا صديق،
سلآمات يا اخ .

تعرف ناس الحريق بتاعين النادي ديل دايماً بيكون فيهم وآحد الساعة
تسعة وكِت تجي ورقو حتي لو قافل بيخُتُو ؤُ يشتت، اها، اوآت يبعد
من الجماعة شوييييية وآحد طوالي ههههههههه يضحك ؤُ يقول، ود ابرك كسح ...

الحكاية يار يت لو كانت كده و بس مشت للاعضاء كمان
يقول ليك عامل قدومك ده الزى قدوم الكلب
وللا عامل رقبتك الزى رقبة الزرافة
زمان و انا صغير حبوبتى لما تزهج منى
بتقول لى
عامل شلاليفك زى شلاليف الجمل الشارب موية الملح
من زمان و نفسى اعرف شلاليف الجمل الشارب موية الملح مالا
و هو اصلا بيشربو موية ملح عشان شنو

Quote: لم يجرؤ الاجانب علي رئيس سوداني مثل هذا النعامة

من بوست مجاور،
جادات يشبّه الرئيس البشير بالنعامة .
هل النعامة تستحق، وما وجه الشبه بين البشير والنعامة ؟...

السقدة،

السقدة طائر يعيش في الرمال المتقطعة في النيل ويكون كثير الصياح
في الليل، يتهمونه قاطني ضفاف النيل بأنه مُدمن للسهر، لذلك الزول
المابينوم يقولوا عليهو، فلآن سُقدة أو سُقُد .

أهلنا في الأُسطورة بيقولوا لآمن الرسول صلي الله عليه وسلّم مات، كل الطيور
حزنت ؤُ كانت بتبكي بكاء شديد جداً إلا السقدة التي تكحلت في ذلك اليوم ؤُ كانت
ترقص، لذلك جعل الله لها شوكتان في جناحيها، كلما ضمت ضمتهما لتنوم
بالليل تطعنها الشوكتان فتقوم فزعة ؤُ تكورك ...

صاحبي .. ود المدير ..

من بلد الزهور عاطر التحايا .. ولضيوفك السمحيين .

Quote: ((نان يابا انا الكل ب بحصل مقامو ؟انت وضعتني في مقام انا مابحصلوا واريتني احصلوا الكل ب صاحي وسيدو نايم ..وانا نايم وسيدي صاحي ..) .

غايتو يا ود الفكي كفيت واوفيت لل ك ل ب حقو والله يستاهل وكلام حكم ومن درر .

Quote: صاحبي .. ود المدير .. من بلد الزهور عاطر التحايا .. ولضيوفك السمحيين .

حباب صاحبتي بت نفيسة .

زمان في دار الرياضة عطبرة عندنا بتاع إسعافات تطور تشبيهه بالحِديّة
حتي صار إسم له . الزول دا كان بيلبس قميص فضفاض وهو طويل ؤُ
نحيف، عندو صلعة في نص الراس ؤُ شعر بالجنبات مربيهو زمن الرفض،
ؤُ لآمن الحكم يصفرلو عشان يزعف لآعب طوالي بيعشق نِمرة خمسة
ؤُ يفتح، طبعاً الشعر طاير بالجنبات والقميص منفوّخ مع الهواء ؤُ هو
بيكون فآرد إيدينو ؤُ شايل الشنطة، ؤُ دار الرياضة عن بكرة ابيها تكورك،
الحِديّة، الحِديّة . بالضبط الزول دا بيكون يشبه الحِديّة . بعض اللعيبة
كانوا بيمثلو إنهم إتعوقوا عشان الحِديّة يجي طاير كنوع من إمتاع الجماهير ...

Quote: اوووووه حبيبنا ود المدير عساك طيب ياخ هسخ الواحد يقول ليك يا رخمة تزعل يقول ليك صوتك رخيم تضحك من الاضان لى الاضان جلالدونا ،،،، ...

عزالدين عباس الفحل
ابوظبي
...

ود بادي قال،
حامد عوج الطندب
آ وليدات
عوج الطندب نار القصب الهبلت ما بتعدلو
شوفو شلوخو مطارق رقدن
وكل تلاتة يمين سياف اتقبلو ،

هنا يشبه شلوخ حامد بالمطارق تشبيه مباشر .
المطارق جمع مُطرق وهي عصاة ارقّ من العُكاز واطول
واغلظ قليلاً من الحدآسة .

قال العربي عندنا مُتغزلاً في محبوبته،
شلآخِك مِتِل قضيب الداخلة .

يشبه شلوخ محبوبته بقضبان القطر،
والداخلة هي عطبرة ...

سلام للجمع الكريم
هاك دي يا ود المدير
الرخمة قالت
وانا اخير زول القاعد في المجلس ويسأل رفاقتو
واخير من القاعد مع نسابتو وشايل حمالتو

ابو الدقيق،

يقوليك، الزول دا ابو الدقيق بس، زول أحمق !.

زمان لآمِن كنا نقرأ علي ضوء الفوانيس ابو الدقيق دا بيجي طاير
ؤُ يروح منقشط في قزازة الفانوس بجوّة ؤُ ينحرق !.
فهمو شنو ؟، الله اعلم .

يقوليك،
يا زووووول، الليلة لآقتني بِت فراشة بس .
فعلاً البنت الرشيقة الجميلة البتكون فوق هذا وذآك انيقة في
لبسها تستحق ان تُشبه بالفراشة وليس ابو الدقيق هنالك فرق ...

السيد معاوية..تحياتي

شايف فوق جبت سيرة الطنضب..برضو بقولوا للشخص العنيد المابتفاهم اعوج الطنطب..على انو الطنطب مافيهو عود دغري كلو ملولو

بعدين عندك زمان...يقول ليك سركت يني التخليك تمشي وتغني...من هي يني

وتجيك الطاوية حبالها ..المقصود العقرب

وشوف الدعوة دي صعبة كيف ولئيمة
يقول ليك
النعامة التزازي بيك
يعني لا تلحقك ولا تقيف منك
يعني تكون في حالة جري على طول راحة ليك مافي

يا ود المدير سلام عليك وعلي ضيوفك جت عليهم
عندي معاك تلاتة حسات
اولك يا بادي
عجبتني الحسة دي عجبة شديدة خلاس وعن اذنك لاستخدامها لاحقا

Quote: ود اب نادم

تاني شئ بدور امتحنك بتعرف البريرة البارة الشايلة جناها وفارة لقيتا في تيكلا تسوي في شنو كدي ما تعرف ؟
عاين لي جاي ... السنبيرية في السافل لاسع في ؟ دي الحسة التالتة
عشان كان معانا جنا من عندكم قال كانت عندهم سنبرية فوق راس الراكوبة قام بالليل براحة اقبضا لمن مد يدو للقبضة قام اتنحنح فررررر طارت
ومن يومها كلما نوى الكلام في امر حساس يتنحنح زي نحنحتو اطيرت منو السمبرية القررررررررب اقبضا
وثم انه طيرتك دي نحن بنسميا ام رخم الله
عاين لي جاي حصل قبت القدالي ؟
عشان كونو ما بقبضو الا الجنا النجيض زي الناير ود زنبار قداد الهبوب

يقول ليك الزول دة
عقرب حزة
والحزة هي حزة اللباس .
والزول دة عكاز طرور

و للزول الضعيف يقول ليك عامل كده زى القشة ام روح

*** حبيت أسلم على الناس الظراف .

*** بوست لزيز، شكرا يا مدير

Quote: زمان و انا صغير حبوبتى لما تزهج منى بتقول لى عامل شلاليفك زى شلاليف الجمل الشارب موية الملح من زمان و نفسى اعرف شلاليف الجمل الشارب موية الملح مالا و هو اصلا بيشربو موية ملح عشان شنو

جلالنا يا حبيب .

يبدو لي إنو موية الملح بتشقق شلآليف الجمل .
عارفين الخروف بيسقوهو موية الملح عشان يدوعلوهو ؤُ دا نوع من الغش،
لكن معاك نسأل عن الجمل وخير من يفتينا في شأن آلبِل اخونا جنابو الطيّب
عثمان يوسف الذي اسعدنا بطلته علينا ...

يا جارنا ود المدير
ياخي صباحك ورد

اها .. انا عاوز اتكلم في الحتة بتاعة ( جزء من الحيوان )... مش الحيوان كله

يقول ليك الزول دا : ضنب ... ياخي دا ما خلو ليهو حاجة .. انتهو منو عديل
رغم أنه الضنب ممكن يكون جميل وأنيق زي ضنب الحصان.. لكن لأنه في ( المؤخرة ) عشان كدا بقا كعب

الشيء التاني
بيقول ليك الزول دا: أنجس من كراع الكلب الورانية .. لا حولاااااااااا
يعني لأنه الكل ـــب بيتبول وهو رافع كراع واحده ، وبالتالي الكراع التاني ح يصلها البول
فهي بتكون زادت نجاسة على النجاسة ...


لمن تصل حتة ( العيون ، وعيون المها ، والمهرة ).. كلمني بالله باقي الحتات دي بتجنن ( عبد العزيز )

كيفك يا معاوية

حسب ظني الجمل بدوهو الملح قبل الأكل عشان ما "يكوفر"

زمان لما يعرسو بت سمحة ويرحلوها من الحلة
أو لما يسافر زول مؤثر ويخلي وراه زول عنطجة ساي

الناس بتقول

طار الصقار وخلو أم رخم الله في الدار

Quote: السيد معاوية..تحياتي شايف فوق جبت سيرة الطنضب..برضو بقولوا للشخص العنيد المابتفاهم اعوج الطنطب..على انو الطنطب مافيهو عود دغري كلو ملولو بعدين عندك زمان...يقول ليك سركت يني التخليك تمشي وتغني...من هي يني وتجيك الطاوية حبالها ..المقصود العقرب

سلآمات يا اباذر .

ما اوردته يا اباذر هو الأصح،
ود بادي قال :
حامد عوج الطندب
آ وليدات
عوج الطندب نار القصب الهبلت ما بتعدلو .
اي النار التي إستعرت بشدة فيها نوع من الرعونة والهبل، لا تستطيع
ان تعدل إعوجاج حامد، يعني حامد دا كان عصلح الناس اخير تتخارج.
في عاميتنا نقول، الحاجة دي رقدت بالهبل، مثلاً يقولك، البصل رقد
بالهبل في السوق .

يني يقال انه كان خواجة سِكيّر في السودان زمن الإنقليز. زمان اكان
سفيت السُكّر اُمّك تقولك، يا ولد لآ تسف السُكّر، سكرة يني اللقوهو
مرمي نتيلة خاري في سروالوا ؤُ برنيطو غالبو يشيلآ ...

Quote: وشوف الدعوة دي صعبة كيف ولئيمة يقول ليك النعامة التزازي بيك يعني لا تلحقك ولا تقيف منك يعني تكون في حالة جري على طول راحة ليك مافي

يا ود الفكي اهلنا بيقولو، فلآن ضهبتو أُم زيزي، وهي حيوان خرافي يوجد
في الخليات، يعني حاجة كدا زي الغول والعنقاء المغرب .

الزول الفيهو عبط بيشبهو بالنعامة . يقولك، الزول النعامة دا،
وإعتقد ان النعامة فيها عبط، في إقتباس اعلآه لصلآح جادات شبّه عمر البشير
بالنعامة واظنه قد اصاب ...

Quote: يبدو لي إنو موية الملح بتشقق شلآليف الجمل .

ده كلام ده يا ود المدير، الشقق شلاليف الجمل الضحك، لما طرو ليهو العرس...

الحديث عن الجمل ذو شجون
مع انو لسه مافى تفسير مقنع لى موية الملح و شلاليف الجمل
الا برضو عندهم كلام فى مخرجات الجمل
زى ما فى قولم
كلامو زى بول الجمل

قالت الشاعرة رقية بت حبوبة تشبه اخوها عبد القادر ود حبوبة
تشبيهات مختلفة في عِدة مواضع من قصيدتها التي رثته بها :

بتريد اللطام أسد الكدادة الزام
هزيت البلد من اليمن للشام
ســــــــــــــيفك للفقــــر قــــلّام

هنا تشبهو تشبيه مباشرة باللسد الزام اي الشديد الداوي الزئير .
الكدادة شجر كثير الشوك .
وتستمر في تشبيهه باللسد النتر في القصيدة إلي ان تأتي ؤُ تقول،
الإعلان صدر و اتجمع المخلوق
بى عينى بشوف اب رسوة طامح فوق
كان جات بالمراد و اليمين مطبوق
ما كان بنشنق ود اب كريق فى السوق

واب رِسوة إسم من اسماء اللسد .
ود ابكريق هو التمساح، هذه تشبيهات مباشرة.

قالت الغناية تشكر جدي أُمحُوّمد ود همزة،
ود همزة جاموس في الخلا هو هو .

الجاموس في حالة هيجانه يكون اخطر حيوان في الغابة
ولا يجرو حيوان آخر للتصدي له ...

Quote: سلام للجمع الكريم هاك دي يا ود المدير الرخمة قالت وانا اخير زول القاعد في المجلس ويسأل رفاقتو واخير من القاعد مع نسابتو وشايل حمالتو

حباب ود ابو سن .

يا عبد الحفيض الرخمة لامن تقول انا اخير من زول معناتا معترفة
بنقص فيها ؤُ في الإقتباس الفي بداية البوست أهلنا العرب قالوا هي
تحمق، عليك الله كان عارف مثال لحمقها ارميهو لينا .

ابو سن،
نسمع عبارة ليهُن نقر سِنّو، هل هناك علآقة،
ابو سن لقب ام إسم ؟...

Quote: يا ود المدير سلام عليك وعلي ضيوفك جت عليهم عندي معاك تلاتة حسات اولك يا بادي عجبتني الحسة دي عجبة شديدة خلاس وعن اذنك لاستخدامها لاحقا Quote: ود اب نادم تاني شئ بدور امتحنك بتعرف البريرة البارة الشايلة جناها وفارة لقيتا في تيكلا تسوي في شنو كدي ما تعرف ؟ عاين لي جاي ... السنبيرية في السافل لاسع في ؟ دي الحسة التالتة عشان كان معانا جنا من عندكم قال كانت عندهم سنبرية فوق راس الراكوبة قام بالليل براحة اقبضا لمن مد يدو للقبضة قام اتنحنح فررررر طارت ومن يومها كلما نوى الكلام في امر حساس يتنحنح زي نحنحتو اطيرت منو السمبرية القررررررررب اقبضا وثم انه طيرتك دي نحن بنسميا ام رخم الله عاين لي جاي حصل قبت القدالي ؟ عشان كونو ما بقبضو الا الجنا النجيض زي الناير ود زنبار قداد الهبوب

ود البوش يا زول من صميم الطينة،
وعليكم السلآم .

اوّل هام،
الحسة اللُولة تعتبرا اللتك تب .
تاني هام، اللمتحان انا سقطت فيهو تب . تِكيلا تصغير تُكل وهو المطبخ بلغة
أهل البندر . نفسي اعرف بتعافر في شنو في التُكُل ؟.
تالت هام، السنبرية قااااعدة في البلد، الشي الغريب جداً يا ود البوش إنو السمبرية
دي من الطيور المهاجرة، ؤُ في سمبرية من قبُل يلدونا كانت بتجي كل عام تبني
عُشها في حرازة حبوبتي ؤُ جنياتا بيقعو، أها، قامت حوّلت للنخلة ؤُ ليوم الليلة
كل سنة بتجي تلد ؤُ تفرّخ في النخلة، دي اجيال في اجيال يا ود البوش .

يا ود البوش أُم رخم الله دي نفسي اعرف بيشبهوبا الزول الطِهامة عشان شنو ؟.
القدالي حويّط ؤُ حريص زيو زي الفكي اببريق، وأُم قيردون، نحن نسميها الكرلي
تالآ السافل . عندنا واحد في البلد ما بيدور الناس، اها، ماشي اتبرا ؤُ عشان مافي
زول يشوفو قام فجراً بدري والوآطة شِتا علي المشرع فشان يلفى اوّل بنطون
ما داير زول يشوفو . أها، في واحد شافو ؤُ جاء قال للجماعة الليلة لقيتلكم الدودة
الدغش فوق المُشرع يتركض من الصقط زي الكرلي الضاربو الشرك .
الدودة لقب طغى علي اسمه الحقيقي ...

متابعين يا ود المدير
دا نوع البوستات ذات النفس الطويل لطبيعة محتواها
وما زال في (الأضابير) الكثير
مودتي

Quote: Omar Moh Omar El-salama · متابعة · يعمل لدى ‏المملكة العربية السعودية‏ بحكي لي أبوي عليه رحمة الله قال : واحد جا يشكي لود بدر ،فلان قال لي الرخمه .. ود بدر قال ليهو : مالا الرخمة ؟؟ لا في زول شاف جناها ولا في زول سمع دغاها وتملاها من التالاها.. رد · أعجبني · متابعة المنشور · أمس في الساعة ‏04:12 صباحاً‏ غايتو زماااااان لما كنا سغار كان بنقول ليها أم رخملو.

سلآمات يا عمر .

غايتو يا عمر علي حسب وصف ود بدر ليها يبدو إنها نجيّضة ؤُ حويّطة
ؤُ دي صفات كويسة، فالظاهر الرخمة دي الناس باهتنها ساكت ؤُ من
زمن بعيد كمان، العرب القدامى قالو، فيها حمق ما عارف جابو الكلآم
دا من وين ؟. علي ايّة حال نحن في الشمال ما عندنا رخم ...

Quote: *** حبيت أسلم على الناس الظراف . *** بوست لزيز، شكرا يا مدير

مرحبتين حباب الطيّب .

حسب إهتمامك بألبِل يا الطيّب، الجمل برغم إنو حيوان عطوّف ؤُ حنين
إلا أنه حقود وعنيف في إنتقامه لذلك شبهو به الأنسان الحقود، يقولك
فلآن دا جمل، وكذلك الزول الصبُوّر الصلد الصليب يقولو عليهو جمل
نسبةً لقوة تحمُل الجمل . زي ما قال جلالدونا الناس يقولولك فلآن دا
بول جمل، غايتو دي يا ريت يتلقي زول يفسرا لينا ؟.

الزول البيتلصق ؤُ يدعي إنو عمل الحاجة مع فلآن ؤُ هو في حقيقة
الأمر كان مربِع إيدينو ؤُ بينظر ساكت بيقولوا، عليه قُرآدة . في
المثل القُرآدة قالت، أنا والجمل نقلنا العيش دا كوووولو من القضارف .
طبعاً القُرآدة كانت عاضة الجمل ؤُ متشعبطة فيهو طوّل المُدّة ...

بول جمل يعني زول معاكس
يقولو ليك فلان دة
عكس نكس بول الجمل
الجمل ببول لي ورا ..
وود البوش شان عرس ما بسلم علي يعني
قالوا
القرادة قالت انا واخوي الجمل جبنا العيش من القضارف

ثم قولهم
أت راميك جمل

راميك جمل
معظم من يرميهم الجمل يصابوا بخلل في الراس لارتفاع طول الجمل . وبقولوا الزول ببقا اروش وما مجمع

من الحيوانات المرتبطة بالشجاعة ويكثر التشبيه بيها في الشعر العامي السوداني التمساح
وحقيقة التمساح عندو ثبات انفعالي وركزة وتحس انو عندو انفة وثقة لما تشوفو في واحدة من الجزر الرملية
وليهو كثير من الاسماء في العامية السودانية مثل ابكريق والدابي والعشاري وكثرة المسميات تدل على عظمة المسمى ..
واطالب انو التمساح يكون شعار السودان
وان يكون لقب منتخبنا الوطني تماسيح النيل على الاقل نثبت احقيتنا بالنيل السرقو مننا المصريين وربطوهو بيهم

ومن الامثلة في العامية السودانية للتشبيه بالتمساح

دي حميرا في الحسن ود ضبعة عمدة الجوير
أناغنيت بولف ليك
ياالدابي العُشاري وزي الشرار عينيك
خبرك بندقية
تلب يا الصقر توّر الرخم مني

الحسن يا الحسن دوم بغني لِي
تمساح جلقني وزي الشرار عيني
ما شال بندقية وقال بتحميني
تلب يا الصقر تور الرخم مني
ودي بنت مسيمس في عبد القادر ود حبوبة
غنى وشكري يا خضرة الجٌم
طلع لي عشارى الليله مسكو يفوح
ما خطف البدينقه وما جفل مجروح
سيفو بياخد الخوده ومعاها الروح

ودي رقية بنت مسمار في الامين ود مسمار ويقال انه وقف بقوة تتكون من15 فارس اما جيش من 70 مقاتل
غنى وشكري يا اختو يا ريا
تمساح الكوانى الضارب الليه
سمعنالن خبرا في الهلالية
خمستاشر جواد سكن سبعمائه

ودي شاعرة الجوابرة كلتوم عبد الرازق
في فارس الجوابرة محمد ود عوض وقالو كانو كاتب في سيفو
( من جرب المجرب حاطت بيهو الندامه ... قربه هلاك وبعده سلامة )
يسلم لي خال فاطنة ..... بلالى البدرج العاطله
أب كريق في اللجج ... سدر حبس الفجج

ودا الجاغريو في محمد ود عبد القادر عمدة العيلفون
الليله أب كريق يبرا بالموجات
فوق ضهرو الخبوب ضنبو تسع طيات
كم دقيت مسامير التدر ملويات
بغروا من الترب أفضل وخيرا مات

ودي في مختار ودر رحمة ناظر العبيدية

سمحه الهيبة فوق مختار
عرش دود مراقد السار

Quote: يا ود المدير سلام عليك وعلي ضيوفك جت عليهم

Quote: وود البوش شان عرس ما بسلم علي يعني

ود اب سن سلام وشوق شديد خلاس
علا قول لي جت عليهم دا معناها اتغير ول شنو ؟
لكن النصيحة تستاهل ضبحة سلك عديل هلوووووووووو
عاين لي جاي
عمنا اب سروال والجار عودو بلومو في صاحبن زنبار قداد الهبوب شان طول ما جاهم في ضل حضاهم
فقال ليهم قبل يومين واتوا في ضلكم دا ما جن فوقكم حمير بجاي قالوا ليهو أي
قاليهم ما ديل نحن هههههههههه

قال بول جمل قال

كــبــوشــيــة
وادي عــبــقــر

الفـنـانة حــميـرا ،،
بــت كـبـوشــيـة ،،،

فـي محكر الديوان

هذه القصيد :-
كتبت في الحسن ودضبعة شيق عمدة الجوير عبدالله ودضبعة غرب شندي .. كان رجل قارح وفارس وشهم وكريم وفارس القرية ..

نص القصيدة :-
شــعــر :-
حـــمـــيـــرا ،،،

فـي محكر الديوان

سيد محكر الديوان ثابت يا أب قلب
تقابة لي النيران وين متل الحسن
***
الحسن يا الحسن غنيتّا ليك بي قياس
صنديد لي الولايا ولي الدموع قشاش
يا مطر السواري الماك هبوب ورشاش
حنكو البليغ خلوهو يتحدث
سيد زيناً قبيل قبل الناس تعرف الناس
سيد أصلاً قديم من الحمزه والعباس
***
الحسن والحسن في عايلة ماتسمّا
ضباح الربايب سيد القدح لمّا
دالي وبرمكي وببرّد حشا العمّا
دا ولادة النجاح الما بتدرك البلما
شوف عيني التساب الفوق البلد عمّا
ود ضبعة التساب الفوق البلد عمّا
***
أناغنيت بولف ليك
ياالدابي العُشاري وزي الشرار عينيك
وخبر البندقية القالو دى بترميك
تلب يا الصقر توّر الرخم مني
***
الحسن يا الحسن دوام بغني لِي
تمساح جلقني وزي الشرار عيني
ما شال بندقية وقال بتحميني
تلب يا الصقر تور الرخم مني
وفي رواية:-
تلب يا صقر جفل الرخم مني

يقال في مرة وكانت الفنانة حميرا بت كبوشية بتغني في هذه الأغنية ولما جات في البيت الأخير صارت تكرر -
( تلب يا الصقر وتوّر الرخم مني ) ،
فنالت عكاز من واحد وقال لها نحن الرخم يا السجم ..ورقدت بعدها إسبتالية .
والأغنية شاعرتها هي حميراء أم قلب .. وقيلت في الحسن ود ضبعة عمدة الجوير وكان شيخا للخط .. توفى الحسن ود ضبعة في بداية الأربعينات..والحسن ود ضبعة رجل كريم وشجاع وله مواقف مشهودة أشهرها قصة البندقية والتي يتداولها الناس كثيرا حيث تقول إن احد الرجال قد سرق بندقية وأمر المفتش كل العمد وشيوخ الخط القبض على السارق وكان من ضمن هولاء الشيوخ الحسن ود ضبعة ، وعند القبض على اللص حضرت إحدى أخواته وكشفت رأسها أمام الرجال فنزل الحسن ودضبعة من حصانه وغطى رأسها وأمر بإطلاق سراح السارق مما اغضب المفتش عندما سمع بهذا الخبر وهدد الحسن ود ضبعة بإقصائه من العمودية و لكنه لم يستطيع فعل اى شئ ضده.... فغنت حميراء أم قلب مستصحبة معها كل قيم ومواقف الحسن ود ضبعة ..

وخبر البندقية القالو دى بترمي
تلب يا صقر جفل الرخم منى

وفي رواية أخرى طريفة أن أهل المنطقة شكو للحسن ود ضبعة من توافد الشباب على حفلات هذه المغنية وتركوا أشغالهم متعقبين حفلاتها ليل نهار.. وبالتالي تتضاعف العبء على ذويهم من العقلاء .. فحمل سلاحه وامتطى حصانه متوجها صوبها ويضمر طردها.. وعندما وصل وجد الدلوكة في السما والشباب طربان ويندق، وفور رؤيتها له في منتصف حلبة الرقص متوجها نحوها ارتجلت هذه القصيدة مادحة له:
سيد محكر الديوان ثابت يا أب قلب..
فوقف واستمع وأعجبه الغناء والمغنية.. فطرب وهزّ فوقا عصاتو ونقط لها.. وقال ليها غني غناك!!
وحميراء هذه يذكرها أهلنا كثيراً في ذكر الغناء القديم في منطقة العالياب ولعلها كانت تحضر من كبوشية لإحياء احتفالات المناسبات، وظهرت من بعدها وحزت حزوها بت مكوار والله معانا كما وردنا من الرواة..

***
المصدر :-
العالياب دوت كوم .





عزالدين عباس الفحل
ابوظبي

الاخ معاوية تحياتي
الرخم، او الرخمة او ام رخماللو، عندنا - نحن ناس الجزيرة - من الصقور، و لونها ابيض . تعيش على القاذورات و الجيف التي تعافها الطيور الجارحة. و ترتبط عندنا بالبلادة و الكسل و عدم الاحساس. لهذا يقول الناس، ان الرخمة قال انا مهما كنت سيئة:
فأنا احسن من تلاتة
التم الاربعين و جلس مع نسابته
و المشى البحر و رجع بجنابته
و الجالس و الواقفين اخياته

Quote: يا جارنا ود المدير ياخي صباحك ورد اها .. انا عاوز اتكلم في الحتة بتاعة ( جزء من الحيوان )... مش الحيوان كله يقول ليك الزول دا : ضنب ... ياخي دا ما خلو ليهو حاجة .. انتهو منو عديل رغم أنه الضنب ممكن يكون جميل وأنيق زي ضنب الحصان.. لكن لأنه في ( المؤخرة ) عشان كدا بقا كعب الشيء التاني بيقول ليك الزول دا: أنجس من كراع الكلب الورانية .. لا حولاااااااااا يعني لأنه الكل ـــب بيتبول وهو رافع كراع واحده ، وبالتالي الكراع التاني ح يصلها البول فهي بتكون زادت نجاسة على النجاسة ... لمن تصل حتة ( العيون ، وعيون المها ، والمهرة ).. كلمني بالله باقي الحتات دي بتجنن ( عبد العزيز )

مرحا بمن جاءنا متعمماً بالأُصطُبّة
وتفوح منه رائحة الوِرش .

بالنسبة للجزء من الحيوان هاك النقل دا،

Quote: كان بنو أنف الناقه جعفر بن قريع بن عوف بن كعب بن زيد مناة بن تميم يعدون من قبائل الدرجة الثانية ، وكان أحدهم إذا سئل : من أي القبائل أنت ؟ قال وهو غاض طرفه : أنا من بني أنف الناقه ،لأن اسم قبيلته فيه معنى القذاره . فقال الحُطيئة يمدحهم : سيري أُمامَ فان الأكثرين حصى والأكرمين اذا مايُنسبون أبا قومٌ هم الأنف والأذناب غيرهم ومن يسوِّي بأنف الناقة الذنبا ومن بعد هذه الأبيات أصبح لهذه القبيلة شأن كبيرويقال أن هناك رجل كان لديه أربع بنات تقدموا لخطبتهم في يوم واحد وهذه الأبيات تدل على الأنف الذي يدل على الشموخ و الكرامة .

اما بالنسبة للكـلب، فقد شبّه الله سبحانه وتعالى الذي كذّب بأياته بالكـلـب
إن تحمل عليه يلهث أو تتركه يلهث .

غايتو البيقولوا عليهو ضنب دا، ما خللولو صفحة يرقد عليها .

بهوى العيون السودا واحب سمار في خدودا،
يقول ليك، بِت بالله عيونا زي كهارب البندر ...

Quote: عمنا اب سروال والجار عودو بلومو في صاحبن زنبار قداد الهبوب شان طول ما جاهم في ضل حضاهم فقال ليهم قبل يومين واتوا في ضلكم دا ما جن فوقكم حمير بجاي قالوا ليهو أي قاليهم ما ديل نحن هههههههههه

يديك العافية يا ود البوش ياخ، خليتنا نتضوحك في الفجرية دي والناس نيام
----------------------------
يا مدير، ما تظلم ضنب الكَـلِب ساكت، الحيوان دا توازنو كلو في ضنبو دا
حتى اسأل البيطري أبوبكر عباس

ود اب سن سلام ياخ
و شاكرين للشرح الوافى
الا الكلام القالو الفرجونى فوق الكلب ده ختير ختارة جد

على الايمان كلام فى راجل ما اتقال

Quote: فى ندوة فنية نظمت بالقاهرة قال أحمد الفرجونى : عدت من البادية لأجد كلبى الذى اعتمد عليه فى القنيص ميتا على رصيف الشارع . غارقا فى الدم الغانى . فكاد قلبى يتوقف أن سائقًاً دهسه . ما دوامة يا تمام كيوف الشارع اصلو الدنيا معدا والمعيشة شوارع بعد ما كت سباحا يمينك ضارع كتلت الليلة واتدردقت فوق الشارع ويواصل الفرجونى نزيف الوفاء بالشعر لكلبه الذى صحبه فى كل رحلات صيده ويسأل الله ان يجد قاتله جزاءً من عنده مثل موت كلبه ويستأنف الرثاء: ضربك لوري عاد ينشل يمين السايقو وينعصر النفس تعوم عليهو طرايقو مثل ما تف زورك قندراني يضايقو يتفو تفيف ملاح ما يلقا زولاً يلايقو يتضامن كل حضور الندوة مع دعاء الفرجونى لصاحب اللورى القاتل ويقول الفرجونى : دلنى الناس على شيخ المر . وشيخ المر من اعيان الكبابيش . هو الوحيد الذى يملك كلباً من نسب كلبى . ثم يبدأ الفرجونى فى رحلته من امدرمان لبادية الكبابيش . يصير مثل الكشاف الباحث عن كنز خبىء فى باطن الأرض يصل ديار آل التوم دله الناس هناك ان شيخ المر يسكن على بعد60 كيلو مترا يستانف الرحلة بحثا عن سلالة كلبه . حتى بلغ ديار شيخ المر . اخبره احد الأعراب : أن شيخ المر فى المحكمة . ثم يساله الاعرابى ( ات عايز شيخ المر فوق شنو ) يجيبه الفرجونى ( والله ياشخ العرب أنا عندى كلبا مات . وسلالتو عند شيخ المر ) يضحك الاعرابى بصوت عال ويقول له ( حرّم شيخ المر يديك الروح ولااديك كلب) ! يصيب اليأس الكشاف الباحث عن كنزه فى سراب صحراء الكبابيش . ولكن للعرب لغة تفاهم أخرى . لغة اكثر اختصارا للوقت . وأمضى من السيوف فى قطعها . انها لغة الشعر . حجة العرب ومنارة السنتهم . يذهب الفرجونى للمحكمة . شيخ المر يجلس على موقع متميز بين قومه . يستدعى الحكمة لحل المشاكل . ولاتخطىء عينيه الغريب . تقع عيناه على الفرجونى يامر الصبية باكرامه ( قوم ياولد سوط الليمون للضيف ) يجىء الصبى بقرعة ماهلة ( عكرانة باليمون ) وضعها الفرجونى امامه ولم يشرب منها ! ( ات مكاجرنا ياالضيف ؟ ) قال شيخ المر ذلك حين مر الوقت ولم يشرب الفرجونى الليمون من القرعة . ثم نهض الفرجونى وبدأ كلامه للشيخ ( والله ياشيخ المر انا مظلوم والظامنى ات ) يقع كلام الفرجونى على الحاضربن وقوع الدهشة ثم يصيح شيخ المر ( ظالمك انا ات منو ياخوى وجيت من وين وداير شنو ؟) يجيبه الفرجونى بالشعر مباشرة : جيت من غادي يا فارس الشوارف الغر جيت من غادي يا صافي الحناضل المر جيتك وعندي فيك أملا كبير يا المر بدور كلبا من الغنم المعادي يجر مرخرخ شاتلو لين ارساغ وواسع غر باهي وريد منيع ليمان وفي عرقوبو لون وقصر رقيق قدوم طوال اضنيهو ماهن صر رهيفا جلدو زي توب السواكني الحر مرخرخ شاتلو لين ارساغ وواسع غر باهي وريد منيع ليمان وفي عرقوبو لون وقصر رقيق قدوم طوال اضنيهو ماهن صر رهيفا جلدو زي توب السواكني الحر

http://azazah.com/forum/showthread.php?t=877http://azazah.com/forum/showthread.php?t=877

Quote: زمان لما يعرسو بت سمحة ويرحلوها من الحلة أو لما يسافر زول مؤثر ويخلي وراه زول عنطجة ساي الناس بتقول طار الصقار وخلو أم رخم الله في الدار

سلآمات يا حمد .

برضو زمان في الحفلآت لآمِن البنات السمحات يمشن اهلِن،
الجماعة يقولوا، راح النوار ؤُ فضل العُوار ...

Quote: ده كلام ده يا ود المدير، الشقق شلاليف الجمل الضحك، لما طرو ليهو العرس...

هههههههههههههههههههههههههه،

يا اخينا انا براي كان طرو لي سيرة العرس شلآليفي بيشققن ...

قال المتنبئ
وشر ماقنصته راحتي قنص شهب البزاة سواء فيه والرخم
يقولو ليك
الزول دة الغنماية تاكل عشاهو
و
تاكل وتقش في طرفو
و
سرارة اللعوت ما تتقابل الا في الموت
ود البوش تضبح وين علي الجزيمة طالبك فوق رقبتك دي عشرمية ضبيحة تلفونية

Quote: متابعين يا ود المدير دا نوع البوستات ذات النفس الطويل لطبيعة محتواها وما زال في (الأضابير) الكثير مودتي

حباب ود الزبير،
الزول الضو .

يقولولك، الزول دا ضو قبيلة، ؤُ زمان البنت السمحة
يقولوا، مضوية رتينة . زول كلس .

كلس يعني شنو ؟...

معاوية الزبير
زول ضو والضو ما بقولو سو
ماهو زول ضلمة

تحيَّات نواضر الصديق ودالمدير
وتحيَّات زاكيات لضيوفك الكرام

أهل البادية يقولون تندرا:
يا أم رخم الله هيييييييه...
الظَّق بخِنْقِك......!

أم قيردون، عندنا بالبادية الغربية، نسميها
"أُم قيقَرَدْ" وهي من الطيور العِيفة....
من الطيور التي يتفاءلون بها أهل البادية،
"طوير العينة"، ولا يأتي إلاَّ في الخريف ، وله صوت كرنين الجرس، وله وقع خاص عند البدو، لأنهم يحسون في صوته هطول المطر
أيضا طائر "أم سُورِج" أبوالتكُّو الأزرق" طاير يأتي في منتصف الخريف، وعندما تكون الوديان مخضرَّة والخيران ممتلأة ،
والأشجار وارفة وملء أحضانها من النُّوَّار، وأغصانها تتمايل من رزاز المطر، أوكما يصوِّر المشهد الشاعر مظعن الكباشي
اللّيلة الصعيد شال وإتخلف برَّاقو
والفَرْع لولتو الزَّيفة وكرَسْ نقناقو
هنا نجد طائر "أُم سورِج" يصفق جناحيه، ويضرب بهما صدره، نقرا دليبا خفيفا ثم يرقص طربا،
ويصدح بلحنٍ جميلٍ، صوته وتصفيق جناحيه ورقصه،كلها ايقاعا منسجما، ما سمعت أُذني أجمل منه ولا أروع
أيضا "أبو التكُّو" الطائر الآخر ، زوجته يضعها في "كركور" من الشجر، ويقفل عليها الكركور
يقولو ليك "مِسدِّد تسديت أبو التكُّو"
أما طائر "أبو الرِّهيو" ، طائر لونو أبيض ناصع وهو طائر يآلف البهائم ويمشي وراءها، ولا يهرب من الإنسان بل أهل البادية لا يصطادونه
ولكنه طائر حرامي وسارق، يسرق كل قوت طائر السمبرية"الكُولجة" ، ويسرق كذلك أعواد عُشها
أما أجمل بيت للطيور فهو بيت
"أُم دلدليه" طائر صغير رشيق جدا، يبني بيته علي افرع الأشجار المنسدله وسط الخيران والأضاة
يعني شجرة تكون بعمق الخور ولها غصن يتدلي منحدرا نحو الماء ،
علي روبه"رأسه" يبني الطائر عُشه من الأعشاب الخضراء وعُشه يكون محكما وفي شكل دائرة ، وتحديدا مثل كورة الشُّرَّاب
وعندما يأتي المطر يصيح مشقشقا باعلي صوته
وأهل البادية يقولون بأنه يقول تندرا وهو يغيظ طائر القمري
"المطرة جاااات ...خراب أم بيتاً تلات قشَّات"
أيضا أهل البادية يتندرون من فصيلة من الصقور
صقر إسمه "تِريلُّو" صقر دني جدا، خيام أهل البادية التي يتركونها أثناء السروح،وبدون حارث، يأتي ويدخلها ويشرب اللَّبن، والحليب،
وأحيانا يأكل الفضلات ، ويسمونه "صقير الهِرار"
ويصفون به البدوي الذي ، يكون قاعد بالمدامر والفرقان ولا يذهب مع بهائمه في رحلة النشوق
أيضا توجد طائر "أُم شِرِلُّو" وهو طائر حاد الذكاء، ولوب جدا، البدو الذي يغادرون الأسواق تنتظرهم عند "الدوداب"،
وعندما يصلونها، تصفِق جناحيها وتغرِّد، وتلتف حول أحدهم دائريا، ثم تتركه وتذهب للآخر، وإذ أحسَّت منهم بادرة غدر،
تركتهم وذهبت لجُحرها، وهي من الطيور النادرة التي تتخذ الجحور بيتا
معزة صادقة للجميع وتحيات زاكيات الأصدقاء
ودأب سن ودالبوش وودالفكي

مشكور ود الفحل علي جلب قصيدة الحسن ود ضبعة .

Quote: رجل قارح

هذه الكلمة مستعملة في عاميتنا لوصف الرجل المِقدام الفارس الجريئ الكاسر .
ومن معانيها في الفصحى، إذا ألقى الفرس أقصى أسنانه فقد قرح وقروحه وقوع السن التي تلي الرباعية .
في العامية عندنا إذا شعر الولد بأنه بلغ سن الرُشد نقول قرح، خاصةً إذا ابدى تصرف كتصرف الناس
الكُبار أو تمرّد نقول، والله الجنا دا قرح، أو الجنا دا بقى قارح .

الزول المافيهو فايدة وأحمق نقول عليه زول بو، ومعناها في الفصحى، الرجل الأحمق، والبو في الأصل
جلد الحُوَار يُحْشَى تبناً ويُقَرَّب من أمه لتدرّ عليه، وهو كذلك عندنا في العامية ؤُ كمان جلد العجل، ونسميه
في العامية العبوب، يقولك الزول دا عبوب يعني ما فيهو فايدة ...

العبيد ود الطيب هلاهلا والله .. لا يفتي في ثقافة ألبل والعبيد قاعد ولا يفتي في حياة البادية وهو حضور
حبابك يا صاحب
ويقولون
الود دة قرح خلاس اي شب عن الطوق وصار جريئا

Quote: من الحيوانات المرتبطة بالشجاعة ويكثر التشبيه بيها في الشعر العامي السوداني التمساح وحقيقة التمساح عندو ثبات انفعالي وركزة وتحس انو عندو انفة وثقة لما تشوفو في واحدة من الجزر الرملية وليهو كثير من الاسماء في العامية السودانية مثل ابكريق والدابي والعشاري وكثرة المسميات تدل على عظمة المسمى .. واطالب انو التمساح يكون شعار السودان وان يكون لقب منتخبنا الوطني تماسيح النيل على الاقل نثبت احقيتنا بالنيل السرقو مننا المصريين وربطوهو بيهم ومن الامثلة في العامية السودانية للتشبيه بالتمساح ياالدابي العُشاري وزي الشرار عينيك تمساح جلقني وزي الشرار عيني طلع لي عشارى الليله مسكو يفوح تمساح الكوانى الضارب الليه أب كريق في اللجج ... سدر حبس الفجج فوق ضهرو الخبوب ضنبو تسع طيات ودي في مختار ودر رحمة ناظر العبيدية عرش دود مراقد السار

حقاً يا ود الفكي التمساح ليهو هيبة وهو مخلوق عجيب وغريب
وفاتك في إفتراسه لفريسته .

والعُشاري من التماسيح ما طوله عشرة أمتار وما فوق العشرة، والعُشاري
دا في النيل بيكون كأنما هو جزيرة عايمة .

والتماسيح تُنسب للمناطق والجُزُر،
كما ورد في الغُنا في الأمثلة، تمساح جلقني،
والغناي قال،
أنا تُمساح فداسي الكسرو ما بيجبّر
بابور التُرك طفاي كهارب البندر
أنا البلا الحرق الشُدر بعد ما خدّر

تمساح توتي .

ويُنسب التمساح ايضاً في التشبيه للأماكن، وفي الأمثلة التي اوردها
ود الفكي،
تمساح الكوانى الضارب الليه
أب كريق في اللجج
عرش دود مراقد السار،

والدود اللسد ايضا.
الكواني جمع كونية وهي المكانة الغريقة في النيل، والليّة
هي الشيمة . واللِجج الأماكن الغريقة في النيل، والسار جمع
سارة وهي ارض صخرية قريبة للشُعب المرجانية، والتمساح
في هذه الأماكن يكون اكثر هيبة ومهابة .

الغناي قال،
هو اللِدِر العلي ضهرو الخبوب والطين،
دا قطع شك تمساح دميرة .

عكس التمساح الورر، ؤُ نحن بنقول عليهو بيضة التمساح الخايسة،
والورر جبان جداً ويُشبه به الرجل الجبان، ومن الأشياء الغريبة
عندنا إننا بنقول للزول المابيعرف يعوم ورر مع إنو الورر برمائي
لكنه دايماً يكون كاسح مع التيار في البحر، عكس التمساح الذي
يشق العِرِق كالسفينة ...

Quote: الاخ معاوية تحياتي الرخم، او الرخمة او ام رخماللو، عندنا - نحن ناس الجزيرة - من الصقور، و لونها ابيض . تعيش على القاذورات و الجيف التي تعافها الطيور الجارحة. و ترتبط عندنا بالبلادة و الكسل و عدم الاحساس. لهذا يقول الناس، ان الرخمة قال انا مهما كنت سيئة: فأنا احسن من تلاتة التم الاربعين و جلس مع نسابته و المشى البحر و رجع بجنابته و الجالس و الواقفين اخياته

مرحبتين حباب عبد الله،
والله شرفتنا بالحيل .

جبت الرايحة يا عبد الله اخوي، والزول المافيهو فايدة فعلاً رخمة، والقالت
الرحمة اخير مِنهُن ديل نقول، مِنّو العوض ؤُ عليهو العوض .

الزول البيكون عنيد برضو بيقولوا عليهو بُوّمة، ؤُ كمان مرآت ينسبوليهو الفعل
يقولولوا، خلآس قُمت علي بوامتك !. وأهلنا يتشأموا من البومة مع إني وجدت
قبائل الأسكيمو يتفاءلوا بالبومة ويعتبروها من الطيور المقدسة كمان !...

Quote: Zo Zooz سلام يا ود المدير، أكيد ناس السافل بيعرفوا والرخم والا ما كان جابوهو في امثالهم .... في غنية مشهورة للمرحومة (حميرا) في شكر الحسن ود ضبعة عمدة الجوير، بتقول : تلب يا صقر ... طـيــّـر الرخـــم منــيّ، هسي بغنيها فنان اسمو (عمر الحواري) فتش في يوتيوب وح تلقاهو. ممكن تورينا حكاية (الطيرة أم طبق .. اللي تطلقها الآمات علي البنات المساكين وغير ملحلحات

سلآمات ؤُ مرحبتين حباب زوزوز .

يا اخي والله ذكرتني الطيرة ام طبق ؤُ دي نسينا نسعل منها اهلنا يا ريت يجي
زول يكون عارف معناها، بس يبدو إنها حاجة كدا زي الرخمة . بعدينك أهلنا
للبنت الطِهامة برضو بيقولو، البت دي طيرة ؤُ في الطيور حميرة . مع إنو
الحميرة دي من فصيلة القمري وهي طيرة وديعة وجميلة ؤُ ما بتلآحظ عليها
تِطِهِم او غباء، وإفتكر الحميرة ظلموها أهلنا ...

سلام ياولد العم
الرخمة قالت انا اخير من ثلاثة
الساكن مع نسابتو
الـ بِقطع البحر بى جَنابتو
والـ بِسعلْ من الحديث بعد ما فاتو

اعمل لينا بوست عن الدَّبَاسة
يقول ليك فلان ده دباسة
مع انى شايف الدباسة دى طيرة جميلة جداً.

والفِرّه المسيكينه دي، هسي الصقر دا ما خاتي عليها يا قدّال
والبراق برق شوف عيني الصقير بجناحو كفت الفِرّه
هل من أمثال عنها ؟

الدباسة مش ياها الفرة !!
والفرة اياها .. طائر السمان البتوجد في المواني ويسكن الفنارات
الفرة بنخلعها ونهجمها وبتجي واقعة

لا و كمان حجوة ام ضبيبينة
حتى الضبانة ما خلوها
لكن بالجد الضبانة ثقيلة
خاسة لما يكون عندك عوارة

الدباس عندنا في جزر الرباطاب
لكن ياها الفِرّه، أودّي وشي وين من عبد العزيز الفاضلابي السبقني دا ؟

الله يجازي محنك يا معاوية..ياصديقي...
يعني ، داير تقنعني انك مستمتع لمن الشعوب دي كوللللللللللللللللللللها مسكت ماسورة؟!!!
حزنت لود البوش ، وكنت قايلو زول خلا زينا ، ما تفوت عليهو الحاجات..
اما عبد الحفيض ابو سن ، عمل شغل يمخول الما بتمخول ، ياهو ذاتو يا معاوية ، عبد الحفيض القاعد يباري في جخانين المنبر ، وعامل فيها معجب بي حاجات اسامة الخواض..!!!!!!
وديل كلهم هينين ، العجيبة جلالدونا.. ما صدق لقي ليك حكاية ام رخم الله الوقعت ليهو في جرح (خصوصا جرح الكف ولا شنو كده ما عارف) ، وتشوك رايح يشيل ويضري في عيشو..لمن القماري هفتو ليك التكتح..وخلت خشمو ملح ملح..!!!

المافي شنو؟..

البوست قاعد اتاوق ليه من قولة تيت..!!
وزي ما نضمتو كتير ، ديموقراطية ساكت ، ادونا معاكم فرقة..
وضدا للنياصة القاعد يمارسها الشعب هنا.. فبرضك الطيور فيها حاجات تانية وسمحة خلاس..والله صحي..!!
البتابع حكاية ام رخم الله ، زي قول عمك شاعر الرابطة القلمية ( ومن نفسه بغير جمال ، لا يرى في الوجود شيئنا جميلة)..ياخي زول يسمى النخلة بانها حمقاء ن ده مش زول مفروض يودوهو مستشفى التيجاني الماحي؟,,
وللجماهير الطيبة ، من اهالي امسودان وشنو كده ما عارف ، االقصيدة ديك كان اسمها (التينة الحمقاء) ، لكن العملاء الوهم من اهالي امسودان ،لم مسكوا السلطة (ديل ناس نميري يا معاوية) قاموا سوها (الخخلة الحمقاء) ،
زهم نفس الناس القاموا عملوا لينا (طه القرشي مريض في المستشفي) ، وبعدما تابوا وقالوا الرووب ، جوا شرحوا الحاصل شنو (جلالدونا انت معانا في فهوم الحداثة دي ولا نفصل اكتر ..! ، غايتو معاوية المدير الحاجات واقعة ليهو تب..!)..

الجماهير القاعدة تتابع البوست ده ، خلونا من النياصة ، تقرأ السلبية.. مش الموضوع بدايتو نوع من الطيور (ام رخم الله)؟..
هاكم طيور تانية ، متفاءلة ، ايجابية .. ومعانية سمحة خلاس ، ممكن تجذب الوجدان اكتر من المعاني السلبية بتاعة ام رخم الله..(بالمناسبة انا شفت ام رخم الله حقيقة ، والكلام البتقال عليها ده مخطط حاقد ساكت)..


ده طير الرهو..



كبر

ودي لحبيبنا جلالدونا ، اها يا جلال عندك كلام في العاقب محمد حسن (عليه السلام)..؟..

ضبان في عينك يا جلال ..!
قال وراي: غني يا قمري..!!





عييييييييييييييييك يا معاوية ، ام رخم الله طيرة ، ونعم بالحق ، برضك في طيور تانية سمحة خلاس..!!

كبر

ودي لحبيبنا معاوية ، سيد ام قالت ام رخم الله..!!

ملك الطيور ، قال ليك يا معاوية...(دي طبعا بالحداثة ، زي حكاية فول بالزيت والجبنة ) وبالعدم (موكا بالكريمة)..!!




كبر

اها ، شباب ، مش الموضوع طيور في طيور؟..
الفكرة يا معاوية ، ام رخم الله دي ، لو مرقت من اطار ثقافك الضيقة ، القامت جابت ليها شعوب مسكت الماسورة بكل براءة ، ممكن تلاقي ثقافات تانية عندها المعنى مختلف تب..يعني ممكن يكون نظرة ايجابية..!!

ودي سكة دايرة حفر (حداثي ) عميق خلاس..!
لكن خلينا في الطيور.. انت بتجيب عنها السلبي فقط..ونحن ح نجيب عنها الإيجابي المتفاءل..والحشاش يملأ شبكتو..!!


ليك ، ولكل ناس المزاج العالي الرايق خالص ، صديقنا طارق ابو عبيدة (غرد ياحمام)..ولا الحمام عندكم ، يا معاوية ، ماهو طير؟؟



اشمعنا ام رخم الله ، والحمام لأ؟..

كبر

هيييييييييييييييييييييييييييييييييع... جنى الوزين يا صديقي ،



اشمعنا ام رخم الله ، وجنى الوزين لأ؟..


كبر

وبرضك في معية الطيور ، كقيمة ايجابية في ثقافات امسودان..

اللحو (في زول بيقدر يقول بغم في اللحو)؟

الطير الخداري...



اها ، زي ما ناس معاوية ، البعض بتفتكر انو ام رخم الله دي حاجة شينة كلو كلو ، في ثقافات سودانية بتمجد ام رخم الله ، والله صحي..!!
ومش مهم..
المهم.. هسع ده امشوا دار ناس بريمة ، ياخي الطير الخدراي هناك ، والله لو زول اداك ليهو هدية ساكت ، الدم يسيل للركب..!!!
في ثقافات البقارة / الطير الخداري ما عندو سالفة تب..والناس بتعاين ليهو بصورة سلبية خلاس..!!

كبر

Quote: الله يجازي محنك يا معاوية..ياصديقي... يعني ، داير تقنعني انك مستمتع لمن الشعوب دي كوللللللللللللللللللللها مسكت ماسورة؟!!!

كبر يا صاحب،
سلآمات .
يا زول المصحيك لهسّع شنو ؟.

يا كبر والله العظيم البوست دا لِما فُتح له وانا أبنت ذلك في بداية البوست .
كلّ الأخوان الذين تداخلو هنا اخوان كرام لهم مكانة خاصة في نفسي ووالله ما قصدت
اخادعهم، فالأمر لا فيهو ماسورة ولا يحزنون، ولا يمكن انا اتلآعب بناس عرفتهم وعرفوني
من خلآل هذا المنبر واحترمهم ويحترموني . مافي ماسورة يا كبر وهذا البوست ظاهره مثل
باطنه وسيستمر إن شاء الله علي نفس النهج .

بالنسبة لصاحبك الخواض الذي إعتقدت انه هو المقصود بالبوست، اقولك، والله العظيم
صاحبك دا الرخمة زاتا كتيرة عليهو وحتي تتأكد من كلآمي دا باري كتاباتو ؤُ مداخلآتو
هنا ستكتشف انه تلزمه سنين كثيرة كي يبلغ مقام الرخمة، رخمة شنو البنشبه عليها
الخواض ؟. يا اخي زول اقولوا، ابعد الأُسر من نقاشنا يقول لي، بهجوك واهجو أُمك
وابوك وأُسرتك وأولآدك ؤُ يسميهم كمان، ؤُ تقول لي اشبهو بالرخمة ؟!، إنت جادي
يا كبر ؟. يا زول رخمة شنو ؟، عليك الله امش سوقلو القطر المدورو ليهو بهناك داك
البوست دا للتشبيه ؤُ كان ممكن يكون عنوانو التمساح العشاري . ما سورة شنو يا زول
إستهدى بالله، النعجة دا لا يستحق بوست . والله صحي . وفّر مداخلآتك دي للقطر
بتاعو عليك الله ...

Quote: البوست قاعد اتاوق ليه من قولة تيت..!!

بالله !.
تيت ياتا يا كبر ؟.
علي اليمين إنت حدك مع البوست دا العنوان، يعني العنوان دا ما فُتُ شبر،
ؤُ ما تنسى إنت بتاع قانون . البوست دا لا يتحدث عن الرخمة فقط ولا عن
الطيور عامةً، وإنت لو متابع من قولة تيت ما كان جيت رميت لينا دشليون
فيديو بتاعت طيور، عليك الله لمها وديها قطر الخواض ؤُ لآزمك إعتذار
للناس المتداخلين في البوست دا . تاني بقولك الخواض شنو كمان البفتحلو
بوست زي دا ؟، عليك الله ما تحاول تخلق للزول دا شخصية علي حسنا ...

عفواً،

ونواصل إن شاء الله ...

معاوية يا صديقي ، حبابك
انا صاحي لأنو الدنيا ويك اند (و سلمنا العهدة وانتهينا..!!) ،

فكرتك يا معاوية انك بتتكلم عن التشبيه العديييل...!!..وما في مشكلة..
لكن يا حبيب الله شافوهو بالعقل وما شافهو بالعين.. !
اشمعنا فكرة التشبيه ( القريتو زمااااااااااااااااااااااااااااااااااااااااااااان في كتاب البلاغة بتاع على الجارم وعلي امين) ما تطب عليك الإ بعد ما يجي ذكرو في بوست القطر؟..
الحكاية سياقات عامة يا معاوية ، ولمن زول يقوم يجيب سيرة التشبيه والإستعارة ، وتجي انت تجيبها على كيفك كده.. برضك مافي مشكلة ، لكن لمن نقوم نقراها في سياق البورد والحاصل بينك وبين اسامة الخواض..
فهنا يا حبيب بتكون في اسئلة كتيرة بتدور في الراس..!!

هل تستبعد يا معاوية انو البعض يفهم خيطك ده مجرد تنحيل و مناطحة ضمنية وسكوكية ؟..
لو انت قلت انك برئ وما قاصد حاجة ، شغل ناس زي جلالدونا ، بيخذلك .. لأنو العفش داخل البص على مسئولية صاحبه..!!

صديقنا منصور المفتاح ، عامل القصة واضحة ومافي مشكلة..!!

وصدقني ، غير خيط ده ، خيوط تانية ، برضك مدورة في نفس المدار بتاع النياصة..!!
من غير حليفة يا حبيب ، السياق بيخذلك وبيؤكد ان الفكرة فكرة مجابدة مربوطة بواقع تاني..يعني نظام تنحيل يا معاوية..والتنحيل ما فيهو مشكلة .. لكن المشكلة الناس بترفض و بتمنع الناس التانيين حق التداخل..والدليل احتجاجك على
على الغنا عن الطيور.. مع انو الرخمة طيرة ، والغنا الجبناهو متسق تماما مع فكرة التشبيه الكنت مفتكر انك قاعد تتكلم عنها..!!
اشمعنا الاستنكار , والأظرط المطالبة باعتذار كمان؟!!!
البوست تنقصه البراءة يا حبيب..وممكن تقول حجتك من غير حليفة..!!
تطرق اسامة الخواض لأسرتك امر مرفوض يا معاوية ، وما عندو مبرر خالص..وادين الفعل لو صدر من اسامة الخواض او من غيرو..!!

كنت ساضيف غنية اخيرة ، ما عندها علاقة بالطيور ، لكن عندها علاقة بالتشبيه البليغ ، التشبيه العديييييييييييل ، وكنت سأهديها لأخونا جلالدونا .. لكن وكت الحنبكة حصلت.. ده طرفنا من البوست ده..!!

كبر

Quote: الحكاية سياقات عامة يا معاوية ، ولمن زول يقوم يجيب سيرة التشبيه والإستعارة ، وتجي انت تجيبها على كيفك كده.. برضك مافي مشكلة ، لكن لمن نقوم نقراها في سياق البورد والحاصل بينك وبين اسامة الخواض.. فهنا يا حبيب بتكون في اسئلة كتيرة بتدور في الراس..!!

يا كبر انا ما مُلزم اقنعك بأنو البوست ما مقصودبو الخواض، لو إقتنعت كان بها
لو ما إقتنعت دا شي بيخصك إنت، وكذلك الإعتذار . علي كيفي كيف يعني ؟،
إنت قراءتك خطأ ؤُ ما عينت خير، بل طوالي إتهمت ؤُ جزمت كمان من غير
تتحرى، ثمّ إنت ما خليت مجال للأسئلة عشان تدور في الراس إجاباتك كانت
جاهزة ؤُ حددت بما لا يدع مجال للشك ان الخواض هو المقصود بالبوست
ؤُ جيت كبيت مداخلآتك علي هذا الأساس شنو يا كبر تقول لي جلالدونا
إنت بكلآمك جيت قاصدني انا، وأفردت لجلالدونا مداخلة براهو، ؤُ يا اخي
جلال زاتو ما قاصد الخواض بتاعك دا . بعدين يا كبر شنو حكاية منصور
عامل حاجاتو ظاهرة دي ؟، يعني انا العامل حاجاتي بالدس ؟، ما تراهو
الخواض دا انا قاعد اجي اهاجمو في بوست القطر بتاعك علني، والمناقرة
البيني ؤُ بينو دي ما من الليلة ولا البارح . يا اخوي لملم فديوهاتك دي امشي
اشحنا في قطركم دا واركبو معاها ...

Quote: اشمعنا فكرة التشبيه ( القريتو زمااااااااااااااااااااااااااااااااااااااااااااان في كتاب البلاغة بتاع على الجارم وعلي امين) ما تطب عليك الإ بعد ما يجي ذكرو في بوست القطر؟..

يا اخوي تشبيهك دا ورد وين في بوست القطر ؟.
إنت قايلني انا بوست القطر دا قريت كل شاردة وواردة فيهو ؟.
يا اخوي القرائن والأدلة دي من غير تحري تُعد صفر كبير
جداً، وهذا للعلم ...

ود المدير
وكل الحضور البهي
سلام
حكم اب تكو
ويتقال للشخص الذي يصدر احكام قاسية وصعبة وظالمة
ويقال ان ابتكو نوع من انواع الطيور
يقوم في موسم التزاوج بنزع ريش الانثى بعد وضع البيض
ويتركها في العش ... لا تستطيع الطيران ..
ولا تستطيع الطيران الا بعد ان يطير صغارها
ويكون عندها اكتمل نمو ريشها هي الاخرى ..

تحياتي للاصحاب هنا
مرحبا كبر
وحبابك
بدون حليفة
دخلت البوست لأني اهوي التراث السوداني الاصيل ولو دار بخلدي او مر بخاطري فقط خاطر ان البوست مقصودا به احد .. اي احد لأحجمت اولا وقاطعته
لا تنكأ الجراح يا صاحب
قال معاوية بن ابي سفيان
جل الفطنة التغابي
او كما قال

تحياتي يا كبر

اسمح لينا (من ود نحمله لك) أن نقول أن مداخلتك لم يحالفها التوفيق وكانت سافرة عن وجه جنائي غير مبرر

لماذا تريد جعل الناس يشعرون بذنب إفتراضي تجاه الأستاذ الخواض

نعم نعلم أن هناك عداء مستحكم بين معاوية والخواض ولكن هذا ليس مدعاة أن تقاطع الناس بوستات معاوية المدير أو بوستات الخواض
فبقدر ما نحترم الخواض ونثمن له دوره الأدبي فإننا نحترم معاوية ونقف على مسافة واحدة منهما فيما يخص زمالة المنبر
كتب معاوية الكثير من البوستات على هذه الشاكلة التراثية وتداخل فيها الكثيرون فلم يُثار غبار حولها
ومسار هذا البوست لا يشيء بأي نية سيئة للنيل من الاستاذ الخواض

ولن نحاكم ضمير معاوية غيابيا فخلافه مع الخواض أضحى مواجهة مكشوفة ولا يحتاج إلى التستر خلف التشبيهات

مع ذلك نتمنى أن تزول أسباب الخلاف بينهما وأن يحتكما لصوت العقل

حباب عبيد الطيّب .

ود المقدم ربيب البادية التي يستأنِس بوحشها ويتفيأ ظلآلها وتطربه طيورها،
وتألفه عربانها حبابك ألف، حبابك ألف يا خريّت البادية ويا منارها الشامخ
و صُوى دروبها . حبابك، وانا عرفتك بتجي بجاي واتمني ان تتكرر زياراتك
حتي نحظي بغزير معرفة عن تراث بوادينا الجميلة . ابقى واصل يا ود المقدم
ولك وللجميع كامل مودتي وأرجو يا إخواني ان تواصلو فالبوست الغرض
منه واضح وليس هنالك اغراض خفية . للجميع مودتي .

ربنا لا تؤاخذنا بما فعل السفهاء منا ...

Quote: أيضا "أبو التكُّو" الطائر الآخر ، زوجته يضعها في "كركور" من الشجر، ويقفل عليها الكركور يقولو ليك "مِسدِّد تسديت أبو التكُّو"

Quote: ود المدير وكل الحضور البهي سلام حكم اب تكو ويتقال للشخص الذي يصدر احكام قاسية وصعبة وظالمة ويقال ان ابتكو نوع من انواع الطيور يقوم في موسم التزاوج بنزع ريش الانثى بعد وضع البيض ويتركها في العش ... لا تستطيع الطيران .. ولا تستطيع الطيران الا بعد ان يطير صغارها ويكون عندها اكتمل نمو ريشها هي الاخرى ..

لله في خلقه شئوّن !.
سمعت كتير حكم اب تكو أو حكم التكو، لكن اوّل مرّة اعرف قصة هذا الطائر
العجيب، ؤُ كمان قالوا، في فترة الحضانة دي السيّد التكو دا تب ما بيقصِر
لا مع المرا لا مع عِيالآ، ؤُ بيقوم بكل إحتياجاتهم من مأكل ومشرب و دواء !.
لكن الظاهر المرا دي كان عمنا التكو دا خلآها علي كيفا بتخرب اللوّل واللآخر
و التكو أعلم بحال مرتو وأُسرتو ...

عزيزنا كبر
اول هام
خليك هنا و بلاش تفارق
تانى هام
ياخى انا تعبت مع ود المدير ده لامن نفسى قام عشان اقنعو ينسى خلافو مع استاذنا الخواض
لى درجة فتحت بوستات كل الغرض منها اسوقو بعيد عن سكة الخواض
منها الدميرة و حجيتكم ما بجيتكم و البوست ده شاركت فبهو بى فعالية لى خدمة نفس الغرض
بى اعتبارها بتقع داخل اطار اهتماماتو
تالت هام
مما جبت سيرة مقطوعة الطارى فى بوست القطر وانو عدلت عن الرد
جا فى بالى انك تأبطت امرا و انه لا محالة واقع ... بس كمان ما اكتفيت بالدلائل و الاشارات
بل اضفت اليها القرائن فصارت سيموقيطا قانونية. اما حتة النخلة الحمقاء نحمد الله انو استفدنا من حتة التناص
و استعملنا مفردة شدرة ولم يأت دكر للنخلةو يا ريت بيها نتخارج من حكاية التجانى الماحى
رابع هام
حكاية الضبان دى ... قبل اخونا معاوية ما يفترع البوست ده قلت ليه انشالله يجيب
امثال اخوانا عبيد و موسى الراجل و عبد الحفيظ و بريمة و ابوبكر ...
و غيرهم يى اعتبار ان لهم ميول و اهتمامات بالتراث ,
ثم انو يا استاذ كبر ياخى انا كنتا بتداخل معاك و كتير كمان من زمن كنتا بكتب بى تحت
و اعلنت اعجابى بما تكتب فكيف اسمح لى نفسى ان اشير لما تكتب بى حجوة ام ضبيبينة
عشان تجى مقطوعة الطارى و تأشر ليك عليها و تحملها دلالات خبيثة
غايتو هجمتنى هجمة الزول داك القال ... من اسد خلقنى ما شفتا الله قدر ده ....
و عشان تهدى من روعى لازمن تجى و معاك الهدية الحرمتنى منها بى سبب حمبكة ود المدير دى
تعال عشان انا عارف جرابك مليان بى حاجاتنا الجميلة دى
تعال عشان اقول وراك
غنى يا قمرى
و ازيد عليها
يا قميريات ستات الجمال جايات قوقن

هذا مع اكيد ودى و احترامى

Quote: اعمل لينا بوست عن الدَّبَاسة يقول ليك فلان ده دباسة مع انى شايف الدباسة دى طيرة جميلة جداً.

Quote: الدباسة مش ياها الفرة !!

Quote: الدباس عندنا في جزر الرباطاب لكن ياها الفِرّه، أودّي وشي وين من عبد العزيز الفاضلابي السبقني دا ؟

هههههههههههههههههههه،

يا ود الزبير عبد الحفيض بالغ لكن . والله صحي .

الدباسة تالآ السافل عندنا هي القمرية، والقمري عندنا انواع، والدباسة اكبر
أنواع القمري حجماً ؤُ بنسميها برضو أُم خنآق و أُم طوق عشان عندها ريش
اسود حول عنقها كما الطوق حول عُنق الحسناء . عندنا القمرية أُم طوق وهي
اكبر انواع القماري حجماً ثم الحِميّرة وهي اصغر في الحجم ؤُ ما عندها طوق،
ثم البليبة أُم ضنباً قصيّر، واخيراً البليبة أُم ضنباً طويل .
الدباسة هي القمرية يا ود ابو سن، والفِرّة بنجيك ليها إن شاء الله ...

تشكر ود المدير وود الزبير
القمرية والبلوم والدباسة ذكرتني نكتة الاعرابي القبض ليهو كديسة !!
اب تكو بالاضافة لنتف ريش الانثي بعمل عش لا يتسع الا لقدوم الانثي من اجل الطعام . بعدينك الراجل ماقصر متكفل بي كل احتياجتها تاني هي مارقة ماشة وين
والدي كان مسميني الفار الابيض ..سألتو في فار ابيض .. قال لي اي بطلع مع الفجر ونحن ماشين الزرع بجفل الحمار لامن يرميك . فار صغير لا يبين ويظهر فجأة
ويقول ليك الزول دة زي فار ام سيسي جنو فتيش ومهابشة
شفقة الكلبة الجابت جناها اعمي
عتود البرم لو خلوهو ما بعشر غنم ولو ضبحوهو ما بغني من قرم

Quote: عتود البرم لو خلوهو ما بعشر غنم ولو ضبحوهو ما بغني من قرم

غايتو يا ود ابو سن نفر محقة عتودك دا يعميني !.

شُفتَ حكمة رب العالمين، الفار السغيروني دا يجفّل الحمارة !...

السلامو عليكم يا رهط..

اهلنا قالوا كلام بلا مثل ما بيكمل ، واخونا معاوية المدير بقى معانا زي (بيضة ام كتيتي) كن شلتها بتكتل ابوك وكن خليتها بتكتل امك..
والرجل عندو خصومة واضحة مع اخونا الشاعر الكبير اسامة الخواض ، ولحدي هنا ما مافي مشكلة ، لكن مشكلة معاوية انو الموضوع بقى عندو ،
على قول المثل (امنقور كلا قدومو احمر) ، وامنقور يا هو ابتكو القاعد يحدثكم عنو اخونا علي محمد الفكي..فمعاوية بقى عندو اسامة والناس البتحاول تقرا حاجات اسامة ، كلهم عندو حاجة واحدة.. رش تقيل زي رش الطيارة للجراد..

طيب الحكاية دي نحن جبناها من وين؟..ومن وين جاتنا فكرة انو معاوية متدرع لأسباب بتخصو؟..عريبي الخلا الجد جد هو (صانع التنحيل)..!!

في خيطنا (تواصل مع نص خسوف القمر الأتبراوي) ، في يوم 10 ابريل 2015
انا كتبت اقول:

Quote: الأتبراوي ، هي صفة القطار المنسوب الى مدينة عطبرة السودانية ، وهي المدينة التي يسميها اهل امسودان (عاصمة الحديد والنار) ، اي انها عاصمة قطارات سكك حديد امسودان ، وقوله ( ارتمى) و(غنى دامعا) ، فهنا استعارة ، تشبيه بليغ حذفت احدى اركانه الأساسية ( مشبه او مشبه به) ، فهي استعارة مكنية ، حيث شبه القطار بالإنسان ، فحذف المشبه به ( الإنسان) ، ولكن اتى باحد لوازمه ( الإرتماء) أو (الغناء المصحوب بالدمع) ، فهل يغني القطار؟ هل يدمع القطار؟ بالطبع لأ..!!!

سيدنا معاوية ، قدس الله سرو ، بعد اسبوعين من السكوكية ، قام اشتغل حنبكة ، شغلة زي (نقيرات ابو الحصين) وعمل بوست الرخمة القدامكم ده..وهل فيها مشكلة ؟..طبعا لأ..ولكن..!!
في مداخلة يوم 25 ابريل 2015..
كتب معاوية:

Quote: سوف نتعرض في هذا البوست للتشبيه المباشر، يعني تشبيه عديييييل كدا . تشبيه بدوان اداة تشبيه، وهو ما يسمونه في اللغة العربية بالتشبيه البليغ، ومثال له، الرجل اسد . إذا اردنا ان نضيف اداءة للمثال نقول، الرجل كالأسد، فأداة التشبية هنا (الكاف) ودا يكون تشبيه مُجمل . علي كُلٍ في البوست دا يهمنا التشبيه من غير ادوات، اي البليغ وفي البوست سميناهو، التشبيه العديييييل كدا ...

وبما انو سيدنا معاوية ليهو ست سنين في المنبر ده ، وما كان شغال بحكاية استعارة وتشبيه بليغ وغيرو..لكن هسع هفت ليهو..يعني المسعلة توارد خواطر للحد ده؟..
طبعا ممكن ناس تصدق انو ده توارد خواطر ساكت..لكن عندنا ده علف لأغراض غير بريئة كلو كلو..ككيف الكلام ده؟..

في يوم 25 ابريل 2015 ، سيدنا معاوية كتب:

Quote: لكن بالرغم من كدا الزول لآمن تصدر مِنّو تصرفات عويرة يقولوا، فلآن طيرة . غايتو دا ظلم الحسن ؤُ حسين فالطيرة تحتاج لمحامي كاااارب عشان تقاضي ود اب نادم .

مش نحن بنكتب بوست التواصل ، دفاعا عن نص الخواض وانو نص من حقو على الناس انو تقراهو..
ناهيك عن فكرة اننا فعلا وفي جزء من حياتنا اشتغلنا بالمحاماة وتركناها بعد مرقنا من امسودان . اها شغلات المحاماة سيدنا معاوية ذكرها في سبيل الطيرة..رجال عميق خلاس..!

ولمن تنحيل شغلات المحاماة ما جابت حقها في بوست الرخمة ، تووشك اخونا جلال جا جابها لينا بي ريشها في بوست التواصل..وكتب:

Quote: نقول كتب الا ستاذ الخواض و نص الاستاذ الخواض و انت الرجل القانونى تعرف.. نصت المادة من قانون العقوبات و تعرف ايضا هذا ما جاء فى اقواله بالنص الداير اقولو كلمة كتب اجابتها كتب شنو وكلمة نص اجابتها نص على شنو

يعني يا سيدنا كبر خلعنا عليك لقب (محامي الطيرة) وما عبرتنا..اخير نذكر بانك الرجل القانوني..!!!!

والخيط بتاع التواصل كان ماشي كما قال المثل (الكـــــلب ينبح والجمل ماشي) ونو اوفنس يا شباب ده مثل ساكت..ومن قبيل قلنا ليكم كلام بلا مثل ما بيكمل..
اها الخيط ماشي..وتووشك اخونا جلال (طبعا عامل مع سيدنا معاوية ون تو، واحد يشيل والتاني يكسر/ دي للناس البتعرف طبيعة غنا ناس الخلا:شيلة وكسرة)..
جا راجع هنا بيت النياصة (بوست الرخمة) وقام اتذكر ليك مثل عجيب وكتب:

Quote: لا و كمان حجوة ام ضبيبينة حتى الضبانة ما خلوها لكن بالجد الضبانة ثقيلة خاسة لما يكون عندك عوارة

لاحظ معاوية بدا الشيلة لمن قال (الزول لمن تصدر منو تصرفات عويرة، يقولوا فلان طيرة) وجلال جاب الكسرة (حجوة ام ضبيبنة)..!!..
طبعا يانا س البنادر ، جلال لمن قال (عوارة) ما قاصد الشتارة ، لكن قاصد العوار (الجرح)..!!!

مصادفات عجيبة مُش؟..


والأظرط معاوية يفقد المنطق ويقول ليك شيل فيديوهاتك واتخارج؟..ده منبر عام ، يا شيخ معاوية، وفيهوحرية تعبير مطلوقة للطيش يا عم لو ما بتقدر عليها شيل براطيشك واتخارج..!!

صدق مثل اهلنا البيقول (النصيحة مربوطة في ضنب نمر)..قليل البيقدر يجيبها..!!

والسلام..

كبر

تعرف يا كبر -بعد السلام عليكم طبعا- ماركيز في واحدة من حكاويه قال
الحلاق أثناء عملية قص الشَعَر بطقطق المقص في الهواء كدا.. ليتخلص من فائض مهارة
أها انت هنا بتتخلص من فائض خيال
ما بين الخواض وود المدير لا يرضي أحدا، وأنا شخصيا متألم لما يحدث لأنه يصرف طاقتهما (فائض طاقة)
في ما يصرفهما عن تجويد "القص".
وما تزعل بالله يا كبر من كلامي دا

Quote: والأظرط معاوية يفقد المنطق ويقول ليك شيل فيديوهاتك واتخارج؟.. ده منبر عام ، يا شيخ معاوية، وفيهوحرية تعبير مطلوقة للطيش يا عم لو ما بتقدر عليها شيل براطيشك واتخارج..!! صدق مثل اهلنا البيقول (النصيحة مربوطة في ضنب نمر)..قليل البيقدر يجيبها..!!

إنت لِسّع مُصر تمثل دور الزول اللماح البيعرفا طايرة، والأشطر والأفهم من كلّ
الناس ؟. لا خلآس إنت أقنعت كلّ الناس الهنا ديل بأنو أنا ركبتهن ماسورة ؤُ شيلتهم
القُفة والمقصود الخواض، خلآس إقتنعو بعد حضرتك جلبت مُقارنات لا يأتيها
الباطل من بين يديها ولا من خلفها، ؤُ طلعت إنت الفاهم ؤُ باقي الناس بتاعين
نياصة ساكت حسب وصفك لهم .
يا ود ما تقعد في الوآطة ؤُ تبطّل الطنقعة البتعمل فيها دي .
شايف الخواض عاداك بالهبل ؤُ بقيت تغيّر عنوان البوست .
شيل طُراشك الفوق دا امسحبو نفسك المضخما في الفارغة
دي، وإتخارج من هنا بلآ منبر عام بلآ قرف معاك .
اقطع وشك ...

عذرا ود المدير فالقاعدة القانونة تقول
محل ما اتهموك بررررررى نفسك ودى قاعدة حقتى بررررراى
و فى الرد على استاذنا كبر ... اتمنى الا يخلو الامر من لطف و لطائف
و على ذكر اللطف و اللطائف فهى ايضا عنوان كتاب للثعلبى حكى فيه
ان ابا بكر الصديق رأى اعرابيا يحمل ثوبا فقال: أهو للبيع ؟.
فقال الاعرابى: لا اصلحك الله. فقال رضى الله عنه: هلا قلت : لا و اصلحك الله
لئلا يشتبه الدعاء لى بالدعاء على
يعنى شنو يعنى يا استاذنا كبر
عشان ما يشتبه الامر عليك لازم اكتب فى دبر كل مداخلة
هذه المداخلة لا علاقة لها بود المدير .... فى محل واو سيدى الصديق رضى الله عنه
فى مداخلة فوق فى البوست ده كتبت ان كبر تأبط امرا
و ظنيت بينى و بين نفسى انى قد بلغت قمة الخيال المتخيل
اتاريهو القصة اخيل من كده
لدرجة اكدت قصور قدارتى الاستيعابية المتخبلة
لا عليك
فلا زلت املك بعض حديد الارادة التاتشرىة لتفنيد تهمتك بالتواطؤ مع ابن المدير
و نواصل
المداخلة دى لا علاقة لها بود المدير سواء كان ونا او توا

Quote: فلا زلت املك بعض حديد الارادة التاتشرىة لتفنيد تهمتك بالتواطؤ مع ابن المدير

يا جلال تواطؤ شنو كمان ؟، ؤُ علي شنو نتواطأ ؟، الزول دا أنا
حلفت ليهو البوست ما مقصود بيهو الخواض، يقول لا، والناس
ركبو ماسورة ؤُ يصر علي ذلك !. بعدينك زول يجيك جوووووا
ديوانك ؤُ يشتم ضيفوك ؤُ يتطاول، بتقوليهو حسناً فعلت ؟.
سيب الزول القرف دا يتخارج من هنا ...

Quote: ما بين الخواض وود المدير لا يرضي أحدا، وأنا شخصيا متألم لما يحدث

والله يا معاوية انا أكثر منك الماً أن سببت لك ألم .
عفواً يا معاوية اعذرني، عشان انا داير اشوف حد الفرزدق القال،
داير يهجوني ويهجو أُمي وابوي وأُسرتي مع ذكر اولادي بالإسم
المقداد وفاطمة، وكلّ اهلي من جم . أما هذا كبر فهو جنازة بحر
منفوخة زيو ؤُ زي الخواد ...

Quote: يا جلال تواطؤ شنو كمان ؟، ؤُ علي شنو نتواطأ

يا ود المدير عليك الله ارحمنى من وناتك دى ياخى ما عندى اى تووات ليك
.... سمح ......
و يا استاذنا كبر
فى بوستا لى اخونا ود المدير عن بت من عطبرة
قامت العوه بينو و استاذنا الخواض بعد اعتذار بذله ود المدير للاستاذ بلة الفاضل
فى عوة قامت بنهما فى بوست له رغم وقار و جلال الموقف
اها خشيت بيناتم و لما لقيت نفسى خشيت فى زنقة زغتا بالدو

Quote: بجهالتى وقعت بين كفين فاستاذ الخواض يسأل عن الكف و ود المدير كف نفسه شرور معكوبيته فكفانى بها الله يستر من فرزدق و جرير ما بعد حداثة الحداثة فيهجونى احدهم بما تسير به الركبان فغض الطرف انك ذو جهلة ... فلا الخواض بلغت و لا مديرا عاد نبقى فى البشتنة دى

شفتا الحيادية و الجية على النفس دى كيف
____
المداخلة دى ما عندها اى علاقة بود المدير لا من قريب و لا من بعيد

تحياتي للاصحاب هنا
لا اخف اعجابي بالخواض ولا اعجابي بود المدير ولا اجد في نفسي حرجا من بذل مودتي لكلاهما
ف شنو
لا تدخلونا في جحر ضب خرب
او ..... وزة كما قيل
فلنكن جزءا من الحل ونعمل فيها ما شايفين وندفع بحسن النية ولا نكون جزءا من خلق بؤرا جديدة للخلاف
جلدنا رهيف والله يؤلمنا ان نر خلافات من نحب تسير نحو ان لا تحل

Quote: المداخلة دى ما عندها اى علاقة بود المدير لا من قريب و لا من بعيد

والله يا جلال أخوي اخير الزول يعمل
حسابو من هنا وغادي .

اها، قسم بالله العظيم انا مسألة التشبيه المباشر دي
جبتها لأنو عندي بوست قبل كدا قريب للبوست دا
كان مفتوح لكل انواع التشبيه، ؤُ كمان والله العظيم
ما شُفت الكلآم عن التشبيه في بوست القطر ؤُ دا الرآبط :
يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!...يـتـلـفّـت زي الـطـيـرة ... تـشـبـيـهآت فـي شـكـل سـحـرآت !!!...

أكتر حاجه بتبوظ البين الناس ...
سوء النوايا والفهم الخاطىء والإصرار على فرض الذات
..........

اما دون ذلك فالبوست ممتع ياود المدير ..

Quote: فلنكن جزءا من الحل ونعمل فيها ما شايفين وندفع بحسن النية

ود ابو سن، يا اخي إنت فوق الراس من فوق،
والله العظيم .
الناس يا صديقي ما تركت لحُسن النيّة مجال، إذا كان كبر بيوحي
ليهو شيطانو الحاجات الغريبة دي ؤُ يقنعو بأنو أفهم زول علي وجه
البسيطة و إنو بيعرف نوايا الناس اكتر منهم، يبقى نحن فضلنا شنو
غير نبرئ نفسنا ؟. الرسول صلي الله عليه وسلّم قال للأنصاريين،
إنما هذه صفيّة بنت حيي بن أخطب زوجتي . قالوا، سبحان الله
أعليك أنت يا رسول الله ؟. قال، إن الشيطان يجري من الإنسان
مجرى الدم من العروق .،
فما بالك نحن يا عبد الحفيظ ؟، قسمنا بالذات العليّة لم يشفع لنا
نسبةً لأنّ الإستنتاجات اقوى من الله في حسابات أخونا كبر !...

Quote: أكتر حاجه بتبوظ البين الناس ... سوء النوايا والفهم الخاطىء والإصرار على فرض الذات .......... اما دون ذلك فالبوست ممتع ياود المدير ..

ملهم يا ملهم كردفان،
حياك الغمام يا رجل .

يا اخي يا ريت لو وضعوني في خانة الفاسقين وتبينوا، حسب ما دعت
إليه الآية الكريمة، وأتمروا بما أمر الله به . إبن عباس قال، إذا سمعت
الله يقول، يا أيها الذين آمنوا، فأعرها سمعك فإنه يا امر يأمر به أو نهي
ينهى عنه . إذا كان تبينوا باعتبار إني فاسقٌ جاء بنباء ما كان دا حصل .
لكن نسوي شنو مع الناس الرفعها علمها فوق للعليم دي ؟...

ود المدير

امس كنت بتكلم مع اوحد من اعمنامنا قلت ليهو انا جعان قام قالي جوع بت الغرب الاكلت رحطها
ضحكت قلت ليهو انت قديم خلاص....انا سمعت هذا المثل زمان خالص...بس ما عارف القصه كيف
لو في زول عارف هنا يفيدنا

وكمان مثل امات طه ....ههههه

ابا ذر،
سلآمات .

Quote: وكمان مثل امات طه ....ههههه

هك أُمات طه حسب ما سمعتها انا ونسجت عليها :

Quote: حكاية أُمات طه ... مُر الجوآب رواسي المركب بدأ يحرك صاري الشراع في إتجاه الريح إستعدادا للإبحار للجانب الشرقي من النيل, في حين أن كل من الحبوب والغفاري والعبيد قد غادروا المركب علي حميرهم متجهين نحو بيوت القرية. درب المشرع ممتد طويل من البحر ليختفي داخل غابات أشجار النخيل والمنقة, وعلى جانبي الدرب حواشات البرسيم وقد نبتت في وسطها أشجار الليمون والبرتكان. الوقت منتصف النهار. رائحة البرسيم عابقة في المكان, والفراشات الممراحة تغازل في زهرات البرسيم بينما الحبوب يحاول كبح جماح حمارته التي بدات عنيدة بعض الشئ... الحبوب: حاو... حاو... عليكم الله شوفوا الحمارة المقبوحة دي!... بلا ياخدك... الغفاري: زمان ما قلنالك إشتري حمار ود الضهبان, ساكت ابيت تسمع كلامنا... الحبوب: ها زول حمار ود الضهبان يطير, الشي دبزاوي أنا من يومي عرفتو وكجنتو... العبيد: والله غايتو شيتا يخلي حمارتك تقطع البحر ده ما في, إلا طه ود الفنجري ده زولا مو هيَن... الحبوب: آي والله صدق, زول أخو أخوان بالحيل... حاو... الله يخربك يا المسنوحة... الغفاري: يا جماعة الناس ديل ضحويهم شغال, دحين أكان ما جرتقنا العريس بسيطان فوق ضهرنا ده, أوعو من نفطر والا ندليلنا موية في حلقنا... العبيد: أبشر بالخير, يا زول حرَم أنا تلقوني قدآمكم تب... بدأ صوت الدلوكة والزغاريد منبعث من وسط غابات النخيل, ونسيم البحر الجميل يداعب جرايد النخل فتبدو كانها تتجاوب راقصة مع ضربات الدلوكة وأنغام الطمبارة وصوت الغناي يأتي بتطريب شجي مرددا... الدخان والدلكة خلن عقلي لكة أنا يا ناس الله لي الليلة... أسرع شبان الفريق نحو الركب الميمون... الشبان : أهلا ... حبابكم ... أبقوا مندلين... أحد الشباب: يا ولد أمش قولهم الفطور... يا جماعة تعالوا علي المضيفة... الغفاري: يا زول نحن داخلين علي دارة اللعب دي, وحالفين كان ما إدقينا لا ناكل لا نشرب. أحد الشباب: قلتو كدي, حرم إياهه المحرية فيكم ... نزل ثلاثتهم إلي دارة اللعب, وإستقبلهم طه هاشا باشا يتفجر محياه عن إبتسامة عريضة وقد بدأ الهلال متلألئ فوق جبينه, رابطا الحريرة في يده اليمنى وسوط العيسيت يندي بالقطران. فضجت النساء بالزغاريد, وعلت الأصوات: أبشروا يا جماعة أبشروا بالخير... أبشر يا زول... وبعد جولة من العرضة إتمولصوا وإنتكلوا علي عكاكيزهم المضببة بجلد ضنب التور, ودآر حولهم طه شاهرا السوط في الفضاء’ فإخطلتت زغاريد النساء بأصوات الرجال: أبشر... أبشريا زول... أبشروا بالخير... بدأ السوط ينزل علي ضهورهم فيزيدهم ثبات وخشونة وركزة مع إصرار عنيد منهم علي العريس أن يواصل الجلد, إلي أن تدخل حاج العبيد... حاج العبيد: حرَم كان تمرقوا, والله ما قصرتوا تب... وهكذا إستمرت أفراح ومراسم الزواج أسبوع ,غادر بعده ثلاثتهم إلي الشاطئ الشرقي مودعين بصبيان القرية حتي مشرع المراكب... رحل طه إلي منزله مع زوجته بدور بت المقدم, ليبدأ حياة جديدة تقاسمه إياها شريكة حياته بدور, التي بدأت تقوم بواجبها تجاه طه وهو يقوم بفلاحة الأرض والعمل الدءوب في الحواشة... أطلت شمس الصباح بإشراقتها البهية علي الحقول فبدأت قطرات الندى تتلألأ فوق الأعشاب, واقبلت الفراشات تلثم أكمام الزهور مما أهاج أشجان العصافير وجعلها تتغنى على أغصان الأشجار.. طه منهمك في العمل بهمة ونشاط... مصطفى: سلام طه, كيف أصبح؟؟ طه:مرحب مصطفى, نحمد الله, أريت صباحك زين... مصطفى: آهه, ما بقيتو تلاتة؟؟ طه: آزول قربنا تب... مصطفى: أعصر علي درب الولد.. طه: البيجيبها الله كلها سمحة... أصبحت بدور في شهرها الأخير , تترقب هي وطه قدوم المولود الجديد... طه منهمك مع شتلة كان قد غرسها فوق الجدول. يقَلَب الأرض في قعرها ويضع بعض المآروق. في أثناء عمله هذا, إذا بصبي يآتي مهرولا نحوه... الصبي: عمي طه... عمي طه...البشارة جابولك بت... وضع طه الطورية وهمهم: ريحانة أشمها ولله الحمد... ثم نظر إلى زهور البرسيم وقال: الحمد لله , اليوم زهور برسيمي زادن زهرة... أدخلت زهرة إلى عالم طه وبدور البهجة والمسرة. كانت بدور تحملها معها إلى الحواشة لإيصال الفطور لطه, الذي كان يداعبها ويقبلها, ثم ترجع هي وامها للبيت بينما يواصل طه العمل. يرجع طه ليلا إلى البيت يضع زهرة على صدره والقمر قد أطلَ من بين أشجار النخيل ويبدأ يربت على ظهرها ويغني... الله ليلي شن تشبه بلا الدافننو في بطن المطآمير لدروبك إنت ما شقن بوابير يا قشيش نص الخلاء الفوق في العتامير البكركر رعدو وديمة سماهو عكير السمح مرعاك يا قش التناقير فتنام على صدر طه الذي يكون هو أيضا قد إستغرق في نوم عميق... القرية تنعم بهدوء جميل, وبدور قد أنجيت طفلتها الثالثة, وقد إختارت لها إسم إخلاص... طه منهمك في الشغل بالحواشة... مصطفى: سلام طه... طه: مرحبتين حبابك مصطفى... مصطفى: مبروكة البنية... طه: الله يبارك فيك... آزول درب الوليد غلبني تب... مصطفى: البنية دي حرَة بالحيل, قدمت العريس قدامها حتين لحقتو... طه: تقصد النصيح ولدك؟... مصطفى: إياهو النصيح, اول البلاهو منو؟؟ مرق قدامها بسبع شهور وحقاها تب... طه: (يضحك) أديناكم إيآهه تب... أصبح بيت طه كما الحديقة, فقد تفتحت فيه ثمانية زهور في غاية الجمال, ترعرعن واصبحن يساعدن بدور في عمل البيت ويقمن أيضا بمساعدة طه في الحواشة... كلما إشتد حر الشمس في الحواشة يلجأ طه إلى ظل شتلته التي كان قد غرسها فوق الجدول ليجد نفسه في لحظة محاط ببناته, واحدة تجفف له العرق, والاخرى تصب له الماء, وواحدة تستعمل الهبابة كي توصل له الهواء. وما أن يرتاح حتى يرجعن لمواصلة العمل في الحواشة... ينظر إليهن طه بإعجاب ويردد في نفسه: والله العظيم كضب القال: المراة كان بقت فاس ما بتشق الراس... اللهم أحفظهن وبارك فيهن يا رب... تزوج حميد ود البصير زهرة, وأصبح أخ لبقية منضوم العقد الفريد... مرت الأيام جميلة وهادئة, وكل يوم يلتف الشمل حول طه وبدور لشراب شاي المغرب, فتقول إخلاص لحميد مداعبة: خصمتك بالرسول يا حميد أخوي تكلم زهرة تجيب لنا ولد... حميد: يا زهرة, أجبري بخاتر إخيتك, بس لازم الولد يطلع شبها... أمونة: الولد كان ما بقى شبه أبوي طه شن طعمو... بدور: يا بناتي إنتن ما فيكن واحدة تقول لي عينك في راسك؟؟؟... ستي نور: يا يمة إنت ما ست الجمال والزوق. البيشبهك منو؟؟؟... بدور: هي يا بناتي عليكن الله شوفن البنت المطموسة دي!!!... طه: إنت الكلام ما جبتيهو براك لنفسك, هسع كان سكت الناس ديل كلهم عارفين البيك والعليك... بدور: الغباء ليك حتي إنت كمان متل بناتك؟!... يضحك الجميع في سرور... هكذا مضت الأيام, جميلة هادئة لا يشوبها شائب, إلى أن ذهب طه ذات يوم برفقة بناته إلى الحواشة وفي أثناء العمل بدأ يشعر بإرهاق شديد وكالعادة لجأ إلى ظل الشتلة ليجد نفسه في لحظة محاط بالزهور. لاحظت إخلاص أن الأمر غير طبيعي في هذه المرة, فقامت بإخبار مصطفى والنصيح اللذين حضرا في الحال... قال طه مخاطبا مصطفى: يا مصطفى البنيات ديل أمانة في رقبتك... ثم نظر نظرة طويلة إلى الشتلة ونظر إلى بناته وقال: يا بناتي الشتلة دي أبقن عليها عشرة, وما تفرطن في الحواشة ريحة التراب الزول كان شماها ساكت ترد الروح بعد ما تروح... قام مصطفى والنصيح بنقل طه إلى البيت... نظر طه إلى بدور, وتمتم بكلمات لم تسمعها فاضت بعدها روحه لبارئها... ضباب من الحزن أصبح عالقا في سماء القرية, إنقشع عندما أنجبت زهرة مولود ذكر إختاروا له إسم طه... أشاع طه في جو البيت الفرح والسرور من جديد... ظلت بدور تكتم حزنها العميق على طه إلى أن تملكها, فأودعت وصاياها بناتها ولحقت به, ليتجدد الحزن الذي تملك الجميع... رغم الماسي إستطاع الزمن أن ينسج خيوط النسيان حول الحزن مرة أخرى لتعود الحياة إلى مجراها الطبيعي. عادت أنامل الحياة الرقيقة تبعث الأمل في النفوس وتنثر الخضرة في الحواشة, لتمتد جسور المحبة ما بين حواشة مصطفى و طه, حيث تعلق قلب النصيح إخلاص, وبادلته إخلاص نفس المشاعر لتنبت شتلة الريدة مع أشجار الليمون والبرتكان وسط حيضان البرسيم... صار مصطفى في مقام الوالد, يبادلنه بنات طه الإحترام ويلجأن اليه في كل الأحوال. وهو قايم بالواجب واكتر حسب وصية طه... بعد أن إنتهى من سقي حيضان البرسيم, تسلق حميد تمرته الوسطانية لقطع الجريد. بداء يقطع وفجاة إنفلت الفرار من يده, حاول حميد الإمساك بالفرار ففقد توازنه وسقط على الأرض ليفارق الحياة في الحال... كانت الصدمة عنيفة على الجميع خاصة زهرة التي ظلت في غيبوبة لفترة من الزمن فارقت على أثرها الحياة. تداعت الآلآم والاحزان من كل صوب وحدب لتسكن في بيت طه جاثمة على صدور البنات... بما أن الخالة في مقام الوالدة, أصبح الصغير طه محاط بسبع أمهات يدرن له العطف والحنان, ذلك إلى جانب مصطفى وإبنه النصيح. لم يكن هنالك بد غير الخضوع لأحكام القدر, والضغط على الجروح لإيقاف نزيف الحزن الذي أصاب الزهور بالذبول. كان لابد أن يتجاسرن على الأحزان, حتى لايطيل الحزن أزهار البرسيم وأشجار البرتكان والليمون, وحتى لايسكن الألم شتلة طه التي غرسها فوق الجدول... النصيح: كيف أصبحتوا يا إخلاص؟ وين طه؟... إخلاص: أريت صباحك زين. طه جاي مع ستي نور, خليتهم وراي... في شنو؟... النصيح: بقرتنا ولدت’ وأبوي قال العجلة دي حقت طه... دايرو يشوفها... ترك طه يد ستي نور واتى مهرولا نحو النصيح وإخلاص, أخذه النصيح بالأحضان وذهب الجميع إلى مراح البهائم لرؤية عجلة طه. بدأ طه مشغول بالعجلة الصغيرة تحت رقابة ستي نور... النصيح: داير أقولك كلام يا إخلاص... إخلاص: إن شاء الله خير!؟... النصيح: بعد إسبوع أنا رايح البندر ابيع المحصول واقضي بعض الأغراض لأبوي... إخلاص: بتيجي متين يا النصيح؟؟... النصيح:بعد عشرة يوم... أبقي عشرة يا إخلاص... إخلاص: وإنت كمان خلي بالك من نفسك... سافر النصيح بعد أن ودع الجميع ووعد إخلاص بانه ستكون هنالك مفاجاة بعد عودته... زليخة: أمشن قدامي على الحواشة, غاشية حبوبة دار السلام أصبَح عليها... أمونة: ما تنسي تجيبي معاك الشملة عشان نديها شطفة فوق البحر... بدات حرارة الجو تزداد والوقت يقترب نحو منتصف النهار. أمات طه منهمكات في فلاحة الأرض, وطه يركض خلف الفراشات في حيضان البرسيم... ستي نور: يا أمونة ما نمشي البحر نشطف الشملة دي ونبرد شوية... أمونة: قومن أمشاكن عشان نجي بسراع... النيل غارق في سكون عميق, أمات طه بدان في غسل الشملة, بينما طه بداء منهمك في اللعب على طرف النيل يلقي بالأعشاب والحجارة في الماء وفجأة صدرت منه صرخة, التفتت نحوه على أثرها زليخة لتجد أن الموج قد جذب الصغير نحو العمق. إنشلَ التفكير في تلك اللحظة وتجمد الدم في العروق وجنَ جنون أمات طه فالقن بأنفسهن في النيل في محاولة جنونية لإنقاذ طه, لكن عنفوان النيل كان أقوى من رقة ونداوة الزهرات فلفَ ساعده حولهن ليغبن في جوفه للأبد... عاد النصيح إلى القرية متدثرا بأثواب حزن ثقيل... الشمس مائلة نحو الغروب, والنصيح متجه نحو البحر ليلقي نظرة على مسرح الحزن الأليم, وقد سار خلفه كل من النور وعثمان.بدأت خيوط الظلام تختلط بإحمرار الشفق. النصيح واقف على طرف البحر والأمواج تتلاعب تحت قدميه وكل من النور وعثمان يراقبان الموقف من فوق القيفة. نظر النصيح على إمتداد الأفق في عرض البحر وكان الظلام قد إكتسح إحمرار الشفق وأمطر على النيل شابيب الحزن الممزوج بلونه المدلهم, ادآر النصيح بصره نحو الجهة الشمالية من الشاطئ فرأى الشملة ما زالت في مكانها, تقدم نحوها بخطى يجرها الحزن وحملها بين يديه وقذف بها بكل قوته إلى عرض النيل, لتتلقفها أمواجه فتعلو بها نحو ظلام الحزن وتهبط بها إلى مدارك ظلام النيل الذي بقدر ما هو يزرع الأفراح في النفوس, يفجر من أعماقها الأحزان احيانا... إختفت الشملة بين الظلام الدامس وتلآطم الأمواج... همس النور في أذن عثمان الذي بدأ له الهمس آت من أعماق السكون المحيط بالمكان: إنا لله وإنا إليه رآجعون... لحقها أمات طه... ود المدير...

Quote: ابا ذر، سلآمات

اهلييين معاويه المدير

امات طه جيهتها ...تمام
شكرا

من ما يقولو للزول
الحديه كف
تعرف الزول لفح الكلام دون فهم وتثبيت

طيوركم ردت إليكم ... وكدة

ــــــــــ







اخونا معاوية ...
ارجو انو مداخلتي دي ما تُفهم غلط ...
لأنو الصورة دي قاعدة في جهازي دا ليها قرابة 7 شهور ...
تحياتي لك ولضيوفك الكرام ...

سلام للاصحاب هنا
قالوا العروس خجلانة وما بتاكل .. اها اهل العريس شبكوها ما بتاكل وما اكالة مشكار ليها .. وبي وشها لامن جاعت يوم واكلت الرحط . والرحط سيور جلد او قد
امات طه .. خالاتو وامو ميتة .. راح وتعاهدن كل واحدة تمسك جيهة وما يرجعن الا معاهو . يفتشن ليهو .ولي الليلة ما رجعن

Quote: والفِرّه المسيكينه دي، هسي الصقر دا ما خاتي عليها يا قدّال والبراق برق شوف عيني الصقير بجناحو كفت الفِرّه هل من أمثال عنها ؟

تعرف يا ود الزبير،
عمّك الحردلو التصوير الصورو في المسدار دا أحدث كميرات الناشيونال جيوقرفِك
تعجز عن تصوير ربعه .
مِنمِنا، نحن بنقول مِن وين ؤُوين، يعني من اماكن بعيدة ؤُ من جميع الإتجاهات .
الفِرّة دي اسرع طائر انا شفتو في حياتي، ؤُ دايماً بتكون لابدا في الحيضان
ؤُ يستحيل تشوفلك فِرّة راكة فوق فرع . من شدة سرعتها في الطيران فهي
واثقة من نفسها، عشان كدا بتخليك لآمن تجي جنبها حتي تطير ؤُ بتقوم بسرعة
مليون محدثة صوت بجناحيها لو بقيت شنو وشنو بخلعك، إستغرب كيف الصقير
دا تمكن منها ؤُ كفتا بجناحو !.
لكن تعال شوف عمنا الحردلو عكس الآية كيف !، لآمن شاف الحردلو الشمس بردت
حرارتا، والبرآق برق جلب برد خفيف، ؤُ شاف الصقير كفت الفِرّة طوالي خطر علي
بالو إنو الظباء في الوديان تكون مرقت من خباءها . يعني زي إنت في الغربة الصباحية
كدي تطرا اهلك، تقوم تقول، تلقاهم زي الساعة دي يشربو في شاي الصباح .
عكس الآية في تلقاها ام خدود الليلة مرقت برا، حيث ان الظباء تُشبه بها الغيد الحسان،
والحردلو هنا شبه الظبية بالحسناء الغيداء، ؤُ كمان خلاها مُعجبة بجمالها لدرجة إنها
بدأت تستعرض نفسها بوقوفها فوق فلآخ المصب كما الحسناء التي تعرض جمالها
للمعجبين، يعني زي ما بتشوف الحسناوات البجن ماشات فوق المسرح ليتم إختيار
ملكة جمال العالم منهن . شي عجيب . والله صحي .

من عِرِفت الفِرّة ما شفت لي زول قبضا ...

Quote: من عِرِفت الفِرّة ما شفت لي زول قبضا ...

ياودالمدير الفرة دي إنحن كتلناها شديد
إكتشفنا نومتها، طبعن هي بتلبد وبتلَّصق علي الأرض ، لذا مابتشوفها وإنت بتكون غافل وفجأة تطير من تحتك ،
ياخلعتك، ياجفلت بيك زاملتك ورمتك
أها هي بتجي في الخريف ، ودايما بتلبد في دائرة صغيرة وسط العشب، القش مابقوم فيها أها إنحنا الواحد كان راكب جمل
من يشوف دائرة صغيرة وسط العشب
يتوقع لابده فيها فرِّة أها إنت كان راكب زاملة مابتطير منك إلاّ تجيها قريب جدا،
أها في الأرض أصطيادها صعبا لكن بنخليها نامن تقوم طايرة وتسرح لها العصا ب فوق
أها طيرانها شديد ، كُرف بتلاقي العصا من قدَّام ولحمها من أحلي لحم الطيور مافي أحلي منه إلا الحبار والوزين أبو كدوس والقمري
الوزين أبو كدوس من أرشق الطيور وهو أكبر من الوزين العادي ومنقاره يشبه "الكدوس"،
وعندما نراه يسبح في الوديان والخيران نجلس ونستمتع بعومه
إنت رايع يا أبوكدوس ورزين
وعشان كدي توَّجوك ترأس جنا الوزين
زي عود البقس لونو وقفاهو متين
عقيد اللّولي في صديرك بِدُقْر العين
**************************
حنجور البِقدِّس ما غطس في ألْمِي
وفندوك البردِّس سيدو مابشيل عِمّي
أيضا ن الطيور الرشيقة طائر "حمَد لبَد"
وله تغريد أهل البادية يفسرونه
حمَد لبد...تحت العَمَد
فهل هو طائر الكنار؟
الدباسة نوع من القمري وهي أصغر من القمرية ولونها يميل لدماس الليل"محروق" أي به سواد أكثر من القمرية
حتي أهل البادية وصفوا بها الجمل"الأخضر"
قالت مغنية الجرارية
ماكَر لي رقَّاصة
وماحام في المداسة
سعيد قلَّا الردَّاسة
فوق لون الدباسة
الشيخ الراحل محمد شريف العباسي قال
الوادي البقوقي دباسو
ردناه جميع قمريهو وبلومو وناسو
الزول البعيد أكتافو من أخراسو
إن بدنيه بلا الكبَّا الحروت من راسو
أهل يفسرون تغريد طاير القمري
نسيبي كِتل
كتلو بابكر
بي عود الكِتِر
طائر الحمام
هل سكونه في بيوت الصفائح ، حيث يري كل يوم جناهو يذبح، وهو يلتقط الحب ويشرب ماء السكر ويغرد
هل هذا فداء وصبر ، أم هذه دناءه؟! عندنا بجبال الحتان "كرب الحتان" التي ذكرها الشاعر الراحل الشيخ العباسي
يوجد بها حمام بري جميل جدا وألوانه مختلفة ، يعيش في الجبال وينزل في الخريف في وديان الكرب، أذا رايت أسرابه
ياودالمدير سوف تحرسه أياما
في طائر إسمه أم الريعان لا يعيش إلا في الصخور والجبال، أهل البادية لايقتلونه ويتشاءمون بقتله
مرة ياودالمدير معلمين ومعلمات ، زمن التعليم بخير والترابط والعفة
أها في مزيرة في المدرسة والمعلمين والمعلمات يتناولون وجبة الغداء، أها طاير ودأبرق المشهور، طويرتو راكه
أها ودأبرق يشيل ويكيل ساكت..! والمدرسين يشاهدوا ..نامن ودأبر ق وقع بردلو في الوطا، قام معلم مسكو ونفضو ورشاهو بي موية
أها ودأبرق فتح وقام طاير شايف زولتو بت أبرق راكه، علي طول غشاها أخدلو واحد حتي طار
شفت القوة دي كيف
الطيور أمرها عجب....!

Quote: سلام للاصحاب هنا قالوا العروس خجلانة وما بتاكل .. اها اهل العريس شبكوها ما بتاكل وما اكالة مشكار ليها .. وبي وشها لامن جاعت يوم واكلت الرحط . والرحط سيور جلد او قد امات طه .. خالاتو وامو ميتة .. راح وتعاهدن كل واحدة تمسك جيهة وما يرجعن الا معاهو . يفتشن ليهو .ولي الليلة ما رجعن -------------------------------------------------------------------------------- ان كل ظلام العالم عاجز عن اطفاء نور شمعة

حبابك عشرة

فعلا انا ايضا سمعت انو الرحط من الجلد في شكل سيور...ده بتاع مناسبة قطع الرحط




بعدين برضو في مره شفت احدهم وضع جحر في العربية ..عشان كلنا كنا رجال في مشوار خاص...ولقينا مراة في الطريق وشلناها معانا

التحايا لصاحب ورواد البوست ...


- نوم الجداد في الحبل
- زي كلب الحر
- الجمل ما بشوف عوجة رقبتو

و قول أُماتنا
تجرك العفنة .. تسكين الفاء و النون
و حكاية عرس ابو الدرداق للقمرا

قالوا
ابوالدرداق خطب القمرة واشترطت عليهو ينضف ليها الواطة .. فمن يومو داك ما يلقا ليهو بعرة الا يشيلها
اما
تجرك العفنة دي اول مرة اسمعها

يَسُكَّك كلـ ب فى زُقاق ضَيِّق مليان ضِرِيسه وانت حفيان

Quote: قالوا ابوالدرداق خطب القمرة واشترطت عليهو ينضف ليها الواطة .. فمن يومو داك ما يلقا ليهو بعرة الا يشيلها اما تجرك العفنة دي اول مرة اسمعها ان كل ظلام العالم عاجز عن اطفاء نور شمعة

زمان يا عيد الحفيض و نحنا من الشمال و السكن فى محل ماب تنزرع
رملة ساى
تعدر على احلنا حفر المستراحات بى سبب انها بتتهايل
اها زى ما فى الحوش الوسيع
حوش للحمبر و حوش للسعية
بتلقى حوش لى قضا الحاجة
اها نضافة الحوش ده كان مسئولية ابو الدرداق
و من هنا جات
حكاية تجرك العفنة و مهر القمرا
يديك العافية يا حبيب