قضية تخابر السيد وزير الداخلية المصرى لاهمية الامر ارجوا مقابلتكم

07:58 PM Apr, 24 2015
سودانيز اون لاين
محمد احمد القاضي-القاهرة
مكتبتى فى سودانيزاونلاين



السيد وزبر الداخلية اللوء مجدى عبد الغفور
السلام و التحية
اولا أحملكم مسئولية سلامتي وانا فى مصر اذا لم يقم مكتب سيادتكم بالسماح لشخصي لمقابلتكم لإخطاركم بكل ما يحدث لشخصى من عملاء جهاز الامن و المخابرات السودانى داخل جمهورية مصر العربية الشقيقة . وانت تتحمل المسئولية الامنية فى حمايتى ,
أناشدكم بالإسراع بتحديد موعد المقابلة لانى احمل قضية تخابر . و ما حدث داخل وزارة الداخلية فى يوم 21 ابريل 2015 الأسبوع الماضي حيث تلقيت تهديد صريح داخل الوزارة عندما اتيتت لمقابلتكم .
01113813890

يا زول انت ما نصيح ...؟؟؟
مافي زول عاقل بكتب ليه كلام زي دا هنا ...

امسح كلامك دا بسرعة

يا بكري الزول دا حا يضيع نفسو ...

.
.
.
محمد القاضي

اتمني من كل قلبي ان يفرج الله همك ويحفظك


ولكنك بطرقك للموضوع هكذا فأنت تضر نفسك كثيرا
حفظك الله
.
.
.
.
.

ود القاضي عندي ليك اقتراح
اتواصل مع توفيق عيسى بتاع الرايات السوداء
حا يفيدك في موضوعك لانو الزول دا شكلو واصل
سيبك من بورد بكري
ربنا بحفظك

الأخ القاضي غير مفهوم في هذه الرسائل. ربما يكون حقيقة و لكن قطعا ليست هذه طريقة سليمة لطلب مساعدة.
بعضهم يقول أنه يحاول إستعجال موضوع لجؤ و تعجيل بإعادة توطين و لكن على كل حال ليست هذه الطريقة المثلى
لو كان الامريتعلق بحالته الصحية نتمنى له الشفاء و ربما الأخوة في مصر يمدون يد المساعدة له.

الاخ الكريم محمد..
انت في حوجة شديدة للمساعدة..
مسألتك متفاقمة بصورة واضحة..
انتبه لروحك و ربنا يعينك.

قناعتي الشخصية ..
أنا أخونا ود القاضي يعاني من خطبٍ ما ...
ويحتاج الى المساعدة ..
فمشكلته أراها أكثر من مشكلة سفر عادية ..
فطرقه للأمر وبهذه الطريقة والكيفية فيه كثير من الخطل الجلل ..
على سلامته الشخصية ..
فهو في بلد ومهما كان غريب عنه ..
ومن يقحمهم في مشكلته الشخصية ..
قد لا يأمن أحد ردود أفعالهم ..

حقاً نتمنى له السلامة أولاً ..
لأنه بدونها ( لاقدّر الله ) يصبح سفره ترفاً ..
ونافلة قول ..

الله يهديكـ يا محمد القاضي يا أخوي ..
وييسر أمركـ ..
ويقيض لكـ من يأخذ بيدكـ ..

Quote: الله يهديكـ يا محمد القاضي يا أخوي .. وييسر أمركـ .. ويقيض لكـ من يأخذ بيدكـ ..

اللهم آمين
أحونا محمد شكلو فى حاجه ماسه للمساعده

الأخ محمد أحمد القاضي

نصيحة أخوية أبعد من السكة الماشي فيها دي حفظا لحياتك
المصريين ديل الايام دي روحهم محرقاهم ، ما أظن أنك سياسي مخضرم
وبتشكل خطر علي حكومة الكيزان حتي يتبعوك خارج الحدود أعرف معارضين
أكثر شراسة وأشد خطورة منك علي نظامهم لكنهم يدخلو ويطلعو من السودان ولا في
زول بيقول ليهم تلت الثلاثة كم .
حقيقة الواحد ماعارف مشكلتك هل هي مشاكل نفسية ربنا يرفع عنك البلاء أم فهلوة حتي تعجل
بأمر أستيطانك بأحدي الدول الغربية في كل الحالات السكة الماشي فيها دي أبعد لانو المصريين
ديل لو مشيت وقلت ليهم قضية تخابر وقعدو معاك ووجدو كلامك كلام الطير في الباقير بيودوك وراء
الشمس والناس ديل لاعندهم رحمة ولا ذمة .

Quote: أناشدكم بالإسراع بتحديد موعد المقابلة لانى احمل قضية تخابر

اكاد اجزم بأن الاخ / محمد معه معلومات خطيرة تمس الامن السودانى لذلك كانت الهجمة الشرسة عليه من ك ل ا ب الامن
قطعا الرسالة وصلت الى الجهات المعنية فى الحكومة المصرية ..

يا جماعة الزول دا جادى؟
هل عندو مشكلة حقيقية محتاج مساعدة ؟

أثني كلام الأخ عمر:
يُرجى من الأخوة القراء والزملاء في مصر،
أن يتواصلوا مع الأخ محمد، ضروري جداً،
لتقديم المساعدة اللازمة له!

استاذ ABUHUSSEIN
امسحوا ليه فعلا هناك تهديدات
لك التحية
الاخ بشير حسن
شكرا لك السكوت اخطر ورسال صوتى للمسئول المصرى فى وزارة الداخلية واجب
على دفع الله
كلامك ضعيف اذا شوفت خطر على حياتى لهذا اتصل بوزير الداخلية المصرى
الاخ Omer Abdalla Omer
اطلع البوست مرة اخرى
شكرا الاخ محمد محمود
شكرا ربنا يخليك
خالد قرقور
الامر جدى خطير
لك التحية
الاخ وضاح عبد الرحمن
شكرا احتاج لمساعدة من وزير الداخلية المصرى لك التحية
الاخ عادل الباهي عبدالرازق
اوعدك ان كل هولا الخونة انشاء الله سوف نحاسبهم و لن نخاف الموت من خلال بوست او رد على بوست
شكرا
علاء سيد احمد
شكرا لك كل المعارضين فى مصر معرضين للضغوط امنية لكن انا لدى كل الدلائل
لك التحية
وضاحة
نعم انا جادى و لدى مشكلة سوف تحل كل الظروف الامنية
شكرا
صلاح عباس
السودانيين فى مصر لهم التحية لكن المساعدة يجب ان تاتى من وزارة الداخلية
لكم التحية

نتمنى ان تكون بخير يا ود القاضى
بقدر الإمكان تجنب فتح مواضيع حساسة فى منبر عام
لا أظن ان وزير الداخلية المصرى شخصيا يتابع موقع سودانيز اونلاين .
وحتى غن كان هنالك أشخاص يتابعون فلن يأخذوا امرك بمحمل الجد .
ارجوا منك ان تجد قنوات إتصال رسمية بالجهات التى تريد توصيل رسالتك لهم.
كن بخير.

تحياتي لك ود القاضي ..

وأرجو ان تكون بخير ..
المشكلة انه العلاقات بين السودان ومصر في أحسن حالاتهــا
وأخاف أن تاتي عكس ما تتمنى .. في حال التفت المسئولون لرسالتكـ ..

مع أمنياتي بحفظ الله لكـ ..

Quote: Øلانى احمل قضية تخابر

دا كلام خطير جداً يا ود القاضي !!!!! مافي زول بقول كلام زي دا .. في بلد زي دا !!!

( أنت تتحمل المسؤولية الأمنية في حمايتي )
دا يا ود القاضي كلام يتقال لوزير داخلية السويد أو الدنمارك أو أي دولة أخرى من هذه الشاكلة !

تأكد لي يا ود القاضي إنك إنسان طيب .. عالي النقاء .

ود القاضي .. صدقني أنا أتألم جداً عندما أقرأ بوستاتك ..
من حروفك التي تترجم دواخلك أجزم أنك لا تستطيع أن تضر أحداً ..
في السودان ولا في أي مكان .. الإنسان الخطر ظاهر من شكله وأسلوبه ودهاءه وحنكته
ود القاضي .. شوف ليك مجموعة تعرف الطرق والمخارجة من هذا الوضع ..
نحن زمنا خلاص انتهى عمراً ودهراً .. ولكن في شباب عندهم حنكة وتخطيط حتى على المنظمات الدولية ..
حاول تمشى معاهم عندنا كثيرين من أولادنا انتشروا في بقاع الأرض ..
من حقك تحسن وضعك وتأمن نفسك ومعيشتك .. ولكن أنا ملاحظ من حروفك انت ما زول مشاكل
ولا سياسة ولا غير سياسة ..

بالله ده وطن ده .. الناس تصل إلى هذه الدرجة من الضيق والتذمر حتى بالحياة ..
شباب في عز عمرهم صدقني زمنا في عمرك ده ما نسال غير التمتع بهذه الحياة ..
ولكن ماذا نقول لهذا الوطن الذي أغلق كل منافذ الأمل ..

قلبي معاك .. كل مرة أحاول أن أتحاشى بوستاتك حتى لا أصاب بالشفقة والهبوط ..
وفقك الله .. ورفع من شأنك .. بس حاول تغير طريقتك الى الدهاء والتخطيط واللف والدوان ..
لأن الحاجات دي في هذه المرحلة من الشباب مهمة جداً .. بعدين ربك كريم وغفور رحيم ..

تحية يا اخ محمد
اتذكر قبل كم شهر فتحت بوست بنفس المعنى والموضوع

Quote: اتذكر قبل كم شهر فتحت بوست بنفس المعنى والموضوع

الاخ مرتضي
شكرا لك تاكد ان اى وسيلة صحفبة على الانتر نت هى متابعة من كل الجهات المختصة فى مصر خاصة الصحف الالكترونية , انشاءالله سوف اصل جهات الاختصاص ..
الاخ الدكتور احمد ادمين
موضوع التخابر هو يمكن ان تكون شئ و لكن لن تؤثر فى العلاقات .
هناك علاقات ازلية بيين مصر و السودان .
لكن مصر و الحكومة المصرية يهمها الامر و انشاءالله سوف نجد الحماية الازمة
لك التحية
محمد فضل الله
نعم وزير الداخلية هو المسئول عن حميتى وهذا لشئ يبدو انك لم تنتبه لها .
لك التحية
على عبد الوهاب يبدو انك تحاول ارسال رسائل تخويفية و نحن لن تؤثر هذه الرسائل فينا , ولن نذهب لتلك المنظمات و يبدو انك تجهل موقفى كثبرا .
الاخ صلاح حبيب و الاخ يوسف الولى
شكرا للمداخلة نعم ما قلته

Quote: خالد قرقور الامر جدى خطير

والله صحي ( جدى ) خطير ..

الاخ الكريم
محمد احمد القاضي
تحياتي
انت ادرى بظروفك من اي شخص اخر
واقترح بان تتصل بجه اخره .................مع وزير الداخليه
وفي اعتقادي ان موضوعك مهم وعاجل
ولك من الشجاعه والحنكه والعقل ما يمكنك ان تتجه الاتجاه السليم .......
وربنا يوفقك بما فيه خير
تحياتي

جمال ود القوز
الامر جدا خطير
لك التحية
عرفات حسين
شكرا لك و انشاءالله سوف نصل لما نريده رقم الضغوط حتى قبل يوم تقريبا بهدم تقديم شكوى لوزير الداخلية المصرى .
شكرا لك

.

سلامات ودالقاضي
والله بتبالغ اخونا علي عبدالوهاب
قلبو عليك تقول عليهو برسل ليك
رسائل تخويفية دا كلام شنو وتاني
حاجة كلام اخونا ودالباهي دا عين العقل
في ناس اخطر منك مافي زول شغال بيهم
ولو امكن عشان نقدر نقيف معاك ممكن تفهمنا
الحاصل شنو وحياتك في خطر كيف وانت دورك
شنو في المعارضة وبتهدد الحكومة بي شنو
والله ياودالقاضي الان تجي السودان وترجع زول
يعرفك مافي خلي يرسلو ليك ناس امن هناك
واخيرا انت راجل اخونا وبيجمعنا بيت واحد وبتهمنا
مصلحتك ياريت لو تبعد من الكتابات دي لانو بتضرر
منها والمصريين ديل لو وقعت فيهم مابرحموك
تسلم

Quote: الله بتبالغ اخونا علي عبدالوهاب قلبو عليك تقول عليهو برسل ليك رسائل تخويفية دا كلام شنو وتاني

شكراً حبيبنا سليمان .. صدقني ما إنتبهت إلا بعد مداخلتك .. زهايمر
اخي سليمان الواحد فينا طول في الغربة وقلبه بقى رهيف والكبر كمان ..
هو ما فهم قصدي .. الزول ده قلبوا طيب وعلى نياتو .. ربنا يحفظه من كل سوء ..
مهما قال أنا متعاطف معاه للاخر ..
اللهم بلغه مقصده ..
شكراً سليمان على التنبيه ..

سليمان القرشي
اولا شكرا لك
ثانيا كلام عادل الباهى دا هو يعرف معارضين فى مصر اخطر منى دا كلام ساى لان المعارضة واحدة , ما فى انسان احسن من زول لكن هو بيحاول يكذب البوست وهذا حال جماعات الؤمتر الوطنى . انا ما بفضل واحد على واحد ..
كلام على عبد الوهاب له رسائل واضحة نقول له سوف يسقط البشير واقول له نعم لدى قضية تخابر ..
لكم التحية