فاقد حنان

06:41 AM Apr, 21 2015
سودانيز اون لاين
عباس الدسيس-Saudia
مكتبتى فى سودانيزاونلاين



اكمل مراحله الدراسية بالقرية ثم الي داخلية الجامعه وتزوج بنت عمه ليغطي قدحه ليست له حكايات غراميه ربما عدم وسامته والنتوئات التي كوجنت وجهه ومشيته الديكيه سبب في ابتعاد البنات عنه وكما لم تكن له الرغبه بالرغم من قلة مؤهلات.
كانت النقلة الاخري بعد الزواج الهجرة الي دول الخليج وفي فترة العطالة قبل العمل تفتحت عينه علي بنات القنوات والهشتك بشتك تفتحت عينيه علي قوام باسكال وإغراء هيفاء وهبي ودلع مايا دياب كان يمني نفسه بعلاقة غرامية ولو في الاحلام ليشبع رغبته العاطفيه.... مع مصاقرة التلفزيون اصبح في عرمه شديده.
اشتري جوال للمعايانات اول ارقام قام بحفظها الشرطة واستعلامات الهاتف لم يستفد منه الي في المنبه لمتابعة المسلسلات التركية.
وفي يوم من الايام حاضن المخده ونايم رن جرس الجوال!!!
سمع صوتها عبر الاثير معطر ...الو ....صوت بنت
جاهو مغص وكاروشه في رقبتو وقعد اتعتع وما عرف اقول شنو !!
رددت الو مين معاااي؟؟
قال ليها: ممعاك أأأنا
ضحكت بدلع ...غريبه انت قايل روحك طه سليمان شنو أنا دي.. ما علينا دولي موجوده ممكن اكلمها؟؟
طه سليمان لا طه العنز دولي ام دلدوم الاقطعو في فقرتك...
ضحكت حتي احس ان ضحكاتها دغدغت مشاعره ... انت زول لذيذ الظاهر انا غلطانه طيب باي.
قال لها ((مرسي)) تلك الكلمة التي سمعها في المسلسلات التلفزيونيه وكان يمني نفسه بلحظة ان يستخدمها.
قفلت الخط ... اصابته حالة من الاندهاشه بتاعت الخلعه وتصبب عرقا وشعر بسخونه في خشمه زي الماكل ليهو ام فتفت وبدأ ينساب اللعاب خارجا .. صوت البت دخل قلبو....
حضن المخده وقهي في التلفزيون نايم علي بطنو وسرح بي خيالو اتذكر حكاية الجماعه الماشين الحج المطوف قال ليهم.
انتبهو يا عباد الله انتم في حج لبيت الله إذا رأيتم جميلات بالحج لا تطيلو النظر لكي لا تفسدو حجتكم وإن رأيتم إمراة جميلة قولو يا الله لكي تبعدو الشيطان وتذكرو انتم بالحج.
اول ما دخلو الطواف واحد قال ليهم يا الله !!!
الجماعه المعاهو وينا وينا وينا .....
ثم تمتم أححححح جينا لي شغل طلعت لينا دي يا ربي خلاس تكون طارت و ل تبقي علي حكاية وينا وينا وينا إمكن تغلط تاني يلا ما ورانا حاجة الجوال ومشحون.
لنا تمومه.....

اولا عودا حميدا مستطاااااااب يا عبس ,, وتانيا ده كلام جميل من اولو يا يا يا حلو ,, والله ضحكت لمن عايز اقع على وشي يا راجل ,, غايتو انا اول الداخلين على البوست لكن شكلي حا اكون اخر الطالعين منو ,, واها من هنا انا ما قايم .. منتظر التمومة بس ما تطول الغيبة ..

تحياتي : ياسر العيلفون

(*)
الابداع ما خاتيك ..

تسجيل حضور

Quote: وشعر بسخونه في خشمه زي الماكل ليهو ام فتفت

يعنى لازمن تكون يا بايتة معاهو .... يا بايتة معاهو ..؟؟


تمام يا ركس

اقوليك حاجة يا عباس الدسيس حصلت معاي اسع تية دي
حرم لا قول قالوا ولا زي حكايتك القاطع من لبستك البتلمع دي غيرا ياخ لبستك اللماعة دي زي الترتر دي هههههه
عاين لي جاي
اليوم من الصباح قافلة معاي قفلة شينة خلاس
كل حاجة مدقرة
هنا وفي السودان وفي صقيعة سلامة كلو واقف تجك
وفي الشغل كل شئ معكنن وبراي اقول الليلة اليوم دا الله اكفيني شرو
وانقق براي كدا
وفي نص نقنقي براي دي التلفون الثابت رننننننننننننن
نلتو ليك نلتة لمن ضرب في الطابعة وبي قلبي قلت الليلة الاتصل دا الفها معاهو لفة زي الزفت
وختت السماعة في اضاني واسمع ليك الو يا عباس حمالتك علي لمن شعرة جلدي كلبت عديل كدا
وقد سرى صوتها ودغدغ مسامعي دغدغة شينة خلاص زي اتكنها قردنت الاذن الثانوية العليا
وقالت نحن شركة بنمنح الايزو .... سنة يا الايزو ..... اذن الشركة الهندية حقها راح في طهور بت الكاشف
وعلى الليمان والرحمن قد صنعت يومي هذا وجميع الايام المقبلة من هذا الاسبوع
ولمن رجع لي المصري الفات مني من كترة نقتي لقاني اكشم تكشيم ما قدرت اضاريهو من جنس الانبساطة
قالي ما شا ء الله يا بيه قبل شوية كنت زعلان ودي الوكت شايف اخر انبساط في ايه يابيه ؟
قلت ليه يا ولد الدنيا دي كان ما النسوان ديل كانت بارت عديل كدا
ولمن يفهم مني شئ ولم يلوي على شئ غير انه طلب مني ان اوقع له سلفته مستقلا هذا الموقف الانبساطي الشديد
اها خلاس تم قصتك يا مجنون

تناول كيس الصاعوط بكل حرص وما تبقي فيه اخر مؤنة السودان الذي احضرها معه ..لو كمل اقبل وين ما إعرف ...وهو يشاهد في قناة العربية للاخبار يتفحص المذيعه بعين المخرج الخبير الذي يلاحظ لأق التفاصيل في اللبس والمكياج ولا يهمه امر فلسطين أو ايران ثم اخذ زفرة يااااااااااه الزوله دي كان التلفزيون بفك الريحه تلقاها جايبه عطورها من باريس كان صلحت ريحة بيت العذابة الوهم ديل وتذكر بنت عمه والطلح الجابو ليها واختها من عمك ادم في المورده ايام كان عريس لو استثمر الطلح الإدخنت بيهو استثمار تجاري كان حسي عندو اربعة مخابز ولا احتاج للاغتراب.
يحدث نفسه اللواعه للحب ...حسي البت دي لو اتصلت تاني معقول تكون صدفه لا لا لا يازول هوى فتش شغلك ولقط قريشاتك الحق الاوضة الادها ليك عمك قبل ما تقع في الخريف اعملها عقد... ولا قسما عظما تلحق ود خالك طه.
ود خالو طه جاء السعودية عمره وزوغه اشتغل في امانة الله سنتين اللقط في الريالات وقت سو ليهو رويشات بقي اطلع المولات مع الجماعه العندهم اقامات يوم شاف ليهو واحده لابسه العباية ومفتوحه من قدام تضرع وتفج الناس يمين شمال زي ميسي بتاع برشلونه وبنطلون الجنز لاصق فيها اتقول جلد ثعبان والعباية وقت الفحها الهواء لي فوق المطايب تمد راسا.
تعال يا ود طه من شاف البنيه قهي فيها من قربت عليهو شال ايدو ودقا بيهو صدرو بي حرقه وقال ليها ((احييييييييي أنا اموت ركن)).
ود طه من حيث لا يعلم تاني يوم لقي روحو في بورتسوان الزوله طلعت اميره ومعاها الحرس بتاعا.
وفجأة رن الجوال بنغمة دخلوها وصقيرها حام أنا ليهم بقول كلام...
الو معاي دولي !!!
تعرقت ارجله وارتجفت يديه وتقطب جبينه وتسارعت دقات قلبه وادرك ان ابواب الحب تفتحت عليه من كل جوانب ثم في لحظه عقلانيه تذكر ود طه...
يا بت الدبيب الارقط إلم فيك عض من وركك لي عنقرتك قلنا ليك دا ما جوال دولي الرقم غلط.
قالت له: بجد انت صدفه غريبه ما كنت متوقعه اتصل غلط إرد علي سوداني لذيذ زيك بعد قفلت منك المرة الفاتت مشيت سألت من ام دلدوم عرفتها الضربة القاضية انت معجم انت عسل لو ما عندك مانع نتونس سواء.
تذكر كلمة معلمه في الابتدائي بحصة الاناشيد عند التسميع وغالبا هو لا يجيد الحفظ عندما يتلعثم يصيح فيه المعلم ((ووقف حمار الشيخ في العقبه)).
يا ولد حظك ضرب خلي الخوف امكن ابوها من المغتربين الزماااااان وعتدو في البلد هنا وبهناك عاملنها عمارات تختصر ليك المشوار بتاع اوضة عمك والبوكس الحا تشيلو معاك.
تقمص دور المحب !!!
وليه لا يا حلوة نتونس ونص وخمسة تصدقي من اول اتصال انجذبته عليك وشغلتي بالي حسيت انا ضايع مثل البيت البدون حاره والتلفون المافيهو حرراه والسواق البدون سيارة يا سلااااااام صوتك شراره وفكوها في جالون بنزين وضحكت تضوي الشارع المافيهو إناره.
ارتاح نفسيا بعد فك الحنان...
أتي صوتها بهمس جميل ... أسفه مامي بتصل عليك تاني !!

Quote: اولا عودا حميدا مستطاااااااب يا عبس ,, وتانيا ده كلام جميل من اولو يا يا يا حلو ,, والله ضحكت لمن عايز اقع على وشي يا راجل ,, غايتو انا اول الداخلين على البوست لكن شكلي حا اكون اخر الطالعين منو ,, واها من هنا انا ما قايم .. منتظر التمومة بس ما تطول الغيبة .. تحياتي : ياسر العيلفون

ياسر الفنان سلام يا حبيبنا
اخبارك والاسرة الكريمة شوق كميات
المشغوليات وحال البلد مسكتنا
شاكر ومقدر للمتابعة

Quote: (*) الابداع ما خاتيك .. تسجيل حضور

ادريس يا حبيبنا اخبارك يا راقي
مبالغة من ديك وعيك
ما تخلينا نبدع في مجال تاني بشوفتك
تحياتي وتقديري

Quote: يعنى لازمن تكون يا بايتة معاهو .... يا بايتة معاهو ..؟؟ تمام يا ركس

عبدالعزيز سلام وتحية
فكت الريق ليها متعه
والمبيت في كل الظروف جميل اخير من التلتله ههههه
اخبارك يا حبيبنا

Quote: قلت ليه يا ولد الدنيا دي كان ما النسوان ديل كانت بارت عديل كدا

ود البوش سلام يا حبيبنا
ياخ ليك وحشه
عشان كدا انا اقول ود البوش لبت مالو
ولا في شارع الله ما اقابلك
تحياتي وتقديري ليك

يادسيس ..
مابراكـ فاقد حنان يأخ ....
معكـ ونشد من أزركـ ..

حكي بطعم الحنان ذاتو ... .