غايتو يا اباذر يوم بتكتل ليك زول بنوع النضمي ده والله. ومع ذلك أنا أعطيناك أحلامنا ومشاعرنا تصيغها لينا زي كلامك البتعرفوا براك ده . وتدي الشمس شاي الصباح وتعزم القمرة عشاء بطرقات كسرة في قعر حلة . وتنسج من موج النيل غطاء لصغارنا وحبايبنا وحتى قلوبنا . وتشيل ليل الألفة مسدار وغنية وحجوة وسكينة وألفة وشوق . وماتنسى ذكرياتنا شيلها معاك دليل ومسكن لزمن الوجع وحراق الروح . وقول للخطاوي الراجعة لدرب الفرح القديم . اقيفي في وش القيف واكشفي رأسك ,واندهي ابونا الفكي الأمين يرجم غربتنا اللعينة بدعوات الصالحين . ومخدرة عليك محل ماتقبل .
مش خالص تحياتي بس ياخ انا فرحان تصدق
Post: #18 Title: Re: اسقى الشمس شاى الصباح Author: الفاتح ميرغني Date: 04-16-2015, 11:37 AM Parent: #17
Quote: وادفن راسى فى موية الأزرق واغسل احزانى جواهو و ومعاهو
واتوحد مع صلصاله من تانى زى زمان
سلام يا ابا ذر وصباحاتك نيلية بهية تصوير بديع لزول مشتاق لما يخلص من همومو.! الهندوس عندهم حجيج سنوي لنهر الغانج بيغطسو فيه بشوق صوفي والواحد لما يطلع بشعر انه اتولد من جديد . انت صحي الانهار دي عبارة عن تٌرع وخيران من جنان رضوان.؟
محبتي
Post: #22 Title: Re: اسقى الشمس شاى الصباح Author: أبوذر بابكر Date: 04-18-2015, 12:50 PM Parent: #18
النيلين يا الفاتح الهناك
عبارة عن دمعتين للفرح
قالو الواطا فرحت فرح شديد لغاية ما دمعت
وفى نواحى الخرتوم صبية بديعة إسمها توتى مدت ايدها ومسحت الدمعتين على خد الواطا
والدمعتين بقن مجرى واحد بين الخدين الخدين اختارن اللون اللخدر
ومن اليوم داك قررو ما يتفارقو
الأنهار جاية مباشرة من السماء
ما تسمع كلام انها بتنبع من وين ومن وين
حاجة زى دى ما عندها مصدر غير السماء
إنت قايل ليه ربنا الخالق قال
انه كل شى حى من الماء
لأنها جايه من فوق
من هناك
Post: #21 Title: Re: اسقى الشمس شاى الصباح Author: أبوذر بابكر Date: 04-17-2015, 01:01 PM Parent: #17
عمر مصطفى
مضوى والله ومنير
من يوم امس آنسنا نارا مشينا عليها فى وادى النضمى البهيج ولقيناك
ضوء وبرد وسماحة وسلام
قريب بإذن الخالق
نسلم الخطاوى لدروب الرجعة المفرحة ونخت الأغانى فى جراب الشوق القديم والعميم وتبارينا الأمانى تمش حدانا ومعانا
ونمد لسانا للغربة بت ال ----
يا زول ايامك مواسم سخية وحياتك سعادة ابدية
وتتعدل عليك محل ما تقبل
Post: #20 Title: Re: اسقى الشمس شاى الصباح Author: أبوذر بابكر Date: 04-17-2015, 09:40 AM Parent: #16
حبيبنا جلال
كيفنك ياخى واريتك طيب وشديد وسعيد
عارف أنا قاعد اقول للجماعة طوالى
انه اشجع ناس فى الدنيا هم البعيشو بره بلدهم
بعيد من اهلهم واحبابهم واصحابهم
بغض النظر عن انهم عايشين وين و بياتو طريقة
الغربة والله يا جلال اخت الموت
واى زول ضاق عذابها بعرف الاحساس ده
تشرب ان شاء الله من كفوف العافية والسعادة دائما
وربنا يلم شمل كل المتغربين
Post: #24 Title: Re: اسقى الشمس شاى الصباح Author: أبوذر بابكر Date: 04-21-2015, 12:47 PM Parent: #14
Post: #30 Title: Re: اسقى الشمس شاى الصباح Author: أبوذر بابكر Date: 04-23-2015, 03:23 PM Parent: #4
Post: #19 Title: Re: اسقى الشمس شاى الصباح Author: جورج بنيوتي Date: 04-16-2015, 02:23 PM Parent: #1
يا مطر :
عليك الله مر بي غادي تلقاني تحت ضل رهيف وشايب
شاركني في الكباية ديك بالله.
0909388430
بكون ممنون!
Post: #23 Title: Re: اسقى الشمس شاى الصباح Author: أبوذر بابكر Date: 04-19-2015, 08:36 AM Parent: #19
يا مساوى البدر وهو لا يسواك
كيف ما نلقاك ؟
كان هون وسهل ورفع القدم
ينبل الشوق أكيد
نشوفك بالقلب والروح ونفرش ليك جوه العيون
Post: #25 Title: Re: اسقى الشمس شاى الصباح Author: Abdalla Gaafar Date: 04-22-2015, 10:39 AM Parent: #23
صديقي ابوذر: هو ذات الوصف وذات السؤال الي حين عودة
زي ماانت اللون البدفق كل سمارة الارض الطيبة قصيدة علي الواح البت الزوق لا خيل الكلمة ارتاحت من فرسانك مرة ولا من ليلك غابت نجمة فرح النغمة الشالت منك ضحك الغنية وفجأة ارتاحت بين احلامك ورقص الموية مع القمرة واندلقت منك فكرة انك ترسم كل الدنيا الفي جواك عروس للنيل وانشرت فينا وفيك قضايا العشق الفاضح ضد الصمت البمنع فينا طلوع الاهة السيل اذا مااندهشت خيل الكلمة من التذكار الفجأء يرجع فينا قضية البت السر من اول يوم والمطرة رزاز والنيل والقمرة وصوتك وريحة الطين والليل مقسوم مابين العاشق الهجر النيل والبت الراجية الموج والليل والخطوة رحيل انشرت فيك حكاية الرجعة من الاحزان ايام الوقفة وليل الذكري وفضلت فيك البت القدلة وسر الريدة وخطو الرجعة
داير اسألك يازول مساسق ديمة في جواك للحلم الموزع بين دروب الليل وفرقان الغياب داير اسألك عن كيف أدس باقي اليقين الفيني في بطن الوجع تيراب وأنا الزول المخسم بالدرادر و المستًف بالغباين والمشاوير السراب يازول مكندك بي غبار وجع الدروب المابتلم في سكة البلد التشوفو رهاب رهاب داير اسألك من وين الملم زكرياتي عشان اجيك ضحكة وحجا داير اسألك عن كيف اشيلك زاد بعد تعبت خيول احلامنا من شيل الغنا المليان بكا داير اسألك عن حسرة الوطن الابت ترتاح ملامحو علي صباحات الحضور غنية فرح داير اسألك عن ليلة العيد النست ترسم علي قلب الدفاتر ضحكة الفقرا وعيونك قوس قزح داير اسألك عن قصة الفرح النزح يازول محاصر بالغنا الممنوع كتابتو علي دفاتر الهجرة للحلم المحال
علمني كيف اختا الدروب المابتحن قبال تموت جواي بروق اللهفة لي قولة تعال يازول مجرتق عيد وفال شابيت عليك وندهت ياباقي الفضل جواي من الطين سؤال علمني كيف اختار خطاوي الرجعة للنيل المكتف بالهزائم والخوازيق الضلال علمني كيف أمرق من الاحزان علي الشوق البناتل ديمة للوطن الجمال عبد الله جعفر
Post: #26 Title: Re: اسقى الشمس شاى الصباح Author: ibrahim fadlalla Date: 04-22-2015, 11:35 AM Parent: #25
Quote: اسقى الشمس شاى الصباح
يا لها من سقيا..وكأس وساقي ...
أبا العطر ...هل في الكأس فضل أناله ...فإني " أمطق " منذ حين ..وتشرب ....*
شكر لك كل هذا الدفق الحميم ..., ---------------------------------- * اعتذاري للمتنبي على رضرضة ابداعه الخالد
Post: #27 Title: Re: اسقى الشمس شاى الصباح Author: عماد كرار Date: 04-22-2015, 12:17 PM Parent: #26
(انه اشجع ناس فى الدنيا هم البعيشو بره بلدهم
بعيد من اهلهم واحبابهم واصحابهم
بغض النظر عن انهم عايشين وين و بياتو طريقة
الغربة والله يا جلال اخت الموت
واى زول ضاق عذابها بعرف الاحساس ده
تشرب ان شاء الله من كفوف العافية والسعادة دائما
وربنا يلم شمل كل المتغربين )
جمع الله شملكم مرة اخري بالوطن حقيقة انا موجود والحمدلله بالوطن ولا استطيع مجرد التخيل ان افارق الوطن في غربة طويلة... وكلماتك ياابوذر هي ابلغ تعبير عن مايعانيه المغترب .. برغم ان الغربة يمكن ان تضيف للمبدع بعدا و القاً جديداً..الا ان العمر قصير ياابوذر وساعة قرب الحبيب لاتعوض "وفنجان جبنة بي شمالو يسوي الدنيا بي حالو"
Post: #29 Title: Re: اسقى الشمس شاى الصباح Author: أبوذر بابكر Date: 04-23-2015, 05:51 AM Parent: #26
يا شمس كونى ضياءا وفرحا
على إبراهيم
كيف الحال يا سمح
يا فضل الله علينا وعلى العالمين
وزى ما قال العبادى
تشرب بى كفوفنا لما تتكفى
Post: #28 Title: Re: اسقى الشمس شاى الصباح Author: أبوذر بابكر Date: 04-22-2015, 02:39 PM Parent: #25
عبد الله جعفر
لو مر نسيمك على الف ميل يخلى العالم طربا تميل
اسئلتك ساااااااااااااااااااااهلة مويه
لكن منو البقدر يجاوب ليك عليها وانت براك شايف حال الليالى وحرقة الأيام ساعة تبقى واقف فى سكة الأحلام لا يلاقيك قمر ولا حتى نجمة تقول سلام
أما عن اليقين
مافى يقين يا صاحبى يمين بالله مافى
بس تخت حمالتك فوق سيد الحمالة غمض عيون روحك وادعى فى سرك انه جهرك يبقى منور ومخدر
ما باقى حل يا عبد الله غير انك تعز الخسامة
وتبقى مارق
الواطا هناك بتنادى موية البحر بتنادى العصريات بتنادى حتى الطيرتين البجن ساعة المغربية ديلك
متذكرن ؟
برضهن قاعدات ينادن
امرق تعال امرق تعال
والمره دى
قسم بالله ما ارجع كلامن
وهلك يا رجعة
Post: #31 Title: Re: اسقى الشمس شاى الصباح Author: أبوذر بابكر Date: 04-24-2015, 08:37 AM Parent: #1
العزيز عماد كرار
ما قلت الا الحق والله
هو العمير ده فيه كم وباقى منه كم ؟
وفى كل الأحوال قصير وممحوق
وأولى بيه الوطن وناس الوطن
كيفما كان وكيفما كانو
الغربة اخت الموت والله يا عماد
مهما تيسرت فيها ومنها اشياء وسهلت واتحققت
لكن يظل الغياب والبعد من الوطن وصمة حزن ووجع و شقاء
