ولا اقول ليك جناح غربى وجناح شرقى وتختار على كيفك وبمزاجك، ياتو الشرقى وياتو الغربى ده بعتمد على وضعية تحليقك انت وشوفك للسودان من فوق وراسك للشمال وكرعيك للجنوب لو كنت محلق ومدى ضهرك للسماء، الجناح اليمين بكون شرق السودان والشمال غرب السودان، والعكس طبعا لو كنت محلق ومدى الواطا ضهرك
غرب السودان يا الفاتح بدارفوره الكبيرة وكردفانه الكبيرة مليان لامن مدفق بفنون وابداع من كل نوع، خصوصا فنون الغناء
وشرق السودان نفس الشى برضو
لكن الإختلاف عند "شادن محمد حسين" انها مشروع كبير، مشروع مأصل ومنظم وشادن عايزه تشيل كل الموروث الغنائى وتوصله لباقى الدنيا، واظنها بدت فعلا
خلاص نخلى شادن الجناح الغربى
و الجناح الشرقى ؟
الجناح الشرقى يا الفاتح زول من نفس طينة شادن محمد حسين، مع اختلاف المشارب والمنطلقات ويمكن حتى البيئة واللغة زول إسمه "أحمد سعيد أبو آمنة" وهذا الأحمد عنده مشروع كامل ومليان ومتكامل وشامل لكل فنون الأدء والغناء البجاوى فى شرق السودان وأبو آمنة زول منفتح ومتفتح ومثقف ومطلع وملم بشكل موسوعى، وبقى معروف لدرجة كويسة جدا بره البلد، وكالعادة طبعا جوه بلده يمكن ما بعرفوه الا قلة قليلة من المهتمين
مشروع أبو آمنة تقريبا نفس مشروع شادن، وهو الخروج بالمحلى لآفاق عالمية رحبة توصل فنون بلدنا وابداعاتها وموسيقاها
قبل اكتر من عقد من السنين، اتذكر انى كتبت عن مطرب بجاوى جميل وقلت ده اجمل صوت اسمعه والله لغاية اللحظة ديك، ولسه مصر على على كده، ده "محمد البدرى" وقلت واثقا انه اجمل صوت ممكن يسمعه الزول، واتمنينا انه يواصل ويبدع ويطرب ويجمل اسماع الناس، ومفروض الناس يهتمو بيه ويوفرو ليه كل المعينات المطلوبة عشان يكون فى المقام والوضع البليق بيه لكن كالعادة، لا حياة لمن تنادى، والأشد إيلاما كمان انه صوت محمد البدرى الفريد، بدأ يتغير وما عاد زى ما بدأ، ومعروف انه الصوت زيه وزى اى عضو ومكون فى جسم الإنسان بتعرض لكل شى ومفروض صاحبه يحافظ عليه ويصينه كمان
ما عارف أنا ناس "الدكتورعثمان مصطفى" ديل قاعدين يعملو شنو ؟
مفروض يعلمو اصحاب الأصوات الجميلة وغير الجميلة كمان، كيف يحافظو على اصواتهم عشان ما تتدهور وتتأثر وتضيع
محمد البدرى امتداد ل "آدم شاش" الإنسان الفنان المطرب، ويمكن حاليا حتى ناس الشرق ما اظن يعرفوه لأنه زى عادتنا الكعبة فى عدم اهتمام وسائل الإعلام والتوصيل بالمبدعين زمان ما كان بتسمع "آدم شاش" الا فى برنامج "ربوع السودان" وتحس انه كمان البرنامج زى "تمامة العدد" بس، ومره واحدة فى الأسبوع
نرجع لموضوع الجناحين المشروعين، شادن وأبو آمنة، ولسه برضو الخوف حاضر ومشاريع زى دى ما من الساهل يتكفل بيها صاحبها لوحده، لأنه الفنون بكل انواعها بقت محتاجة صرف واهتمام وعناية وبقت حاجة مكلفة اذا كان الغرض منها الانتشار والرسوخ والوصول للناس جوه وبره، وقبل ده خلق ابداع مكتمل وتتوفر ليه كل العناصر المطلوبة عشان تحقق المطلوب منها
الشى المطمئن هو انه الاتنين ديل عارفين هم عايزين شنو وبعملو فى شنو وعندهم ثقة كبيرة وقناعة أكبر بالمشروع الماشين فيه
اصوات جميلة وفريدة فى نوعها ومتميزة، وبرضو لو ما تمت المحافظة عليها حتنتهى وتتدهور زى اصوات فنانين كتار قبلهم
بالله اسمعو أبو آمنة ده كيف
ما يستفاد من النضمى الكتير أعلاه
ما يستفاد هو طلب منك يا الفاتح ميرغنى، إنك تحاول تسعى بأى وسيلة وطريقة انك تلاقى "أحمد سعيد أبو آمنة" وعلى ضمانتى أنا إنك قبل الغناء حتستمتع بطرح أبو آمنة وكلامه فى كل مجال، حتلقى زول مثقف لأقصى حد، ودى بقت شى نادر عند كتير من المسمين نفسهم فنانين
عليك الله يا الفاتح كوس الزول ده وين ما يكون، وكان ما ادهشك حد الثمالة قول لى انت كضاب
ما تخليه بالله
صاح الناس فى البلد أكيد عندهم اهتمامات واولويات قبل الفنون من غنا ومزيكا لكن أنا من بدرى عندى قناعة راسخة وقوية انه كل مشاكل ومعضلات السودان فى المقام الأول
هى مشكلات ثقافية
والله جد
والحلول الثقافية أسهل وايسر وابسط وما مكلفة، وفى نفس الوقت تأثيرها أعظم واكبر
هسه الندوة ولا الفعالية دى الشافها ولا سمعها منو ؟
انت عارف
يا دوبك انا بس سمعت الجزء الأول وقلت اعلق عليه حتى اجى للباقى
اللهو بخصوص انه كردفان وبرضو دارفور كانت وعاء وبوتقة حنينة جدا لكل ناس السودان فعلا
ياخ بس النديك مثل بسيط وانت تانى احكم
شوف كيف كردفان مش بس بتستوعب وترحب بالناس لكن بتحبهم وهى التلمعهم وتتمرهم وتوريهم للناس
فى السبعينات
كان فى مجموعة من الفنانين الشباب من حلتنا "ودراوة" كلهم مشو الأبيض وانضمو اظن لفرقة فنون كردفان، والفرقة دى كمان عالم مهول وقصة طويلة ناس عوض محمدانى وجمعة جابر
الناس ديل فى فترة من الفترات زى ما بقولو قبضو جو الغنا مش فى الأبيض بس بل فى كردفان ودارفور وحتى فى باقى الأقليم
لو انت صغير فى عمرك زينا كده وما حضرت الناس ديل
ههههههههههههه
اسال منهم
عبد الفتاح عباس حيدر محمد احمد "الله يرحمه" عبد الله مساعد - ده ود خالتى وهسه بقى أذان الهادى محمد حسن
اسال ساى من طرف اى زول حضر الفترة ديك وبوريك
وده كله شنو ؟
ده دلالة على انه كردفان زى ما قال اخونا احمد هى وعاء وجامع لكل ناس السودان بلا استثناء
وما تزال
كدى النمش اتم باقى الندوة
Post: #10 Title: Re: جناحان يا الفاتح ميرغنى جناحان Author: أبوذر بابكر Date: 04-08-2015, 09:37 AM Parent: #9
والحاجة المهمة جدا تانى يا عباس شنو
هى انه انا فعلا لما شبهت الشرق والغرب بالجانحين
قصدت اقول انه الجناح الواحد مستحيل يرفع الطائر ولا بحلق بيه
زى ما الليد الواحده ما بتصفق
لازم كلنا، رضينا ولا ابينا، نبقى جسم واحد وروح واحده
عشان نطير ونحلق
ونعيش
غير كده
مافى غير الهلاك والضياع والفناء
والله جد
Post: #11 Title: Re: جناحان يا الفاتح ميرغنى جناحان Author: عباس محمود Date: 04-08-2015, 12:01 PM Parent: #10
أبو ذر سلام تاني
ياخي الفعالية دي نزلت في بوست هنا في منبرنا الواحد ده ونزلها المهندس عبد الله الشقليني
حسبما أعتاد في أنزال أنشطة منتدي السودان الفكري في أبوظبي هنا.
أكيد أكبر منك كتير ههههههه...لكن بسأل صديقي عثمان الفحيل - ود ألابيض الفنان - سؤالك عن شبابكم الأنضموا لي فرقة فنون كردفان ونحن سوا في نفس البلد و المدينة.
الشاعر الجميل ابا ذر صاحب الحرف المٌعطر انا هسع اجيك من وين؟ اليانكي لديهم مثلا مؤداه : إن شاء الله للإنسان أن يطير لذوده بالجناحين"! تحية أولى إلى حين عودة.
عشان كده قلنا نخليك تكمل جميلك الجميل وتم باقى السماحة الناقصة بى أبو آمنة
كان الله قدرك
وكان ما قدرك اكيد ما بنلومك والله
ومحبتنا ليك كمان تزيد زيادة
بلدنا سمحة والله يا الفاتح
سمحة سماحة شديدة
اكتر شى أنا بريده فى الدنيا دى هو السودان
دى ما هضربة نوستالجيا ساى
كان دايرين بحلف ليكن
يا زول على مهلتك
Post: #15 Title: Re: جناحان يا الفاتح ميرغنى جناحان Author: الفاتح ميرغني Date: 04-09-2015, 03:28 AM Parent: #14
عزيزنا ابوذر. ياخ انت زول " شوّاف" شديد. والزول ده فعلا عبارة عن مشروع مبدع وواعي ومختلف. وممكن نقول الفيرشن الذكوري لمشروع شادن! وأول شيء، عجبني تعليقه على اللبس بإعتبارو شيء ملفت ومعبّر عن خصوصية و" الخصوصية هي الجمال"! ونبدأ بالخنفس والخلال( Afro pick) عندما اجتاحت صرعة الـAfro او الخنفس كموضة، العالم كله قام بتقليدها. وفي السودان الناس كلهم كانو مخنفسين".نجوم الكورة والفنانيين والشخصيات المهمة والاعلاميين. الغريبة ما قلنا الحاجة دي عندنا تقليد قبلي في شرق السودان، قبل ما تكون موضة امريكية في بدايات الستينات! الامير الكوشي بشاشا فاتح بوست بلامس فيه حاجات زي: " حاجاتنا السمحة الما قاعدين نشوووووووووووفها". محاربون من فرسان البجة في ملحمة " تماي" التي كتب عنها استاذنا وقامتنا السامقة، عبدالمنعم خليفة واحدا من اجمل البوستات في سودانيز اونلاين: andlt;a href="http://sudaneseonline.com/cgi-bin/sdb/2bb.cgi?seq=printandboard=470andmsg=1399573893andrn=" target=_selfandgt;من تاريخنا الوطني.. الذكرى المائة والثلاثون لمعركة (تماي)من تاريخنا الوطني.. الذكرى المائة والثلاثون لمعركة (تماي)
محبتي
Post: #16 Title: Re: جناحان يا الفاتح ميرغنى جناحان Author: أحمد التجاني ماهل Date: 04-09-2015, 04:38 AM Parent: #15
الأخ أبو ذر لك التحية والتقدير على البوست، والتحية لأهلنا في ودراوة ولنا فيها أعزاء منهم من رحل ومنهم يعيش الآن أطال الله أعمارهم وعاشوا معنا نعم العيشة والخوة عمنا محمد الحسن أبو علامة (أبو دقن) وعمنا يوسف بخيت أبو علامة والد العيدروس ومحاسن ومتزوج مننا (أم الحسين بت ضو النعيم) وعمنا بخيت الحسن أبو علامة (أبو غالية) والد العقيد الشهيد أبو علامة بخيت الرجل الشهم وعمنا فتح الرحمن بخيت وحسن يوسف الزبير وعيال الهجوة ونسابتهم عيال عمر العالم ناس شوقي وعوض الله والدكتور محمد أحمد عمر الذي مات في الحرب الأهلية في بداية هذا العهد المظلم وأخونا عبد الله تاجوري وحارس المرمى أبو زيد ولاحقا من عرفتهم من ودراوة طالبتي صباح أحمد علي وعمنا الدكتور عثمان أبو علامة في الإمارات. يا أخي أبا ذر هذا السودان كان جميلا وعندنا في كردفان كان الناس ولا يزالون منطبقين جميعا لهذا كان ولا يزال الموروث الثقافي والقيمي متنوع بتنوع المجتمع. والتحية عبر البوست لصديقي الصحفى الحادق الفاتح ميرغني والذي بالتأكيد هو لهذه الأجنحة بـــــُـــــــــــــراق. والتحية لصديقي عباس محمود الزول السمح عقل وصورة. أحمد التجاني
Post: #18 Title: Re: جناحان يا الفاتح ميرغنى جناحان Author: الفاتح ميرغني Date: 04-09-2015, 07:08 AM Parent: #16
Quote: ما يستفاد من النضمى الكتير أعلاه
ما يستفاد هو طلب منك يا الفاتح ميرغنى، إنك تحاول تسعى بأى وسيلة وطريقة انك تلاقى "أحمد سعيد أبو آمنة" وعلى ضمانتى أنا إنك قبل الغناء حتستمتع بطرح أبو آمنة وكلامه فى كل مجال، حتلقى زول مثقف لأقصى حد، ودى بقت شى نادر عند كتير من المسمين نفسهم فنانين
عليك الله يا الفاتح كوس الزول ده وين ما يكون، وكان ما ادهشك حد الثمالة قول لى انت كضاب
يا اباذر ياخ ده فنان مبدع حد التدفق. صوت رهيب وملكات تطريبية من النوع البخلي ناس the X factor يقولو Wow! وحاشاك من الكضب لأني مقتنع بما لا يدع مجالا للشك بأن معشر الشعراء بشوفو بقلوبهم والدليل ابو العلاء المعري او رهين المحبسين - بيته والعمى! وان شاء الله الزول ده يكون في برنامج حواراتي القادمة في القاهرة او دبي.
محبتي
Post: #21 Title: Re: جناحان يا الفاتح ميرغنى جناحان Author: أبوذر بابكر Date: 04-09-2015, 08:46 AM Parent: #18
شفت يا الفاتح لو عملت دى
ولميت فيه ونضمت معاه
قلبى بكون رضيان عليك دنيا وآخره
ههههههههههههههههههه
بعدين شنو الوصية فى الذمة
تقول ليه اصلك ما تكسل ولا تخلى شى يأثر عليك ويحبطك مهما كان
وقول ليه دائما خلى نيتك زاملتك
والله بسهل ليك كل شى
Post: #19 Title: Re: جناحان يا الفاتح ميرغنى جناحان Author: أبوذر بابكر Date: 04-09-2015, 07:09 AM Parent: #16
حبيبنا أحمد التجانى
سبحان الله ربنا اكرمكم بأطيب البشر من ودراوة، اسرة أبوعلامة والأسرة دى فى ودراوة من اعرق وانبل واكبر الأسر والله الزول ممكن يتجرأ ويقول انه الخوى واهل الخوى محظوظين عشان الناس ديل اخاروهم واختارو بلدهم دون كل المدن والمناطق التانية
الحاجة ام الحسين
اقول ليك وتصدقنى يا أحمد
واحد من حيشان ناس اب علامة، وتحديدا اسرة محمد بخيت ويوسف بخيت و العبيد اب علامه
فاتح فى حوشنا فى ودراوة وعلى مدار ساعات اليوم الناس متداخلين وملمومين
الله الله على اب علامة بخيت كلمته والله يا احمد قلت ليه ياخ ما تبقى زول كويس شدييييد كده
الناس الكويسين ما بعيشو كتير
يقوم يضحك طوالى ضحكة الحلوة ديك ويصر عينه ويقول لى
ياخ انا كاربينو خلى لى الوراهو وقدامو وبقى بس كايس لى وما لم فينى لغاية ما رجعت من الجنوب وسلفا كير قال للدينكا يا انا يا اب علامه ده وبرضو ما قدر على
تخيل بالله وبعد ده كله اب علامه يجى يموت جوه مكتب
يا الله
Post: #17 Title: Re: جناحان يا الفاتح ميرغنى جناحان Author: أبوذر بابكر Date: 04-09-2015, 06:54 AM Parent: #15
حبيبنا الفاتح
شفت بالله أبو آمنة ده كيف
اهم واجمل شى انه عارف عايز شنو ومفروض يعمل شنو
لكن الخوف يا الفاتح
الخوف انه مهما كان متحفز وجاد ومصر و مؤمن ب مشروعه تلم فيه الحاجات الكعبة ديك البتقصقص الجنحات وتثبط العزائم وتزهجه من كل شى
ودى حاجات كتيرة طبعا ومعروفة منها المقصودة ومنها الما مقصودة
وانت سيد العارفين يا الفاتح كيف انه فى الدول والمجتمعات البتفهم وتعرف لما تظهر موهبة زى دى بتتصدى ليها مؤسسات وكيانات قوية وتمسك ايدها وتحقق ليها وبيها اقصى النجاحات من كل نوع، سواء مادية او معنوية
ونحن ما عندنا شى زى ده
الخنفسة حقت اهلنا فى شرق السودان بامتياز
حاجة عجيبة بالجد
العرق أو الإثنية الأفريقية الوحيدة يمكن العندهم شعر بنمو بالطريقة دى لا وشنو كمان هم بهتمو بيه اهتمام زائد يصل درجة الطقوس مش بس عبارة عن تقليد
غايتو فى نص السبعينات ايام كنا فى الثانوى العام كلنا خنفسنا
كان عندى تلاتة خلالاات
وقمصان تحرمنى منك
هههههههههههههههههه
Post: #20 Title: Re: جناحان يا الفاتح ميرغنى جناحان Author: الفاتح ميرغني Date: 04-09-2015, 07:41 AM Parent: #17
مع اني زيك يا حبيب ما فاهم كلمة لكن هذا غناء مطرب ايما غايات الاطراب! يا اباذر بتلاحظ مساحة التطريب او ( The versatility ) في صوته فيها ابعاد من حنجرة الراحل خوجلي عثمان، عليه شأبيب الرحمة. مرات لمن اسمع حيدر بورتسودان وعادل مسلم أو الشاعرة سميرة البلوي بيجيني إحساس بوجود نكهة مميزة في اصواتهم زي قهوة الشرق، ما عارف ليه!!! مع اني ما كييف قهوة لكن صاحبي قال: الفرق بين قهوة الشرق و"ستار بكس" زي الفرق بين موية زمزم والموية العادية!!!
الشاعرة سميرة البلوي أجمل صوت نسائي منذ الراحلة ليلى المغربي.!
محبتي
Post: #22 Title: Re: جناحان يا الفاتح ميرغنى جناحان Author: أبوذر بابكر Date: 04-09-2015, 09:01 AM Parent: #20
دى ساهله شويه
كونك تكون ما فاهم شى من الكلام وتنطرب الطرب الشديد ده
يخيل لى فى الحالة دى الصوت البشرى بنضاف ويمتزج مع المزيكا ويبقو شى واحد وما بكون فى داعى لفهم الكلام
قلت ليك دى ساهلة ليه
النحكى ليك القصة دى بس ما تضحك على بالله
زمان ايام التمانينات وبعد ما عرفنا "خوليو اجليسياس" وعجبنا بقينا نكوس اشرطة الكاسيت بتاعته
يمين بالله يا الفاتح فى اغنية كده بوريك اسمها كنت لامن اسمعها
بقعد ابكى
ههههههههههههه
لاقاك غبا وعواره اكتر من كده ؟
بكاء شديد بدموعه
ياخ انت ولا فاهم اى شى تماما، هسه يمكن الزول ده بقول فى شى مفرح ومبهج وما عنده اى علاقة بالحزن ولا البكاء
لكين لا
انا طوالى بقعد ابكى
ده يقولو عليهو شنو ؟
بمناسبة الفوكالز واللغات المختلفة يا الفاتح
انا طوالى قاعد اقول انه فى لغات طبيعة "الفونيتكس" الفيها وبرضو نوعية "الإنتونيشن" بتديها قابلية انها تلحن وتموسق اكتر من لغات تانية
قول لى كيف
عندك مثلا اللغات التالية
الاسبانية الأمهرية النوبية الأمازيغية
ولحد ما
الإنجليزية العربية
مع شوية لغات افريقية برضو، خصوصا فى غرب القارة
دى كلها لغات بتبقى اجمل واحلى لما تؤدى ملحنة ومموسقة
عكس مثلا
الفرنسية او اليابانية او الروسية
تحس انها ما لاتقة فى الغناء اطلاقا
تسمع مثلا "إديث بياف" ولا "ميراى ماتيو" او حتى "جون هاليداى" بجلالة قدرهم كلهم
لكن برضو تحس كده زى ما تقول
الملح ناقص
هههههههههههه
Post: #23 Title: Re: جناحان يا الفاتح ميرغنى جناحان Author: الفاتح ميرغني Date: 04-09-2015, 10:12 AM Parent: #22
Quote: النحكى ليك القصة دى بس ما تضحك على بالله
زمان ايام التمانينات وبعد ما عرفنا "خوليو اجليسياس" وعجبنا بقينا نكوس اشرطة الكاسيت بتاعته
يمين بالله يا الفاتح فى اغنية كده بوريك اسمها كنت لامن اسمعها
بقعد ابكى
ههههههههههههه
لاقاك غبا وعواره اكتر من كده ؟
بكاء شديد بدموعه
ياخ انت ولا فاهم اى شى تماما، هسه يمكن الزول ده بقول فى شى مفرح ومبهج وما عنده اى علاقة بالحزن ولا البكاء
لكين لا
انا طوالى بقعد ابكى
ده يقولو عليهو شنو ؟
يا اباذر اضحك فيك شنو ياخ.!! زول ببكي ده معناه " زول سوي شديد" لانو الدموع قالوا بتجلي النظر وتخفف على الفؤاد عبء الحزن، على حد تعبير عمك إبن حزم. وانت ما دام بتبكي من زمن ناس خوليو هسع بتكون بقيت زرقاء اليمامة. ههههههه انا شخصيا زول ما بيبكي او يقول ليك" ما ممكن الناس تشوف دموعي" بيبدو لي متخشب وجدانيا! طبعا في منتصف الثمانينات بدينا نسمع الغنا الغربي بتاع ناس: ديميس روسس وخوليو والبي جيز وتينا شارلس والبوني إم وبوب مارلي. ولمن سمعنا ليونيل ريتشي، الولد الرومانسي الرهيب،البكا حصل البكا والدموع انهمرت. لدرجة إنو واحد صاحبنا كان يصر قبل ما نسمع" Three times a lady" نطفي النور ونوقد شمعة! قبل فترة كنت بسمع في حوار مع ليونيل ريشي قام حكى عن واحد صاحبو ما عندو اي علاقة بالرومانسية. والبت بتاعتو عاوزه تسمع منو كلام حلو ورومانسي، وهو ما قال ليها اي حاجة. قامت جابت ليهو أغنية " Three times a lady". وقالت ليهو " بنهرة شديدة" أنقل الكلام ده ورددو على مسامعي" هههه. تصدق يا مؤمن طوالي ضربت لصاحبي وقلت ليهو " البكا جعل منك زرقاء اليمامة". لول جاييك يا حبيب في موضوع اللغات الرطبة واللغات الناشفة.
محبتي
Post: #24 Title: Re: جناحان يا الفاتح ميرغنى جناحان Author: أبوذر بابكر Date: 04-09-2015, 10:44 AM Parent: #23
الفاتح
عليك الله ياخ اعفى لى
لو زحمتك وشغلتك ب جنس المواضيع العجيبة دى
Post: #25 Title: Re: جناحان يا الفاتح ميرغنى جناحان Author: الفاتح ميرغني Date: 04-09-2015, 10:52 AM Parent: #24
Quote: الفاتح
عليك الله ياخ اعفى لى
لو زحمتك وشغلتك ب جنس المواضيع العجيبة دى
تزحمني شنو يا حبيب.ياخ انا عاوز اقول ليك" انا سيد العرب" مستلهما الشعور بتاعك في بوست عزيزنا عمر الفاروق!!!
محبتي
Post: #27 Title: Re: جناحان يا الفاتح ميرغنى جناحان Author: بابكر قدور Date: 04-09-2015, 11:46 AM Parent: #25
أخي أبوذر بابكر لك الود والتحايا الطيبات موضوع شيق وجميل وفاتح للشهية للعودة والتعليق بإسهاب حول مشروع الأخ أبوآمنة المتكامل لنقل غناءنا وموسيقانا لرحاب العالمية الذي تقدم فيه خطوات عملية ملموسة وإلى ذلك الحين لك مني كل تحية وتقدير أخي أبوذر .. ودمت ....
أنا أبوي عركي من طيبة الشبخ عبدالباقي ... واسمي عبدالباقي الجيلي علي الشيخ عبدالباقي ...
لكن لي في ودراوة أواصر قربي ووشائج ....
فأمي من ود عشيب .... بت أحمد الخضر ود شريرة ... لو كان الاسم قد طقش سمعك ...
والفاتح ميرغني وكردفان مبنع الروعة ... عناصر جمال أخرى تجمع بيننا ...
محبتي والله ...
يا سلاااااااام ياخ صاحبي السمح والزين عبدالباقي الجيلي ليك هلت البيبان وفرحت شبابيكنا: ياخ بجمع بينا مودة ومحبة وحكي ناعم عن ناس من اجمل من خلق ربنا في الكون! يعلم الله سعيد بالطلة!
Quote: بمناسبة الفوكالز واللغات المختلفة يا الفاتح
انا طوالى قاعد اقول انه فى لغات طبيعة "الفونيتكس" الفيها وبرضو نوعية "الإنتونيشن" بتديها قابلية انها تلحن وتموسق اكتر من لغات تانية
قول لى كيف
عندك مثلا اللغات التالية
الاسبانية الأمهرية النوبية الأمازيغية
ولحد ما
الإنجليزية العربية
مع شوية لغات افريقية برضو، خصوصا فى غرب القارة
دى كلها لغات بتبقى اجمل واحلى لما تؤدى ملحنة ومموسقة
عكس مثلا
الفرنسية او اليابانية او الروسية
تحس انها ما لاتقة فى الغناء اطلاقا
تسمع مثلا "إديث بياف" ولا "ميراى ماتيو" او حتى "جون هاليداى" بجلالة قدرهم كلهم
لكن برضو تحس كده زى ما تقول
الملح ناقص
هههههههههههه
يا ذرذرة فوق النيل يا خ ممكن اتفق معاك في بعض اللغات التي اوردتها، لكن عليك الله اللغة الفرنسية شيلها من القايمة وخت بدلها اي لغة تانية . الفرنسية دي بالذات بتعتبر من اللغات ذات الرنين المموسق،.والعجب لو سمعتها من الجنس اللطيف، بيجيك شعور بانها لغة الحور العين.! وكدي اسمع سلين ديون، ملكة كيبيك ، في أغنية :" ويظل الحب باقيا"( L'amour existe encore):
" رغم العنف المستشري ورغم الكآبة المزرية ورغم القنابل المتساقطة من القِبل الاربع يظل الحب باقيا" طبعا لمن غنتها في ذكرى احداث 11 سبتمبر، في ناس رفعوا الفراش وإحتسبوا حالة الحزن.
أنا نسيت ليك اهم واحدة من اللغات البديعة بعد تتلحن
البجاوية خصوصا لغة الهدندوة تحديدا
لكن بالنسبة للفرنسية والله ما بمرقا من رفيقاتا
بعدين الحصل مع سيلين ديون حصل لأنه ده صوت وأداء سيلين ديون وهو الخلق الجمال ده فى الفرنسية
كدى خلى يوم أى معنية او مغنى تانى غير سيلين العجيبة دى يغنى نفس الأغنية
احتمال كبير مش ما تعجبك وبس
احتمال ما تغرف انه دى هى الأغنية نفسها
سيلين دى خارج اى حسابات يا زول
انت سيلين دى بشر ؟
الرجاء الإفادة
هههههه
Post: #45 Title: Re: جناحان يا الفاتح ميرغنى جناحان Author: الفاتح ميرغني Date: 04-11-2015, 09:13 AM Parent: #44
Quote: سيلين دى خارج اى حسابات يا زول
انت سيلين دى بشر ؟
الرجاء الإفادة
هههههه
يا حبيبنا الزولة دي عبارة عن " كمين من بشر". زولة تنضح آدمية حد الفيضان! -من الفنانات القلائل اللواتي لم يتعاطين المخدرات( الحقيقة قالت مرة مع صاحباتها ضربت ليها "نفس أو نفسين" ولم تعد الكرة مرة أخرى على حد تعبيرها). -رفضت عقودا بقيمة 15 مليون دولار امريكي للمشاركة في تحكيم" America's Got Talent بحجة إنو البرنامج بيشغلها عن " بيتها واولادها".! - اطلقت على واحد من اولادها اسم " نلسون" تيمنا بالزعيم الراجل مانديلا، على أمل أن يقدر قيمة هذا الاسم ومعنى روح التسامح والمحبة. - ألغت كل ارتباطاتها الفنية بما فيها جولة آسيوية مدرارة للدولارات من أجل ممارضة زوجها " رينيه" الذي يعاني من السرطان ! - قالت احسن حاجة بتعرف تعملها - بعد الغنا - انها بتلم باقي الاكل( The leftover) وتاني يوم بتقوم تعمل منه وجبة.إتذكرت اماتنا زمان الاكل لو ما بات زااااااتو ما بيستسيغن طعامته! زولة سمحة، صوت وصورة وخايلة فيها تسريحة "الاسد الفي القيد يناتل"!
محبتي
Post: #46 Title: Re: جناحان يا الفاتح ميرغنى جناحان Author: ملهم كردفان Date: 04-11-2015, 09:49 AM Parent: #45
Quote: ازيك يا كردفانى يا ملهم
آنست وضويت والله
ومرحب بيك فى كل أوان وحين
مرحبابك ابوذر ويديك العافيه اها ..... اول ملاحظه انو ابو أمنه مشى أمريكا وشادن فى الخليج وانتو زاتكم بره ... يعنى البلد طارد ...للإبداع ومنفر لو كنت فى الداخل مادمت تحمل شيئا جادا ستجد المحبطين والحساد والنفعيين ومادمت انت مش مؤتمر وطنى التلفزيون تشمو قدحه ولو شميتو مره وجسوا نبضك ولقوك فى شى من الرفض للظلم بتاع المؤتمر اللاوطنى بطيروا عيشتك وبتصل للتهديد بالسجن والإغتصاب وهتك أعراض اهلك قدامك ... يعنى القبح بقى صفه ملازمه للحكومه البغيضه الماسكه البلد ده من ناحيه ومن ناحيه أخرى المشروع الغنائى بيحتاج دعم كبير جدا جدا عشان يتحقق ده طبعا مع إصرار هذين المبدعين على نشر البديع من حاجاتنا ... وربنا يوفقهم ويوفقكم ياخى ..... تحليه حتى المنتديات تجد فيها تمتلىء بالمحبطين والمغرضين والحاقدين من أعداء النجاح .. الساتر الوحيد الممكن الواحد يعملوا انو يثق فى الناس البدعموهو والناس البنتقدو حاجاتو ... ووأضعف الإيمان الدعم الحوارى والنشرى على صعيد الإنترنت
Post: #47 Title: Re: جناحان يا الفاتح ميرغنى جناحان Author: عبد الباقي الجيلي Date: 04-12-2015, 09:26 AM Parent: #46
الفاتح ياخ فتح الله عليك بما تحي فينا من موات ...
من محاسن هذا المنبر الجميل ... أنك تغيب عنه شهوراً ودهوراً ...
ولما تعود بائساً مثقلاً بإحباطات الوطن الحزن ... يمنحك أسباباً أخرى للفرح ... سلمت يا أبا ذر ...
موضوع هذا البوست ...
الجناح الشرقي ...
وهو جناح يا عزيزي أبا ذر ... وللأسف الشديد ... مهيض ... مهيض ... مهيض
مذ أن كنا نبحث بشغف عن أعمال أمير سواكن ويحيى أدروب ...
وحتى محمد البدري ومحمد سعيد الفنان المثقف ...
ثم سيدي دوشكا ...
ولم يزل الشرق بعد عصياً على اهتمام المركز ...
كردفان خيرها جوة وبرة ... تفيض بمعينات الحياة على نفسها وغيرها ...
أما الشرق فبائس بائس بائس ...
وأنت تأخذك الدهشة حتماً حين ترى أدروباً يدندن بربابته لحناً روياً ...
مليئاً بالحياة والجمال ...
ولا يملك من مظاهر الحياة سوى خلالاً وحذاءً من بقيايا إطارات السيارات بالياً ...
وكوباً من جبنة ... وخرقة ... لا تدري لا تساخها ..هي التراب .. .أيهما تشبهه بالآخر ...
مدهش إنسان الشرق هذا ....
حديثكما عن سيلين ديون ...
سيدفعني لطلب صغير منك .. يا فاتح ... فتح الله عليك ...
اسبر غور عالم جوان بايز ...
هي الآن في خريف العمر ...
معتقة كما النبيذ ...
عندما تمسك بقيثارتها .. وتدندن ... تأخذك إلى عوالم ماركيز الغرائبيبة ...
محبتي لكما ...
ولكل من ولج محراب الجمال هذا ....
Post: #50 Title: Re: جناحان يا الفاتح ميرغنى جناحان Author: أبوذر بابكر Date: 04-15-2015, 08:06 AM Parent: #47
تحياتى يا عبد الباقى
مش شرق السودان بس هو المنسى ومهمش زى ما بقولو
كل اطراف البلد بتعانى من نفس الشى
وتظل الحقيقة الكبرى، البهرب منها الناس، وهى انه
كل مشاكل السودان القديمة والجديدة وحتى الحتظهر لاحقا
كلها مشلات ثقافية قبل كل شى
وما لم نفهم فى الأول أصل المشكلة ما حنقدر نعالجها
مشكلة جنوب البلد الإنفصل كانت فى المقام الأول اشكالية ثقافية حول الهوية والمواطنة قبل ما يكون الموضوع عن التنمية او توزيع السلطة أو الثروة
وكل الشى الحاصل حاليا فى بلدنا بدور فى نفس الحلقة
الفنون والإهتمام بيها أكيد عنصر فاعل وقوى وممكن يسهم فى حل كل مشكلاتنا
بس من يفهم ؟
Post: #48 Title: Re: جناحان يا الفاتح ميرغنى جناحان Author: بابكر قدور Date: 04-12-2015, 11:33 AM Parent: #46
أخي أبوذر لك الود والتحايا الطيبات مضافاً إليها تقديري ومحبتي .... الإجابة على تساؤلاتك كلها بالإيجاب فأنا من كسلا ومن الميرغنية والباشمهندس حسن قدور شقيقي وسأنقل له مادار بيننا .... وسعدت جداً بملاقاتك هنا وشرفني التداخل معك إذ قاد لمعرفة شخصكم الكريم التي أعتز بها كثيراً .... أعترف إبتداءً أنني عرفت الفنانة شادن محمد حسين من خلال البوست الذي تفضلت بفتحه على الرغم من أنني قد لمحت بوست الأخ الفاتح ميرغني ولكن لم يسعدني الوقت بالإطلاع عليه في حينه ولكني عدت إليه بعد المداخلة معك .... كما وأنني اطلعت على الكثير من الأعمال التي قدمتها الفنانة شادن ولا شك أن مشروعها هو مشروع متفرد يشكل نقلة في الفن السوداني ولكن على الصعيد المحلي وليس على الصعيد العالمي .. إذ أن النقل إلى الصعيد العالمي يتطلب إتباع خطوات معينة أقول, وهذا رأي خاص, أنه وباستقراء تجربة الفنان أحمد سعيد أبوآمنة يمكن بسهولة إستخلاص تلك الخطوات ومن ثم اتباعها .... أبو آمنة الآن يتربع على كرسي العالمية بعد أن حققت تجربته نجاحاً بفضل عوامل تيسرت له لم تكن حليفة لتجارب من سبقوه على خطى العالمية وأقصد تجربة الأستاذ كابلي وتجربة الفنان عبدالقادر سالم التي اقترنت بها تجربة الفنان عبدالعزيز المبارك والفنان محمد جبارة الذين وصلت أعمالهم لأرفف "الأمازون" وبقيت هناك حتى اليوم. إنني من هنا أتقدم للفنانة شادن ناصحاً لها أنها مؤهلة تماماً لأن تخوض التجربة العالمية وتستطيع أن تقدم فيها نجاحاً عظيماً إذا تتبعت خطوان الفنان أحمد سعيد أبوآمنة بحذافيرها فمالذي فعله أبوآمنة؟ إلتقى أبو آمنة بالفنان الأمريكي ميقويل مرينو وهو من ولاية إنديانا الأمريكية وكان اللقاء عن طريق الصدفة وحدها وكان ذلك في القاهرة في نادي الجاز بالقاهرة وعمل الفنانين مع بعض بعد تكوين فرقة أوتاك التي أنتجت ألبوماً مشتركاً من أغاني البجة حقق نجاحاً كبيراً هو ألبوم "بجاوية" وفي خلال تجوال الفرقة حقق لها الألبوم مبيعات من الولايات المتحدة الأمريكية كفت تمويل الفرقة وخلقت لها قاعدة من المعجبين لا يستهان بهم. كان ذلك في 2012م وفي سنة 2013م ذهب أبوآمنة إلى أمريكا لتنطلق الفرقة من هناك وتقدم أغنياتها في 2014م في العديد من المدن الأمريكية مما أتاح لها فرصاً عديدة كان من بينها الدعوة الموجهة لهم من تد إكس إنديانا التي قدمت أحمد سعيد آمنة وميقويل من خلال فريق أوتاك للمعجبين العالميين .. وانطلقت الفرقة لتقدم غناء البجة على الباسنكوب "الطنبور" وتقيم ورش العمل والعروض حول الإيقاعات والرقص .... مجتمع البجة والثقافة .. الفنون الشعبية واليدوية ... وطريقة عمل الباسنكوب وتعليم العزف عليه .. وأنطلقت الفرقة .. وكتبت عنها الصحافة العالمية .... قالت صحيفة منيوبوليس ستار تربيون اليومية "ألبوم بجاوية كان أفضل أحد مفاجآت الموسيقى العالمية لعام 2012م" ....
Post: #51 Title: Re: جناحان يا الفاتح ميرغنى جناحان Author: أبوذر بابكر Date: 04-15-2015, 08:13 AM Parent: #48
تحياتى يا قدور
صدفة سمحة والله الخلتنا نعرفك
وتحياتى للصديق العزيز الباشمهندس حسن قدور
ويا ريت والله تورينا اخباره وتوصل ليه السلام والأشواق
وعبرك برضو التقدير والفخر بفنانا أبو آمنة
والله أنا من اول مره شفته وسمعته عرفت انه زول فعلا مميز
ربنا يوفقه ويديه المزيد من النجاح
وان شاء الله ما يكسل ولا يحبط عشان يواصل المشروع السمح ده
Post: #49 Title: Re: جناحان يا الفاتح ميرغنى جناحان Author: أبوذر بابكر Date: 04-14-2015, 07:34 AM Parent: #46
معليش يا ملهم
تأخرنا عليك ياخ شويه
كلامك سليم وصحيح تماما
المشاريع الزى دى فعلا محتاجة اهتمام شديد خصوصا فى جوانب الصرف المادى
ومستحيل فرد يقوم بالحاجات دى كلها ويحصل ويخلق مشروع متكامل بدون دعم مادى كبير وكبير جدا
عشان كده طبيعى جدا مشاريع زى دى فى مجتمعاتنا تفشل قبل ما تبدأ
والشخص الحصيف، وربما المحظوظ جدا زى المبدع أبو آمنة يمكن يقدر يواصل ويحقق كل طموحاته المرجوة
ونحن ما عندنا طبعا غير الأمنيات الطيبة والصادقة والدعوات كمان لكل صاحب مشروع
وزى ما أنا قلت فى بداية الموضوع
انه صحيح ناسنا فى السودان عندهم اولويات وضرورات حياتية ومعيشية اهم كتير من شاكلة المشاريع دى بس برضو ده ما بيعنى اننا نلغيها وما نهتم بيها
