غدا الاربعاء وقفة احتجاجية لسكان حي الخرطوم ( 3) ...

07:10 PM Mar, 24 2015
سودانيز اون لاين
ناذر محمد الخليفة-www.nazirkhalifa.com
مكتبتى فى سودانيزاونلاين



وذلك من اجل استرداد الحق المسلوب من سكان الحي ألا وهو نادي الاسرة ..


واليكم البيان كاملا :

أهلي آبائي
أمهاتي أخواني أخواتي
نناشدكم من أجل الخرطوم 3 للوقوف معنا لاسترداد الحي المسلوب منا نادي الاسرة والذي منح لجهات عديدة لاقامة الاستثمارات فيه وحرمان أهالي الحي
الاستفادة منها وهو المنفس الوحيد في هذه المنطقة المميزة والكل يعلم بملكية النادي العريق لنا .. وذلك بوقفة احتجاجية سلمية .. نكرر سلمية يوم الاربعاء
الساعة العاشرة صباحا وبحضور كثير من الصحف المرافقة لنا مع العلم بانه بدأت جهة في انشاء مباني في الجهة الجنوبية من النادي للتمليك ..

حضورك من أجل الخرطوم 3 ..



اللجنة الشعبية جنوب وشمال وشرق النادي ..

قبل تسعة أعوام كتبت بوستا في هذا المنبر عن ما آل اليه حال نادي الاسرة العريق وأستكتبت المرحوم خالد الحاج في منتدى سودانيات
للكتابة عن ذكرياته مع هذا النادي .. فكان البوست أدناه والذي يحتوي على مقالي ومقاله حول النادي ..
ألا رحم الله الفقيد خالد الحاج بقدر ما اعطي وقدم للأنسانية وللمعرفة ..

فوق
لدعم إخوتنا في الخرطوم 3 ليستعيدوا حقهم..

السلام عليكم يا ناذر وضيوفه الكرام

انت بتقصد نادي الاسرة ام حديقة القرشي؟

طبعا الاثنين استبح حماهم وسدت منافذ الرئة التي يتنفس بها سكان الحي بالمباني والتمليك في هذين المتنفسين

كامل التضامن معكم وانتم اهلي سكان حي الخرطوم 3

فوق
لدعم إخوتنا في الخرطوم 3 ليستعيدوا حقهم..

عزيزي ناذر الخليفة
سلامات
سلمية ؟
والله يا أخ ناذر مع كتير احترامي ليك ولي أهلنا في 3 .. سلمية لا ..
الموت الاحمر ولا النادي ..
تحياتي

الأخ ناذر
تحياتي
تربطني بهذا الحي ذكريات عطرة .. فقد كنت من قاطنيه لفترة خلت.
تم إنشاء نادي الأسرة في ميدان عبدالمنعم ( عبدالمنعم محمد) . رجل البر والإحسان‘ رحمه الله. وغرب الميدان كانت مدرسة عبدالمنعم
وجامع عبدالمنعم، وسوق عبدالمنعم، وقهوة البرابرة ومحطة (عشرة دقايق). كانت في الميدان عدة ميادين لكرة القدم ، وكانت تقام به إحتفالات المولد النبوي الشريف،
الذي تم نقله إلى ميدان الليق بالحلة الجديدة، وهو أيضاً قد تم عليه الإعتداء السافر.
قصدت من الإشارة إلى المرحوم عبدالمنعم محمد لنرى فيم كان الناس ينفقون عمرهم القصير، وكيف أصبح هؤلاء يهدرون
عمرهم القصير.
شتان بين أن تنفق عمرك في خدمة المجتمع وتقدم لآخرتك، وبين أن تهدره في مصلحتك الضيقة غير عابئ بمجتمعك وناسيا لآخرتك.
مطلبكم مشروع .. وندعمكم بقلوبنا ودعواتنا .. وهذا أضعف الإيمان.
وفقكم الله ..

Quote: نناشدكم من أجل الخرطوم 3 للوقوف معنا لاسترداد الحي المسلوب منا نادي الاسرة والذي منح لجهات عديدة لاقامة الاستثمارات فيه وحرمان أهالي الحي

سلام نازر

واهم حاجة ترجع النافورة

من طولها كنا نشاهدها من السكة حديد

دي كانت اكبر نافورة في العالم

الله معكم

كامل التضامن مع اهلنا في نمرة ثلاثة، انها من اوائل وفغات حملة ارحل

شينه منكم يا عضوية سودانيز ..
معقول !
نحن عضويتنا بالالاف يطلب منكم زميل مؤازرتهم بحرفين بس أ ب تتكاسلو؟
800 مشاهد 9 موازرين!
عيب.
إدارة المبر ذاتا كانت هميمة بالحاجات دي زمان ..
ما عارف الحصل ليها شنو؟

كامل التضامن معكم
]

شكرا احمد عمر ..

Quote: فوق لدعم إخوتنا في الخرطوم 3 ليستعيدوا حقهم..

مشكور علي الدعم والموازرة ..
د

سلام فريدة ..

Quote: انت بتقصد نادي الاسرة ام حديقة القرشي؟ طبعا الاثنين استبح حماهم وسدت منافذ الرئة التي يتنفس بها سكان الحي بالمباني والتمليك في هذين المتنفسين

اقصد النادي ... وهذا لا يمنع أن حديقة القرشي أصابها ما اصاب النادي وان كانت الحديقة مصيبتها أفظع ..

مشكور ود العام خالد العبيد ...

Quote: فوق لدعم إخوتنا في الخرطوم 3 ليستعيدوا حقهم..

سلام عثمان موسى ...

Quote: والله يا أخ ناذر مع كتير احترامي ليك ولي أهلنا في 3 .. سلمية لا .. الموت الاحمر ولا النادي ..

يا زول روق ما تكتلنا وتكتل أولاد الحلة ساي الفضلنا كلنا ما نملا دفار لو كشونا ..!!

ما تنس في بلان بي وبلان سي ....!!

....
...

Quote: ما تنس في بلان بي وبلان سي ....!!

...

وهو كدلك يا عزيز
...
..راكمو الطاقات ....وجمعوا القدرات ... و عددوا البلانات ...
...
رغم الظلام و الظالمين ما زالت المشاعل و الشموع ممسوكه باياديكم وحتي نهاية النفق والنفاق
...
...شدو حيلكم


و الله مافي زول حيغير ليكم حياتكم الا انتو
...
...و لو زاتو ......جا زول قولو ليهو ما دايرين
...
........
......

مشكور كتير أخونا عثمان رضوان ...

Quote: الأخ ناذر تحياتي تربطني بهذا الحي ذكريات عطرة .. فقد كنت من قاطنيه لفترة خلت. تم إنشاء نادي الأسرة في ميدان عبدالمنعم ( عبدالمنعم محمد) . رجل البر والإحسان‘ رحمه الله. وغرب الميدان كانت مدرسة عبدالمنعم وجامع عبدالمنعم، وسوق عبدالمنعم، وقهوة البرابرة ومحطة (عشرة دقايق). كانت في الميدان عدة ميادين لكرة القدم ، وكانت تقام به إحتفالات المولد النبوي الشريف، الذي تم نقله إلى ميدان الليق بالحلة الجديدة، وهو أيضاً قد تم عليه الإعتداء السافر. قصدت من الإشارة إلى المرحوم عبدالمنعم محمد لنرى فيم كان الناس ينفقون عمرهم القصير، وكيف أصبح هؤلاء يهدرون عمرهم القصير. شتان بين أن تنفق عمرك في خدمة المجتمع وتقدم لآخرتك، وبين أن تهدره في مصلحتك الضيقة غير عابئ بمجتمعك وناسيا لآخرتك. مطلبكم مشروع .. وندعمكم بقلوبنا ودعواتنا .. وهذا أضعف الإيمان. وفقكم الله ..

ألا رحم الله رجل البر والاحسان عبد المنعم محمد ذاك المحسن حياه الغمام ..
أنظر كم ترك من ورائه .. ميدان عبد المنعم مسجد عبد المنعم مدارس عبد المنعم ... والكثير الكثير ..

مشكور على المداخلة أرجو منك مراجعة بوست خالد الحاج أعلاه ..

بتدفعوا للمشارك في الوقفة الاحتجاجية من غير أبناء الحي كم ؟

سلام عما د ...

Quote: سلام نازر واهم حاجة ترجع النافورة من طولها كنا نشاهدها من السكة حديد دي كانت اكبر نافورة في العالم الله معكم

يا سلااااام يا الشبلي ...

فعلا كانت أروع نافورة والله .. وبرضو مسرح حوض السباحة وغنو فيهو عمالقة الفنانين محمد وردي وزيدان ابراهيم وود الامين وابراهيم عوض وعثمان حسين وغيرهم ..

نتمنى أن تعاد لنادينا هذا سيرته الاولى ..

مثله مثل كثير من الميادين والمباني التي تغول عليها الغول الانقاذي
والغيث في اولو قطرة
معكم من اجل استرداد النادي وارجاعه الى اهله

وحقيقة يا نازر حال حديقة القرشي وما الت اليه كما رايت في اخر زياراتي للسودان في يناير
حالة مزرية ومحزنة وبدل ان تكون متنفس اصبحت كاتمة على نفس الحي
ولكن كما قلت الغيث في اولو قطرة

كل التضامن مع اهلنا وجيرانا فى الخرطوم 3 لسترداد حقوقهم فى نادى الاسرة
من الحرامية والمجرمين واصحاب الاستثمارات الخاصة





كسرة :
يا ناذر بالله عليك سلم لي سلام خاااص لى وحيد بتاع الايسكريم
ياخى لسة هو موجود فى مكانوا داك ولا رحل كما رحل كل شي جميل ومعالم جميلة فى الخرطوم 3 و 2 ؟

دقيقة يا محمد علي ..

هولد أون بليس ...!!!

Quote: كامل التضامن مع اهلنا في نمرة ثلاثة، انها من اوائل وفغات حملة ارحل

تضامنك قبلناهو لكن الوقفة دي ما عندها علاقة بي أرحل لا من قريب لا من بعيد ..

ما في شي بيغطس حجر الوقفات المطلبية الا تقديمها للاعلام بعد الباسها ثوب السياسة والنضال والمناتلة ...!

دايرين نادينا يرجعوهو لينا وخلاص ...!

Quote: دايرين نادينا يرجعوهو لينا وخلاص ...

ناديكم ده قلعوا منكم متين يا ناذر؟؟

لانه شائف اليومين دي مع حملة ارحل في تحركات كثيرة مطلبية

ديل القلعوا كثير و ما برجع الا يرحلوا.

مشكور محمد طه الملك ..

Quote: شينه منكم يا عضوية سودانيز .. معقول ! نحن عضويتنا بالالاف يطلب منكم زميل مؤازرتهم بحرفين بس أ ب تتكاسلو؟ 800 مشاهد 9 موازرين! عيب. إدارة المبر ذاتا كانت هميمة بالحاجات دي زمان .. ما عارف الحصل ليها شنو؟

اهو أنتو جيتو وما قصرتو .. الباقين عذرهم عندهم ..

الفاتح علي التوم ..

Quote: كامل التضامن معكم

مشكور يا زعيم ..

تسلم يا هولولي ..

Quote: وهو كدلك يا عزيز ... ..راكمو الطاقات ....وجمعوا القدرات ... و عددوا البلانات ... ... رغم الظلام و الظالمين ما زالت المشاعل و الشموع ممسوكه باياديكم وحتي نهاية النفق والنفاق ... ...شدو حيلكم و الله مافي زول حيغير ليكم حياتكم الا انتو ... ...و لو زاتو ......جا زول قولو ليهو ما دايرين

شكرا نادر المشارك من الفيس بوك ..

Quote: Nader Elrokbi · جامعة بونا الهند حسبي الله ونعم الوكيل من أقدم النوادي وكنا نلعب به كرة القدم في الدورات المدرسية وقد كان الدخول زمان بالعضوية والأسر تتعارف وكل من يعرف الخرطوم جيداً سوف يبكي علي ضياع هذا النادي العريق الذي لدينا به زكريات جميلة المشكلة أن من يملك القلم لايدري عن الخرطوم شياً لذلك طالبنا بأن يولي علي الخرطوم أبنائها فهم أدري بها ويحترمون سكانها القدام

سلام هاني ..

Quote: بتدفعوا للمشارك في الوقفة الاحتجاجية من غير أبناء الحي كم ؟

لمن النادي يرجع لينا انشاء الله حا نخليهو يسبح في النافورة الجديدة مجانا لمدة اسبوعين ..

سلام علي الفكي ..

Quote: وحقيقة يا نازر حال حديقة القرشي وما الت اليه كما رايت في اخر زياراتي للسودان في يناير حالة مزرية ومحزنة وبدل ان تكون متنفس اصبحت كاتمة على نفس الحي

الناس هجرتا من بدري والله ...

سلام وضاحة ...

Quote: يا ناذر بالله عليك سلم لي سلام خاااص لى وحيد بتاع الايسكريم ياخى لسة هو موجود فى مكانوا داك ولا رحل كما رحل كل شي جميل ومعالم جميلة فى الخرطوم 3 و 2 ؟

لسع موجود ومحلو زي ما كان زمان قبل خمسة وعشرين سنة .. ما طور نفسو .. والناس خلتو لانعدام المواكبة ..

نقف بكامل مع حقوق
لأهلنا في الخرطوم (3) وأصدقائنا هناك
ونسنجهر هذا المطلب لحين تعود لأهالي الخرطوم (3) حقوقهم كاملة دون نقصان

كامل التضامن مع اخوتنا فى نمرة 3 حتى يستعيدوا حقوقهم المسلوبة ..
تحياتى يا ناذر وربنا يعينكم ..

ازيك يا ناذر

كيف الحال

أنا برجع بيكم لزمان شديد

قبل ما يقوم النادى
وايام لسه كان ميدان مولد، وميدان عبد المنعم

وكشك عمك دهب بتاع الفول والطعمية فى الميدان

وشمال الميدان تماما بيت ناس عمك "بر" واولاده ناس هاشم بر والباقين
وبرضو فى النواحى ديك ناس "تُلب"

كان فى صيدلية ملاصقة بيت ناس بر بتاعة اهلنا الأقباط
نسيت اسمها والله

ما تقول أنا كبير وعجوز لأنه الفترة ديك كنا اطفال عديل والله تقريبا فى بداية المرحلة الإبتدائى

كنا بنجى مره مره العصريات نلعب او نتفرج فى الدافورى

كنا ايام الاجازات بنجى مع عبده الحاج او عبده بوكاسا الله يرحمه ويتقبله

وبيوت اهلنا فى المثلث القدام القسم الجنوبى مباشرة مع ناس عمك ابوزيد صاحب مطبعة التمدن
وجيرانا برضو ناس القوصى وقريب مننا خلوة شيخ محمد

ايام والله

حضرت ايام كان التمساح المحنط معلق فى مدخل القسم الجنوبى يا ناذر ؟


ههههههههههههه

ناذر
تحياتي

متضامنين معاكم، لكن كمان عندي أسئلة:

ملكية النادي بتاعة منو بالتحديد
وبجانب الوقفة هل في جهد قانوني
الوقفة هدفها شنو (يعني مثلاً تعريف بالقضية ولا عندها أهداف تانية)؟؟؟


الأسئلة دي يا ناذر عشان نستفيد من الخبرات وندير حوار حول العمل الاحتجاجي المطلبي.

وبالتوفيق ليكم وللمشتركين في الوقفة

أخي ناذر نادي الأسرة لم يكن الأول ولن يكن الأخير في الحملة المنظمة لنهب ممتلكات أهالي الخرطوم، أنه عطاء من لا يملك لمن لا يستحق، أنظر إلى جهات الولاية الاربعة المواطنين يضجون من سلب حقوقهم وعلى عينك يا تاجر. أغرب شيء الخرطوم الولاية الوحيدة يمكن التي لم يجدو لها والياً من أبنائها.
نتضامن مع سكان الخرطوم 3 لاسترداد نادي الأسرة.

الأخ ناذر
لك التحية وأنت تتقدم الصفوف في هذا الأمر الذي هو جزء مهم من مكونات الترابط الأسري لهذا الحي العظيم ، وأرجو أن تتواصل هذه المهمة بكل الطرق المشروعة والقانونية لإبقاء هذا الحق في أيدي أهله وملاكه.فان لهذا الحي ( الخرطوم 3 ) مكانة خاصة في قلبي ، فقد كان وما زال يضم بين جوانحه أهل البر والتقوى والصلاح. وقد كنت منذ مطلع السبعينيات كثير الترددعلى دار والدنا الراحل الرجل الورع الصالح الخليفة المكي الحنفي عليه رحمة الله ،( شمال نادي الأسرة) ، وقد كان هو والوالدة رابعة وأشقائي بالدار يفرحون بقدومي وزيارتي . وأصبحت عضواً غير مقيم منذ ذلك الوقت بالحي ،وليس ذلك فحسب فقد جاد علي الحي بواحد من أعظم أصدقاء حياتي وعمري ألا وهو الباشمهندس الخليفة مختار مكي ، والذي ورث مقام والده كرجل بر وإحسان وتعميراً لمساجد الله وتشجيعاً لحفظة كتابه الكريم في المسجد الذي بنيى حيث كان يتعبد والده عليه رحمة الله . ولذلك فنحن مثلكم لنا ذكريات عطرة تربطنا بهذا الحي ، وعرفنا فيه إناس لو إحتفلت الدنيا ما تزينت إلا بهم .وأضم صوتي اليكم مناشداً كل من أراد أن يضع يده في حق ليس له فليرفعها ، إن أراد لنفسه منفعة الدنيا والآخرة فليعرض عن هذا. فقد أخبرنا المولى عز وجل أنه يعاقب الناس بذنوبهم ، وليعلم أن الصالحين الذين عمروا هذا الحي ، وإن رحل بعضهم فان دعواتهم تظل سارية إلى يوم ملاقاة الرب . وليتذكر الجميع أن آخر آية أنزلها سبحانه وتعالى على خلقه ، ( إتقوا يوماً ترجعون فيه إلى الله ) اللهم أحفظ أهلنا في الخرطوم 3وفي سائر بلاد السودان من كل مصيبة ومكروة ، آمين يا رب العالمين
مختار البكري
الولايات المتحدة

السلام عليكم ..

اسف للانقطاع وساعود للرد عليكم .. ولكن حدثت عدة تطورات اوجزها فيما يلي ..

دعت اللجان الشعبية الثلاث الموجودة في الخرطوم ثلاثة لاجتماع هام لاهالي وسكان الخرطوم تلاتة امس ليلا .. كان الحضور مشرفا وتحدث فيه عدد من المخضرمين
عن تاريخ النادي واصرارهم على اعادته لسيرته الاولى .. وكان اللافت ان المتحدثين تحدثوا حديث الصراحة وذكرو اسماء المسئولين الذين تسببو في ما وصل اليه حال
النادي بالاسم ومنهم المتعافي و رئيس الجمهورية ذات نفسه ..

بعد نقاش مستفيض تم تكوين لجنة تسيير للتحدث مع ادارة النادي الحالية التي تتبع لهيئة البراعم والناشئين واسترداد الحق المسلوب كما تم ااقبول بمقترح تكوين لجنة قانونية
ولجنة اعلامية لتنوير الاهالي بمسار التفاوض لحظة بلحظة ..

اتضح من حديث وتعقيب البعض ان الجميع مستعد لخوض معركة قانونية طويلة الامد من اجل استعادة نادي الاسرة لأن هنالك فقرات في قانون الحكم المحلي المعمول به تثبت حق الاحياء التي تقع على ميادين ونوادي
بالانتفاع منها وتبعية ادارتها للجان الشعبية مباشرة ..

وسنفيدكم بالتطورات أول باول ..

مشكور للتضامن اخونا عادل البراري .

Quote: نقف بكامل مع حقوق لأهلنا في الخرطوم (3) وأصدقائنا هناك ونسنجهر هذا المطلب لحين تعود لأهالي الخرطوم (3) حقوقهم كاملة دون نقصان

مشكور أخونا علاء سيد احمد ..

Quote: كامل التضامن مع اخوتنا فى نمرة 3 حتى يستعيدوا حقوقهم المسلوبة .. تحياتى يا ناذر وربنا يعينكم ..

هلا أبو ذر ..

Quote: ازيك يا ناذر كيف الحال أنا برجع بيكم لزمان شديد قبل ما يقوم النادى وايام لسه كان ميدان مولد، وميدان عبد المنعم وكشك عمك دهب بتاع الفول والطعمية فى الميدان وشمال الميدان تماما بيت ناس عمك "بر" واولاده ناس هاشم بر والباقين وبرضو فى النواحى ديك ناس "تُلب" كان فى صيدلية ملاصقة بيت ناس بر بتاعة اهلنا الأقباط نسيت اسمها والله ما تقول أنا كبير وعجوز لأنه الفترة ديك كنا اطفال عديل والله تقريبا فى بداية المرحلة الإبتدائى كنا بنجى مره مره العصريات نلعب او نتفرج فى الدافورى كنا ايام الاجازات بنجى مع عبده الحاج او عبده بوكاسا الله يرحمه ويتقبله وبيوت اهلنا فى المثلث القدام القسم الجنوبى مباشرة مع ناس عمك ابوزيد صاحب مطبعة التمدن وجيرانا برضو ناس القوصى وقريب مننا خلوة شيخ محمد ايام والله حضرت ايام كان التمساح المحنط معلق فى مدخل القسم الجنوبى يا ناذر ؟ ههههههههههههه

والذكريات صادقة ونبيلة ..

Quote: حضرت ايام كان التمساح المحنط معلق فى مدخل القسم الجنوبى يا ناذر

ابدا والله .. أنا مما فتحت في الدنيا ما قابلني غير تمساح واحد شايفو من أنا صغير وهو التمساح العشاري القاعد في حوض معرض الخرطوم الدولي واظنو قاعد لي يوم الليلة
وما عارفو داك تمساح محنط بالجد ولا منحوت .. لكن اهو القابلني ,, غيرو الا يكون التمساح اللاكوست القدر الضب بتاع أمواس الحلاقة داك ..

سلام الصادق اسماعيل ..

Quote: متضامنين معاكم، لكن كمان عندي أسئلة: ملكية النادي بتاعة منو بالتحديد وبجانب الوقفة هل في جهد قانوني الوقفة هدفها شنو (يعني مثلاً تعريف بالقضية ولا عندها أهداف تانية)؟؟؟

أمبارح من خلال السرد التاريخي بتاع اعمامنا الكبار .. تكلم واحد من كبارات الحي وهو مهندس .. قال في السبعينات جاتم أوامر بالتخطيط لي مشروعين مهمين هم مشروع
سوبا الزراعي ونادي الاسرة وانهم عملو في المشروعين ووضعو الخرائط والتصاميم الاولية . العمل كان باشراف مباشر من اللواء قلندر وبخبرات روسية اسهمت في وضع وتعديل التصاميم
وقام بالتنفيذ عدد من المقاولين في الحي ..

في الاول النادي كان بيتبع لي وزارة الشباب في عهد مايو وبعد داك تنقل لي كم وزارة منها الشباب والرياضة والشئون الاجتماعية وغيرها ..

سنة 1995 حصلت المشكلة وهي انو الرئيس عمر البشير في خطاب جماهيري في كوبر منح هيئة البراعم والناشئين حق التصرف في النادي .. وفي ناس من الحي عارضو القرار وتم تعديل القرار
الى تخصيص جزء من مساحة النادي للهيئة .. وبعد داك ناس الحي عارضو القرار بالاستعانة بقانون الحكم المحلي البيقول انو اي مساحة خالية او ميدان او نادي تتبع للجان الشعبية في الحي مباشرة لأدارتا
والوزارة ما عليها الا الاشراف ودفع مرتبات العاملين ..

المهم الوضع استمر الى ما هو عليه والنادي تحول لي كم حاجة منها مقر لمكاتب الامن وبعد داك مقر لتدريب قادة المؤتمر الوطني وبعد داك مقر لتاشيرات العمرة وبعد داك مقر اتوزيع الاغاثة
وفي مرحلة من المراحل جهة ما معروفة قرمت من الاطراف وعملت مباني اجرتا جامع وجهة تانية عملت مباني اجرتا صالة افراح ولا زال التقريم مستمر ..

شكرا فاطمة الحاج ...

Quote: أخي ناذر نادي الأسرة لم يكن الأول ولن يكن الأخير في الحملة المنظمة لنهب ممتلكات أهالي الخرطوم، أنه عطاء من لا يملك لمن لا يستحق، أنظر إلى جهات الولاية الاربعة المواطنين يضجون من سلب حقوقهم وعلى عينك يا تاجر. أغرب شيء الخرطوم الولاية الوحيدة يمكن التي لم يجدو لها والياً من أبنائها. نتضامن مع سكان الخرطوم 3 لاسترداد نادي الأسرة.

والجملة التحت دي مهمة جدا :

Quote: أغرب شيء الخرطوم الولاية الوحيدة يمكن التي لم يجدو لها والياً من أبنائها.

عشان كدة ما في والي بيهمو البيحصل في الخرطوم طالما هو حا يقضي فترتو ويمشي ..
واتضح من سرد الامس انو اسماعيل المتعافي يتحمل كامل المسئولية عما آل اليه حال النادي عندما كان واليا للخرطوم ..

سلام استاذ مختار البكري ..

Quote: الأخ ناذر لك التحية وأنت تتقدم الصفوف في هذا الأمر الذي هو جزء مهم من مكونات الترابط الأسري لهذا الحي العظيم ، وأرجو أن تتواصل هذه المهمة بكل الطرق المشروعة والقانونية لإبقاء هذا الحق في أيدي أهله وملاكه.فان لهذا الحي ( الخرطوم 3 ) مكانة خاصة في قلبي ، فقد كان وما زال يضم بين جوانحه أهل البر والتقوى والصلاح. وقد كنت منذ مطلع السبعينيات كثير الترددعلى دار والدنا الراحل الرجل الورع الصالح الخليفة المكي الحنفي عليه رحمة الله ،( شمال نادي الأسرة) ، وقد كان هو والوالدة رابعة وأشقائي بالدار يفرحون بقدومي وزيارتي . وأصبحت عضواً غير مقيم منذ ذلك الوقت بالحي ،وليس ذلك فحسب فقد جاد علي الحي بواحد من أعظم أصدقاء حياتي وعمري ألا وهو الباشمهندس الخليفة مختار مكي ، والذي ورث مقام والده كرجل بر وإحسان وتعميراً لمساجد الله وتشجيعاً لحفظة كتابه الكريم في المسجد الذي بنيى حيث كان يتعبد والده عليه رحمة الله . ولذلك فنحن مثلكم لنا ذكريات عطرة تربطنا بهذا الحي ، وعرفنا فيه إناس لو إحتفلت الدنيا ما تزينت إلا بهم .وأضم صوتي اليكم مناشداً كل من أراد أن يضع يده في حق ليس له فليرفعها ، إن أراد لنفسه منفعة الدنيا والآخرة فليعرض عن هذا. فقد أخبرنا المولى عز وجل أنه يعاقب الناس بذنوبهم ، وليعلم أن الصالحين الذين عمروا هذا الحي ، وإن رحل بعضهم فان دعواتهم تظل سارية إلى يوم ملاقاة الرب . وليتذكر الجميع أن آخر آية أنزلها سبحانه وتعالى على خلقه ، ( إتقوا يوماً ترجعون فيه إلى الله ) اللهم أحفظ أهلنا في الخرطوم 3وفي سائر بلاد السودان من كل مصيبة ومكروة ، آمين يا رب العالمين مختار البكري الولايات المتحدة

بالامس وردت سيرة الخليفة الصالح الخليفة المكي وابنائه كثيرا في مستعرض مسيرة الحي والنادي .. اذ كان من الأوائل الذين عملوا بجهدهم ومالهم في تعمير وانشاء النادي ومع أل معلا وال جابر ابو العز والكثيرين من اعيان الحي .. رحمهم الله كثيرا
فقد اعطوا ومنحو ولم يستبقوا شيئا ..

جزاك الله خيرا ..