طير المغارب فات قبيل

طير المغارب فات قبيل


03-18-2015, 12:50 PM


  » http://sudaneseonline.com/cgi-bin/sdb/2bb.cgi?seq=msg&board=480&msg=1426679439&rn=0

Post: #1
Title: طير المغارب فات قبيل
Author: أبوذر بابكر
Date: 03-18-2015, 12:50 PM

11:50 AM Mar, 18 2015
سودانيز اون لاين
أبوذر بابكر-
مكتبتى فى سودانيزاونلاين



زى عطش السنابل الخايفه
منتظره المطر
وزى وجل البيوت الواقفه
فى حر السنين
متكيه فى ضل الشدر
وروح المويه ديك
القوّمت نفس البحر
وزى شغف القمرا
بى طعم السهر
فكرت اجيك
طارى السفر
وقفت فى صف الحلم
مضارى بى حيطة الضجر
ختيت زوادتى مع غناى
صريتا فى طرف الهدم
وطير المغارب فات قبيل
خلانى واقف ما انتظر

فكرت اجيك
وقعدت انده فيك براى
اعاين فى الدروب الحارنه
عدمانه الأتر
والعيون مليانه شوف
إلا الدروب فارشه الطشاش
القلوب متروسه خوف
عطشانه مشتهيه الرشاش

فكرت اجيك
وامرق براى
اشد خيل شوقى ليك
واشد حيل مسدارى بيك
وكل ما افضٍّى ماعون همى
من مغسة اساى
من شلهتة الأمانى
الساكنه فى دمى
يعصى الحنين أمر المروق
يملاها تانى يعبى
شريان هناى مفقود
ضل طريقو لى قلبى
منقد بكاى موقود
خات نيرانو فى عِبّى
تيه السنين موعود
كتَّف محطات سفرو فى دربى
وجع البعاد راقد حداى
جوه القليب متخبى
يا مطرة خريف الشوق
فِجى العوارض صُبى
يا فرحة الحلم الزمان
قومى وتعالى انسربى
جيبى معاكى طعم العيد
ومن جيهة غيابك شِبّى
سمِّعى سورة الريد والحنان
وامسحى لوح مواجعك اكتْبى



زمان سنة كم وتمانين
Post: #2
Title: Re: طير المغارب فات قبيل
Author: عبدالعزيز عثمان
Date: 03-18-2015, 01:03 PM
Parent: #1

Quote: 1مايا فرحة الحلم الزمان
قومى وتعالى انسربى
جيبى معاكى طعم العيد
ومن جيهة غيابك شِبّى
سمِّعى سورة الريد والحنان
وامسحى لوح مواجعك اكتْبى
اها يالحبيب
من كم وتمانين ماسك الدرب ساساق تطارد في العشم..
غايتو ان شاء الله قبال نشد الرحال لهجرتنا النهائية
نشوف مرة فد واحدة ،،،ابق ضي الزمن السمح،،،حلم
نعيش له.
Post: #3
Title: Re: طير المغارب فات قبيل
Author: أبوذر بابكر
Date: 03-18-2015, 01:31 PM
Parent: #2

قصدك الدردره والشلهتة والبشتنة يا عبد العزيز ؟

والله كان ما اخاف الكضب

اظنها من أول يوم

أول يوم جينا فيه الى هذا الكوكب العجيب

ويمكن قبل كده كمان

تتذكر شكلة هابيل وقابيل ؟

لكين النضمى ده تحديدا

كان ايام الجرمان هدو وكسرو الحيطة البين برلين الفوقانية وبرلين التحتانية

فى نفس الأيام والله

كنا حاضرين الهوجة العجيبة ديك معاهم

النصيحة كسرنا معاهم برضو

إعمالا للمثل داك بتاع

دار ابوك كان خربت
شيلك فيها شليه

ولا كيف هو المثل

كيف اخبارك
Post: #4
Title: Re: طير المغارب فات قبيل
Author: أبوذر بابكر
Date: 03-18-2015, 01:41 PM
Parent: #2

معليش يا عبد العزيز

اتذكرت حاجة تانى بعد ما كتبت ليك

عارف

فى طير كده طوالى بكون طاير ساعة المغربية
قبل ما الدنيا تضلم شديد

طوالى قدر ما تعاين تلقاهو طاير ومسرع

كل يوم كنت بشوفه
وبتخيل انه مسافر وماش جهاتنا ديل

بقيت بحسده ليك

والله قربت اكرهو عديل

حصل شفتو ؟
Post: #5
Title: Re: طير المغارب فات قبيل
Author: عبدالعزيز عثمان
Date: 03-18-2015, 11:24 PM
Parent: #4

هو في طير في الدنيا دي
اخوك ما ناضمو
اييييك ياصاحب
حملتها اشواقي وحنيني للاهل
وهي تدور فوقي جهات بحيرة ملاوي
جهات زامبيا
وانا ارتجف عابرا الموزمبيق
واطير فوقي وانا اغنيه
ياطير ياطير
وانادي هجرات العصافير
في مواسم الاشواق والحنين
ثم امم من الطير في صحراء بلاد العرب
تمر مسرعة تبحث عن مستقر
الان ياصاحبي اري كل الطيور حولي
تبادلني اشواق وحنين
ويطل من الشباك كل صباح
عصفور جميل
يؤانس وحدتي....
وحدنا عرفنا كل طيور الارض
شممنا عطر جميع ازاهير الكون
تفيانا ظلال جميع اشجار الدنيا
ولكنا لم نجد ساعة من الوقت
لشرب من ليمون شجرة بدارنا
ما تانسنا ولو لصباح مع هديل حمام امهاتنا
ماشممنا عطر جهاتنا
فدائما نحن
بقجنا هي قرانا
توزعنا المطارات كل يوم
كن بخير ياجميل...
Post: #6
Title: Re: طير المغارب فات قبيل
Author: أبوذر بابكر
Date: 03-19-2015, 06:26 AM
Parent: #5

" target="_blank">
Post: #8
Title: Re: طير المغارب فات قبيل
Author: أبوذر بابكر
Date: 03-22-2015, 06:34 AM
Parent: #5

ريحة النيم نص النهار

عارف يا عبد العزيز

مرات كتيرة بكون حايم وماشى فى مكان
اقرب نيمه منه يمكن تكون على بعد آلاف الأميال

وبالرغم من كده
بتجينى ريحة شجر النيم

النيم عنده ريحة مميزة وما بتشبه باقى روائح الحاجات

جات من وين ؟

الله اعلم عاد

اما بخصوص الطير

دى كمان حكاية تانى براها

انت تكون جوه البيت
والقاسية بس تغمض عويناتك وتسرح

طوالى يجيك منظر الطيرتين الطايرات فى آخر العصرية وقبل المغارب بشويه

جايات من وين ماشات على وين ؟

برضو ما معروف

المهم بس مشهد ثابت ومتحرك فى نفس الوقت

ثابت فى تلالافيف وجخانين الذاكرة
ومتحرك فى صورته القدامك

انت عارف ده كله بكون من شنو ؟

من محاحاة الغياب ومدافرة المسافات اللئيمة دى

لكن اصبر لى ليهو

لو كان الغياب رجلا

كنت عملت ليك فيه عمايل عجيبة

قربت قربت

وموعدنا نهار النيم
Post: #7
Title: مرتين
Author: أبوذر بابكر
Date: 03-20-2015, 07:59 AM
Parent: #1

جربت طريقة اخونا كبر لتنزيل مقاطع الفيديو

شكلها شبه نجحت

لكن ليه المقطع بظهر مكرر أو مرتين ؟
Post: #9
Title: Re: مرتين
Author: أبوذر بابكر
Date: 03-30-2015, 09:41 AM
Parent: #7
Post: #10
Title: Re: مرتين
Author: د.محمد حسن
Date: 03-30-2015, 10:24 AM
Parent: #9

شكرا ابوذر بابكر

نص كانه كتب اليوم
Post: #11
Title: Re: مرتين
Author: أبوذر بابكر
Date: 03-30-2015, 01:15 PM
Parent: #10

عفوا يا دكتور محمد

نحن الإتغيرنا ولسه حنتغير زيادة

كل شى تانى زى ما هو
من يومنا الأول النزلنا فيه من الجنة

بمناسبة الجنة

هى فى السماء رقم كم تحديدا ؟
Post: #12
Title: Re: طير المغارب فات قبيل
Author: محمد كابيلا
Date: 03-30-2015, 02:28 PM
Parent: #1

Quote: فكرت اجيك
طارى السفر
وقفت فى صف الحلم
مضارى بى حيطة الضجر
ختيت زوادتى مع غناى
صريتا فى طرف الهدم
وطير المغارب فات قبيل
خلانى واقف ما انتظر


نص مليان حنية وشوق

لكــ التحية ...
Post: #13
Title: Re: طير المغارب فات قبيل
Author: أبوذر بابكر
Date: 03-30-2015, 02:34 PM
Parent: #12

تتملى ان شاء الله عافية وسعادة يا كابيلا

وفرح عميم ومقيم

قول آمين