خَبَار الشُّوم ... والفتى المأزوم

08:59 AM Mar, 15 2015
سودانيز اون لاين
ابو جهينة-السعودية _ الرياض
مكتبتى فى سودانيزاونلاين



إهداْ لكل قابضٍ على الجمر ، كل أنواع الجمر أينما كان

***

ما دام بِقِيتْ نُصَّ البحر واقف
ما يْهِم لو نزلْتَ أعُوم ..
خربانة خربانة ..
لا عُذْراً بَقَدِّم .. لا بَخَاف اللوم ..
و المُتْعَوِّد طُوُل السَّهر ..
على فَرْش الحرير بِغَلْبُو النوم ..
جاطتْ .. و هاصتْ
إخْتَلَط حابْل الهديل جوة نابِل نعيق البُوم
هاتي ال في و ال مافي
زيدي كوم همومنا رَدُوم ...
شِنْ بِسَوِّي خَبار الشوم للفتى المازوم ؟
لا جَرْحاً بِيَنْزِف يزيد نَتْح الألم
و لا فرحاً بِغَيٍّر طعْم الأسى المرسوم ..
واقف زى شَدَر الخريف شامخ ..
العروق جوة الأرض .. و الصَّفَق معدوم
بَشِقْ عتامير الضلام ..
و فوق جبال التِيهْ .. بازَاً هوايتو الحُوُم
عهداً قطعتو جوة النَّفِس ..
مهما كِتْرَنْ بَتَابْت القوم ..
لا بْتَسْمعي أَنَّةْ شِكَاية .. ولا صوت نواح مكتوم
خلي الوجع يِتْنَامَى .. و سيبي الحُزُن يطول وُيْدُوم
بيلْقُوني أنا ياني أنا .. زيْ ما كنتَ .. كُوم صَبُر مَرْدُوم

***