Post: #1
Title: شُخْباً صادف الرملة وخِتا الماعون
Author: على احمد النعيم
Date: 03-10-2015, 11:53 AM
10:53 AM Mar, 10 2015
Sudanese Online
على احمد النعيم-
My Library at SudaneseOnline
لقد ساقتنى قدماى ان أزور احد اصدقائى قد عاد قبل فترة من السودان
بعد ان امضى هو واسرته إجازتهم هناك لزيارة الاهل ومن ثم البدء فى
تنفيذ بعض من مقترحاتهم المستقبلية.
سألته ذلك السؤال المعتاد وليتنى ما سألته... !!
عليك الله الاجازة كانت كيف.. فردّ علىّ بامتعاض وحرقة شديدين قائلاً:
والله يا اخوى اجازتى كانت كأنها (شُخْباً صادف الرملة وخِتا الماعون)
واردف قائلاً عليك الله تانى ما تسعلنى وانا والله تانى ما سعلتو تب..
لكن ياربى مالو السنيح دا؟؟؟
كلنا يعرف الشُخب وهو ما يخرج من الضرع إذا أُحتلِب ... لكن عليكن الله
عاينو معاى لى شُخْب الزول دا مشى وين ؟؟؟
هل لا من مشا هناك انطبق عليهو المثل الشهير البقول (الصيف ضيّعتِ اللبن)؟؟؟
-------------
يا ود البوش ياخى مبروك على البنية وان شاء ربنا يحضرك جديد وليداتك كلهم.
ياخى افزعنى عليك ود حسونة ورنى المسنوح دا يكون مالو؟؟؟
وياناس الحوش كلكن ايدكن معاى عشان انا ماشى السودان قريب ومعاى شُخب شُخبين خايف عليهن
يروحن منى ويتلحن الرمال
ووحوح فى حضن الفتاة ضجيعها ** ولم يك فى النكد المقاليت مشخبُ
|
Post: #2
Title: Re: شُخْباً صادف الرملة وخِتا الماعون
Author: عبدالله ود البوش
Date: 03-11-2015, 05:30 AM
Parent: #1
هههههههههههه
ابو النعيم ود حمد مشتاقين ياخ
زولك قاليك البلد بقت شملة ود كنيزر هي تلاتية وقدها رباعي
| Quote: شُخْباً صادف الرملة وخِتا الماعون |
يعني كان حلبت مية بقرة واللبن ضرب الوطا بل الرملة كمان وختا الماعون يعني برة الجق
ههههههه
نبارك ليك جديد الوليدات يابا
شوق شديد وتحية واحترام
|
Post: #3
Title: Re: شُخْباً صادف الرملة وخِتا الماعون
Author: عبدالحفيظ ابوسن
Date: 03-11-2015, 05:49 AM
Parent: #2
لعل لبنه متخثرا يا علي
لعل بياض شخبه ابي وسخ الماعون وقال الواطة اخير من ماعنو
فيا علي
كن لأهلك كما تحب ان يكونوا لك
لازلنا بخير
امرق تعال ساي
|
Post: #4
Title: Re: شُخْباً صادف الرملة وخِتا الماعون
Author: عبدالعزيز عثمان
Date: 03-11-2015, 06:34 AM
Parent: #3
ياعلي اختي البنادر
دي ياها البدفق مويتك علي رهابا
شوف ترس جدك وين
بس جنبو
ارمي موجودك
جدعات واطة
مسقية ومرعية
ان ندم وله لبنك اشتت
مسعول انا..
|
Post: #5
Title: Re: شُخْباً صادف الرملة وخِتا الماعون
Author: ابو جهينة
Date: 03-11-2015, 12:54 PM
Parent: #4
تحياتي أخي علي
غايتو المثل دة: (شُخْباً صادف الرملة وخِتا الماعون) ، مثل غارق في مآلات المغتربين، إن لم يكونوا كلهم ، فأغلبهم
و أعتقد غير جازم بأنه يقصد بالمثل دة وكأنه ذهب للسودان بما أهرق عليه من غربته وكده وعرقه ، ثم غرق في دوامات إستهلكتْ كل الأخضر واليابس .
غايتو فعلا من الأحسن تاني ما تسأله
دمتم
|
|