Post: #1
Title: إنها الكوارع .. يا الله !!
Author: محمد حيدر المشرف
Date: 03-08-2015, 10:13 PM
Parent: #0
09:13 PM Mar, 08 2015
سودانيز أون لاين
محمد حيدر المشرف - دولة قطر
مكتبتي في سودانيزاونلاين
تلك العضاريف اللزجة ..
او لعلها تلك اللزوجة العضروفيه اللذيذة .. يا الله ياخ !!
مضى اليوم بخيره القليل وشروره الكثيرة بين العمل وما بعده من الشلهته ..
تطوعت بمساعدة الزملاء بالصيدلية الخارجية ..
تطوعت لله والرسول وأولئك المرضى المرصوصين في حزنٍ رهيب ..
أنا كما لا تعلمون اعمل بمشفى ل .. السرطان ..
كانت ساعة لله والرسول والاوفر تايم بالتأكيد ..
قضيتها وأنا تحت الحاح الجوع الرهيب .. و
ما ضقت لي لقمه من الصباح ..
طلعت من الشغل عند الرابعة ..
يا الله !!
نسيت مشوار الجوازات ..
جوازات دولة محترمه جدا لا "دق" فيها ..
ولا تشبه على الاطلاق قنصليات ذلك الوطن الحزين ..
عند السادسة ..
وتماما عند تمام ذلك الجوع الرهيب ..
وأنا قدام البيت تماما ..
اكتشفت انو اللستك القدام الشمال نازل !!
كانوا يعدون لي الغداء ..
وكنت أحاول محاولات جد فاشلة جدا في انتزاع اللستك الراسخ في قراره المكين و حلف ما يطلع !!
حللتهم صامولة صامولة وانت يا اللستك ابيت تطلع ..
شاهدي كان الاسبير الساكن جواري و عدة الشغل و تلك الصواميل المحلولة المنثورة حولي كما حبات الودع ...
تذكرت تلك الماكينة التي اشتريتها ذات فراغ ..
هي ذات تلك التي قد ترونها امام محلات البنشر ..
الا أنها اصغر بكثير ..
جلبتها وأوصلتها بكهرباء العربية ونفخت اللستك و ... تصدق نفخت !!
اولادي ينادوني في سيمفونية مشتركة أن الغداء جاهز ..
عصافير البطن تهرمن نداءاتهم كاجدع قطعة موسيقية على الاطلاق ..
في تلك اللحظة, اتخذت قرارا غريبا جدا ..
امشي اغير اللساتك أول وأجي اتغدى ..
المهم غشيت "الفاتمينات"* ورجعت عند العاشرة بلساتك جديدة وطلب فول وواحد كبدة واتنين كوارع ..
والاولاد نايمين اخدت لي دش كارب و ..
قمت دخلت المطبخ ..
سخنت الفول والكبدة في طوه واحدة في ذات الوقت الكانت فيهو الكوارع في المايكرويف ..
رصيت العدة وموضعت فحول الشطة الخدرا في الطرف الادني من صحن الفول والكبدة ..
ختيت الصينية أمام التلفاز وقمت كده على الكوارع ..
أفرغتها تماما -في سلوك بهيمي بامتياز- من فكرة لزوجتها الممتعة .
تراصت عضاريفها جميعها في طرف الصينية ..
بيضاء من غير روح أوطعم أو رائحة ..
ممزوجة بحلاوة لسعة فحول الشطة الحضراء ..
ولاعبة صاح مع مناولات الفول والكبدة ..
تذكرت قصيدة ياااابيض اللون !!
غسلت يدي من تلك اللزوجة بعدما إمتلأت بها روحي تماما ..
بلعت لي حبتين بندول ..
كتبت حولذا في سودانيز أونلاين وأسلمت قيادي للنوم ..
تصبحون على خير ..
* الفاتمينات مطعم سوداني في نواحي الجزيرة العربية ..
* باقي التعديلات بكرة باذن الله
*
|
Post: #2
Title: Re: إنها الكوارع .. يا الله !!
Author: Osman Musa
Date: 03-08-2015, 11:21 PM
Parent: #1
عزيزنا د / المشرف
سلام مطبوق ليك وللأسرة الكريمة .
كدي يا أخوي النسعلك وأنت الخبير صاحب الباع في ما تفعله الكوارع ال SUPER في الشرايين التاجية والركب .
وصحيح يا دكتور حبة ال LOVAZA الواحدة ممكن تمسح كلوسترول كراع تيس أملح ؟
وصحيح يا دكتور ال LOVAZA هي خشم بيوت ؟
تحياتي ومتابعين
|
Post: #3
Title: Re: إنها الكوارع .. يا الله !!
Author: يحي قباني
Date: 03-09-2015, 00:07 AM
Parent: #2
| Quote: كدي يا أخوي النسعلك وأنت الخبير صاحب الباع في ما تفعله الكوارع ال SUPER في الشرايين التاجية والركب |
قبال ما ارد على عثمان موسى ...
بالله يا ود المشرف طمنا عليك اول ما تصحى بالسلامة :)
___________________________________________________
صاحبي دكتور استشاري هنا يا عثمان ... مسمي الكوارع ( حقنة كلسترول في القلب )
اعمل حسابك ... العمر ليهو حقو برضو ... :)
لما كنا في العشرينات كنا كل جمعة في حلة كوارع مع صاحبنا رحمة الله عليه الصادق ربيع ( احسن من يعمل كوارع في السودان )
وحاتك اصابعك من شدة ما ملصقات الا جارك يفكفكهم ليك عشان تغسل ...
|
Post: #4
Title: Re: إنها الكوارع .. يا الله !!
Author: معاوية المدير
Date: 03-09-2015, 02:27 AM
Parent: #3
| Quote: وحاتك اصابعك من شدة ما ملصقات الا جارك يفكفكهم ليك عشان تغسل ... |
حاول محمد البيطري بعد ضرب العرقي ان يحظى بقطعة من الكوارع التي ظلّت تتملص من بين
صوابعه كالسحلية، فقال، والله يا صديّق بقرتك دي تقول جاية من موزمبيق بكرعيا، وأردف قائلاً
بعد ان تذكر لُزوّجة الكوارع، خضر مرّة ضرب كوارع ونام الصباح داير يكورك لبنتو غلبو يفتح خشمو.
صديّق قال ليهو، يا اخي ما تبالغ أصلو ما ممكن.
البيطري ردّ عليهو، والله العظيم، إلا كبولو في خشمو سِنر حتا فتح.
إن شاء الله تكون غسلّت خشمك يا دكتور.
هباني والمشرف، السلآم جاكم...
|
Post: #5
Title: Re: إنها الكوارع .. يا الله !!
Author: نادر الفضلى
Date: 03-09-2015, 04:20 AM
Parent: #4
Quote:
صاحبي دكتور استشاري هنا يا عثمان ... مسمي الكوارع ( حقنة كلسترول في القلب )
|
عشان كده من شروط أكلها تعقيها (جكة) تمرين ساخن فيتحول مفعولها (لحقنة منشطة)
وتبطل مفعول حقنة كلسترول فى القلب!
|
Post: #6
Title: Re: إنها الكوارع .. يا الله !!
Author: عبدالحفيظ ابوسن
Date: 03-09-2015, 04:31 AM
ود المدير هههه الله لا تاجرك ياخ هههه
تحياتي ود المشرف وضيوفه
تعرف كان عندنا واحد في كوستي احسن من زول قباني دة .. آي غلاط عديل كدة
حافر ليهو حفرة جمب البحر . ومدخل فيها زير . الصباح ينضف الضلافين ويعمل ليهن بهاراتن ويحشرن في الزير . ويقفل خشم الزير بالطين .. ويولع فيهن الحطب . حطب كتير خلاص .. ويجي راجع العصر يمرق الضلافين . ويختهن في طش ويشيلهم في راسو .. ويلف بيهن
نيييييفااااااااا ... علينا النيفا جاي
النيفة .. وبيتنا جمب البحر تالت عشرة منو
سماحة النيفة دي ماضوقتها .. الضلافين ينقرشن كلهن زي المشاش
|
Post: #7
Title: Re: إنها الكوارع .. يا الله !!
Author: محمد حيدر المشرف
Date: 03-09-2015, 07:54 AM
Parent: #1
هههههه ..
تذكرت الاغنية والله ..
حبايبي الحلوين أهلا جوني انا ما قايل..
ازيكم جميعا يا أيها القوم ..
وأما عن الكوارع فحدث ..
لا أعلم مدى الكلسترول في طلب الكوارع ولكن ..
هي مرة في كل عام ..
تناديك شهوة الكوارع فتشد رحالك "للفاتمينات"
ثم تعود ..
ثم "تضربها" زي الماحاصل حاجة ..
عموما ومن ناحية صيدلانية لا يحقن المرء من فمه على الاطلاق !!
لكم التحايا جميعا وكل الود ..
و واحد واحد ..
|
Post: #8
Title: Re: إنها الكوارع .. يا الله !!
Author: Asim Fageary
Date: 03-09-2015, 08:03 AM
Parent: #7
Quote:
هباني والمشرف، السلآم جاكم...
|
ود المشرف .. سلام مربع ليك وللقوم القايم من النوم
يا معاوية المدير هــبانــي الجابو هنا شنو ! إنت يا أخوي بتغبي بالسيرة بس ولو جابولك طلب الكوارع كنت سمت قباني شنو عليك الله
|
Post: #9
Title: Re: إنها الكوارع .. يا الله !!
Author: محمد حيدر المشرف
Date: 03-09-2015, 08:14 AM
Parent: #1
د. عثمان صباح/مساء الخير يا عزيزي ..
الاوميقا اتش ثري دي والتي تدعونها ال LOVAZA في الأرض الجديدة ..
فمعلوماتي عنها اناه تعمل على ال triglycerides باكثر من رفيقاتها من ال LDL و HDL..
ولا يكون لها اثرا علاجيا الا في جرعات عالية تبلغ 4 جرامات في اليوم الواحد (4 حبات من العندنا في الخليج) ..
أعجبني الإسم الذي تطلقونه عليها "LOVAZA"
كان ليكون أكثر عبقرية لو اُطلق على أحد أدوية العجز الجنسي من قبيلة السيالس والليفاترا والفياجرا !!
و ..فيهو نكهة مكسيكية .. اليس كذلك ؟!!
مودتي
|
Post: #10
Title: Re: إنها الكوارع .. يا الله !!
Author: محمد حيدر المشرف
Date: 03-09-2015, 08:29 AM
Parent: #1
قباني يا صديقي ..
وأما وقد دار محور سؤالك عنا في صبحية الكوارع هذه ..
فنحن بخير و الحمدلله ..
زمااان يا قباني كان تغيير اللستك الواحد ما بياخد معاك 5 دقائق ..
وكانت لساتك زمان بتنزل كل يوم ..
وكان تغييرها مجرد روتين يومي ..
ولا أريد أن أفصح عن تلك المعاناة الرهيبة التي صادفتني في تغيير اللستك أمبارح ..
لا وفشلت في تغييرو .. تصور !!
يا حليلنا يا قباني :)
|
Post: #12
Title: Re: إنها الكوارع .. يا الله !!
Author: معاوية المدير
Date: 03-09-2015, 08:42 AM
Parent: #10
Quote: يا معاوية المدير هــبانــي الجابو هنا شنو ! إنت يا أخوي بتغبي بالسيرة بس ولو جابولك طلب الكوارع كنت سمت قباني شنو عليك الله
|
كنت سميتو قبانيت مع الطلب. والله صحي...
|
Post: #11
Title: Re: إنها الكوارع .. يا الله !!
Author: محمد حيدر المشرف
Date: 03-09-2015, 08:40 AM
Parent: #1
| Quote: هباني والمشرف، السلآم جاكم... |
انها الكوارع يا عزيزي عاصم ..
ود المدير ده سمع سيرة الكوارع ومسكتو رجفة ذكرياتها وقااااام كده انداح ..
واندياحاتو ممتعة جدا ..
وهو زول حكاء بامتياز
انظر لمفارقة " السينر" ..
دي والله مفارقة عبقرية لا تأتي بها الا بداهة السودانيين !!
|
Post: #13
Title: Re: إنها الكوارع .. يا الله !!
Author: معاوية المدير
Date: 03-09-2015, 08:44 AM
Parent: #11
| Quote: تذكرت قصيدة ياااابيض اللون !! |
أصلك أكلتها بي صنفرة.
تحياتي للشاعر العملآق محيو...
|
Post: #14
Title: Re: إنها الكوارع .. يا الله !!
Author: محمد حيدر المشرف
Date: 03-09-2015, 08:46 AM
Parent: #1
نادر الفضلي ..
سلامات وكيف الحال يا صديق ..
تعرف !!
Quote: عشان كده من شروط أكلها تعقيها (جكة) تمرين ساخن فيتحول مفعولها (لحقنة منشطة)
وتبطل مفعول حقنة كلسترول فى القلب! |
المشكلة انو أغلب الظروف المحيطة بالكوارع ..
لا تسمح على الاطلاق بممارسة ال "الجكة" ..
وفي بعض الأحيان يكون غسل الأيادي مشكلة حقيقية يا عزيزي :)
|
Post: #16
Title: Re: إنها الكوارع .. يا الله !!
Author: Asim Fageary
Date: 03-09-2015, 09:01 AM
Parent: #14
Quote:
المشكلة انو أغلب الظروف المحيطة بالكوارع ..
لا تسمح على الاطلاق بممارسة ال "الجكة" .. |
أنا ذاتي من قبيل ما قادر إتخيل الجكة بعد الكوارع دي كيف .. هو الواحد كان قدر فتح عيونه يكون ما قصر
وخصوصاً لو معاها الشطة بتاعت الاتي
|
Post: #21
Title: Re: إنها الكوارع .. يا الله !!
Author: tabaldy
Date: 03-09-2015, 09:18 AM
Parent: #14
| Quote: حافر ليهو حفرة جمب البحر . ومدخل فيها زير . الصباح ينضف الضلافين ويعمل ليهن بهاراتن ويحشرن في الزير . ويقفل خشم الزير بالطين .. ويولع فيهن الحطب |
كويس إنا وقفت علي الدخان يا ود أب سن
بس في الإنقاذ في بيت بظبطوا كوارع،، شوف عيني لقيت ناس ألعاب القوى هناك معسكرين في إطار إعدادهم لي مشاركة خارجية
سلام للجميع
|
Post: #15
Title: Re: إنها الكوارع .. يا الله !!
Author: محمد حيدر المشرف
Date: 03-09-2015, 08:58 AM
Parent: #1
| Quote: نيييييفااااااااا ... علينا النيفا جاي |
ههههه ..
تذكرت, يااا ود ابسن, تذكرت مسألة ضبط المصطلحات ..
وحيرتني مسألة تسمية الكوارع بالنيفه ..
وما علاقة ذلك براس النيفه المعروف .
ومن أين أتت هذه التسميات على اية حال :)
تسلم يا صديقي وشوقتنا تماما لقرمشة تلك ال نييييفاااااا
|
Post: #17
Title: Re: إنها الكوارع .. يا الله !!
Author: محمد حيدر المشرف
Date: 03-09-2015, 09:06 AM
Parent: #1
بالله شوفو المساخة ..
| Quote: أصلك أكلتها بي صنفرة |
يعني اختصرت على قولي بالسلوك البهيمي ةما أدراك في كلمة وااااحدة !!
|
Post: #18
Title: Re: إنها الكوارع .. يا الله !!
Author: فتح العليم محمد أبوالقاسم
Date: 03-09-2015, 09:09 AM
Parent: #1
تحياتي
فحوي الموضوع جميل
ولكن اسمح لي صراحة لله كدا لغته لاتشبه كتابات ودالمشرف .
مودتي
|
Post: #19
Title: Re: إنها الكوارع .. يا الله !!
Author: Asim Fageary
Date: 03-09-2015, 09:15 AM
Parent: #18
يا فتح العليم .. سلام مربع
ود المشرف دا مثقف عضوي (تفاعلي) يتفاعل مع التفاصيل اليومية للمجتمع بشكل طبيعي خالي من الرتوش
إنت قايله زول معلب ولا شنو
|
Post: #20
Title: Re: إنها الكوارع .. يا الله !!
Author: محمد حيدر المشرف
Date: 03-09-2015, 09:18 AM
Parent: #1
فتح العليم سلامات وكيف الحال ..
أردد كثيرا اننا لا نكتب الا ذواتنا في هذا الاسفير ..
وبالضرورة لا نكتب الا بايدينا ..
نشييييل من ذواتنا ونخت ونخط في هذا الفراغ المشحون بالانسنة والانسانيات والمعارف والعلوم ما خطر وما لم يخطر على قلب بشر ..
ما اللغة في نهاية المطاف !!
أكتب بالفة شديدة تجاه أصدقاء .. ويكاتبني الأصدقاء
تلك لغة ذات مقام رفيع والله ..
مودتي ..
|
Post: #22
Title: Re: إنها الكوارع .. يا الله !!
Author: عبدالحفيظ ابوسن
Date: 03-09-2015, 11:33 AM
Parent: #20
مرحب تبلدي
غايتو قالوا لغاويسا دي بتنفع الركب .. لكن قرقيش العضام ومص المخ بزيد الكسترول .. الزول دة انا بتذكرو طفل صغير .. وكانت الحياة ضنينة .. اشتهي نيفتو ويعوزني المال . ولامن الم فيها ما يفضل لي الا اسف باقي العضم .
قالوا الضيف اتلهم العضم الماكن . وبعد كمل لحمتو .. قرش دنقوس العضم .. وقبل علي المخ .. يمص فيهو .. يديهو دقة علي كراع العنقريب ويمص فيهو .. وسيد البيت ممغوس منو
دق العضم واداهو مصة ورفعو زي المنظار المكبر حق افلام الكابويات وصر عين وبقا يعاين جواهو . داير يشوفو كمل ولا فيهو باقي
سيد البيت قال ليهو
عليك الله هسة بتصرصر في اضيناتك الجحر دة بدخلك
|
Post: #23
Title: Re: إنها الكوارع .. يا الله !!
Author: ياسر منصور عثمان
Date: 03-09-2015, 01:12 PM
Parent: #1
اخوي الاصغر محمد ود المشرف
ذكرتنا ايام كوارع عمك فؤاد وما ادراك ما كوارع عمك فؤاد وايام كوارع عمك فؤاد
ويالها من ايام
دم بخير
|
Post: #24
Title: Re: إنها الكوارع .. يا الله !!
Author: ودقاسم
Date: 03-10-2015, 08:49 AM
Parent: #23
محمد المشرف ... حمدا لله على السلامة
من أواخر السبعينات لم أتناول طلب كوارع من مطعم أو ست كوارع
كان أستاذنا يسكن قريبا منا ونحن عزابة.. وكنا بنجيب الكوارع ولزومياتها من كل صاحبة تخصص
وكانت تأتينا صينية عشاء من بيت الأستاذ .. فيها الفول والبيض المسلوق وأحيانا دمعة
كان الأستاذ ( يدفر) الصينية ناحيتي ويقول اكل الصينية دي يا ودقاسم وأوعك تهبش الكوارع
وكنت قبل سنتين أتحاور مع سائق يعمل مهنا بالشركة .. كان ممتليء الجسم .. شكوت له (القاوت )
فقال لي : عليك بالكوارع يا استاذ
قلت هو لحم وهذا المرض ينتج عن تناول اللحوم واالبقوليات
قال : يا أستاذ اللحم بروتين والكوارع حاجة تانية خالص
بقي أن تعلم أنني آكل الكواره المعمولة في البيت ، حيث أن حرمنا طاهية ماهرة ، النوع البيعمل من الفسيخ شربات
وفي مرة كان معنا نجار في البيت، وحان موعد الغداء وكنت يومها قد طلبت كوارع على الغداء ، وقد كرهت زوجتي أن تقدم لي الكوارع
في حضور الضيف .. وبدأت تعاتبني على اختيار للكوارع في ذاك اليوم .. فسألت النجار
- ياخينا كيف لو الغدا كوارع
- جبتها من وين؟
- شغل بيت
- والله ؟
- أيوة
- جيب ياخ ، هو في أحسن من الكوارع
|
|