|
ادعوا لاخوكم بالثبات فانا ذاهب الي قنصيلة جدة للجواز الالكتروني
|
05:14 AM Mar, 08 2015 سودانيز أون لاين اساسي - مكتبتي في سودانيزاونلاين
لما كنت بصدد اغتنام الفرصة بعد سماع ان الجوازات الالكترونية يمكن استخراجها من قنصلية جدة التي اقيم فيها قبل اكثر من اسبوع .. ولانشغالي في العمل طيلة الفترة هذه فقد قررت ان اذهب الي القنصلية يوم الخميس السابق .. ولكن قبل هذا التوقيت وكما يعلم الجميع فقد انتشر خبر مستخرج الجواز اسعد التاي وما حدث له في القنصلية .. طبعا باصيت الموضوع وقلت خلي الامور تتضح شوية عشان الواحد ما جاهز ولياقته تعبانة طيلة الفترة الماضية . ولكي استعد جيدا لاستخراج الجواز بدأت منذ الثلاثاء الماضي في تمارين لياقة قاسية علها ترفع من معدل اللياقة سريعا وتعينني علي استخراج الجواز والصمود والثبات عند الضرب والبطش والذي اظنه اصبح جزئا اصيلا من رسوم استخراج الجواز وانهاء المعاملات في القنصلية . بعد كل تمرين لياقة قاسي كنت اقود العربة لحوالي نصف ساعة الي حي الكرنتينة واقطع كورتين مديدة دخن وطلبين شية مما يشتهر به ذلك الحي الجداوي ذو الطابع الافريقي السوداني .. وبما ان رسوم الجواز الجديد تبلغ حوالي 540 ريال كما سمعت ..مضاف اليها رسوم غير مباشرة قيمة الاشتراك في الجيم لممارسة تمارين اللياقة وكمال الاجسام بمبلغ 350 ريال للشهر وقيمة شراء الشية والمديدة لاسبوع 250 ريال وبنزين مشاوير الكرنتينة قول 100 ريال الحسبة بقت تقريبا 1240 ريال من اجل استخراج الجواز الجديد علي يقين ان الاخوة في بورداب جدة لن يخزلوني في هذا الوقت العصيب وعملا بالمبدا الاسلامي ( تعاونوا علي البر والتقوى) كنت اتمني منهم ان يعينوني بعصبة من اشداء بورداب جدة للوقوف معي في هذا المازق التاريخي لاستخراج الجواز من قنصلية جدة الباطشة الضاربة بيد من حديد .. الان الخوف كل الخوف ان اتدقا انا وعصبتي ويقطعوا لي جوازي القديم في راصي اظنني ما زلت بحاجة الي التمارين القاسية لذا فقد مددت الذهاب الي القنصلية الي نهاية الاسبوع لاستفيد من تلك التمارين فانها ان لم تفدني في القتال من اجل جوازي الجديد فانا علي يقين انها لن تخزلني في الجري ان استدعي الامر .
|
|
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: يوسف الطيب احمد إدريس)
|
يا أساسي
ما اظن حد يقدر يمد يده عليك
بعدين الناس ديل دقصوا مع أسعد التاي .. ما اي زول بيقدروا يمدوا يدهم عليه
أسعد التاي شكله كان جايي من سفر وما إهتم بالهندام وكدا
لكن أمشي مهندم وإتكلم بثقة وعاين ليهم في عيونهم وإنت بتكلمهم
الحبة دي ما بتجسك \ على العموم جوالي عندك أي تعدي عليك ولا تناقشهم كتير أديني واحد سلك تلقاني معاك
نمارس معاهم الدبلوماسية الشعبية أو كما قيل !
دا غير إنه حالياً هم أصلاً بكونوا في مرحلة ندم من الحصل وهذا هو التيرمومتر البشري يخطأ فيندم وينسى ثم يخطأ
فما أعتقد يكونوا وصلوا مرحلة النسيان عشان كدا بسرعة حصلهم قبل ما ينسوا !
مع تحياتي ودعواتي لكم بالتوفيق
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: اساسي)
|
تحياتى
نصرك الله يا اخى
اوصيك بالآتى :-
1 - احضر معك شاهدين عدلين
2 - انذر القائمين بالامر بالداخل انك اذا لم تخرج سليما معافى في خلال ساعتين من الزمن هناك احد ما سوف يبلغ السلطات باختفاءك د\اخل الجب في ظروف غامضة
3 - لا تحمل هاتفك الاصلى معك والذى بداخله صورك وصور اسرتك واصدقاءك ، احمل هاتف احتياطي واتركه مفتوح
4 - احفظ ملامح من تتعامل معهم بالداخل جيدا واحفظ ما يقال لك واجتهد في حفظ الأسماء
ثم توكل على الله وادخل
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: wadalzain)
|
أساسي يا صديقي الصدوق.. أنصحك في البداية تقرا سلسلة ألغاز رجل المستحيل بتاعت أدهم صبري بتاعت غاص في معدة الأول وتفادى لكمة كانت موجه لفكه العلوي ثم إستدار في كسر من الثانية و ركل الأخير في بطنه قبل أن يهشم رأس ثالث كانت قد عمّ بالهجوم عليه.... بعد داك تتمرن على الجري لأني شايفك متفائل وإتعاملت مع الموضوع على أساس إنك حتصمد للمضاربات دي ..وما تنسى إنقاص الوزن و حفظ زقاقات جدة .. الأهم لو بعد دقوك و قامو إعتذرو ليك إنو غلطو عليك و قالوا ليك ت أها شرب شنو ؟ لإاوووعك تستجيب ليهم ..انا عاارفك نفسك ساقطة وبطنك ما بتقاوم .. تذكر أخي أساسي لا تشرب لا كركدي لا أي مشروب غازي .. ولو ضغطو عليك فأطلب محلبية ميسو بنكهة الفانيليا ..
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: عمر الفاروق)
|
أساسي سلام اسمع نصيحتي دي تشوف الصف وتقيف وتعمل فيها أطرش واعمل فيها رائح من كل شي عند غلط منسوبي السفارة لشخص أمامك اعمل فيها كانك لم تسمع شي ولاتخرج تلفونك تصور الأحداث او تتكلم به حتي لا يترك غلطه لجارك ويتشعلق فيك وكتر من كلمة ياسعادتك وركز علي صغار الموظفين وكتر كلمة أنتم فخر لنا شفت لوعملت بي ده ممكن خلال شهر تستلم مع المواظبة للحضور يوميا (:
---------- التحية للسيد السفير الريح حيدوب في سفارة السودان في كوريا فهو لايشبه هؤلاء الناس
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: usama Babiker)
|
اسمع نصيحتي ،، بلا كرنتينة بلا مديدة دخن بلا بتاع .. وانت داخل على القنصلية بتلقى واحدين واقفين جمب الباب من يشوفوك ود ناس ونضيف كده بندهو ليك: قفا؟ .. قفا؟ تشوف أغلد عنقرة وتتفق معاه ياكل الدق بدلك - بس تتأكد ضهرو نضيف ومافيهو آثار جديدة بتاعة دق (بوريك بعد شوية ليه ضهرو يكون نضيف) .. طبعا الزول ده ما بدقوه شديد لانو منهم وكده بعد يخلصوا منو تقوم تكمل اجراءاتك عادي بس خلي بالك ما تدفع ليهو القروش كلها .. بعد ما تستلم الجواز حتن تدفع ليهو - لانو الموظف عادي ممكن يقول ليك كدي ورينا مكان الضرب عشان نتأكد .. تقوم تجيب الزول ويتأكدو من انو ده ضرب فرش .. ضرب اليوم
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: اساسي)
|
أسس يا جبنة...
كلام القصير مااااا بنسمع..
زمااااان لما حكيت ليكم حكايتنا لما أصدرنا الجواز لإبنتي الكبرى وكيف أنها جعلت الضابط يضحك عندما سألها عن أشهر شخصية في الحلاوين فأجابت: بادي محمد الطيب..
متذكر المعطة دي؟؟
أها الوكت داك كان الرقم الوطني والجواز الإلكتروني شغااااال...
ولما كان استخراج الرقم الوطني ضرورة للتقديم للتعليم العالي والجامعات والكلام دا...أنا قلت أسوق ليك الزوجة الصالحة الصابرة المحتسبة دي وعيالها مرة واحدة ونخلص من الرقم الوطني..
إترصينا ليك زي الورد في الصالة...ودخلنا انتهينا من الرقم الوطني واستلمناهو تاني يوم..
ولما مشيت للإستلام...من باب اللقافة كده قلت أشيل أرانيك الجواز وأعبيها في البيت وأشوف يوم مناسب كده أستأذن وأخم عائلتي وأرجع أواصل إجراءات إصدار الجواز...
حلو؟؟
أها قمنا ظبطنا الحلاقات والتسريحات والذي منه..ومشينا القنصلية..
دخلونا يا يمة وصورونا وبصمونا وعلمونا الصبر الجميل..
وبعد أسبوعين من ذلك التاريخ..كان أي زول من أفراد عائلتي الصغيرة يمتلك جواز إلكتروني زي الورد..
براااااكم تتكاسلوا وتزنقوا روحكم وتجوا تملونا فقر...
الغريبة يجيك واحد ساي كدا بعد ما تقشر عليهو بالجواز الجديد..يقول ليك:
والله سمعنا قالوا الجواز الجديد ده عنده مشكلة في مطارات العالم..
التقول نحن خلااااااص قاعدين نسافر حتة غير الخرطوم...
ومع ذلك ..قلت يا ود أنا أجرب الجواز ده في دبي القريبة دي..
والله ما صادفت أي مشكلة .. والضابط الإماراتي رحب بي بإبتسامة جميلة جداً..
فاللهم لك الحمد لا نحصي ثناءً عليك..
ولا نامت أعين المتكاسلين عن الحق والحق أبلج...
..
كتابة موالية على الريق
..
تحياتي..
.
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: Mahmoud Mustafa Mahmoud)
|
أنت يا سمسم ما عندك نية تدخل التاريخ وتمر على الجغرافيا والهندسة يا عمك لو ما سعلوك كفكف وخش وتعال مارق مدمدم يصوروك للصحافة ومنبر من لا منبر له والفيسبوك والتويتر ووووو على الأقل ممكن تمرق من حتة إنك مناضل ترطيبة وأسافير أي سر وعين الله ترعاك وكدا
الرجاء من الجميع تأييد ودعم المناضل الجسور أس أس في دقته القادمة سر فإنا من خلفك (ما تاخد في خاطرك والنبي أنها بريئة بريئة بريئة والله على ما أقول شهيد)....
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: Mahmoud Mustafa Mahmoud)
|
Quote: علي يقين ان الاخوة في بورداب جدة لن يخزلوني في هذا الوقت العصيب وعملا بالمبدا الاسلامي ( تعاونوا علي البر والتقوى) كنت اتمني منهم ان يعينوني بعصبة من اشداء بورداب جدة للوقوف معي في هذا المازق التاريخي لاستخراج الجواز من قنصلية جدة الباطشة الضاربة بيد من حديد ..
|
نمشي معاك السفارة .... منو ده انا ده .. بري بري بري بري ....
لاكين نديك النصيحة ..
ياعمك البس فنلتك الكت ديك وحمر عيونك لي اي واحد يلاقيك والحبة ما بتجيك...
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: Mahmoud Mustafa Mahmoud)
|
** السمانى . ** سلام وصباحك خير.. ** دعوه للقدوم الى دانة الدنيا وإستخراجه من قُنصلية دُبى ,, بالرُغم من إشتراط الإقامه فى الإمارات لكن بنطلب ليك الإستثناء ولأنهم يتعاملون برُقى وذوق وإحترافيه فلن يُرد لك طلب ..لاعندنا ضرب ولا عندنا فوضى .. ولا حجز صف بخمسميه ... تسجل إسمك ويتم تحديد يوم لك وإذا تقدمت مايفيد بإستعجالك لسفرك فى مهمه الى أوربا أو إى أمر يتعلق بمهام تتعلق بتجديد إقامه ,, تجد من الموجدين من يتنازل لك عن دوره بكل أريحيه ,,, لانها دبى المُميزه فنحمد الله أن يسر لينا موظفيين مُميزين ,, لافيهم مُصارع ولا فيهم مُلاكم ولا بتاع جودو..
(ودام الود والإحترام بين الراعى والرعيه) (ابو محمد فؤاد) - الماكيكى..
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: Mahmoud Mustafa Mahmoud)
|
يا جماعة الجواز الإليكتروني أخبارو شنو ؟ بدأت رحلة الشمشمة بهذا السؤال ..... جاتني الإجابات ..... والله زحمة لمنت غلط ..... ياأخي الصف يبدأ الساعة 3 صباحا ... فوسوست لي نفسي .... طيب الواحد يعمل شنو؟ ينزل يعملوا في السودان والا يشوف ليهو واسطة .... يا أخي مالوا دايما نحن أورنا كدة أي حاجة مهما كانت بسيطة لازم تجاهد فيها عشان تتحصل عليها .... فجأة أتذكر أن زميلنا عبدالمتعال عندو واحد معرفة من ناس الأمن يعمل في القنصلية .... طوالي طربت ليهو بشفقة ... يا متعال ياأخي زولكم الفي القنصلية موجود؟ جات الإجابة سريعة والله موجود لكن أنا كم يوم قاعد أتصل عليهو مطنشني .... يا حسرة رجعنا تاني للمربع الأول ..... الواحد يعمل شنو ..... والغريبة كل هذا الخوف والتوجس ولم أسمع بضرب الراجل حتي حينه ..... دي معقولة طيب أنت لو سمعت بدقة أسعد التاي .... كنت عملت شنو ؟ المهم وأنا أنحس حظي وأقطع حسرة عدم إمكانية الحصول علي جواز إليكتروني جديد بدون معاناة في حناني ... قلت يا أخي بتاع ناس قريعتي راحت ده ممكن يفيدني في حاجة، لأنو شكلوا كده مصاقر القنصلية وقاعد للناس ديل في حلقم .... يعني ممكن يكون هارشهم شوية .... عم عبدالوهاب الجواز الإليكتروني أخبارو شنو؟ والله الموضوع ساهل جدا أنا الآن جاي من السفارة ... أنت عندك رقم وطني.... آآآى ؟ .... الله الله فرجت فرجت .... المطلوب شنو طيب ؟ صورتين + صورة جوازك والرقم الوطني + صورة جواز الشاهد مع رقمه الوطني . ...... يا أخي فشلت غزوتي الأولي الي السفارة .... ببساطة وصلت الساعة 9 صباحا .... قالوا الطلبات كملت .... توسلت الطابط قال لي مافي أي طريقة أي تجي بكرة ..... لاحظت أن هنالك أشخاص كثر في مثل حالتي .. أقرب واحد قال لي يا أخي الضابط ده قام من محلو دى وأدا واحد بيعرفو أورنيك .... قلت ليهو ما يسمعك يقوم يقول تعالوا بعد شهر ..... ههههه وده حاتي ده ما سمعت بقصة أسعد التاي .... الله يعينك يا أساسي
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: اساسي)
|
يا أخوانا وبعيد من الهزل والتريقة والمسخرة مما حدث وقد قيل شر البلية ما يضحك ولأنه لا يتصور أن يتم هذا التعدي وتلك الإنتهاكات من منسوبي جهة دبلوماسية على مستوى قنصلية ... ولا يتصور كل هذا الإذلال الذي تعرض له سعد من قنصلية وطاقمها .. مما يبين أن هؤلاء شرذمة وطقمة مشوهين ولا يحملون من صفات الإنسانية أي ملمح وقديماً قيل : وضع الندى في موضع السيف مضر كوضع السيف في موضع الندى
يعني نقاش وكلام من شاكلة ما أوردته أن هؤلاء مجرد مشوهين ,انهم لا إنسانيين و و و كده ما ينفع هنا ... فيا ناس جدة أليس فيكم نفر رشيد أوليس فيكم من غلى دمه وحدث نفسه بالإقتصاص لهذا السعد البريئ ؟ الموضوع ده ووبساطة لو من ملايين سودانيي جدة إتلموا 10 فقط من أخوان عزة ودخلوا على ناس القنصلية ديل وقفلوا الباب وراهم ونضفوهم من طرف ...! تفتكروا واحد من الخنازير ديل أو أشباههم ح يفكر مجرد فكرة إنو يتصرف أي تصرف غير لائق لأي بني أدم تاني .؟؟
على الاقل داوني بالتي كانت هي الداء .. والأسلوب ده هو المفروض يتبع مع كل النوعية دي في كل المرافق ومفاصل ما تبقى من دولة ....
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: الهادي ابوبكر)
|
Quote: علي يقين ان الاخوة في بورداب جدة لن يخزلوني في هذا الوقت العصيب وعملا بالمبدا الاسلامي ( تعاونوا علي البر والتقوى) كنت اتمني منهم ان يعينوني بعصبة من اشداء بورداب جدة للوقوف معي في هذا المازق التاريخي لاستخراج الجواز من قنصلية جدة الباطشة الضاربة بيد من حديد .. |
سلام يا إسو أخوك والله اليومين ديل لياقتو تعبانة شديد وما بقدر على الشلاليت والكفوف فمعذرة لتلبية طلبكم الغالي وبعد التشاور مع بورداب جدة تم عقد لجنة مصغرة لنصرة ( الهامة ) أساسي وقد تقرر الآتي : ــ * نسبة لصعوبة المهمة والتي تحتاج لأشخاص يتمتعون بمهارات قتالية عالية ومشهود لهم بالكفاءة في هذا المجال وبعد التداول والتمحيص فقد وقع الإختيار على الآتية أسماءهم :ـ 1/ الرفاعي حجر عبد العاطي 2/ الهادي عبد الله ( وطني ) 3/ صديق رحمة النور وتحوطاً لأي طارئ في حال تكالب الأعداء على الفريق إعلاه فقد تم تكوين لجنة طوارئ للدعم والمساندة على أن ترابط بالقرب من موقع الحدث وتكون رهن إشارة الفريق الأول حال طلب النجدة والإستغاثة وفق شفرة معينة تم الإتفاق عليها واللجنة مكونة من ـ 1 ـ م أحمد التجاني 2/ نور الدين الفحل 3/ عبد العزيز الكنزي 4/ معاوية عبيد الصائم
مع خالص تمنياتي بالتوفيق للجميع والله الموفق
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: Abureesh)
|
شكرا ليكم جـــــت عليكم وعلي مقترحاتكم من اجل سلامتنا
لسع ملاوز من المشية بفكر انتظر لجنة التحقيق بتاعة وزارة الخارجية وازامن مشيتي لاستخراج الجواز معاها لانهم بيكونوا الوقت داك مساكين
كمان واحد صاحبنا امس نصحني بالاضافة لمديدة الدخن والشية في محل عصائر الطاقة العجيب بيعمل عصير ( عرائسي ) ( للعرسان يعني ) من 16 نوع فاكهة مخلوط بعجوة التمر وعسل السدر الاصلي وعليهو مكسرات وحليب مكثف محلي ..قلت امش اخد لي منو كم كباية كدا تحسبا
ياخ الحكاية دي ما بقت استخراج جواز اني مور ... دا نفاس عديل
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة جدة للجواز الالكتروني (Re: اساسي)
|
Quote: كمان واحد صاحبنا امس نصحني بالاضافة لمديدة الدخن والشية في محل عصائر الطاقة العجيب بيعمل عصير ( عرائسي ) ( للعرسان يعني ) من 16 نوع فاكهة مخلوط بعجوة التمر وعسل السدر الاصلي وعليهو مكسرات وحليب مكثف محلي ..قلت امش اخد لي منو كم كباية كدا تحسبا |
دا صديق جاهل داير يجيب ليك تصلب شرايين
اشتري العصير وقدمو هدية للقنصل
| |
|
|
|
|
|
|
Re: ادعوا لاخوكم بالثبات فانا ذاهب الي قنصيلة (Re: Ahmed Khalil)
|
Quote: ملاحيظ: اسعد التاي قليل ادب...ناس السفارة تعاملهم معه كان خطا... اسعد التاي مفروض السفارة تجدعو لناس امن البعثات الدبلوماسية القاعدين في الدوريات جنب بوابة القنصلية..
التاي كان قليل ادب شديد خالص.. |
** يابشير احمد .. ** سلام ,, ومساءك خير .. ** يامــؤدب بأدب الإنقاذ .. ما الذى تعرفه عن أســـــــعــــــد التاى حتى توصفه بكلامك القمئ أعلاه والذى يشبه التنظيم الذى تُدافع عنه بالباطل دائماً ... حتى لايذهب خيالك المريض المُتشرب بأدب الفساد والإفساد الذى تُدافع عنه ... أسعد التاى والده كان من العشره الداعميين للاخوان المسلمين عندما كان مُسماها (جبهة الميثاق) (بابكر عمر التاى) وكان من الداعميين للإنتكاس التى مازالت تكتم الأنفاس ,, وإبتعد ونأى عنها عندما أصبحت تلم الهوامل والفاقد التربوى وأنصاف المتعلمين واصحاب الأيادى الخفيفه ..
() الذى ةصفته ووصمته بقلة الأدب يمكنك أن تسأل عن أُسرته إى شخص تعرفه من ود عشيب أو إى قريه فى شمال شرق الجزيره () () مُهندس ناجح ... وضابط قوات مُسلحه "تم تسريحه من الخدمه" لانه قال كلمة حق وسُجن فيها 6 أشهر بسجن كوبر() () ولأننى لا اعرفك إلا من خلال كتاباتك فى هذا الحوش .. والتى تُشابه إعتقادك فى العصابه الفاسده ,, فلا يمكننى أن اوصفك أو أوصمك بأنك مؤدب أو غير مؤدب .. بل حسن النيه يفرض على إننى أتعامل مع شخص مُتعلم ميزه الله عن الأُميين والجهله بالعقل وإختيار مايطبعه بأنامله من عبارات وكلمات .. () وأخيراً اقول لك وعلى لسان عمه (مبارك التاى) صديقى والذى أعرفه من ثلاثين عاماً لو وزع أدب أســـعـــد الــتــاى على مجموعه من البشر فى إى قريه نائيه أو مدينه لكفاها وزاد..
(ودام الود والإحترام بين الجميع)
| |
|
|
|
|
|
|
|