Post: #1
Title: بالله - بالمنطق كده (قصيدة جديدة للشاعر عبد القادر الكتيابي)
Author: امجد الجميعابى
Date: 03-07-2015, 07:15 PM
06:15 PM Mar, 07 2015
سودانيز أون لاين
امجد الجميعابى -
مكتبتي في سودانيزاونلاين
بالله - بالمنطق كده :
سوداني -
ولدة والدين معقود عليهم في المسيد
بالفاتحة و الناس شاهدين
سوداني
جاي من العدم - ب ( الله لي ) -
لجوهو باسم الله - بأذان على سمعه اليمين
و أقامو ليهو صلاة جنازتو على الشمال
بفطرة الحق و اليقين
و اتربى جسمو من الحلال
بين الكرام الطيبين
بالله بالمنطق كده :
دعوة شنو الداعينو ليها كأنو ما كان عنده دين !!
ورونا بس مين انتو ؟ من أية سما
و أخوان منو ؟
أخوانا نحن المسلمين ؟
إسلامنا ذاااتو الفي الكتاب ؟
القالو رب العالمين ؟
و اسم نفس اسم لكن بتقصدوا تاني دين !!!
ورونا بالواضح كده :
كان انتو - كان فقها الملوك - كان المجوس المشركين
ما سمعتوا بسيرة النبي ؟؟ ( اللهم صل علي الحبيب )
يوم قالوا ليهو :
( إذا أردت الملك أو ما ) .. أبى
ما سمعتو بخلقه العظيم ؟
في السور
في الخطب في المديح ؟
ما سمعتو ادع إلى سبيل ؟
ما سمعتو لنت لهم و رؤف رحيم ؟
ورونا بس يا فتنة الزمن اخير
ورونا بس -
مين انتو ؟ من أية سما ؟
و اخوان منو ؟
أنصار منو و عبدة شنو ؟
و من ياتو ملة و ياتو دين ؟؟؟
عبد القادر الكتيابي
|
Post: #2
Title: Re: بالله - بالمنطق كده (قصيدة جديدة للشاعر عبد القادر الكتيابي)
Author: امجد الجميعابى
Date: 03-07-2015, 07:19 PM
Parent: #1
منقولة من صفحة الاخ و الصديق دكتور سعد عبد القادر العاقب من الفيسبوك و ادناه ما كتبه دكتور سعد
| Quote: وصلتني هذه المقطوعة الشعرية اليوم من صديقى الأستاذ الشاعر عبدالقادر الكتيابي كتابة وصوتا في الواتس أب |
|
|