حَكّامْةُ امْ كِيكِي ..للشاعر محمد المهدي عبد الوهاب ( ود المهدي) ستحدث نقلة نوعية لدور الحكامة

12:46 PM Mar, 01 2015
سودانيز أون لاين
عفاف ابوكشوه - ام د رمان
مكتبتي في سودانيزاونلاين



التحية والإحترام
للأستاذ ود المهدي .. الصحفي والشاعر المرهف المهموم بقضايا الوطن .
قصيدة جديرة ..بالتوقف عندها ... بالتأكيد ستحدث نقلة نوعية ...لدور الحكامة
من دور محرض للفرسان في تأجيج الحروب ..الي دور إيجابي
يدعم نشر ثقافة السلام ..ونأمل أن يتم تلحينها وتري النور قريبا ..
لحوجتنا لها في هذه المرحلة الحرجة التي تمر بها بلادنا .

.حَكّامْةُ امْ كِيكِي
محمد المهدي عبد الوهاب
--------------------------------
ليلكْ بَهِيمْ
إغَالبْ صَرِيخَك فَقْدْ القريبْ
تعاين دواخلكْ
تكوس لي حبيبْ وتلك الأماكنْ،
وما تَلقى ساكنْ غيرْ النحيبْ
ْْْْْْْْ
غريبة الدارْ
مَغبّرة كاتمةْ
صانّةْ كالجَبّانة
تهاتي بالعِينة اْمْ بروقْ
في رَجا المطرْ الصّبيبْ
هَدَاْ ليلْهَا وَدّرْ بهجتو الطربَانةْ
لا أكلنْ طعيمْ
لا بالنْ إروقْ
لا زُوجَنْ لزيمْ
لا جنيات اِطمبرو لا بَنّوتْ إقوقنْ
لا طبْلَنْ رزيمْ
--------------
علّمَني اْمَاتي
مِنْ بقيتا بِنَيْ
أغني للحرابة
اِزَغْرتَنْ جاراتي
لي أبُويَا وِاْخَيْ
وَنَا واقفة لي فُرْسَاني:
ما في زول يَغَشَانِي
ما يتاوق لَيْ
أو يْدقْ بيباني..
إلا بعد الهَبْرةْ
------------
جو العيال اجتمعوا
قَجُّوا الكلاشْ للتارْ
فارقونا دْغيشْ
شدّو خيلُم فزعوا
زي بِريقْ ياخْواتي
مِتِلْ سِلاحُنْ لمعوا
قام عجاجُنْ ديشْ
فِضِلت أندَهْ وأندَهْ
للعامرة بيهم دارنا
وُحالي لينا العيشْ.....
لكن قُلالْ الرّجَعو
ْْْْْْْْْْ
يا الله يا منّان
ليكَ بشرح قصدي:
الحرابة تغور
نرجع نصطلح
بالحُسنَى ما بالزِندِي
الخراب ده إِفُوتْ
اِتفاهمو الحِبّانْ
تتناغمْ الأمّاتْ
اِحِلْ علينا أمانْ
إِجو فريق ناس فوقْ
اُنَاسْ الفريقْ التحتو
جملةً فرحانين...
أمُرْقِي يالقَمْرَهْ
جوكي الشبابْ ناقزينْ
ْْْْْْْْْْ
شُوفُولِي ناسْ عوضيةْ
نادوها حدّ الزينْ
"وِنْتِي يا رِقَيّةْ
رِقَيّةْ بتَ أهلنا...
أم شعراً مَتَنّى"
قُوميلا يالصِفيرهْ
يَمْ دَمْعَتَنْ مِطيرهْ
"قَشّايتي يالخِديرةْ ..
بَفِرِكي وبَطويكي
بَشوفْ شبابي الفيكي
شبابي نورْ الوادي
يا حمرةْ امْ بوادي"
هـَ ديلْ عيالنا اليُفّعْ
بَدَالْ إضُرْبُو المُدفعْ
دايرين إضُرْبُو اْمْ كيكي
==========
جيرانَا صالحونا
شدّو الرِّكابْ قَصَدونَا
نضبحلهُن كرامة
كرامة للسلام
كرامة للسلامة
.. اِبْقَا فَاضِلْ قولِي ليكِ
إخَيّتِيْ الحكامة:
حَكّامَة يا حَكّامَة
حِكْمَةْ تْحَكِّم الرّايْ السديدْ
كانْ في الجُبالْ كان في الغَرِبْ/ كان في الجنوبْ كان في الشّرِقْ/
كان في الشمال أو في الصعيدْ/
تِعبت الروحْ المَقَنْطَرةْ للهلاكْ
قوم يا مَلاكْ الرّحمةْ بشِّرْ بالجديد
وابقَ دوباي للعمل
....
العملْ عند الأهلْ
الأهلْ عايزين أملْ
الأمَلْ جُوهْ القلوبْ
القلوب دايرهْ الوئامْ
الوئامْ دايرْ السلامْ
السلامْ دايرَ الضَرِعْ
الضرع دايرَ الزرعْ
الزرعْ دايرَ المطرْ
والمطرْ حق الجميع
المطر خير للجميع
--------
مَغْرَبتْ والطير سكتْ
لي عُشو آبْ
شوقي غوّر
إلا بيتي بشوفو نوّر
بعدما شال السحاب
والقِبْلِي دوّرْ
وجاني من قالْ طه زولِكْ..
عالي بَنْبَرو في مجالسْ
الاصطلاحْ
واْقْوى من قالْ..
زي حميد:
"أرضاً سلاح
أرضاً سلاحْ"
وفوكَا زاد:
ما بْندُورْ "صقارا حام"
فوقْ جماجمْ الانتقامْ
وتملّي زاد:
سوقني محل ما الحبيبة
قريبة تراعي الغرام
غريبة الأشواق حبيبة
يجيبا منام في منامْ"

جلسة ميلاد القصيدة ..في حضرة شاعر الإنسانيه القدال
بمنزل الاصدقاء نجوي دفع الله ومصطفي آدم ..
مساء الجمعة 6 فبراير 2015 - الشارقة -
تصوير ..الفنان عثمان تراث

ياسلام ياعفاف ليك وللصديق ود المهدى. ده الكلام ياصحاب. يجب ان نؤسس لثقافة السلام

جيرانَا صالحوناQuote
شدّو الرِّكابْ قَصَدونَا
نضبحلهُن كرامة
كرامة للسلام
كرامة للسلامة

اهلا يا مراحب
أستاذ المعز ابو نوره
وشكرا علي المرور الجميل
فلتتستع دائرة تأسيس ثقافة السلام
وحقيقة نحن أحوج اليها الآن
ومازالت الحروب مشتعلة في
أجزاء عزيزة من الوطن الجريح
وهنالك تيار كبير يؤجج نيران الحروب
بنشر ثقافة الحرب
مودتي وإحترامي
ونواصل

الشعراء هم أكثر الناس مقدرة على الحلم
بوطن حر ديموقراطي
تسود فيه ثاقة السلام والمحبة
حتى لو لم يجدوا فضاء رحبا لتحقيقه
في سياق ثقافة الحروب السائدة
التي تحاصر المجتمع السوداني
وعبر الأجهزة الإعلامية المملوكة للحكومة
لذلك نحن أحوج ما نكون الآن الي مبدعيين
خلاقيين يقومون بتأسيس
ثقافة السلام من خلال الشعر
والموسيقي والمسرح والإعلام
وكافة ضروب المعرفة ... وذلك
لتغيير ثقافة الحرب السائدة
ونشر ثاقفة السلام
التي توطد دعائم
السلم اإلإجتماعي
واالحرية والديمقراطية
ونواصل

السلام لود المهدي الشاعر النبيل
والتحية لشدوه الجميل في شأن السلام
ويا حكامة أم كيكي السلام جاييكي

مراااحب
استاذ ناصر
وشكرا علي المرور الجميل
مودتي

Quote: جو العيال اجتمعوا قَجُّوا الكلاشْ للتارْ فارقونا دْغيشْ شدّو خيلُم فزعوا زي بِريقْ ياخْواتي مِتِلْ سِلاحُنْ لمعوا قام عجاجُنْ ديشْ فِضِلت أندَهْ وأندَهْ للعامرة بيهم دارنا وُحالي لينا العيشْ..... لكن قُلالْ الرّجَعو

تحياتي أستاذة عفاف وعبرك للشاعر ود المهدي..
ديل أهلي البقيف في الدارة وسط الدارة واتنبر.....
والجايي أحلى.